ཉེ་ལམ་རྒྱ་ནག་གི་གསར་འགོད་པ་ཞིག་གིས་མཁའ་རླུང་འབག་བཙོག་སྐོར་གྱི་དངོས་བྱུང་གློག་བརྙན་ ༼ གུར་ཁང་འོག ༽ཅེས་པ་ཞིག་བཟོས་ཏེ་ཁྱབ་བསྒྲགས་བྱས་པ་དེར་རྒྱ་ནག་ཁོར་ཡུག་སྲུང་སྐྱོབ་ལྷན་ཁང་གིས་བསྔགས་བརྗོད་བྱས་ཡོད་ཀྱང་ཉིན་གཅིག་གི་རྗེས་སུ་རྒྱ་ནག་དྲིལ་བསྒྲགས་ལྷན་ཁང་གིས་གློག་བརྙན་དེ་བཀག་སྡོམ་བྱས་ཡོད་འདུག
ཟླ་སྔོན་མའི་ཚེས་ ༢༨ཉིན་རྒྱ་ནག་དབུས་བརྙན་འཕྲིན་ཁང་གི་གསར་འགོད་པ་ཟུར་བ་ཁྲའེ་ཅིན་ (Chai Jing) གྱིས་རྒྱ་ནག་གི་མཁའ་དབུགས་འབག་བཙོག་སྐོར་གྱི་དངོས་བྱུང་གློག་བརྙན་ ༼ གུར་ཁང་འོག༽ཅེས་པ་ཞིག་བཟོས་ཏེ་དྲ་ཐོག་ཏུ་ཁྱབ་བསྒྲགས་བྱས་ཏེ་ཆུ་ཚོད་ ༢༤ ནང་ལྟ་ཀློག་བྱེད་མཁན་ས་ཡ་ ༡༠༠ ལྷག་བྱུང་ཡོད་པ་དང་། ཟླ་འདིའི་ཚེས་ ༡ ཉིན་གྱི་ཞོགས་པར། རྒྱ་ནག་དབུས་ཁོར་ཡུག་སྲུང་སྐྱོབ་ལྷན་ཁང་གི་འགན་འཛིན་གསར་པ་ཁྲིན་ཅི་ནེན་ (Chen Jining)༼ ཁྲིན་ཅི་ནེན་ནི་ཟླ་སྔོན་མའི་ཚེས་ ༢༧ ཉིན་སྲིད་འཛིན་ཞི་ཅིན་ཕིན་གྱིས་ཁོར་ཡུག་སྲུང་སྐྱོབ་ལྷན་ཁང་གི་འགན་འཛིན་དུ་བསྐོ་བཞག་བྱས། ༽གྱིས་ཁྲའེ་ཅིན་སྒེར་གྱིས་འགྲོ་སོང་བཏང་སྟེ་རྒྱ་ནག་གི་ཁོར་ཡུག་འབག་བཙོག་སྐོར་ལ་གློག་བརྙ་བཟོས་ཏེ། བཙོག་རླུང་གིས་མིའི་བདེ་ཐང་ལ་གནོད་སྐྱོན་ཆེན་པོ་བཟོ་བཞིན་ཡོད་པའི་སྐོར་རྒྱ་ནག་མི་དམངས་ལ་ར་སྤྲོད་བྱས་པར་ཐུགས་རྗེ་ཆེ། ཞེས་བརྗོད་ཡོད་འདུག
འོན་ཀྱང་ཉིན་དེའི་ཕྱི་དྲོར་རྒྱ་གཞུང་དབུས་དྲིལ་བསྒྲགས་ལྷན་ཁང་གིས་དངོས་བྱུང་གློག་བརྙན་དེ་དང་དེའི་སྐོར་གྱི་དཔྱད་བརྗོད་ཡོངས་རྫོགས་ཆུ་ཚོད་ ༢༡ ནང་ཚུད་དུ་བརྒྱུད་ལམ་ཁག་ནས་ནག་གསུབ་གཏོང་དགོས་པའི་བཀའ་ཕབ་པ་ལྟར། དེ་འབྲེལ་གྱི་གནས་ཚུལ་ཁག་རྒྱ་ནག་ནང་ཁུལ་གྱི་བརྒྱུད་ལམ་ཁག་ཏུ་བཀག་བསྡོམས་བྱས་ཡོད་འདུག ཧོང་ཀོང་གི་གསར་འགོད་པ་ཞིག་གིས་བརྗོད་པ་ལྟར་ན། རྒྱ་ནག་དབུས་དྲིལ་བསྒྲགས་ལས་ཁུངས་ཀྱིས་དེ་སྔོན་ནས་གློག་བརྙན་དེའི་སྐོར་འགོད་སྤེལ་མི་ཆོག་པའི་བཀའ་བཏང་ཡོད་ཚུལ་བརྗོད་འདུག
