རྒྱ་ནག་ལ་ཏཱ་ལའི་བླ་མ་དགོས་མཁོ་ཡོད།

<<རྒྱ་ནག་ལ་ཏཱ་ལའི་བླ་མ་དགོས་མཁོ་ཡོད།>>ཞེས་པའི་རྩོམ་ཡིག་དེ་ནི་ཨ་རིར་བཞུགས་མཁན་ཆབ་སྲིད་དཔྱད་གཏམ་པ་རྒྱ་རིགས་ཤེས་ཡོན་ཅན་གྲན་ཕོ་ཁུང་གིས་ཉེ་ཆར་ཨ་རིའི་གྲོང་ཁྱེར་ནེའུ་ཡོག་ནང་བསྐོང་ཚོགས་གནང་བའི་༧གོང་ས་༧སྐྱབས་མགོན་ཆེན་པོ་མཆོག་ལ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ ༢༥ འཁོར་བར་དགའ་སྟོན་རྟེན་འབྲེལ་ཞུ་བའི་མཛད་སྒོའི་ཐོག་གསུང་བཤད་གནང་བའི་རྩོམ་ཡིག་ཡིན་ཞིང་། རྩོམ་ཡིག་དེ་རྒྱ་ཡིག་གི་དྲ་ཚིགས་ཆེ་ཁག་ནང་ཐོན་ཏེ་ཀློག་མཁན་མང་པོ་བྱུང་ཡོད་ཀྱང་། བོད་ཡིག་ནང་མེད་སྟབས་ཆེད་དུ་བོད་བསྒྱུར་ཞུས་པ་ཡིན།

————————————————————————————————–

དྲུང་འཕར་ཀུན་དགའ་བཀྲིས་ཀྱིས་རྒྱ་ཡིག་ནས་བོད་ཡིག་ཏུ་བསྒྱུར།

ཕྱི་ཟླ་བཅུ་གཉིས་པའི་ཚེས་བཅུའི་ཉིན་མོ་འདི་ནི་ག་དུས་ཡིན་རུང་སྤྱིར་བཏང་མིན་པའི་ཉིན་མོ་ཞིག་ཡིན་པ་དང་། ལོ་འདིའི་ཟླ་བ་ ༡༢ ཚེས་ ༡༠ ཉིན་མོ་ནི་དེ་བས་དམིགས་བསལ་གྱི་ཉིན་མོ་ཞིག་ཆགས་ཡོད། གང་ཡིན་ཟེར་ན། འདི་ལོ་ནི་༧གོང་ས་ཏཱ་ལའི་བླ་མ་མཆོག་ལ་ནོ་བྷེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ཧྲིལ་པོ་ ༢༥ འཁོར་གྱི་ཡོད་པ་ནི་དུས་རབས་བཞི་ཆ་གཅིག་གི་འཕེལ་རིམ་གྱི་རྡོ་རིང་ཞིག་ཡིན།

དུས་རབས་སྔོན་མའི་དུས་དཀྱིལ་དུ་བཙན་བྱོལ་གྱི་ལམ་བུར་ཕེབས་དགོས་བྱུང་མ་ཐག ༧གོང་ས་ཏཱ་ལའི་བླ་མཆོག་གིས་གཟིགས་རྒྱང་རིང་པའི་དགོངས་གཞི་ཟབ་མོ་དང་། ནམ་ཡང་འགྱུར་བ་མེད་པའི་ཐུགས་སྟོབས་ལ་བརྟེན་ནས་འགྲོ་བ་མིའི་རིགས་ཀྱི་རིན་བྲལ་ནོར་བུ་ཡིན་པའི་བོད་ཀྱི་སངས་རྒྱས་པའི་ཆོས་དང་། རིག་གཞུང་སྲུང་སྐྱོབ་གནང་ཡོད་པ་མ་ཟད། འཛམ་གླིང་ས་ཕྱོགས་གང་སར་བྱམས་དང་བརྩེ་བས་གཙོ་བོར་བྱས་པའི་བོད་བརྒྱུད་ནང་བསྟན་ངོ་སྤྲོད་གྱི་མཛད་འཕྲིན་བསྐྱངས་པའི་ཤུགས་རྐྱེན་ཆེན་པོ་འཇོག་གནང་མཛད་ཡོད།

