རྒྱ་རིགས་ཤིག་གིས་གངས་སྐྱིད་ནས་བོད་དོན་གཏམ་བཤད་བྱས།

དེ་རིང་རྒྱ་རིགས་དམངས་གཙོ་དོན་གཉེར་བ་ཡཱང་ཅན་ལི་ལགས་ཀྱིས་གངས་སྐྱིད་ཁུལ་གྱི་གཞུང་ཞབས་ལས་བྱེད་སྐོར་ཞིག་ལ་བོད་རྒྱའི་གནད་དོན་སྐོར་ལ་བགྲོ་གླེང་གཏམ་བཤད་གནང་སྐབས། རྒྱ་ནག་ཁོ་རང་ཚོའི་རྒྱབ་ཕྱོགས་ན་ལྐོག་ཇུས་ཡོད་སྟབས་ལྐོག་ཇུས་མེད་པའི་མི་ཞིག་དང་འབྲེལ་བ་བྱ་རྒྱུ་ཁག་པོ་ཡིན་ཟེར།

དེ་རིང་ཞོགས་པ་ཆུ་ཚོད་ ༩།༣༠ སྟེང་རྒྱལ་སྤྱིའི་བོད་རྒྱ་སྨྱུག་ཚོགས་ཀྱིས་གཙོ་གཉེར་དང་བོད་ཀྱི་སྲིད་བྱུས་ཉམས་ཞིབ་ཁང་གིས་མཐུན་འགྱུར་གནང་སྟེ། གངས་སྐྱིད་གཉའ་ཁྲི་ཚོགས་ཁང་དུ་༼རྒྱ་སྐད་ཐོག་རྒྱ་རིགས་འབུམ་རམས་པ་ཡང་ཅན་ལི་དང་ལྷན་དུ་བོད་དོན་གླེང་བ།༽ཞེས་པའི་བགྲོ་གླེང་ཞིག་ཚོགས་ཡོད་པ་དང་། བགྲོ་གླེང་ཐོག་བཀའ་ཤག་གི་ངེས་སྟོན་པ་ཚེ་རིང་དབང་ཕྱུག་ལགས་དང་། བོད་མི་མང་སྤྱི་འཐུས་རྒྱུན་ལས་འབའ་བ་སྐལ་བཟང་རྒྱལ་མཚན་ལགས་དང་གངས་ལྷ་མོ་ལགས། སྤྱི་འཐུས་ཤར་གླིང་ཟླ་སྒྲོན་ལགས།  དེ་བཞིན་ཕྱི་དྲིལ་རྒྱ་ཡིག་སྡེ་ཚན་གྱི་འགན་འཛིན་བསོད་ནམས་རྡོ་རྗེ་ལགས། གཞན་ཡང་།  བོད་ཀྱི་སྲིད་བྱུས་ཉམས་ཞིབ་ཁང་དང་། དྷ་སའི་འབྲེལ་བ་ལས་ཁུངས་བཅས་ཀྱི་ལས་བྱེད་སོགས་མི་གྲངས་ ༡༨ འཛོམས་འདུག

བགྲོ་གླེང་གི་ཐོག་མར་སྐུ་མགྲོན་རྒྱ་རིགས་དམངས་གཙོ་དོན་གཉེར་བ་དང་ཆབ་སྲིད་དཔྱད་ཞིབ་པ་ཡཱང་ཅན་ལི་ལགས་ཀྱིས་གཏམ་བཤད་གནང་དོན། ངས་དེ་རིང་འདི་ནས་ལོ་ ༢༠ ལྷག་ལ་བོད་རིགས་སྤུན་ཟླ་དང་མཉམ་དུ་འགྲོ་བ་མིའི་ཐོབ་ཐང་ཆེད་ལས་ཀ་བྱེད་པ་དང་དམིགས་བསལ་གྱིས་ངས་བོད་ཀྱི་རང་དབང་ལས་འགུལ་སྤེལ་བའི་ཁྲོད། ཐོག་མར་ངས་མི་རིགས་གཞོན་སྐྱེས་མགོ་ཁྲིད་ཚོགས་པ་ (族群青年领袖研习营) བཙུགས་ནས་ལས་ཀ་བྱེད་སྐབས་ང་ལ་ཆབ་སྲིད་ཀྱི་དམིགས་ཡུལ་ཡོད། ཐོག་མར་ང་རྒྱ་ནག་མཐུན་སྒྲིལ་ཚོགས་པའི་རྩ་དོན་ (中华联邦宪法草案) ཡི་ལས་ཀ་བྱེད་པའི་མི་ཞིག་ཡིན་པ་དང་། ང་ཚོས་བོད་མི་རིགས་ལ་རྒྱབ་སྐྱོར་བྱེད་མཁན་ཚང་མར་སོ་སོའི་རྒྱབ་སྐྱོར་བྱེད་ སྟངས་འདྲ་མིན་ཡིན་ཡོད། ངས་ཐོག་མར་ཁྱེད་རང་ཚོར་བསམ་བློ་འཁོར་ཡོད་པ་དེ་རྗེས་སུ་ངེས་པར་དུ་མཚམས་འཇོག་དགོས་བྱུང་སོང་། ངས་བོད་མི་མང་པོར་འབྲེལ་བ་བྱས་ནས་ཁོ་ཚོའི་མི་ཚེ་ལོ་རྒྱུས་ལ་ཉན། བོད་ཀྱི་གནས་བབས་དང་ཆོས། རིགས་གཞུང་སོགས་རྒྱུས་ལོན་བྱས་ཏེ་ཤེས་རྟོགས་བྱུང་རྗེས་ང་རྒྱ་མི་ཞིག་ཡིན་པའི་ཆ་ནས་ང་ལ་ཁྱེད་རང་ཚོའི་མ་འོངས་འཆར་འགོད་བྱེད་པའི་དབང་ཆ་མི་འདུག་ལ་བདེ་སྐྱིད་ག་རེ་བྱས་ནས་བསྐྲུན་པའི་དབང་ཆ་ཡང་མི་འདུག དེ་འདྲའི་གནད་དོན་ཚབས་ཆེན་ཞིག་ལ་འཕྲད་ཡོད་སྟབས། དེ་རིང་ངས་འདི་ནས་བཤད་རྒྱུར་སྤྱིར་བཏང་ངས་བོད་ཀྱི་རང་དབང་འཐབ་རྩོད་ལ་རྒྱབ་སྐྱོར་བྱེད་ནས་ལོ་ ༢༠ ལྷག་འགོར་ཡོད་པ་དང་། བོད་པའི་སྤུན་མཆེད་ཚོས་གྲོགས་པོ་བཟང་པོ་ཞིག་ཡིན་ཟེར་ཆོག་ཀྱང་། ངའི་ལངས་ཕྱོགས་དེ་ཁྱེད་རང་ཚོའི་རང་དབང་གི་དབང་ཆར་རྒྱབ་སྐྱོར་བྱེད་པ་ལས་དཔེར་ན་རང་བཙན་དགོས་པ་དང་མི་དགོས་པའི་འདེམས་ཀ་སོགས་མིན་པར་ཁྱེད་རང་ཚོའི་མ་འོངས་པའི་འཐབ་རྩོད་ཐབས་ལམ་འདེམས་ཕྱོགས་གླེང་གི་མིན། ངས་རྒྱབ་སྐྱོར་བྱེད་པ་དེ་ད་ལྟ་ཁྱེད་རང་ཚོར་དབང་ཆ་མེད་པ་བཞིན་ང་ལའང་དབང་ཆ་མེད་སྟབས། ཁྱེད་ཚོ་ལ་མ་འོངས་པའི་ཆབ་སྲིད་མདུན་ལམ་འདེམས་ཕྱོགས་ཀྱི་དབང་ཆ་མི་འདུག ངས་ཁྱེད་རང་ཚོའི་མ་འོངས་བའི་དབང་ཆ་འདེམས་ཕྱོགས་དེར་རྒྱབ་སྐྱོར་བྱེད་བཞིན་ཡོད། དཔེར་ན། ཁྱེད་རང་ཚོས་རང་བཙན་འདེམས་རྒྱུ་དང་ཆེས་མཐོའི་རང་སྲིད་རང་སྐྱོང་འདེམས་རྒྱུ། དེ་བཞིན་གུང་ཁྲན་ཏང་གིས་ལག་བསྟར་བྱེད་བཞིན་པ་སོགས་འདེམས་མིན་ནི་ཁྱེད་རང་ཚོའི་རང་དབང་རེད། ངས་གླེང་སློང་བྱེད་བཞིན་པའི་བོད་དོན་དང་ལངས་ཕྱོགས། བྱ་བ་ཡོད་ཚད་ཁྱེད་རང་ཚོའི་དབང་ཆར་རྒྱབ་སྐྱོར་བྱེད་པ་ཡིན་པ་ལས། ངས་ཁྱེད་རང་ཚོའི་འོས་ཤོག་བླུགས་ནས་ཐོབ་པའི་དབུ་མའི་ལམ་ལ་རྒྱབ་སྐྱོར་བྱས་པ་མ་རེད། ངའི་བསམ་བློའི་ནང་གི་བརྒྱུད་རིམ་འདི་ནི་ཧ་ཅང་གལ་ཆེན་ཞིག་ཡིན། གང་ཡིན་ཞེ་ན། བོད་དོན་རྒྱབ་སྐྱོར་བ་མང་པོ་ཞིག་ད་དུང་ལམ་ཁ་འདི་ལ་འགྲོ་ཐུབ་ཀྱི་མི་འདུག ང་རྒྱ་མི་ཞིག་ཡིན་པའི་ཆ་ནས་ཁྱེད་རང་ཚོར་བདེ་སྐྱིད་བསྐྲུན་ཐུབ་མིན་གླེང་མི་ཐུབ། བདེ་སྐྱིད་ཡོད་མེད་ཁྱེད་རང་ཚོས་གླེང་དགོས་པ་ཞིག་ལས་ཁྱེད་ཚོའི་ཚབ་བྱེད་པའི་དབང་ཆ་ང་ལ་མེད། ཁྱེད་ཚོའི་དབང་ཆར་རྒྱབ་སྐྱོར་བྱེད་པ་དང་མ་འོངས་ཆབ་སྲིད་ཀྱི་མདུན་ལམ་འདེམ་ཕྱོགས་ལ་རྒྱབ་སྐྱོར་བྱེད་བཞིན་ཡོད།

