གྲོས་ཚོཊ་ཚོཊ་དུས་ ༡༠ པ་དབུ་འཛུཊ་གནང་སོང་།

དེ་རིང་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པ་དབུ་འཛུགས་ཐོག་སྤྱི་འཐུས་ཚོགས་གཙོ་མཆོག་ནས་ཚང་མས་སྤྱི་དོན་ལ་དགོངས་པ་ཆེར་བཞེས་ཀྱིས་ཚོགས་འདུའི་ཆ་ཤས་ལེན་དགོས་པའི་འབོད་སྐུལ་གནང་སོང་།

དེ་རིང་སྔ་དྲོའི་ཆུ་ཚོད་ ༩།༡༥ ཙམ་ལ། བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༡༠ པ་དབུ་འཛུགས་གནང་སོང་བ་དང་། ཚོགས་ཐོག་ཏུ་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་དང་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་རྣམ་གཉིས་ཀྱི་དབུས་སྤྱི་འཐུས་རྣམ་པ་དང་། སྲིད་སྐྱོང་བློ་བཟང་སེང་གེ་མཆོག་དང་ཕྱག་རོགས་བཀའ་བློན་རྣམ་པ། དེ་བཞིན་ལྷན་ཁང་ཁག་གི་དྲུང་ཆེ་རྣམ་པ་དང་དོན་གཉེར་ཅན་གྱི་ཟུར་ཉན་པ་བཅས་འཛོམས་འདུག་ལ། ད་ལན་གྱི་ཚོགས་འདུའི་ཐོག་སྤྱི་འཐུས་ཐུབ་བསྟན་ལུང་རིགས་ལགས་དང་སྒྲོལ་དཀར་སྐྱབས་ལགས་གཉིས་ཀྱིས་ཚོགས་དུས་ཧྲིལ་པོར་དགོངས་པ་ཞུས་ཡོད་པ་དང་། སྤྱི་འཐུས་ག་ཟི་ཚེ་རིང་པོ་གཞུང་འབྲེལ་ཕྱོགས་སྐྱོད་དུ་ཕེབས་པ་མ་གཏོགས་གཞན་སྤྱི་འཐུས་རྣམ་པ་ཚང་འཛོམས་བྱུང་འདུག

སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་ནས་ཚོགས་འདུ་དབུ་འབྱེད་ཀྱི་གསུང་བཤད་གནང་དོན། གྲོས་ཚོགས་ནང་བགྲོ་གླེང་གནང་སྐབས་ཐུགས་འགན་ཆེར་བཞེས་ཀྱི་ཐོག་ནས་བགྲོ་གླེང་གནང་རོགས་ཞེས་ཞུ་རྒྱུ་དང་། ད་ལྟ་འོས་བསྡུའི་ལས་རིམ་འགྲོ་བཞིན་པ་ཡིན་སྟབས། གྲོས་ཚོགས་ནང་བཀའ་མོལ་གསུང་སྟངས་དང་རྣམ་འགྱུར་སྟོན་སྟངས་དེ་ཚོའི་ཐོག་ལ་ཏོག་ཙམ་ཁྱད་པར་འགྲོ་མི་སྲིད་པ་མ་རེད། ཚང་མས་ཐུགས་གཟབ་གནང་སྟེ་སྤྱི་པ་དང་སྒྲིག་འཛུགས། རྩ་དོན་བཅས་ལ་དགོངས་པ་རྩ་ཆེ་ཤོས་སུ་བཞེས་དགོས་པ་ཞིག་ཆགས་བསྡད་ཡོད་པ་རེད། དེ་མིན་སྐབས་སྐབས་སུ་ང་ཚོར་བར་ཆད་དེ་འདྲ་འཕྲད་ཀྱི་ཡོད་ཀྱང་། ད་ལྟའི་བར་དུ་གྲོས་ཚོགས་ཀྱི་འགྲོ་སྟངས་སོགས་གང་ཅིའི་ཐད་ལ་ཡག་ཐག་ཆོད་ཅིག་བྱུང་ཡོད་པ་རེད། ད་རེས་ཀྱི་གྲོས་ཚོགས་འདིའི་ནང་ཡིན་ནའང་དེ་སྔ་མཐུན་འགྱུར་གནང་བ་ལྟར་འཛིན་སྐྱོང་བཀའ་ཤག་གི་ངོས་ནས་ཡིན་ན་རེད། བཀུར་འོས་སྤྱི་འཐུས་རྣམ་པ་ཡིན་ནའང་རེད་རྒྱ་ཆེ་སར་དགོངས་ཏེ་གྲོས་ཚོགས་ལ་བར་ཆད་མི་ཡོང་བར་མཐུན་འགྱུར་གནང་རོགས་ཞེས་ཞུ་ཡི་ཡོད། ཅེས་གསུངས་སོང་།