ཕྱི་ལོ་ ༢༠༠༩ ལོར་གུས་པ་དྷ་རམ་ས་ལར་འཚམས་འདྲིར་བསྐྱོད་སྐབས་དབེན་པའི་གཡང་གཟར་རི་གྲོང་གི་སིང་དུ་འཛུགས་སྐྲུན་གནང་བའི་དགོན་པ་གྲྭ་ཚང་དང་། སློབ་གྲྭའི་ནང་འདོན་པ་གསུང་པའི་དབྱངས་དང་། སློབ་དེབ་ཀློག་པའི་སྒྲ་རྣམས་མཐོང་ཐོས་ཡོང་དུས་ངའི་སེམས་ནང་དགའ་སྐྱོ་ཟུང་འབྲེལ་གྱི་ཚོར་བ་བྱུང་། བོད་མི་བཙན་བྱོལ་བའི་རང་གི་མཛེས་སྡུག་ལྡན་པའི་ཕ་ཡུལ་མེད་པར་གྱུར་ཏེ་མིའི་ལུང་པར་ཁྱིམ་གཞིས་འཛུགས་དགོས་ཆགས་པ་ནི་སྐྱོ་དགོས་པ་ཞིག་ཡིན། འོན་ཀྱང་བོད་ཀྱི་ཆོས་དང་། སྐད་ཡིག རོལ་དབྱངས། ཞབས་བྲོ། ཆས་གོས་སོགས་སྲོལ་རྒྱུན་རིག་གཞུང་སྲུང་སྐྱོབ་འཐུས་ཚང་ཐུབ་ཡོད་པ་ནི་དགའ་འོས་པ་ཞིག་རེད།

དུས་རབས་སྔོན་མའི་དུས་དཀྱིལ་ཡོལ་ཙམ་ལ་རྒྱ་ནག་དམར་པོའི་གཞུང་གིས་བོད་ནང་གི་དགོན་སྡེ་གྲྭ་ཚང་དང་། ལྷ་ཁང་རི་ཁྲོད་སོགས་རིག་གཞུང་གི་བསྟི་གནས་རྣམས་ངན་པ་ཁོག་བཅུག་གིས་གཏོར་བཤིག་བཏང་ཡོད་པ་དེ་ནི་བོད་ཀྱི་ལོ་རྒྱུས་ཐོག་བྱུང་མ་མྱོང་བའི་ཚབས་ཆེའི་གཏོར་བཤིག་ཅིག་ཡིན། ཡིན་ན་ཡང་༧གོང་ས་ཏཱ་ལའི་བླ་མ་ཆོག་གིས་ཞི་དུལ་བབ་བརླིང་གི་ངང་ནས་བཙན་བཟུང་དང་། འཕྲོག་བཅོམ། དྲག་གནོན་ལ་གདོང་གཏུགས་གནང་ཡོད། མ་གཞི་ཚད་ལས་འདས་པའི་སྐུ་ངལ་ཆེན་པོ་བྱུང་ཡོད་ཀྱང་། ༧གོང་ས་ཏཱ་ལའི་བླ་མ་མཆོག་ནས་སྙིང་རྗེ་ཆེན་པོའི་ཉམས་ལེན་གནང་མཁན་གྱི་ངང་ཚུལ་བཟུང་སྟེ། བཟོད་སྒོམ་གྱིས་ཀླ་ཀློར་ཁ་གཏད་དང་། བྱམས་བརྩེས་འཁོན་སེམས་ལ་ཁ་གཏད་གནང་གི་ཡོད།

༧གོང་ས་ཏཱ་ལའི་བླ་མ་མཆོག་གིས་མི་རིགས་ཀྱི་འགལ་ཟླ་མེད་པར་བཟོ་ཆེད་དང་། རྒྱ་བོད་མི་རིགས་གཉིས་འཆམ་མཐུན་ཡོང་ཆེད་དབུ་མའི་ལམ་གྱི་དགོངས་པ་གསར་གཏོད་གནང་ཡོད། ༧གོང་ས་མཆོག་གི་དགོངས་པ་དེ་ལ། བོད་ཕྱི་ནང་གཉིས་ཀྱི་བོད་མི་ཚོས་རྒྱབ་སྐྱོར་དང་ངོས་ལེན་གནང་གི་ཡོད་པ་མ་ཟད། འཛམ་གླིང་རྒྱལ་ཁབ་ཁག་གིས་ཀྱང་དགོངས་པ་དེ་གསལ་རྟོགས་བྱུང་ཡོད། དེར་བརྟེན་༧གོང་ས་ཏཱ་ལའི་བླ་མ་མཆོག་ལ་ནོ་བྷེལ་ཞི་བདེའི་གཟེངས་རྟགས་ཀྱི་མཚན་བསྟོད་གསོལ་བ་དེ་ནི་ངོ་གནོང་མི་དགོས་པ་ཞིག་དང་། མཚན་དོན་མཚུངས་པ་ཞིག་ཡིན།

༧གོང་ས་ཏཱ་ལའི་བླ་མ་མཆོག་ལ་བོད་མི་ཡོངས་ཀྱི་གུས་བཀུར་ཐོབ་ཀྱི་ཡོད་ལ། འཛམ་གླིང་སྐྱེ་རྒུ་མང་ཆེ་བའི་གུས་བཀུར་ཀྱང་ཐོབ་ཡོད། རྒྱ་ནག་གི་མགོ་ཁྲིད་རྣམས་ལ་མཚོན་ན། རྒྱ་རིགས་ཡོངས་ཀྱི་གུས་བཀུར་ཐོབ་མཁན་མགོ་ཁྲིད་སུ་གཅིག་མེད་ལ། འཛམ་གླིང་སྐྱེ་རྒུ་མང་ཆེ་བའི་གུས་བཀུར་ཐོབ་མཁན་ཞིག་དེ་བས་ཀྱང་མེད་པ་མ་ཟད། དེ་ལས་ལྡོག་སྟེ། འཛམ་གླིང་སྐྱེ་རྒུ་མང་ཆེ་བའི་སྐྱོན་བརྗོད་བཟེད་ཡུལ་དང་། དོགས་པ་བྱེད་ཡུལ་དུ་གྱུར་ཡོད།

༧གོང་ས་ཏཱ་ལའི་བླ་མ་མཆོག་གི་རྣམ་དཔྱོད་དང་། ཀུན་སྤྱོད། མཚན་སྙན་བཅས་ནི་གོ་གནས་མཐོ་ཞིང་དབང་ཆ་ཆེ་བའི་རྒྱ་ནག་དམར་པོའི་མགོ་ཁྲིད་རྣམས་ཀྱི་རྣམ་དཔྱོད་དང་། ཀུན་སྤྱོད། མཚན་སྙན་དང་བསྡུར་ཐབས་མེད་པས། སྐྱེས་ཆེན་དམ་པའི་བྱམས་སྐྱོང་གི་བཞིན་རས་ཀྱིས་སྟོབས་ཆེན་ཡུལ་གྱི་གདུག་རྩུབ་སྲིད་དབང་གི་རྣམ་པ་ཟིལ་གྱིས་མནན་ཡོད།

