ཇོ་ནང་བའི་གནད་དོན་ནི་ཆོལ་ཁའི་གནད་དོན་མིན།

མིག་མི་འཛུམ།

ཇོ་ནང་བའི་གནད་དོན་འདི་ཧ་ཅང་ཛ་དྲག་གི་རང་བཞིན་ཞིག་ཏུ་སེམས། སྔ་སོར་ཇོ་ནང་སྒྲུབ་བརྒྱུད་ཀྱི་རིང་ལུགས་འཛིན་པའི་སྡེ་འདི་ལ། ཆོས་བརྒྱུད་སྤྱི་མཚུངས་ཀྱི་ཐོབ་ཐང་དགོས་མིན་དང་སྤྲོད་མིན་ཐད། གཏམ་ཐོ་རེ་བ་འགའ་གོ་མྱོང་བ་མ་ཟད། སྤྱི་འཐུས་ཁ་ཤས་ཀྱིས་རང་རྐྱ་ཐུབ་པའི་ཆོས་བརྒྱུད་ཅིག་མ་ཡིན་པར་གྲུབ་མཐའ་ག་གེ་མོའི་ནང་གསེས་ལྟ་བུ་ཞིག་ཡིན་པར་བསྒྲུབས་མྱོང་བའང་ཐོས། དེ་དུས་ནས་རང་ཉིད་ཇོ་ནང་བའི་གྲུབ་མཐར་འཇུག་པ་ཞིག་མིན་ནའང་། ཆུང་དུས་ནས་གཞུང་ལུགས་རེ་ཟུང་ལ་ཐོས་བསམ་བྱེད་མཁན་ཞིག་ཡིན་པའི་ངོས་ནས། བོད་ཀྱི་ལོ་རྒྱུས་ཐོག་ཡོངས་གྲགས་ཀྱི་མཁས་པ་མང་བོས་ལྟ་བའི་ཐད་དཔྱད་བསྡུར་གནང་སྐབས། ཇོ་ནང་བའི་དབུ་མའི་ཐད་ཀྱི་གཞན་སྟོང་ལ་དགག་པ་མང་དུ་བྱེད་པ་དང་། གྲུབ་མཐའི་རྣམ་བཤད་ཁག་ཏུ་ཡང་ཇོ་ནང་གྲུབ་མཐའི་ལྟ་བའི་བཞེད་དགོངས་སོགས་ལ་ཆེ་ཆེར་འགྲེལ་བ་དེ་དག་དྲན་གྱི་འདུག སྐབས་དེ་དག་ཏུ་ཇོ་ནང་དང་ས་སྐྱ་གཉིས་གཅིག་ཏུ་བཞེད་མཁན་སུ་ཡང་མེད་ཁར་ས་སྐྱའི་ནང་གསེས་ཤིག་ཡིན་པའི་གཏམ་ཡང་སྦྲང་སྐད་ཙམ་མེད། འོན་ཀྱང་བླ་མ་རེ་ཟུང་གི་སློབ་མ་དང་སློབ་མ་རེ་གཉིས་ཀྱི་བླ་མར་བསྟེན་ནས་གྲུབ་མཐའ་ཕན་ཚུན་གྱིས་གཅིག་གིས་གཅིག་བསྡུ་གསོག་རྒྱག་དགོས་ཚེ། ས་སྐྱའི་གྲུབ་མཐའ་དང་དེའི་སློབ་བརྒྱུད་གཙོས། བཀའ་བརྒྱུད་དང་རི་བོ་དགེ་ལྡན་པ་སོགས་ཀྱང་ཡོད་ཚོད་མི་འདུག་པ་གནས་ལུགས་སུ་གྲུབ་ཡོད། དེ་ཞོར་འཕྲོས་ཡིན།

དཀྱུས་ལ་འབབ་པར་བྱ་སྟེ། དེ་རིང་གྲོས་ཚོགས་སྒོ་ཁར་འཕྲེད་དར་སྣ་ཚོགས་དང་ཡིག་བྱང་འདྲ་མིན་བཏེགས་ནས་ཞུ་འབོད་བྱེད་ཀྱིན་པ་འདི། ངས་བསམ་ན་ཧ་ཅང་ཉེན་ཁ་ཆེན་པོ་ཞིག་གི་སྟ་གོན་ཡིན་པར་སྣང་། བོད་ཡུལ་སྟོད་སྨད་བར་གསུམ་ལ་ཁྱབ་པའི་གྲུབ་མཐའ་ཆེན་པོ་ཞིག་ལ་གྲུབ་མཐའ་གཞན་ལྟར་གྲོས་ཚོགས་ཀྱི་རྐུབ་སྟེགས་མ་ཐོབ་པ་འདི་གནས་ལུགས་ཀྱི་སྟེང་ནས་བཤད་ན་དེ་ ཙམ་འོས་པ་ཞིག་མིན་ཏེ། འོན་ཀྱང་མང་གཙོའི་ཐག་གཅོད་ཀྱི་གྲོས་ཆོད་བརྩི་དགོས་པ་ཡང་དཔལ་རྒྱལ་བ་ཇོ་ནང་ བའི་ཆོས་བརྒྱུད་འཛིན་པ་ཚོས་ངེས་པར་དུ་ཤེས་དགོས་པ་ཞིག་ཡིན། གནད་དོན་འདི་གང་ནས་བྱུང་བ་རེད་དམ་ཞེ་ན། ཁྲིམས་བཟོ་ལྷན་ཁང་གི་མི་སྣ་རེ་རེའི་ངོས་དང་བསམ་བློའི་ཆུ་ཚད་ཀྱི་སྟེང་ནས་བྱུང་བ་ཞིག་ལ་ངོས་འཛིན་དགོས་པར་མཐོང་།

