མི་མཐུན་ཕྱོགས་ལ་ཞི་མོལ་མེད།

རིག་པའི་ཁུ་བྱུག

དོལ་རྒྱལ་ཁ་ལ་འཁྱེར་བའི་མི་དམངས་ཤོག་སྒོར་གྱི་རྒྱུགས་ཁྱིར་རང་རེ་མཆོག་དམན་ཀུན་ནས་ངོས་འཛིན་བྱེད་བཞིན་པ་འགའ་ཞིག་གི་བྱེད་སྟངས་ཁྲེལ་མེད་རིགས་དེ་ཚོར་དོན་དངོས་ཀྱི་ཆ་ཤས་ཏིལ་འབྲུ་ཙམ་ཡང་མེད་པ་འཇིག་རྟེན་མཐོང་ཆོས་སུ་གྱུར་པས་ཡ་ལན་ར་སྤྲོད་བྱེད་མི་དགོས་པར་རང་ངོ་རང་སྤྲོད་བྱེད་བཞིན་པ་ཤེས་ནུས་སུ་གྱུར། འོན་ཀྱང་དེང་སྐབས་དོལ་ཚོགས་དང་ང་ཚོའི་བར་ཞི་མོལ་བྱས་ན་ཡག་པོ་ཡོད་འདྲའི་བསམ་ཚུལ་སྟོན་མཁན་ཡང་ཡོད་འདུག ཕྱི་ཚུལ་ནས་བལྟས་ན་བསམ་ཚུལ་འདི་ནི་དེང་རབས་གུ་ཡངས་རང་བཞིན་གྱི་བསམ་བློ་འདྲ་པོ་ཡོད་ཀྱང་། ཞིབ་ཏུ་བསམ་ཚེ་དོན་གནད་འདི་ཚོའི་ཐད་ཀྱི་རྨང་གཞིའི་ཤེས་བྱ་ཡང་རྒྱུས་མངའ་མེད་པའི་རྟགས་གསལ་པོར་མངོན་བཞིན་འདུག བོད་རྒྱའི་བར་ཆབ་སྲིད་ཀྱི་དོན་གནད་རྙོག་འཛིང་ཅན་ཞིག་ཡོད་ཀྱང་མི་སྤྱོད་དང་མཐུན་པར་ཐག་གཅོད་བྱེད་པའི་དབང་ཚད་སྐྱེ་བོ་ཐ་མལ་པའི་ལག་ཏུ་ཡོད། དོལ་རྒྱལ་གྱི་གནད་དོན་འདི་ནི་ཆོས་ལུགས་དང་འབྲེལ་བ་ཞིག་ཡིན་པས་ཐག་གཅོད་ཀྱང་ལྷ་མི་ཀུན་མཐུན་ཞིག་དགོས་པ་ཡིན། འདིའི་ཐད་ང་ཚོས་ངེས་པར་དུ་ཤེས་རྟོགས་དགོས་པ་འདུག་སྙམ། དེས་ན་ཕྲན་ནས་རང་བློས་གང་ལྕོགས་ཀྱིས་དོན་གནད་འགའ་ཤས་ཐོག་འགྲེལ་བརྗོད་ཅིག་བྱ་འདུན་མཆིས་སོ།།

