ད་དུང་སྔར་བཞིན་སྲིད་སྐྱོང་དང་འོས་མི་རྩེད་ཆས་རེད།

བློ་གྲོས་རབ་བརྟན།

ངའི་ཆེད་རྩོམ་༼སྲིད་སྐྱོང་དང་འོས་མི་རྩེད་ཆས་མ་རེད༽ཅེས་པར་ཀླུ་མཁར་བྱམས་ཀྱི་རྒྱབ་སྐྱོར་ཚོགས་ཆུང་ཟེར་བས་ལན་ཞིག་བོད་ཀྱི་དུས་བབ་དྲ་ངོར་༢༠༡༥/༨/༢༨ ལ་བཀོད་འདུག དངོས་གནས་བྱས་ན་ངས་ཀླུ་བྱམས་འོས་མི་འདོན་མཁན་བོད་རྒྱལ་ཡོངས་རང་བཙན་ལྷན་ཚོགས་ཀྱི་འོས་འདོན་སྟངས་ཐད་ནས་སྐད་ཆ་གཙོ་བོ་བཤད་ཡོད། དེར་བརྟེན་ལན་ཞིག་ཡོད་ན་ཚོགས་པ་དེ་ནས་ཡོང་དགོས་མོད། འོན་ཀྱང་དེ་ལས་མ་བསླེབས་པར་ཀླུ་མཁར་བྱམས་ལ་རྒྱབ་སྐྱོར་བྱེད་མཁན་ཚོགས་ཆུང་ནས་བསླེབས་འདུག ལན་དེ་བཀླགས་རྗེས་ད་དུང་སྔར་བཞིན་“སྲིད་སྐྱོང་དང་འོས་མི་རྩེད་ཆས་རེད་“འདུག

ང་ལ་གསལ་ཁ་འདོན་དགོས་ས་དེ་བོད་རྒྱལ་ཡོངས་རང་བཙན་ལྷན་ཚོགས་ཀྱིས་འོས་མི་འདོན་སྟངས་ཐད་ནས་རེད། ངས་རང་བཙན་ལྷན་ཚོགས་ཀྱིས་འོས་མི་འདོན་ཆོག་གི་མ་རེད་ཟེར་གྱི་མེད་ལ། ཚོགས་པ་ཞིག་གི་དངོས་ནས་འོས་མི་འདོན་སྐབས་ཤེས་འཇོན་གང་ཐད་ནས་མི་རྩེ་མོའི་ནང་གི་ཏོག་དེ་འདོན་དགོས་པ་བསྙོན་དུ་མེད་ན། ཁྱེད་ཅག་གིས་ཀླུ་མཁར་བྱམས་རང་བཙན་ལྷན་ཚོགས་ཀྱི་ཚོགས་མི་གཙོ་གྲས་ཤིག་ཡིན་རབས་བཤད་པ་ལས་གཙོ་བོའི་ནང་གི་ཏོག་དེ་ཀླུ་བྱམས་ཡིན་པ་བསྟན་མེད་ཅིང་། ཚོགས་མི་གཙོ་གྲས་ཤིག་རེད་ཅེས་པས་ད་དུང་ལན་ཐེབས་མེད་ལ། རང་བཙན་ལྷན་ཚོགས་ཀྱི་རྒྱུན་ལས་རྣམས་ལྷན་འཛོམས་ཀྱིས་གྲོས་བསྡུར་གྱི་ལམ་ནས་ཀླུ་བྱམས་བཏོན་པ་ཡིན་པའི་བདེན་དཔང་དངོས་སྟོན་རྒྱུ་ཡོད་ན་འགྲིག་འདུག དེ་མེད་ཕྱིན་ཆད་ད་དུང་ཡང་ཁོང་ཚོ་ལ་མཚོན་ན”སྲིད་སྐྱོང་དང་འོས་མི་རྩེད་ཆས་རེད་“འདུག

