ཁ་སང་གྲོས་ཚོགས་ནང་སྤྱི་འཐུས་ཁག་གཅིག་དང་སྲིད་སྐྱོང་མཆོག་གི་བར་བོད་མིའི་སྒྲིག་འཛུགས་ཀྱི་ལས་བྱེད་ཚོའི་ཟླ་ཕོགས་སྤར་ཕྱོགས་སྐོར་ལ་དྲི་བ་དྲིས་ལེན་གནང་སོང་།
ཁ་སང་སྐབས་བཅོ་ལྔ་པའི་གྲོས་ཚོགས་ཚོགས་དུས་དགུ་བའི་ཉིན་དགུ་པའི་སྔ་དྲོར། སྐར་རྟགས་ཅན་གྱི་དྲི་བ་དྲིས་ལན་གནང་སྐབས། སྤྱི་འཐུས་འཇིགས་མེད་འབྱུང་གནས་ལགས་ཀྱིས་སྲིད་སྐྱོང་བློ་བཟང་སེང་གེ་མཆོག་ལ། སྐབས་ ༡༤ པའི་བཀའ་ཤག་གིས་བོད་མིའི་སྒྲིག་འཛུགས་ཀྱི་སྲི་ཞུ་ལས་བྱེད་རྣམས་ཀྱི་གསོལ་ཕོགས་སྤར་རྒྱུར་ཕོགས་རིམ་བསྐྱར་ཞིབ་ཚོགས་ཆུང་ཞིག་ཆེད་འཛུགས་གནང་ཡང་། ཚོགས་ཆུང་གི་སྙན་ཐོ་ཕུལ་འབྱོར་རྗེས་སྙན་ཐོ་རྩིས་མེད་བཏང་སྟེ། བཀའ་ཤག་གིས་བར་བརྒལ་ངལ་སེལ་གྱི་རྩ་ཕོགས་བརྒྱ་ཆ་ ༣༢ སྤར་བ་དང་། མཛད་གཙོ་རྣམ་རྣམ་པ་དང་སྲི་ཞུ་ལས་བྱེད་ཚོར་གཞུང་དོན་ཕྱོགས་བསྐྱོད་སྐབས་ཟུར་ཕོགས་སྤྱི་མཚུངས་སྤར་ཆ་མ་གནང་བ་བཅས་ཀྱི་ཐད། རྩ་ཕོགས་ནས་བརྒྱ་ཆ་ ༣༢ ཙམ་བར་བརྒལ་ངལ་སེལ་དུ་སྤར་བ་དེ་རྩ་ཕོགས་ཐོག་མི་སྣོན་དོན་གང་ཡིན་དང་། ལས་བྱེད་མང་པོ་ཞིག་གིས་བརྒྱ་ཆ་ ༣༢ དེ་རྩ་ཕོགས་ཐོག་གནན་དགོས་པའི་བདེ་སྡུག་སྙན་ཞུ་ཞིག་བཀའ་ཤག་ལ་ཕུལ་ཡོད་པ་དེར་དགོངས་བཞེད་གནང་འཆར་ཡོད་མེད་དྲི་བ་བཏོན་པའི་ཐད་སྲིད་སྐྱོང་མཆོག་གིས། རྩ་ཕོགས་སྟེང་བརྒྱ་ཆ་ ༣༢ བསྣན་ཚེ་བཀའ་ཤག་གིས་ཐབས་འཚོལ་ཐུབ་པའི་དམིགས་བསལ་མ་དངུལ་དང་གྲོས་ཚོགས་ལ་འཆར་འབུལ་ཞུས་པའི་དངུལ་འབོར་གཉིས་འདུམས་ཀྱི་མེད་པ་དང་། བརྒྱ་ཆ་ ༣༢ རྩ་ཕོགས་ཐོག་མ་བསྣན་པ་དེས་གཟིགས་གསོལ་དང་གསོག་དངུལ་གྱི་ཁེ་ཕན་ཡོད་མཁན་ད་ཡོད་ལས་བྱེད་བགྲེས་ཡོད་འགྲོ་མཁན་རྣམས་ལ་ཁྱད་པར་ཆགས་ཀྱིན་ཡོད་པ། དེ་བཞིན། ད་ཆ་ལས་བྱེད་པའི་ཕོགས་རིམ་བསྐྱར་ཞིབ་གནང་ཐུབ་མེད་སྟབས་ཕྱོགས་སྐྱོད་ཟུར་ཕོགས་སྔ་སོར་གནས་པ་ཡིན་སྐོར་སོགས་ལན་འདེབས་གནང་སོང་།
