ཁ་སང་རེས་གཟའ་ལྷག་པའི་༸སྐུའི་བླ་གཟའ་དང་ལྷག་དཀར་དང་བསྟུན་ཏེ། ལ་དྭགས་བསོད་ནམས་གླིང་གཞིས་ཆགས་སུ་ལྡི་ལིའི་མཐོ་སློབ་ཁག་ཏུ་སློབ་གཉེར་གནང་བཞིན་པའི་ལ་དྭགས་བོད་ཁྱིམ་གྱི་སློབ་ཟུར་སྐོར་ཞིག་གིས་སྣེ་ཁྲིད་དེ། གཞིས་ཆགས་ཀྱི་ཁོར་ཡུག་དང་། ཉེ་འཁོར་གྱི་ཁྲོམ་གཞུང་ཁག་གཙང་བཟོ་བྱེད་པའི་སྒོ་ནས་༸སྐུའི་གྱ་སྟོན་སྲུང་གཙི་བྱས་དང་བྱེད་བཞིན་ཡོད་འདུག
ས་གནས་ནས་འགྱུར་མེད་ཚེ་རིང་ལགས་ཀྱིས་གནས་ཚུལ་བཏང་འབྱོར་ལྟར་ན། ཁ་སང་༸སྐུའི་གྱ་སྟོན་སྲུང་གཙི་དང་འབྲེལ་བའི་ལས་འགུལ་གྱི་ཐོག་མར། སློབ་གཉེར་བ་ཚོས་ཞོགས་པ་ཆུ་ཚོད་ ༩།༠༠ ཐོག་ལྷུན་གྲུབ་ཆོས་སྡིངས་དགོན་དུ་འདུ་འཛོམས་བྱས་ཏེ་གཞུང་བསྟན་སྲུང་མ་དང་། དཀར་ཕྱོགས་སྐྱོང་བའི་སྲུང་མ་རྣམས་ལ་འཕྲིན་བཅོལ་བསང་གསོལ་གནང་རྗེས། གཞིས་ཆགས་ཀྱི་ཁོར་ཡུག་དང་། ཁྲོམ་གཞུང་ཁག་ཅིག་ལ་གཙང་བཟོ་བྱེད་པའི་ཉིན་ ༤ རིང་གི་ལས་འགུལ་མགོ་འཛུགས་གནང་ཡོད་འདུག
དེའི་ཐད་ལས་འགུལ་ནང་མཉམ་ཞུགས་གནང་མཁན་སློབ་གཉེར་བ་བཀྲ་ཤིས་དོན་གྲུབ་ཀྱིས་གསུངས་དོན། ད་ལྟ་སྤེལ་དང་སྤེལ་བཞིན་པའི་ཁོར་ཡུག་གཙང་བཟོའི་ལས་འགུལ་དེ་ནི། འདི་ལོ་རང་ཅག་བོད་མིའི་འདུ་ཕྱིའི་སྐྱབས་མགོན་༸གོང་ས་རྒྱལ་བ་རིན་པོ་ཆེ་མཆོག་ཕྱི་ལུགས་ལྟར་དགུང་གྲངས་ ༨༠ ཕེབས་པའི་༸སྐུའི་གྱ་སྟོན་རྣམ་པ་མི་འདྲ་ཞིག་གི་ལམ་ནས་སྲུང་གཙི་བྱེད་ཁུལ་ཡིན། ༸གོང་ས་མཆོག་གིས་རྒྱུན་དུ་ཁོར་ཡུག་ནི་འགྲོ་བ་མི་ཙམ་མ་ཟད། འཇིག་རྟེན་གྱི་སྐྱེ་འགྲོ་ཡོངས་ཀྱི་བདེ་ཐང་ལ་འབྲེལ་བ་ཡོད་པ་ཙམ་དུ་མ་ཟད། ཁོར་ཡུག་གཏོར་སྐྱོན་གཏོང་བ་ནི། རང་ཉིད་ཀྱི་ཚེ་སྲོག་ལ་གཏོར་སྐྱོན་བྱེད་པ་དང་གཅིག་མཚུངས་ཡིན་པས། རྟག་ཏུ་ཁོར་ཡུག་ལ་བག་མེད་གཏོར་སྐྱོན་བྱེད་མི་ཆོག་པ་སོགས་ཀྱི་བཀའ་སློབ་ལམ་སྟོན་ཕེབས་པ་དེ་ཉིད་གཙོ་བོར་བཟུང་ནས་༸རྒྱལ་བ་དགྱེས་པའི་ལས་འགུལ་གྱི་ཆ་ཤས་སུ་སྤེལ་བ་ཞིག་ཡིན། ཞེས་སོགས་ངོ་སྤྲོད་གནང་འདུག
