ང་རྔ་མ་ཅན་དང་རྭ་ཅོ་ཅན་བཟོས་པར་དགའ་བོ་བྱུང་།

ཀླུ་མཁར་བྱམས་ལགས་ཀྱིས་ཁོང་སྲིད་སྐྱོང་འོས་མིར་ལངས་བ་དེར་ཐའེ་ཝན་དང་ཧོང་ཀོང་། རྒྱ་ནག་ནང་བཅས་ནས་དོ་སྣང་ཆེན་པོ་བྱུང་ཡོད་པ་དང་། འོས་མི་གཞན་ལ་གནས་སྟངས་ཤིག་གི་འོག་ནས་དེ་འདྲ་རྩ་བ་ཉིད་ནས་བྱུང་མྱོང་མེད་སྐོར་བརྗོད་སོང་།

དེ་རིང་སྔ་དྲོའི་ཆུ་ཚོད་ ༡༡།༣༠ ཐོག་མེག་གྷན་བོད་ཀྱི་གསོལ་མགྲོན་ཁང་གི་ཚོགས་ཁང་དུ། ཨ་ཚོགས་ཀླུ་མཁར་བྱམས་ལགས་ཀྱི་དང་བླངས་རྒྱབ་སྐྱོར་བའི་གོ་སྒྲིག་འོག ༢༠༡༦ ལོའི་སྲིད་སྐྱོང་འོས་མི་ཨ་ཚོགས་ཀླུ་མཁར་བྱམས་ལགས་ཀྱིས་རྒྱ་གར་ནང་གི་ས་གནས་ཁག་ ༢༦ ནང་སྐོར་སྐྱོད་ཀྱིས་མི་མང་ལ་གཏམ་བཤད་བྱས་པའི་གྲུབ་འབྲས་དང་། དེ་འབྲེལ་གྱི་གནད་དོན་ཁག། དེ་བཞིན་སང་ཉིན་ནས་བཟུང་ཨ་རི་དང་ཁེ་ན་ཌའི་ནང་སྐོར་སྐྱོད་བྱ་རྒྱུ་ཡིན་པའི་ཐད་གསར་འགོད་གསལ་བསྒྲགས་ཤིག་བྱས་སོང་།

སྲིད་སྐྱོང་འོས་མི་ཀླུ་མཁར་བྱམས་ལགས་ཀྱིས་ཁོང་གི་སྐོར་སྐྱོད་ཀྱི་གྲུབ་འབྲས་དང་ཁྱབ་བསྒྲགས་ཀྱི་ནུས་པ་ཅི་ཐོན་སྐོར་བརྗོད་དོན། ཕྱོགས་མཐའ་ཁག་དང་དགོན་སྡེ་ཁག་ནང་བོད་རང་བཙན་རྩོད་ལེན་བྱེད་མཁན་ཚོར་ད་ལྟ་བར་དུ་ཞྭ་མོ་ནག་པོ་གཡོགས་ཟེར་ནའང་རེད། གང་ལྟར་བོད་རང་བཙན་གྱི་གནས་བབ་འདི་ལོ་ཁ་ཤས་ནང་ལ་ཧ་ཅང་གིས་ཉམས་རྒུད་ཕྱིན་པ་རེད། ཉམས་རྒུད་འགྲོ་དགོས་པའི་རྒྱུ་མཚན་ག་རེ་རེད་ཟེར་ན། གཞུང་ངོས་ནས་སྤྱི་ཚོགས་ནང་གི་ལས་དོན་བྱེད་ཕྱོགས་ཤིག་དང་ཏན་ཏན་འབྲེལ་བ་ཡོད་པ་རེད། དེ་འདྲའི་གནས་སྟངས་ཤིག་གི་འོག་ནས་རྒྱ་ཆེའི་མི་མང་གི་སེམས་ཁམས་འཁྲུག་བསྡད་པ་དེས། རང་བཙན་གྱི་ཚོགས་པ་དང་རྩ་འཛུགས་སྒྲིག་འཛུགས་ཁག་ཀྱང་ཡག་པོ་གནས་ཐུབ་མ་ཐུབ་ཙམ་མིན་པར། མི་སྒེར་མང་པོ་ཞིག་ནག་པོ་བཟོ་རྒྱུ་སོགས་ཀྱི་གནས་སྟངས་མང་པོ་བྱུང་ཡོད་པ་རེད། ད་རེབ་ཀྱི་ངའི་ཕྱོགས་སྐྱོད་ཀྱི་གོ་སྐབས་འདི་བརྒྱུད་དེ། རང་བཙན་དང་དབུ་མའི་ལམ་བར་ལ་དམ་ཚིག་མཐུན་དུ་འགྲོ་རྒྱུ་དང་། གཅིག་གིས་གཅིག་ལ་འགྲེལ་བཤད་དེ་ཁ་གསལ་དུ་འགྲོ་རྒྱུ། ཁྱད་པར་དུ་བོད་རང་བཙན་ཕྱོགས་གཏོགས་ལ་མ་ཉེས་མ་ཡོག་བྱས་བསྡད་ཡོད་པའི་གནས་སྟངས་དེ་ཚོ་གསལ་པོ་ཆགས་རྒྱུ་སོགས་རྒྱ་ཆེའི་མི་མང་ནང་གོ་རྟོགས་ཡག་པོ་ཞིག་འཕེལ་སོང་བསམ་གྱི་འདུག རང་བཙན་རྩོད་མཁན་ཚོར་ངོ་རྒོལ་བྱེད་རྒྱུ་གཅིག་པུ་མ་རེད། ཁོ་ཚོར་འཆར་གཞི་དང་དམིགས་ཡུལ་འདུག ཁོ་ཚོས་སྐྱོན་འཛུགས་གཅིག་པུའི་ཆེད་དུ་སྐད་ཆ་བཤད་ཀྱི་མེད་པ་གང་ཞིག་ལ། རྒྱ་ཆེའི་མི་མང་གི་མངོན་འདོད་དང་སེམས་ཚོར་གྱི་ཆེད་དུ་ལས་དོན་དང་འཆར་གཞི་བྱེད་ཕྱོགས་ག་རེ་ཡོད་པ་མི་མང་ནང་གསལ་པོ་བྱུང་པ་དེས། ང་ཀླུ་མཁར་བྱམས་ལ་ཆ་བཞག་ན། ང་དཀར་པོ་ཆགས་ཆེད་མ་རེད། བོད་རང་བཙན་གྱི་ལྟ་བ་ལངས་ཕྱོགས་འཛིན་མཁན་གྱི་མི་མང་ཆེ་བ་ཞིག་དཀར་འདོན་བྱ་རྒྱུའི་གོ་སྐབས་དང་། ཚོགས་པ་ཁག་ཡིན་ཡང་ཕན་ཐོགས་རྒྱུ། ང་ཚོ་རང་བཙན་དང་དབུ་མའི་ལམ་བར་ལ་གོ་ནོར་འགྲེལ་ལོག་བརྒྱབ་བསྡད་ཡོད་པ་དེ་གསལ་ཁ་འགྲོ་རྒྱུར་ངས་ཕན་ཐོགས་སོང་བསམ་གྱི་འདུག ཁྱད་པར་དུ་ང་ཚོ་ལངས་པའི་བརྒྱུད་རིམ་འདི་བརྒྱུད་ནས་གལ་ཆེ་ཤོས་ཤིག་ལ་རྒྱ་ནག་གི་གསར་འགྱུར་བརྒྱུད་ལམ་ཆེ་ཤོས་དེ་ཚོའི་ནང་དྲིལ་བསྒྲགས་ཤུགས་ཆེན་པོ་ཕྱིན་ཡོད་པ་རེད། དཔེར་ན། ཐའེ་ཝན་དང་ཧོང་ཀོང་། རྒྱ་ནག་ནང་བཅས་ནས་དོ་སྣང་ཆེན་པོ་བྱས་ཡོད་པ་རེད། རྒྱ་ནག་ནང་ནས་དོ་སྣང་ཆེན་པོ་བྱེད་དགོས་པའི་རྒྱུ་མཚན་ག་རེ་རེད་ཟེར་ན། བཙན་བྱོལ་སྤྱི་ཚོགས་ནང་ནས་རང་བཙན་གྱི་ལྟ་བ་འཁྱེར་མཁན་གྱི་ཤོག་ཁག་ཅིག་ལངས་ཀྱི་ཡོད