དཀའ་ངལ་ཆུང་ལ་ཁྱབ་རྒྱ་ཆེ་བའི་བོད་དོན་དྲིལ་བསྒྲཊ།

གནས་ཚུལ་བཏང་འབྱོར་བྱུང་བ་ལྟར་ན། ཟླ་འདིའི་ཕྱི་ཚེས་ ༥ ཉིན། ན་དབྱིན་ཡུལ། ཝེལ་སི་ཁར་ཌེ་ཧྥི། (Wales Cardiff) རུ་སྐད་གྲགས་ཡོད་པའི་ལོ་རེའི་རྒྱུག་རྩེད་འགྲན་ཚོགས་ཆེན་མོ་(Cardiff Half Marathon)ཞེས་པ་དེ་བསྡུས་ཡོད་པ་དང་། དེར་འཛམ་གླིང་གི་ལུས་རྩལ་བ་མིང་གྲགས་ཅན་མང་དག་ཅིག་གིས་སྣེ་ཁྲིད་པའི་རྩེད་འགྲན་པ་ ༢༡༠༠༠ ཙམ་ཞུགས་བྱས་ཡོད་པའི་ཁྲོད་བོད་རིགས་ན་གཞོན་གཟའ་རུ་ཉི་མ་ལགས་སུ་བྱ་དགའ་ཞིག་ཐོབ་ཡོད་འདུག

རྒྱུག་འགྲན་དེ་ཉིན་དེའི་ཞོགས་པའི་ཆུ་ཚོད་ ༩ པའི་སྟེང་མགོ་འཛུགས་གནང་སྟེ། ལོ་རྒྱུས་རང་བཞིན་ལྡན་པའི་གྲོང་དང་གྲོང་ཁྱེར་གྱི་ཁང་བརྩེགས། སྐྱེད་མོས་ཚལ། རང་བྱུང་མཛེས་ལྗོངས་སོགས་བརྒྱུད་དེ་རྒྱུག་ཤར་གློད་པའི་ཁྲོད། བོད་དོན་ལས་འགུལ་བ་གཟའ་རུ་ཉི་མ་ལགས་དང་། ཁོང་གི་བཟའ་ཟླ་རྗོར་ཇེ་(Georgie)སོགས་ནང་མི་བཞི་ཡིས་(Free Tibet)བོད་རང་དབང་ཞེས་བྲིས་པའི་སྟོད་ཐུང་སྔོ་སྐྱ་རེ་གྱོན་ཏེ་ལག་ཏུ་བོད་ཀྱི་རྒྱལ་དར་འཕྱར་ཏེ་བོད་དོན་དྲིལ་བསྒྲགས་གནང་ཡོད་འདུག

རྒྱུག་འགྲན་པ་དང་ལྟད་མོ་བ་མང་པོས་ཁོང་གཟའ་མི་བཞི་ལ་དོ་སྣང་ཆེན་པོ་བྱས་ཡོད་པ་མ་ཟད། སྐབས་དེར་ཕྱི་རྒྱལ་བ་མང་པོས་ཁོ་ལ་བོད་པའི་སྐོར་གྱི་སྐད་ཆ་འདྲི་བ་དང་། བོད་དོན་ལ་རྒྱབ་སྐྱོར་གྱི་འབོད་སྒྲ་ཆེན་པོ་བརྒྱབ་ཡོད་པ་མ་ཟད། གསར་འགོད་པ་མང་པོ་ཞིག་གིས་ཀྱང་ཁོང་ལ་དོ་སྣང་ཆེན་པོས་དྲི་བ་སོགས་བཏང་ཡོད་འདུག

གཟའ་རུ་ཉི་མ་ལགས་ཀྱིས་བརྗོད་དོན། རྩེད་འགྲན་འདི་རིགས་ནམ་རྒྱུན་དགེ་རྩ་ཚོགས་པ་(Charity)རེས་བཀོད་སྒྲིག་བྱེད་ཀྱིན་ཡོད་སྟབས་མི་མང་གིས་ལས་འགུལ་དེར་ཆེ་མཐོང་བྱེད་ཅིང་། དེའི་ནང་སྔོན་ཚུད་ནས་ཐོ་འགོད་ཀྱིས་དངུལ་ཏོག་ཙམ་སྤྲོད་དགོས་པ་ལས་དེར་མི་ཚུད་པའི་དཀའ་ངལ་མེད་ཀྱང་། བོད་མི་ཚོས་འདི་འདྲའི་རིགས་ལ་དོ་སྣང་མི་བྱེད་སྟབས། བོད་དོན་ཁྱབ་བསྒྲགས་ཀྱི་གོ་སྐབས་ཡག་པོ་ཞིག་ཤོར་གྱི་འདུག་ཅེས་སོགས་བརྗོད་འདུག

གཟའ་རུ་ཉི་མ་ལགས་ནི། དབྱིན་ཡུལ་དུ་གནས་སྡོད་བྱེད་མཁན་བོད་ཞིག་ཡིན་ལ། ཁོང་གིས་ཡུལ་དེར་སྤྱི་ཚོགས་ཞབས་ཞུ་སྒྲུབ་ཞོར་(SaveTibetWales) ཞེས་པའི་ཚོགས་པ་བཙུགས་ཏེ། ཁཱར་མར་ཐེན་དཔེ་མཛོད་ཁང་དང་། (carmarthen library) སི་ཝན་སེ་སློབ་གྲྭ་ཆེན་མོ། (Swansea University) ལཱམ་སྦེ་ཐྲེར་སློབ་གྲྭ་ཆེན་མོ།(Lambeter University)སོགས་སུ་བོད་དོན་ལས་འགུལ་རབས་དང་རིམ་པ་སྤེལ་ཡོད་པ་དང་། གཞན། བཙན་བྱོལ་བོད་མི་དཀའ་ངལ་ཅན་ཚོར་སློབ་ཡོན་དང་སྨན་ཡོན་སོགས་ལ་རོགས་རམ་ཡང་གནང་ཡོད་འདུག་ལ། ཁོང་གིས་ད་ལོ་གཟའ་རུ་བོད་ཀྱི་ཐེབས་རྩ་ཚོགས་པ་(Zari Tibet Found )www.zaritibet.org ཞེས་ཞིག་ཀྱང་བཙུགས་ཡོད་འདུག