བར་གནས་ཤིག་གིས་ཀླུ་བྱམས་ཡག་རབ་རྒྱན་རབ་བཤད་ན་རྣ་བར་འགྲོ་ཡི་རེད། དེ་མིན་ཀླུ་བྱམས་ལ་རྒྱབ་སྐྱོར་བ་ཞིག་གིས་ཀླུ་བྱམས་བཟང་རབ་བཤད་ན་རྣ་བར་འགྲོ་ཁག་པོ་རེད། རྒྱུ་མཚན་ནི་ཁྱེད་ཅག་ཕྱོགས་གཅིག་ལ་ལྷུངས་ཚར་བས་རེད། གང་ལྟར་ངས་ཀླུ་བྱམས་སྒེར་ལ་ཅི་ཡང་རྗོད་ཀྱིན་མེད་ལ། ད་དུང་དེ་སྔའི་ཆེད་རྩོམ་དུ་མི་དྲང་བོ་ཞིག་དང་ཁ་རུ་ཁ་ཐུག་ཅིག་རེད་ཅེས་པ་རང་འཇགས་ཡིན།

གལ་ཆེན་བ་ཞིག་ནི་ཁྱེད་ཅག་གིས་༼སྟབས་མ་ལེགས་པ་ཞིག་ལ་བོད་རང་བཙན་འཐབ་རྩོད་པ་ཚོར་བཙན་བྱོལ་ནང་ཕྱོགས་གང་ཐད་ནས་ནུས་མེད་བཟོ་བཞིན་པའི་༽ རང་བཙན་འཐབ་རྩོད་ཚོ་ལབ་ན་གོ་བ་ག་འདྲ་ཞིག་ལེན་དགོས་པ་རེད། ཚོགས་པ་ཞིག་ལ་གོ་དགོས་ན་ཚོགས་པ་གང་དང་གང་རེད། ཡང་ན་མི་སྒེར་བ་ཡིན་ན་སུ་དང་སུ་རེད། དེ་དང་པོ་གསལ་ཁ་བཏོན་རྗེས་དེ་ནས་སྒྲིག་འཛུགས་དང་ཚོགས་སྡེ། ཡང་ན་སུ་དང་གང་གིས་རང་བཙན་འཐབ་རྩོད་ནུས་མེད་བཟོ་བཞིན་པ་རེད། ཇི་ལྟར་བཟོ་བཞིན་ཡོད་པ་རེད། འདི་སྐད་ཆ་ཆུང་ཆུང་ཞིག་གཏད་ནས་མ་རེད་ལ། ཚོད་ཚོད་ལ་མི་དཀྱུས་མ་ཞིག་ཁ་ནས་ཐོན་པའི་ཚིག་ཀྱང་མ་རེད། འདི་སྲིད་སྐྱོང་གི་འོས་མིར་རྒྱབ་སྐྱོར་ཚོགས་ཆུང་གི་ཁ་ནས་ཐོན་པ་རེད། འདི་དག་ལ་ཁོངས་དང་ལུང་དངོས་ཡོད་གཞིར་བཞག་གིས་ར་སྤྲད་དེ། ཡིན་ན་ཡིན་པ་དང་མིན་ན་མིན་པ་དེ་མི་མང་ལ་གསལ་བོ་བཟོ་དགོས་པའི་གནད་དོན་ཞིག་རེད།