་པ་དེ། རྒྱ་ནག་གཞུང་གིས་དོ་སྣང་བྱེད་དགོས་པའི་གནད་དོན་ཞིག་ཆགས་ཡོད་སྟབས། རྒྱ་ནག་གི་གསར་འགྱུར་བརྒྱུད་ལམ་ནས་ཧ་ཅང་གིས་དོ་སྣང་བྱས་ཡོད་པ་མ་ཟད། བོད་རང་བཙན་གྱི་རྒྱབ་སྐྱོར་བ་རྒྱ་རིགས་ཁ་ཤས་ཀྱིས་མངོན་གསལ་དོད་པོས་རྒྱབ་སྐྱོར་བྱེད་པ་དང་རྩོམ་བྲིས་པ་སོགས་ད་བར་འདི་འདྲ་བའི་གནས་སྟངས་ཤིག་ཧ་ལམ་བྱུང་མེད་པ་མ་ཟད། སྲིད་སྐྱོང་གི་འོས་མི་གཞན་ཚོར་གནས་སྟངས་གཞན་པ་ཞིག་གི་འོག་ནས་འདི་འདྲ་རྩ་བ་ཉིད་ནས་བྱུང་མྱོང་ཡོད་པ་མ་རེད། ཅེས་བརྗོད་སོང་།

ཡང་ཁོང་གིས་བཙན་བྱོལ་བོད་མིའི་སྤྱི་ཚོགས་ཀྱིས་འོས་བསྡུའི་རྣམ་འགྱུར་འཛིན་སྟངས་ཐད་བརྗོད་དོན། ད་རེབ་ང་ལངས་པའི་རྒྱུ་མཚན་འདི་དང་བསྟུན་ནས། ང་ཚོ་ཆབ་སྲིད་ཀྱི་ཁྱབ་ཁོངས་ནང་ཆབ་སྲིད་ཀྱི་རོལ་རྩེད་དམ་རྩེད་འཇོ་ཡག་པོ་འགྲོ་ཡི་འདུག དཔེར་ན། ང་ཚོར་ཟུར་ཟའི་བརྙན་པར་དང་ཟུར་ཟའི་རི་མོ་འདྲ་མི་འདྲ་བཟོས་ཏེ། རྒྱ་ཆེའི་མི་མང་ལ་སྐྱིད་པོ་གཏོང་རྒྱུ་དང་ཉི་མ་སྐྱེལ་རྒྱུ་ལྷོད་ལྷོད་བྱས་ནས་རྣམ་གཡེང་ལ་རོལ་རྒྱུའི་ལམ་ཁ་གཏོད་འདུག ཆབ་སྲིད་ཁྲོད་དེ་འདྲ་ཏན་ཏན་དགོས་ཀྱི་ཡོད་པ་རེད། ང་འདྲ་པོ་ཡིན་ན་རྔ་མ་དང་རྭ་ཅོ་ཡོད་པ་དེ་འདྲ་འདྲ་མི་འདྲ་བཟོས་འདུག་ཀྱང་། ང་དེར་དགའ་པོ་བྱུང་། དེ་ག་རེ་རེད་ཟེར་ན། ང་ཚོའི་ཆབ་སྲིད་འདི་གུ་ཡངས་པོ་ཞིག་དང་ཕྱོགས་ཡོངས་ནས་མང་ཚོགས་རང་བཞིན་གྱི་བགྲོ་གླེང་ཞིག་བྱ་རྒྱུར་ཧ་ཅང་གིས་ཕན་ཆེན་པོ་ཐོགས་ཀྱི་རེད་བསམ་གྱི་འདུག ང་ཚོས་ཆབ་སྲིད་ཟེར་བ་དེ་ཧ་ཅང་གིས་གུ་དོག་པོ་ཞིག་དང་། དགོན་པ་གྲྭ་ཚང་གི་སྐུ་འདྲ་ཤོམ་སྟངས་ཀྱི་རྣམ་པ་མིན་པར་ཤེས་རིག་སྣ་ཚོགས་ཀྱི་ཁྱབ་ཁོངས་ཏེ། རོལ་རྩེད་དང་གཞས། ཞབས་བྲོ་སོགས་ཀྱི་ནང་ང་ཡིན་ན་འདྲ་མི་འདྲ་བཟོས་འདུག་ལ། གཞན་ཚོར་ཡིན་ནའང་འདྲ་མི་འདྲ་བཟོས་ཡོད་སྲིད་པ་ཞིག་ཡིན་སྟབས། སྐབས་སྔོན་མ་ཁག་དང་བསྡུར་ན་ད་ལྟ་ལེགས་པོ་བྱུང་ཡོད་པ་མ་ཟད། ལྷག་པར་དུ་ངའི་སྐོར་ལ་འདྲ་མི་འདྲ་བཟོས་ཡོང་གི་འདུག