འུ་ཚོའི་ཁྲིམས་བཟོ་བ་དག་གིས་ནི་རྣམ་རྟོག་དང་ཐེ་ཚོམ། ཞེད་སྣང་འབའ་ཞིག་གི་ངོས་ནས་སྤྱི་དོན་ཞེས་པའི་རྩྭ་ཕུང་ལྟ་བུའི་ལས་ཀ་ཞིག་སྒྲུབ་ཀྱིན་ཡོད། དེ་ནི་འཐེན་འཁྱེར་ཞེས་པའི་རང་སྲོག་གཅོད་བྱེད་ཀྱི་རལ་གྲི་དེ་ཡིན། ད་རེས་གྲོས་ཚོགས་ནས་བགྲོ་གླེང་གང་ཡང་མེད་པར་གློ་བུར་ཐོལ་རྒྱག་གི་རྣམ་པ་དེ་དང་། དེའི་མཇུག་འབྲས་ལ་གཞིག་ན། འཕྲལ་ཕུགས་རྒྱང་གསུམ་གྱི་གནད་དོན་ལ་བསམ་བློ་གང་ཡང་མ་བཏང་བར། ཐད་ཀར་ཆོལ་ཁ་དང་ཆོལ་ཁའི་ཞེན་ཁོག་འབའ་ཞིག་གི་རྣམ་པ་གསལ་བོར་མངོན་བྱུང་། འདི་ནི་ནམ་ནམ་ཞར་ཞར་ལ་དྷ་སའི་ཉེ་འཁོར་གྱི་ཐང་ཁྲོམ་སིལ་འཚོང་བ་དང་རྒྱ་གར་ཇ་ཁང་དག་གི་སྒོ་ཁར་འཚང་ནས་གོ་ལོ་ཐོས་ལོའི་གཏམ་གྱིས་ཉི་མ་བསྐྱལ་བའི་རྒན་རྒོན་དག་གིས་ནམ་རྒྱུན་བཤད་ཀྱིན་པ་སྟེ། “ ཇོ་ནང་ལ་སྤྱི་འཐུས་ཐོབ་སོང་ཚེ། ཨ་མདོར་སྤྱི་འཐུས་གཉིས་ཀྱི་གྲངས་ཀ་འཕར་བ་རེད།”ཅེས་པ་དེ་ཡིན།

བློ་གཟུ་བོར་གནས་ཏེ་བཤད་ན། དཔལ་རྒྱལ་བ་ཇོ་ནང་བའི་གྲུབ་མཐའ་དང་དེའི་ཆོས་བརྒྱུད། ད་དུང་གཞན་ལ་མེད་པའི་སྦྱོར་དྲུག་ཉམས་ལེན་གྱི་གདམས་པ་དག་ནི་བོད་བརྒྱུད་ནང་བསྟན་གྱི་གྲུབ་ཆ་ཞིག་ཡིན་པ་མ་ཟད། བོད་མི་རིགས་ཀྱི་རྩ་བའི་རིག་གཞུང་གལ་ཆེན་ཞིག་ཡིན་པ་ལས། ཆོས་བརྒྱུད་གྲུབ་མཐའ་འདིའི་མགོར་ཨ་མདོ་བཞག་ནས་བལྟས་ན་ཧ་ཅང་ཐལ་ཆ་ཤོར་བ་ཞིག་ལ་ངོས་འཛིན་མི་བྱ་ག་མེད་ཡིན། གོང་གི་བཤད་ཡམས་དེའི་རྗེས་སུ་རྒྱུག་མཁན་གྱི་ཁྲིམས་བཟོའི་མི་སྣ་ཁག་ཅིག་གིས། ནམ་དུ་ཡང་གྲོས་ཚོགས་ཀྱི་ལས་ཀ་ནི་ཆོལ་ཁ་ཕན་ཚུན་གྱི་མགོ་བོ་གཅོག་རེས་ཙམ་དུ་འཛིན་པ་ཅི་འདྲའི་བློ་ཡུལ་དུ་ཤོང་དཀའ་བའི་སྐྱོ་སྣང་ཞིག་རེད་ཨང་སྙམ།

