རྒྱ་ནག་དམག་མི་དང་ཉེན་རྟོག་པས་ཡུལ་ཤུལ་ཆུ་དམར་ལེབ་རྫོང་དང་། གཅན་ཚ་རྫོང་བཅས་སུ་བོད་མི་ཚོར་གང་བྱུང་གཅར་རྡུང་བཏང་སྟེ་སྨན་ཁང་དུ་མྱུར་སྐྱོབ་བྱེད་ཀྱིན་པའི་གནས་ཚུལ་བྱུང་འདུག
སུད་སུ་གནས་སྡོད་ནགས་མགོ་འཇིགས་མེད་ལགས་ཀྱིས་འདི་གར་གནས་ཚུལ་ངོ་སྤྲོད་གནང་བ་ལྟར་ན། ཟླ་འདིའི་ཚེས་ ༢༢ ཉིན་གྱི་དགོང་མོ་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོང་ཁུལ་ཆུ་དམར་ལེབ་རྫོང་དུ། རྫོང་ཐོག་ཏུ་ཡོད་པའི་དམག་མི་ ༣༠ ལྷག་གིས་ཆང་འཐུང་རྗེས་རྫོང་གི་ཁྲོམ་གཞུང་དུ་བོད་པའི་གཞོན་སྐྱེས་ ༤ ལ་རུབ་རྡུང་བྱས་ཏེ། གཞོན་སྐྱེས་གཅིག་ཛ་དྲག་གི་གནས་སྟངས་འོག་སྨན་ཁང་དུ་མྱུར་སྐྱོབ་སྨན་བཅོས་བྱེད་ཀྱི་ཡོད་པ་དང་། གཞན་གསུམ་གྱི་ལུས་སྟེང་ལ་རྨ་ཁ་ཚབས་ཆེན་བཟོས་ཡོད་འདུག
དེ་བཞིན། ཟླ་འདིའི་ཚེས་ ༡༡ ཉིན་རྨ་ལྷོ་ཁུལ་གཅན་ཚ་རྫོང་མར་ཁུ་ཐང་གྲོང་རྡལ་དུ། ༢༠༡༤ ལོའི་རྒྱལ་སྤྱིའི་མི་རིགས་སྲོལ་རྒྱུན་མདའ་རྩལ་འགྲན་ཚོགས་དང་། མདའ་སྟོན་རིག་གནས་དུས་ཆེན་སྐབས་གསུམ་པ་ཚོགས་ཡོད་པའི་ཉིན་གཉིས་པའི་དགོང་མོ། ལྟད་མོ་བ་ཚོས་མདའ་རྩེད་ཐང་ཆེན་དུ་དགོངས་ཚོགས་གསོལ་ཚིགས་ཀྱི་སྐབས་སུ། རྫོང་གི་ཉེན་རྟོག་པ་ཁག་ཅིག་ར་བཟི་རྗེས་ཚོགས་རར་ཡོང་སྟེ། དེར་ཡོད་མི་མང་གིས་ཁོང་ཚོར་ཆང་མ་དྲངས་ཚེ་ལས་འགུལ་སྔོན་ལ་མཇུག་སྒྲིལ་འཇུག་རྒྱུའི་ཉེན་བརྡ་བཏང་འདུག
སྐབས་དེར་གཅན་ཚ་རྫོང་གི་ཚོང་བ་དབང་ཕྱུག་ཞུ་བའི་ཕུ་བོས་ཉེན་རྟོག་པར། བྱེད་སྟངས་དེ་རྒྱ་ནག་གི་བཅའ་ཁྲིམས་གང་དུ་བཀོད་ཡོད་མེད་དང་། མི་མང་དཀྱུས་མ་ཚོས་སོ་སོའི་དངུལ་གྱིས་ཟ་མ་ཟ་བཞིན་པ་དེ་ཁྲིམས་འགལ་ཡིན་མིན་སོགས་དོགས་འདྲི་བྱེད་པར། ཉེན་རྟོག་པས་ཁོ་བཙན་དབང་གིས་ཉེན་རྟོག་རླངས་འཁོར་ནང་འཁྲིད་ཡོད་པ་མ་ཟད། དེར་བར་འདུམ་བྱེད་མཁན་ཚོང་བ་དབང་ཕྱུག་དང་བ་ཡན་རྫོང་ནས་ཡོང་བའི་བསྟན་འཛིན་རིན་ཆེན་ཞུ་བ་གཉིས་ཀྱང་བཙན་འཁྲིད་བྱས་ཡོད་འདུག