ཉེ་ལམ་རྒྱ་ནག་གི་ཨ་རིར་ཕྱི་སྐྱོད་སློབ་མའི་ཐོངས་ཆན་དུས་ཡུན་ཇེ་རིང་དུ་བཏང་པ་དང་བསྟུན་ཏེ་རྒྱ་ནག་གི་ཤེས་ཡོན་པ་དང་ཆབ་སྲིད་པའི་ཁྲོད་གླེང་སློང་དང་སེལས་འཁྲལ་གསར་པ་ཞིག་འབྱུང་བཞིན་ཡོད་འདུག
བདུན་ཕྲག་སྔོན་མའི་ནང་པེ་ཅིན་དུ་ཨེ་ཤ་ཡའི་དཔལ་འབྱོར་གླེང་སྟེགས་ཞེས་པའི་ཚོགས་འདུ་ཚོགས་པ་དང་བསྟུན་ཏེ། ཨ་རིའི་སྲིད་འཛིན་ཨོ་བྷ་མ་རྒྱ་ནག་ཏུ་བསྐྱོད་དེ། རྒྱ་ནག་གི་སྲིད་འཛིན་ཞི་ཅིན་ཕིན་དང་མཉམ་དུ། རྒྱ་ནག་ནས་ཨ་རིར་ཕྱི་སྐྱོད་བྱེད་པའི་སློབ་མའི་ཐོངས་མཆན་དུས་ཡུན་ལོ་ ༡ ནས་ལོ་ ༥ ལ་བསྲིངས་པ་དང་། ཡུལ་སྐོར་སྤྲོ་འཆམ་པ་དང་ཚོང་པའི་ཐོངས་མཆན་ལོ་ ༡ ནས་ལོ་ ༡༠ ལ་བསྲིངས་ཡོད་འདུག
རྒྱ་ནག་སློབ་གསོ་སྡེ་ཁག་གི་ཞིབ་འཇུག་སྙན་ཐོ་ལྟར་ན། ༢༠༡༣ ལོར་ཕྱི་རྒྱལ་ཁག་ཏུ་སློབ་སྦྱོང་བྱེད་བཞིན་པའི་རྒྱ་ནག་གི་སློབ་ཕྲུག་ ༤༡༣༩༠༠ ལྷག་ཡོད་པའི་ནང་ཨ་རིར་སློབ་མ་ ༢༣༥༥༩༧ ཙམ་ཡོད་པ་དང་། དེས་རྒྱ་ནག་གི་ཕྱི་སྐྱོད་ལོ་མ་ཡོངས་ཀྱི་རྒྱ་ཆ་ ༥༧ ཙམ་ཟིན་ཡོད་འདུག དེའི་ཁྲོད་མཐོ་འབྲིང་སློབ་མ་ཁྲི་ ༣ ཙམ་ཡོད་འདུག
རྒྱ་ནག་གི་ཕྱི་སྐྱོད་སློབ་མའི་སྐོར་ལ། རྒྱ་ནག་གི་ཆབ་སྲིད་པ་དང་ཉམས་ཞིབ་པ་ཚོའི་ཁྲོད་གླེང་ཕྱོགས་གསར་པ་ཞིག་ཡོང་གི་ཡོད་པ་ནི། རྒྱ་ནག་གི་སློབ་མ་ཕོན་ཆེན་པོ་ཕྱི་རྒྱལ་ཁག་ཏུ་བསྐྱོད་དེ་སློབ་སྦྱོང་བྱས་ཏེ་ཕྱིར་ལོག་ཚེ། རྒྱ་ནག་གི་ཤེས་ཡོན་ལམ་ལུགས་ལ་གཞན་དབང་འོག་བཅོས་བསྒྱུར་ཐེབས་སྲིད་པའི་ཉེན་ཁ་ཡོད་པ་དང་གཅིག