པ་ཀི་སི་ཐན་ནང་གི་འཇིགས་སྐུལ་དྲག་སྤྱོད་ཤོག་ཁག་ཅིག་གིས་ཀཱ་ཤི་མིར་ནང་རྒྱ་གར་གཞུང་གིས་དམ་དྲག་བྱེད་ཀྱིན་པར་ངོ་རྒོལ་ཡོད་སྐོར་བརྗོད་འདུག
ཟླ་འདིའི་ཚེས་ ༤ དང་ ༥ ཉིན་གཉིས་རིང་པ་ཀི་སི་ཐན་གྱི་གྲོང་ཁྱེར་ལཱ་ཧོར་ནང་པ་ཀི་སི་ཐན་གྱི་དྲག་སྤྱོད་ཤོག་ཁག་ཇམ་མཱ་ཌེ་ (Jammat-ud-Dawa) ཞེས་པས་ཚོགས་འདུ་ཞིག་བསྐོངས་ཏེ། ཚོགས་ཐོག་ཏུ་ཚོགས་པའི་མགོ་གཙོ་དང་ ༢༠༠༨ ལོའི་ཟླ་ ༡༡ ཚེས་ ༢༦ ཉིན་མོམ་བྷེ་གྲོང་ཁྱེར་ནང་དྲག་སྤྱོད་ལས་འགུལ་སྤེལ་མཁན་གྱི་བྱེད་གཏེ་གཙོ་བོ་ཧཱ་ཧྥེ་ཛི་ (Hafiz Saeed) ཡིས་ཆུ་ཚོད་བཞི་ལྷག་གི་གཏམ་བཤད་ཅིག་སྤེལ་ཏེ། པ་ཀི་སི་ཐན་གཞུང་གིས་རྒྱ་གར་གཞུང་གིས་ཀཱ་ཤི་མིར་ནང་མཁྲེགས་འཛིན་སྲིད་བྱུས་བཟུང་སྟེ་ཡུལ་དེའི་ནང་འགྲོ་བ་མིའི་ཐོབ་ཐང་ལ་རྡོག་རོལ་བཏང་སྟེ། ཡུལ་མིར་མི་སྤྱོད་ལས་འདས་པའི་མནར་གཅོད་གཏོང་གི་ཡོད་པ་དེར་འཁོན་ལན་སློག་དགོས་པ་དང་། པ་ཀི་སི་ཐན་རྒྱལ་ཡོངས་ནང་ཁ་ཆེའི་ཆོས་ལུགས་ཀྱི་རྩ་འཛིན་ཁྲིམས་སྒྲིག་ལག་བསྟར་བྱས་ཏེ་རྒྱལ་ཁབ་གཞན་གྱིས་བཙན་བཟུང་བྱས་པའི་ཁ་ཆེའི་མངའ་ཁོངས་དག་བཅིངས་གྲོལ་གཏོང་དགོས་པ་མ་ཟད། ཁ་ཆེའི་དགྲ་བོ་དག་ལ་ཆོས་ལུགས་ཀྱི་དམག་དྲངས་ཏེ་ཚར་གཅོད་གཏོང་དགོས་སྐོར་བརྗོད་འདུག
འདིའི་ཐད་ཧཱ་ཧྥེ་ཛི་ཡིས་པ་ཀི་སི་ཐན་གྱི་སྐྱ་རེངས་ (Dawn) ཞེས་པའི་ཐོག་བརྗོད་དོན། གལ་ཏེ་རྒྱ་གར་གཞུང་གིས་ ༡༩༧༡ ལོར་མཉམ་འབྲེལ་རྒྱལ་ཚོགས་ཀྱིས་གཏན་འབེབས་བྱས་པའི་ཀཱ་ཤི་མིར་མི་རིགས་ཚོར་རང་ཐག་རང་གཅོད་ཀྱི་ཐོབ་ཐང་སྤྲོད་དགོས་པའི་གྲོས་ཆོད་ལ་ཁས་ལེན་མ་བྱས་ཚེ། པ་ཀི་སི་ཐན་སྲིད་བློན་ནཱ་ཝ་སེ་ཤཱ་རེབ་ཀྱིས་ལངས་ཕྱོགས་བརྟན་པོ་བཟུང་སྟེ། རྒྱ་གར་ལས་ལོགས་སུ་རང་བཙན་རྩོད་ལེན་བྱེད་མཁན་གྱི་ཀཱ་ཤི་མིར་གྱི་མགོ་ཁྲིད་ཚོར་རོགས་རམ་བྱས་ནས་ཁོ་ཚོའི་མངོན་འདོད་འགྲུབ་ཐུབ་བྱ་དགོས། ཞེས་བརྗོད་འདུག
ཁོས་ཀཱ་ཤི་མིར་གྱི་འོས་བསྡུ་དང་འབྲེལ་བའི་ཐོག་བརྗོད་དོན། རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་ཀཱ་ཤི་མིར་ནང་ཐེངས་མང་ཡོང་སྟེ། མངའ་སྡེའི་གྲོས་ཚོགས་ཀྱི་འོས་བསྡུ་ཐོབ་ཐབས་བྱས་ཏེ་རྒྱལ་སྤྱིའི་ཐོག་ཀཱ་ཤི་མིར་ནི་རྩོད་ཉོག་ཅན་གྱི་ས་ཁུལ་ཞིག་མིན་པ་ར་སྤྲོད་བྱེད་རྩིས་བྱེད་བཞིན་ཡོད་ཀྱང་། པ་ཀི་སི་ཐན་དང་ཀཱ་ཤི་མིར་ནི་ཁ་བྲལ་ཐབས་མེད་པ་ཞིག་ཆགས་ཡོད་སྟབས། ང་ཚོས་ད་ལྟའི་རྒྱ་གར་བྷེ་ཇི་པི་ཚོགས་པའི་དམིགས་ཡུལ་དེ་བསྒྲུབ་བཅུག་རྒྱུ་མིན། ཞེས་བརྗོད་འདུག
རྒྱ་གར་གྱི་བྱ་སྤྱོད་དང་འབྲེལ་བའི་ཐོག་ཁོས་མུ་མཐུད་དུ་བརྗོད་དོན། ད་ལྟ་རྒྱ་གར་གཞུང་གིས་པ་ཀི་སི་ཐན་གྱི་རྡུལ་ཕྲན་མཚོན་ཆ་བཀག་འགོག་དང་རྒྱལ་སྤྱིའི་སྒྲིག་འཛུགས་ཀྱིས་ཁ་ཆེའི་བྱ་སྤྱོད་ལ་སྐྱོན་བརྗོད་བྱེད་བཞིན་ཡོད་ཀྱང་། ང་ཚོའི་འཐབ་རྩོད་དེ་སུས་ཀྱང་ཚོད་འཛིན་བྱེད་ཐུབ་ཀྱི་མ་རེད། གལ་ཏེ་རྒྱ་གར་གཞུང་གིས་ཨབ་གྷན་ནང་ཨ་རིར་དམག་རོགས་གཏང་ཚེ། ཁ་ཆེའི་དྲག་སྤྱོད་པ་དག་ཀྱང་ཀཱ་ཤི་མིར་གྱི་སྤུན་ཟླ་ཚོར་རོགས་པར་འགྲོ་རྒྱུའི་ཐོབ་ཐང་ཡང་ཡོད་པ་རེད། ཅེས་སོགས་བརྗོད་འདུག
ཁ་སང་རྒྱ་གར་ཧིན་དྷུ་སི་ཐན་དུས་བབ་ཐོག་རྒྱ་གར་ཕྱི་སྲིད་ལྷན་ཁང་གི་མགྲིན་ཚབ་པ་སཱ་ཡི་ཌེ་ (Syed Akbaruddin) ཡིས་བརྗོད་དོན། པ་ཀི་སི་ཐན་གཞུང་གིས་ཉེན་རྟོག་པ་ཕོན་ཆེ་འགྲེམས་འཇོག་བྱས་ཏེ། མཉམ་འབྲེལ་རྒྱལ་ཚོགས་དང་རྒྱ་གར། ཨོ་སི་ཌོ་ལི་ཡ། ཨ་རི་དང་དབྱིན་ཡུལ་བཅས་ཀྱིས་འཇིགས་སྐུལ་རིང་ལུགས་པར་ངོས་འཛིན་བྱས་པའི་ཧཱ་ཧྥེ་ཛི་སད་ཌི་ལ་རོགས་པ་བྱས་ཏེ། ཚོགས་འདུ་དེ་འདྲ་ཞིག་ཚོགས་བཅུག་པ་དེ་ནི་རྒྱལ་སྤྱིའི་ཁྲིམས་ལུགས་ལ་བརྩི་སྲུང་མ་བྱས་པ་ཞིག་ཆགས་ཡོད་པ་མ་ཟད། པ་ཀི་སི་ཐན་ནི་འཇིགས་སྐུལ་རིང་ལུགས་པ་གསོ་སྐྱོང་བྱེད་ཡུལ་ཞིག་ཡིན་པ་གསལ་སྟོན་བྱས་པ་རེད། ཅེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། ཉེ་ཆར་རྒྱ་གར་དང་པ་ཀི་སི་ཐན་གཉིས་ཀྱིས་མཐའ་མཚམས་ཁུལ་དུ་དམག་འཐབ་ཡང་ཡང་བྱེད་བཞིན་ཡོད་སྟབས། པ་ཀི་སི་ཐན་གྱི་འཇིགས་སྐུལ་རིང་ལུགས་པས་གོ་སྐབས་བཟུང་སྟེ་རྒྱ་གར་ལ་དྲག་སྤྱོད་ལས་འགུལ་སྤེལ་རྒྱུའི་ཉེན་བརྡ་བཏང་བ་ཞིག་ཡིན་སྐོར་བརྗོད་འདུག