བོད་པ་དང་རྒྱ་མི་མང་པོ་ཞིག་གིས་རྒྱ་ནག་ལ་དམངས་གཙོའི་ལམ་ལུགས་མེད་པ་ཡིན་ན་བོད་དོན་ཐག་གཅོད་བྱ་མི་ཐུབ་བཅས་གླེང་གི་ཡོད་པ་དེ་བོད་ཀྱི་གནད་དོན་དེ་གུང་ཁྲན་ཏང་དང་མཉམ་གཅིག་འཐབ་འཁྲུག་རྒྱག་གི་འདུག ཚང་མས་དེ་ཐེངས་མང་གོ་ཐོས་ཡོང་དུས་མི་ཚོས་དེ་བདེན་པར་འདོད་དེ་རྒྱ་ནག་ཡོངས་དམངས་གཙོར་མ་བསྒྱུར་བ་ཡིན་ན་བོད་དོན་ཐག་གཅོད་ཧ་ཅང་ཁག་པོར་སྣང་ཡང་། ངས་བཤད་ན་འདོད་པ་ནི་དེ་ནི་གནད་དོན་གྱི་གྲུབ་ཆ་ཡོངས་རྫོགས་མ་རེད། རྒྱ་ནག་དམངས་གཙོའི་ལམ་ལུགས་ནི་བོད་དོན་ཐག་གཅོད་བྱེད་དགོས་པའི་ཆ་རྐྱེན་གཙོ་གྲས་ཤིག་ཡིན་ཡང་དེ་ཆ་རྐྱེན་ཡང་དག་པ་ཞིག་མ་རེད། རྒྱ་ནག་ལ་དམངས་གཙོ་མེད་པ་དང་རང་དབང་མེད་པའི་སྐབས་ལ་བོད་དོན་དེ་དངོས་གནས་གླེང་མོལ་བྱ་རྒྱུ་དང་ཐག་གཅོད་བྱ་རྒྱུ་ཕལ་ཆེར་མི་སྲིད་ཀྱང་། གལ་སྲིད་རྒྱ་ནག་ལ་དམངས་གཙོ་ཐོབ་པ་ཡིན་ན་བོད་དོན་རང་བཞིན་གྱིས་ཐག་གཅོད་བྱེད་པ་ཞིག་ཀྱང་རྩ་བ་ནས་མ་རེད་འདི་དེ་རིང་ངས་བཤད་ན་འདོད་སོང་། དམིགས་བསལ་རྒྱ་ནག་གི་དམངས་གཙོ་དོན་གཉེར་བ་ཞིག་དང་རྒྱ་མི་ཞིག་ཡིན་སྟབས་ངེས་པར་དུ་བཤད་དགོས་པ་ཞིག་ཡིན་སྟབས། འདི་དེ་རིང་ངས་བཤད་དགོས་པའི་གནད་དོན་གཙོ་བོ་ཞིག་ཡིན།  གང་ཡིན་ཞེ་ན། ང་རྒྱ་ནག་གི་འཚོ་བའི་ཁྲོད་ཀྱི་མི་ཞིག་ཡིན་པའི་ཆ་ནས་ངས་རྒྱ་ནག་གི་བསམ་བློ་ག་རེ་ཡིན་པ་ཤེས་ཀྱིན་རེད། གལ་སྲིད་ཁྱེད་ལ་དམངས་གཙོ་ཡོད་ན་བོད་དོན་ཐག་གཅོད་བྱེད་རྒྱུ་དེ་འདྲའི་ལས་སླ་བོ་ཞིག་རྩ་བ་ནས་མ་རེད། དེ་བཞིན་ད་ལྟ་རྒྱ་ནག་ལ་དམངས་གཙོ་ཐོབ་མེད་པའི་སྔོན་དུ་ཁྱེད་ཚོས་རྒྱ་ནག་ལ་འབྲེལ་བ་རྒྱ་ཆེ་རུ་གཏོང་དགོས། རྒྱ་ནག་མི་མང་ལ་བོད་ཀྱི་ལོ་རྒྱུས་དང་རིག་གཞུང་། དངོས་ཡོད་གནས་ཚུལ་དང་གནས་བབས་སོགས་རྒྱུས་