ཟླ་འདི་ཚེས་ ༤ ཉིན་ཀྲུང་གོར་ལྟ་བ་ཞེས་པའི་དྲ་ཚིགས་སྟེང་། ཁྲའེ་ཅིན་གྱིས་གློག་བརྙན་དེ་ཐོག་མར་དྲ་ཐོག་ཏུ་བཞག་སྐབས། རྒྱ་ནག་གཞུང་འབྲེལ་ “མི་མང་དྲ་བ་” དང་ “ཞིན་ཧྭ་དྲ་བ་”གཉིས་ཀྱིས་བསྔགས་བརྗོད་བྱས་ཡོད་པ་མ་ཟད། ཁྲའེ་ཅིན་ནི་སྤྱི་ཚོགས་ནང་གི་མི་འཇོན་ཐང་ཆེ་ཤོས་གྲས་ཤིག་ཡིན་ཚུལ་བརྗོད་ཡོད་ཀྱང་། ཉིན་གཉིས་རྗེས་གློག་བརྙན་དེ་བཀག་འགོག་བྱས་པ་དེ་བརྒྱུད་ནས་སྲིད་གཞུང་ནང་ཁུལ་གྱི་མཐོ་རིམ་དཔོན་རིགས་བར་གྱི་ཛ་དྲག་གི་འགལ་བ་དེ་རྟོགས་ཐུབ་ཚུལ་བརྗོད་འདུག དེ་བཞིན། རྒྱ་རིགས་ཆབ་སྲིད་དཔྱད་བརྗོད་པ་ཀྲའོ་ཕེའི་ཐའོ་(Zhao Peitou)ཡིས་ཀྱང་། ཁོར་ཡུག་སྲུང་སྐྱོབ་ལྷན་ཁང་གི་འགན་འཛིན་ཁྲིན་ཅི་ནེན་གྱིས་ཁྲའེ་ཅིན་ལ་བཀའ་དྲིན་ཆེ་ཞུས་ཡོད་པ་དེས། ཞི་ཅིན་ཕིན་ཕྱོགས་ནས་ཁྲའེ་ཅིན་ལ་རྒྱབ་སྐྱོབ་ཡོད་པ་མཚོན་ཐུབ་ཀྱང་། རྗེས་སུ་དྲིལ་བསྒྲགས་ལྷན་ཁང་གིས་བཀག་འགོག་བྱས་པ་དེས། རྒྱ་ནག་དབུས་གཞུང་ནང་ཁུལ་དུ་སྲིད་བྱུས་ཐག་གཅོད་ཐོག་འགལ་བ་བྱུང་ཡོད་པ་གསལ་བོར་མངོན་ཡོད་པ་དང་། འདིས་རྒྱ་ནག་གི་མཐོ་རིམ་དཔོན་རིགས་བར་འགལ་བ་ཛ་དྲག་ཡོད་པའང་བསྟན་ཡོད། ཅེས་བརྗོད་འདུག
བརྒྱུད་ལམ་དཔྱད་ཞིབ་པ་མིན་ཅེད་ (Meng Jie) ཀྱིས། དྲིལ་བསྒྲགས་ལྷན་ཁང་གིས་མངོན་གསལ་ངང་ཞི་ཅིན་ཕིན་གྱི་འདོད་ཚུལ་ལ་ངོ་རྒོལ་བྱས་ཡོད་པ་རེད། བརྒྱུད་རིམ་འདི་དག་གི་རྒྱབ་དུ་རྒྱ་ནག་དབུས་ཆབ་སྲིད་སྡེ་ཚན་གྱི་རྒྱལ་ཡོངས་སྲིད་གྲོས་རྒྱུན་ཨུ་ལི་ཡོན་ཧྲན་(Liu Yunshan)གྱི་སྟངས་འཛིན་ཡོད་པ་དང་། ད་དུང་ཁོས་ཞི་ཅིན་ཕིན་ལ་མངོན་གསལ་གྱིས་འགྲན་རྒོལ་བྱེད་ཀྱིན་ཡོད་པའང་མཚོན་ཐུབ། ཅང་ཙེ་མིན་དང་ཀྲུའུ་ཡོན་ཁང་གི་ཁོངས་གཏོགས་སུ་ཡོད་པའི་ལི་ཡོན་ཧྲན་གྱིས་དངངས་སྐྲག་འོག་ད་རེབ་ཀྱི་གནས་ཚུལ་དེར་ལག་པ་འཆིང་དོན། གློག་བརྙན་དེ་བརྒྱུད་ནས་རྒྱ་ནག་གཞུང་གི་མེ་མདའི་གློག་འོད་དམར་ཐིག་དེ་རྒྱ་ནག་རྡོ་སྣུམ་བཟོ་གྲྭའི་ལྐོག་ཟ་རུལ་སུངས་སྟེང་ལ་ཁ་གཏད་ཡོད་པ་དང་། ལི་ཡོན་ཧྲན་གྱིས་ཉེན་ཁར་མ་འཛེམ་པར་གློག་འོད་དམར་ཐིག་དེ་མེད་པ་བཟོ་ཐབས་བྱེད་ཀྱིན་ཡོད་པ་མཚོན་ཐུབ། ཅེས་བརྗོད་འདུག