ཁོར་ཡུག་གཙང་བཟོ་དང་འབྲེལ་བའི་དང་བླང་སློབ་ཕྲུག་གི་ལས་འགུལ་དེ་ནི། ཁ་སང་ཉིན་དང་པོར་གཞིས་ཆགས་ལས་ཁུངས་ཀྱི་གཡས་གཡོན་དང་། བརྒྱ་ཤོག་གསུམ་པ་དང་། རུ་ཐོག་ཆོས་སྡིངས་དགོན་གྱི་མཐའ་འཁོར། དེ་བཞིན་ཉེ་འཁྲིས་ཁྲོམ་གཞུང་དང་གཞུང་ལམ་བཅས་ལ་གནང་རྗེས། དེ་རིང་ཉིན་གཉིས་པར་ལྕོག་ལམ་བརྒྱ་ཤོག་བཞི་པ་དང་། ལྔ་པ། དེ་བཞིན་བཅུ་པ་དང་། བཅུ་གཉིས་བཅས་ལ་མུ་མཐུད་གནང་རྒྱུ་དང་། སང་ཉིན་ཉིན་གསུམ་པར་སླེ་གྲོང་ཁྱེར་ནས་སྤྱི་ལེ་ ༧ ཙམ་གྱི་ལྷོ་ཕྱོགས་སུ་ཆགས་པའི་ཨ་གླིང་གཞིས་ཆགས་ཀྱི་བརྒྱ་ཤོག་བཞིའི་ཁོར་ཡུག་ཡོངས་རྫོགས་དང་། སླེ་ཁྲོམ་གཞུང་བཅས་ལ་གཙང་བཟོ་བྱས་རྗེས། ཉིན་མཐའ་མར་བསོད་ནམས་གླིང་གཞིས་ཆགས་ཀྱི་བརྒྱ་ཤོག་དང་པོ་དང་གཉིས་པ། དེ་བཞིན་ཟམ་པའི་གཡས་གཡོན་ལ་ཡོད་པའི་ཁྲོམ་གཞུང་དང་། ༸རྒྱལ་བའི་ཕོ་བྲང་དགེ་འཕེལ་གླིང་སོགས་སུ་ཁོར་ཡུག་གཙང་བཟོ་བྱས་རྗེས། དེ་རིང་གི་ཉིན་གྲངས་བཞིའི་རིང་གི་༸སྐུའི་གྱ་སྟོན་སྲུང་གཙི་དང་འབྲེལ་བའི་ལས་འགུལ་མཇུག་བསྡོམས་གནང་རྒྱུ་ཡིན་འདུག
![Changpa nomads walk on a rugged path in Ladakh's Chushul valley [Tarushi Aswani/Al Jazeera]](https://tibettimes.net/wp-content/uploads/2026/10/Screen-Shot-2026-10-16-at-2.29.07-PM-360x180.png)
ཤིན་ཏུ་ལེགས། བསྔགས་བརྗོད་ཀྱི་མེ་ཏོག་རྒྱང་ནས་གཏོར་བཞིན་ཡོད།
སྔ་མོ་ཡིན་ན་བརྒྱ་སྟོན་སྐབས་འགྲོ་ལམ་མེད་སར་ལམ་ཁ་གསར་བཟོས་དང་། ལམ་བདེ་མོ་མེད་པ་རྣམས་བདེ་པོ་བཟོས་པ། ལྷ་ཁང་དང་མཆོད་རྟེན་སོགས་ལ་དབུ་དཀར་གསོས་པ་སོགས་ཀྱི་སྤྱི་ཚོགས་རང་བཞིན་གྱི་ལམ་ལུགས་བཟང་པོ་དེ་འདྲ་ཡོད་པ་རེད།
དེང་སྐབས་དེ་འདྲ་མི་དགོས་ཀྱང་གད་སྙིགས་ཀྱི་དཀའ་ངལ་ནི་གང་སར་ཆེས་ཛ་དྲག་ཆེ་བའི་གནད་དོན་སོང་། དེ་རིང་གི་གཙང་བཟོའི་བརྒྱ་སྟོན་ལས་འགུལ་དེ་ཧ་ཅང་ལགས་བསྟར་རང་བཞིན་ཞིག་བྱུང་འདུག་པས་དགའ་ཡོད།