ཁ་སང་༧གོང་ས་མཆོག་གིས་ཨོ་སི་ཀྲོ་ལི་ཡའི་གསར་འགོད་པར་བཀའ་ལན་བསྩལ་སྐབས་ང་ཚོས་མི་རབས་གསར་པ་ཚོར་ཆོས་ལུགས་ལས་བརྒལ་བའི་བཟང་སྤྱོད་དང་འགྲོ་བ་མིའི་རིགས་ཀྱི་བཟང་སྤྱོད་སློབ་གསོ་སྤྲད་དེ། ཉོན་མོངས་ཀྱིས་ཀུན་ནས་བསླངས་པའི་བྱ་ངན་དེ་དག་ཟློག་ཐབས་བྱེད་དགོས་ཞེས་གསུངས།
ཟླ་འདིའི་ཚེས་ ༤ ཉིན་༧གོང་ས་མཆོག་ཨོ་སི་ཀྲོ་ལི་ཡའི་གྲོང་ཁྱེར་སི་ཌི་ཎི་གནམ་ཐང་དུ་ཞབས་སོར་འཁོད་སྐབས། རྒྱ་གར་གྱི་གཞུང་ཚབ་མཆོག་དང་བོད་མིའི་སྒྲིག་འཛུགས་ཀྱི་སྐུ་ཚབ་དོན་གཅོད་ལྷག་པ་མཚོ་འགོ་ལགས་ཀྱི་གཙོས་ཆིབས་སྒྱུར་གོ་སྒྲིག་ཚོགས་ཆུང་གི་ཚོགས་གཙོ་དང་བོད་མི་ ༢༠༠ ལྷག་གིས་ཕེབས་བསུ་ཞུས་རྗེས། ༧གོང་ས་མཆོག་གིས་ཨོ་སི་ཀྲོ་ལི་ཡའི་ (Network Ten’s news) ཞེས་པའི་གསར་འགོད་པ་སྐུ་ཞབས་ཨ་ལེ་ (Waleed Aly ) ལགས་ཀྱི་དྲི་བར་བཀའ་ལན་བསྩལ་བ་ཁག་ཕབ་བསྒྱུར་ཞུས་ཡོད།
གསར་འགོད་པ་ཨ་ལེ་ལགས་ཀྱིས་ཐོག་མར་༧གོང་ས་མཆོག་ལ་འདི་ལོ་དགུང་གྲངས་ ༨༠ ཕེབས་པའི་སྐུའི་འཁྲུངས་སྐར་ལ་འཚམས་འདྲི་ཞུས་རྗེས་འཁྲུངས་སྐར་ཉིན་མཛད་འཕྲིན་གང་བསྐྱངས་ཡོད་མེད་བཀའ་འདྲི་ཞུས་པར། ༧གོང་ས་མཆོག་གིས། ཟླ་སྔོན་མར་དྷ་སྟེང་བོད་ཁྱིམ་དུ་ངོས་དང་ལྷོ་ཨ་ཧྥི་རི་ཀའི་ཡེ་ཤུའི་བླ་ཆེན་ཌེ་སི་མོན་ཀྲའུ་ཀྲའུ་མཆོག་གིས་ཐུགས་སྤྲོ་བཏང་བ་ཡིན། སྐབས་དེར་ཁོ་ཚོས་ངོས་ཀྱི་སྐྱེས་སྐར་གྱི་མངར་ཟས་ (cake) སྒྲིག་གཤོམས་བྱས་ཡོད་སྟབས། ཌེ་སི་མོན་ཀྲའུ་ཀྲའུ་མཆོག་གིས་ངོས་ལ་མངར་ཟས་སྟེང་འབར་བཞིན་པའི་རྐྱོང་རྩེ་ (candle) རྣམས་ལ་ཕུ་བརྒྱབ་ནས་གསོད་སྟངས་བསླབས་བྱུང་། སྤྱིར་ནང་པ་སངས་རྒྱས་བ་ཚོས་སྐྱེས་སྐར་ལས་མི་ཚེ་དོན་དང་ལྡན་པ་ཞིག་བསྐྱལ་རྒྱུ་གལ་ཆེ་བ་བརྩི་གི་ཡོད། ཅེས་གསུངས་འདུག