ད་དུང་སྐད་ཆ་གཞན་ཞིག་ལ་༼བར་ལམ་ཞིག་བོད་དོན་འཐབ་རྩོད་ཀྱི་གནས་བབས་འདི་ཉམ་ཆགས་སོང་ཡོད་༽ཅེས་བཤད་འདུག འདི་དོན་ལ་གནས་པའི་སྐད་ཆ་ཞིག་རེད་དམ། བོད་དོན་ཟེར་ན་གོ་བ་ག་འདྲ་ལེན་གྱི་ཡོད། འདི་གཅིག་ཡིན། གཉིས་ནས་ངས་ནོར་མེད་ན་ཁྱེད་ཅག་གི་ལྟ་སྟངས་ཡིན་ན། བོད་མིའི་སྒྲིག་འཛུགས་ནས་རྒྱ་གཞུང་ལ་སྤྲད་པའི་ས་གནས་རང་སྐྱོང་གི་ཡིག་ཆ་ལ་ཡ་ལན་མ་སྤྲད་པ་དེ་རེད། འདི་ནི་བཀའ་ཤག་གོང་མའི་སྐབས་གདོང་དང་གདོང་ཐུག་སྟེ་བོད་དོན་ཐད་ཀར་བཤད་པའི་ལས་རིམ་གྱི་ཆ་ཤས་གལ་ཆེན་ཞིག་རེད། འདིས་རྒྱ་གཞུང་ལ་རྒྱུ་མཚན་དང་གནས་ལུགས། བདེན་པ་དང་དོན་དངོས་གཞི་བཟུང་གི་སྐད་ཆ་སྨྲ་རྒྱུ་མེད་པའི་གནས་སུ་བསྐྱལ་ཏེ། ཚོད་ཚོད་ལ་བོད་རང་བཙན་དང་བོད་ཆེན་པོ་རྩོད་ཀྱིན་འདུག་ཅེས་བསྒྲགས་ཏེ་ཁག་འཁྲི་བྱེད་བཞིན་ཡོད་ཅིང་། བོད་རང་བཙན་ནི་རྒྱ་ནག་གཞུང་ལ་མཚོན་ན་རྩོད་དགོས་པ་ཞིག་ཆགས་ཡོད། ད་ལྟའི་རྒྱ་གཞུང་གིས་བོད་རང་བཙན་སྤྲོད་མི་སྲིད་ཅིང་། བོད་མི་ཚོས་ལེན་མི་ཐུབ་པའི་གདེང་ཚོད། རྒྱལ་སྤྱི་ནས་རྒྱབ་སྐྱོར་མེད་པའི་དོན་དངོས་བཅས་ཀྱིས་རེད། དེར་བརྟེན་རང་བཙན་བརྩད་ན་རང་སྐྱོང་དང་སྐད་ཡིག་རིག་གཞུང་སྲུང་སྐྱོབ་སོགས་ཀྱི་ཐད་ནས་སྐད་ཆ་བཤད་མི་དགོས་ལ། ༧གོང་ས་མཆོག་དང་བོད་མིའི་སྒྲིག་འཛུགས་ཀྱིས་རང་བཙན་རྩོད་ཀྱིན་མེད་ནའང་རྩོད་ཀྱིན་འདུག་ལབ་ཀྱི་ཡོད་པ་ལྟར་བོད་མི་ཚོས་ཀྱང་འཇོན་མིན་ལ་མ་ལྟོས་པར་རང་བཙན་རྩོད་ཁུལ་བྱས་ན། རྒྱ་ནག་གཞུང་གིས་༧གོང་ས་མཆོག་དང་བོད་མིའི་སྒྲིག་འཛུགས། རྒྱལ་སྤྱིའི་སྤྱི་ཚོགས་བཅས་ལ་གདོང་ལེན་བྱེད་པར་ལས་སླ་རུ་དང་སྟབས་བདེ་རུ་གྱུར་ཡོད།

ལར་ནས་བཙན་བྱོལ་བོད་མིའི་ཁྲོད་དུ་རང་སྐྱོང་དང་རང་བཙན་རྩོད་མཁན་གཉིས་ཡོད་པའི་ཁུལ་རེད། ྄དངོས་གནས་བྱས་ན་རང་བཙན་རྩོད་མཁན་ཚོས་ལས་ཀ་མང་བ་བྱེད་དགོས་མོད། འོན་ཀྱང་དོན་ལ་རང་སྐྱོང་རྩོད་མཁན་ཚོས་རྒྱ་གཞུང་དང་མཉམ་དུ་འབྲེལ་བ་སླར་གསོ་དང་། པེ་ཅིན་དུ་སྐུ་ཚབ་ཐེངས་མང་མངགས་ཏེ་བོད་དོན་ཐད་གྲོས་བསྡུར་རིམ་པར་བྱས་པ་སོགས་ལས་ཀ་མང་བ་བྱས་ཡོད། རང་བཙན་པ་ཚོས་རང་བཙན་ཆེད་དུ་ལས་ཀ་འདི་བྱས་པ་རེད་ཅེས་ཡོངས་གྲགས་སུ་ཅི་ཡང་སྟོན་རྒྱུ་མེད་ན། ལས་སླ་ཤོས་ནི་བཙན་བྱོལ་ནང་རང་བཙན་རྩོད་རྒྱུ་དེ་རེད།