དོན་གནད་ཀྱི་ངོ་བོ།

དོལ་རྒྱལ་གྱི་རྙོག་གླེང་འདི་ནི་༸གོང་ས་ལྔ་པ་ཆེན་པོའི་སྐུ་དུས་ནས་བྱུང་ཞིང་༸པཎ་ཆེན་བསོད་ནམས་གྲགས་པའི་ཡང་སྲིད་སྤྲུལ་སྐུ་བསོད་ནམས་དགེ་ལེགས་དཔལ་བཟང་གི་ཡང་སྲིད་རྫུན་མ་ལམ་དུ་ལྷོངས་ཏེ་གཟིམ་ཁང་གོང་གི་སྤྲུལ་སྐུའི་གདན་ཐོབ་བྱུང་།༸གོང་ས་ལྔ་པ་ཆེན་པོའི་སྐུ་མདུན་ནས་གསུང་ཆོས་གསན་ཏེ་བླ་སློབ་ཏུ་གྱུར་ཀྱང་རིམ་པས་གཟིམ་ཁང་གོང་འོག་བར་ཐུགས་སྣང་གཤིན་པོ་ཞིག་བྱུང་མེད་ཚོད། སྐུ་ཚེ་རིང་པོ་བཞུགས་མ་ཐུབ་པར་དགོངས་པ་རྫོགས་ཉེའི་མཚམས་སུ་འབྱུང་པོ་ཞིག་གིས་རྒྱུད་བརླམས་པའི་མཚན་མ་བྱུང་བ་བཞིན་དམ་སྲིར་གྱུར་པ་རེད། ལུགས་གཉིས་མཁྱེན་པའི་མངའ་བདག་ཁམས་གསུམ་ཆོས་ཀྱི་རྒྱལ་པོ་༸གོང་ས་ལྔ་པ་ཆེན་པོས་དོལ་རྒྱལ་འདི་པ་ནི་རྒྱུ་སྨོན་ལམ་ལོག་པ་ལས་བྱུང་ཞིང་། ངོ་བོ་དམ་སྲི་འབྱུང་པོ། བྱེད་ལས་བསྟན་དང་འགྲོ་བ་ཀུན་ལ་འཚེ་བ་བྱེད་མཁན་ཞིག་ཡིན་པར་ཐག་གཅོད་གནང་ཡོད་པ་རེད།

ཆོས་ཕྱོགས་ཀྱི་གཟིགས་སྟངས།

ཆོས་ཕྱོགས་ནས་བཤད་ན་བསྟན་པ་སྤྱི་དང་བྱེ་བྲག་ཐེག་པ་ཆེན་པོ་རྒྱུ་འབྲས་ཀྱི་ཐེག་པ་གཉིས་ཀར་བླ་སློབ་ཀྱི་དམ་ཚིགས་ནི་ཧ་ཅང་གལ་ཆེན་པོ་ཡིན་པར་མ་ཟད། ཆོས་གྲོགས་ནང་ཕན་ཚུན་གྱི་དམ་ཚིག་ཀྱང་གལ་ཆེན་པོར་ངོས་འཛིན་བྱེད་བཞིན་ཡོད། བསྟན་འཛིན་ཕུ་ནུ་བཞིན་དུ་མཐུན་པ་ཞིག་མ་བྱུང་ན་བསྟན་པ་ཡུན་རིང་གནས་ཐུབ་ཐབས་མེད། དེར་བརྟེན་མདོ་རྒྱུད་གཞུང་ལུགས་དུ་མ་དང་མཁས་གྲུབ་གཉིས་ལྡན་གྱི་སྐྱེས་ཆེན་མང་པོས་དམ་ཚིག་ཧ་ཅང་གལ་ཆེན་ཡིན་པ་གསལ་པོ་གསུངས་ཡོད་པ་རེད། གལ་ཏེ་བླ་སློབ་བར་དམ་ཚིག་ཉམས་ཆག་ཕྱིན་པ་ཞིག་ཡིན་ན་དེ་ནི་དམ་ཉམས་ཡིན་ཅིང་། དམ་ཚིག་ཉམས་ཆག་ཕྱིན་ཟིན་ནའང་ད་དུང་ཆོས་འབྲེལ་སྤྱི་དང་ལྷག་པར་གསང་སྔགས་ཀྱི་ཆོས་འབྲེལ་བྱས་ན་བླ་སློབ་གཉིས་ཀར་ཕན་ཐོགས་གང་ཡང་མེད་པར་མ་ཟད་ལས་ངན་ཚབས་ཆེན་གསོག་པའི་རྒྱུར་འགྲོ་བ་ཡིན། དེར་བརྟེན་དམ་ཚིག་ཉམས་ཆག་ཕྱིན་པ་དང་ཆོས་དང་ཟང་ཟིང་གི་འབྲེལ་བ་མཚམས་འཇོགས་བྱེད་པ་ནི་ཕན་ཚུན་གཉིས་ཕན་གྱི་ཐག་གཅོད་ཅིག་ཡིན་པ་རེད།

