ཉེ་ལམ་༧གོང་ས་མཆོག་གིས་ཨ་རིའི་ནེའུ་ཡོག་དང་ནེའུ་འཇར་སེ་བོད་རིགས་མི་མང་ལ་བཀའ་སློབ་གནང་སྐབས། ང་ཚོའི་སྟོབས་ཤུགས་ཡོང་ས་ནི་བདེན་པ་དང་། འཚེ་བ་མེད་པ། ཀུན་ལ་ཕན་པའི་སྟོབས་ཤུགས་དང་། གུང་ཁྲན་ཏང་གི་སྟོབས་ཤུགས་ཡོང་ས་མེ་མདའ་རེད། འཕྲལ་དུ་མེ་མདའི་སྟོབས་ཤུགས་དེ་ཆེ་བ་ཡོད་ཀྱང་ཕུགས་རྒྱང་རིང་པོའི་ཆ་ནས་བདེན་པའི་སྟོབས་ཤུགས་ཆེ་བ་ཡིན་ཞེས་གསུངས།
ཟླ་ ༡༡ ཚེས་ ༥ ཉིན་༧གོང་ས་མཆོག་གྲོང་ཁྱེར་ནེའུ་ཡོག་གི་(Javits Center) ཞེས་པའི་ཚོགས་ཁང་ཆེན་མོའི་ནང་ནེའུ་ཡོག་དང་ནེའུ་འཇར་སེ་བོད་རིགས་མི་མང་ ༥༠༠༠ བརྒལ་བར་བཀའ་སློབ་གནང་བའི་ནང་དོན་འདིར་བསྡུ་བསྒྲིགས་བྱས་ཡོད། ༧གོང་ས་མཆོག་གིས་མི་མང་ལ་འཚམས་འདྲི་དང་བཅས་གསུངས་དོན། བོད་གངས་ཅན་པ་ཆོས་གྲོགས་ཕོ་མོ་ལྷན་རྒྱས་ལ་ཞུ་རྒྱུར། དེ་རིང་བོད་མི་སྟོང་ཕྲག་བཞི་ལྔ་ཞིག་འདིར་ལྷན་དུ་འཛོམས་པར་བརྟེན་སེམས་ནང་བོད་ལ་སླེབས་པ་མིན་ནམ་བསམ་པ་ལྟ་བུ་ཞིག་འདུག རྒྱ་གར་ནས་ཚུར་ཁྲིམས་མཐུན་བྱས་ནས་ཡོང་པ་ཡིན་ནའང་འདྲ། ཁྲིམས་འགལ་བྱས་ནས་ཡོང་པ་ཡིན་ནའང་འདྲ། གང་ལྟར་འདིར་སླེབས་པའི་རྗེས་ལ་བོད་མིའི་ངོ་བོ་དང་སྤྱི་སེམས་མ་ཉམས་པ་ཡོད་པར་ཚང་མར་བཀའ་དྲིན་ཆེ་ཞུ་རྒྱུ་ཡིན། ཁྱེད་རང་ཚོར་ཨ་རིར་སླེབས་ནས་ཕྲུ་གུ་མང་པོ་བཟོས་འདུག ཕྲུ་གུ་འདི་དག་བོད་མི་འཁྲུལ་མེད་ཅིག་ཡོང་ཆེད་བོད་ཡིག་སློབ་པ་སོགས་ཐབས་ཤེས་ཡོད་རྒུ་རྩལ་སྤྲུགས་བྱེད་ཀྱིན་ཡོད་པ་ཧ་ཅང་ཡག་པོ་རེད་ཐུགས་རྗེ་ཆེ།
ལས་བསྡོམས་ནང་ཕྲུ་གུ་ཚོར་སྐྱབས་འགྲོ་སེམས་སྐྱེད་ཀྱིས་མཚོན་པའི་ཞལ་འདོན་བསླབ་པའི་སྐོར་བྲིས་འདུག