རྒྱ་ནག་དང་ཉི་ཧོང་གིས་དམག་ཆེན་གསུམ་པར་རེ་འབོད་ཀྱི་མཆོད་འབུལ་བྱས།

ནན་ཅིན་དམར་གསོད་ཆེན་མོའི་མཆོད་འབུལ་ཉིན་མོ་དེར་རྒྱ་དམར་གྱི་སྲིད་འཛིན་ཞི་ཅིང་ཕིང་གིས་གཏམ་བཤད་དེ་སྐད་གྲགས་ཆེན་པོ་ཆགས་འདུག ཁོས་སྐད་ཆའི་ནང་འདི་འདྲ་ཞིག་ཀྱང་ལབ་འདུག ((གནའ་ནས་བཟུང་ཞི་བདེ་ནི་མིའི་རིགས་ཀྱི་རེ་སྒུག་ཡིན། ཞི་བདེ་ནི་ཉི་འོད་དང་འདྲ་བར་དྲོད་ཁོལ་འཛོམས་ཤིང་། སྦྲང་ཆར་དང་མཚུངས་པར་བརླན་བཤེར་ལྡན། ཉི་འོད་དང་དྲོད་ཁོལ་ཡོད་ན། སྐྱེ་དངོས་མཐའ་དག་གཞི་ནས་སྐྱེ་འཕེལ་ཐུབ་པ་དང་། ཞི་བདེ་དང་བརྟན་འཇགས་ཡོད་ན། གཞི་ནས་མིའི་རིགས་ཀྱིས་རང་གི་ཕུགས་བསམ་སྔར་ལས་ལྷག་པར་མངོན་འགྱུར་བྱེད་ཐུབ། ལོ་རྒྱུས་ཀྱིས་ང་ཚོར་ཞི་བདེ་ནི་བརྩོན་ལེན་བྱེད་དགོས་པ་ཞིག་དང་སྲུང་སྐྱོབ་བྱེད་དགོས་པ་ཞིག་ཡིན་པ་ར་སྤྲོད་བྱས་ཡོད། མི་ཐམས་ཅད་ཀྱིས་ཞི་བདེ་ལ་གཅེས་སྤྲས་དང་སྲུང་སྐྱོབ་བྱེད་པ་དང་། དམག་འཁྲུག་གི་ཡ་ང་བའི་བསླབ་བྱ་ཡིད་ལ་བཟུང་ན། ད་གཟོད་ཞི་བདེ་ལ་རེ་བ་ཡོད།)) འདི་ལྟ་བུའི་ཁ་གཡང་སོགས་སྒྲོག་འདུག།

དོན་གྲུབ་བཀྲ་ཤིས་ཀྱི་ཞབས་མཆན་རིང་པོ་དེ་རྩོམ་ཡིག་ཡིན་པ་འདྲ་བོ། གསར་འགྱུར་ཡིན་པ་འདྲ་བོ། རང་རྣམ་ཡིན་པ་འདྲ་བོ། རྟོགས་སྒྲུང་ཡིན་པ་འདྲ་བོ། སྙན་ངག་ཡིན་པ་འདྲ་བོ་རིང་པོ་རིང་པོ་ཞིག་བྲིས་འདུག གང་ལྟར་སྙན་པོ་ཞེ་དྲག་འདུག་ནང་དོན་ཡང་གཏིང་ཟབ་པོ་འདུག བོད་ནང་གི་དྲ་རྒྱའི་ཐོག་ལ་བསྐུར་ན་ཁ་ཡོད་ལག་ཡོད་ཀྱིས་གསམ་གཞིག་གཏོང་དགོས་པ་ཡོང་ངེས་རེད།
དྲ་གྲོགས་ཀརྨ་ལགས་ཀྱི་རེ་བ་ལྟར་ཟུར་མཆན་ཙམ་གྱི་ནང་དུ་འཇོག་པ་ལས་དྲ་རྒྱ་ཞིག་གི་ཐོག་ལ་སྤེལ་ན་ཧ་ཅང་ཡག་པོ་འདུག་ལགས་

དྲ་གྲོགས་མང་པོ་ཞིག་ཕེབས་ནས་བསམ་ཚུལ་གསུངས་པར་དགའ་བསུ་ཞུ། མང་པོ་ཞིག་གིས་གསར་འགྱུར་ཡག་པོ་བྲིས་འདུག་རབས་རྗོད་ཀྱིན་འདུག དེར་ཡང་ཐུགས་རྗེ་ཆེ་ཞུ།

ཁི་ཉིན་ཚེས་ ༡༣ གཟའ་སྤེན་པ་གཉིས་པ་དང་ ༡༤ ཉིན་ཉི་མའི་གུང་གསེང་རེད། ནང་ནས་ལྷོད་ལྷོད་བྱས་ཏེ་དེབ་རེར་བལྟས་ནས་བསྡད་པ་ཡིན། ཉིན་རྒྱབ་བརྙན་འཕྲིན་སྒོ་བྱས་སྐབས་ BBC སྟེང་ནན་ཅིན་དོན་རྐྱེན་སྐོར་འཁྱུག་ཙམ་བསྟན་སོང་། དེ་དུས་དོ་སྣང་དམིགས་བསལ་གང་ཡང་བྱུང་མ་སོང་། ཕྱི་དྲོའི་ཆུ་ཚོད་ ༦ ཙམ་ལ་བཟའ་ཉོག་དང་ལྷན་དུ་དགོང་ཟས་ཟ་ཞོར་དུ་བརྙན་འཕྲིན་ལ་བལྟས་པ་ཡིན། སྐབས་དེར་རྒྱ་ནག་གི་བརྙན་འཕྲིན་ཚན་པ་ཚང་མས་ “ནན་ཅིན་དམར་གསོད་ཆེན་མོ” ཞེས་པ་དེ་ཧ་ཅང་དོ་དོ་ཏན་ཏན་དང་གོ་རིམ་ལྡན་པའི་ཐོག་ནས་གཏོང་གི་འདུག དེས་ང་ལ་བསམ་གཞིག་ཅིག་དང་། ལོ་རྒྱུས་མང་པོ་ཞིག་ཕྱིར་དྲན་བྱེད་བཅུག་སོང་ལ། ཉི་ཧོང་དང་རྒྱ་ནག་གིས་རྣམ་འགྱུར་སྟོན་རེས་བྱེད་སྟངས་འདི་ལ་གད་མོ་ཞིག་ཤོར་སོང་།

