བོད་རིགས་ཚོགས་པ་ཚོ་བཙན་བྱོལ་བོད་མིའི་བཅའ་ཁྲིམས་འོག་འཇུག་དགོས་སམ།

སྤྱི་འཐུས་ལྷན་ཚོགས་ཀྱིས་ཕྱི་རྒྱལ་ཁག་གི་བོད་རིགས་ཚོགས་པ་དང་བོད་རིགས་སྤྱི་མཐུན་ཚོགས་པ་རྣམས་བཙན་བྱོལ་བོད་མིའི་བཅའ་ཁྲིམས་ཀྱི་སྒྲོམ་གཞིའི་འོག་འཇུག་དགོས་མིན་ལ་ཞིབ་འཇུག་ཚོགས་ཆུང་བཙུགས་ཏེ་དགོངས་འཆར་བསྡུས་མཐར། སྔར་རྒྱུན་བཞིན་འཇོག་རྒྱུ་དང་བོད་རིགས་ཚོགས་པ་ཚོས་དོན་གཅོད་ལ་འབྲེལ་ལམ་སྔར་ལྷག་བྱེད་དགོས་པའི་གྲོས་ཆོད་བཞག་སོང་།

གཟའ་མིག་མར་ཉིན། བོད་མི་མང་སྤྱི་འཐུས་གྲོས་ཚོགས་ནང་། དེ་སྔོན་སྤྱི་འཐུས་རྒྱུན་ལས་ཀྱིས་ཚོགས་ཆུང་བཙུགས་ཏེ། ཕྱི་རྒྱལ་ཁག་གི་བོད་རིགས་ཚོགས་པ་དང་བོད་རིགས་སྤྱི་མཐུན་ཚོགས་པ་ཁག་བཙན་བྱོལ་བོད་མིའི་བཅའ་ཁྲིམས་འོག་བཅུག་དགོས་མིན་ཞིབ་འཇུག་བྱས་པའི་སྙན་ཐོ་གྲོས་ཚོགས་ནང་སྒྲོགས་སྦྱང་གནང་བའི་ཐོག སྤྱི་འཐུས་མང་པོ་ཞིག་གིས་བགྲོ་གླེང་གནང་མཐར་ཚེས་ ༢༤ ཉིན་གྲོས་ཆོད་ཅིག་བཞག་སྟེ། ཕྱི་རྒྱལ་བོད་རིགས་ཚོགས་པ་དང་བོད་རིགས་སྤྱི་མཐུན་ཚོགས་པ་ཁག་གི་འགྲོ་སྟངས་སྔར་རྒྱུན་བཞིན་གནས་རྒྱུ་དང་། ཕྱི་རྒྱལ་སྐུ་ཚབ་དོན་གཅོད་ཁག་དང་འབྲེལ་ལམ་སྔར་ལྷག་གོང་འཕེལ་གཏོང་དགོས་པ་བཅས་སྤྱི་མོས་གཏན་འབེབས་གནང་སོང་།

དེ་ནི་སྔར་ལོའི་ཕྱི་ཟླ་ ༤ ཚེས་ ༢༣ ཉིན་སྤྱི་འཐུས་རྒྱུན་ལས་ཀྱིས་ཕྱི་རྒྱལ་བོད་རིགས་ཚོགས་པ་ཁག་བཙན་བྱོལ་བོད་མིའི་བཅའ་སྒྲིག་གི་སྒྲོམ་གཞིའི་ནང་བཅུག་དགོས་མིན་ཐད་མི་ ༥ ལས་གྲུབ་པའི་ཞིབ་འཇུག་ཚོགས་ཆུང་ཞིག་བཙུགས་ཏེ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་བརྒྱུད་རྒྱ་བལ་འབྲུག་གསུམ་ཕུད་ཕྱི་རྒྱལ་ཁག་གི་བོད་རིགས་ཚོགས་པ་དང་བོད་རིགས་སྤྱི་མཐུན་ཚོགས་པ་ཁག་ལ་དགོངས་འཆར་བསྡུས་ཡོད་འདུག