ཁོང་གསུམ་གཅན་ཚ་རྫོང་ལྟ་སྲུང་ཁང་དུ་འཁྲིད་པའི་ལམ་བར་དུ་ཉེན་རྟོག་པ་ ༢༠ ལྷག་གིས་གཅར་རྡུང་དང་། ཉིན་དེའི་དགོང་མོ་ཉེན་རྟོག་པ་ ༨ ཀྱིས་ཆང་འཐུང་ཞོར་དུ་ཆང་གི་ཤེལ་དམ་གྱིས་ཁོང་ཚོའི་རྩིབ་རུས་དང་པུ་མོའི་ཐོག་གཞུས་ཡོད་འདུག
ཚེས་ ༡༢ ཉིན་གྱི་ཞོགས་པར་ལྟ་སྲུང་ཁང་གི་ཉེན་རྟོག་པས་བསྟན་འཛིན་རིན་ཆེན་སར་འགྱེལ་ཏེ་གནས་སྟངས་ཛ་དྲག་ཡིན་པ་མཐོང་རྗེས་རྨ་ལྷོ་ཁུལ་སྨན་ཁང་དུ་བསྐྱལ་ཡོད་པ་དང་། ཚེས་ ༡༣ ཉིན་ཟི་ལིང་རྒྱ་གྲམ་དམར་པོའི་སྨན་ཁང་དུ་འཁྲིད་ཡོད་འདུག སྐབས་དེར་བརྟག་དཔྱད་བྱེད་སྐབས་རྩིབ་རུས་དྲུག་བཅག་ཡོད་པ་ཤེས་རྟོགས་བྱུང་སྟེ་བདུན་ཕྲག་གཅིག་རིང་སྨན་བཅོས་བྱས་ཡོད་འདུག ཚེས་ ༢༠ ཉིན་གཅན་ཚ་རྫོང་གི་ཉེན་རྟོག་པ་གློ་བུར་ཡོང་སྟེ་ཟི་ལིང་ནས་ཕྱིར་གཅན་ཚ་རྫོང་སྨན་ཁང་དུ་འཁྲིད་དེ་སྨན་བཅོས་བྱེད་ཀྱི་ཡོད་འདུག ཁོང་གིས་ཟ་མ་ཟ་མི་ཐུབ་པ་དང་སྐད་ཆ་བཤད་མི་ཐུབ་ཀྱི་མེད་པར་ཛ་དྲག་གི་གནས་སུ་གྱར་ཡོད་འདུག
ཚེས་ ༢༡ ཉིན་ཉེན་རྟོག་པས་ནང་མིར་ཁོ་རང་ཁྱིམ་དུ་འཁྲིད་དེ་སྨན་བཅོས་བྱེད་དགོས་པའི་བརྡ་སྤྲད་ཡོད་འདུག་ཀྱང་། དེའི་ཡང་སྔོན་དུ་ནང་མི་ཉེ་འབྲེལ་ཚོས་ཁོང་ཚོའི་སྐོར་སྐད་ཆ་དྲིས་སྐབས། ཁོང་ཚོ་ཀློད་གྲོལ་བཏང་ཡོད་ཚུལ་ལས་སྨན་ཁང་དུ་འཁྲིད་དེ་སྨན་བཅོས་བྱེད་ཀྱི་ཡོད་སྐོར་གསལ་བོ་བརྗོད་མེད་སྟབས། ནང་མི་ཉེ་འབྲེལ་ཚོས་ངོས་ལེན་བྱེད་ཀྱི་མེད་པར། ཉེན་རྟོག་ཕྱོགས་ནས་བསྟན་འཛིན་རིན་ཆེན་ཞིང་ཆེན་སྨན་ཁང་དུ་བསྐྱལ་ཏེ་སྨན་བཅོས་བྱེད་དགོས་ཚུལ་དང་། གཅར་རྡུང་བྱེད་མཁན་གྱི་ཉེན་རྟོག་པ་ཚོར་ཁྲིམས་ཆད་གཅོད་དགོས་པའི་དགོས་འདུན་འདོན་བཞིན་ཡོད་འདུག
གསར་འགོད་པ། དོན་གོ
སྙིང་རྗེ་བོད་མི་དེ་དག་ལ་