དེ་ཚོ་དྲང་ཕྱོགས་ནས་བཤད་ཀྱི་ཡོད་ན་རེད་ལ། ལྡོག་ཕྱོགས་ནས་བཤད་ཀྱི་ཡོད་ནའང་རེད། ང་དེ་ཚོར་དགའ་པོ་ཡོད་པ་མ་ཟད། རྒྱ་ཆེའི་མང་ཚོགས་ཀྱི་སེམས་ཁམས་གུ་ཡངས་སུ་གཏོང་རྒྱུར་ཕན་ཐོགས་ཡོང་གི་རེད་བསམ་གྱི་འདུག ཅེས་བརྗོད་སོང་།

ཀླུ་མཁར་བྱམས་ལགས་ཀྱིས་ཚོགས་པ་སྒྲིག་འཛུགས་འགས་ཁོང་གི་འོས་བསྡུའི་གཏམ་བཤད་བཀག་འགོག་བྱས་པའི་སྐོར་བརྗོད་དོན། ཚོགས་པ་སྐྱིད་སྡུག་ཁ་ཤས་ཤིག་གིས། དཔེར་ན་མིང་བཏོན་པ་ཡིན་ན་བོད་ཁྱིམ་དང་། དགའ་ལྡན་དང་སེ་ར་དགོན་པ་སོགས་ཀྱིས་རྒྱ་ཆེའི་མི་མང་ལ་འོས་འདེམས་ཀྱི་གོ་སྐབས་འདི་ཏན་ཏན་སྤྲད་ཡོད་པ་མ་རེད། སྤྱིར་བཏང་ཁོ་ཚོའི་གྲས་དེ་བཤད་སྟངས་བྱས་ན། གཞུང་འབྲེལ་མིན་པའི་སྡེ་ཚན་ཡིན་ལབ་ཀྱི་ཡོད་ཀྱང་། བཙན་བྱོལ་བོད་མིའི་སྒྲིག་འཛུགས་ཀྱི་ཁྱབ་ཁོངས་ནང་ཁྱབ་དགོས་ཀྱི་ཡོད་སྟབས། སྒྲིག་འཛུགས་འདིའི་འོག་ནས་རྒྱལ་ཡོངས་འོས་བསྡུ་འགྲོ་བཞིན་ཡོད་སྟབས། ངས་སྒེར་གྱི་ཚོགས་པ་ཡིན་པའི་བསམ་བློ་བཏང་བ་ཡིན་ན་འགྲིག་གི་ཡོད་པ་མ་རེད་བསམ་གྱི་འདུག ཡིན་ཡང་གནས་སྟངས་དེ་འདྲ་ཞིག་གི་འོག་ནས་ངའི་གཏམ་བཤད་ཀྱི་ལམ་ཁ་བཀག་པ་དེ། ང་ཀླུ་མཁར་བྱམས་ལ་ཐད་ཀར་དོ་ཕོག་དང་སྐྱོན་འགྲོ་བཞིན་ཡོད་པ་ཧ་གོ་ཡི་མི་འདུག་ཀྱང་། ལས་ཀ་བྱེད་སྟངས་དེ་ང་ཚོ་དམངས་གཙོའི་ལམ་ལུགས་སྲོལ་ཡག་པོ་ཞིག་གི་ཐོག་འགྲོ་ཡི་མེད་པ་གསལ་པོ་ཡིན་པ་མ་ཟད། རྒྱ་ཆེའི་མི་མང་གི་གདམ་བྱ་འདེམས་བྱེད་ཀྱི་ཐོབ་ཐང་ལ་ཏན་ཏན་དོ་ཕོག་འགྲོ་ཡི་ཡོད་པ་རེད། ཅེས་བརྗོད་སོང་།