སྤྱི་འཐུས་འཇིགས་མེད་འབྱུང་གནས་ལགས་ཀྱིས་འཕྲོས་དོན་དྲི་བར། བཀའ་ཤག་གིས་ཕོགས་རིམ་ཚོགས་ཆུང་གི་སྙན་ཐོར་ངོས་བཞེས་མ་ཐུབ་པའི་དོན་གནད་གཙོ་བོ་དེ། ཕོགས་རིམ་ཚོགས་ཆུང་གི་ཕོགས་རིམ་རྗེས་འབྲེལ་གྱི་འགྲོ་གྲོན་ཁག་ཅིག་མ་ཚུད་པར་བརྟེན་ནས་བྱུང་བ་ཞིག་མཐོང་གི་འདུག་སྟབས། ཕོགས་རིམ་རྗེས་འབྲེལ་ཀྱི་འགྲོ་གྲོན་མ་ཚུད་པ་གང་དག་དང་། གལ་སྲིད་འགྲོ་གྲོན་དེ་དག་ཚུད་ཀྱི་མེད་ན་བཀའ་ཤག་རང་གིས་བསྐྱར་དུ་ཕྱག་འབུལ་གནང་དགོས་ཀྱི་རེད་ཅེས་བཀའ་གནང་མ་ཐུབ་པའི་གནས་སྟངས་གང་ཆགས་ཡོད་དམ་ཅེས་དྲིས་པའི་ལན་དུ་སྲིད་སྐྱོང་མཆོག་གིས། བཀའ་ཤག་གིས་ཕོགས་རིམ་ཚོགས་ཆུང་ལ་བཀའ་ཤག་ནས་ཐབས་ཤེས་བྱས་པའི་དངུལ་ཁྱོན་བསྡོམས་འབུམ་ ༤༠༠ དང་དབུས་ལས་བྱེད་ཁོངས་འབུམ་ ༢༥༠ ཡོད་ཅིང་། དེ་གཞིར་བཟུང་ཁྱེད་རང་ཚོས་སྙན་ཐོ་འཁྱེར་ཡོང་རོགས་ཞེས་ཞུས་ཡོད། ཁོ་ཚོས་སྙན་ཐོ་འཁྱེར་ཡོང་སྐབས་དེའི་ནང་འབུམ་ ༢༠༠ མ་ཟིན་ཙམ་ཞིག་བར་བརྒལ་ངལ་སེལ་ཁོངས་བཏང་ཡོད་ཀྱང་། ཡུལ་ཐང་གུན་གསབ་དང་ཁང་དོད། གསོག་དངུལ་དང་གཟིགས་གསོལ་བཅས་སྤྱི་ཡོངས་ལ་ག་ཚོད་སྤར་གྱི་ཡོད་པ་དེ་འབུམ་ ༢༥༠ ནང་ལ་ཚུད་ཀྱི་མེད་སྟབས། ཕོགས་རིམ་ཚོགས་ཆུང་གི་སྙན་ཐོ་དེར་བཀའ་ཤག་གིས་རྩིས་མེད་བཏང་བ་མིན་ཡང་ད་ལྟ་ལག་ལེན་བསྟར་ཐུབ་ཀྱི་མི་འདུག་ཞུས་པ་རེད། ད་ལྟའི་ཆར་ཡུལ་ཐང་གུན་གསབ་དང་ཁང་དོད། གཟིགས་གསོལ། གསོག་དངུལ་བཅས་བསྡོམས་ན་འབུམ་ ༢༠༠ དེའི་སྒང་ལ་ལོ་རེར་འབུམ་ ༧༥ ཙམ་དང་། དབུས་རང་ཁུངས་ལས་བྱེད་དང་ཤེས་རིག་ཁྱབ་ཁོངས་ཀྱི་སློབ་གྲ་ཁག་གི་དགེ་རྒན་དང་ལས་བྱེད་ཆེད་འབུམ་ ༤༠ མན་ཙམ་ཐོད་པ་འགྲོ་གི་འདུག བཀའ་ཤག་གིས་ཐབས་འཚོལ་བྱས་པའི་འབུམ་ ༤༠༠ ཐོག་འབུམ་ ༡༠༠ ལྷག་འགྲོ་གི་ཡོད་སྟབས། ད་ལན་སྤར་ཆ་དེ་གསོག་དངུལ་ལ་སྦྱར་ཐུབ་མེད་སྟབས་བར་བརྒལ་ངལ་སེལ་ཁོངས་སུ་འཇོག་ དགོས་ཐུག་པ་རེད་ཅེས་གསུངས་སོང་།