ཐག་གཅོད་བྱེད་པོའི་ཡོན་ཚད།

ལྷ་འདྲེ་གང་ཞིག་གི་ངོ་བོ་དང་རྒྱུ། བྱེད་ལས་སོགས་ཐག་གཅོད་བྱེད་མཁན་གྱི་གང་ཟག་དེ་ནི་ལྷ་མི་ཀུན་གྱི་གཙུག་ཏུ་བཀུར་ཡུལ་དུ་གྱུར་པའི་གང་ཟག་ཁྱད་པར་ཅན་ཞིག་ཡིན་དགོས་པ་རེད། ལུགས་གཉིས་མཁྱེན་པའི་མངའ་བདག་ཁམས་གསུམ་ཆོས་ཀྱི་རྒྱལ་པོ་༸གོང་ས་ལྔ་པ་ཆེན་པོ་ནི་གངས་ལྗོངས་ལྷ་མི་ཀུན་གྱིས་གཙུག་གི་ནོར་བུར་བཀུར་བའི་སྐྱེས་ཆེན་དམ་པ་ཞིག་ཡིན་པ་རྩོད་མེད་ཡོངས་གྲགས་ཤིག་རེད། ༸གོང་ས་ལྔ་པ་ཆེན་པོས་རྒྱུ་སྨོན་ལམ་ལོག་པ་ལས་བྱུང་བའི་དམ་སྲི་འབྱུང་པོ་བསྟན་པ་དང་འགྲོ་བར་འཚེ་བ་བྱེད་མཁན་ཞིག་ཏུ་ངོས་འཛིན་གནང་ཟིན་པའི་དོལ་རྒྱལ་གལ་ཏེ་འཇམ་མགོན་རྒྱལ་བའི་བསྟན་སྲུང་དམ་ལྡན་ཞིག་ཡིན་པར་ངོས་འཛིན་བྱེད་དགོས་ན། དེ་ལྟར་བྱེད་མཁན་དེ་༸གོང་ས་ལྔ་པ་ཆེན་པོ་དང་རྟོགས་པ་མཉམ་པ་ཞིག་དགོས་པར་མ་ཟད། དེ་ལྟར་ཡིན་པའི་ལུང་རིགས་ཀྱི་སྒྲུབ་བྱེད་ཚད་ལྡན་གྱི་ཐོག་ནས་འགྲེལ་བརྗོད་བྱེད་དགོས་ཀྱང་དེ་འདྲའི་སྐྱེ་བོ་དམ་པ་ཞིག་ད་བར་བྱུང་མྱོང་མེད། དགེ་ལྡན་བསྟན་པའི་གསལ་བྱེད་ཁྲི་ཆེན་ངག་དབང་མཆོག་ལྡན་སོགས་ཚད་ལྡན་དམ་པ་མང་པོས་དགག་བྱ་གནང་ཡོད། ༸སྐྱབས་རྗེ་ཕ་བོང་ཁ་བདེ་ཆེན་སྙིང་པོ་མཆོག་ནས་ཀྱང་༸རྒྱལ་མཆོག་བཅུ་གསུམ་པ་ཆེན་པོའི་སྐུ་མདུན་དུ་དོལ་རྒྱལ་འཇམ་མགོན་རྒྱལ་བའི་བསྟན་སྲུང་དམ་ཚིག་ཅན་ཞིག་ཡིན་པའི་ཁུངས་ལྡན་གྱི་སྒྲུབ་བྱེད་ཕུལ་རྒྱུར་མ་སྤོབས་པར་ཨ་མའི་སྐྱེས་ལྷ་ཡིན་པའི་ཆ་ནས་གསོལ་མཆོད་བྱེད་ཀྱི་ཡོད་སྐོར་ཞུས་པ་དང་། ༸སྐྱབས་རྗེ་ཁྲི་བྱང་རིན་པོ་ཆེ་མཆོག་ནས་སྒྲུབ་བརྒྱུད་བསྟན་པའི་གཙུག་རྒྱན་༸རྒྱལ་བ་ཀརྨ་པའི་སྐུ་མདུན་དུ་དོལ་རྒྱལ་གསོལ་མཆོད་སྦས་གནང་དགོས་བྱུང་བ་འདི་ནི་དཔེ་མཚོན་གསལ་ཤོས་ཤིག་རེད། ༸རྒྱལ་མཆོག་སྐུ་ཕྲེང་རིམ་པའི་ནང་༸གོང་ས་ལྔ་པ་ཆེན་པོའི་བཀའ་བཅད་ལ་འགྱུར་བ་གཏོང་དགོས་ན་༸རྒྱལ་མཆོག་བཅུ་གསུམ་པ་དང་བཅུ་བཞི་པ་ཆེན་པོར་བབས་འོས་མཆིས་ཀྱང་༸གོང་ས་རྣམ་གཉིས་ནས་༸གོང་ས་ལྔ་པ་ཆེན་པོའི་བཀའ་དགོངས་གཞིར་བཟུང་ཤར་བསྐྱོད་མཛད་ཡོད།