བགྲོ་གླེང་དབུ་འཛུགས་ཀྱི་ཐོག་མར་ཕྱི་ལོ་ ༢༠༠༩ ནས་ད་ལྟའི་བར་བོད་ནང་བོད་མི་སེར་སྐྱ་ ༡༤༢ ཀྱིས་བོད་བསྟན་སྲིད་ཆེད་སྐུ་ལུས་མེར་བསྲེགས་གནང་བ་སོགས་ད་ལྟའི་བོད་ནང་གི་ཛ་དྲག་གནས་སྟངས་དང་འབྲེལ་བའི་གྲོས་ཆོད་གྲོས་འཆར་སྒྲོག་སྦྱངས་དང་འབྲེལ་བགྲོ་གླེང་དང་། དེ་བཞིན་བཀའ་ཟུར་ས་འདུ་རིན་ཆེན་དོན་གྲུབ་མཆོག་དང་དགའ་གདོང་སྐུ་རྟེན་བསྟན་འཛིན་དབང་གྲགས་ལགས། གཞན་ཡང་། རྒྱ་གར་གྱི་སྲིད་འཛིན་ཟུར་པ་སྐུ་ཞབས་ཨབ་དུལ་ཀ་ལམ་(Dr. A.P.J Abdul Kalam)མཆོག་བཅས་འདི་ལོར་དགོངས་པ་རྫོགས་པར་གཞུང་འབྲེལ་གྱི་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་སྒྲོག་སྦྱངས་བཅས་གནང་སོང་།

ད་ལན་གྱི་ཉིན་གྲངས་ ༡༠ རིང་གི་ཚོགས་འདུའི་ཐོག གཙོ་བོ་བོད་མིའི་སྒྲིག་འཛུགས་ཀྱི་ལྷན་ཁང་ཁག་གི་ལོ་འཁོར་ལས་བསྡོམས་སྙན་སྒྲོན་ཞུ་བ་དང་འབྲེལ་བགྲོ་གླེང་གསལ་བཤད་གནང་རྒྱུ་དང་། དེ་བཞིན་བོད་མི་མང་སྤྱི་འཐུས་ལྷན་ཚོགས་ནས་ཆེད་འཛུགས་གནང་བའི་མང་ཚོགས་རྩིས་ཁྲའི་ཚོགས་ཆུང་སྐབས་ ༦ པའི་ལས་བསྡོམས་དང་སྙན་ཐོར་བཀའ་ཤག་གིས་ཕྱག་བསྟར་ཇི་གནང་གི་སྙན་ཐོའི་ཐོག་སྤྱི་འཐུས་རྒྱུན་ལས་ནས་མཇུག་སྐྱོང་གནང་བའི་སྙན་ཐོ་དང་། ཤེས་ཡོན་ཚོགས་ཆུང་གི་ལོ་གཅིག་རིང་གི་ཞིབ་འཇུག་སྙན་ཐོ། དེ་བཞིན་ཆེས་མཐོའི་སྨན་པའི་ལྷན་ཚོགས་དང་འབྲེལ་བའི་ཞིབ་འཇུག་ཚོགས་ཆུང་གི་སྙན་ཐོ་བཅས་ཚོགས་ཆུང་གི་སྙན་ཐོ་ཁག་ཅིག་དང་། གཞུང་འབྲེལ་ཁྲིམས་ཡིག་བསྐྱར་བཅོས་ཀྱི་ཁྲིམས་འཆར་སོགས་ཀྱི་ཐོག་བགྲོ་གླེང་གནང་རྒྱུ་ཡིན་འདུག

གསར་འགོད་པ། པདྨ་མཚོ།