ལོན་བྱེད་འཇུག་དགོས། བོད་དོན་ལ་ཤེས་རྟོགས་མང་ན་མ་འོངས་པ་རྒྱ་ནག་དམངས་གཙོ་ཆགས་པ་ཡིན་ན་གོ་སྐབས་མང་པོ་ཡོད་པ་དང་། གལ་སྲིད་དེ་འདྲའི་འབྲེལ་བ་བྱུང་མ་ཐུབ་ན་མ་འོངས་པར་བོད་དོན་དེ་ལས་དཀལ་ངལ་ཆེ་རུ་འགྲོ་རྒྱུ་ཡིན་སྟབས། བོད་པ་ཚོས་ངེས་པར་དུ་རྒྱ་མི་རིགས་དང་འབྲེལ་བ་བྱ་རྒྱུ་མིག་རྒྱང་རིང་པོ་དང་རྣམ་དཔྱོད་ལྡན་པ་ཞིག་རེད་ཅེས་བརྗོད་སོང་།

དབུ་མའི་ལམ་ནི་ཚང་མས་གླེང་སློང་བྱུང་པ་ཞིག་དང་༧སྐྱབས་མགོན་ཏཱ་ལའི་བླ་མས་ ༡༩༧༤ ནས་གླེང་སློང་བྱུང་པ་དང་རིམ་གྱིས་རྒྱལ་སྤྱིའི་སྤྱི་ཚོགས་སྟེང་གླེང་སློང་ཤུགས་ཆེན་བྱུང་རྗེས་འདི་ནི་ཡོངས་སུ་དག་པའི་ལམ་ཁ་ཞིག་ཏུ་གླེང་བ་རེད། ང་རང་གི་ཉམས་མྱོང་དང་བརྒྱུད་ན་༧ཏཱ་ལའི་བླ་མ་ལྷག་བསམ་རྣམ་དག་དང་རྒྱབ་ལོག་ན་ངན་ཇུས་ཅི་ཡང་མེད་སྟབས། ངས་རྒྱ་ནག་གི་སློབ་གཉེར་བ་ཚོར་ཐེངས་མང་༧སྐྱབས་མགོན་ཏཱ་ལའི་བླ་མ་ནི་ཡང་དག་པ་ཡིན་པ་བཤད་མྱོང་ཡོད། དེའི་རྗེས་སུ་བརྡ་ལེན་དེ་དག་རྒྱ་ནག་གི་མགོ་ཁྲིད་ཚོར་སྤྲད་ཡོད་ས་རེད། ངས་ཁོ་ཚོར་ང་རང་སྒེར་གྱིས་འབྲེལ་བ་བྱས་པའི་ཉམས་མྱོང་ཞིག་དེ་ ༧སྐྱབས་མགོན་ཏཱ་ལའི་བླ་མ་ལྷག་བསམ་རྣམ་དག་ཡིན་པ་དང་། དབུ་མའི་ལམ་ནི་རང་བཙན་གྱི་ལྐོག་ཇུས་ཡིན་པར་འདོད་པ་སོགས་ནོར་ཁྲལ་ཡིན་པར་བརྗོད་མྱོང་། འོན་ཀྱང་། རྒྱ་ནག་སྲིད་གཞུང་གིས་ཏཱ་ལའི་བླ་མ་དང་འབྲེལ་བ་བྱ་རྒྱུ་ཁག་པོ་ཆགས་ཡོད། གང་ཡིན་ཞེ་ན། རྒྱ་ནག་ཁོ་རང་ཚོའི་རྒྱབ་ཕྱོགས་ན་ལྐོག་ཇུས་ཡོད་སྟབས་ལྐོག་ཇུས་མེད་པའི་མི་ཞིག་དང་འབྲེལ་བ་བྱ་རྒྱུ་ཁག་པོ་ཡིན། དབུ་མའི་ལམ་ལ་ཁྱེད་རང་ཚོས་ངེས་པར་དུ་རྒྱབ་སྐྱོར་བྱེད་དགོས་ཀྱི་ཡོད་ཅེས་ལབ་ཀྱིན་མེད། གོང་ནས་ངས་ཁྱེད་རང་ཚོའི་འདེམས་ཀའི་དབང་ཆ་ང་ལ་མེད་ཅེས་ལབ་པ་དང་། ངས་ཁྱེད་རང་ཚོའི་དབང་ཆར་རྒྱབ་སྐྱོར་བྱེད་ཀྱིན་ཡོད། འོན་ཀྱང་། དབུ་མའི་ལམ་ནང་ལ་ཤེས་རབ་ཤིག་ཡོད་པ་དེ་ནི་༧སྐྱབས་མགོན་ཏཱ་ལའི་བླ་མས་རྒྱ་ནག་གི་ཁྱད་ཆོས་ཧ་ཅང་གསལ་བོ་ཧ་གོ་ཡོད་པ་དང་། རྒྱ་ནག་ཆེན་མོའི་བསམ་བློ་དེ་ཤ་གསེང་རུས་གསེང་དུ་འཐུམས་ཡོད་པ་དེ་ཁོང་གིས་ཤེས་ཡོད་པ་དང་། དེ་གཏོར་བཤིག་གཏོང་རྒྱུ་ཧ་ཅང་ཁག་པོ་ཡོད་པའང་ཤེས་རྟོགས་བྱུང་འདུག