རྒྱ་ནག་ལྷོ་རྒྱུད་གླིང་ཕྲན་ཧེ་ནན་ཞིང་ཆེན་དུ་ཞིང་བ་མི་མང་སྟོང་ཕྲག་མང་པོ་ས་གནས་སྲིད་གཞུང་གི་སྒོ་དྲུང་དུ་འདུ་འཛོམས་ཀྱིས། ཉེ་ལམ་སྲིད་གཞུང་གིས་ཁོ་ཚོའི་ས་ཞིང་གཞུང་བཞེས་བཏང་བ་མ་ཟད། དེའི་གུན་གསབ་མ་དངུལ་ཡང་ལྐོག་ཟ་བྱས་སོང་ཞེས་ངོ་རྒོལ་ལས་འགུལ་སྤེལ་སྐབས། ས་གནས་ཉེན་རྟོག་པས་ཡུལ་མི་ ༡༠ ལྷག་འཛིན་བཟུང་དང་ཉེས་རྡུང་ཚབས་ཆེན་བཏང་ཡོད་འདུག
རྒྱ་ནག་གི་སྤྱི་ཚོགས་བརྒྱུད་ལམ་ཁག་ཏུ་ལོ་ ༥༠ ནས་ ༦༠ སོན་པའི་ཡུལ་མི་རྒན་རབས་པ་མང་པོར་ས་གནས་ཉེན་རྟོག་པས་གཅར་རྡུང་ཚབས་ཆེན་བཏང་སྟེ། ཁོ་ཚོ་ས་གནས་སྨན་ཁང་དང་གྲོང་རྡལ་སྨན་ཁང་ཁག་ཏུ་བསྐྱལ་དགོས་བྱུང་ཡོད་པ་དང་། ཉེན་རྟོག་པས་ཁོ་ཚོར་ཉེས་རྡུང་དེ་འདྲ་གཏོང་དོན། ཁོ་ཚོས་ས་གནས་སྲིད་གཞུང་གི་ལྐོག་ཟ་རུལ་སུངས་ཐེར་འདོན་བྱས་པས་ཡིན་སྐོར་སོགས་བཀོད་འདུག
གནས་ཚུལ་བསྒྲགས་དོན་ལྟར་ན། ༢༠༡༠ ལོར་རྒྱ་ནག་གཞུང་གིས་གོང་སྨྲས་གྲོང་ཚོ་དེ་དག་གི་ས་ཞིང་གཞུང་བཞེས་བཏང་སྟེ་ཡུལ་མི་ཚོར་རྒྱ་སྒོར་ཁྲག་ཁྲིག་ ༢ ལྷག་གི་གུན་གསབ་སྤྲོད་རྒྱུའི་ཁས་ལེན་བྱས་པ་འཐུས་ཚང་ཤིག་ད་དུང་སྤྲད་མེད་ཅིང་། མིང་ལ་ཀྲི་ཧྥང་ (Zhifang) ཟེར་བ་ཞིག་གིས་དྲ་ལམ་ཁག་ཏུ། སྲིད་གཞུང་གིས་ས་ཞིང་གཞུང་བཞེས་བྱས་པའི་གུན་གསབ་མ་དངུལ་དེ་སྤྱིར་བཏང་ཡུལ་མི་རེར་རྒྱ་སྒོར་སྟོང་ཕྲག་ ༣༤ འཐོབ་ཀྱི་ཡོད་ནའང་། ཡུལ་མི་ཚོའི་ལག་ཏུ་གུན་གསབ་མ་དངུལ་རྒྱ་སྒོར་ ༣, ༤༠༠ ཙམ་མ་གཏོགས་རེག་མེད་སྟབས། གྲོང་སྡེ་དེ་དག་གི་ཡུལ་མི་ཚོས་ས་གནས་སྲིད་གཞུང་ལ་ངོ་རྒོལ་བྱས་པ་མ་ཟད། ཐ་ན་གྲོང་སྡེའི་ནང་གི་དུད་ཚང་གཅིག་གི་ཁྱིམ་མི་ཚང་མ་ངོ་རྒོལ་ལས་འགུལ་ནང་ཞུགས་ཀྱི་འདུག ཅེས་བཀོད་འདུག
འདས་པའི་ལོ་ངོ་འདི་དག་ནང་། རྒྱ་ནག་གི་ཞིང་གྲོང་མི་མང་དང་ས་གནས་ཉེན་རྟོག་པའི་བར་ལ་འཁྲུག་འཛིང་ཤོར་མུས་ཡིན་ཞིང་། དེ་ཡང་ས་གནས་དཔོན་རིགས་ཚོ་དང་ས་བདག་གྲལ་རིམ་གཉིས་བར་གྱི་མཁར་དབང་གི་ཁེ་བཟང་རྩོད་ལེན་འཐབ་རྩོད་ཅིག་ཡིན་འདུག