བོད་ཀྱི་ནང་ཆོས་བསླབ་ཅེས་པ་ནི་སྐྱབས་འགྲོ་སེམས་སྐྱེད་ཤོ་ལོ་ཀ་གཅིག་བཏོན་ཏེ་བསྡད་པས་འགྲིག་གི་མེད། སངས་རྒྱས་ཆོས་དང་ཚོགས་ཀྱི་མཆོག་རྣམས་ལ་ཞེས་ངང་རྒྱུད་རིང་པོ་བྱས་ཏེ་ནེ་ཙོ་ལ་བསླབ་ན་ཕལ་ཆེར་ཤེས་ཀྱི་རེད། ནང་ཆོས་ནི་ཚིག་སྐམ་པོ་ཞིག་བཏོན་ནས་སྡོད་རྒྱུ་མ་ཡིན་པར་སངས་རྒྱས་དང་ཆོས། དགེ་འདུན་བཅས་ཀྱིས་རྒྱུ་དང་རྐྱེན་གང་ལ་བརྟེན་ནས་བྱུང་བ་དང་། ངོ་བོ་ཅི་འདྲ་ཡིན་པ། བྱེད་ལས་སམ་འབྲས་བུ་ཅི་འདྲ་ཡིན་པ་སོགས་འགྲེལ་བཤད་རྒྱག་དགོས།
གཞན་ཡང་། གཙོ་ཆེ་གཞིས་ལུས་རྒྱ་ཆེའི་མི་མང་ནི་ང་ཚོའི་དོན་གྱི་བདག་པོ་རེད། ཁོང་ཚོར་དུས་ད་ལྟ་བར་དུ་དཀའ་ངལ་སྣ་ཚོགས་འཕྲད་ཡོད། རྒྱ་ནག་གཞུང་གིས་སྲིད་བྱུས་འཇམ་རྩུབ་ཐབས་ཤེས་སྣ་ཚོགས་བྱས་ཏེ་ལོ་དྲུག་ཅུ་བརྒལ་བ་འགྲོ་བཞིན་ཡོད། ཡིན་ནའང་། བོད་མིའི་སེམས་ཤུགས་ལ་འགྱུར་བ་གཏོང་ཐུབ་ཡོད་པ་མ་རེད། རྒྱ་མི་རིགས་སོ་སོའི་རིག་གཞུང་ལ་ཞེན་ཁོག་ཡོད་པ་ལྟར། བོད་ནང་བོད་མི་ཚོ་སོ་སོའི་ཆོས་དང་རིག་གཞུང་ལ་དགའ་ཞེན་གྱིས་ཧ་ཅང་བརྟན་པོ་འདུག དེར་བརྟེན་ང་ཚོ་བཙན་བྱོལ་བ་ཉུང་ཤས་ཡིན་ཡང་། རང་དབང་གི་གོ་སྐབས་ཐོབ་ཡོད་སྟོབས་གཞིས་ལུས་རྒྱ་ཆེའི་མི་མང་གི་སེམས་ཤུགས་དང་སྙིང་སྟོབས་ཀྱི་ཚབ་བྱ་རྒྱུའི་འགན་འཁུར་དགོས།
བོད་རྒྱ་ཆེའི་མི་མང་རྣམས་དེ་སྔ་དགའ་ལྡན་ཕོ་བྲང་གཞུང་གི་ཁྱབ་ཁོངས་ཡིན་མིན་གྱི་སྐད་ཆ་མེད་པར་བོད་ཆོལ་ཁ་གསུམ་གྱི་བོད་རིགས་མཆིས་སོ་ཅོག་ཆིག་སྒྲིལ་གྱི་འདུ་ཤེས་ཤུགས་ཆེན་པོ་ཆགས་ཡོད། བོད་ཀྱི་ཆོས་དང་རིག་གཞུང་སྐོར་ལ་རྩོམ་ཡིག་འབྲི་བ་སོགས་ཞབས་འདེགས་སྒྲུབ་མཁན་ཤུགས་ཆེ་ཤོས་མདོ་སྨད་ཁུལ་ནས་ཡོང་གི་འདུག དབུས་གཙང་ཁུལ་ནས་ཉུང་བ་དང་མདོ་སྟོད་ཁུལ་ནས་གང་འཚམས་ཡོང་གི་འདུག རྐྱེན་ངན་པ་དང་སེམས་སྐྱོ་པོ་རེད་ཀྱང་རང་ལུས་མེར་བསྲེགས་གཏོང་མཁན་ཡང་མཚོ་སྔོན་དང་ཀན་སུ། ཟི་ཁྲོན་བཅས་དེ་སྔ་དགའ་ལྡན་ཕོ་བྲང་གཞུང་གི་ཐད་ཀའི་ཁྱབ་ཁོངས་ལ་མེད་པ་དེ་དག་ནས་མང་བ་ཡོང་གི་འདུག