སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་གཉེན་འབྲེལ་ཚོར་ཕྱི་ཕྱོགས་ནས་འབྲེལ་བ་བྱེད་མི་ཐུབ་པ་བཟོས་འདུག་ཟེར།
རྒྱ་གཞུང་གིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྲིང་མོ་དང་ཚ་མོ་གཉིས་ཀློད་གྲོལ་བཏང་ཏེ་ཕ་ཡུལ་དུ་འབྱོར་ཡོད་ཀྱང་། རྒྱ་གཞུང་གིས་ཁོང་གི་ཁྱིམ་མི་གཉེན་འབྲེལ་ཚོའི་ཁ་པར་ཨང་གྲངས་ཚང་མ་བསྡུས་ཏེ། ནང་ཁུལ་དུ་ཕན་ཚུན་འབྲེལ་བ་བྱེད་ཐུབ་པ་མ་གཏོགས་ཕྱི་ཕྱོགས་ནས་འབྲེལ་བ་བྱེད་མི་ཐུབ་པ་ཞིག་བཟོས་ཡོད་པ་མ་ཟད། ཁྱིམ་མི་གཉེན་འབྲེལ་ཚོར་ཚོགས་འདུ་བསྡུས་ཏེ་སྐད་ཆ་གང་བྱུང་བཤད་མི་ཆོག་པའི་བཙན་བཀའ་བཏང་ཡོད་འདུག
དེ་རིང་འདི་གའི་གསར་འགོད་པས་ཁ་པར་བརྒྱུད་རིན་པོ་ཆེའི་ཚ་བོ་དགེ་བཤེས་ཉི་མ་ལགས་སུ། རིན་པོ་ཆེའི་སྲིང་མོ་དང་ཚ་མོ་གཉིས་ཀྱི་གཙོས་ཁྱིམ་མི་གཉེན་འབྲེལ་ཚོའི་གནས་སྟངས་ག་འདྲ་ཆགས་ཡོད་བཀའ་འདྲི་ཞུས་པར་ཁོང་གིས། ཕྱི་ཟླ་ ༧ ཚེས་ ༡༣ ཉིན་རིན་པོ་ཆེའི་སྲིང་མོ་དང་ཚ་མོ་གཉིས་ཁྲིན་ཏུའུ་ནས་གར་སོང་ཆ་མེད་དུ་གྱུར་ཏེ་ཉིན་གྲངས་བཅུ་གསུམ་བཅུ་བཞི་ཞིག་ཕྱིན་པ་རེད། ཕྱི་ཟླ་ ༧ ཚེས་ ༣༠ ཉིན་ཁོང་གཉིས་ཀློད་གྲོལ་བཏང་སྟེ་ཁྱིམ་དུ་བསླེབས་འདུགཡིན་ནའང་། ང་ཚོས་ཁོང་གཉིས་ལ་ཐད་ཀར་འབྲེལ་བ་བྱེད་ཐུབ་ཀྱི་མི་འདུག་ཅེས་དང་།
ཁོང་གིས་མུ་མཐུད། ནང་དང་སྤུན་སྤུན་མཆེད་ཡོངས་རྫོགས་ཀྱི་ཁ་པར་ཨང་གྲངས་འཁུར་ཕྱིན་ཏེ་ཚང་མ་བཀག་ཚར་འདུག ཁོ་རང་ཚོ་ནང་ཁུལ་ནས་ཕར་ཚུར་ཁ་པར་བཏང་ན་འགྲོ་ཡི་འདུག་ཟེར་མ་གཏོགས་ང་ཚོས་ཕྱི་ལོགས་ནས་ཁ་པར་བཏང་ཡང་གཅིག་ཀྱང་འགྲོ་ཡི་མི་འདུག ཉེ་སྔོན་རིན་པོ་ཆེ་ཡི་སྤུན་སྤུན་མཆེད་ཚང་མར་ཚོགས་འདུ་བསྡུས་ཏེ་སྐད་ཆ་གང་བྱུང་བཤད་ཆོག་གི་མ་རེད་ཟེར་བ་འདྲ་བོ་དང་། སྡིགས་ར་སྐུལ་བའི་གནས་ཚུལ་བྱུང་འདུག་ཅེས་གསུངས་བྱུང་།
