ཐེངས་འདིའི་ས་ཡོམ་ཁྲོད་སངས་རྒྱས་བཅོམ་ལྡན་འདས་ཀྱི་འཁྲུངས་གནས་ལིམ་བྷི་ནིར་གནོད་སྐྱོན་ཐེབས་མེད་སྐོར་བརྗོད་འདུག
ཟླ་འདིའི་ཕྱི་ཚེས་ ༢༥ ཉིན་བལ་ཡུལ་གྱི་གཙོས་བོད་དང་རྒྱ་གར་གྱི་མངའ་སྡེ་ཁག་ཅིག་ནང་ས་ཡོམ་གྱིས་མི་རྒྱུ་གཉིས་ལ་གོད་ཆག་ཆེན་པོ་བྱུང་ཡོད་ཀྱང་། ལིམ་བྷི་ནི་བདག་གཉེར་ཁང་གི་འགན་འཛིན་བྷ་ཊ་ལཱ་ཡིས་གསར་འགོད་པར། ས་ཡོམ་བྱུང་རྗེས་བལ་ཡུལ་ནང་ཡོད་པའི་ལིམ་བྷི་ནིའི་ལྷ་ཁང་(Maya Devi Temple)སོགས་འཛམ་གླིང་ཤུལ་བཞག་རིག་དངོས་ཡོངས་ལ་རྟོག་ཞིབ་བྱས་ཡོད་ཀྱང་གནོད་སྐྱོན་ཐེབས་རིགས་བྱུང་མེད་སྐོར་བརྗོད་འདུག
བརྒྱུད་ལམ་ཁག་ཏུ་ཐེངས་འདིའི་གོད་ཆག་ཁྲོད་བལ་ཡུལ་དུ་ཡོད་པའི་གནའ་བོའི་འཛུགས་སྐྲུན་གལ་ཆེན་ཁག་ ༡༤ ལ་གནོད་སྐྱོན་ཐེབས་ཡོད་པ་དང་། དེ་དག་ནང་འཛམ་གླིང་གི་ཤུལ་བཞག་རིག་དངོས་ ༡༢ ཚུད་ཡོད་པ་མང་ཆེ་བ་རྩ་མེད་དུ་གྱུར་ཡོད་པའི་གནས་ཚུལ་ཐོན་ཡོད་ཀྱང་། ཟླ་འདིའི་ཕྱི་ཚེས་ ༢༧ ཉིན་རྒྱ་ནག་ཤིན་ཧྭ་གསར་ཁང་གི་གསར་འགོད་པ་ལིམ་བྷི་ནིར་ཕྱིན་ཏེ་གནས་ཚུལ་སྤེལ་བ་ལྟར་ན། ལིམ་བྷི་ནི་ཁུལ་དུ་རྒྱུན་ལྡན་ལྟར་ཚོང་ཁང་དང་ཟ་ཁང་སོགས་ཀྱིས་ཚོང་ལས་གཉེར་བཞིན་ཡོད་ལ། འཛམ་གླིང་ཤུལ་བཞག་རིག་དངོས་ཀྱི་གྲས་སུ་ཚུད་པའི་གནས་མཆོག་ལིམ་བྷི་ནིའི་ལྷ་ཁང་ལའང་གནོད་སྐྱོན་ཐེབས་མེད་པ་དང་། ད་ལྟའང་ཕྱི་རྒྱལ་གྱི་གནས་མཇལ་བ་མང་པོ་ཡོད་ལུགས་བརྗོད་འདུག
འཛམ་གླིང་དུས་བབ་ཀྱིས་གནས་ཚུལ་སྤེལ་བ་ལྟར་ན། ཐེངས་འདིའི་ས་ཡོམ་གྱིས་བལ་ཡུལ་ནང་གི་ལོ་རྒྱུས་ཡུན་རིང་ལྡན་པའི་ཆོས་ལུགས་དང་འབྲེལ་བའི་འཛུགས་སྐྲུན་རིག་དངོས་མང་པོར་རིམ་པ་འདྲ་མིན་གྱི་གནོད་སྐྱོན་ཐེབས་ཡོད་པ་མ་ཟད། ཡུལ་སྐོར་ལས་རིགས་ཀྱིས་བལ་ཡུལ་གྱི་དཔལ་འབྱོར་ཐོན་སྐྱེད་ཀྱི་བརྒྱ་ཆ་ ༨.༢ ཟིན་ཞིང་། ལོ་རེར་ཁྱོན་ཡུལ་སྐོར་བ་ཁྲི་ ༨༠ ཙམ་སྣེ་ལེན་བྱེད་ཀྱི་ཡོད་ཀྱང་། ས་ཡོམ་བྱུང་རྗེས་འཛམ་གླིང་གི་ཡུལ་སྐོར་བ་མང་པོས་བལ་ཡུལ་ནང་སྤྲོ་འཆམ་བྱ་རྒྱུ་ཕྱིར་འཐེན་བྱས་ཡོད་སྟབས། འཛམ་གླིང་གི་ཆེད་མཁས་པ་ཚོས་བསྐྱར་སྐྲུན་གྱི་འགྲོ་གྲོན་སོགས་ཐེངས་འདིའི་ས་ཡོམ་གྱིས་ཁྱོན་ཨ་སྒོར་དུང་ཕྱུར་ ༥༠ ལྷག་གི་དཔལ་འབྱོར་གྱོང་གུད་བཟོས་ཡོད་སྐོར་བརྗོད་འདུག
གསར་འགོད་པ། པདྨ་མཚོ།