གཞིས་ལུས་རྒྱ་ཆེའི་མི་མང་ཆོལ་ཁ་གསུམ་གཅིག་ཏུ་བསྒྲིལ་ནས་བོད་ཁ་བ་གངས་ཅན་པ་ཞེས་པའི་མིང་ཚིག་གཅིག་གི་འོག་སྟོབས་ཤུགས་གཅིག་སྒྲིལ་བྱས་ནས་བསྡད་ཡོད། ང་ཚོ་བཙན་བྱོལ་ལ་ཡོད་པ་ཚོའང་དེ་བཞིན་བྱས་ཏེ་ཆོལ་གསུམ་ཆིག་སྒྲིལ་གྱི་ཐོག་ནས་གོང་བུའི་ནུས་ཤུགས་འདོན་རྒྱུ་ཤིན་ཏུ་གལ་ཆེ།
སྐབས་བབ་གོང་བུ་ཆིག་སྒྲིལ་གྱི་ནུས་པ་འདོན་རྒྱུར་ཆབ་སྲིད་ཐད་ལས་འགུལ་ངར་པོ་བྱས་པ་དེས་ནུས་པ་དེ་ཙམ་ཐོན་མི་ཐུབ། དེ་སྔ་མང་པོ་བྱུང་བ་རེད། གལ་ཆེ་ཤོས་ང་ཚོའི་ཆོས་དང་རིག་གཞུང་ལ་བདག་པོ་རྒྱག་དགོས། བོད་རིགས་མཆིས་སོ་ཅོག་དང་། བལ་ཡུལ་ཁུལ་ནས་ཡོང་བའི་ཤར་པ་དང་རྟ་མང་སོགས་ཆོས་དང་རིག་གཞུང་གཅིག་པ་རེད། དེ་བཞིན་རྒྱ་གར་གྱི་ནུབ་ལ་དྭགས་ནས་ཤར་མོན་བར་ཆོས་དང་རིག་གཞུང་བོད་དང་གཅིག་ཡིན་པས་ས་ཁུལ་དེ་དག་ནས་མི་གྲངས་སྟོང་ཕྲག་ལྔ་ཙམ་རང་རེའི་གྲྭ་ས་ཆེ་ཁག་ཏུ་ཕེབས་ནས་ཟ་མཉམ་འཐུང་མཉམ་བྱས་ཏེ་སློབ་གཉེར་བྱེད་བཞིན་ཡོད། བཅོམ་ལྡན་འདས་ཀྱིས་རིགས་རུས་ཀྱི་དབྱེ་བ་མེད་གསུངས་པ་བཞིན་རྒྱ་གར་ནང་གི་རིས་མེད་ཆོས་སྒར་བོན་དང་བཅས་པ་ཚང་མར་མི་རིགས་ཀྱི་དབྱེ་བ་མེད་པར་མཐུན་པོ་དང་འཆམ་པོ་བྱེད་རྒྱུ་གལ་ཆེན་པོ་ཡིན། རྭ་སྟོད་གྲྭ་ཚང་གི་མཁན་པོ་ད་ལྟ་ཨ་མི་རི་ཀའི་མི་རེད། ཁོང་གྲྭ་ས་ལ་དཔེ་ཆ་བལྟས་ཏེ་ད་ལྟ་མགོ་སེའི་གྲྭ་པ་ཞིག་གིས་བོད་ཀྱི་དགོན་པ་གལ་ཆེན་ཞིག་གི་མཁན་པོ་ཆགས་པ་དང་པོ་རེད། ང་ཚོར་མི་རིགས་ཀྱི་དབྱེ་བ་གང་ཡང་མེད།
ཐ་མལ་བའི་མི་ཞིག་ཡིན་ཕྱིན་ཆགས་སྡང་གི་བློ་ཕྲན་བུ་ཕྲན་བུ་ཡོང་གི་རེད། དེ་ཆེ་སའི་ཐོག་འཁྱེར་རྒྱུ་མེད། ཆུང་ས་ལ་ང་ཚོ་དང་ཁོ་ཚོ་ཞེས་ཕྱོགས་རིས་ཕྲན་བུ་ཡོང་གི་ཡོད་ཀྱང་། ཆེ་སའི་ཐོག་ནས་བོད་ཆོལ་ཁ་གསུམ་གོང་བུ་གཅིག་གྱུར་གྱི་ནུས་པ་སྟོན་དགོས་པ་རེད། ང་ཚོ་བཙན་བྱོལ་བ་བྱས་ཏེ་ལོ་ལྔ་བཅུ་ང་ལྔ་སོང་བའི་རིང་སེམས་ཤུགས་མ་ཆག་པའི་འབྲས་བུར་དེང་སང་རྒྱ་རིགས་ནང་ལིའུ་ཤོ་པོ་སོགས་ཤེས་ཡོན་ཅན་བོད་པར་རྒྱབ་སྐྱོར་བྱེད་མཁན་ཇེ་མང་ཇེ་མང་དུ་འགྲོ་བཞིན་ཡོད། ལོ་ཤས་སྔོན་ནས་ཨ་རི་དང་ཁེ་ན་ཊ། ཡོ་རུབ་ཁུལ་སོགས་ལ་ཡོད་པའི་བོད་རིགས་ཚོར་ངེས་པར་དུ་རྒྱ་རིགས་རྣམས་དང་ཐུག་ནས་དངོས་ཡོད་གནས་ཚུལ་འགྲེལ་བཤད་རྒྱག་རྒྱུ་གལ་ཆེན་པོ་འདུག་ཅེས་བརྗོད་པ་ཡིན། དེ་ནས་རྒྱ་བོད་མཛའ་མཐུན་ཚོགས་པ་བཙུགས་ནས་ལས་ཀ་བྱེད་ཀྱི་ཡོད་པ་རེད། དེང་སང་རྒྱ་རིགས་ནང་ལ་བོད་ཀྱི་ཆོས་དང་རིག་གཞུང་ལ་དོ་སྣང་བྱེད་མཁན་ཧ་ཅང་མང་པོ་རེད། རྒྱ་རིགས་ཁྲོད་ནང་ཆོས་བྱེད་མཁན་དུང་ཕྱུར་བཞི་ཙམ་འདུག དེའི་ནང་ནས་མང་པོ་ཞིག་གིས་བོད་ཀྱི་ནང་ཆོས་ལ་དོ་སྣང་བྱེད་ཀྱི་འདུག
དེ་མིན་རིག་གཞུང་དང་ཁོར་ཡུག་ལ་དོ་སྣང་བྱེད་མཁན་རྒྱ་རིགས་མང་པོ་ཞིག་གིས་དམིགས་བསལ་བོད་ཀྱི་ཐོག་ལ་དོ་སྣང་བྱེད་ཀྱི་འདུག ང་ཚོས་དབུ་མའི་ལམ་ཞེས་རང་རྒྱལ་གཞན་ཕམ་དང་། གཅིག་རྒྱལ་གཅིག་ཕམ་མ་ཡིན་པར་གཉིས་ཕན་ཡོང་བའི་འབད་བརྩོན་བྱས་ཡོད། དེའི་གྲུབ་འབྲས་ལ་རྒྱ་ནག་གི་ཤེས་ཡོན་ཅན་དང་མི་མང་ཁྲོད་ནས་ང་ཚོར་སྙིང་ཉེ་བོ་བྱས་ཏེ་འབྲེལ་བ་བྱེད་མཁན་ཡར་རྒྱས་སོང་ཡོད། དེ་དང་ཆབས་ཅིག་རྒྱ་ནག་མཐོ་རིམ་མགོ་ཁྲིད་ཚོའི་ཁྲོད་དུའང་ནང་པའི་ཆོས་ལ་དོ་སྣང་བྱེད་མཁན་དང་། ནང་ཆོས་ལ་དོ་སྣང་མེད་པ་ཡིན་ནའང་སྤྱི་ཡོངས་ཀྱི་བསམ་བློ་གཏོང་དུས་བོད་ཀྱི་གནས་ཚུལ་ཐད་ལོ་མང་ཕྱིན་ཡང་སེམས་ཀྱི་གཏིང་ནས་མཐུན་འབྲེལ་ཟེར་བ་དེ་ཡོང་གི་མེད་པ་ལ་ངོས་ལེན་མ་བྱས་རང་བྱས་ཆགས་ཡོང་དུས་དོ་སྣང་གསར་བ་ཞིག་སླེབ་ཀྱི་འདུག