རྒྱ་ནག་གཞུང་གིས་བོད་འདི་རྒྱ་ནག་གི་ཁ་བྲལ་ཐབས་མེད་པའི་ཆ་ཤས་ཤིག་ཡིན་ཅེས་ཤོད་ཀྱི་ཡོད། དེ་ལྟར་ཡིན་ན། མ་མཐར་ཡང་༧གོང་ས་ཏཱ་ལའི་བླ་མ་མཆོག་དང་བོད་བརྒྱུད་ནང་བསྟན་ནི་རྒྱ་ནག་ལ་མེད་དུ་མི་རུང་བའི་བསམ་བློའི་རྒྱུ་ནོར་ཞིག་ཡིན་པ་ཁས་ལེན་བྱེད་དགོས་ཀྱི་རེད། དེང་སང་གི་རྒྱ་ནག་ནི་སྤྱི་ཚོགས་ཀྱི་སྤྱོད་བཟང་ཉམས་པ་དང་། དཔོན་རིགས་ཁྲོད་ལྐོག་ཟ་རུལ་སུངས་བྱེད་མཁན་མང་བའི་གནས་སུ་གྱར་ཡོད་པར་བརྟེན། སྣང་ཚུལ་དེ་དག་བཟོ་བཅོས་བྱེད་པ་ལ་༧གོང་ས་ཏཱ་ལའི་བླ་མ་མཆོག་གི་བྱམས་བདེན་སྤྱོད་བཟང་གི་མཛད་པའི་སྟོབས་ཤུགས་འདི་ཧ་ཅང་གི་དགོས་མཁོ་ཆེན་པོ་ཆགས་ཡོད།

ཡང་དག་པའི་བོད་བརྒྱུད་ནང་བསྟན་རྒྱུན་འཛིན་གནང་མཁན་དང་། བོད་རིགས་མི་མང་གི་བསམ་པའི་གཙོ་འཛིན། ནོ་བྷེལ་ཞི་བདེའི་གཟེངས་རྟགས་བཞེས་མཁན། སྤྱོད་མཆོག་གྲགས་ཅན་གྱི་འཛམ་གླིང་ཆོས་ལུགས་དབུ་ཁྲིད་བཅས་ཡིན་པའི་༧གོང་ས་ཏཱ་ལའི་བླ་མ་མཆོག་ལ་ཡོད་པ་ནི་བཟང་པོའི་ཡོན་ཏན་དང་། མཚན་དང་སྙན་གྲགས་ཡིན་པ་དང་། ཡོན་ཏན་དང་མཚན་སྙན་དེ་དག་གིས་འཛམ་གླིང་མི་མང་རྣམས་ལ་སློབ་གསོ་གནང་གི་ཡོད་ལ། རྒྱ་ནག་མི་མང་ལ་ཡང་སློབ་གསོ་གནང་གི་ཡོད། ཁོང་གི་མཛད་པ་དེ་དག་གིས་འཛམ་གླིང་ལ་ཤུགས་རྐྱེན་གཏོང་ཐུབ་ལ། རྒྱ་ནག་ལ་ཡང་ཤུགས་རྐྱེན་གཏོང་ཐུབ་ཀྱི་ཡོད།

ངས་འདིར། རྒྱ་ནག་གཞུང་ལ་རེ་སྐུལ་ནན་པོ་བྱེད་རྒྱུར། སྐུ་ན་སྨིན་པའི་༧གོང་ས་མཆོག་བོད་དུ་ཕྱིར་ལོག་ཕེབས་བཅུག་དགོས་པ་དང་། ༧གོང་ས་མཆོག་འཇམ་དབྱངས་ཀྱི་གནས་སུ་གྲགས་པའི་རི་བོ་རྩེ་ལྔར་གནས་གཟིགས་སུ་ཕེབས་བཅུག་དགོས་ལ། ༧གོང་ས་མཆོག་རྒྱ་ནག་གི་ས་ཁུལ་གང་སར་ཕེབས་བཅུག་དགོས་ཞེས་རེ་འབོད་བྱེད་རྒྱུ་ཡིན།