རིན་པོ་ཆེའི་གདུང་ཐལ་བཙན་འཕྲོད་བྱས་ཏེ་ཕ་ཡུལ་དུ་གདན་འདྲེན་ཞུ་བཅུག་མེད་པའི་སྐོར་ལ་ཁོང་གིས། ཕྱི་ཟླ་ ༧ ཚེས་ ༡༦ ཉིན་གྱི་ཞོགས་པར་ཁྲིན་ཏུའུ་བཙོན་ཁང་ནས་སྐུ་ཕུང་ཞུགས་འབུལ་བྱེད་དུ་བཅུག་ཡོད་པ་དང་། གདུང་ཐལ་ཕ་ཡུལ་དུ་འཁུར་མཁན་མི་བཞི་མ་གཏོགས་བཞག་ཡོད་པ་མ་རེད། ཉིན་དེའི་ཕྱི་དྲོར་ཉེན་རྟོག་པའི་ལྟ་རྟོག་འོག་མི་བཞི་དེས་གདུང་ཐལ་འཁུར་ནས་དགོང་མོར་ལྕགས་ཟམ་རྫོང་དུ་བསླེབས་སྐབས། ཉེན་རྟོག་པ་མང་པོ་ཡོང་སྟེ་གདུང་ཐལ་ཕ་ཡུལ་དུ་འཁུར་ཆོག་གི་མ་རེད། དེ་རྒྱ་ནག་དབུས་གཞུང་གི་བཀའ་རེད་ཅེས་གདུང་ཐལ་བཙན་འཕྲོག་བྱས་ཡོད་པ་དང་། མི་བཞི་དེས་ང་ཚོས་ཞུ་བ་མང་པོ་བརྒྱབ་སྟེ་གདུང་ཐལ་སྤྲོད་རྒྱུ་བྱས་པ་རེད། མ་འཕྲོག་རོགས་ཞེས་ཞུ་བ་བརྒྱབ་ཡོད་ཀྱང་། མ་ཕན་པར་བཙན་པོ་དབང་ཡོད་ཀྱིས་འཕྲོག་སྟེ་ལྕགས་ཟམ་ཁའི་ཆུ་ནང་དུ་འདེབས་ཀྱི་ཡིན་ལབ་འདུག ཡིན་ནའང་། ཕྱིས་སུ་བཏབ་ཡོད་མེད་ཧ་གོ་མ་སོང་གང་ལྟར་ཕ་ཡུལ་དུ་འཁུར་བཅུག་ཡོད་པ་མ་རེད། ཅེས་དང་། རིན་པོ་ཆེ་བཙོན་ཁང་ནས་སྐུ་གྲོངས་རྗེས། ཁྱིམ་མི་གཉེན་འབྲེལ་ཚོར་ཁོང་གི་སྐུ་ཆས་རྣམས་རྩིས་སྤྲད་ཡོད་མེད་དྲིས་པར། སྐུ་ཆས་གང་ཡོད་པ་ཐམས་ཅད་མེར་བསྲེགས་བཏང་སྟེ་གཅིག་ཀྱང་སྤྲད་ཡོད་པ་མ་རེད། སྤྲད་ཆོག་གི་མ་རེད་ལབ་སོང་ཟེར། ཞེས་གསུངས་བྱུང་།
ད་ལྟ་རིན་པོ་ཆེའི་དགོན་པ་རྣམས་ཀྱི་གནས་སྟངས་ག་འདྲ་ཆགས་ཀྱི་ཡོད་དྲིས་པར་ཁོང་གིས། ཉིན་མ་ཁ་ཤས་ཀྱི་སྔོན་དུ་རིན་པོ་ཆེ་མཆོག་གི་དགོན་པའི་ནང་དམག་མི་རང་འཇགས་བསྡད་འདུག་ལབ་སོང་། སྤྱིར་བཏང་རིན་པོ་ཆེ་དགོངས་པ་རྫོགས་པའི་ཉིན་མོ་ནས་བཟུང་སེར་སྐྱ་ཡོངས་སུ་རྫོགས་པ་དགོན་པའི་ནང་འདུས་ཏེ་མཆོད་འབུལ་སྨོན་ལམ་ཞུས་ནས་བསྡད་ཡོད་ཀྱང་། ཕྱི་ཚེས་ ༡༧ ཉིན་གྱི་ཞོགས་པ་ནས་བཟུང་མི་མང་རྣམས་དགོན་པའི་ནང་འགྲོ་རུ་མ་བཅུག་པར་སོ་སོའི་ཁྱིམ་དུ་སྡོད་དགོས་པའི་བཙན་བཀའ་བཏང་ཡོད་སྟབས། མི་མང་དགོན་པའི་ནང་འགྲོ་བར་དཀའ་ངལ་ཡོད་ས་རེད་མ་གཏོགས། དགོན་པའི་ནང་དུ་ཡོད་པའི་གྲྭ་བ་ཚོས་མཆོད་འབུལ་བྱེད་པར་དམིགས་བསལ་གྱི་དཀའ་ངལ་ཡོད་ས་མ་རེད། ཅེས་དང་།