དེར་བརྟེན་ང་ཚོས་ལོ་ང་བཅུ་ང་ལྔའི་རིང་ལ་སེམས་ཤུགས་མ་ཆག་པར་ཚང་མས་ཧུར་ཐག་བྱས་པ་རེད། ང་ཚོའི་ཐབས་ལམ་དེའང་དངོས་ཡོད་གནས་ཚུལ་ལ་རན་པ་ཞིག་གི་སྒང་ལ་ཕྱིན་པ་དེའི་འབྲས་བུ་ད་ལྟའང་གང་ལ་གང་འཚམས་ཐོན་ཡོད་ལ། ད་དུང་ཡང་འབྲས་བུ་ཐོན་གྱི་རེད་སྙམ་གྱི་འདུག ངོས་ནས་རྟག་ཏུ་བརྗོད་པར་ང་ཚོ་རྒྱ་བོད་གཉིས་ཀྱི་འཐབ་རྩོད་དེ་ཕྱོགས་གཅིག་ནས་དྲག་པོའི་སྟོབས་ཤུགས་དང་བདེན་པའི་སྟོབས་ཤུགས་བར་གྱི་འཐབ་རྩོད་རེད། ང་ཚོའི་སྟོབས་ཤུགས་ཡོང་ས་ནི་བདེན་པ་དང་། འཚེ་བ་མེད་པ། ཀུན་ལ་ཕན་པའི་སྟོབས་ཤུགས་དང་། གུང་ཁྲན་ཏང་གི་སྟོབས་ཤུགས་ཡོང་ས་མེ་མདའ་རེད། འཕྲལ་དུ་མེ་མདའི་སྟོབས་ཤུགས་དེ་ཆེ་བ་ཡོད་ཀྱང་ཕུགས་རྒྱང་རིང་པོའི་ཆ་ནས་བདེན་པའི་སྟོབས་ཤུགས་ཆེ་བ་ཡིན། འཛམ་གླིང་གང་ལ་བལྟས་ནའང་བདེན་པའི་སྟོབས་ཤུགས་དེ་རིམ་པས་མེད་པར་མི་འགྲོ་བ་དང་། དྲག་པོའི་སྟོབས་ཤུགས་ནི་འཕྲལ་སེལ་ས་ཆོད་ཆེ་བ་ལྟ་བུ་ཡོད་ཀྱང་ཕུགས་རྒྱང་བརྟན་པོ་མེད། ཆབ་སྲིད་ཀྱི་འགྱུར་བའི་ཐོག་ནས་བཤད་ནའང་བཟང་ཕྱོགས་སུ་འགྱུར་བ་འགྲོ་བཞིན་ཡོད་པ་ཧ་ཅང་གསལ་པོ་རེད། ཅེས་དང་།
ངོས་རང་ཆུང་ཆུང་སྐབས་ལྷ་སར་ཡོད་དུས་ནས་དབང་ཆ་མི་རེ་ཟུང་གི་ལག་ཏུ་ཡོད་པས་དྲུང་ཡིག་ཆེན་མོ་ཚོར་འབྱར་འབྱར་འདྲ་བོ་བྱེད་དགོས་ཀྱི་ཡོད། ཁྲིམས་ཀྱི་འགྲོ་སྟངས་ཤིག་ཡོད་པ་མ་རེད། དབང་འཛིན་མཁན་ཚོར་འབྲེལ་བ་ཡག་པོ་ཡོད་མིན་གྱི་ཐོག་གནས་དབང་ཆའི་སྟེང་མང་པོ་ཡོང་གི་ཡོད། དེ་ལ་འགྱུར་བ་གཏོང་དགོས་བསམ་པ་ཞིག་དེ་དུས་ནས་ཡོད། ཅེས་དང་།
མཇུག་ཏུ་དོལ་རྒྱལ་སྐོར་ལ་བཀའ་གནང་དོན། ཁོ་ཚོ་ཁ་ཤས་ཀྱིས་ཆོས་དད་རང་མོས་ཞེས་བཤད་ཀྱི་འདུག