དེའི་ཕྱི་ཉིན་གཟའ་ཉི་མ་རེད། ཞོགས་པར་ལས་ཀ་དང་འབྲེལ་ནས་དྲ་ཐོག་ལ་སྐོར་ཉུལ་ཞིག་བྱས་པ་ཡིན། རྒྱལ་སྤྱིའི་གསར་ལམ་ཆེ་ཁག་རེ་ཟུང་གིས་ཀྱང་ཁ་སང་ནན་ཅིན་གྱི་འདས་མཆོད་དེ་བཀོད་འདུག དེའི་ཐོག་བསམ་ཚུལ་བཤད་མཁན་རེ་ཟུང་གིས། རྒྱ་ནག་གིས་ག་དུས་ཡིན་ཡང་ཕྱི་དགྲ་ཞིག་གླགས་འཁེལ་གྱི་མེད་སྐབས། ལམ་སང་མང་ཚོགས་སྐུལ་སློང་བྱས་ཏེ་ཕ་རོལ་ལ་ཉེས་འཛུགས་འདྲ་མིན་བྱས་པ་བརྒྱུད་ནས་མང་ཚོགས་ལག་སྣེར་གཏོང་གི་རེད། སྔོན་ཆད་ ༡༩༢༨ ཡས་མས་ལ་རྒྱ་ནག་ཧྲང་ཧེ་དང་ནན་ཅིན། ཀུང་ཀྲུག་སོགས་སུ་ཉི་ཧོང་དང་ཨ་རི། འཇར་མན་སོགས་དང་རྙོག་ཟིང་བྱུང་སྐབས་མང་ཚོགས་དང་སློབ་ཕྲུག་སྐུལ་སློང་བྱས་ཏེ། དོན་མེད་དུ་མང་ཚོགས་དཀྱུས་མ་མང་པོ་ཤི་རྨས་ཐེབས་ཡོད། ཉེ་ལམ་ཞི་བདེ་རྒྱ་མཚོའི་གླིང་ཕྲན་འགའི་ཐད་རྩོད་ཉོག་བྱུང་སྐབས་ཀྱང་རྒྱ་ནག་གཞུང་གིས་མང་ཚོགས་ལ་ངན་སྐུལ་བྱས་ཏེ། པེ་ཅིན་སོགས་སུ་ཉི་ཧོང་གི་བཟོ་གྲྭ་དང་རླངས་འཁོར་གཏོར་བཅོམ་ཐེབས་ཡོད། ད་རེས་ཀྱང་རྒྱ་ནག་གིས་ཞི་བདེའི་མིང་ཐོག་ནས་རྒྱ་མི་རིགས་ལ་རྒྱལ་ཁབ་དང་ཧྭན་མི་རིགས་ཀྱི་ཞེན་ཁོག་བསླངས་ཏེ། རྒྱལ་སྤྱིར་བརྡབ་གསིག་མེད་པའི་ཐོག་ནས་ཉི་ཧོང་ལ་འཁོན་ལན་སློག་གི་འཇུག་རྩིས་རེད། ཅེས་སོགས་བརྗོད་འདུག གནས་ཚུལ་དེ་དག་གིས་དེད་དེ་ནན་ཅིན་དམར་གསོད་ཆེན་མོའི་བྱུང་རིམ་རྒྱབ་མདུན་སྐོར་གྱི་གསར་འགྱུར་འདི་སྤེལ་བ་ཡིན།

ངས་གསར་འགྱུར་དེ་འབྲི་སྐབས། དེབ་དང་དྲ་ཚིགས་སོགས་ལས་རྒྱུ་ཆ་འཚོལ་བཞིན་འཚོལ་བཞིན། སོ་སོའི་བྱིས་པའི་དུས་ཀྱི་གནས་ཚུལ་མང་པོ་ཞིག་མདང་ནུབ་བརྙན་ཡོལ་ངོས་འདས་མཆོད་ལྟར་རེ་རེ་བཞིན་དྲན་སོང་། ངས་ཀྱང་ཆུང་དུས་རི་པིན་ཀུའེ་ཙི་(འཇར་པན་འདྲེ་དམག 日本鬼子 )དང་། མེ་གོ་དགྲ་བོ། (美国敌人)གོ་མིན་ཏང་ལོག་སྤྱོད་པ་(共民党反动着)མང་པོ་བསད་མྱོང་ལ། ཀྲུང་གོ་མེ་གོའི་དམག་འཁྲུག་ལའང་ཐེངས་མང་ཞུགས་མྱོང་། ང་རང་གཙོ་བྱས་པའི་བྱིས་པ་བཙན་པོ་དག་ཀྲུང་གོའི་པཱ་ལུའུ་ཅུ་(བཅིངས་འགྲོལ་དམག)ཡིན་ལ། བྱིས་པ་གཉོམ་ཆུང་དག་མེ་གོ་དགྲ་བོ་དང་། མགོའི་སྐྲ་དང་ལུས་ཀྱི་ལྭ་ཡག་པོ་མེད་མཁན་དག་རི་པིན་ཀུའེ་ཙི་དང་གོ་མིན་ཏང་གི་ལོག་སྤྱོད་རེད། རྩེད་མོའི་དམག་འཁྲུག་དེའི་ཁྲོད་ནས་ཁོ་ཚོས་མགོ་ལྕག་འགྲམ་ལྕག་མང་པོ་བཟེད་དགོས་པ་མ་ཟད། གདོང་དང་ལུས་ངག་གིས་ཧ་ཅང་ཐ་ཤལ་དང་གཉོམ་ཆུང་གི་ཉམས་སྟོན་དགོས་པ་དང་། ཤི་ཁུལ་རྨས་ཁུལ་དང་། ས་རུ་འགྲིལ་ཁུལ་སོགས་ཀྱང་ཡང་ཡང་བྱེད་དགོས།

