རྒྱ་གཞུང་གིས་སིག་ནེའི་རྒྱ་ནག་གཞུང་ཚབ་ཁང་གི་ནང་དྲག་སྤྱོད་སྤེལ་མཁན་གྱི་བོད་མི་ཚོར་ཁྲིམས་ཐག་ནན་པོ་བཅད་དེ་སློབ་གསོ་ཐེབས་ཏུ་འཇུག་དགོས་སྐོར་བརྗོད་འདུག
ཁ་སང་རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཕྱི་ཚེས་ ༢༣ ཉིན་ཨོ་སི་ཊོ་ལི་ཡའི་སིག་ནེ་གྲོང་ཁྱེར་དུ་ཡོད་པའི་རྒྱ་ནག་གཞུང་ཚབ་ཁང་གིས་གསར་འགོད་ལྷན་ཚོགས་ཤིག་བསྡུས་ཏེ། ཕྱི་ཚེས་ ༢༢ ཉིན་གྱི་ཕྱི་དྲོར་བོད་རང་བཙན་པ་ ༦༠ ལྷག་ཁྲིམས་འགལ་གྱིས་གཞུང་ཚབ་ཁང་ནང་འཛུལ་ཏེ་རྒྱ་ནག་གི་རྒྱལ་དར་རྩབ་ཧྲལ་བཏང་བ་མ་ཟད། གཞུང་ཚབ་ཁང་གི་ལས་བྱེད་ཅིག་ལ་རྨས་སྐྱོན་ཅུང་ཙམ་ཡང་བཟོས་སྐོར་བསྒྲགས་ཡོད་པ་དང་། གནས་ཚུལ་བྱུང་རྗེས་ཨོ་སི་ཊོ་ལི་ཡའི་ཉེན་རྟོག་ཕྱོགས་ནས་རྒྱ་ནག་ལ་དགོངས་དག་ཞུས་ཡོད་པ་མ་ཟད། མ་འོངས་པར་རྒྱལ་ཕྱིའི་གཞུང་ཚབ་ཁང་རྣམས་ཀྱི་བདེ་འཇགས་སྲུང་སྐྱོབ་བྱ་བར་བསྐྱར་ཞིབ་བྱ་རྒྱུ་ཡིན་ལུགས་བརྗོད་ཡོད་སྐོར་བཀོད་འདུག
ཁ་སང་ཕྱི་ཚེས་ ༢༣ ཉིན་རྒྱ་ནག་གཞུང་འབྲེལ་དྲ་བ་གོ་ལའི་དུས་བབ་ཐོག་དེའི་སྐོར་ལ་དཔྱད་བརྗོད་ཅིག་སྤེལ་བའི་ནང་། རྒྱ་ནག་གཞུང་ཚབ་ཁང་གི་ནང་བཙན་འཛུལ་བྱས་པའི་དྲག་སྤྱོད་དེར་སྐྱོན་བརྗོད་ཤུགས་ཆེན་བྱེད་ཀྱི་ཡོད། ཨོ་སི་ཊོ་ལི་ཡའི་ཉེན་རྟོག་ཕྱོགས་ནས་གནས་ཚུལ་བྱུང་རྗེས་བོད་རང་བཙན་པ་ཁག་ཅིག་འཛིན་བཟུང་བྱས་ཡོད་ཀྱང་། ངོ་རྒོལ་བཀག་འགོག་བྱེད་མ་ཐུབ་པར་ལས་འགན་ལ་འཐུས་ཤོར་ཚབས་ཆེན་བྱུང་བ་དང་། རྒྱ་ནག་གཞུང་ཚབ་ཁང་ལ་གནོད་སྐྱོན་བཟོས་ཡོད་སྟབས། ཨོ་སི་ཊོ་ལི་ཡ་གཞུང་ལ་འོས་འགན་ཡོད་པ་ལྟར་ངེས་པར་དུ་རྒྱ་ནག་ལ་དགོངས་དག་ཞུ་དགོས། ཞེས་བརྗོད་འདུག
ཡང་དཔྱད་བརྗོད་ནང་། ཨོ་སི་ཊོ་ལི་ཡ་ཕྱོགས་ནས་ད་རེས་ཁྲིམས་ལྟར་བོད་རང་བཙན་པ་མི་ངན་གདུག་རྩུབ་ཅན་དེ་ཚོར་ཁྲིམས་ཆད་ནན་པོ་བཅད་པ་ཡིན་ན། ད་གཟོད་བོད་རང་བཙན་པ་དེ་ཚོར་སློབ་གསོ་ངོ་མ་ཞིག་སྤྲོད་ཐུབ་ལ། མ་འོངས་པར་ས་གནས་དང་བྱེད་ཐབས་ཙམ་བརྗེས་ཏེ། ཡང་བསྐྱར་ཨོ་སི་ཊོ་ལི་ཡའི་ནང་ཡོད་པའི་རྒྱ་ནག་གཞུང་ཚབ་ལ་འཇབ་རྒོལ་བྱེད་པའི་བསམ་བློ་མེད་པ་བཟོ་ཐུབ། གལ་སྲིད་ཨོ་སི་ཊོ་ལི་ཡ་ཕྱོགས་ནས་འཇབ་རྒོལ་བ་དེ་ཚོ་ལས་སླ་བོ་བྱས་ནས་ཀློད་པ་ཡིན་ན། མ་འོངས་པར་ཁོ་ཚོས་སྔར་ལྟར་རྒྱ་ནག་གཞུང་ཚབ་ཁང་ལ་འཇབ་རྒོལ་བྱེད་པའི་དམིགས་ཡུལ་རྒྱ་ཡན་དུ་བཏང་བ་རེད། ཅེས་དང་།
