ཁ་སང་ཕྱི་ཟླ་ ༡ ཚེས་ ༡༣ ཉིན་རྒྱ་ནག་གི་སྐད་བརྡ་རིག་པའི་མཁས་པ་རྒྱ་ཡིག་གི་སྦྱོར་ཀློག་གསར་གཏོད་པ་ཀྲུའུ་ཡའོ་ཀུང་(Zhou Youguang)ལགས་དགུང་གྲངས་ ༡༠༩ ལ་ཕེབས་པའི་སྐྱེས་སྐར་དང་བསྟུན་ཏེ། རྒྱ་ཡིག་གི་བརྒྱུད་ལམ་ཁག་ཏུ་ཁོང་གི་ལོ་རྒྱུས་དང་མཛད་རྗེས། ཆབ་སྲིད་ལྟ་བ་བཅས་ཀྱི་སྐོར་ལ་གླེང་སློང་ཆེན་པོ་བྱེད་བཞིན་འདུག
དེ་རིང་ཀྲུང་གོར་ལྟ་བ་ཞེས་པའི་དྲ་ཚིགས་ཀྱིས་ཀྲུའུ་ཡའོ་ཀུང་ལ་བཅའ་འདྲི་ཞིག་ཞུས་པའི་ལན་དུ་ཁོང་གིས། “རྒྱ་ནག་གི་དཔལ་འབྱོར་བཅོས་བསྒྱུར་བྱས་ཏེ་མི་ལོ་ ༣༠ ཕྱིན་ཡོད་ཀྱང་རྒྱ་ནག་ལ་ད་དུང་དམངས་གཙོ་མངོན་འགྱུར་བྱེད་ཐུབ་མེད། ངས་དུས་རྒྱུན་དུ་བཅོས་བསྒྱུར་དང་འཕེལ་རྒྱས་ཀྱི་ལམ་ཁ་གཙོ་བོ་དེ་དམངས་གཙོའི་ལམ་ལུགས་ཁོ་ན་ཡིན་པར་ཡིད་ཆེས་བྱེད་ཀྱིན་ཡོད།”ཅེས་བརྗོད་འདུག
ཀྲུའུ་ཡའོ་ཀུང་ལས་གནས་ནས་དགོངས་པ་ཞུས་རྗེས་ཁོས་དེབ་བཅུ་གྲངས་ཤིག་བྲིས་ཡོད་པ་དང་། དེབ་དེ་དག་ནང་རྒྱ་གཞུང་གི་ཆབ་སྲིད་བཅོས་བསྒྱུར་བྱས་མེད་པ་དང་ཏུན་ཞོ་ཕིན་གྱིས་དཔལ་འབྱོར་བཅོས་བསྒྱུར་ལའང་ཆད་ལྷག་མང་པོ་ཡོད་པ་སོགས་བྲིས་ཡོད་འདུག ཁོང་གིས “རྒྱ་ནག་མི་མང་གི་དཔལ་འབྱོར་ཡར་རྒྱས་འགྲོ་བཞིན་པ་འདི་གལ་ཆེན་མ་རེད། རྒྱ་ནག་དམངས་གཙོའི་ལམ་དུ་འགྲོ་རྒྱུ་ནི་མིའི་རིགས་ཀྱི་ཡར་རྒྱས་ངོ་མ་དེ་ཡིན།” ཞེས་བརྗོད་ཡོད་འདུག
ཀྲུའུ་ཡའོ་ཀུང་ནི་རྒྱ་ནག་ཆབ་སྲིད་འགྱུར་བ་ཁག་ལ་རྒྱུས་མྱོང་ཆེན་པོ་ཡོད་མཁན་གྱི་མི་སྣ་རྒན་ཤོས་དེ་ཡིན་པ་དང་། ཁོང་གི་རྩོམ་ཡིག་དང་གཏམ་བཤད་མང་པོ་ཞིག་ལ་རྒྱ་ནག་གཞུང་གིས་བཀག་འགོག་བྱེད་བཞིན་ཡོད་འདུག ཉེ་ཆར་ཀྲུའུ་ཡའོ་ཀོང་གིས་རིག་གནས་གསར་བརྗེ་སྐོར་གྱི་དེབ་ཅིག་བྲིས་པའི་ནང་དུ་རིག་གནས་གསར་བརྗེ་ལས་འགུལ་སྐབས་མི་ཁྲི་སྟོང་མང་པོར་ཤི་རྨས་བྱུང་ཡོད་ཚུལ་གྱི་ཚན་པ་ཞིག་གཞུང་གིས་ནག་གསུབ་བྱས་ཡོད་འདུག