ང་ཆུང་ཆུང་སྐབས་ངའི་ཕ་ཡུལ་དུ་རླངས་འཁོར་ལམ་ཁ་མེད་ལ་དགུན་ཁ་བསླེབས་ན་གློག་ཀྱང་ཆད་འགྲོ། ལོ་རེའི་དགུན་ཁ་སླེབས་ན་ཐེངས་གཅིག་གཉིས་རེར་ཏཱན་ཡེན་(གློག་བརྙན 电 影)ལྟ་རྒྱུའི་གོ་སྐབས་ཡོད། (དབྱར་ཁ་མི་ཚང་མར་ཁོམ་ལོང་མེད།) དེ་ནི་ང་ཚོ་བྱིས་པ་དག་ལ་ལོ་གསར་ལས་ཀྱང་སྤྲོ་བ་ཆེ་བ་དང་ཀ་ར་བུ་རམ་ལས་ཀྱང་རོ་མངར་ལྡན། ངའི་ཨ་མ་ལགས་དང་ང་ཚོའི་གྲོང་པའི་བུད་མེད་རྣམས་ཏཱན་ཡེན་གྱི་ཅ་ལག་དང་། ཧྥ་ཏུན་ཅི་(གློག་འདོན་འཕྲུལ་ཆས།发动机)སོགས་ལེན་དུ་འགྲོ་དགོས། ཆུ་ཚོད་གཉིས་གསུམ་སར་ལེན་དུ་འགྲོ་དགོས་ཤིང་། ཁོང་ཚོས་འཕྲུལ་ཆས་དེ་དག་བརྒྱབ་ལ་འཁུར་ནས་ཆུ་ཚོད་གཉིས་གསུམ་གྱི་ལམ་ཁ་བརྒྱུད་ནས་ཕྱི་དྲོར་ང་ཚོའི་སྡེ་བར་སླེབ་ཀྱི་ཡོད། ཏཱན་ཡེན་ཐེངས་གཅིག་བསྟན་ན་གླ་ཆར་རྒྱུ་ནོར་སྟེར་དགོས་པ་དང་། མཚམས་རེར་ཁྱིམ་ཚང་རེ་ནས་ཤིང་སྡོང་སྟེར་དགོས།

དེ་རིང་དགོང་མོ་ཏཱན་ཡེན་ལྟ་རྒྱུ་ཡོད་ན་ཉིན་དཀར་ཕྱུགས་རྫིའི་ཉི་མ་ལོ་ལས་རིང་ཡང་སེམས་པའི་ནང་དུ་དྲོད་དང་འོད་ཀྱིས་ཁེངས་ཡོད། ཕྱི་དྲོ་དགོང་ཆུ་འཐུང་རྗེས་ང་ཚོའི་སྡེ་བའི་ལཱེའང་ཀྲིན་(སྡེ་བའི་སྤྱི་ཁང་།粮站)ཆེན་པོ་ཞིག་ཡོད་པ་དེའི་ནང་ནས་ཏཱན་ཡེན་སྟོན་པ་དང་། སྐབས་དེར་བྱིས་པ་སྣབས་ལུག་ཚོས་པགས་རྩག་དྲོན་པོ་གྱོན་པ་དང་། ནམ་རྒྱུན་གླིང་སྒྲུང་ལ་ཉན་སྡོད་མཁན་རྒན་འཁོགས་ཚོས་ཀྱང་གདན་མཐུག་པོ་རེ་མཆན་ལ་བཙིར་ནས་ཏཱན་ཡེན་ལྟ་རུ་འགྲོ། སྔོན་ཆད་ཕ་མ་ཚོའི་རིང་ལ་ཤཱང་དང་རྫོང་ཐོག་ལ་མ་སོང་ན་ཀྲུང་གོ་མེ་གོར་ལྟ་རྒྱུ་མེད་པ་དང་། མཚམས་རེར་རྒྱལ་ཁབ་ཀྱིས་ཆེད་དུ་རི་པིན་ཀུའེ་ཙི་ལ་ལྟ་རུ་འཇུག་གི་ཡོད་རབས་ཀྱང་འདུག དེ་ལྟར་དགུན་འཁྱག་བ་མོའི་ཁྲོད་ནས་ཆུ་ཚོད་གསུམ་བཞི་རེར་ཏཱན་ཡེན་ལྟ་བ་དང་། མཚམས་རེར་མི་མང་དྲགས་ན་ལཱེའང་ཀྲིན་ནང་མི་ཤོང་བར། ཕྱི་ལོགས་སུ་ཟོག་རྭ་ཆེན་པོ་ཞིག་ཡོད་པ་དེའི་རྩིག་ངོས་ལ་རས་གཞི་བརྒྱངས་ཏེ། མི་ཚང་མ་ཟོག་རྭའི་ནང་བསྡད་ནས་ཏཱན་ཡེན་ལྟ་དགོས། འདི་དཀའ་ངལ་ཆུང་ཆུང་རེད། ཚང་མའི་སེམས་འཁུར་ཆེ་ཤོས་ཏཱན་ཡེན་འཕྲུལ་ཆས་དང་ཧྥ་ཏུན་ཅི་ལ་ཆག་སྐྱོན་ཤོར་ཨེ་ཡོང་བསམ་པ་དེ་རེད།

དེའི་ཕྱིར་ཉིན་ནས་བཟུང་ང་ཚོ་བྱིས་པ་ཚོར་སླར་ཡང་ཀྲུང་གོ་མེ་གོ་དང་རི་པིན་ཀུའེ་ཙིའི་འཁྲབ་གཞུང་གསར་པ་གསར་རྐྱང་ཞིག་རེག་ཡོད་པ་རེད། ད་དུང་བྱིས་པ་བཙན་པོ་དབང་ཅན་དག་ལ། ལིན་ཙི་ཤུ་དང་། ཐེན་ཙི་མིན། ཁྲིན་ཊིན་སོགས་ཀྲུང་གོའི་ལོ་རྒྱུས་མི་སྣ་དག་གི་མིང་དང་། བྱིས་པ་གཉོམ་ཆུང་དག་ལ་ཀཱིང་པཱེན་རྐུབ་ཆེ་དང་། ཕཱ་ཐོ། ཧྲིན་ཐེ་ངོ་ལུག་སོགས་རི་པིན་དང་མེ་ཀོའི་དམག་དཔོན་ནུས་མེད་ཐ་ཤལ་དག་གི་མིང་བཏགས་ཡོད། དགོད་བྲོ་བ་ཞིག་ལ། བློ་བཟང་མེ་ཀཱོ་ཟེར་བ་སོགས་བྱིས་པ་འགའ་རེར་མིང་དེ་གཏན་འཇགས་སུ་ཐོག་ནས་ད་ལྟའང་མཚང་མིང་ལ་དེ་ལྟར་འབོད། རྔམ་མཐུག་ཅིང་གཏིང་ནག་པའི་བག་ཆགས་སྐྱུར་མོ་དེ་ང་གཅིག་པུ་མ་རེད། ཀྲུང་གོའི་མི་དམངས་དུང་ཕྱུར་བཅུ་གསུམ་གྱི་བརྒྱུད་ན་རིམ་པ་མི་འདྲ་བའི་ཐོག་ཤོག་བུར་སྣུམ་གྱིས་ཟིན་པ་ལྟར་ཤ་གསེང་རུས་གསེང་དུ་འཐིམ་ཡོད།

དཀའ་ཚེགས་ཆེ་བའི་དམག་འཁྲུག་དེ་དག་ཁྲོད། བྱིས་པ་ལ་ལར་ཁ་ཁྲག་སྣ་ཁྲག་བཞུར་བ་དང་གྱོན་པ་རལ་པ། ཐལ་བ་དང་འདམ་ཉོག་ནང་གཡུག་པ་སོགས་བྱས་ཏེ་རི་པིན་ཀུའེ་ཙི་དང་མེ་གོའི་དགྲ་བོ་རྣམས་ཕམ་པར་རྒྱག་དགོས་ལ། ཀྲུང་ཀོའི་པཱ་ལུག་ཅོན་ལ་རྒྱལ་ཁ་འཐོབ་དགོས། གཡུལ་འཁྲུག་དེའི་ཁྲོད་ནས་འགྱིག་ཅཱི་རིལ་དང་། རྩེད་ཆས་ཡག་པོ་འགའ་རེ་ཚེགས་མེད་དུ་རེག་ཐུབ། དེ་དག་ཁ་ཤས་ཀྲུང་གོས་རྒྱལ་ཁའི་ཁྲོད་ནས་བཙན་འཕྲོག་བྱས་པ་རེད་ལ། ཁ་ཤས་རི་པིན་ཀུའེ་ཙི་དང་མེ་གོ་འཁྲབ་མཁན་བྱིས་པ་གཉོམ་ཆུང་ཚོས་ངོ་སྲུང་ཆེད་རྔན་པར་སྤྲད་པ་རེད།

ང་རང་ལོ་བཅུ་དང་བཅོ་ལྔར་སོན་སྐབས་ང་དང་ངའི་རྩེད་རོགས་རྣམས་ཀྱང་ལུས་སེམས་གཉིས་ཀ་འཚར་ལོངས་བྱུང་ཞིང་། སྐབས་དེ་དུས་ཁྱིམ་མཚེས་གྲོང་སྡེ་གཞན་ལ་སོང་ན་ཏཱན་ཡིན་དབྱར་དགུན་གཉིས་ཀར་ལྟ་རྒྱུ་རེག དུས་དེར་རི་པིན་ཀུའེ་ཙི་དང་མེ་གོ་དགྲ་བོ། གོ་མིན་ཏང་ལོག་སྤྱོད་སོགས་ཀྱང་ཕྲན་བུ་ཉུང་དུ་ཕྱིན་འདུག ཏཱན་ཡེན་ལྟ་བྱེད་འཕྲུལ་ཆས་ཀྱང་ཡར་རྒྱས་ཕྱིན་ཏེ་ལའུ་ཞཱེང་(录像)ཟེར་བའི་སྒམ་ཆུང་ནག་པོ་མདུན་ངོས་ཤེལ་ཡོལ་ཅན་ཞིག་དར་སོང་། དེའི་ནང་བྱང་ལ་ཐོ་གང་དང་། ཟུར་ལ་སོར་བཞི་ལྔ་ཅན་གྱི་འཁོར་ཐག་ཅིག་འཇོག་གི་འདུག སྐབས་དེའི་ལའུ་ཞཱེང་ནང་དོན་ཡང་སྣ་ཇེ་མང་ལ་སོང་སྟེ་འཁྲབ་ཚན་ཅན་རིང་པོ་དེ་འདྲ་གཅིག་རྗེས་གཉིས་མཐུད་དུ་ཐོན་སོང་།

