ལྐོག་ཟ་རུལ་སུངས་བ་ ༢༨༨ རྩད་ཆོད་ཡོད་ཟེར།

ཁ་སང་རྒྱ་ནག་ཉེན་རྟོག་ཁང་གིས་འདས་པའི་ཟླ་ཤས་རིང་ཕྱི་རྒྱལ་དུ་ཡོད་པའི་རྒྱ་ནག་གི་ལྐོག་ཟ་རུལ་སུངས་བ་ ༢༨༨ རྩད་ཆོད་ཟེར།

ཁ་སང་ཕྱི་ཚེས་ ༡༧ ཉིན་རྒྱ་ནག་ཉེན་རྟོག་ཁང་གིས། འདི་ལོའི་ཕྱི་ཟླ་ ༧ པ་ནས་བཟུང་རྒྱ་གཞུང་གིས་ཕྱི་རྒྱལ་ཡུལ་གྲུ་ཁག་ཏུ་བྲོས་བྱོལ་ཕྱིན་པའི་ལྐོག་ཟ་རུལ་སུངས་བ་རྩད་གཅོད་བྱས་ཏེ། འདས་པའི་ཟླ་བ་ ༤ ལྷག་གི་ནང་ཁྱོན་ལྐོག་ཟ་རུལ་སུངས་བ་ ༢༨༨ རྩད་གཅོད་ཐུབ་ཡོད་ཅིང་། དེའི་ནང་ནས་མི་ ༡༢༦ རང་འགུལ་གྱིས་ཕྱིར་ལོག་སྟེ་ནག་ཉེས་ངོས་ལེན་བྱས་ཡོད་པ་དང་། ད་ཆར་མུ་མཐུད་དུ་ཨ་རི་དང་ཁེ་ན་ཌ། སི་པེན། ཐའེ་ལན་ཌི། ཐའེ་ཝན། ཨ་ཧྥ་རི་ཁའི་རྒྱལ་ཁབ་ཁག་ཅིག་བཅས་ཁྱོན་རྒྱལ་ཁབ་ ༥༦ ནང་རྒྱ་ནག་གི་ལྐོག་ཟ་རུལ་སུངས་བ་རྩད་གཅོད་བྱེད་བཞིན་ཡོད་པ་དང་། ཕྱི་ལོ་ ༢༠༠༨ ནས་ ༢༠༡༣ བར་ཕྱི་རྒྱལ་དུ་ཡོད་པའི་ལྐོག་ཟ་རུལ་སུངས་བ་ཁྱོན་ ༨༡༠ རྩད་གཅོད་ཐུབ་ཡོད་པ་མ་ཟད། ཨ་རི་དང་ཁ་ན་ཌ། ཉི་ཧོང་། སྦེལ་ཇམ་སོགས་སྟོབས་འབྱོར་ཆེ་བའི་རྒྱལ་ཁབ་ཁག་ནས་མི་ ༨༤ རྩད་གཅོད་ཐུབ་ཡོད་སྐོར་བསྒྲགས་འདུག

འདི་ལོའི་ཕྱི་ཟླ་ ༡༠ པའི་ནང་རྒྱ་ནག་ཆེས་མཐོའི་མི་མང་ཞིབ་བཤེར་ཁང་དང་ཆེས་མཐོའི་ཁྲིམས་ཁང་། ཉེན་རྟོག་ཁང་། ཕྱི་འབྲེལ་ལྷན་ཁང་བཅས་མཉམ་འབྲེལ་གྱིས་༼ ཕྱི་རྒྱལ་གྱི་དཔལ་འབྱོར་དོགས་ཡོད་ཉེས་ཅན་ཚོས་རང་སྐྱོན་ངོས་ལེན་བྱེད་པར་སྐུལ་འདེད་ཀྱི་བརྡ་ཁྱབ།༽ཟེར་བ་ཞིག་བསྒྲགས་ཏེ། འདི་ལོའི་ཕྱི་ཟླ་ ༡༢ ཚེས་ ༡ ནང་ཚུད་དུ་ཕྱི་རྒྱལ་ཁག་ཏུ་ཡོད་པའི་ཉེས་ཅན་ཚོས། གནས་ཡུལ་གྱི་རྒྱ་ནག་གཞུང་ཚབ་ཁང་བརྒྱུད་དེ་ཉེན་རྟོག་ཁང་དང་མི་མང་ཞིབ་བཤེར་ཁང་། མི་མང་ཁྲིམས་ཁང་བཅས་ལ་རང་སྐྱོན་ཡར་ཞུ་བྱས་ཏེ་རང་འགུལ་གྱིས་རྒྱལ་ནང་དུ་ལོག་པ་ཡིན་ན། དངུལ་དངོས་ཀྱི་ཉེས་ཆད་སོགས་ཡང་དུ་གཏོང་རྒྱུ་ཡིན་པ་མ་ཟད། ནག་ཉེས་ཆུང་རིགས་ལ་ཁྲིམས་ཆད་མེད་པ་བཟོ་རྒྱུ་དང་། གལ་སྲིད་དེ་ལས་ལྡོག་ཚེ་ཉེན་རྟོག་ཁང་གིས་ནུས་པ་ཡོད་དགུ་བཏོན་ཏེ་འཛིན་བཟུང་གིས་ཁྲིམས་ལྟར་ཐག་གཅོད་ནན་པོ་བྱ་རྒྱུ་ཡིན་པའི་བཀའ་ཁྱབ་བཏང་འདུག