གསར་འགོད་པས་༧གོང་ས་མཆོག་ཐར་པའི་གོ་འཕང་ཐོབ་ཟིན་སྐོར་ཞུས་པར་༧གོང་ས་མཆོག་གིས། དེ་འདྲ་མ་རེད། བྱང་སེམས་ཀྱི་ས་གོང་མ་ཐོབ་པ་རྣམས་ལ་འཁོར་བའི་ལས་ཉོན་གྱི་སྡུག་བསྔལ་མྱོང་དགོས་ཀྱི་མེད། ད་ལྟ་ངོས་གནས་ཚད་དེར་སླེབ་མེད། གང་ཡིན་ཟེར་ན་ངོས་མཚམས་རེར་ཁོང་ཁྲོ་སྐྱེ་ཡི་འདུག་ཅེས་བཀའ་ལན་བསྕལ་ཡོད་པ་དང་། ཡང་གསར་འགོད་པས་༧གོང་ས་མཆོག་ཁོང་ཁྲོ་ག་དུས་སྐྱེས་གནང་གི་འདུག་ཅེས་དྲིས་པར། ༧གོང་ས་མཆོག་གིས་གསར་འགོད་པར་བསྟན་བཤིག་སློང་གིན་ཁྱེད་ཀྱིས་དྲི་བ་ཆོ་མེད་དེ་འདྲ་སྐུལ་སྐབས་ཁོང་ཁྲོ་ལངས་ཀྱི་འདུག་ཅེས་བཞད་ཤོབ་དང་སྦྲགས་བཀའ་ལན་བསྩལ་འདུག
གསར་འགོད་པས་༧གོང་ས་མཆོག་ལ་དེང་རབས་ཀྱི་འཛམ་གླིང་འདིར་ཆོས་ཀྱི་ཕན་ཐོགས་གང་བསྐྲུན་གྱི་ཡོད་དམ་ ཞེས་བཀའ་འདྲི་ཞུས་པའི་ལན་དུ་ཁོང་གིས། ཆོས་ནི་ང་ཚོའི་བློ་སྦྱོང་མཁན་དང་སེམས་ནང་ཞི་བདེ་བག་ཕེབས་སྐྲུན་མཁན་གྱི་ལག་ཆ་ལྟ་བུ་ཞིག་ཆགས་ཡོད། འཛམ་གླིང་གི་ཆོས་ལུགས་ཆེ་ཁག་ཚང་མས་བྱམས་པ་དང་སྙིང་རྗེ། བཟོད་པ་བཅས་ཀྱི་ཉམས་ལེན་སྐོར་གྱི་བསླབ་བྱ་གསུང་གི་ཡོད། མི་ཁ་ཤས་ཤིག་གིས་ཁོང་ཁྲོ་དང་ཞེ་སྡང་གི་བློ་དེ་དག་བཟང་པོའི་ཕྱོགས་སུ་བརྩི་བཞིན་པ་དེ་ནི་ནོར་བ་མ་ཟད་མིའི་ཞན་ཆ་ཞིག་ཀྱང་ཆགས་ཡོད། ང་ཚོའི་རང་རྒྱུད་ཀྱི་ནུས་སྟོབས་ངོ་མ་དེ་སེམས་ནང་ཞི་བདེ་བག་ཕེབས་དགོས་པ་དེ་ཡིན། འཇིག་རྟེན་བཀོད་པ་པོ་འདོད་མཁན་ཚོར་ལྟ་གྲུབ་དེས་སེམས་ནང་ཞི་བདེ་ཡོང་རྒྱུར་ཕན་ཐོགས་ཡོད། ད་ལྟ་འཛམ་གླིང་ནང་མི་འབོར་ཐེར་འབུམ་བདུན་ཡོད་ཁོངས་ནས་ཐེར་འབུམ་གཅིག་ཙམ་གྱིས་ཆོས་ཁས་ལེན་གྱི་མེད་སྟབས། ང་ཚོས་ཆོས་ཁས་ལེན་མིན་ལ་མ་ལྟོས་པར་ཚང་མས་མི་བཟང་པོ་ཞིག་བྱ་རྒྱུ་དེ་ཐུན་མོང་གི་དམིགས་ཡུལ་ཡིན་པ་མ་ཟད་དེ་ཧ་ཅང་གལ་ཆེན་པོ་ཡིན་པ་དྲན་དགོས། ང་ཚོ་ཚང་མ་སྤྱི་ཚོགས་ལ་རྟེན་པའི་སྲོག་ཆགས་ཤིག་ཡིན་སྟབས། གཅིག་གིས་གཅིག་ལ་བརྩེ་བ་དང་སྙིང་རྗེ་བྱེད་དགོས། ཞེས་གསུངས་འདུག
གསར་འགོད་པས་༧གོང་ས་མཆོག་ལ་ཁྱེད་ཀྱིས་ཆོས་ཁས་ལེན་མཁན་ཡིན་མིན་ལ་མ་ལྟོས་པར་ང་ཚོ་ཚང་མ་འགྲོ་བ་མི་རིགས་གཅིག་མཚུངས་ཡིན་པའི་འདུ་ཤེས་བཟུང་སྟེ། ཚང་མར་བྱམས་དང་བརྩེ་བ་སྤྲོད་དགོས་སྐོར་གསུངས་སོང་། དེ་འདྲ་ཡིན་ན་འགྲོ་བ་མིའི་རིགས་ཀྱི་གུས་བརྩི་མི་ཐོབ་པའི་ཨི་རག་དང་སི་རི་ཡའི་མཉམ་འབྲེལ་དྲག་སྤྱོད་ཤོག་ཁག་ (ISIS) གི་དྲག་སྤྱོད་པ་ཚོར་གང་འདྲ་བྱས་ཏེ་བྱམས་དང་བརྩེ་བ་སྤྲོད་དགོས་སམ། ཞེས་བཀའ་འདྲི་ཞུས་པའི་ལན་དུ་ཁོང་གིས། ད་ལྟ་ང་ཚོས་དཀའ་ངལ་དེ་སེལ་ཐུབ་རྒྱུ་དཀའ་ལས་ཁག་པོ་ཆགས་ཡོད། གང་ཡིན་ཟེར་ན་མི་དེ་དག་ཉོན་མོངས་ཀྱི་འཆིང་རྒྱས་དམ་པོར་བཅིངས་ནས་བསྡད་ཡོད། ཡིན་ཡང་མ་འོངས་པར་ང་ཚོས་ཐུན་མོང་གི་ཉམས་མྱོང་དང་ཚན་རིག་པས་བརྟག་དཔྱད་བྱས་པ་གཞི་ལ་བཞག་སྟེ། མི་རབས་གསར་པ་ཚོར་ཆོས་ལུགས་ལས་བརྒལ་བའི་བཟང་སྤྱོད་དང་། འགྲོ་བ་མིའི་རིགས་ཀྱི་བཟང་སྤྱོད་ཀྱི་སློབ་གསོ་སྤྲད་དེ། ཉོན་མོངས་ཀྱིས་ཀུན་ནས་བསླངས་པའི་བྱ་ངན་དེ་དག་ཟློག་ཐབས་བྱེད་དགོས། ང་ཚོས་དཀའ་ངལ་དེ་དྲག་ཐབས་སྤྱད་དེ་སེལ་ཐབས་བྱས་ན། དཀའ་ངལ་སེལ་རྒྱུ་ཕར་ཞོག་དེ་ལས་འཚེ་བའི་བྱ་སྤྱོད་མང་དུ་འགྲོ་རྒྱུ་ཡིན་སྟབས། གང་ལྟར་ང་ཚོས་མི་དེ་དག་དང་སྐད་ཆ་བཤད་དེ། ཁོ་ཚོར་ཁོང་ཁྲོ་དང་ཉོན་མོངས་ཚོར་ཤུགས་དྲག་པོ་དེ་འདྲ་སྐྱེ་དགོས་དོན་གང་ཡིན་སྐད་ཆ་དྲིས་ནས་དཀའ་ངལ་སེལ་ཐབས་བྱེད་དགོས་པ་རེད། ཅེས་གསུངས་འདུག