ཕྱི་དྲོར་ཟོག་ལུག་ལྷས་ལ་བཅུག་རྗེས་གྲོང་པའི་བྱིས་པ་མང་པོ་མཉམ་དུ་བར་ཐག་ཅུང་རིང་བའི་ལུང་མདོར་གྲོང་སྡེ་གཞན་ཞིག་ཡོད་པ་དེར་ལའུ་ཞཱེང་ལྟ་རུ་འགྲོ་བཞིན་ཡོད། མར་འགྲོ་སྐབས་ཆུ་ཚོད་གཅིག་ལྷག་དང་། ཡར་ལོག་སྐབས་ཧ་ལམ་ཆུ་ཚོད་གཉིས་འགོར་གྱིན་ཡོད། ཤིང་ནགས་དང་བྲག་རོང་ཆུ་འདམ་སོགས་བརྒྱུད་ནས་འགྲོ་དགོས་ཤིང་། མཚམས་རེར་ལའུ་ཞཱེང་བལྟས་ཚར་ནས་མཚན་གུང་ཕྱིར་ལོག་སྐབས་ཆར་བ་འབབ་པ་དང་ཆུ་ལོག་རྒྱུག་པ་སོགས་ཀྱི་ཉེན་ཁ་ཡང་ཡོད། གནམ་གཤིས་ཡག་ན་ལམ་བར་ནས་གཉིད་ཐུན་རེ་རྒྱག་བཞིན་ཡོང་གི་ཡོད་ལ། མཚམས་རེར་བུ་མོ་ཚོར་པྲ་ཚེག་བྱས་ཏེ་རུམ་ལ་ལག་པ་བརྒྱབ་ནས་ནུ་མར་རེག་པ་དང་། མར་མནན་ཏེ་ཁའི་ནང་དུ་མཆིལ་མ་ལྡུག་པ་སོགས་བྱས་ཏེ། རྩེད་ཞོར་དགོད་ཞོར་དུ་ཡོང་ན་ལམ་ཐག་ཐུང་དྲགས་པའི་སྣང་བ་སྟེར་མོད། ནང་དུ་སླེབས་རྗེས་ཆུ་ཚོད་གཉིས་གསུམ་ལས་གཉིད་ལོང་མེད་པར་ནམ་ཁ་གསལ་འགྲོ་ཞིང་། གཉིད་དྭངས་མེད་ཀྱང་ཨུ་ཚུགས་ཀྱིས་ཡར་ལངས་ཏེ་ལས་ཀ་དང་ཕྱུགས་རྫིར་འགྲོ་དགོས། སྐབས་དེ་ཤད་ཅིག་ནས་ང་རང་སློབ་སྦྱོང་གི་ལམ་བུར་སྐྱོད་མགོ་བཙུགས་པ་ཡིན།

སྲན་མ་སོ་ཡིས་མ་ཆོད་པར་ཡོས་ལ་ལྡིང་ཞེས་པའི་དཔེར་ལྟར། དུས་ཀྱི་འགྱུར་གྲོས་ཀྱི་དབང་གིས་དམིགས་འབེན་ལ་གྲུབ་འབྲས་ཆེན་པོ་མ་ཐོན་པ་དང་། མི་ཚང་མར་རང་དོན་རང་གཅེས་དང་རང་དབང་རང་ལུགས་ཀྱི་འདུ་ཤེས་ཤུགས་ཇེ་ཆེར་སོང་བ་དང་བསྟུན་ཏེ། རི་པིན་དང་མེ་གོ་ཕམ་པར་རྒྱག་རྒྱུ་མཚམས་བཞག་སྟེ། བོད་དང་ཡུ་གུར་སོགས་གྲངས་ཉུང་མི་རིགས་ཁག་དང་། བོད་བརྒྱུད་ནང་བསྟན་དང་རྒྱ་བརྒྱུད་ཏའོ་ལུགས་སོགས་ཆོས་ལུགས་ཁག་ཅིག དེ་བཞིན་སྤྱི་ཚོགས་རྙིང་པ་(旧 社会)ཟེར་བ་སོགས་ལ་དགོད་བྲོ་བ་དང་མཚར་སྣང་ཅན་གྱི་སྒྱུ་རྩལ་མཐོན་ཐབས་ཀྱི་ལམ་ནས་གཏམ་རྒྱུད་དང་། སྒྲུང་རིང་ཐུང་སྣ་ཚོགས་བཟོས་ཏེ། མི་རིགས་དེ་དག་དང་ཆོས་ལུགས་དེ་དག་གི་གཡོ་སྒྱུ་ཁྲམ་གསུམ་དང་། རྨོངས་དད་གླེན་ལྐུག མ་རབས་ཐ་ཤལ། འཆལ་སྤྱོད། ཉེས་གསོག་གི་སྣང་བརྙན་ཡ་མ་བརླ་མང་པོ་བཞེངས་སྐྲུན་བྱས་ཏེ། དེ་དག་སུན་འབྱིན་དགག་རྒྱག་དང་། དམའ་འབེབས་ཐེར་འདོན་སོགས་ཀྱི་ལམ་ནས་ཧྭན་མི་རིགས་ཆེན་པོའི་ཟིལ་ཤུགས་ངོམ་པ་དང་ལྷ་མེད་དངོས་གཙོ་རྩོད་སྒྲུབ་སྨྲ་བའི་ལྟ་བ་ཁྱབ་སྤེལ་བྱེད་མགོ་ཚིགས་སོང་།