གནད་དོན་དཔྱད་ཞིབ་པ་ཚོས། རྒྱ་གཞུང་གིས་ཨ་རིའི་ནང་ཡོད་པའི་རྒྱ་ནག་གི་ལྐོག་ཟ་རུལ་སུངས་བ་རྩད་གཅོད་ཐུབ་ཡོད་ལུགས་བསྒྲགས་པ་དེར་ཡིད་ཆེས་མེད་སྐོར་དང་། རྒྱ་ནག་དང་ནུབ་ཕྱོགས་དམངས་གཙོའི་རྒྱལ་ཁབ་ཁག་བར་གྱི་རིན་ཐང་ལྟ་བ་དང་འདུ་ཤེས་འཛིན་སྟངས་ཀྱི་ཐོག་ཁྱད་པར་ཆེན་པོ་ཡོད་སྟབས། ཁྲིམས་འཛིན་མཉམ་འབྲེལ་ཐོག་དཀའ་ངལ་ཆེན་པོ་ཡོད་ལུགས་བརྗོད་འདུག

རྒྱ་ནག་གཞུང་འབྲེལ་གསར་ལམ་ཁག་གིས། ཕྱི་རྒྱལ་དུ་བྲོས་བྱོལ་ཕྱིན་པའི་ལྐོག་ཟ་རུལ་སུངས་བ་རྩད་གཅོད་བྱེད་སྐབས། ཕྱིའི་རྒྱལ་ཁབ་ཁག་ཅིག་གིས་ཉེས་ཅན་ལ་སྲོག་ཁྲིམས་མི་གཅོད་པའི་ཁས་ལེན་དགོས་པའི་རེ་བ་བཏོན་ཡོད་ཀྱང་། ཁྲིམས་ཀྱི་གཏན་འབེབས་ལྟར་ཉེན་རྟོག་ཁང་གིས་ཆེས་མཐོའི་ཁྲིམས་ཁང་ལ་གནས་ཚུལ་ཡར་ཞུ་བྱེད་དགོས་པ་དང་། ཆེས་མཐོའི་ཁྲིམས་ཁང་གིས་ཐག་གཅོད་བྱས་རྗེས། ཕྱི་འབྲེལ་ལྷན་ཁང་གིས་རྒྱལ་ཁབ་ཀྱི་ཚབ་བྱས་ཏེ་ཁས་ལེན་བྱེད་དགོས་སྐོར་བརྗོད་འདུག

རྒྱ་ནག་སྒྲིག་ཁྲིམས་ཞིབ་བཤེར་ལྷན་ཁང་གིས་སྤེལ་བའི་སྙན་ཐོ་ཞིག་གི་ནང་། འདས་ལོའི་སྟོན་ཚིགས་དུས་ཆེན་དང་རྒྱལ་སྟོན་དུས་ཆེན་གྱི་གུང་གསེང་དང་བསྟུན་ཏེ། རྒྱ་གཞུང་གི་ལས་བྱེད་པ་ ༡༡༠༠ ཕྱི་རྒྱལ་དུ་ཕྱིན་ཏེ། དུས་ལྟར་ཕྱིར་ལོག་མེད་པ་མ་ཟད། དེའི་ནང་ནས་མི་ ༧༡༤ གཏན་ནས་ཕྱིར་ལོག་མེད་སྐོར་བརྗོད་ཡོད་པ་དང་། ཉེ་སྔོན་རྒྱ་ནག་སྤྱི་ཚོགས་ཚན་རིག་གླིང་གིས་འདི་ལོར་ལྐོག་ཟ་རུལ་སུངས་དང་འབྲེལ་བའི་གཞུང་ཞབས་པ་སྔར་ལས་མང་པོ་བྲོས་བྱོལ་དུ་ཕྱིན་ཡོད་པ་མ་ཟད། ཕྱི་རྒྱལ་དུ་ཁྱིམ་མི་གཉེན་འབྲེལ་ཡོད་པ་དང་རྒྱུ་དངོས་བཅོལ་འཇོག་བྱས་ཡོད་མཁན་ཚོ་བྲོས་བྱོལ་དུ་འགྲོ་བའི་གོ་སྐབས་མང་དུ་ཕྱིན་ཡོད་སྐོར་བརྗོད་འདུག

གསར་འགོད་པ། པདྨ་མཚོ།