རྒྱ་ནག་དུང་ཕྱུར་ ༡༠ ལྷག་གིས་རྒྱུ་མཚན་ལ་མ་ལྟོས་པར་ངོས་ལེན་མ་བྱས་ན། གནད་དོན་འདི་ཐག་གཅོད་བྱེད་རྒྱུ་ཧ་ཅང་ཁག་པོ་ཡིན། ཞེས་སོགས་བརྗོད་སོང་།

ད་ལོ་རྒྱབ་ཤ་དཀར་པོ་དེབ་ནང་ལ་གནའ་བོའི་དུས་ནས་བོད་ནི་རྒྱ་ནག་གི་ཆ་ཤས་ཡིན་པ་མང་པོ་བྲིས་ཡོད། ཚང་མ་ཤེས་གསལ་ལྟར་ ༢༠༠༠ ལོའི་རྒྱབ་ཤ་དཀར་བོ་དེབ་ནང་ལ་དུས་རབས་ ༡༣ བའི་སྐབས་ནས་བོད་རྒྱ་ནག་གི་ཆ་ཤས་སུ་གྱུར་ཡོད་ཚུལ་ལབ་ཡོད་པ་དང་། ༡༩༥༩ ལོའི་ཟླ་ ༥ ཚེས་ ༢༣ ཉིན་ང་ཕོད་ངག་དབང་འཇིགས་མེད་ལ་བཙན་གྱིས་ཞི་བའི་དོན་ཚན་ ༡༧ གྱི་འཆང་ཡིག་བཞག་པའི་དོན་ཚན་དང་པོའི་ནང་བོད་རིགས་མི་མང་ཕྱིར་ཀྲུང་ཧྭ་མི་མང་གི་ཁྱིམ་གཞི་ཆེན་པོ་ནང་ལོགས་ཡོད། སྐབས་དེར་བེད་སྤྱོད་བྱེད་པའི་ཚིག་ནི་ “ཕྱིར་ལོག”་པ་ཞེས་བེད་སྤྱོད་བཏང་ཡོད། ཚིག་དེའི་ཐོག་ནས་བོད་ནི་དེའི་སྔོན་དུ་ཁྱིམ་ཚང་ཆེན་མོའི་ཕྱི་ལོགས་སུ་ཡོད་པ་བསྟན་ཡོད་ལ། རྒྱ་ནག་གཞུང་གི་ཡིག་ཆའི་ནང་དུ་ཁོ་རང་ཚོས་རྫུན་བཤད་བཞིན་ཡོད་པ་ཁྱེད་ཀྱིས་ལབ་དགོས་མེད་སྟབས། ང་ཚོས་ངེས་པར་དུ་བཏོན་དགོས་ཡོད། མི་མང་པོ་ཞིག་གིས་ལོ་རྒྱུས་ཀྱི་གནད་དོན་གླེང་དགོས་དོན་མེད་སྐོར་བརྗོད་བཞིན་ཡོད་ཀྱང་། ངས་བསམ་ན་ལོ་རྒྱུས་ངེས་པར་དུ་བདག་པོ་བརྒྱབ་ནས་གླེང་དགོས་པ་དང་། ལོ་རྒྱུས་ནི་དངོས་ཡོད་གནས་ཚུལ་གྱི་རྨང་གཞི་ཡིན་སྟབས། བོད་པའི་སྤུན་ཟླ་ཚོས་རྒྱ་ཡིག་ཐོག་འཐུས་སྒོ་ཚང་བའི་ལོ་རྒྱུས་ཀྱི་དེབ་ཅིག་འདོན་དགོས་རྒྱུ་ཧ་ཅང་གལ་ཆེ། དང་པོ་ནས་ཆབ་སྲིད་དྲི་བསྒྲགས་ལྟ་བུའི་དེབ་དང་ཀླད་པ་འཁྲུད་པའི་དེབ་ཅིག་མིན་པར། ཧ་ཅང་ཚད་ལྡན་ཡིན་པའི་དེབ་ཅིག་ངེས་པར་དུ་འདོན་དགོས། གལ་སྲིད་དེ་ལྟ་བུ་ཞིག་མེད་དེ་བོད་ཀྱི་ལོ་རྒྱུས་གླེང་སློང་མ་བྱུང་ན་མི་མང་པོ་ཞིག་མགོ་འཐོམ་ཡོད་པ་དང་མུ་མཐུད་དུ་འཐོམ་རྒྱུ་རེད། རྒྱ་ནག་གཞུང་གིས་ཁེ་ཕན་འདི་དག་བདེ་སྤྱོད་གཏོང་ནས་མུ་མཐུད་དུ་རྒྱ་མི་རིགས་ཀྱི་ཀླད་པ་འཁྲུད་བཞིན་ཡོད་པ་མ་ཟད། ཀླད་པ་འཁྲུད་བ་དེའང་ཚད་ངེས་ཅན་ཞིག་ལ་ཐོན་ འདུག

དེབ་ནང་གི་ “གནའ་ནས་བཟུང་”ཟེར་བ་དེ་ག་རེ་ཞིག་ལ་གནའ་ནས་བཟུང་ལབ་དགོས་ཡོད་པ་རེད། ང་ཚོས་རྒྱབ་ཤ་དཀར་བོ་ཚོར་བསྡུར་ན་རྒྱ་ནག་གི་རྫུན་བཤད་པ་དེ་ཧ་གོ་ཡོང་གི་རེད། དེ་ང་ཚོས་ངེས་པར་དུ་ཕྱི་འདོན་བྱ་དགོས་པ་དང་། གལ་སྲིད་ང་ཚོས་ལོ་རྒྱུས་མ་གླེང་བ་ཡིན་ན་དྲང་བདེན་ཡང་གླེང་ཐུབ་ཀྱི་མེད། བོད་ཀྱི་གྲོགས་པོ་ཁག་ཅིག་གིས་ད་ལྟ་ལོ་རྒྱུས་ལ་མི་ལྟ་བར་མདུན་ལ་ལྟོས་ཞེས་བརྗོད་ཡོད། མདུན་ལ་བལྟས་ན་འགྲིག་ཡོད་ཀྱང་ལོ་རྒྱུས་ཀྱི་གནས་བབས་དེ་ངེས་པར་དུ་ཧ་གོ་དགོས་པ་ཞིག་རེད། ད་ལོའི་རྒྱབ་ཤ་དཀར་པོའི་དེབ་ནང་ལ་དོ་སྣང་བྱ་དགོས་པ་གཞན་ཞིག་ཡོད་པ་དེ། “བོད་ཀྱི་་་” “བོད་ཀྱི་་་་” “བོད་ཀྱི་མི་རིགས་གཞན་” ཞེས་པ་དང་ “བོད་ཀྱི་” ཟེར་བ་དེ་བོད་ལྗོངས་རང་ལས་གཞན་གྱི་བོད་པ་ཚོར་ལབ་ཀྱིན་མེད་པ་དེར་ “བོད་ཀྱི་” གཞན་མི་རིགས་ཞེས་བརྗོད་པ་འདི་སྔོན་ཆད་བེད་སྤྱོད་བཏང་རྒྱུ་ཉུང་ཉུང་ཡིན་པ་དང་ངའི་བག་ཆགས་ལ་ཕལ་ཆེར་མི་འདུག ངས་བལྟས་ན་འདི་ནི་རྒྱ་རིགས་གཙོས་བོའི་མི་རིགས་གཞན་གྱི་བར་ལ་རྙོག་དྲ་བཟོ་བཞིན་ཡོད་པ་དེ་རེད། ཅེས་སོགས་བརྗོད་སོང་།

དེའི་རྗེས་དྲི་བ་དྲིས་ལེན་སྐབས་སུ། དབུ་མའི་ལམ་གྱི་ཐོག་དགོངས་ཚུལ་ཅི་ཡོད་དྲིས་པར་ཁོང་གིས། དབུ་མའི་ལམ་ལ་དངོས་གནས་བྱས་ན་རྒྱལ་སྤྱིའི་ཐོག་ནས་བསྔགས་བརྗོད་ཧ་ཅང་མང་པོ་ཐོབ་ཡོད་ལ། ཤེས་རྟོགས་ཐུབ་པ་ཞིག་ཀྱང་རེད། དཔེར་ན། ཨ་རིའི་སྲིད་འཛིན་གྱིས་རང་བཙན་དགོས་ལབ་པ་ཡིན་ན། ཕྱི་འབྲེལ་ཐོག་སྟབས་བདེ་མེད་པས་དབུ་མའི་ལམ་གྱིས་ཁོ་ལ་ཆེ་མཐོང་ཞིག་བསྐྲུན་ཡོད་པ་དང་། དེ་བཞིན་ཏཱ་ལའི་བླ་མ་མཆོག་གིས་མི་མང་ལ་སྟབས་བདེ་གནང་ཡོད་པ་རེད། ང་ཚོ་ལྟ་བུ་ཕྱི་སྡོད་རྒྱ་རིགས་གྲགས་ཆེན་དང་། ཡང་ན་དཀྱུས་མ་ཚོས་ཀྱང་དབུ་མའི་ལམ་ལ་ཚད་མཐོའི་ངོས་འཛིན་བྱེད་ཀྱི་ཡོད། ༧གོང་ས་མཆོག་གིས་བཏོན་གནང་བའི་དབུ་མའི་ལམ་ནི་ལྷག་བསམ་རྣམ་དག་ཅིག་ཡིན་པ་ལས་དེ་ལ་མགོ་སྐོར་གྱི་རང་བཞིན་གང་ཡང་མེད་ཀྱང་། རྒྱ་ནག་གཞུང་གི་ཕྱོགས་ནས་དབུ་མའི་ལམ་ནི་རྒྱལ་ཁབ་ཁ་བྲལ་གཏོང་ཐབས་ཡིན་སྐོར་བརྗོད་དེ་དང་ལེན་བྱེད་ཀྱི་མེད་པ་རེད། གལ་སྲིད་ཁོ་ཚོས་ཁྱེད་ཀྱི་དབུ་མའི་ལམ་དེ་ལྷག་བསམ་རྣམ་དག་ཡིན་པ་དང་ལེན་བྱས་པ་ཡིན་ན་སྟབས་བདེ་ཡོད་པ་མ་རེད། དེའི་ཕྱིར་དབུ་མའི་ལམ་ལ་གནད་དོན་འདུག རྒྱལ་ཁབ་ཁ་བྲལ་གཏོང་ཐབས་དང་ཏཱ་ལའི་བླ་མས་ངན་སེམས་བཅངས་འདུག་སོགས་བརྗོད་པ་ཡིན་ན། ད་གཟོད་ཁོ་ཚོ་མཉམ་དུ་སྐད་ཆ་བཤད་མི་དགོས་པ་དང་གནད་དོན་ཐག་གཅོད་མི་དགོས་པས་ཁ་གཡར་ས་འཚོལ་གྱིན་ཡོད་པ་རེད། གལ་སྲིད་ཁོ་ཚོས་དངོས་གནས་གནད་དོན་ཐག་གཅོད་འདོད་ཡོད་ན། ཁྱེད་ཀྱིས་དབུ་མའི་ལམ་མ་གླེང་བར་གཞན་ག་རེ་གླེང་བ་ཡིན་ནའང་ཁོ་ཚོས་ཁྱེད་དང་མཉམ་དུ་གླེང་མོལ་བྱེད་ངེས་རེད། ཡིན་ནའང་། ཁོ་ཚོར་གནད་དོན་ཐག་གཅོད་བྱེད་འདོད་མེད་པར་བརྟེན་དང་ལེན་བྱེད་ཀྱི་མེད་པ་རེད། རྒྱ་ནག་གཞུང་ལ་ད་ལྟ་དབུ་མའི་ལམ་གྱི་ཐོག་ནས་མདུན་ལམ་གང་ཡང་མེད་ཀྱང་། མ་འོངས་པར་ཡང་མདུན་ལམ་མེད་པ་ཡིན་མིན་སུས་ཀྱང་ཁ་ཚོན་བཅད་ནས་བཤད་ཐུབ་པ་རེད། འོན་ཀྱང་། ང་རང་སྒེར་གྱི་ངོས་ནས་བཤད་ན། གལ་སྲིད་རྒྱ་ནག་གཞུང་གིས་ཡོངས་ཁྱབ་ཀྱི་ཐོག་ནས་དབུ་མའི་ལམ་ནི་ཡག་པོ་དང་ཡང་དག་གི་བྱེད་ཐབས་ཤིག་ཡིན་ལ། ངེས་པར་དུ་ལྷག་བསམ་རྣམ་དག་གིས་དང་ལེན་དགོས་པའི་ངོས་འཛིན་མ་བྱས་པ་ཡིན་ན། ཆེས་མ་མཐར་ཡང་ཧན་མི་རིགས་མང་པོའི་རྒྱབ་སྐྱོར་ཐོབ་ཀྱི་ཡོད་པ་རེད། འདིར་སྣང་ཆུང་བྱེད་མི་རུང་བའི་གནད་དོན་གཉིས་ནི་གཅིག་ད་ལྟ་ཕྱི་སྡོད་རྒྱ་མིས་བོད་ཀྱི་རང་དབང་ཐོག་རྒྱབ་སྐྱོར་བྱེད་དགོས་ཀྱི་ཡོད་སྟབས།  དབུ་མའི་ལམ་གྱི་ཐོག་ནས་བོད་ཀྱི་ལོ་རྒྱུས་བདེན་དོན་དང་ད་ལྟའི་གནས་སྟངས་ཤེས་རྟོགས་ཐུབ་པ་བཟོས་ཏེ་ནུས་པ་འདོན་དུ་འཇུག་རྒྱུ་ཧ་ཅང་གལ་ཆེན་པོ་རེད། གཞན་ཡང་། རྒྱ་ནག་གཞུང་དངོས་གནས་དམངས་གཙོ་ཅན་དུ་གྱུར་བ་དང་། བོད་དོན་ཐག་གཅོད་བྱེད་འདོད་ཡོད་པ་ནའང་དེ་འདྲ་ལས་སླ་བོ་ཡོད་པ་མ་རེད། ད་ལྟ་ཧན་མི་རིགས་དང་ཕྱི་སྡོད་རྒྱ་མི་མང