དེ་དུས་ང་ཚོ་ཡར་རྒྱུག་མར་རྒྱུག་དང་ས་ལྡིང་གནམ་ལྡིང་བྱས་ཏེ་རི་པིན་ཀུའེ་ཙི་དང་མེ་གོའི་དགྲ་བོ་གསོད་རྒྱུ་མེད། གཅིག་ནས་ལའུ་ཞཱེང་གི་ནང་དོན་དེ་རིགས་ཇེ་ཉུང་དུ་སོང་ཡོད་ལ། གཉིས་ནས་ང་ཚོའི་རྩེད་རོགས་ཚང་མ་ནར་སོན་ཏེ་ས་མཆོང་གནམ་མཆོང་བྱེད་རྒྱུར་ངོ་ཚ་བ་དང་བཟོ་ལྟ་དོད་རྒྱུ་ཧ་གོ་ཡོད། ཡིན་ནའང་ཟོག་རྫི་ལུག་རྩི་རི་མགོར་འཛོམས། ཞིང་བ་ཆུ་འདྲེན་ལམ་ཁར་ཐུག་སྟེ། མདང་ནུབ་ལའུ་ཞཱེང་ནང་<<ལྷ་སྲིན་སྡེ་བརྒྱད།>>ནང་གི་ཆོ་ཧྥིན་ལ་དཔའ་རྩལ་ཆེ་ཚུལ་དང་ལྷ་ལྡན་ཆོས་འཁོར་གླིང་ནས་ཡོང་བའི་ཅཱིག་མའོ་ཊི་ལ་མཐུ་རྩལ་ཞན་སྐོར། <<ཧི་ལན་རི་བོའི་ཁ་བ།>>ནང་གི་རྒྱལ་བོ་ཡཱོན་ཧྭོ་ལ་དཔའ་རྩལ་ཆེ་སྐོར་དང་མདོ་གསུམ་ཇོ་སྲས་ལ་གཡོ་སྒྱུ་འཛོམས་ཚུལ། ཧྲོ་ལེན་དགོན་པའི་ནང་གི་ཧུང་ཧྥེ་ཧྭོང་ལ་དྲག་རྩལ་ཆེ་རབས་དང་། ཏོ་ལུགས་པ་ལཱེ་ཏྭ་ཧོང་གི་སྤྱོད་པ་འཆལ་སྐོར། གནམ་བསྐོས་གོང་མར་བྱང་སེམས་ཆེ་སྐོར་དང་ཞིང་བདག་ཕྱུག་པོར་གདུག་རྩུབ་ཆེ་ལུགས་སོགས་གཅིག་ཁ་གཅིག་གིས་འཕྲོག་ནས་ཉི་མ་གང་ནས་ཤར་ཏེ་གང་ལ་ནུབ་པའང་མ་ཤེས་པར་ལའུ་ཞཱེང་གི་ནང་དོན་དེ་དག་བསྐྱར་ཟློས་ཡང་ཟློས་བྱེད་ཀྱིན་ཡོད།

ང་རང་ལོ་ཉི་ཤུར་སོན་པ་དང་དུས་རབས་ཉེར་གཅིག་བརྡ་འཕྲིན་དུས་རབས་ཀྱང་ལྷན་དུ་སླེབས་སོང་། དེ་སྔའི་ལའུ་ཞཱེང་དག་ཀྱང་སྤུས་ཚད་སྔར་ལས་ཇེ་ལེགས་དང་། འོད་སྡེར་(VCD/CD)ཅན་ལ་འཕེལ་རྒྱས་ཕྱིན་སོང་། གློག་བརྙན་གྱི་ནང་དོན་དང་རྣམ་པ་ཡང་དབྱར་གྱི་ཤྭ་འོད་བརྡོལ་བ་ལྟར་བརྗོད་བྱ་སྣ་ཚོགས་རེད། འོན་ཀྱང་ཀྲུང་གོ་བའི་ཟིལ་ཤུགས་ངོམ་པ་དང་གྲངས་ཉུང་མི་རིགས་དང་ཆོས་ལུགས་ལ་གཏམ་བརྗོད་བཟོ་རྒྱུ་སྔར་ལས་རྒྱ་ཆེ་ཞིང་གཏིང་ཟབ་ལ། ‘ནན་ཅིན་དམར་གསོད་ཆེན་མོ’དང་། ‘རི་འགོག་དམག་འཁྲུག’ ‘མེ་འགོག་ཁྲོ་རོགས’ སོགས་ལོ་རྒྱུས་ཀྱི་དོན་རྐྱེན་དང་ཞེ་འཁོན་གྱི་རྨ་ཁ་དག་ལའང་ཡང་ནས་ཡང་དུ་རེག་རེག་བྱས་ཏེ། རྣམ་པ་གཞན་ཞིག་གི་ལམ་ནས་ཀྲུང་གོའི་མི་མང་གི་སེམས་ངོར་འཇོག་ཐབས་བྱེད།