རིན་པོ་ཆེ་ལ་ཁྱོན་དགོན་པ་ ༨ ཡོད་པ་དང་། དགོན་པ་ཆེ་ཤོས་དེ་ཨོ་ཐོག་དགོན་པ་ཡིན་ཞིང་། གྲྭ་བ་༤༠༠ ཙམ་ཡོད་པ་དང་། དེ་ནས་བདེ་ཆེན་ཆོས་གླིང་ཟེར་བའི་ཨ་ནེ་དགོན་པ་ཆེན་པོ་ཞིག་ཡོད་པའི་ནང་ཨ་ནེ་༨༠ ཙམ་ཡོད་ལ། དགོན་པ་མང་ཆེ་བ་ཉག་ཆུ་རྫོང་ཁོངས་སུ་ཡོད་སྐོར་གསུངས་བྱུང་།
རིན་པོ་ཆེས་ཆེད་འཛུགས་གནང་བའི་ས་གནས་ཀྱི་སློབ་གྲྭ་ཞིག་རྒྱ་གཞུང་གིས་སྒོ་བརྒྱབ་ཚར་བའི་སྐོར་ལ་ཁོང་གིས། ནག་ཆུ་ཁོངས་སུ་རིན་པོ་ཆེས་སློབ་གྲྭ་ཞིག་བརྒྱབ་ཡོད་པ་རེད། བརྒྱབ་ནས་ཞེ་དྲགས་མ་སོང་བར་ཉག་ཆུ་རྫོང་དང་སི་ཁྲོན་ཞིང་ཆེན་གྱི་མི་སྣ་ཡོང་སྟེ། གཞུང་ལ་རྩིས་སྤྲོད་དགོས་པའི་བཙན་བཀའ་བཏང་ནས་བླངས་སོང་བ་དང་། རྗེས་སུ་ཁོ་རང་ཚོས་སློབ་གྲྭ་དེ་རྦད་དེ་སྒོ་བརྒྱབ་བཞག་པ་རེད། དང་ཐོག་སློབ་གྲྭ་དེ་བཙུགས་སྐབས་སློབ་ཕྲུག་ ༢༠༠ མ་ཟིན་ཙམ་ཡོད་ཀྱང་། ཕྱིས་སུ་སློབ་ཕྲུག་ཚང་མ་ཁ་འཐོར་དུ་ཕྱིན་ཏེ་ཁ་ཤས་སློབ་སྦྱོང་གི་གོ་སྐབས་མ་རག་པར་ལྷག་པ་དང་། ཁ་ཤས་བཙན་བྱོལ་དུ་ཡོང་སྟེ་ད་ལྟ་ཨ་རི་དང་ཡུ་རུབ་སོགས་ཀྱི་ནང་ཡོད་པ་རེད། ཅེས་གསུངས་བྱུང་།
ད་ལྟ་བར་དུ་ཐད་ཀར་རྒྱ་ནག་དབུས་གཞུང་ལ་རིན་པོ་ཆེའི་སྐུ་གྲོངས་རྐྱེན་སྐོར་ཞུ་གཏུག་བརྒྱབ་ཡོད་མེད་དྲིས་པར། ཁྲིན་ཏུའུ་བཙོན་ཁང་དུ་སྐུ་ཕུང་རྩིས་སྤྲོད་དགོས་པའི་འབོད་སྐུལ་བྱེད་དུ་འགྲོ་སྐབས། རིན་པོ་ཆེའི་སྲིང་མོའི་མིང་ཐོག་ནས་སྙན་ཞུ་དོན་ཚན་ལྔ་ཅན་ཞིག་འཛམ་གླིང་གི་ས་ཕྱོགས་གང་སར་བཀྲམ་ཡོད་པ་དང་། སྙན་ཞུ་དེའི་ནང་གལ་ཏེ་རིན་པོ་ཆེའི་སྐུ་ཕུང་ང་ཚོར་རྩིས་སྤྲོད་མ་བྱས་ན། རྒྱལ་སྤྱིའི་ཐོག་ནས་གནད་དོན་འདིར་ཞིབ་འཇུག་བྱེད་རོགས་ཞེས་འབོད་སྐུལ་བྱ་རྒྱུ་ཡིན་སྐོར་བཤད་ཡོད་པ་རེད། རྒྱ་ནག་དབུས་གཞུང་ལ་ཐད་ཀར་ཞུ་གཏུག་བྱས་མེད་ཀྱང་། དོན་ཚན་ལྔ་ཅན་གྱི་སྙན་ཞུ་དེ་ཁྲིན་ཏུའུ་བཙོན་ཁང་གི་མགོ་ཁྲིད་ཚོར་སྤྲད་ཡོད་པ་མ་ཟད། སྐབས་དེར་སི་ཁྲོན་ཞིང་ཆེན་དང་དཀར་མཛེས་ཁུལ། ལི་ཐང་རྫོང་། ཉག་ཆུ་རྫོང་བཅས་ཀྱི་མགོ་ཁྲིད་མང་པོ་བསླེབས་ཡོད་སྟབས། ཁོ་ཚོ་ཚང་མར་སྤྲད་ཡོད་ས་རེད། ཅེས་གསུངས་བྱུང་།
གསར་འགོད་པ། པདྨ་མཚོ།