ད་ལོའི་ཕྱི་ཟླ་ ༨ ཚེས་ ༡༣ ཉིན་ཕྱི་རྒྱལ་བོད་རིགས་ཚོགས་པ་ ༡༤ ཙམ་གྱིས་བསམ་འཆར་ཡིག་ཐོག་ནས་འབྱོར་བའི་ནང་། ཚོགས་པ་ ༨ ཙམ་གྱིས་གནས་ཡུལ་རྒྱལ་ཁབ་ལ་དེབ་སྐྱེལ་བྱས་ཡོད་སྟབས་དེ་ལ་དོ་ཕོག་མི་འགྲོ་བའི་ཆེད་དང་། ཚོགས་པ་སོ་སོའི་སྒྲིག་གཞིའི་ནང་བོད་མིའི་སྒྲིག་འཛུགས་ཀྱི་ལམ་སྟོན་ལ་བརྩི་བཀུར་ཞུ་རྒྱུ་འཁོད་ཡོད་པ་བཅས་ལ་བརྟེན་ཏེ། སྔར་རྒྱུན་བཞིན་གནས་ལ་ལེགས་པའི་དགོངས་འཆར་བཏོན་ཡོད་པ་དང་། ཚོགས་པ་ ༦ ཙམ་གྱིས་བཙན་བྱོལ་བོད་མིའི་བཅའ་སྒྲིག་གི་ཆ་རྐྱེན་འོག་ཆ་རྐྱེན་བསྐྲུན་ན་ལེགས་པའི་དགོངས་ཚུལ་གསུངས་ཡོད་འདུག

སྤྱི་འཐུས་རྒྱུན་ལས་ཀྱི་ཞིབ་འཇུག་ཚོགས་ཆུང་ནས་ཀྱང་ཚོགས་པ་དེ་དག་གི་འོས་བསྡུའི་མཚོན་པའི་ལས་དོན་འགའ་རེའི་ཐོག་འགྲོ་གྲོན་ཆེན་པོ་ཡོང་ཉེན་བཅས་ལ་བརྟེན་ཏེ། མཐའ་མར་ཚོགས་པ་དེ་དག་བཅའ་ཁྲིགས་འོག་ཆ་རྐྱེན་སྐྲུན་མི་དགོས་བར་སྔར་རྒྱུན་བཞིན་གནས་ན་ལེགས་པ་དང་། བོད་རིགས་ཚོགས་པ་ཁག་དང་ཕྱི་རྒྱལ་སྐུ་ཚབ་དོན་གཅོད་ཁག་གི་བར་འབྲེལ་ལམ་སྔར་ལྷག་ཡོང་དགོས་པ་ཚུལ་སོགས་སྙན་ཐོ་དེའི་ནང་འཁོད་འདུག

