ཐིའུ་སྟོབས་ལྡན།
ང་ཚོ་བོད་ཀྱི་ལོ་རྒྱུས་ཡིག་ཚང་རྣམས་སུ་མི་ཉག་གི་ལོ་རྒྱུས་དེབ་གཟུགས་སུ་བཀོད་པ་དང་། ཡང་ན་མི་ཉག་སྐོར་གྱི་དཔྱད་རྩོམ་དང་ཆེད་རྩོམ་སོགས་ནི་མཛུབ་རྩེའི་གྲངས་ཀ་ཙམ་ལས་ཧ་ཅང་མཐོང་དུ་དཀོན་པ་དང་། ལྷག་པར་དུ་རང་རེ་བོད་ཀྱི་དེ་བྱུང་རིག་པ་ལ་མཁས་པར་རློམ་པའི་སྨྱུག་ཐོག་པ་མང་པོས་ཨ་འོ་ལྡོང་མི་ཉག་གི་སྐོར་ལ་གོ་རྟོགས་ཞན་པ་དང་ཕྱོགས་རིས་ཀྱི་བསམ་བློ་ཆེ་བ། དེ་མིན་ཅུང་རྒྱུས་མངའ་དང་གོ་རྒྱ་ཆེ་བ་དག་གིས་ཀྱང་རང་གི་ཞེན་འདོད་གཙོར་བཟུང་ལས་ལོ་རྒྱུས་དངོས་ལ་རྟོགས་ཞིབ་ནན་པོ་མི་བྱེད་པར། དུས་རབས་བཅུ་བཞི་རབ་བྱུང་དྲུག་པའི་ནང་ཚལ་པ་ཀུན་དགའ་རྡོ་རྗེས་(༡༣༠༩-༡༣༦༤)བརྩམས་པའི་<<དེབ་ཐེར་དམར་པོ།>>ལས་མི་ཉག་རྒྱལ་རབས་ཤིས་ཞཱ་མདོར་བསྡུས་ཞེས་པར་གཞིར་བཅོལ་ཏེ། བོད་རབ་བྱུང་བདུན་པའི་ནང་སྟག་ཚང་དཔལ་འབྱོར་བཟང་པོས་(༡༤༣༤-)བརྩམས་པའི་<<རྒྱ་བོད་ཡིག་ཚང་ཆེན་མོ།>>ལས་མི་ཉག་གི་རྒྱལ་རབས་ཞེས་པ་དང་། རབ་བྱུང་བརྒྱད་པའི་ནང་དཔའ་བོ་སྐུ་ཕྲེང་གཉིས་པ་གཙུག་ལག་ཕྲེང་བས་(༡༥༠༤-༡༥༦༦)བརྩམས་པའི་<<ཆོས་འབྱུང་མཁས་པའི་དགའ་སྟོན།>>ལས་མི་ཉག་གི་རྒྱལ་པོ་དང་ཆོས་ཀྱི་བྱུང་བ་བརྗོད་པ་སོགས་ཀྱི་ནང་དུ། ལྡོང་མི་ཉག་གི་ལོ་རྒྱུས་དཀྱུས་གཅིག་ཏུ་བཀོད་པ་དག་ལ་བསྐྱར་ཟློས་དང་ཡང་ཟློས་ཀྱིས་ཁ་ཁྲལ་འཇལ་བ་ཙམ་ལས། ཨ་འོ་ལྡོང་མི་ཉག་གི་རིགས་རུས་མཆེད་ཁོངས་ངོ་མ་བོད་ཀྱི་རུས་ཆེན་བཞིའི་ཁོངས་སུ་ལྡོང་གི་རུས་རྒྱུད་ལས་མཆེད་པ་དང་། སུང་གི་རྒྱལ་པོ་རིན་ཙུན་ནམ་ཁྲི་རབས་ (༢༠༠-༣༠༠) བར་དང་ཙོང་ཁའི་རྒྱལ་པོ་ཁྲི་ནམ་ལེགས་སྨོན་གྱི་སྐབས་སུ། མི་ཉག་རྒྱལ་ཁབ་ཀྱི་རྒྱལ་ཁྲིར་འཁོད་པའི་རྒྱལ་པོ་ཆེས་ཐོག་མ་སྟེ་ཡོོའན་རྒྱལ་པོའམ་ཡོའན་ཧུན་ནས་རྒྱལ་རབས་མཐའ་མ་རྡོ་རྗེ་དཔལ་བར་ (༡༠༣༨-༡༢༢༧) གྱི་རྒྱལ་རབས་ཙམ་མ་ཡིན་པར། སྤྱི་ལོའི་ཡར་སྔོན་ཟེར་ནའང་འདྲ་སྟོད་ལྷ་རབས་དུས་སྐབས་ཀྱི་ལྡོང་མི་ཉག་གི་གནས་བབ་དང་། ཆོས་རྒྱལ་རིམ་བྱོན་ནམ་བར་སྔ་དར་སྐབས་ཀྱི་མི་ཉག་གི་གནས་ཚུལ། ལྷག་པར་དུ་སྨད་སིལ་ཆད་ཀྱི་སྐབས་སུ་མཐའི་རྒྱལ་ཁབ་ཁག་དང་ཕན་ཚུན་འདྲ་མཉམ་གྱི་མཛའ་འབྲེལ་བཙུགས་ཏེ་རྟེན་ཆས་འབུལ་རེས་དང་གཉེན་གྱི་འབྲེལ་བ་ཡང་བྱུང་། ལྷག་པར་དུ་ཐང་རྒྱལ་རབས་ཀྱི་དུས་དཀྱིལ་ནས་བཟུང་རྒྱལ་པོ་ཡོའན་ཧའོ་ཡིས་ད་ལྟའི་ཉིང་ཞ་དང་། ཀན་སུའུ། ཧྲའན་ཞིའི་ནུབ་བྱང་བཅས་ཀྱི་ས་ཁུལ་དུ་བཙན་ས་བཟུང་སྟེ་ཐང་རྒྱལ་རབས་ཀྱི་དུས་མཇུག་དང་རྒྱལ་རབས་ལྔའི་དུས་སྐབས་སུ། ལྡོང་སྤྱང་མི་རིགས་དེ་ནུབ་བྱང་ས་ཁུལ་གྱི་སྟོབས་ཤུགས་ཆེས་ཆེ་བའི་རུ་ཚོ་ཆེན་པོ་ཞིག་ཏུ་གྱུར།
སྤྱི་ལོ་ ༡༠༣༨ ལོར་ལྡོང་སྤྱང་གི་མགོ་པ་ཡོོའན་ཧའོ་མི་ཉག་རྒྱལ་ཁབ་ཀྱི་རྒྱལ་ཁྲིར་བཀོད་དེ་མི་ཉག་རྒྱལ་ཁབ་དངོས་སུ་བཙུགས་པའི་བསྒྲགས་གཏམ་སྤེལ་ཡོད་པ་དང་མི་ཉག་རྒྱལ་ཁབ་ཀྱི་མིང་ཡང་ཁྱབ་བསྒྲགས་བྱས། དཔོན་མཁར་དང་ཕོ་བྲང་བརྩིགས། དཔོན་འབངས་ཀྱི་གོས་རྒྱན་གཏན་ལ་ཕབ། མི་ཉག་གི་ཡི་གེ་གསར་བཏོད་མཛད། གཞན་ཡང་བོད་རིག་པ་དང་ལོ་རྟགས་ཀྱང་བཙུགས། དམག་དཔོན་ལམ་ལུགས་འཐུས་ཚང་གསར་བཙུགས་ཐོག་དམག་དོན་གྱི་སྒྲིག་འཛུགས་གཏན་ལ་ཕབ། རྒྱལ་ཁབ་ཀྱི་ཁྲིམས་ལུགས་ཚང་མ་དྲག་པོའི་ཐོག་བསྒྱུར། ཁོང་གིས་བོད་བཙན་པོ་དང་སུང་རྒྱལ་ཁབ་ཀྱི་ལམ་