དེ་འདྲའི་དུས་ཚོད་ཞིག་ཤར་སྐབས་༧གོང་ས་མཆོག་ལ་བོད་མི་མང་གི་དགའ་བསུ་ཆེན་པོ་ཐོབ་རྒྱུ་ཡིན་པ་མ་ཟད། རྒྱ་རིགས་མི་མང་གིས་ཀྱང་དགའ་བསུ་ཐོབ་རྒྱུ་གཏན་འཁེལ་ཡིན། དེ་འདྲའི་དུས་ཚོད་ཞིག་ཤར་སྐབས་༧གོང་ས་མཆོག་ལ་བོད་མིའི་དད་གུས་ཐོབ་རྒྱུ་ཡིན་པ་མ་ཟད། རྒྱ་རིགས་ནས་ཀྱང་གུས་བཀུར་ཐོབ་རྒྱུ་གཏན་འཁེལ་ཡིན་སྟབས། དེ་ལྟ་བུའི་དགའ་བསུ་དང་། གུས་བཀུར་ནི་རྒྱ་ནག་སྤྱི་ཚོགས་ཀྱི་སྤྱོད་བཟང་སྲུང་སྐྱོབ་བྱེད་པར་དུས་ཐོག་གི་ཆར་བ་ལྟ་བུ་ཆགས་ཡོད།

༧གོང་ས་ཏཱ་ལའི་བླ་མཆོག་བོད་དུ་ཕེབས་ཐུབ་པ་ཡིན་ན། བོད་ཁུལ་བརྟན་ལྷིང་ཡོང་རྒྱུར་ཕན་ཐོགས་ཡོད་ལ། རྒྱ་ནག་གི་སྤྱི་ཚོགས་བརྟན་ལྷིང་ཡོང་རྒྱུར་ཡང་ཕན་ཐོགས་ཡོད། རྒྱ་ནག་གཞུང་གིས་ཡང་ཡང་ཤོད་བཞིན་པའི་ “སྤྱི་ཚོགས་བརྟན་ལྷིང་།” ཟེར་བ་འདི་གཅིག་བྱས་ན་༧གོང་ས་མཆོག་བོད་དུ་ཞབས་བཅག་པ་དེ་རང་གི་ཐོག་ནས་མངོན་འགྱུར་ཡོང་ཐུབ་པས། དེ་ལྟར་བྱུང་ཚེ། དེ་ནི་ལས་ཆུང་ཕན་ཆེའི་དཔེ་རང་རེད།

ང་རང་རྒྱ་ནག་སྐམ་ས་ཆེན་པོར་འཚར་ལོངས་བྱུང་བའི་རྒྱ་རིགས་ཤེས་ཡོན་ཅན་ཞིག་ཡིན་པའི་ཆ་ནས་ངས་རྒྱ་རིགས་ཀྱི་བསམ་བློའི་འཁྱེར་སོ་ཧ་ཅང་གསལ་པོ་རྟོགས་ཐུབ། དབུ་མའི་ལམ་ནི་རྒྱ་ཆེའི་རྒྱ་རིགས་ཀྱིས་ཁས་ལེན་བྱེད་ཐུབ་པའི་ཆབ་སྲིད་ཀྱི་དགོངས་པ་དང་། རིག་པའི་གཞུང་ལུགས་ཀྱི་བསམ་བློ་ཞིག་ཡིན་ཞིང་། ད་ལྟའི་དངོས་ཡོད་གནས་སྟངས་ནས་བཤད་ཀྱང་། བོད་ཀྱི་གནད་དོན་ཐག་གཅོད་ཡོང་དགོས་ན། དབུ་མའི་ལམ་རྒྱུན་འཁྱོངས་དེ་ཡིན། དེར་བརྟེན་ངས་བོད་རིགས་གྲོགས་པོ་ཚོར། སྐུ་ངལ་གང་འདྲ་ཞིག་འཕྲད་རུང་༧གོང་ས་ཏཱ་ལའི་བླ་མ་མཆོག་ནས་འདོན་གནང་མཛད་པའི་དབུ་མའི་ལམ་རྒྱུན་འཁྱོངས་གནང་རོགས་གནང་ཞེས་རེ་སྐུལ་ཞུ་གི་ཡོད། གང་ཡིན་ཟེར་ན། དབུ་མའི་ལམ་གྱི་དོན་སྙིང་ནི་ཧ་ཅང་གཏིང་ཟབ་པ་དང་། དབུ་མའི་ལམ་གྱི་ཤུགས་རྐྱེན་ནི་ཧ་ཅང་རྒྱ་ཆེན་པོ་ཡིན་པས། དགོངས་གཞི་དེ་ལ་མི་སེམས་འགུལ་བའི་ནུས་པ་རླབས་ཆེན་ཞིག་ཡོད་པས་ཡིན།

