དེ་རིང་སྔ་དྲོར་འདི་ལོའི་སྲིད་སྐྱོང་སློབ་ཡོན་བྱ་དགའ་སུ་ཇ་བོད་ཁྱིམ་གྱི་སློབ་བུ་བསྟན་འཛིན་དགྲ་འདུལ་ལགས་ལ་ཐོབ་པ་གསལ་བསྒྲགས་གནང་སོང་།
དེ་རིང་སྔ་དྲོའི་ཆུ་ཚོད་ ༡༠ པ་ཐོག་སྲིད་སྐྱོང་བློ་བཟང་སེང་གེ་མཆོག་གིས། ད་ལོའི་འཛིན་རིམ་བཅུ་གཉིས་ཀྱི་རྒྱ་གར་རྒྱལ་ཡོངས་ཡིག་རྒྱུགས་ཁྲོད། སྲིད་སྐྱོང་སློབ་ཡོན་བྱ་དགའ་ཐོབ་པའི་སུ་ཇ་བོད་ཁྱིམ་གྱི་སློབ་མ་བསྟན་འཛིན་དགྲ་འདུལ་ལགས་ལ་འཚམས་འདྲིའི་མཇལ་འཕྲད་གནང་ཡོད་པ་དང་། ཉིན་གུང་ཆུ་ཚོད་ ༡༢ ཐོག་བཀའ་ཤག་གི་ཚོགས་ཁང་འོག་མའི་ནང་། སྲིད་སྐྱོང་མཆོག་དང་ཤེས་རིག་དྲུང་ཆེ་ངག་དབང་རབ་རྒྱལ་ལགས། ཤེས་རིག་སློབ་ཡོན་ཚན་པའི་འགན་འཛིན་འཆི་མེད་ཚེ་དབྱངས་ལགས། སུ་ཇ་བོད་ཁྱིམ་གྱི་སློབ་སྤྱི་ཀརྨ་ཤེས་རབ་ལགས་བཅས་ལྷན་བཞུགས་ཐོག་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་།
ལྷན་ཚོགས་ཐོག་སྲིད་སྐྱོང་མཆོག་གིས་བསྐྱར་དུ་སློབ་བུ་བསྟན་འཛིན་དགྲ་འདུལ་ལགས་ལ་བཀྲ་ཤིས་བདེ་ལེགས་ཀྱི་འཚམས་འདྲི་གནང་བ་དང་སྦྲགས། གཞི་རྩའི་སློབ་ཡོན་གནང་རྒྱུ་དེ་ག་ཚོད་བརྒྱ་ཆ་མཐོ་ན་སློབ་ཡོན་དེ་ཙམ་གྱིས་མང་བ་གནང་གི་ཡོད་ཀྱང་། སྲིད་སྐྱོང་སློབ་ཡོན་ཐོག་མར་མགོ་བཙུགས་སྐབས་ག་འདྲ་གནང་དགོས་ཀྱི་འདུག་ཅེས་ལས་བྱེད་ཚོའི་ནང་བགྲོ་གླེང་ཏོག་ཙམ་བྱུང་བ་རེད། ཡིན་ནའང་། མཐའ་མར་འབུམ་གཅིག་བཟོས་པ་ཡིན་ན། གོ་བདེ་པོ་ཞིག་དང་ཅུང་ཕོན་ཆེན་པོ་ཞིག་ཡོད་པ་རེད་བསམ་ནས་གཏན་འཁེལ་གནང་བ་དང་། སྤྱིར་བཏང་དངུལ་དངུལ་རེད་དེ་སྲིད་སྐྱོང་གསོལ་རིས་སྤྲད་ནས་སློབ་སྦྱོང་ཐོག་འབད་བརྩོན་བྱེད་མཁན་གྱི་སློབ་ཕྲུག་ཚོར་མཐོང་དང་ངོས་འཛིན་བྱས་པ་ཡིན་ན། ཐུགས་ཕན་སོས་ཀྱི་རེད་བསམ་པའི་ཐོག་ནས་འབད་བརྩོན་བྱས་པ་རེད། སྐབས་དེར་སློབ་ཕྲུག་ཚོས་ཆོབ་དང་སྦྲགས་ཏེ། བརྒྱ་ཆ་ ༩༥ ཟེར་བ་དེ་ཤེལ་སྒོའི་ནང་གི་མོག་མོག་རེད་རག་རྒྱུ་ཡོད་པ་མ་རེད་ཅེས་ལབ་མཁན་བྱུང་ཡོད་འདྲ། འོན་ཀྱང་། ཉེ་ཆར་བསྟན་འཛིན་དགྲ་འདུལ་དང་དེའི་སྔོན་དུ་བསྟན་འཛིན་ཆོས་སྐྱིད་གཉིས་ལ་སྲིད་སྐྱོང་སློབ་ཡོན་རག་ཡོང་དུས། སློབ་ཕྲུག་ཚོས་སློབ་སྦྱོང་ཧུར་ཐག་དང་ལས་བྱེད་ཚོས་ཀྱང་ཁུར་བླངས་ཏེ། ཤེས་ཡོན་ཐོག་སྤྱི་ཡོངས་ནས་གང་ལ་གང་འཚམ་ཡར་རྒྱས་འགྲོ་ཡི་ཡོད་ཅེས་ཞུས་པ་ཡིན་ནའང་ཞུ་ཚོད་ཐུག་པ་ཞིག་རེད་བསམ་གྱི་འདུག ཅེས་གསུངས་སོང་།
སློབ་བུ་བསྟན་འཛིན་དགྲ་འདུལ་ལགས་ཀྱིས་བོད་མི་སྤྱི་དང་ལྷག་པར་དུ་སློབ་ཕྲུག་ཚོས་དཀའ་ལས་རྒྱག་དགོས་སྐོར་ལ་ཁོང་གིས། སོ་སོས་དཀའ་ལས་བརྒྱབ་པ་ཡིན་ན་འབྲས་བུ་གཏན་གཏན་འཐོབ་རྒྱུ་ཡོད་པས། ག་དུས་ཡིན་ནའང་བོད་པ་ཞིག་ཡིན་པའི་སེམས་ཤུགས་མ་ཆག་པ་དགོས་པ་དང་། དེ་བཞིན། བོད་པའི་སློབ་ཕྲུག་ཚོའི་ངོས་ནས་ད་ལྟ་དཀའ་ལས་རྒྱག་པའི་དུས་ཚོད་ཅིག་ཏུ་སླེབ་ཡོད་སྟབས། སྤྱི་ཚོགས་ལ་འགྱུར་བ་འགྲོ་བཞིན་པ་དང་བསྟུན་ཏེ་བཟང་ཕྱོགས་ལ་བལྟས་ནས་དཀའ་ལས་རྒྱག་དགོས་སྐོར་དང་། ཁོ་རང་གི་གྲུབ་འབྲས་ཚང་མ་དགེ་རྒན་རྣམ་པའི་བཀའ་དྲིན་ཡིན་པས་ཐུགས་རྗེ་ཆེ་ཞུ་བ་དང་མཉམ་དུ། སློབ་ཕྲུག་ཚོའི་ངོས་ནས་དུས་རྒྱུན་དགེ་རྒན་རྣམ་པར་བརྩི་བཀུར་ཞུ་དགོས་སྐོར་བརྗོད་སོང་།