ལུགས་ལ་ལེགས་ཆ་བླངས་ཏེ་དཔོན་གྱི་གོ་གནས་རིམ་པ་གསར་དུ་བཙུགས། དཔོན་གྱི་གོ་གནས་ནང་ནས་བོད་དཔོན་ནི་ཆེས་མཐོ་བ་ཞིག་ཡིན། མི་ཉག་རྒྱལ་ཁབ་ཀྱི་རྒྱལ་པོ་ཐོག་མ་ཧའོ་རྒྱལ་པོ་ནི་དཔའ་མཛངས་གཉིས་ལྡན་གྱི་རྗེ་བོ་ཞིག་ཡིན་ཏེ་སུང་གི་རྒྱལ་རབས་སུ། ཡོའན་ཧའོ་ཞེས་པ་དཔའ་རྩལ་ལྡན། ཤེས་རིག་བཀྲ། བྲིས་དང་། བཟོ་དང་། སངས་རྒྱས་ཀྱི་ཆོས་ལ་མཁས། རྒྱ་བོད་གཉིས་ཀྱི་སྐད་ཡིག་ལ་ཤིན་ཏུ་མཁས་པ་ཡོད་ཅེས་པ་ལྟར་རྒྱའི་ལོ་རྒྱུས་ནང་དུའང་ཁོང་གི་མཚན་སྙན་ཕྱོགས་མཐར་གྲགས་ཡོད་ནའང་། དེ་དག་ལ་བློ་གཟུར་གནས་ཐོག་ཞིབ་འཇུག་གནང་མཁན་མེད་ཟེར་ནའང་མ་འཐུས་པ་མེད་པའི་སྐབས་མཚམས་སུ། མུ་གེའི་ཐོག་ལ་ཟླ་ལྷག་ཅེས་པའི་དཔེ་ལྟར་ལྡོང་མི་ཉག་གི་མི་རིགས་ཀྱིས་ས་གཞི་ཆེན་པོ་འདིའི་སྟེང་རལ་གྲི་ཁྲག་ལ་སྦང་པའི་རྒྱལ་སྲུང་གི་ཕར་རྒོལ་དང་། དཔྱོད་ཤེས་རྩལ་དུ་བཏོན་ཏེ་མི་ཉག་གི་ཤེས་རིག་གསར་སྐྲུན་སོགས་ཀྱི་མཛད་རྗེས། མདོར་ན་མི་ཉག་གི་ལས་དབང་དང་ཁ་རྗེ་དབང་ཐང་སོགས་ཡོད་ཚད་ཀོ་བཏུམས་དགུ་བརྩེགས་ཀྱིས་སྐོང་ཡིག་དང་སོགས་སྒྲའི་ནང་དུ་བསྡུ་གསོག་བརྒྱབ་སྟེ། མིའི་ལོ་རྒྱུས་ཀྱི་རི་མོའི་འོད་ཀོར་ལས་འཕུད་གང་ཐུབ་ཀྱི་ལས་སུ་ཞུགས་ཏེ་སྦྱོར་བ་ངན་པའི་ལས་བརྩམས་པ་ནི། རང་མི་རིགས་ཀྱི་ལོ་རྒྱུས་ཐོག་གི་ནག་ཉེས་ཅན་ཞིག་ཏུ་གྱུར་ཡོད།
ཞིབ་མོར་བསམ་ན་རང་རེ་བོད་ཀྱི་ཆེས་རྒན་ཡིག་ཚང་ཁུངས་མ་རྣམས་དང་གཟུར་གནས་བོད་ཀྱི་དེ་བྱུང་རིག་པ་སྨྲ་བའི་དྲན་དབང་དག་གིས་མི་ཉག་གི་མི་རྒྱུད་ཀྱི་མཆེད་ཁུངས་ནི་ལྡོང་ཡིན་པ་དང་། ལྡོང་ནི་བོད་ཡིན་པ། བོད་ནི་རོང་ཡིན་ཟེར་བའི་ཤེས་བྱེད་བརྒྱ་ཕྲག་ཡོད་པ་ལས། སི་ཁྲོན་མི་རིགས་དཔེ་སྐྲུན་ཁང་གིས་པར་དུ་བཏབ་པའི་<<རྒྱ་བོད་ཡིག་ཚང་ཆེན་མོ།>>ཡི་ཤོག་གྲངས་ ༡༣ ལས་“ད་ཕོ་བོ་ལྡོང་ལ་མཆེ་དྲུག་ཡོད། སྟོད་ན་སྤ་ཚབ་འབྲིང་ཡས་གཉིས། །བར་ན་རོ་འཛེ་རག་་་་་ཤི་གཉིས། །སྨད་ན་མི་ཉག་གྱི་ཐན་གཉིས་”ཞེས་པ་དང་། <<བོད་མི་བུ་གདོང་དྲུག་གི་རུས་མཛོད་མེ་ཏོག་སྐྱེད་ཚལ།>>གྱི་ཤོག་གྲངས་ ༧, པ་ལས་“བྱི་བ་ལ་སོགས་ལོ་སྐོར་བཅུ་གཉིས། དེ་ལའང་བརྡ་མིང་འདི་ལྟ་སྟེ། ཤིང་དང་སྟག་ཡོས་སྟོང་སུམ་ཞེས། །མེ་དང་རྟ་སྤྲུལ་སེང་འ་ཞ། །ལྕགས་དང་བྱ་སྤྲེལ་སྦྲ་ཞང་ཞུང་། །ས་དང་གཤེད་བཞི་རྒྱལ་དྲང་རྗེ། །ཆུ་དང་བྱི་ཕག་ལྡོང་མི་ཉག་”ཞེས་པ་དང་ཡང་དེ་ཉིད་ལས་ཕྱི་འགྱུར་གྱི་<<གཏོ་ཕུག་>>ལས་ལུང་འདྲེན་བྱས་ཏེ་“མི་ནི་མི་ཉག་ལྡོང་། མི་ནི་སོ་སྟོང་སུམ་བྷ། མི་ནི་སྦྲ་རྒྱལ་ཞང་ཞུང་། མི་ནི་སེང་རྒ་འ་ཞ། མི་ནི་རྒྱལ་རྗེ་དྲང་དཀར་” ཞེས་པ་སོགས་མཚོན་<<ལ་དྭགས་རྒྱལ་རབས་འཆི་མེད་གཏེར།>>དང་། <<ཞང་བོད་ལོ་རྒྱུས་ཏི་སེའི་འོད།>>། <<ཡར་ལུང་ཇོ་བོའི་ཆོས་འབྱུང་།>>། <<བོད་ཀྱི་ལོ་རྒྱུས་སྤྱི་བཤད་པདྨ་ར་གའི་ལྡེ་མིག>>། <<བོད་ཀྱི་གནའ་རབས་ལོ་རྒྱུས།>>སོགས་མདོར་དྲིལ་ན་མི་ཉག་གི་རུས་རྒྱུད་ཀྱི་འགོ་ཁུངས་ནི་བོད་མི་ཚོ་རུས་ཀྱི་ཕྱི་མོ་བཞི་རུ་གྱེས་ཟེར་བའི་ནང་ཚན་ལྡོང་གི་རྒྱུད་པ་ལས་མཆེད་པའི་ཁུངས་ལྡན་ལུང་རིགས་རྫོགས་ག་ལ་ཐུབ།