ད་ལྟ་ང་དང་ངའི་བྱིས་དུས་ཀྱི་རྩེད་རོགས་རྣམས་དང་གཞོན་དུས་ཀྱི་སློབ་གྲོགས་ཚོས་རི་པིན་ཀུའེ་ཙི་མི་གསོད་ལ། མེ་གོ་དགྲ་བོ་དང་གོ་མིན་ཏང་ལོག་སྤྱོད་པར་དམག་འཁྲུག་ཀྱང་མི་རྒྱག སྔོན་ཆད་སོ་སོས་བསམ་མ་ཤེས་པ་དང་། ཀྲུང་གོས་འུར་མགོ་བསླངས་ཏེ་ཤི་རྨས་ཚབས་ཆེན་བཟོས་པར་འགྱོད་བཤགས་དང་། མདོ་གསུམ་ཇོ་སྲས་དང་ཏའོ་ལུགས་རྒན་པོར་འཕྱ་སྨོད་བྱས་པར་གནོང་འགྱོད་སྐྱེ་བཞིན་ཡོད།

ད་ནི་ང་ཚོས་སི་ཁཱོ་ལན་ཌིས་དབྱིན་ཇིའི་བཙན་འཛུལ་འོག་ནས་རང་དབང་བརྩད་པའི་<> དང་། འབར་མའི་མི་མང་གིས་དམངས་གཙོ་བརྩོན་ལེན་བྱས་པའི་<>། རོ་མན་གྱི་གཏུམ་སྤྱོད་ཆེ་བའི་རྒྱལ་བོ་མགོ་རྟིང་བསློགས་པའི་<< Gladiator>>། ཐའེ་ཝན་གྱི་གཉུག་མའི་མི་རིགས་ཚོས་བདག་དབང་འཐབ་རྩོད་བྱས་པ་<< Warriors of the Rainbow: Seediq Bale>>། རྒྱ་གར་གྱིས་རང་དབང་རང་བཙན་ཀྱི་ལས་འགུལ་སྤེལ་བའི་<< Gandhi>>སོགས་ལ་བལྟས་ཏེ། དེ་དག་གི་ཕུག་བསམ་དང་སྙིང་སྟོབས་ལ་སློབ་སྦྱོང་དང་། འདས་པའི་དུས་རབས་ཕྱེད་ལྷག་གི་ཀྲུང་གོའི་གློག་བརྙན་འཁྲབ་གཞུང་དང་འཁྲབ་སྟོན་པ། འཁྲབ་ཁྲིད་པ། འཁྲབ་ཚན་རེ་རེའི་ནང་དོན་དང་རྒྱབ་ལྗོགས་སོགས་ལ་བསྐྱར་དུ་བསམ་གཞིགས་དང་དབྱེ་ཞིབ་བྱ་རྒྱུ་ཡིན། རི་པིན་ཀུའེ་ཙི་ཡི་བདེན་དང་མེ་གོ་དགྲ་བོ་ཡི་ལོ་རྒྱུས་འཚོལ་རྒྱུ་ཡིན། རྒྱལ་སྤྱིའི་ཁྲིམས་ལུགས་དང་མི་ཆོས་ཀུན་སྤྱོད་ཀྱི་ཐོག་ནས་<<ཝུན་ཁྲིན་ཀོང་ཇོ།>> དང་། <<གླིང་སྒྲུང་།>>། <<དར་མདོའི་མཛའ་གཞས།>>། <<བོད་ཀྱི་གསང་སྒྲུང་།>> སོགས་ཀྱི་བདེན་པ་བརྡར་རྒྱུ་ཡིན།

མཚན་གུང་ཆུ་ཚོད་དང་པོ་ཡོལ་སོང་། འབྲི་བཞིན་འབྲི་བཞིན་རྦད་དེ་ཉོག་ཐལ། དགོངས་དག འདི་ནས་འབྲི་མཚམས་འཇོག་རྒྱུ་ཡིན།

་་་་་་་་་་་ རྒྱ་ནག་གིས་བོད་བཙན་བཟུང་བྱེད་སྐབས་བོད་མི་ས་ཡ་གཅིག་ལྷག་གི་ཚེ་སྲོག་ཤོར་ཡོད་ཟེར་གྱིན་ཡོད་ཀྱང་། བོད་གཞུང་དྲིལ་བསྒྲགས་ལྷན་ཁང་གིས་ཞིབ་འཇུག་སྔ་ཕྱི་མང་པོ་བྱས་ཀྱང་བོད་མི་ཁྲི་གཅིག་གི་མིང་ཐོ་ཡང་རེག་ཡོད་པ་མ་རེད། ་་་་་་་ཟེར།