གལ་སྲིད་ཨོ་སི་ཊོ་ལི་ཡ་དཔལ་ཡོན་ལྡན་པའི་རྒྱལ་ཁབ་ཅིག་ཡིན་ན། ཨོ་སི་ཊོ་ལི་ཡའི་ནང་ཡོད་པའི་རྒྱ་ནག་གི་ལས་ཁུངས་ལ་རྒྱ་ནག་ནང་གི་ཨོ་སི་ཊོ་ལི་ཡའི་ལས་ཁུངས་ལ་ཡོད་པའི་བདེ་འཇགས་དེ་ལྟ་བུ་གཅིག་མཚུངས་སུ་ཡོད་པར་ངེས་པར་དུ་འགན་ལེན་དགོས། ཨོ་སི་ཊོ་ལི་ཡས་དེ་ངེས་པར་དུ་བསྒྲུབ་ཐུབ་དགོས་ལ། འདི་འདྲའི་དགོས་འདུན་དེ་ཅུང་ཙམ་ཡང་ཚད་ལས་བརྒལ་མེད་པར་ང་ཚོས་ཡིད་ཆེས་བྱེད་ཀྱི་ཡོད། ཅེས་བརྗོད་འདུག
དཔྱད་བརྗོད་ཀྱི་མཇུག་ཏུ། ཉེ་བའི་ལོ་ཤས་ནང་ནུབ་ཕྱོགས་རྒྱལ་ཁབ་ཁག་གི་ནང་བོད་རང་བཙན་པའི་སྟོབས་ཤུགས་ཀྱིས། ས་གནས་ཁག་གི་རྒྱ་ནག་གཞུང་ཚབ་ཁང་ནང་བཙན་འཛུལ་ཐེངས་མང་བྱས་ཡོད་པ་དང་། ཨོ་སི་ཊོ་ལི་ཡའི་ནང་བོད་མི་ཐལ་སྤྱོད་པ་ཚོས་བྱ་འགུལ་སྣ་ཚོགས་སྤེལ་བཞིན་ཡོད་པས། ཨོ་སི་ཊི་ལི་ཡའི་ཉེན་རྟོག་ཕྱོགས་ནས་ངེས་པར་དུ་དོགས་ཟོན་བྱ་དགོས། ཕྱི་ཚེས་ ༢༢ ཉིན་གྱི་གནད་དོན་དེ་བཀག་འགོག་བྱེད་པར་ཉེན་རྟོག་པས་ནུས་པ་ལྡན་པའི་འབད་བརྩོན་བྱས་མེད་པ་མངོན་གསལ་དོད་པོ་ཡིན་སྐོར་བརྗོད་འདུག
ཕྱི་ཚེས་ ༢༢ ཉིན་ཨོ་སི་ཊོ་ལི་ཡའི་ཉེན་རྟོག་པས་འཛིན་བཟུང་བྱས་པའི་བོད་མི་རྣམས་ཀློད་གྲོལ་བཏང་ཚར་ཡོད་སྟབས། དེ་རིང་འདི་གའི་གསར་འགོད་པས་ཞི་རྒོལ་ནང་ཞུགས་པའི་བོད་མི་ཞིག་ལ། ཨོ་སི་ཊོ་ལི་ཡ་གཞུང་ཕྱོགས་ནས་མ་འོངས་པར་གནད་དོན་ཐག་གཅོད་ག་འདྲ་བྱ་རྒྱུ་ཡིན་པའི་སྐོར་ལ་སྐད་ཆ་བྱུང་ཡོད་མེད་དྲིས་པར་ཁོང་གིས། ཉེན་རྟོག་པས་འཛིན་བཟུང་བྱས་པ་རྣམས་ཆུ་ཚོད་ ༩ རིང་བཀག་ཉར་བྱས་རྗེས་ཚང་མ་བཏང་ཚར་བ་རེད། ཉེན་རྟོག་ཕྱོགས་ནས་མ་འོངས་པར་གནད་དོན་ག་འདྲ་ཐག་གཅོད་བྱ་རྒྱུ་ཡིན་མིན་དེ་ཨོ་སི་ཊོ་ལི་ཡ་ཁྲིམས་ཁང་གིས་བལྟ་དགོས་སྐོར་ལབ་ཀྱི་འདུག ཅེས་བརྗོད་བྱུང་།
གསར་འགོད་པ། པདྨ་མཚོ།