ཡང་ཁོང་གིས་མ་འོངས་པར་ཆབ་སྲིད་ཚན་རིག་དང་ལོ་རྒྱུས་ཐོག་ནས་འབུམ་རམས་པ་གཏན་གཏན་འཐོན་ཐུབ་པ་བྱ་རྒྱུ་ཡིན་པ་མ་ཟད། སྤྱིར་བཏང་ཆབ་སྲིད་ཚན་རིག་ལ་དབྱེ་བ་མང་པོ་ཡོད་པའི་ནང་ནས་གཅིག་གི་ཐོག་ལ་རྒྱལ་སྤྱིའི་སྡིངས་ཆའི་ཐོག་ནས་བོད་པ་དེར་བཀའ་འདྲི་ཞུས་ཟེར་བ་ལྟ་བུ་ཞིག་ཆགས་ཐུབ་པའི་རེ་བ་བཅངས་ཡོད་སྐོར་སོགས་བརྗོད་སོང་།
དྲི་བ་དྲིས་ལན་སྐབས་སྲིད་སྐྱོང་མཆོག་གིས་སྲིད་སྐྱོང་སློབ་ཡོན་བྱ་དགའ་གནང་ཕྱོགས་ཐོག་གསུངས་དོན། སྲིད་སྐྱོང་སློབ་ཡོན་ལ་བརྒྱ་ཆ་ ༩༥ ལོན་དགོས་པ་མ་གཏོགས་ཆ་རྐྱེན་གཞན་གང་ཡང་མེད་སྟབས། རྒྱ་གར་དབུས་འབྲིང་རིམ་ཤེས་ཡོན་ལྷན་ཚོགས་(CBS)ཀྱི་འགྲོ་སྟངས་བྱས་པ་ཡིན་ན། སློབ་ཚན་ ༥ ཡི་བརྒྱ་ཆ་ག་ཚོད་ཡིན་ནའང་དེ་རྩིས་ནས་སློབ་གྲྭར་ཚུད་པའི་ལམ་ལུགས་ཡོད་པ་གཞིར་བཟུང་སྟེ།་སྲིད་སྐྱོང་སློབ་ཡོན་ཡིན་ནའང་སློབ་ཚན་ ༥ ལ་བརྒྱ་ཆ་ ༩༥ ལོན་པ་ཡིན་ན་འགྲིག་གི་ཡོད་པ་རེད། ཡིན་ནའང་། བོད་ཡིག་དེ་གལ་ཆེན་པོ་ཡིན་པས་ཉུང་མཐར་བརྒྱ་ཆ་ ༦༠ ལོན་དགོས་ཀྱི་འདུག་ཅེས། ཤེས་རིག་ལས་ཁུངས་ཀྱི་སློབ་ཡོན་ཚོགས་ཆུང་ནས་ཚོགས་འདུ་ཚོགས་ཏེ་ཐུགས་ཐག་བཅད་ཡོད་ལ། མ་འོངས་པར་ཡང་དེ་ལྟར་འགྲོ་བའི་རེ་བ་ཞུ་ཡི་ཡོད། མ་ཟད་ད་ལོར་སྲིད་སྐྱོང་སློབ་ཡོན་རག་མཁན་བསྟན་འཛིན་དགྲ་འདུལ་མ་ཡིན་པའི་སློབ་ཕྲུག་གཉིས་མེད་ནའང་གཅིག་ཡོད་པ་འདྲ་བོ་ཆགས་འདུག་ཀྱང་། སློབ་ཚན་ ༤ ལ་བརྒྱ་ཆ་ ༩༥ རེ་རག་ཡོད་ཀྱང་སློབ་ཚན་ ༡ ལ་བརྒྱ་ཆ་ ༩༥ མ་རག་དེ་འདྲ་ཆགས་འདུག ཅེས་དང་། མ་འོངས་པར་སློབ་ཡོན་མ་འདྲ་བ་མང་ཙམ་བཟོས་ཏེ་སློབ་ཕྲུག་སྤྱི་ཡོངས་ལ་ཕན་ཐོགས་ཡོང་བར་འབད་བརྩོན་གནང་བཞིན་ཡོད་སྐོར་སོགས་གསུངས་སོང་།