གསར་འགོད་པས་༧གོང་ས་མཆོག་གིས་ཨོ་སི་ཀྲོ་ལི་ཡའི་སྲིད་བློན་ཀྲོ་ཌེ་ཨ་བྷོ་ཌི་ (Tony Abbott) མཆོག་ལ་སློབ་སྟོན་གནང་བ་ཡིན་ན། སློབ་སྟོན་ག་རེ་གནང་ས་རེད་ཅེས་ཞུས་པར། ༧གོང་ས་མཆོག་གིས་བཞད་མོ་དང་སྦྲགས་སྲིད་བློན་མཆོག་གི་ཐུགས་ཁྲལ་གནང་ཡུལ་གཙོ་བོ་ནི་དཔལ་འབྱོར་གནས་སྟངས་ཆགས་སྲིད་པ་ཞིག་ཡིན་སྟབས། དེ་ནི་ངོས་ཀྱིས་གང་ཡང་མ་ཤེས་པའི་གནད་དོན་དེ་རེད། ཉེ་ལམ་རྒྱ་གར་ནང་ཚ་བ་ཤུགས་ཆེན་འོག་མི་ ༢༠༠༠ ལྷག་ཤི་ཡོད་པའི་ཡིད་སྐྱོའི་གནས་ཚུལ་ཐོན་ཡོད་སྟབས། ངོས་ཀྱིས་དཔལ་འབྱོར་ཡར་རྒྱས་བཏང་སྟེ་ས་ཕྱོགས་གང་སར་ཡོད་པའི་དབུལ་ཕོངས་ཚོར་རོགས་རམ་གནང་རྒྱུ་དེ་གལ་ཆེན་པོར་བརྩི་བཞིན་ཡོད། འདས་གྲོངས་སོང་མི་དག་ནི་མཐུན་རྐྱེན་གྱི་དབུལ་བའི་ཉམ་ཐག་ཤ་སྟག་ཆགས་ཡོད་སྟབས། ང་ཚོས་ངེས་པར་དུ་ཁོ་ཚོའི་དཀའ་ངལ་སེལ་རྒྱུའི་དཔལ་འབྱོར་སྲིད་བྱུས་གསར་པ་ཞིག་བཟོ་དགོས་ཀྱི་འདུག ཅེས་གསུངས་འདུག
ཁ་སང་ཉིན་རྒྱབ་༧གོང་ས་མཆོག་ཨོ་སི་ཀྲོ་ལི་ཡའི་བྷུ་ལུ་མོན་ཊིན་ (Blue Mountains) ཁུལ་གྱི་གྲོང་བརྡལ་ལེའུ་ར་(Leura) ཞབས་སོར་འཁོད་སྐབས་བོད་མི་ ༡༥༠ ལྷག་གི་ལག་ཏུ་མཇལ་དར་ཐོགས་ནས་ཕེབས་བསུ་ཞུས་ཡོད་པ་དང་། ཟླ་འདིའི་ཚེས་ ༥ ནས་ ༩ ཉིན་བར་༧གོང་ས་མཆོག་གིས་དེ་ཁུལ་མང་ཚོགས་ཚོར་དཔལ་གསང་བ་འདུས་པའི་བཀའ་ཆོས་དང་འཇིགས་བྱེད་ཀྱི་བཀའ་དབང་སྩལ་རྒྱུ་ཡིན་འདུག
གསར་འགོད་པ། དོན་གྲུབ།