སྤྱི་འཐུས་རྒྱུན་ལས་ཀྱི་ཞིབ་འཇུག་སྙན་ཐོ་དེ་གྲོས་ཚོགས་ནང་སྒྲོགས་སྦྱང་གནང་རྗེས། བྱང་ཨ་རིའི་སྤྱི་འཐུས་བཀྲ་ཤིས་རྣམ་རྒྱལ་ལགས་ཀྱིས་བརྗོད་དོན། རང་ཉིད་ཀྱིས་གནད་དོན་དེ་གལ་ཆེན་པོ་ཞིག་ཡིན་པར་ངོས་འཛིན་ཞུ་བཞིན་ཡོད། ཕྱི་རྒྱལ་ཡུལ་གྲུ་ཁག་ཏུ་བོད་མི་གཏན་སྡོད་བྱེད་མཁན་གྱི་གྲངས་འབོར་ཇེ་མང་དུ་འགྲོ་བཞིན་ཡོད་པ་མ་ཟད། བོད་མིའི་གནས་སྟངས་ཀྱང་ཛ་དྲག་འོག་གནས་ཡོད་སྟབས། བོད་ནང་གི་བོད་མི་ཚོས་རེ་བའི་མིག་འབུར་གཏོད་ས་དེ་༧གོང་ས་མཆོག་གིས་དབུ་ཁྲིད་པའི་བཙན་བྱོལ་བོད་མི་དག་ཆགས་ཡོད། ང་ཚོ་ཡུལ་ལུང་གང་འདྲ་ཞིག་ནང་གནས་ཀྱང་། ཚང་མ་རྡོག་རྩ་གཅིག་སྒྲིལ་ཡོང་དགོས་པ་མ་ཟད། སོ་སོའི་གོམས་གཤིས་དང་ཆས་གོས། ཁྱད་ཆོས་ལྡན་པའི་རིག་གཞུང་དག་མི་ཉམས་རྒྱུན་འཛིན་དང་ཉམས་པ་སླར་གསོ་བྱ་རྒྱུའི་འགན་དེ་ང་ཚོར་ཡོད།ད་ལྟའི་ཆར་བོད་མི་དེ་དག་གིས་བཙན་བྱོལ་བོད་མིའི་སྒྲིག་འཛུགས་ལ་ཁ་ཞེ་གཉིས་མེད་ཀྱིས་དགའ་ཞེན་དང་རྒྱབ་སྐྱོར། ཡིད་ཆེས།བློ་གཏད་བཅོལ་བཞིན་ཡོད་སྟབས། མ་འོངས་པར་དེ་ཚོ་མུ་མཐུད་གནས་དགོས་པ་དེ་གལ་ཆེན་པོ་ཆགས་ཡོད། ད་ལྟའི་ང་ཚོའི་འབྲེལ་བ་གནང་སྟངས་དེ་ཨ་མ་ཡིན་ཤག་དང་ནུ་མ་བསྣུན་ཤག་བྱས་ཏེ་འགྲོ་བཞིན་ཡོད། ད་ལྟའི་བོད་མིའི་སྒྲིག་འཛུགས་ཀྱི་ཁྲིམས་སྒྲིག་གི་འཁོར་རྒྱའི་ནང་གནས་མ་ཐུབ་པ་ཡིན་ན། མ་འོངས་པར་བོད་རིགས་སྤྱི་མཐུན་ཚོགས་པ་དང་བོད་མིའི་སྒྲིག་འཛུགས་བར་གྱི་འབྲེལ་ལམ་གང་འདྲ་ཆགས་མིན་དང་། མ་འོངས་པར་དེ་དག་གོང་བུ་གཅིག་སྒྲིལ་ཐོག་གནས་ཐུབ་མིན་སྐོར་ལ་བློ་དོགས་ཤིག་ཡོང་གི་ཡོད་སྟབས།ཚོགས་པ་དེ་དག་དང་བོད་མིའི་སྒྲིག་འཛུགས་བར་གྱི་འབྲེལ་ལམ་དེ་ལྕགས་འཐག་གིས་འཆིང་པ་ལྟར་དགོས་ཀྱི་འདུག ཚོགས་པ་དེ་དག་བོད་མིའི་སྒྲིག་འཛུགས་ཀྱི་བཅའ་ཡིག་འོག་ཚུད་དགོས་ཀྱི་འདུག་ཅེས་ཞུ་རྒྱུ་ཡིན། ཞེས་བརྗོད་སོང་།

