ཕལ་བའི་མི།
IlhamTohti ཟེར་བའི་རུས་པ་མཁྲེགས་པོ་ཅན་གྱི་ཡུ་གུར་བའི་ཕོ་ཁྱོ་ག་ཞིག་དྲན་པ། ཁྱོད་ལ་ཚེ་བཙོན་གྱི་ཁྲིམས་ཐག་བཅད་པའི་གསར་འགྱུར་དེ་ངས་ད་ལྟ་རང་དབྱིན་ཇིའི་རྒྱང་བསྒྲགས་བརྙན་འཕྲིན་ལས་མཐོང་སོང་། གསར་འགྱུར་དེས་ང་ལ་བསམ་ཡུལ་ལས་འདས་པའི་ཚོར་བ་དམིགས་བསལ་བ་ཅང་སྤྲད་མ་སོང་། དེ་ནི་ལོ་ངོ་འདི་ཚོའི་རིང་སྲིད་གཞུང་གིས་བོད་དང་ཡུ་གུར་བ་རྩ་མེད་བཟོ་བཞིན་པའི་གདུག་རྩུབ་ཀྱི་སྲིད་བྱུས་དེའི་ཆ་ཤས་ཙམ་ཡིན་པས་རེད། ད་ལྟ་ངས་འདང་བརྒྱབ་ན་ཁྱོད་ཀྱང་རྒྱབ་རྩ་མེད་པའི་བོད་མི་ཞིག་དང་འདྲ་བར་ཧ་ཅང་ལས་ངན་ཞིག་རེད།
འོད་ཟེར་གྱིས་ང་ལ་ཡུ་གུར་དུ་རུས་པ་མཁྲེགས་པོ་ཅན་གྱི་ཕོ་ཁྱོ་ག་ཞིག་ཡོད་པ་ཤེས་རྟོགས་བྱུང་དུ་བཅུག་པར་བརྟེན། ལོ་ངོ་འདི་ཚོའི་རིང་ངས་འོད་ཟེར་གྱི་ཟིན་བྲིས་བརྒྱུད་ནས་ཁྱོད་ཀྱི་སྐོར་ལ་དོ་སྣང་བྱས་པ་ཡིན། དེ་ནི་ཡུར་གུར་བ་དང་བོད་པ་གཉིས་ཀྱི་ལས་དབང་ལ་ཧ་ཅང་འདྲ་བའི་ཆ་ཡོད་པས་ཡིན། འོན་ཀྱང་། ཁྱོད་ཀྱི་རྩོམ་ཡིག་དག་གིས་བདག་ལ་ཁྱོད་ནི་ཡུ་གུར་རང་བཙན་གྱི་ལམ་འཁྲིད་པ་ཞིག་ཡིན་པར་བཤད་མ་སོང་ལ། ཁྱོད་ཀྱི་སྐད་ཆས་ཀྱང་ཁྱོད་དེ་ལྟར་ཡིན་པའི་བདེན་དཔང་ཅི་ཡང་བྱས་མ་སོང་།
ངས་འོད་ཟེར་གྱིས་བྲིས་པའི་རྩོམ་ཡིག་ཅིག་ལས་གང་ཞིག་ཤེས་པ་དེ་ནི་ཁྱོད་ཡུ་གུར་བའི་འགྲོ་བ་མིའི་ཐོབ་ཐང་རྩོད་ལེན་པ་ཞིག་ཡིན་པ་ཙམ་རེད་ལ། ད་དུང་དེའི་ཐོག་ལ་འཐོལ་པ་གཅིག་ཤེས་ཡོད་པའི་དབང་དུ་བཏང་ན་དེ་ནི་ཁྱོད་སློབ་ཆེན་གྱི་དཔལ་འབྱོར་རིག་པའི་དགེ་རྒན་ཞིག་ཡིན་པ་ཙམ་རེད།