ཀྲུའུ་ཡའོ་ཀུང་གི་རྩོམ་སྒྲིག་པ་ཡེ་ཧྥོང་ (Ye Fang)གིས་བཤད་རྒྱུར། “ མུ་མཐུད་འདི་ལྟར་སྡོད་མི་བཤད་དཀའ་ཡང་། ད་ལྟའི་ཆར་ཀྲུའུ་ཡའོ་ཀོང་གི་དཔེ་དེབ་རིགས་དཔར་བསྐྲུན་ལ་སྲིད་གཞུང་གིས་དམ་དྲག་ཆེ་རུ་འགྲོ་བཞིན་འདུག”ཅེས་བརྗོད་འདུག ཀྲུའུ་ཡའོ་ཀོང་གིས་ཀྱང་། འདི་ནི་རྒྱ་ནག་མགོ་གཙོ་མི་རེ་ཟུང་གནད་དོན་ཞིག་དང་མི་གཅིག་གཉིས་ཀྱི་གནད་དོན་ཞིག་མ་རེད། འདི་ནི་ལམ་ལུགས་ཤིག་གི་གནད་དོན་རེད། རྒྱ་ནག་ནང་དུ་ང་ཚོར་སྨྲ་བརྗོད་རང་དབང་མེད་པས་རེད་ཅེ་བརྗོད་ཡོད་འདུག
ཀྲུའུ་ཡའོ་ཀུང་ནི་ཆིན་རྒྱལ་རབས་སྐབས་ཕྱི་ལོ་ ༡༩༠༦ ལོར་ཅིང་སུའུ་ཁྲུང་ཀྲུག་གི་མཐོ་རིམ་ཁྱིམ་ཚང་ཞིག་ཏུ་སྐྱེས་ཤིང་། རྒྱ་ནག་གི་ཡི་གེ་སྦྱོར་ཀློག་འགྲོ་སྟངས་སྟེ་ཕེན་ཡེན་(中国拼音书写系统)ཞེས་པ་གསར་གཏོད་གནང་མཁན་ཡང་ཁོང་ཡིན་འདུག ཆིན་རྒྱལ་རབས་བསྣུབས་རྗེས་ཁོས་ཧྲང་ཧེ་དང་ཉི་ཧོང་སོགས་ནས་སློབ་སྦྱོང་བྱས་ཡོད་པ་དང་། ༡༩༣༧ ལོར་ཉི་ཧོང་དང་རྒྱ་ནག་གི་དམག་འཁྲུག་སྐབས། ཁོའི་ནང་མི་ཚང་མ་ཁྲོན་ཆིན་ལ་གནས་སྤོར་བྱས་ཡོད་འདུག
༡༩༤༣ ལོ་ནས་ཨ་རའི་ནའེ་ཡོག་ནང་རྒྱ་ནག་གི་དངུལ་ཁང་ཞིག་ལ་ལས་ཀ་བྱས་ཡོད་པ་དང་། རྗེས་སུ་མའོ་ཙེ་ཏུང་གྱིས་སྤྱི་ཚོགས་རིང་ལུགས་འུད་སྒྲོག་ཤུགས་ཆེན་པོ་བྱས་པར་ཁོ་རང་ཡིད་འགུལ་ཐེབས་ཏེ་ ༡༩༤༩ ལོར་ཁོ་ཕྱིར་རྒྱ་ནག་ཏུ་ལོག་ཡོད་ཀྱང་། མའོ་ཡི་ཁ་ཞེ་མི་མཚུངས་པ་ཤེས་རྗེས་ཁོས་ “སྤྱི་ཚོགས་རང་ལུགས་འུད་སྒྲོག་བྱེད་སྐབས་ཁོ་ཚོ་ནི་དམངས་གཙོའི་རང་ལུགས་ཡིན་པ་བསྒྲགས་བཞིན་འདུག” ཅེས་བྲིས་ཡོད་འདུག