དེའི་རྗེས་སྲིད་སྐྱོང་བློ་བཟང་སེང་གེ་མཆོག་གིས་གསུངས་དོན། ཕྱི་རྒྱལ་ཁག་ཏུ་བོད་རིགས་ཚོགས་པ་མང་པོ་ཡོད་ཡོད་ཁོངས་ནས་དགོངས་ཚུལ་རྟོག་ཐུབ་པ་སྤྱི་མཐུན་ཚོགས་པ་༡༤ཙམ་རེད། སྤྱི་མཐུན་ཚོགས་པ་ ༨ ཀྱིས་བཅའ་སྒྲིག་གི་ཆ་རྐྱེན་བསྐྲུན་དགོས་ཀྱི་མེད་པ་དང་། ༦གིས་དགོས་ཀྱི་འདུག་ཅེས་བརྗོད་ཡོད་སྟབས།བརྒྱ་ཆར་བརྩིས་ན་ཉུང་ཉུང་ཞིག་གི་བསམ་ཚུལ་ལས་ཚུད་མེད་ཀྱང་། ཉུང་ཤས་དེ་ལས་ཀྱང་མང་ཆེ་བས་སོ་སོའི་ཡུལ་ལུང་ནང་ཁྲིམས་མཐུན་དེབ་སྐྱེལ་བྱས་པའི་ཚོགས་པ་ཞིག་ཆགས་ཡོད་སྟབས། ད་ལྟ་རང་འཇགས་གནས་ན་འགྲིག་གི་འདུག་ཅེས་བཀའ་ཤག་གིས་ཞུས་པ་ཡིན། ཨ་རིར་མཚོན་ན། དེབ་སྐྱེལ་བྱས་པའི་ཚོགས་པ་གང་འདྲ་ཞིག་ཡིན་ཡང་ཨ་རིའི་མི་སེར་གྱི་བདེ་སྡུག་ལྟ་ཆེད་བཙུགས་པ་ཞིག་ཡིན་སྟབས་ཁོ་ཚོར་མི་སེར་དང་འབྲེལ་བའི་གནད་དོན་གང་ཡིན་ཡང་ཐེ་ཇུས་བྱེད་དབང་ཡོད་ཀྱང་།ཕྱིའི་རྒྱལ་ཁབ་ཀྱིས་ཨ་རིར་དེབ་སྐྱེལ་བྱས་པའི་ཚོགས་པ་ཁག་ལ་ཐེ་ཇུས་བྱེད་དབང་མེད་པ་ཁྲིམས་སྒྲིག་ནང་གསལ་སྟབས། བཀའ་ཤག་གིས་ཐེ་ཇུས་བྱས་ཚེ་དེབ་སྐྱེལ་བྱས་པའི་ཚོགས་པ་དག་ལ་གནོད་ཀྱི་ཡོད་སྟབས། བཀའ་ཤག་གིས་ཐེ་ཇུས་མ་གནང་ལ་ལེགས་པའི་ཐག་གཅོད་བྱས་ཡོད། ཅེས་གསུངས་ཏེ་ཕྱི་དྲིལ་འོག་བོད་རིགས་ཚོགས་པ་ཁག་གི་ཐོ་གཞུང་ཡང་དགོས་མཁོ་མེད་ཚུལ་གསུངས་སོང་།

དེའི་རྗེས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་སྤྱི་ཡོངས་ནས་གསལ་བཤད་གནང་དོན། ད་ལྟའི་ཆར་ང་ཚོའི་སྤྱི་ཚོགས་ཀྱི་འགྱུར་བ་ཤུགས་ཆེན་འགྲོ་བཞིན་ཡོད་པ་དང་། རྒྱ་བལ་འབྲུག་གསུམ་ནས་བོད་རིགས་མང་པོ་ཞིག་ནུབ་ཕྱོགས་དང་ཤར་ཕྱོགས་རྒྱལ་ཁབ་ཁག་ཏུ་འགྲོ་བཞིན་ཡོད་པ། བོད་མིའི་སྤྱི་ཚོགས་འདི་ཁ་འཐོར་ནས་འགྲོ་བཞིན་ཡོད་པའི་གནས་སྟངས་འོག བོད་མིའི་སྒྲིག་འཛུགས་དང་ས་ཕྱོགས་གང་སར་གནས་པའི་བོད་རིགས་དག་འབྲེལ་བ་དམ་ཟབ་ཅིག་ཡོང་ཆེད། ཕྱི་རྒྱལ་བོད་རིགས་ཚོགས་པ་དང་བོད་རིགས་སྤྱི་མཐུན་ཚོགས་པ་ཁག་བཅའ་ཁྲིམས་ཀྱི་སྒྲོམ་གཞིའི་འོག་འཇུག་དགོས་མིན་ལ་ཚོགས་ཆུང་འདི་བཙུགས་པ་རེད། ད་ལྟའི་ང་ཚོའི་འཐབ་རྩོད་དང་སྤྱི་ཚོགས་ཀྱི་གནས་སྟངས་ཐོག་ནས་བལྟ་སྐབས་བོད་རིགས་ཚོགས་པ་དང་བོད་རིགས་སྤྱི་མཐུན་ཚོགས་པ་དག་ཧ་ཅང་གལ་ཆེན་པོ་ཆགས་ཡོད་སྟབས། བཅའ་ཁྲིམས་ཀྱི་སྒྲོམ་གཞིའི་འོག་གནས་ཀྱང་རུང་མ་གནས་ཀྱང་རུང་གང་ལྟར་བོད་མིའི་སྒྲིག་འཛུགས་དང་འབྲེལ་བ་དམ་ཟབ་ད་ལྟ་ཡོད་པ་རེད་ལ། མ་འོངས་པར་ཡང་དེ་ལས་ལྷག་ཅིག་ཡོང་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།