སུ་ཇ་བོད་ཁྱིམ་གྱི་སློབ་སྤྱི་གསར་པ་ཀརྨ་ཤེས་རབ་ལགས་ཀྱིས་སུ་ཇ་བོད་ཁྱིམ་གྱི་ཐེངས་དང་པོའི་འཛིན་རིམ་ ༡༢ ཀྱི་ཡིག་རྒྱུགས་གྲུབ་འབྲས་སྐོར་ལ། ད་ལོ་ང་ཚོའི་སློབ་གྲྭའི་འཛིན་གྲྭ་ ༡༢ པའི་ཡིག་ཚད་ཐེངས་དང་པོ་ཡིན་ལ། ཡིག་ཚད་གཏོང་མཁན་སློབ་ཕྲུག་ ༡༢༩ ཡོད་པ་ཚང་མས་ཡིག་ཚད་འཕྲོད་ཡོད་པ་མ་ཟད། ད་རེས་དམིགས་བསལ་བྱས་ཏེ་སྲིད་སྐྱོང་སློབ་ཡོན་ལེན་མཁན་སློབ་ཕྲུག་གཅིག་བྱུང་ཡོད་སྟབས། བོད་ཁྱིམ་སྤྱི་ཡོངས་ནས་རེ་བ་བརྒྱབ་པ་ནང་བཞིན་རེ་བ་གྲུབ་སོང་བསམ་པའི་ཚོར་སྣང་བྱུང་། ཡིན་ནའང་། ཡིག་ཚད་ཀྱི་བརྒྱ་ཆ་རག་པ་དེར་འདོད་པ་ཚིམ་པ་ཞིག་བྱུང་སོང་ངམ་ཟེར་ན་བྱུང་མ་སོང་། གང་ཡིན་ཟེར་ན། ང་ཚོར་སྲིད་སྐྱོང་སློབ་ཡོན་དེ་སློབ་ཕྲུག་གསུམ་བཞི་ཙམ་ལ་ཐོབ་པའི་དམིགས་ཡུལ་ཡོད། ཡིན་ནའང་། བརྒྱ་ཆ་སྤྲོད་ཕྱོགས་ཀྱི་ཐོག་ལ་ཁྱད་པར་ཏོག་ཙམ་ཡོད་དུས་སློབ་ཕྲུག་གཅིག་མ་གཏོགས་བསླེབས་མ་སོང་། དེ་ནས་གནས་ཚུལ་བཟང་པོ་ཞིག་ག་རེ་ཞུ་རྒྱུ་ཡོད་ཟེར་ན། ང་ཚོའི་སློབ་ཕྲུག་ ༡༢༩ ཡི་ནང་ནས་སློབ་ཕྲུག་ ༦ བརྒྱ་ཆ་ ༩༠ ལྷག་དང་། སློབ་ཕྲུག་ ༤༠ བརྒྱ་ཆ་ ༨༠ ལྷག སློབ་ཕྲུག་ ༦༠ ལྷག་བརྒྱ་ཆ་ ༧༠ ནང་བསླེབས་ཡོད་པ་དང་། བརྒྱ་ཆ་ ༥༠ ལྷག་ལེན་མཁན་སློབ་ཕྲུག་གཅིག་བྱུང་སོང་། ཡིན་ནའང་། ང་ཚོའི་ངོས་ནས་སློབ་ཕྲུག་ཚང་མས་བརྒྱ་ཆ་ ༦༠ ཡན་ལེན་ཐུབ་པའི་དམིགས་ཡུལ་བཟུང་བ་ཡིན། ཞེས་བརྗོད་སོང་།
གསར་འགོད་པ། པདྨ་མཚོ།
ད་ཐེངས་སྲིད་སྐྱོང་སློབ་ཡོན་སྤྲོད་སྟངས་འདི་ཁྱད་མཚར་ཞིག་རེད། ད་སྔ་ངའི་བུ་མོར་སྤྱི་ཡོངས་ཡིག་རྒྱུགས་གྲུབ་འབྲས་ཡག་པོ་སོན་ཡང་བོད་ཡིག་གྲུབ་འབྲས་ཡག་པོ་མ་བྱུང་བའི་དབང་གིས་དགའ་ལྡན་ཕོ་བྲང་གཟེངས་རྟགས་རག་མ་ཐུབ་པ་བྱུང་སོང་། སྐབས་དེ་དུས་ཤེས་རིག་ལས་ཁུངས་ཀྱིས་དགའ་ལྡན་ཕོ་བྲང་གཟེངས་རྟགས་སྤྲོད་སྐབས་བོད་ཡིག་སློབ་ཚན་དེ་གཙོ་གནད་སློབ་ཚན་ལྔའི་ནང་ངེས་པར་འཇོག་གི་ཡོད་ཅེས་འགྲེལ་བཤད་གནང་བྱུང་བས། དེ་བཞིན་དུ་ཁས་ལེན་ཞུས་པ་ཡིན། འོན་ཀྱང་ད་ཐེངས་བསྟན་འཛིན་དགྲ་འདུལ་གྱི་སློབ་ཚན་ལྔའི་ནང་བོད་ཡིག་བརྩིས་མེད་པ་རེད། དེ་ནི་ཤེས་རིག་ལས་ཁུངས་ལ་སྒྲིག་གཞི་མེད་པ་མིན་པར། སྲིད་སྐྱོང་སློབ་ཡོན་རག་མཁན་བྱུང་སོང་ཞེས་སྤྱི་ཚོགས་ནང་ཁྱབ་བསྒྲགས་ཤིག་བྱ་འདོད་པ་མིན་ནམ་སྙམ་པའི་དོགས་པ་བྱུང་། དེ་མིན་ན་དེང་སང་ཤེས་རིག་ལས་ཁུངས་ཀྱི་བོད་ཡིག་ལ་ཆེ་མཐོང་སྤྲོད་མཚམས་བཞག་པ་ཡིན་གྱི་རེད།
ཞོར་ནས་དྲི་བ་ཁ་ཤས་འདྲི་རྒྱུ་ཡོད།
༡། སློབ་ཚན་ལྔ་གང་རུང་ལ་བརྒྱ་ཆ་མཐོ་པོ་ལོན་པ་ཙམ་གྱིས་འགྲིག་གི་ཡོད་ན་བསྟན་འཛིན་དགྲ་འདུལ་ལ་དགའ་ལྡན་ཕོ་བྲང་གི་གཟེངས་རྟགས་ཀྱང་སྤྲོད་ཀྱི་རེད་དམ།
༢། ཕྱི་ཚེས་༢༦ ཉིན་བོད་མིའི་སྒྲིག་འཛུགས་ཀྱི་དྲ་རྒྱའི་ནང་སྒྱུ་རྩལ་སྡེ་ཚན་གྱི་བརྒྱ་ཆ་མཐོ་ཤོས་སུ་ཇ་སློབ་གྲྭའི་ཤ་བོ་ཆོས་ལྡན་ལ་བརྒྱ་ཆ་༩༣་༢ ཐོབ་ཡོད་ཅེས་བཀོད་འདུག་པས། ཡང་སྙིང་ཨང་དང་པོ་སུ་རེད།
༣། སྲིད་སྐྱོང་སློབ་ཡོན་དང་དགའ་ལྡན་ཕོ་བྲང་སློབ་ཡོན་གཉིས་ཀྱི་བརྒྱ་ཆ་བརྩི་སྟངས་གཅིག་པ་རེད་དམ་མ་རེད། མིན་ན་མིན་པའི་རྒྱུ་མཚན་གང་རེད།
༤། དེང་སང་བོད་ཡིག་གིས་ལྟོ་མི་སྟེར་བ་ཟེར་བ་དེ་དངོས་གནས་ཆགས་པ་རེད་དམ།
སློབ་མ་བསྟན་འཛིན་དགྲ་འདུལ་གྱིས་བརྒྱ་ཆ་༩༥ ལོར་པར་བསྔགས་བརྗོད་ཞུ་འོས་ཀྱང་སྲིད་སྐྱོང་གཟེངས་རྟགས་སྤྲོད་སྟངས་འདི་ཁྲིམས་སྒྲིག་གང་ནས་བལྟས་ཀྱང་འདོད་བློ་ཁེངས་པ་མ་བྱུང་།