སྤྱི་འཐུས་པདྨ་འབྱུང་གནས་ལགས་ཀྱིས་བཀའ་ཤག་གིས་བརྒྱ་ཆ་ ༣༢ གསུང་གི་ཡོད་པ་དེ་བརྒྱ་ཆ་ ༣༢ མིན་པར་བརྒྱ་ཆ་ལྔ་དྲུག་བདུན་བྱས་ནས་རྩ་ཕོགས་ཐོག་སྤར་ན་ཁྱད་པར་གང་ཡོད་དང་། མིང་བར་བརྒལ་ངལ་སེལ་ཞེས་བཏགས་ན་ཡག་པ་འདུག་དགོངས་དོན་གང་ཡིན་ནམ་ཞེས་དྲིས་པའི་ལན་དུ་སྲིད་སྐྱོང་མཆོག་གིས། དེ་དུས་བཀའ་བསྡུར་མང་པོ་བྱུང་ཡོད་པ་མ་ཟད། ལས་བྱེད་དང་བཀའ་བསྡུར་ཡང་བྱུང་ཡོད་པ་རེད། གསོག་དངུལ་དང་སྨན་དོད། དཔྱ་དངུལ་ལག་དེབ་ཀྱི་དངུལ་ཡར་ཕུལ་བ་སོགས་དང་། བར་བརྒལ་ངལ་སེལ་གྱི་བརྒྱ་ཆ་ ༣༢ དེ་ལས་བྱེད་ཀྱི་ལག་པར་རག་པ་ཡིན་ན། དངུལ་མང་བ་ལས་བྱེད་ཀྱི་སྦ་ཁུག་ནང་ལྷགས་ཀྱི་ཡོད་པ་མ་ཟད། གསོག་དངུལ་མ་སྤྲད་པ་ཚོར་གསོག་དངུལ་དང་། སྨན་དོད་དང་དཔྱ་ཁྱལ་ལག་དེབ་ཆེད་ཕོགས་ནས་བརྒྱ་ཆ་ ༥ སྤར་ཡོད་སྟབས། ལས་བྱེད་ཀྱི་ལག་པར་དངུལ་མང་བ་རག་གི་ཡོད་སྟབས་བར་བརྒལ་ངལ་སེལ་ཁོངས་བཞག་པ་རེད། ང་ཚོའི་གནས་སྟངས་འདི་ལུང་པ་གཞན་དང་མི་འདྲ་བར་གཞན་དབང་སྟབས་བསྟུན་ཡིན་སྟབས། མཐའ་མ་ཕྱི་ཕྱོགས་ནས་དངུལ་ཐབས་འཚོལ་བྱེད་ཐུབ་པ་གཞིར་བཟུང་འགྲོ་དགོས་པ་ཆགས་ཡོད། བརྒྱ་ཆ་ ༣༢ སྤར་ཟེར་བ་དེ་ལོ་རེར་རྩིས་ན་འབུམ་ ༤༠༠ རེ་སྤར་དགོས་སྟབས་ལས་སླ་པོ་ཞིག་རྩ་བ་ནས་མ་རེད། ཅེས་གསུངས་སོང་།
སྤྱི་འཐུས་ཟླ་བ་ཚེ་རིང་ལགས་ཀྱིས་ལས་བྱེད་ཁག་ཅིག་གིས་བདེ་སྡུག་སྙན་ཞུ་ཕུལ་ཡོད་པ་དེར་བཀའ་ཤག་དགོངས་པ་བཞེས་མ་ཐུབ་པ་རེད་དམ་ཞེས་དྲིས་པའི་ལན་དུ་སྲིད་སྐྱོང་མཆོག་གིས། བདེ་སྡུག་སྙན་ཞུ་འཕུལ་མཁན་ལས་བྱེད་མང་ཆེ་བ་གསོག་དངུལ་ཡོད་མཁན་དག་ཆགས་ཡོད། བར་བརྒལ་ངལ་སེལ་བརྒྱ་ཆ་ ༣༢ དེས་རྒན་ཡོལ་ཕེབས་མཁན་ཚོར་རྒན་ཕོགས་ལ་ཁྱད་པར་འགྲོ་བཞིན་ཡོད་པ་མ་རེད། ལས་བྱེད་ཁྱོན་བསྡོམས་ ༥༡༧ ཡོད་པ་ནས་ ༡༨༣ ལ་གསོག་དངུལ་ཡོད་པ་དང་། ༣༠༠ ལྷག་ལ་གསོག་དངུལ་མེད་སྟབས། གསོག་དངུལ་ལ་ཁྱད་པར་ཆེན་པོ་ཡོད་ན་གསོག་དངུལ་མེད་མཁན་ཚོར་རང་བཞིན་གྱིས་གྱོང་རག་གི་ཡོད་པ་རེད། གསོག་དངུལ་ཕུལ་མཁན་ཚོར་སྒྲིག་འཛུགས་ངོས་ནས་བརྒྱ་ཆ་ ༨ བསྣོན་དགོས་ཀྱི་ཡོད་པར་བརྟེན། མ་ཕུལ་མཁན་ཚོར་སྒྲིག་འཛུགས་ནས་བརྒྱ་ཆ་ ༨ དེ་རག་གི་མེད་པས་ལས་བྱེད་ ༣༠༠ ལྷག་ལ་གྱོང་རག་གི་ཡོད་པ་མ་ཟད། དབུས་རང་ཁུངས་ལས་བྱེད་ཚོས་ཀྱང་བདེ་སྡུག་ཞུ་གི་ཡོད་སྟབས། བཀའ་ཤག་ངོས་ནས་སྤྱི་ཡོངས་ལ་དགོངས་པ་བཞེས་དགོས་པ་ཆགས་ཀྱི་ཡོད། ཅེས་སོགས་གསུངས་སོང་།
སྤྱི་འཐུས་ཟླ་བ་ཕུན་སྐྱིད་ལགས་ཀྱིས་ལས་བྱེད་ལ་གཟིགས་རྟོག་གནང་མཁན་གཙོ་བོ་འཛིན་སྐྱོང་བཀའ་ཤག་ཆགས་ཡོད་སྟབས། བཀའ་ཤག་གིས་ལས་བྱེད་ལ་རྩ་ཕོགས་སྤར་མ་ཐུབ་ན་ང་ཚོར་སྤར་ཡང་ལེན་ཐུབ་ཀྱི་མི་འདུག གང་ཡིན་ཟེར་ན། ང་ཚོས་ལས་བྱེད་ཀྱི་དཀའ་ངལ་དེ་སེལ་ཐུབ་མ་སོང་གསུངས་མ་ཐུབ་པའི་གནས་བབ་ག་རེ་ཆགས་ཡོད་དམ་ཞེས་དྲིས་པའི་ལན་དུ་སྲིད་སྐྱོང་མཆོག་གིས། བཀའ་ཤག་གིས་དགོངས་ཚུལ་ག་རེ་ཡོད་པ་དེ་ཡིག་ཐོག་ཏུ་བཀོད་ནས་འབུམ་ ༤༠༠ ཡིན། དེར་གྲོས་ཚོགས་ནས་བཀའ་འཁྲོལ་གནང་རོགས་གནང་། བཀའ་འཁྲོལ་གནང་བ་གཞིར་བཟུང་སྤར་རྒྱུ་ཡིན་ཞེས་བརྗོད་པ་ལྟར། གྲོས་ཚོགས་ནས་བཀའ་འཁྲོལ་གནང་སྟེ་སྤར་བ་རེད། མཛད་གཙོ་རྣམ་པར་ཕོགས་སྤར་རྒྱུའི་སྐུ་དབང་དེ་གྲོས་ཚོགས་ལ་ཡོད་སྟབས། གྲོས་ཚོགས་ཀྱིས་ལག་བསྟར་གནང་བ་རེད། ལས་བྱེད་ནང་ལ་མཛད་གཙོ་རྣམ་པའི་གླ་ཕོགས་སྤར་སོང་། ང་ཚོ་ལས་བྱེད་ཚོར་ཡ་མ་བྱས་པར་ལྷགས་སོང་ཟེར་མཁན་དེ་འདྲ་ཡོད་ས་རེད། དེའི་འབྱུང་རྐྱེན་མང་ཆེ་བ་མཛད་གཙོ་རྣམ་པའི་ཟླ་ཕོགས་སྤར་བར་བརྟེན་ནས་བྱུང་སོང་བསམ་པ་ཞིག་བྱུང་། ང་ཚོ་བཀའ་ཤག་གིས་རེ་བར་ཞལ་ལག་དང་ཆུ། སྨན་འདྲ་པོ་གནང་ཡོད་བསམ་པ་ཞིག་བྱུང་ཡང་། དེ་སྤར་བ་དེ་ཡག་ཏུ་འགྲོ་རྒྱུའི་ཚབ་ཏུ་དུག་ཏུ་འགྱུར་གྲབས་བྱེད་ཀྱིན་འདུག བགློ་གླེང་འདི་མཛད་གཙོ་རྣམ་པར་སྤར་བར་བརྟེན་ནས་ཆགས་སོང་མ་གཏོགས། དེ་སྔོན་ལས་བྱེད་ནང་ལ་བསམ་ཚུལ་རྩ་ནས་མེད། ཅེས་སོགས་གསུངས་སོང་།
གསར་འགོད་པ། དོན་གྲུབ།