དོན་དངོས་ཐོག་བཤད་ན། ཡུ་གུར་གྱི་གནད་དོན་ཡིན་ན་འདྲ། བོད་ཀྱི་གནད་དོན་ཡིན་ན་འདྲ། སོག་པོའི་གནད་དོན་ཡིན་ན་འདྲ། དེ་ནི་འགྲོ་བ་མིའི་ཐོབ་ཐང་གི་གནད་དོན་ལས་བརྒལ་བའི་གནད་དོན་ཞིག་ཡིན་ལ། དེ་ནི་རྒྱ་སྐྱེད་རིང་ལུགས་པས་དྲག་ཤུགས་སྤྱད་ནས་རྒྱལ་ཁབ་ཅིག་ལ་བཙན་འཛུལ་བྱས་པའི་གནད་དོན་ཞིག་ཡིན། འོན་ཀྱང་། བདག་གིས་ཤེས་གསལ་ལྟར་ན། ཁྱོད་ཀྱིས་དེའི་ཐད་ལ་རྩོད་གླེང་ཟུར་ཙམ་མམ། ཡང་ན། རྩོད་གླེང་གཏན་ནས་བྱས་མེད་ཅེས་ལབ་ནའང་ཆོག་པ་ཡིན།
དོན་དངོས་ཐོག་ཁྱོད་ཀྱིས་ཅི་ཞིག་རྩོད་གླེང་བྱས་པ་དེ་ནི་ཡུ་གུར་གྱི་འགྲོ་བ་མིའི་ཐོབ་ཐང་ཙམ་རེད། དེ་ལྟ་ནའང་། དེས་ཏག་ཏག་ཁྱོད་ཀྱིས་ཚེ་བཙོན་གྱི་ཉེས་ཆད་ལྗིད་མོ་འཁུར་དགོས་ཐུག་པར་བརྟེན། ངས་ཁྱོད་རང་ཡང་ང་ཚོ་བོད་མི་ཞིག་དང་འདྲ་བར་ཧ་ཅང་ལས་ངན་ཞིག་ཅེས་ཁ་ནས་རང་དབང་མེད་པར་ཤོར་སོང་།
ཇི་ལྟར་བསམ་ན་དེ་ལྟར་ཁྱོད་མི་ལས་ངན་ཞིག་རེད། གལ་སྲིད་ཁྱོད་ཀྱིས་དངོས་གནས་ཡུ་གུར་རང་བཙན་གྱི་ལམ་དུ་ཁྲིད་ཡོད་པའི་དབང་དུ་བཏང་ཞིང་དེ་ཡང་དབྱིན་ཡུལ་དུ་ཡིན་པའི་བཏང་ན། དེ་ནི་ནག་ཉེས་ཤིག་གཏན་ནས་ཡིན་མི་སྲིད་པའམ་ནག་ཉེས་ཤིག་ཏུ་གཏན་ནས་འགྱུར་མི་སྲིད་པ་ཡིན་ལ། ཡང་གཅིག་བཤད་ན། ཁྱོད་ཀྱི་ངོ་གདོང་དེ་རྒྱ་མི་ཞིག་གི་ངོ་གདོང་ཡིན་ཚེ། ཁྱོད་ཀྱི་རྩོམ་ཡིག་གམ་ཁྱོད་ཀྱི་སྐད་ཆ་དེས་ཁྱོད་ཀྱིས་ཚེ་བཙོན་གཏན་ནས་འཁུར་དགོས་མི་སྲིད། འོན་ཀྱང་། ཁྱོད་ཀྱི་ངོ་གདོང་དེ་ནི་ཡུ་གུར་བའི་ངོ་གདོང་ངོ་མ་ཞིག་ཡིན་སྟབས། ཁྱོད་ཀྱི་སྐད་ཆ་དེས་ཁྱོད་ཚེ་བཙོན་དུ་བརྫངས་པ་རེད།
ལྗགས་རྩོམ་ཡག་པོ་འདུག