ད་ལྟའི་དོན་དངོས་ཀྱི་གདམ་ཀ

༸གོང་ས་༸སྐྱབས་མགོན་ཆེན་པོ་མཆོག་ནས་དོལ་རྒྱལ་དང་འབྲེལ་བའི་གནད་དོན་ཐད་སྔ་ཕྱིའི་ཡོང་རྐྱེན་ཐམས་ཅད་ལ་དགོངས་དཔྱད་ཐིལ་ཕྱིན་མཛད་དེ་དོལ་རྒྱལ་དགེ་ལྡན་བསྟན་པའི་སྲུང་མ་ལྟ་ཅི། དམ་ཚིག་ཅན་གྱི་དྲེག་པ་ཞིག་ལས་ཀྱང་ལྡོག་སྟེ་བསྟན་དང་འགྲོ་བ་ལ་གནོད་ཅིང་འཚེ་བ་བྱེད་མཁན་གྱི་དམ་སྲི་འབྱུང་པོ་ཞིག་ཡིན་པ་མངོན་གསུམ་གསལ་གཟིགས་བྱུང་། དེ་ལྟ་བུའི་དམ་སྲི་འབྱུང་པོ་ཞིག་འཇམ་མགོན་རྒྱལ་བའི་བསྟན་སྲུང་དུ་འཁྲུལ་ཏེ་གསོལ་མཆོད་བྱེད་པ་ནི་བསྟན་པ་སྤྱི་དང་། འཇམ་མགོན་རྒྱལ་བའི་བསྟན་པའི་རྨ་འབྱིན་ཆེན་པོར་གཟིགས་ཏེ་རིམ་པས་དོལ་རྒྱལ་བསྟན་གསོལ་དང་འབྲེལ་བའི་སྐོར་ལམ་སྟོན་ཕེབས། འཇམ་མགོན་རྒྱལ་བའི་བསྟན་འཛིན་སྐྱེས་ཆེན་དམ་པ་རྣམས་དང་། ཞིང་མཆོག་འདུས་པ་རྒྱ་མཚོས་༸གོང་ས་༸སྐྱབས་མགོན་ཆེན་པོ་མཆོག་གི་ལམ་སྟོན་བཞིན་སྤང་བླང་དམ་འཇོག་ནོར་འཛོལ་མེད་པ་གནང་ཡོད་ཀྱང་། གོ་ཤེས་མེད་པའི་སྐྱེ་བོ་ཉུང་ཤས་ནས་ལམ་ནོར་ལྡོག་ཤེས་མ་བྱས་པར་ད་དུང་དེ་ལས་ལྡོག་ཏེ་ལུང་རིགས་ཐད་ལྡན་གང་ཡང་སྨྲ་རྒྱུ་མེད་པར་ལོང་བཤད་སྣ་ཚོགས་འུར་སྒྲོག་གིས་སྤེལ་ཏེ་མཐར་དགྲ་དགའ་གཉེན་སྡུག་གི་ལམ་དུ་བསྐྱོད་པར་བརྟེན།༸གོང་ས་མཆོག་ནས་བསྟན་དོན་ཐུགས་ལ་བཅངས་ཏེ་དམ་ཉམས་དེ་རིགས་གང་ཉིད་ཀྱི་སྐུ་མདུན་ནས་དབང་ལུང་མན་ངག་ཞུ་བ་དང་། བསླབ་སྡོམ་ཞུ་བ་སོགས་མི་བྱེད་པའི་བསྐུལ་མ་གནང་ཡོད། དམ་ཚིག་གཅིག་ཏུ་འབྲེལ་བའི་རྡོ་རྗེ་སྤུན་གྲོགས་རྣམས་ནས་ཀྱང་མ་སྐུལ་དང་བས་བླངས་ཏེ་དམ་ཉམས་དེ་རིགས་དང་ཆོས་དང་ཟང་ཟིང་གི་སྐལ་བ་མཉམ་སྤྱོད་མི་བྱེད་པའི་དམ་འཇོགས་མཛད་དེ་རྒྱལ་བསྟན་སྤྱི་དང་བྱེ་བྲག་འཇམ་མགོན་རྒྱལ་བའི་བསྟན་པའི་དབུ་འཕང་གཟེངས་སུ་ཐོན་པར་གནང་།༸རྒྱལ་བསྟན་སྤྱི་དང་བོད་གངས་ལྗོངས་ཀྱི་བསྟན་སྲིད་མི་རིགས་དང་བཅས་པའི་ཉག་ཕྲའི་ལོ་རྒྱུས་ལ་ཕྱི་མིག་ལྟ་སྐབས་ང་ཚོས་དོལ་རྒྱལ་དང་༸རྒྱལ་བ་རིན་པོ་ཆེ་གཉིས་ཀྱི་ནང་ནས་གཅིག་འདེམས་དགོས་ན་༸རྒྱལ་བ་རིན་པོ་ཆེ་འདེམས་རྒྱུ་ནི་ཆོས་དང་འཇིག་རྟེན་གང་གི་ཆ་ནས་ཀྱང་ལོང་བས་ཁམས་སུམ་གྱི་དཔེར་མཐོང་བས་ང་ཚོས་བྱས་པའི་གདམས་ཀ་འདི་ནི་མི་ཆོས་དང་མཐུན་ཞིང་ཆོས་ཉིད་དང་ཡང་མི་འགལ་བ་ཞིག་ཡིན་པ་སྤོབས་པས་བཤད་ཆོག་པ་ཡིན།

