རྒྱ་ནག་གཞུང་གིས་མི་མང་འདུ་འཛོམས་བྱེད་ཡུལ་ཆེ་ཁག་ཏུ་ཐ་མག་འཐེན་མི་ཆོག་པའི་ཁྲིམས་གཞི་ཞིག་གཏན་འབེབས་བྱས་ཡོད་འདུག
ཉེ་ལམ་རྒྱ་ནག་རྒྱལ་སྲིད་སྤྱི་ཁྱབ་ཁང་ཁྲིམས་འཛིན་གཞུང་ལས་ཁང་གིས་༼མི་མང་འདུ་འཛོམས་ཆེ་སར་ཐ་མག་འཐེན་རྒྱུར་ཚོད་འཛིན་བྱ་ཐབས་སྐོར་གྱི་སྲོལ་ཡིག༽ཅེས་པ་ཞིག་གཏན་འབེབས་བྱས་ཏེ། མི་མང་འདུ་འཛོམས་བྱེད་ཡུལ་ཆེ་ཁག་ཏུ་ཐ་མག་འཐེན་མི་ཆོག་པ་མ་ཟད། བརྒྱུད་ལམ་ཁག་ཏུ་ཐ་མག་རིགས་ཀྱི་ཚོང་འཕྲིན་གསལ་བསྒྲགས་སྤེལ་མི་ཆོག་པ་དང་། མི་མང་འདུ་ཡུལ་ཁག་ཏུ་ཁྱབ་བསྒྲགས་རིགས་ཀྱང་གང་བྱུང་སྦྱར་འགྲེམས་མི་ཆོག་པའི་སྒྲིག་གཞི་བཟོས་ཡོད་པ་ལྟར། ཁ་སང་ཕྱི་ཚེས་ ༢༨ ཉིན་པེ་ཅིན་མི་དམངས་སྲིད་གྲོས་ལྷན་ཁང་གིས་པེ་ཅིན་གྲོང་ཁྱེར་གྱི་སྤྱི་སྤྱོད་རླངས་འཁོར་དང་མེ་འཁོར་འབབ་ཚིགས། ལས་ཁུངས། ཟ་ཁང་། གླིང་ག་བཅས་སུ་ཐ་མག་འཐེན་མི་ཆོག་པ་བཟོས་ཡོད་པ་དང་། ཚགས་ཤོག་དང་དུས་དེབ། བརྙན་འཕྲིན། དཔེ་དེབ། དྲ་ཚིགས། རླུང་འཕྲིན་བཅས་ནང་དུ་ཐ་མག་དང་འབྲེལ་བའི་ཚོང་ལས་རིགས་ཁྱབ་བསྒྲགས་བྱེད་མི་ཆོག་པ། གལ་སྲིད་ཐ་མག་འཐེན་མཁན་བྱུང་ཚེ་ཨ་སྒོར་ ༣༣ ཡི་ཉེས་ཆད་གཏོང་རྒྱུ་ཡིན་པའི་སྒྲིག་ཁྲིམས་གཏན་འབེབས་བྱས་ཏེ། ལོ་རྗེས་མའི་ཟླ་ ༦ ནང་སྒྲིག་ཁྲིམས་དེ་པེ་ཅིན་གྲོང་ཁྱེར་དུ་དངོས་སུ་ལག་བསྟར་བྱ་རྒྱུ་ཡིན་པའི་ཐག་གཅོད་བྱས་ཡོད་འདུག
གནས་ཚུལ་འདིའི་ཐད་རྒྱ་ནག་ནང་རྟེན་གཞི་བྱས་པའི་འཛམ་གླིང་འཕྲོད་བསྟེན་ལྷན་ཚོགས་ཀྱི་སྐུ་ཚབ་སྐུ་ཞབས་བྷེར་ཧར་ཌི་ (Bernhard Schwarrlander)ལགས་གསར་འགོད་པར། རྒྱ་ནག་ནང་གི་ཟ་ཁང་དང་ཆང་ཁང་། མི་མང་འདུས་སྡོད་དང་འགྲིམ་འགྲུལ་བྱེད་སར་ཐ་མ་འཐེན་པ་དེས། ཐ་མག་འཐེན་མཁན་ཁོ་རང་ཚོ་ལས་ལྷག་པ་ཐ་མག་མི་འཐེན་མཁན་གྱི་མང་ཚོགས་ཚོར་གནོད་ཚབས་ཆེན་པོ་ཡོད་སྟབས། ཐེངས་འདིའི་པེ་ཅིན་གཞུང་གིས་ཐག་གཅོད་དེར་དགའ་བསུ་ཞུ་རྒྱུ་དང། ལྷག་པར་དུ་སྒྲིག་ཁྲིམས་འདི་རྒྱ་ནག་རྒྱལ་ཡོངས་སུ་གཅིག་གྱུར་ལག་བསྟར་བྱ་རྒྱུ་གལ་ཆེན་པོ་རེད། ཅེས་བརྗོད་འདུག