དེ་རིང་འཕྲེད་དར་འཕྱར་ནས་ཞུ་འབོད་ལ་ཕེབས་པའི་དགེ་འདུན་པ་དང་མི་མང་གི་ངོས་ནས་ཧ་ཅང་ཞི་བ་དང་དུལ་བའི་རྣམ་པ་ཞིག་མངོན་པ་འདིས། ད་དུང་རེ་བ་ཆེན་པོ་བཟུང་ཡོད་པ་མཚོན་ཐུབ། གཞིས་ལུས་ཇོ་ནང་བའི་དགོན་སྡེ་ཆེ་ཆུང་བརྒྱ་ཕྲག་མང་བོ་དང་དེའི་ཆོས་བརྒྱུད་འཛིན་པའི་མི་མང་འབུམ་ཕྲག་དུ་མའི་ཚབ་མཚོན་དུ་ཕེབས་པའི་ཁོང་ཚོས། རེ་འདུན་དོན་ཚན་བཞི་བཏེགས་ནས་པུས་མོ་སར་བཙུགས་པ་འདི་སྣང་མེད་དུ་བཞག་ཚེ། སུས་ཀྱང་འགོག་མི་ཐུབ་པའི་ཞི་ཁྲོའི་རྦ་རླབས་དྲག་པོ་ཞིག་རྗེས་ན་ཡོད་པ་མ་ཟད། ད་ལྟའི་ལོ་རྒྱུས་དང་ཆོས་འབྱུང་། ཆབ་སྲིད་བཅས་ཀྱི་འགན་འཁྲི་མ་འཁུར་བའི་མཇུག་འབྲས་ཀྱང་རྗེས་ན་ཡོད་པར་མཐོང་གིན་འདུག དེ་དུས་དགོད་དགོས་ན་དགོད་མི་ཤེས་པ་དང་ངུ་དགོས་ན་ངུ་མི་ཤེས་པའི་ཚད་ལ་བསླེབ་མི་སྲིད་པ་མིན།

ཡང་གཅིག་བཤད་ན། དགོན་པ་ཆུང་ཆུང་ཞིག་འཚོགས་ལ་ཞུགས་པ་ལྟ་བུའི་རང་རེའི་གྲོས་ཚོགས་ར་བ་འདིའི་ནང་གི་ཆོས་བརྒྱུད་སྤྱི་འཐུས་ཀྱི་རྐུབ་སྟེགས་རྩ་མེད་བཟོ་དགོས་པ་དང་། དེ་དག་སྔར་མུས་བཞིན་བཞུགས་རྒྱུ་ཡིན་པ་དེ་སྲིད་དུ་གཞན་སྟོང་དབུ་མ་ཆེན་པོའི་ལྟ་བ་འཛིན་མཁན་གྱི་ཇོ་ནང་བའི་ཆོས་བརྒྱུད་རྐུབ་སྟེགས་རྩོད་པའི་ངར་སྒྲ་འཇགས་མི་སྲིད། དེ་ལ་དམིགས་ཡུལ་ཆེན་པོ་གཞན་མེད་དེ། གཞུང་བཟང་ཆུ་བོ་སྟོང་གི་རྒྱུན་གྱི་གདམས་པ་མ་ལུས་མི་ཉམས་གོང་འཕེལ་གྱིས་སྐྱོང་དགོས་ན། གཞན་ལ་ཅི་ཡོད་རང་ལའང་ཐོབ་དགོས་པའི་གནས་ལུགས་དེ་ཡིན།

གསལ་བོར་ཞུ་དགོས་པ་ཞིག་ལ། སྐབས་བཅོ་ལྔ་བའི་གྲོས་ཚོགས་ཚོགས་དུས་དགུ་བའི་སྟེང་བྱུང་དང་འབྱུང་གིན་པའི་ གནད་དོན་འདི་དག་ཆོལ་ཁའི་རྙོག་གླེང་ལ་ཁ་བསྒྱུར་ཐབས་བྱེད་མཁན་གྱི་གང་ཟག་ཀྱང་མང་ཚོད་འདུག་ཀྱང་། དོན་དངོས་ནི་དོན་དངོས་ལྟར་ལྟ་དགོས་པ་ལས། དེར་ལོག་འགྲེལ་རྒྱག་པ་ནི་གཟས་ནས་བསྙོན་འདིང་བ་ལས་མ་འདས། དེའི་ཕྱིར། བོད་མི་སྤྱི་བོ་གནམ་སྟོན་ཀུན་གྱིས་དྲང་བདེན་གཞི་ལ་བཞག་ནས་གཅིག་ཤོས་ལ་འཐོབ་དགོས་པ་དང་གཅིག་ཤོས་ཀྱིས་ཤོར་འོས་པའི་ལྟ་ཚུལ་དུས་ནས་དུས་སུ་མི་འཛིན་པར་ཞུ་ཞེས་གསོལ། མཇུག་ཏུ། བདེན་པ་ཉིད་རྒྱལ་གྱུར་ཅིག