ད་ལྟའི་ཆར་ཕྱི་རྒྱལ་དོན་གཅོད་དང་སྤྱི་འཐུས་བར་ལས་དོན་བྱེད་ཕྱོགས་ཐོག་དཀའ་ངལ་འཕྲད་ཀྱིན་ཡོད་པ་ཚང་མས་མཁྱེན་གྱི་ཡོད་པ་རེད། དེ་བཞིན་བོད་རིགས་ཚོགས་པ་དེ་ཚོས་ཚོགས་འདུ་ཚོགས་སྐབས་ཕྱི་རྒྱལ་གྱི་སྤྱི་འཐུས་དེ་ཚོ་སྐད་བཏང་ཡོད་མེད་སོགས་ཀྱི་གནས་སྟངས་ཡོང་གི་ཡོད། དེ་ཚོར་འགྲོ་ལུགས་འགྲོ་སྟངས་ལམ་སྟོན་གསལ་བོ་དགོས་པ་གལ་ཆེན་པོ་རེད་བསམ་གྱི་ཡོད།

སུད་སི་ལྟ་བུར་མཚོན་ན་འགྲོ་སྟངས་མ་འདྲ་བ་ཞིག་རེད། ཁོ་རང་ཚོར་ཕྱི་དྲིལ་དང་རིག་གཞུང་། དཔལ་འབྱོར་སོགས་སྡེ་ཚན་མང་པོ་ཞིག་འདུག དཔལ་འབྱོར་གྱི་གནས་སྟངས་ཐོག་ལའང་ཁོ་རང་ཚོས་སྟངས་འཛིན་བྱས་ཏེ་འགྲོ་བཞིན་འདུག ཁོ་རང་ཚོས་ཇི་ནེ་ཝའི་དོན་གཅོད་དེ་ས་གནས་མགོ་འཛིན་གྱི་མཚན་ཐོག་ནས་ཡོང་དགོས་ཀྱི་འདུག་གསུང་གི་འདུག དེ་ལ་ཚོགས་གཙོས་ངོས་ནས་གསལ་བོར་ཞུས་པ་ཡིན། དོན་གཅོད་དེ་ས་གནས་མགོ་འཛིན་ཡོང་གི་མ་རེད། གང་ཡིན་ཟེར་ན། བོད་མིའི་སྒྲིག་འཛུགས་ཀྱིས་སྤྱི་ལ་ཁྱབ་པའི་སྲིད་བྱུས་ཤིག་འཛིན་དགོས་སྟབས། བྱང་ཨ་རི་གཅིག་པུར་བོད་རིགས་ཚོགས་པ་ ༣༠ ཡས་མས་ཤིག་ཡོད་ས་རེད། དོན་གཅོད་ཚོགས་འདུ་རྐྱང་རྐྱང་ལ་བཅར་ནས་སྡོད་དགོས་ཆགས་ཡོང་གི་རེད། གཉིས་པ་སུད་སིར་མཚོན་ན། དོན་གཅོད་ས་གནས་མགོ་འཛིན་གྱི་ངོ་བོའི་ཐོག་ནས་ས་གནས་འཐུས་ཚོགས་ཀྱི་ཚོགས་འདུར་བཅར་ཡང་དོན་གཅོད་ཀྱིས་འཛིན་སྐྱོང་གི་འགན་དེ་འཁུར་དགོས་ཀྱི་མི་འདུག ས་གནས་འཐུས་ཚོགས་ཁོ་རང་ཚོས་འགན་ཆ་ཚང་འཁུར་འདུག སུད་སིའི་ས་གནས་མཐུན་ཚོགས་ཀྱིས་འོས་བསྡུའི་ལས་རིམ་སོགས་འགྲོ་བཞིན་ཡོད། བོད་མིའི་སྒྲིག་འཛུགས་ཀྱིས་ངོས་ལེན་ཡོད་པའི་ས་གནས་འཐུས་ཚོགས་ཡིན་གསུང་གི་ཡོད་པ་ལྟར། བོད་མིའི་སྒྲིག་འཛུགས་ཀྱིས་ཀྱང་ངོས་བཞེས་གནང་གི་ཡོད་པ་རེད། དེར་བརྟེན། གལ་སྲིད་ཁོ་ཚོར་ས་གནས་མགོ་འཛིན་དགོས་པ་ཡིན་ན། ཁོ་རང་ཚོས་ནང་ཁུལ་ནས་འོས་བསྡུ་བྱས་ཏེ་ས་གནས་མགོ་འཛིན་ཞིག་འདེམས་ཐུབ་ན་ཡག་པོ་ཡོད་པ་རེད་ཅེས་ལམ་སྟོན་ཞུས་པ་ཡིན། ད་ལྟའི་ཆར་འོས་བསྡུའི་བརྒྱུད་རིམ་གཅིག་གི་ནང་དུ་བོད་རིགས་ཚོགས་པ་དང་ས་གནས་འཐུས་ཚོགས་གཉིས་ཀའི་འགན་འཁུར་གྱི་ཡོད་སྟབས། དེ་འགྲིག་གི་ཡོད་པ་མ་རེད། དང་པོ་སྒྲིག་འཛུགས་གཉིས་དགོས་མིན་དང་། གལ་སྲིད་དགོས་ན་དེ་གཉིས་ཁ་ཁ་བཟོས་ཏེ། ལས་དོན་བྱེད་ཕྱོགས་དང་འགྲོ་ལུགས་འགྲོ་སྟངས་དབྱེ་མཚམས་བཟོ་དགོས་པ་རེད། ཅེས་གསུངས་སོང་།