དུས་རབས་ཉི་ཤུ་པའི་མཇུག་ནས་རྒྱ་ནག་དང་ཕྱི་གླིང་གི་ཉམས་ཞིབ་པ་མང་པོས་ལྡོང་མི་ཉག་གི་ལོ་རྒྱུས་དང་རིག་གནས། སྐད་ཡིག་སོགས་ལ་དོན་གཉེར་ཆེན་པོས་ཞིབ་འཇུག་དང་བགྲོ་གླེང་། དཔྱད་བརྗོད་སོགས་ཀྱི་དེབ་ཐེར་བརྒྱ་ཕྲག་ལ་ཉེར་བ་འགྲེམས་སྤེལ་བྱས་དང་བྱེད་མུས་ལྟར། དཔེར་ན་རྒྱའི་ཡིག་རིགས་ཐོག་ཐོན་ཞིང་རྒྱ་ནག་སྤྱི་ཚོགས་ཚན་རིག་ཁང་གིས་པར་དུ་བསྐྲུན་པའི་<<མི་ཉག་ཞིབ་འཇུག>>ཅེས་པའི་དེབ་ཕྲེང་བརྒྱད་དང་། རྩོམ་པ་པོ་ཏུའུ་ཅི་ལུའུ་ཡིས་བརྩམས་ཤིང་ཧྲང་ཧེ་གནའ་རྩོམ་པར་སྐྲུན་ཁང་ནས་པར་དུ་བཏབ་པའི་<<མི་ཉག་རིག་པའི།>>དེབ་ཕྲེང་བཅོ་བརྒྱད། རྩོམ་པ་པོ་ཀྲུའུ་ཧྥན་ཀྲུའུ་ཡིས་བརྩམས་ཤིང་ཀྭ་ཤི་དགེ་འོས་སློབ་གྲྭའི་པར་སྐྲུན་ཁང་ནས་པར་བསྐྲུན་བྱས་པའི་<<ཐང་རྒྱལ་རབས་སྐབས་ཀྱི་ལྡོང་བྱང་།>>སོགས་ཀྱི་དཔེ་དེབ་བཅུ་ཕྲག་ལྔ་ལྷག་དང་། གཞན་ཡང་དཔྱད་རྩོམ་དང་ཆེད་རྩོམ། ད་དུང་བདག་གིས་མ་མཐོང་པའི་མི་ཉག་སྐོར་གྱི་བརྩམས་ཆོས་ནི་བདག་གིས་མཐོང་པ་ལས་ལྡབ་འགྱུར་གྱིས་མང་བ་ཡོད་པ་ནི་སྨྲོས་མི་དགོས་སོ།། ལྷག་པར་དུ་ཨུ་རུ་སུ་མི་ཆོས་རིག་གནས་མཉམ་འབྲེལ་ཨུ་ཡོན་ལྷན་ཁང་དང་རྒྱ་ནག་གི་རྒྱལ་སྤྱི་མཉམ་འབྲེལ་ཚན་པའི་གྲུབ་ཆ་ཡན་ལག་གཙོ་བོས་འགྲོ་གྲོན་གྱི་མ་དངུལ་ཕོན་ཆེན་བཏང་སྟེ། སྐབས་དང་པོ་<<རྒྱལ་སྤྱི་མི་ཉག་རིག་པའི་རྩོམ་རིགས་གླེང་སྟེགས།>>ཞེས་པའི་ཚོགས་ཆེན་ཉིང་ཞཱ་དབྱིན་ཁྲོན་དུ་ཚོགས་ཡོད་པ་དང་། སྐབས་གཉིས་པའི་རྒྱལ་སྤྱི་མི་ཉག་རིག་པའི་རྩོམ་རིགས་གླེང་སྟེགས་གོ་སྒྲིག་གནང་མཁན་ནི་ཉིང་ཞ་སློབ་གྲྭ་ཆེན་མོའི་མི་ཉག་ཤིས་ཞ་སློབ་གླིང་དང་། རྒྱ་ནག་སྤྱི་ཚོགས་ཚན་རིག་ཁང་གི་མི་ཉག་རིག་གནས་ཞིབ་འཇུག་ལྟེ་གནས། ཀན་སུའུ་དབུ་རུ་ཐུན་མོང་བཅས་ནས་གཙོ་སྒྲུབ་གནང་ཐོག ཕྱི་རྒྱལ་གྱི་ཚོགས་བཞུགས་པ་ ༡༢༠ ལྷག་མཉམ་ཞུགས་བྱས་ཡོད་ལ། དཔྱད་གཞིའི་རྩོམ་ཡིག་ ༡༠༦ ཙམ་སྤེལ་ཐུབ་པ་བྱུང་ཡོད།