རྒྱ་ནག་གི་སློབ་ཕྲུག་དྲག་ཤོས་དག་ཕྱི་རྒྱལ་དུ་ཕྱིན་ན་རྒྱ་ནག་གི་སློབ་གྲྭ་མང་པོ་ཞིག་ཏུ་སློབ་ཕྲུག་ཇེ་ཉུང་དུ་འགྲོ་བཞིན་པའི་ཁར་རྒྱ་ནག་ནང་གི་སློབ་གྲྭའི་སྤུས་ཚད་ཀྱང་ཇེ་ཞན་དུ་འགྲོ་རྒྱུ་ཡིན་པ་དང་གཉིས། རྒྱ་ནག་གི་ཕྱི་སྐྱོད་སློབ་མ་གཅིག་གི་ད་ལྟའི་ལོ་རེའི་འགྲོ་སོང་རྒྱ་སྒོར་ཁྲི་ ༢༥ ཡིན་པ་དང་། ཕྱི་སྐྱོད་སློབ་མ་ཡོངས་ཀྱི་ལོ་གཅིག་གི་འགྲོ་གྲོན་རྒྱ་སྒོར་དུང་ཕྱུར་ ༨༠༠ ལྷག་ཆགས་ཏེ་མ་དངུལ་ཕོན་ཆེན་པོ་ཕྱི་རྒྱལ་དུ་ཤོར་གྱིན་ཡོད་སྟབས། མ་དངུལ་དེ་དག་རྒྱ་ནག་ནང་ཁུལ་གྱི་སློབ་གྲྭ་དང་སློབ་གསོའི་ཐོག་གཏོང་ཐུབ་ཚེ་གྲུབ་འབྲས་ཆེན་པོ་འཐོན་ཐུབ་པ་དང་གསུམ་བཅས། རྒྱ་ནག་གི་སློབ་ཕྲུག་མང་པོ་ཕྱི་རྒྱལ་དུ་སྐྱོད་བཞིན་པར་སྐྱོན་གནས་གསུམ་ངོས་འཛིན་འོག་སེམས་འཁྲལ་གསར་པ་ཞིག་འབྱུང་བཞིན་ཡོད་འདུག
རྒྱལ་སྤྱིའི་སྲིད་དོན་དབྱེ་ཞིབ་པ་ཚོས། རྒྱ་ནག་གི་ཕྱི་སྐྱོད་སློབ་མ་དེ་རྣམས་རིགས་གསུམ་ལ་འདུ་ཞིང་། ༡། རྒྱ་ནག་གི་མཐོ་རིམ་དབང་འཛིན་པ་དང་འབྱོར་ལྡན་ཁེ་ལས་པ་དག་གི་བུ་ཕྲུག་གཉེན་ཚན་ཡིན་པ་དང་། ༢། རྒྱ་ནག་གི་སློབ་གྲྭ་ཁག་ལས་སློབ་སྦྱོང་གི་གྲུབ་འབྲས་ཡག་ཤོས་དག་ཡིན་པ། ༣། རྒྱ་ནག་ནང་ཡིག་རྒྱུགས་མ་འཕྲོད་པའི་བྱིས་པ་ལང་ཤོར་དང་རིག་རྟུལ་དག་ཡིན་སྟབས། རིགས་དང་པོ་གཉིས་པ་ཚོ་འཕྲལ་ཕུགས་ཀྱི་བདེ་འཇགས་ཆེད་ཐོག་མ་ནས་ཕྱིར་ལོག་རྩིས་མེད་པར་འཆར་གཞི་ལྡན་པའི་ཐོག་ནས་ཕྱི་སྐྱོད་བྱས་ཡོད་སྟབས། རྒྱ་ནག་གི་སློབ་གསོའི་བྱ་བར་ཤུགས་རྐྱེན་ཐེབས་མི་སྲིད་པ་དང་། ཡིག་རྒྱུགས་མ་འཕྲོད་པའི་རིགས་འབྱོར་འབྲིང་གི་བྱིས་པ་ཡིན་སྟབས། རྒྱལ་ཁབ་ཀྱི་ཤེས་ཡོན་ལ་དོ་སྣང་མེད་པར་དཔལ་འབྱོར་འཚོལ་བསྒྲུབ་ཨང་དང་པོར་འཇོག་ངེས་ཡིན་སྟབས། གཞན་དབང་འོག་རྒྱ་ནག་གི་ཤེས་ཡོན་སྒྲོམ་གཞིར་འགྱུར་བ་ཐེབས་རྒྱུ་རེད་ཟེར་བ་དེ་སེམས་འཁྲལ་ལྷག་མ་ཞིག་རེད་ཟེར།