དེ་ནི་བསམ་བློ་ཡག་པོ་ཞིག་ཐོངས་དང་། ངོས་ཀྱིས་དོལ་རྒྱལ་མཚམས་འཇོག་མ་བྱས་པར་དུ་ང་རང་ལ་ཆོས་དད་རང་མོས་ཡོད་པ་མ་རེད། ཁུ་ནུ་བླ་མ་རིན་པོ་ཆེའི་དྲུང་ནས་བྱང་ཆུབ་སེམས་འགྲེལ་ཞུས། དེ་ནས་སྤྱོད་འཇུག་གི་ལྗགས་ལུང་ཞུས་པ་ཡིན། མཚམས་ཤིག་ནས་ཁུ་ནུ་བླ་མ་རིན་པོ་ཆེའི་སྐུ་མདུན་ནས་རྒྱུད་གསང་བ་སྙིང་པོའི་ལྗགས་ལུང་ཞིག་ཞུ་ཐུབ་ན་བསམ་ནས་གླིང་རིན་པོ་ཆེ་ལ་དགོངས་སྐོར་ཞུས་པ་ཡིན། སྐབས་དེར་ཁོང་གིས་ཞལ་འཛུམ་ནས་དེ་མ་ཞུ་དོལ་རྒྱལ་གྱིས་གནོད་ཡོང་། ཡག་པོ་ཡོད་པ་མ་རེད་གསུངས་བྱུང་། དོལ་རྒྱལ་བསྟེན་རྒྱུ་མཚམས་འཇོག་བྱས་རྗེས་ཁུ་ནུ་བླ་མ་རིན་པོ་ཆེ་དང་། དིལ་མགོན་མཁྱེན་བརྩེ་བཅས་ཀྱི་སྐུ་མདུན་ནས་ཕུར་བའི་དབང་གིས་མཚོན་པའི་རྫོགས་ཆེན་གྱི་གཞུང་མང་པོ་ཞུས་པ་ཡིན། དེར་བརྟེན་ངོས་ཀྱིས་དོལ་རྒྱལ་མཚམས་འཇོག་མ་བྱས་པར་དུ་ཆོས་དད་རང་མོས་བྱུང་ཡོད་པ་མ་རེད། ཆོས་དད་རང་མོས་ཀྱི་སྐད་ཆ་བཤད་དགོས་བྱུང་ན་དེ་ལྟར་རེད། ལར་ནས་སྐྱབས་རྗེ་ཁྲི་བྱང་རིན་པོ་ཆེས་ཀྱང་ངོས་ལ་གསུངས་མྱོང་། དོལ་རྒྱལ་དྲེགས་པ་རེད། སྐྱབས་རྗེ་ཕ་བོང་ཁ་པ་རིན་པོ་ཆེའི་ལྗགས་བཀོད་གནང་བའི་བླ་མ་མཆོད་པའི་ཚོགས་ཞིང་ནང་དོལ་རྒྱལ་ཡོད་པ་མ་རེད། ཅེས་དང་། ངོས་ཀྱིས་ཐོག་མ་ཉིད་ནས་དོལ་རྒྱལ་ཡོང་སྟངས་འདི་འདྲ་རེད། ཡིན་ནའང་། དོལ་རྒྱལ་བསྟེན་དང་མི་བསྟེན་ཟེར་བ་དེ་སོ་སོ་རང་ཉིད་ཀྱིས་བསམ་བློ་བཏང་ནས་ཐག་གཅོད་རྒྱུ་མ་གཏོགས་ངས་བཀའ་ཕབ་རྒྱུ་ཡོད་པ་མ་རེད། ངོས་སྒེར་གྱིས་དངོས་སུ་ཉམས་མྱོང་གི་ཐོག་ནས་གནས་ཚུལ་གང་ཡིན་པ་དེ་བཤད་དགོས་རྒྱུ་ངའི་ལས་འགན་རེད། བཤད་པ་དེ་ཉན་དང་མ་ཉན་སོ་སོའི་བསམ་བློ་གཏོང་རྒྱུ་ལས་ངས་བཤད་པ་དེ་ལ་ཉན་དགོས་ཡོད་ཅེས་ནམ་ཡང་བཤད་མེད། ཁ་ཆེ་ཕ་ལུའི་སྙིང་གཏམ་བཤད་ཡོད་དོ།། ཉན་དང་མི་ཉན་སོ་སོའི་བསམ་བློ་རེད།། ཅེས་དེ་སྔ་གཙུག་ལག་ཁང་དུ་འཚོགས་དུ་ཤིག་ལ་བཤད་ཡོད། དེ་ཁོ་ཚོས་ཤེས་ཀྱི་མི་འདུག སོ་སོས་བསྟེན་གྱི་ཡིན་ན་བསྟེན། འདི་མགོ་ཚོས་པ་བྱོས། ཅེས་སོགས་གསུངས་སོང་།