་་་་་་་་་་་་་ ཀྲུང་གོ་དང་ཉི་ཧོང་རྒྱལ་ཁབ་གཉིས་ཀྱི་མི་དམངས་མི་རབས་བར་ནས་མི་རབས་བར་མཛའ་མཐུན་དང་། ལོ་རྒྱུས་མིག་དཔེར་བལྟས་ཏེ་ཞི་བདེ་ལ་བྱས་རྗེས་འབུལ་འོས། ལོ་རྒྱུས་བརྗེད་ཚེ་ངོ་ལོག་པ་ཡིན་ལ། ནག་ཉེས་ཁས་མ་བླངས་ཚེ་ནག་ཉེས་བསགས་པ་ཡིན་ཏེ། བཙན་འཛུལ་དམག་འཁྲུག་གི་ལོ་རྒྱུས་སྣང་མེད་དུ་འཇོག་འདོད་པའི་རྣམ་འགྱུར་དང་། བཙན་འཛུལ་དམག་འཁྲུག་གི་ངོ་བོ་ཡག་པོར་སྒྱུར་འདོད་ཀྱི་གཏམ་སྤྱོད་ཅི་ཙམ་བྱས་ཀྱང་ཆོག བཤད་སྟངས་ཅི་འདྲ་ཡག་ཀྱང་རུང་།
དེ་དག་ཡོངས་རྫོགས་ཀྱིས་མི་རིགས་ཀྱི་ཞི་བདེ་དང་དྲང་བདེན་ལ་སྔར་ལས་ལྷག་གི་གནོད་བསྐྱལ་བ་ཡིན། ནོར་འཁྲུལ་གྱི་གཏམ་སྤྱོད་དེ་དག་ལ་ཞི་བདེ་དང་དྲང་བདེན་ལ་དགའ་བའི་མི་རྣམས་ཀྱིས་ངེས་པར་དུ་དོགས་ཟོན་དང་མཐའ་གཅིག་ཏུ་ངོ་རྒོལ་བྱེད་དགོས། ་་་་་་་་་་་་་་་་་་་

ཉི་ཧོང་གི་སྲིད་བློན་ཁོང་ལྷ་ཁང་དེར་མཆོད་འབུལ་དུ་སྐྱོད་དེ་ཕྱིར་ལོགས་སྐབས་རྒྱ་ནག་སོགས་ཀྱིས་སྐྱོན་བརྗོད་བྱས་སྐབས་ཁོས་ལན་འདི་ལྟར་བརྒྱབ་ཡོད། ངས་འཛམ་གླིང་དམག་ཆེན་གཉིས་པའི་ནང་འདས་གྲོངས་སུ་སོང་བའི་དཔའ་བོ་དག་ལ་དྲན་གསོའི་མཆོད་འབུལ་བྱས་པ་དེ། དམག་ཆེན་གཉིས་པར་ཡི་རངས་བྱས་པ་མིན་ལ། དམག་ཆེན་ཁྲོད་མི་གསོད་ཁྲག་སྦྱོར་གྱི་བྱ་སྤྱོད་ལ་སྔགས་བརྗོད་བྱས་པ་དེ་བས་ཀྱང་མིན། ངས་ངའི་རྒྱལ་ཁབ་དང་ངའི་མི་རིགས་ཀྱི་ཆེད་དུ་ཚེ་སྲོག་ཤོར་བའི་དཔའ་བོ་དང་། ངའི་ཤ་ཁྲག་གཅིག་པའི་མེ་པོ་དེ་དག་གིས་མི་ཚེའི་བདེ་སྐྱིད་ལ་རོལ་མ་ཐུབ་པར་དར་མའི་དུས་སུ་ཚེ་སྲོག་ཤོར་བར་མྱ་ངན་དང་གུས་བཀུར་ཞུས་པ་ཡིན། འགྲོ་བ་མི་སུ་འདྲ་ཞིག་ཡིན་ནའང་རང་གི་མེས་པོ་དང་རང་གི་མི་རིགས་འདས་གྲོངས་སུ་ཕྱིན་པ་དག་ལ་གུས་བཀུར་བྱེད་པ་དེ་མིའི་རིགས་ཀྱི་བཟང་སྤྱོད་ཅིག་རེད། དེས་རྒྱལ་ཁབ་སུ་ལའང་འཁོན་སེམས་སློང་གི་མེད་ལ། གུས་བཀུར་མཆོད་འབུལ་དེའི་རྒྱབ་མདུན་དུ་བརྩེ་དུང་དང་ཆོས་སེམས་ཙམ་ལས་ཆབ་སྲིད་དང་དཔལ་འབྱོར་རྒྱལ་ཕམ་གྱི་རྣམ་འགྱུར་གང་ཡང་མེད། གལ་སྲིད་གུས་བཀུར་དེར་འགྲེལ་བཤད་ལོག་པར་རྒྱག་དང་དེའི་རྒྱབ་ལྗོངས་སུ་གནས་ཚུལ་གཞན་ཡོད་པར་འདོད་མཁན་ཞིག་ཡོད་ན། མི་དེ་དག་གི་ཀུན་སློང་རྣམ་དག་མིན་པ་དང་སེམས་ནང་ཞེ་འཁོན་ཆེན་པོ་ཞིག་ཉར་ཡོད་པའི་རྟགས་ཡིན་པ་ལས་དེ་ང་ཚོའི་ཕྱོགས་སུ་འགན་འཁུར་གང་ཡང་མེད་ཅེས་བརྗོད་ཡོད། དབྱིན་ཡིག་ལས་བསྒྱུར་བ་ཡིན།

བཙན་འཛུལ་པའི་ལོ་རྒྱུས་རོགས་རིམ་དང་ཅིང་གྲོལ་གྱི་ངོ་བོ་སྒྱུར་ཐབས་བྱེད་མཁན་ནི་ཞིས་དང་རྒྱ་ནག་མི་རིགས་རིང་ལུགས་པ་རང་ཉིད་རེད།།

རྒྱ་ནག་གི་སྐྱག་རྫུན་ལ་རྫོགས་ཡག་ཡོད་མ་རེད། གང་ལྟར་བཤད་རུང་མ་བཤད་རུང་འཇར་པན་གྱི་རྗེས་སུ་ལུས་འདུག་པ་དེ་རེད།