སྐབས་དེའི་བགྲོ་གླེང་གི་ནང་དོན་གཙོ་བོ་ནི་མི་ཉག་སྤྱི་ཚོགས་ཀྱི་ལོ་རྒྱུས་དང་། མི་ཉག་གི་སྐད་དང་ཡི་གེ རྩོམ་རིགས་དང་མནའ་དཔེ། མནའ་བོའི་རིག་དངོས་ཤུལ་བཞག་སོགས་ལ་བགྲོ་གླེང་གནང་དང་གནང་མུས་བཞིན། མི་རིགས་དང་རུས་རྒྱུད་དབྱེར་མེད་ཀྱི་སྨྱུག་ཐོགས་པ་དང་བསམ་བློ་བ་ཚོ་གོམ་པ་མཉམ་སྤོ་དང་མེ་ཏོག་མཉམ་བཞེད་ཐོག མི་ལོ་སྟོང་ཕྲག་དུ་མའི་ལོ་རྒྱུས་ཀྱི་རང་བཞིན་ལྡན་པའི་ཨ་འོ་ལྡོང་མི་ཉག་གི་ལོ་རྒྱུས་ཀྱི་ཡིག་ཚང་སྔོག་པའི་གཡོ་རླབས་ཁྲོད། ཤ་ཁྲག་དང་རིགས་རུས་ཁུངས་གཅིག་ལས་མཆེད་པའི་མི་རིགས་ཀྱི་མདུན་ལམ་འཚོལ་ཞིང་། དྲང་བདེན་རང་དབང་གི་སློང་མོ་བའི་འཐབ་གྲོགས་ཚོས་ནི་དེ་ལས་ལྡོག་སྟེ་ལྡོང་མི་ཉག་གི་ལོ་རྒྱུས་དང་རིག་གནས་ལ་སྣང་ཆུང་དང་ཁྱད་གསོད། མདོར་ན་རང་མི་རིགས་ཀྱི་ལོ་རྒྱུས་ཀྱི་ཟིན་ཐོ་རུ་ཐ་སྙད་ཙམ་ཡང་མ་བཀོད་པར་ཟུར་བཏོན་བྱེད་ཅི་ཐུབ་དང་། སྐོང་ཡིག་དང་སོགས་སྒྲའི་ནང་དུ་སྦས་པའི་ལས་སུ་ངལ་བར་ལྷུན་ལེན་པའི་བྱས་ཉེས་ཀྱི་སེམས་ཚོར་ཟབ་མོ་ནི་ངོ་མ་བློ་ཡུལ་དུ་ཤོང་དཀའ་བ་ཞིག་རེད།
བློ་རྣལ་དུ་ཕབ་སྟེ་བསམ་ན་སྟོད་ལྷ་རབས་ཀྱི་དུས་སུ་བྱོན་པའི་ལོ་ཙཱ་བ་སངས་རྒྱས་གྲགས་ལ་གཞིགས་ནའང་མི་ལོ་སྟོང་ཕྲག་མང་པོའི་ཡར་སྔོན་ནས་མི་ཉག་གི་ཡུལ་དུ་ཆོས་རིག་ཤུགས་ཆེན་དར་ཡོད་པ་མ་ཟད། སྐབས་དེ་དང་དེའི་དུས་ཀྱི་སྤྱི་ཚོགས་ལ་མི་ཉག་བ་ཚོས་ཕན་ཐོག་ཀྱང་ཆེན་པོ་ཡོང་གི་ཡོད་པ་མཚོན་ཐུབ། བར་མངའ་དར་གྱི་དུས་སུའ་ཞང་བོད་ཡིག་སྒྱུར་གྱི་སྒོ་འཕར་ཕྱེ་བར་