ཚོགས་ཆུང་གི་ལས་དོན་བྱེད་ཕྱོགས་ཐོག་ལ་ཁོང་གིས། སྤྱི་འཐུས་ལྷན་ཚོགས་ཀྱི་ཞིབ་འཇུག་ཚོགས་ཆུང་ལ་ཚོགས་པ་ཁ་ཤས་མ་གཏོགས་བསམ་ཚུལ་བསླེབས་ཡོད་པ་མ་རེད། སྙན་ཐོ་དེའི་ནང་བལྟས་པ་ཡིན་ན་ད་ལྟའི་དོན་གཅོད་རྣམ་པས་ཐུགས་འགན་དེ་ཙམ་བཞེས་མེད་པའི་གནས་སྟངས་ཤིག་རང་བཞིན་གྱིས་ཆགས་འདུག ཚོགས་གཙོ་དོན་གཅོད་ཀྱི་ཚོགས་འདུར་བཅར་སྐབས་གསལ་བོར་ཞུས་ཡོད། ང་ཚོའི་ཚོགས་ཆུང་གི་ཚོགས་མི་དག་རྒྱལ་ཁབ་རེ་རེའི་ནང་ཕེབས་ཏེ་ཞིབ་འཇུག་གནང་རྒྱུ་ཁག་པོ་རེད། འཛིན་སྐྱོང་གིས་བཀོད་ཁྱབ་བཏང་བའི་ཐོག་ནས་དོན་གཅོད་ཁག་ནས་བོད་རིགས་ཚོགས་པ་ཁག་གི་བསམ་ཚུལ་བསྡུ་དགོས་པ་ཞིག་ཆགས་ཡོད་ཀྱང་། དེ་ཙམ་ཚགས་ཚུད་པོ་ཞིག་བྱུང་མེད་པའི་གནས་སྟངས་ཆགས་འདུག་སྟབས། མ་འོངས་པར་གལ་སྲིད་ཚོགས་ཆུང་འདི་རིགས་ཚུགས་པ་ཡིན་ན་འཛིན་སྐྱོང་དང་དོན་གཅོད་ངོས་ནས་ཐུགས་འགན་ཆེ་ཙམ་བཞེས་དགོས་པ་ཆགས་འདུག ཅེས་སོགས་གསུངས་སོང་།

སྤྱི་འཐུས་རྒྱུན་ལས་ཀྱི་ཞིབ་འཇུག་ཚོགས་ཆུང་གི་ཚོགས་མི་དག་ནི། མཁན་པོ་བསོད་ནམས་བསྟན་འཕེལ་མཆོག་དང་སྤྱི་འཐུས་ཀརྨ་ཡེ་ཤེས་ལགས།ཚོགས་མི་སྤྱི་འཐུས་ཐུབ་བསྟན་ལུང་རིགས་ལགས།སྤྱི་འཐུས་བཀྲ་ཤིས་རྣམ་རྒྱལ་ལགས།སྤྱི་འཐུས་ཐུབ་བསྟན་དབང་ཆེན་ལགས་བཅས་ཡིན་འདུག