གཟའ་པ་སངས་ཉིན་ཨ་རིའི་རླུང་འཕྲིན་རྒྱ་ཡིག་དྲ་བའི་སྟེང་། རྒྱ་ནག་ཁོར་ཡུག་ཉམས་ཞིབ་གླེང་སྟེགས(Wilson American Institute of China Environment Forum)ཞེས་པའི་འགན་འཛིན་ལྕམ་ཇལ་ནེ་ཧྥའི་ཁྲོ་ནའི་ (Jenniffer Turner)ཡིས། “ང་དང་ངའི་ཉམས་ཞིབ་ལས་རོགས་ཚོར་མཚོན་ན། ཁྲའེ་ཅིན་གྱི་གློག་བརྙན་ནང་དུ་གནས་ཚུལ་གསར་པ་གང་ཡང་མི་འདུག འོན་ཀྱང་གློག་བརྙན་དེས་རྒྱ་ནག་གི་ཁ་རླུང་འབག་བཙོག་གི་ཉེན་ཁ་གསལ་བོར་བསྟན་ཡོད་པ་དང་། གློག་བརྙན་བཟོ་སྟངས་གང་འཚམས་ཡག་པོ་ཡོད་པ། རྒྱ་ནག་གི་མི་མང་པོ་ཞིག་ལ་ཁོར་ཡུག་གི་རྒྱུན་ཤེས་ཧ་ཅང་ཞན་པ་བཅས་ལ་བརྟེན་ཏེ། ཁྲའེ་ཅིན་གྱི་དངོས་བྱུང་གློག་བརྙན་དེས་གནད་དོན་མང་པོ་ཞིག་ཕྱི་ལོགས་སུ་སྟོན་ཐུབ་པ་བྱུང་སྟེ། གནས་ཚུལ་འདི་རྒྱལ་ཡོངས་ནང་གླེང་གཞི་ཆེན་པོ་ཆགས་པ་རེད།” ཅེས་བརྗོད་འདུག
མོས་མུ་མཐུད་དུ། རྒྱ་ནག་གི་དྲ་དམངས་ཚོས་ཁ་རླུང་འབག་བཙོག་ཞེས་པ་འདི་མཐོང་ཡོད་ཀྱང་། ཁོ་ཚོས་བཙོག་རླུང་ཇི་ལྟར་བྱུང་བ་དང་དེས་མིའི་བདེ་ཐང་ལ་གནོད་སྐྱོན་ག་རེ་བཟོ་བཞིན་ཡོད་མེད་གསལ་བོ་མི་ཤེས། འོན་ཀྱང་། ཁྲའེ་ཅིན་གྱིས་རབ་གཏོགས་རི་མོའི་ (cartoon)ལམ་ནས་(PM 2.5)ཡིས་མིའི་རིགས་ཀྱི་དབུགས་འབྱིན་རྔུབ་ལ་གནོད་སྐྱོན་བྱུང་སྟངས་གསལ་བོ་བསྟན་ཡོད་པ་མ་ཟད། མང་ཚོགས་ལ་བཙོག་རླུང་ལ་ཉེན་ཁའི་འདུ་ཤེས་མཐོ་རུ་བཏང་ཡོད་པ་རེད། ཅེས་བརྗོད་འདུག
ཁྲའེ་ཅིན་གྱི་དངོས་བྱུང་གློག་བརྙན་དེའི་ནང་དོན་གཙོ་བོ་མང་ཚོགས་ལ་བཙོག་རླུང་ནི་ཅི་ཞིག་ཡིན་པ་དང་། གང་ནས་ཇི་ལྟར་བྱུང་བ། གནད་དོན་དེར་ང་ཚོས་ག་རེ་བྱེད་དགོས་པ་བཅས་ཀྱི་དོན་གསུམ་གླེང་ཡོད་པ་དང་། ཞོར་དུ་སྲིད་གཞུང་གིས་འཐུས་ཤོར་དང་། རྒྱལ་ཁབ་ནང་གི་སྒེར་སྤྱོད་ཁེ་ལས་རིགས་ཀྱི་གནད་དོན་ཐག་གཅོད་བྱ་དགོས་པ་སོགས་བསྟན་ཡོད་པ་རེད།
དངོས་གནས་གློག་བརྙན་དེ་ཡག་པོ་བཟོས་འདུག