མི་ཉག་གི་ལོ་ཙཱ་བ་ལྕེ་ཚ་མཁར་བུས་མཛད་རྗེས་རླབས་ཆེན་བཞག་ཡོད་པ་དང་། བོད་ཡུལ་གཅིག་གྱུར་མཛད་པའི་ལས་སུ་ལྡོང་བྱང་མངའ་འོག་ཏུ་འཇུག་པར་རྒྱལ་པོ་གནམ་རི་སྲོང་བཙན་སྐུ་དངོས་ནས་ཁྲི་དམག་གཅིག་དྲངས་ཏེ་དམག་འཐབ་ལ་ཞུགས་དགོས་བྱུང་བ། ཆོས་རྒྱལ་སྲོང་བཙན་སྒམ་པོ་དང་མུ་ནེ་བཙན་པོ་གཉིས་ཀྱིས་གཉེན་གྱི་འབྲེལ་བ་མཛད་ཕྱོགས་ལ་བསམས་ནའང་རིགས་རྒྱུད་གཅིག་པའི་ཚོ་བའི་སྟོབས་ཤུགས་མཉམ་འབྲེལ་ཡོང་བའི་ཆེད་དུ་ཡིན་པ་ཤིན་ཏུ་གསལ་བ་སོགས་ལ་གཞིགས་ན། བོད་བཙན་པོའི་དུས་སྐབས་སུ་ལྡོང་མི་ཉག་གི་རྒྱལ་ཕྲན་སྟོབས་ཤུགས་ཇི་ཙམ་དར་ཡོད་མེད་ནི་ལོ་རྒྱུས་ཀྱི་ཟིན་ཐོ་ལས་གསལ་ལྷམ་མེར་མཐོང་ཐུབ།
འདིར་བཤད་འདོད་པ་ནི་ལྡོང་མི་ཉག་གི་མི་རིགས་འདི་མ་ཤི་སྔུན་ནས་དུར་འཇུག་མི་བྱེད་པར་འཚལ་ཞུ། ཕུ་བོ་ལྡོང་དང་ཡུམ་མཆོག་འབྲི་སྣ་མ་གཉིས་ལས་མཆེད་ཅིང་ལྡོང་གི་རུས་རྒྱུད་འཛིན་པའི་ཨ་འོ་ལྡོང་མི་ཉག་བ་ཚོ་ད་ལྟའི་དབང་དུ་བྱས་ན་དར་རྩེ་མདོ་རྫོང་དང་བརྒྱད་ཟུར་རྫོང་། ཉག་ཆུ་རྫོང་། རྟའུ་རྫོང་བཅས་ཀྱི་ས་ཁུལ་དུ་ལས་སུ་འབྲོག་ལས་དང་ཞིང་ལས་བྱེད། མགོ་ལ་ཕྱིང་ཞྭ་གྱོན། ལུས་སུ་པགས་ལྭ་འདབ་རིང་ཅན་གོན། ཐ་གུའི་སྐ་རགས་བཅིངས། སྐ་རགས་ལ་གྲི་ཆུང་དང་མེ་འཆའ་འདོགས། རྐང་ལ་རྐོ་བའི་ལྷམ་གོན། རྣ་བར་རྣ་ལུང་འདོགས། མོ་རྣམས་ཀྱིས་ལུས་ལ་ཕུ་རུང་རིང་ཞིང་གོང་བ་ཕྱིར་སློགས་པའི་སྣམ་བུའི་ལྭ་གོན། ནས་འབྲུ་བསྙལ་ནས་ཨ་རག་བཟོ་སྟེ། མི་ལོ་སྟོང་ཕྲག་མང་པོ་འཕྲང་དུ་བརྒྱུད་པའི་རང་གི་ཡབ་མེས་ཀྱི་ཕ་ཁྱིམ་དྲོན་མོ་སྲུང་ནས་འཚོ་ཞིང་ཡོད་ན་ལྡོང་མི་ཉག་རྒྱལ་ལོ།། །།