འོན་ཀྱང་རྒྱ་ནག་གི་ཕྱི་སྐྱོད་སློབ་མ་ལོ་རེ་ནས་ལོ་རེར་མང་དུ་འགྲོ་བཞིན་ཡོད་པ་དེས་རྒྱ་ནག་མི་མང་གི་བསམ་སྤྱོད་གུ་ཡངས་རང་དབང་གི་ཕྱོགས་སུ་སྐུལ་འདེད་གཏོང་རྒྱུ་ཡིན་པ་སྨོས་མེད་ཡིན་སྟབས། རྒྱ་ནག་གཞུང་གིས་ཀྱང་གནད་དོན་དེར་འདྲོག་མགོ་ལངས་ཏེ། ད་ལྟ་ནས་སྤྱི་ཚོགས་ནང་གླེང་ཕྱོགས་བཟོས་ཏེ་ཚོད་ལྟ་རང་བཞིན་གྱི་ཐོག་ནས་བསམ་ཚུལ་བསྡུས་ཏེ་ཆུ་མ་ཡོང་གོང་གི་རགས་སམ། ཡང་ན་བསམ་བློ་གཉིས་པ་ཞིག་གཏོང་རྒྱུར་གྲ་སྒྲིག་བྱེད་ཀྱིན་ཡོད་པར་ངོས་འཛིན་བྱེད་ཀྱིན་ཡོད།
རྒྱ་ནག་གི་ཤེས་ཡོན་པ་དང་མཐོ་རིམ་སློབ་ཕྲུག སློབ་མའི་ཕ་མ་ནང་མི་སོགས་མ་གཏོགས་ཆབ་སྲིད་དབང་འཛིན་པ་དང་འབྱོར་ལྡན་ཚོང་པའི་ཁྲོད་དུ། རྒྱལ་ཁབ་ཀྱི་ཁེ་ཕན་དང་སློབ་གསོའི་ཇུས་ཆེན་ལ་བསམ་བློ་གཏོང་མཁན་ཉུང་ཉུང་ཡིན། རྒྱལ་ཁབ་ལ་ཤ་ཚའི་གཏམ་སྤྱོད་སྤེལ་མཁན་འགའ་རེ་ཡོད་པ་དེ་དག་ཀྱང་མཐར་དེད་ན་ཁོ་ཚོ་སྒེར་གྱི་གོ་གནས་དང་ཁེ་ཕན་ཞིག་ལ་སྙེག་གི་ཡོད་སྟབས། རྒྱ་ནག་གི་སློབ་གསོའི་བྱ་བཞག་དེ་གནས་སྐབས་ཀྱི་ཆབ་སྲིད་མངོན་འདོད་སྒྲུབ་བྱེད་ཙམ་གྱི་ངོ་བོར་གྱུར་ཏེ་གཞུང་དམངས་བར་ན་སྐྱ་ཟད་སྔོ་གཏུགས་ཆགས་ཡོད།
ད་དུང་ཕྱིའི་ཤུགས་རྐྱེན་འགོག་ཆེད་ནང་གི་སློབ་གསོར་དུས་དང་བསྟུན་པའི་བཅོས་བསྒྱུར་ཆེན་པོ་ཞིག་མ་བཏང་ཚེ་རྒྱ་ནག་གི་ཕྱི་སྐྱོད་སློབ་མའི་ལམ་ཁ་འགོག་ཐབས་མེད་པ་མ་ཟད། རྒྱ་ནག་གི་སློབ་གསོའི་གནས་ཚད་སྔར་ལས་ཉམས་རྒུད་དང་རྒྱལ་སྤྱིའི་ཐོག་རྒྱ་ནག་གི་སློབ་གྲྭར་མཚན་མཐོང་མེད་པ། གཅིག་བྱས་ན་རིམ་གྱིས། རྒྱ་ནག་གི་ན་གཞོན་ཚོར་རང་རྟོག་གི་བསམ་བློ་དང་སློབ་ཕྲུག་གི་ནང་མིར་རང་དོན་གྱི་ཧམ་སེམས་སྐྱེས་ཏེ་རྒྱ་ནག་ནང་སློབ་གསོའི་གསར་བརྗེ་ལས་འགུལ་ཞིག་འབྱུང་སྲིད་པའི་ཚོད་དཔག་བྱེད་མཁན་ཡང་ཡོད་འདུག
གསར་འགོད་པ། དོན་འགྲུབ་བཀྲ་ཤིས།
དོན་འགྲུབ་བཀྲ་ཤིས་ལགས་ཀྱིས་སྤེལ་བའི་དཔྱད་འགྲེལ་གསར་གནས་འདིའི་དོན་གནདརྒྱ་ནག་གི་སེམས་འཁྲལ་གསར་ཤོས་ལ་བསམ་གཞིག་བྱེད་སྐབས། སེམས་འཁྲལ་འདིའི་རྒྱབ་ཏུ་ང་ཚོར་ཡང་སེམས་འཁྲལ་ཞིག་མེད་དམ་སྙམ། གལ་ཏེ་ནང་སའི་མཐོ་འབྲིང་སློབ་གསོ་ཉམས་ཞན་དུ་གྱུར་པ་དང་། སློབ་ཕྲུག་ཇེ་ཉུང་དུ་སོང་ན། ནང་སའི་སློབ་གྲྭ་ཁག་གི་ས་སྟོང་དེ་དག་ནང་སའི་མཐའ་འཁོབ་གྲོང་གསེབ་དང་། གྲངས་ཉུང་མི་རིགས་ཁག་གི་སློབ་མས་བསྐང་རྒྱུ་ཡིན་པ་དང་། དེས་ན་གྲངས་ཉུང་མི་རིགས་ཁག་གི་མཐུན་མིན་རིག་གནས་འཛིན་སྐྱོང་བྱེད་པའི་ཁ་ཕྱོགས་ལ་ཤུགས་རྐྱེན་དེ་བས་ཆེ་བ་ཡོང་ཉེན་ཡོད།
ཕྱོགས་གཞན་ནས་བཤད་ན། འབྱུང་འགྱུར་ནང་ད་བར་འབྱོར་ལྡན་དང་མཐོ་རིམ་པ་ཚོས་སྒེར་བཟུང་བྱས་པའི་སློབ་གསོའི་ལྟེ་གནས་ཁག་གཞི་ནས་དབུལ་ཕོངས་དང་། གྲངས་ཉུང་མི་རིགས་ཁག་ལ་འཐོབ་པ་དང་། དེས་ནང་སའི་འཕོ་འགྱུར་ལ་ཤུགས་རྐྱེན་ཐེབས་ངེས་རེད།
གསར་འགྱུར་ཀློག་བདེ་བ་གློག་ན་གོ་རྒྱུ་ཡོད་པ། གོ་ནས་བསམ་བློ་གཏོང་རྒྱུ་ཡོད་པ་ཞིག་འབྲིས་འདུག་གོ་།
རྩོམ་སྒྲིག་པ་ཆེན་མོ་དོན་གྲུབ་བཀྲ་ཤིས་མཆོག་གིས་གསར་འགྱུར་ཧ་ཅང་ཡག་པོ་གོ་རྒྱུ་ཆེན་པོ་ཡོད་པ་བསམ་བློ་གཏོང་རྒྱུ་མང་པོ་ཡོད་པ་ཞིག་བྲིས་འདུག་ཐུགས་རྗེ་ཆེ། རྒྱ་ནག་གི་ཆབ་སྲིད་གཅིག་པོ་མ་ཡིན་པར་ཤཻས་ཡོན་དང་འཕྲོད་བསྟན་སོགས་ཕྱོགས་གང་ཐད་ནས་འདི་བཞིན་གཏིང་ཟབ་མོའི་ཐོག་ནས་སྔོག་སྟེ་གོ་བདེ་བའི་ཐོག་ནས་འབྲི་འགོད་གནང་ཐུབ་ན་ཧ་ཅང་ཐུགས་རྗེ་ཆེ་ཞུ་བཞིན་ཡོད།