་པོས་དབུ་མའི་ལམ་བརྒྱུད་དེ་བོད་དོན་སྐོར་སྔར་ལས་མང་པོ་ཤེས་རྟོགས་བྱུང་ཡོད་ལ། ཡང་དག་པའི་ཁྲིམས་ལུགས་ཀྱི་ཐོག་ནས་ཐག་གཅོད་དགོས་པར་འདོད་ཀྱི་ཡོད། ཁྲིམས་ལུགས་ཀྱིས་ཐག་གཅོད་པ་ཟེར་བ་དེའི་ནང་དོན་ནི་བོད་མི་རང་ཉིད་ཀྱིས་གདམ་ག་བྱ་རྒྱུ་དེ་རེད་བསམ་གྱི་ཡོད། ཅེས་བརྗོད་སོང་།

པཎ་ཆེན་ཆུང་སྲིད་རིན་པོ་ཆེའི་སྐོར་ལ་ཁོང་གིས། པཎ་ཆེན་རྫུན་མའི་གནད་དོན་དེ་ཧ་ཅང་གལ་ཆེན་པོ་ཞིག་རེད། ག་རེ་བྱས་ནས་གལ་ཆེན་པོ་རེད་ཟེར་ན། གུང་ཁྲན་ཏང་གིས་སྲིད་བྱུས་ཀྱི་ཐོག་ནས་༧ཏཱ་ལའི་བླ་མ་སྐུ་ཕྲེང་ ༡༥ པར་མཁྲེགས་པོའི་ཚུལ་འཛིན་གྱི་ཡོད་པ་ཧ་ཅང་གསལ་བོ་རེད། དེ་ལ་ཐེ་ཚོམ་ཅི་ཡང་ཡོད་པ་མ་རེད། ག་རེ་བྱས་ནས་རྒྱ་ནག་དབུས་གཞུང་གིས་ཏཱ་ལའི་བླ་མ་ངོས་འཛིན་གྱི་ཐོབ་ཐང་ཤུགས་ཆེན་པོས་རྗོད་ཀྱི་ཡོད་པ་རེད་ཟེར་ན། མ་འོངས་པར་ཏཱ་ལའི་བླ་མ་སྐུ་གཤེགས་ཏེ་སྐུ་ཕྲེང་ ༡༥ པ་ངོས་འཛིན་བྱེད་སྐབས། ཁོ་ཚོས་ཏན་ཏན་ཐོབ་ཐང་དེ་དམ་འཛིན་བྱ་རྒྱུ་ཡིན་སྟབས། ཡང་ཏཱ་ལའི་བླ་མ་བདེན་རྫུན་གཉིས་བྱུང་དུ་བཅུག་སྟེ་དཀའ་རྙོག་མང་པོ་འབྱུང་ངེས་རེད། ཁོ་ཚོས་ཐབས་ཇུས་དེ་གཏན་ཁེལ་ཚར་བ་རེད་ལ། ཏན་ཏན་དེ་འདྲ་བྱ་རྒྱུ་ཡིན་པས་ཐོབ་ཐང་ཤུགས་ཆེན་པོས་རྗོད་ཀྱི་ཡོད་པ་རེད། ངས་བསམ་ན་ཆེས་མ་མཐར་ཡང་བོད་ཕྱི་ནང་གི་བོད་མི་ཡོངས་ཀྱིས་རྡོག་རྩ་གཅིག་སྒྲིལ་གྱིས་པཎ་ཆེན་རྫུན་མ་དེ་དང་ལེན་མི་བྱེད་རྒྱུ་ཧ་ཅང་གལ་ཆེན་པོ་ཡིན་པ་མ་ཟད། མ་འོངས་པར་ང་ཚོས་རྒྱལ་སྤྱིའི་ཐོག་པཎ་ཆེན་བླ་མའི་གནད་དོན་དེ་གཙོ་གནད་དུ་བཟུང་ནས་རྒྱལ་སྤྱིའི་སྤྱི་ཚོགས་ལ་ཧ་གོ་རུ་འཇུག་དགོས་པ་རེད། རྒྱལ་སྤྱིའི་ཐོག་ནས་ཡང་སྲིད་སོགས་ཀྱི་སྐོར་ལ་ཧ་གོ་མཁན་ཧ་ཅང་ཉུང་ཉུང་པས་དེ་ཚོ་གསལ་བོ་བཟོ་དགོས་པ་རེད། བོད་མིའི་སྒྲིག་འཛུགས་ཀྱིས་གཏན་ནས་པཎ་ཆེན་རྫུན་མ་དེ་དང་ལེན་བྱ་རྒྱུ་ཡོད་པ་ མ་རེད་བསམ་གྱི་འདུག གལ་སྲིད་དང་ལེན་བྱས་པ་ཡིན་ན་དོང་ཞིག་བརྐོས་ཏེ་རང་ཉིད་ནང་དུ་མཆོངས་བ་ལྟ་བུ རེད། ཅེས་བརྗོད་སོང་།

གསར་འགོད་པ། འཇིགས་མེད་རྒྱ་མཚོ།