ངས་འདིར་༧གོང་ས་ཏཱ་ལའི་བླ་མ་མཆོག་སྐུ་ཚེ་ཡུན་ཏུ་གཏན་ནས་མཐོ་སྒང་གི་ས་མཐོར་ཞབས་བཅག་ཐུབ་པ་དང་། རྒྱ་ཡི་ཡུལ་གང་སར་གནས་ཆིབས་སྒྱུར་གནང་ཐུབ་པར་སེམས་གཏིང་གི་སྨོན་འདུན་ཞུ་རྒྱུ་ཡིན། དེ་ལྟ་བུའི་དཔྱད་དཔལ་ཞིག་བསླེབས་ནས་མེ་ཏོག་བཞད་པའི་དུས་ཚོད་དེ་མྱུར་དུ་ཤར་རྒྱུར་སེམས་གཏིང་ནས་རེ་སྒུག་བྱེད་ཀྱིན་ཡོད། ཐུགས་རྗེ་ཆེ། བཀྲ་ཤིས་བདེ་ལེགས།

སྒྱུར་མཁན་གྱི་མཆན། སྐུ་ཞབས་གྲན་ཕོ་ཁུང་ནི་ཞི་བདེའི་གཟེངས་རྟགས་མཛད་སྒོར་ནེའུ་ཡོག་དང་། ནེའུ་འཇས་སི་ས་གནས་བོད་རིགས་སྤྱི་མཐུན་ཚོགས་པས་གདན་ཞུ་གནང་ཞིང་། ཁོང་གི་གསུང་བཤད་གྲུབ་སྟེ་ལོག་ཕེབས་སྐབས། ཚོགས་ཁང་ནང་གི་གཡས་གཡོན་དུ་ཞུགས་པའི་བོད་མི་ཚོས་ཐུགས་རྗེ་ཆེ་ཞེས་ཕྱག་བརྡབ་པའི་སྐབས་ཁོང་གིས་མིག་ལ་མཆི་མ་འཁོར་བ་དང་ཆབས་ཅིག ཁོང་ཚོགས་ཁང་གི་ཕྱི་ལ་སླེབས་ནས་རླངས་འཁོར་ནང་འཛུལ་གྲབས་བྱེད་པའི་སྐབས། ད་ལྟ་བོད་མི་ཚོས་གཡས་གཡོན་ནས་ལག་པ་བརྡབ་སྐབས་ངས་གཡས་ཕྱོགས་ལ་བལྟས་པ་མ་ཏོགས། གཡོན་ཕྱོགས་ཀྱི་བོད་མི་རྣམས་ལ་བལྟ་རྒྱུ་བྱུང་མ་སོང་བས་ཁོང་རྣམས་ལ་གུས་ཞབས་མེད་པ་ཆགས་ཀྱི་མ་རེད་དམ་ཞེས་བཀའ་འདྲི་གནང་བཞིན་དུ་རླངས་འཁོར་ནང་འཛུལ་སོང་།

མ་རྩོམ་རྒྱ་ཡིག་གི་འབྲེལ་ཐག http://www.boxun.com/news/gb/pubvp/2014/12/201412141113.shtml#.VJiAAsAo