གསར་འགོད་པ། དོན་འགྲུབ་བཀྲ་ཤིས་ལགས་ནས་དཔྱད་ཞིབ་གཏིང་ཟབ་མོའི་གསར་འགྱུར་ཞིག་བྲིས་འདུག འདི་ལྟ་བུའི་གསར་འགྱུར་ཀློག་པ་ན་མིག་རྒྱ་ཆེན་པོ་སྐྱེད་ཡོང་གི་འདུག རྒྱ་ནག་གི་ཕྱིར་སྐྱོད་སློབ་མའི་གྲང་འབོར་དེ་བཙན་བྱོལ་བོད་མི་ཡོངས་རྫོགས་ལས་སྡབས་གཉིས་ཀྱིས་མང་བ་དེ་ལ་ང་རང་ཧ་ལས་སོང་
རྒྱ་ནག་གི་ལོ་གཞོན་མང་པོ་ཞིག་ཕྱི་ལོགས་སུ་སློབ་སྦྱོང་ལ་བསྐྱོད་ཐུབ་པ་ནི་གུང་ཁྲན་ཏང་གི་རྩ་ཁྲིམས་ལ་འགྱུར་བཅོས་གཏོང་བའི་རྨང་གཞིག་གཏིང་ཚར་བ་ལྟ་བུ་རེད། བསམ་བློའི་རང་དབང་གི་ཐོག་ནས་རྒྱ་ནག་ནང་ཁུལ་དང་ཕྱི་ལོགས་སུ་ཡོད་པའི་རྒྱ་རིགས་རྣམས་ཀྱི་བསམ་སྤྱོད་ཀྱང་མི་མཐུན་པའི་གླེང་སློང་མང་པོ་ཡོང་གི་ཡོད། ཕྱི་ལོགས་སུ་ཡོད་པའི་ཀྲུང་གོའི་ན་གཞོན་ཚོས་མ་འོངས་པར་ཀྲུང་གོ་གསར་པ་ཞིག་འཛུགས་རྒྱུར་ལེགས་སྐྱེལ་འཕུལ་ཐུབ་པའི་རེ་བ་བྱེད་ཀྱི་ཡོད།
རྒྱ་ནག་གི་ཤེས་ཡོན་སློབ་གསོའི་སྟེང་དུ་ནོར་འཁྲུལ་ཡོད་པ་ཡོངས་གྲགས་ཆགས་ཡོད་པ་རེད། རྒྱ་ནག་ཁོ་རང་ཚོས་ཁོ་རང་ཚོ་བུ་རབས་ཚ་བརྒྱུད་དེ་ནག་ཁུངས་ནང་འདེད་བཞིན་ཡོད་པ་རེད། རྒྱ་ནག་གི་གཅིག་སྡུད་སློབ་གསོ་གཏིང་ནག་དེས་དབང་གིས་ཕྱི་རྒྱལ་ཁག་ཏུ་ཡོང་མཁན་རྒྱ་རིགས་སློབ་ཕྲུག་མང་པོ་ཞིག་ལམ་སང་བསམ་བློར་འགྱུར་བ་དང་གུ་ཡངས་ཆགས་ཐུབ་ཀྱི་མི་འདུག ཡིན་ནའང་རྒྱ་ནག་གི་སློབ་ཕྲུག་མང་པོ་ནུབ་ཕྱོགས་སུ་བསྐྱོད་ཀྱི་ཡོད་པ་འདིས་རྩ་བའི་ཆ་ནས་རྒྱ་ནག་གི་ཕྱོགས་མང་པོ་ཞིག་ལ་ཤུགས་རྐྱེན་གང་འཚམས་ཤིག་འཐོན་གྱི་རེད་བམས་གྱི་འདུག