ཨ་རིའི་ནང་ཚོགས་བཞིན་པའི་མི་རིགས་ཀྱི་གཞོན་སྐྱེས་མགོ་ཁྲིད་སྦྱོང་བརྡར་ཚོགས་འདུའི་ཐོག བོད་མིའི་སྐུ་ཚབ་ཁག་ཅིག་མཉམ་ཞུགས་ཀྱིས་བོད་ཀྱི་ཛ་དྲག་གནས་སྟངས་སྐོར་གཏམ་བཤད་གནང་ཡོད་འདུག
འདི་གར་ཡེ་ཤེས་བསྟན་འཛིན་ལགས་ཀྱིས་གནས་ཚུལ་མཁོ་གཏོང་གནང་བ་ལྟར་ན། ཁ་སང་ཕྱི་ཚེས་ ༢༧ ཉིན་གྱི་སྔ་དྲོའི་ཆུ་ཚོད་ ༩ པའི་ཐོག ཨ་རིའི་མཱ་རས་ལན་ཌི་(Maryland)མངའ་སྡེའི་ནང་། མི་རིགས་ཀྱི་གཞོན་སྐྱེས་མགོ་ཁྲིད་སྦྱོང་བརྡར་ཚོགས་འདུ་ཞེས་པ་མགོ་འཛུགས་གནང་ཡོད་པ་དང་། ཚོགས་ཐོག་ཏུ་རྒྱ་ནག་སྐམ་ས་དང་ཐའེ་ཝན། ཧོང་ཀོང་། ཨོ་མིན། ཁོ་བྷ། ལྷོ་སོག ཡུ་གུར་བཅས་ནས་སྐུ་ཚབ་ ༡༠༠ ཙམ་མཉམ་ཞུགས་བྱས་ཡོད་པའི་ཁྲོད། བཙན་བྱོལ་བོད་མིའི་སྒྲིག་འཛུགས་ཀྱི་ཨ་རིའི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་ལགས་ཀྱི་གཙོས་བོད་མི་མང་སྤྱི་འཐུས་ཁག་ཅིག་དང་། ཕྱི་དྲིལ་རྒྱ་ཡིག་སྡེ་ཚན་དང་སྲིད་བྱུས་ཉམས་ཞིབ་ཁང་། གཞན་ཡང་། རྒྱལ་སྤྱིའི་བོད་དོན་ལས་འགུལ་ཁང་དང་ཐའེ་ཝན་བོད་རིགས་ཚོགས་པ། རྒྱལ་སྤྱིའི་བོད་དོན་རྒྱབ་སྐྱོར་ཚོགས་པ། ཨེ་ཤ་ཡའི་བོད་དོན་འབྲེལ་མཐུད་ལས་ཁུངས། བོད་རང་བཙན་སློབ་ཕྲུག་ཚོགས་པ་བཅས་ཀྱི་སྐུ་ཚབ་མཉམ་ཞུགས་གནང་ཡོད་འདུག
ཚོགས་འདུ་དབུ་འབྱེད་ཐོག་བོད་མིའི་སྒྲིག་འཛུགས་ཀྱི་ཨ་རིའི་སྐུ་ཚབ་དོན་གཅོད་དབུ་དཀར་ཚང་སྐལ་རྡོར་ལགས་ཀྱིས་༧གོང་ས་མཆོག་གི་གསུང་འཕྲིན་སྒྲོག་སྦྱངས་དང་། བརྙན་རིས་བརྒྱུད་སྲིད་སྐྱོང་བློ་བཟང་སེང་གེ་མཆོག་གི་གསུང་བཤད་གཟིགས་འབུལ་གནང་ཡོད་པ་དང་། ཉིན་དེའི་ཕྱི་དྲོར་བོད་མི་མང་སྤྱི་འཐུས་སྐལ་བཟང་རྒྱལ་མཚན་ལགས་དང་འཇམ་དབྱངས་བཟོད་པ་ལགས། ཕྱི་དྲིལ་རྒྱ་ཡིག་སྡེ་ཚན་འགན་འཛིན་བསོད་ནམས་རྡོ་རྗེ་ལགས། རྒྱལ་སྤྱིའི་བོད་དོན་ལས་འགུལ་ཁང་ཚོགས་གཞོན་བུ་ཆུང་ཚེ་རིང་ལགས། ཐའེ་ཝན་བོད་རིགས་ཚོགས་པའི་ཚོགས་གཙོ་བཀྲ་ཤིས་ལགས་བཅས་ནས། བོད་སྤྱིའི་ཛ་དྲག་གནས་སྟངས་དང་བོད་མིའི་རང་ལུས་མེར་བསྲེགས་ཀྱི་རྒྱུ་རྐྱེན། བོད་མིའི་ཆབ་སྲིད་ཀྱི་ལངས་ཕྱོགས་སོགས་ཀྱི་ཐོག་གཏམ་བཤད་དང་དྲི་བ་དྲིས་ལན་གནང་ཡོད་འདུག
ཚོགས་འདུ་དེ་༼སྤྱི་དམངས་ནུས་སྟོབས་༽ཞེས་པའི་ཚོགས་པ་གསར་འཛུགས་གནང་མཁན་རྒྱ་རིགས་ཤེས་ཡོན་པ་མི་ཡང་ཅིན་ལི་ཡིས་གཙོ་གཉེར་འོག་ལོ་རེར་ཐེངས་གཅིག་ཚོགས་ཀྱི་ཡོད་པ་དང་། ཐེངས་འདིའི་ཚོགས་འདུ་ཟླ་འདིའི་ཕྱི་ཚེས་ ༣༠ ཉིན་མཇུག་སྒྲིལ་རྒྱུ་ཡིན་འདུག
གསར་འགོད་པ། པདྨ་མཚོ།