གྲོས་མོལ་གྱི་ཞི་རྟེན་མེད།

གོང་དུ་དབྱེ་ཞིབ་བྱས་པའི་དོན་གནད་དེ་ཚོར་བསམ་གཞིགས་བྱེད་སྐབས་དོལ་རྒྱལ་གྱི་གནད་དོན་ཐད་གཉིས་ཕན་གྱི་གྲོས་མོལ་བྱེད་པའི་གཞི་རྩ་ཞིག་མེད་པ་གསལ་པོ་རེད། ཆོས་ལུགས་ཀྱི་ཐད་ནས་ཐེག་པ་ཆེ་ཆུང་སྔགས་དང་བཅས་པའི་མདོ་རྒྱུད་ཀྱི་གཞུང་ལུགས་ནང་བླ་སློབ་ཀྱི་དམ་ཚིག་གལ་ཆེར་གསུངས་ཡོད་པས་དམ་ཚིག་སྲུང་བ་ནི་བསྟན་པ་སྲུང་བ་ཡིན། དོལ་རྒྱལ་དེ་ཉིད་ཚད་ཐུབ་ཀྱི་སྐྱེས་ཆེན་དུ་མས་དམ་སྲིར་ངོས་འཛིན་གནང་ཡོད་པ་རེད། དེར་རྟེན་ཐེག་ཆེན་ཆོས་གཞུང་གི་ཐད་ནས་གྲོས་མོལ་གྱི་གཞི་རྩ་མེད། ཡང་ལ་ལས་དོལ་རྒྱལ་དེ་ཡང་སེམས་ཅན་ཞིག་ཡིན་པའི་ཆ་ནས་སྙིང་རྗེའི་ཡུལ་ཡིན་ཚུལ་གཏམ་ཨ་ཕས་གཏང་རྒྱུ་ཨ་མས་བཏང་པའི་དཔེ་ལྟར་ལོང་བཤད་འདྲ་ཆགས་དེ་འདྲ་བྱེད་ཀྱི་འདུག དོལ་རྒྱལ་འདི་ཉིད་རྒྱུ་དང་ངོ་བོ་བྱེད་ལས་བཅས་ཀྱི་ཆ་ནས་སྐྱེ་བ་འདི་ཉིད་ལ་ལས་ངན་ཞེ་གཅིག་གསོག་པའི་ངོ་བོར་གྲུབ་པར། ལས་གསོག་གི་རྒྱ་ཇེ་ཆུང་དང་ནུས་མེད་དུ་གཏོང་བ་ནི་དོན་དམ་པའི་སྙིང་རྗེ་མ་ཡིན་ནམ། བྱང་ཆུབ་སེམས་དཔས་འགྲོ་བ་ཉམ་ཐག་པ་ལས་ངན་ཁོ་ན་གསོག་བཞིན་པ་མཐོང་ནས་སྡིག་ཅན་ཚེ་ཐུང་བ་ཤོག་ཅེས་སྨོན་ལམ་བཏབ་པ་བྱང་ཆུབ་སེམས་པའི་སྨོན་ལམ་རླབས་པོ་ཆེར་སོང་ན། འདི་ཉིད་ཁྱད་འབྱེད་པའི་ལུང་རིགས་ཐད་ལྡན་སྨྲ་རྒྱུ་མེད་པ་གསལ་པོ་རེད། མི་སྤྱོད་ཀྱི་ཐད་ནས་དོལ་རྒྱལ་བྱུང་ནས་མི་ལོ་བཞི་བརྒྱ་ལྷག་གི་རིང་བོད་བསྟན་སྲིད་མི་རིགས་དང་བཅས་པར་ཕན་ཐོགས་འདི་བྱུང་ཞེས་བརྗོད་རྒྱུ་མེད་པར་ད་དུང་བསྟན་འཛིན་གྱི་སྐྱེས་ཆེན་དམ་པ་མང་པོའི་སྐུ་སྲོག་དཀྲོངས་པ་ཕ་རྒོད་བླ་མའི་ཞལ་ལུང་ནང་གསལ་པོ་བཀོད་ཡོད། ༸གོང་ས་ལྔ་པ་ཆེན་པོ་ནས་༸རྒྱལ་མཆོག་སྐུ་ཕྲེང་བཅུ་བཞི་པ་འདི་ཉིད་བར་གྱི་སྐུ་ཕྲེང་རིམ་བྱོན་སྤྱི་དང་ལྷག་པར་༸རྒྱལ་མཆོག་བཅུ་བཞི་པ་འདི་ཉིད་ནི་བོད་འབངས་ལ་ལྷག་པར་བཀའ་དྲིན་ཆེ་བ་ཕར་བཤད་ཚུར་བརྗོད་བྱེད་མི་དགོས་པར་ཀུན་གསལ་མཁའ་ཁྱབ་ཡིན་པས་འདིར་གྲོས་ཁ་བསྡུར་སའི་གཞི་རྟེན་མེད།།