འཛམ་གླིང་འཕྲོད་བསྟེན་ལྷན་ཚོགས་ཀྱི་སྙན་ཐོ་ལྟར་ན། རྒྱ་ནག་ནང་ཐ་མག་འཐེན་མཁན་དུང་ཕྱུར་ ༣ ལྷག་ཡོད་པ་དང་། པེ་ཅིན་གྲོང་ཁྱེར་གཅིག་པུར་ཐ་མག་འཐེན་མཁན་འབུམ་ ༤ ལྷག་ཡོད་འདུག རྒྱ་ནག་ནི་འཛམ་གླིང་ནང་གི་ཐ་མག་འཐེན་མཁན་དང་བཟོ་མཁན་ཆེས་མང་ཤོས་ཆགས་ཏེ། རྒྱ་ནག་ནང་ལོ་རེར་ཐ་མག་འཐེན་མཁན་ས་ཡ་གཅིག་ལྷག་འདས་གྲོངས་སུ་འགྲོ་བཞིན་ཡོད་འདུག ཕྱི་རྒྱལ་དང་རྒྱ་ནག་གི་འཕྲོད་བསྟེན་ཆེད་མཁས་ཚོས་རྒྱ་ནག་ནང་ཐ་མག་རིན་གོང་ཆུང་ཆུང་ཡིན་སྟབས། ༢༠༣༠ ལོར་རྒྱ་ནག་ནང་ཐ་མག་གིས་འདས་གྲོངས་སུ་འགྲོ་མཁན་ད་ལྟའི་གྲངས་འབོར་ལས་ལྡབ་གསུམ་ཆགས་རྒྱུ་ཡིན་པའི་ཚོད་དཔག་བྱས་ཡོད་འདུག
པེ་ཅིན་གཞུང་གིས། ༢༠༡༤ ལོར་པེ་ཅིན་ནང་ཡོད་པའི་ཐ་མག་བཟོ་གྲྭ་སྤྱི་ཡོངས་ལ་ཨ་སྒོར་ཐེར་འབུམ་ ༡༦ གི་དཔྱ་ཁྲལ་རྒྱག་འཆར་ཡོད་ལ། ད་ལོར་འཕྲོད་བསྟེན་བློན་ཆེན་ལྷན་ཁང་ལས་བྱེད་པ་ཟུར་བ་ཞིག་གིས་གསར་འགོད་པར། ༢༠༡༢ ལོར་ཉིན་རེར་རྒྱ་ནག་གཞུང་ལ་ཐ་མག་ཉོ་ཚོང་གི་དཔྱ་ཁྲལ་ཐོག་ནས་ཨ་སྒོར་ས་ཡ་ ༧༥ ལྷག་གི་ཡོང་འབབ་ཡོད་སྟབས། ཐ་མག་བཟོ་གྲྭ་དང་ཉོ་ཚོང་བྱེད་མཁན་ཚོས་རྒྱ་ནག་ནང་ཐ་མག་བཀག་སྡོམ་བྱེད་པ་དེས་རྒྱ་ནག་གི་ལོ་རེའི་ཡོངས་འབབ་དང་དཔལ་འབྱོར་ཡར་རྒྱས་ལ་དོ་ཕོག་ཆེན་པོ་འགྲོ་རྒྱུ་ཡིན་སྐོར་དང་། ཕྱི་རྒྱལ་ཁག་ཏུ་ཐ་མག་བཟོ་སྐྲུན་ཆོག་པའི་རྒྱུ་མཚན་དྲངས་ཏེ་ངོ་རྒོལ་བྱེད་ཀྱིན་ཡོད་ཚུལ་བརྗོད་འདུག ཁ་སང་ཁོ་རང་གིས་ཡང་བསྐྱར་གསར་འགོད་པར། ངས་ལོ་མང་པོའི་རིང་རྒྱ་ནག་ནང་ཐ་མ་བཀག་སྡོམ་བྱེད་པར་འཐབ་རྩོད་བྱས་མཐར། དེ་རིང་གཞི་ནས་འགྱུར་ལྡོག་བྱུང་བར་དགའ་སྤྲོ་ཆེན་པོ་བྱུང་སོང་ཞེས་བརྗོད་འདུག
༢༠༡༢ ལོར་རྒྱ་ནག་གི་འཕྲོད་བསྟེན་ལྷན་ཁང་གིས་རྒྱ་ནག་རྒྱལ་ཡོངས་སུ་མང་ཚོགས་འདུ་འཛོམས་ཀྱི་གླིང་ཁ་དང་རླངས་འཁོར་ས་ཚིགས། ལས་ཁུངས་སོགས་སུ་ཐ་མ་འཐེན་བཀག་སྡོམ་བྱས་པའི་ལམ་སྟོན་ཡིག་ཆ་ཞིག་བཀྲམས་ཡོད་ཀྱང་། རྗེས་སུ་མང་ཚོགས་ཁྲོད་ལམ་སྟོན་ཡིག་ཆ་ཁ་གསལ་མེད་པ་དང་ལག་བསྟར་བྱེད་མཁན་གྱི་སྒྲིག་འཛུགས་དམིགས་བསལ་མེད་པ་བཅས་ལ་བརྟེན་ཏེ་བཟང་ཕྱོགས་ཀྱི་འགྱུར་བ་གང་ཡང་ཐེབས་ཐུབ་ཡོད་མི་འདུག
འཛམ་གླིང་གི་ཆེད་ལས་མཁས་པ་ཚོས། རྒྱ་ནག་ནང་ཐ་མག་ཤུགས་ཆེན་པོ་བྲིན་དོན་རྒྱལ་ཁབ་ཀྱི་དཔྱ་ཁྲལ་ཡོངས་འབབ་ཀྱི་བཅུ་ཆའི་གཅིག་ཐ་མག་ལས་ཡོང་གི་ཡོད་པ་དང་། མང་ཚོགས་ལ་ཐ་མག་གི་གནོད་སྐྱོན་སྐོར་གྱི་གོ་རྟོགས་ཞན་དྲགས་གཉིས་ལ་བརྟེན་ཏེ་བྱུང་ཡོད་ཚུལ་བརྗོད་འདུག
གསར་འགོད་པ། ལྷ་སྐྱབས་རྒྱལ།