ཁོང་གིས་མ་འོངས་པར་གདོང་ལེན་བྱེད་ཕྱོགས་སྐོར་བརྗོད་དོན། ང་ཚོས་གདོང་ལེན་བྱེད་དགོས་པ་ཞིག་ནི་དབང་ཆའི་འཐབ་རྩོད་རེད། དབང་ཆའི་འཐབ་རྩོད་ཁྲོད་ནས་སྲིད་སྐྱོང་ལ་ལངས་ཀྱི་ཡིན་ལབ་དུས། རྩ་བའི་ཆ་ནས་དབང་ཆའི་ཁྱབ་ཁོངས་ཀྱི་སྐད་ཆ་ཞིག་བཤད་ཀྱི་ཡོད་སྟབས། སྤྱིར་བཏང་དམངས་གཙོ་ཡང་དག་པ་ཞིག་གི་གོ་རིམ་ཁྲོད་ནས་དབང་ཆ་དེ་བརྗེ་སྤོར་བྱ་རྒྱུ་དང་། དབང་ཆར་འགྱུར་བ་འགྲོ་དགོས་པ་དེ་དཀའ་ངལ་ཆེན་པོ་ཞིག་མ་རེད། ཡིན་ཡང་དབང་ཆ་བརྗེ་སྤོར་དང་མཉམ་དུ་མི་གཅིག་གི་མཚན་གནས་དང་རྐུབ་བཀྱག་གི་གནད་དོན་ཙམ་མིན་པར། འདིའི་རྒྱབ་ལོགས་ལ་ཁེ་ཕན་དང་ཕྱོགས་གཏོགས་མང་པོ་ཞིག་གིས་རྐྱ་འདྲ་པོ་ཐེབས་ཡོད་སྟབས། གནད་དོན་འདིའི་ཐོག་ནས་ང་ཚོར་དཀའ་ངལ་ཞིག་ཡོང་གི་འདུག ཡིན་ཡང་ད་ལྟའི་སྐབས་ལ་ཧ་ཅང་གི་ཛ་དྲག་ཅིག་མ་རེད་བསམ་གྱི་འདུག དཀའ་ངལ་འདི་ཆེ་རུ་ག་དུས་འགྲོ་ཡི་རེད་ཟེར་ན། ང་སྔོན་འགྲོ་ནས་དངོས་གཞིའི་སྒང་ལ་ཡར་གང་འཚམ་ཞིག་བསླེབས་ཏེ། མ་འོངས་པར་དངོས་སུ་སྲིད་སྐྱོང་གི་རྐུབ་བཀྱག་སྟེང་སླེབ་སྐབས་དེ་བས་ཀྱང་ཛ་དྲག་ཆགས་ཀྱི་རེད་བསམ་གྱི་འདུག ཡིན་ནའང་། གནད་དོན་འདིར་ང་ཀླུ་མཁར་བྱམས་སྒེར་གྱིས་མགོ་སྒུར་རྒྱུའི་འཆར་གཞི་མེད་ལ། རྒྱ་ཆེའི་མང་ཚོགས་ཀྱི་ངོས་ནས་ཀྱང་དེ་ལུགས་ཀྱིས་དབང་ཆའི་འཐབ་རྩོད་འདིའི་ནང་འགྲོ་དགོས་འདུག དབང་ཆའི་འཐབ་རྩོད་འདི་ཀླུ་མཁར་བྱམས་སྒེར་ལ་རྐུབ་བཀྱག་ཅིག་རག་མ་རག་གི་གནད་དོན་ཞིག་རྩ་བ་ཉིད་ནས་མ་རེད་ལ། མཚན་གནས་ཤིག་ཀྱང་མ་རེད། དབང་ཆ་འདི་དང་འབྲེལ་ནས་ང་ཚོའི་སྤྱི་ཚོགས་འདི་གཙང་མ་བཟོ་དགོས་པ་ཞིག་དང་། ད་ལྟ་བར་དུ་མ་དག་རྒྱུན་འབྱམས་ཀྱི་སྤྱི་ཚོགས་ཤིག་ལྷགས་བསྡད་ཡོད་པ་དེ་གཙང་མ་ཞིག་བཟོ་དགོས་ཀྱི་ཡོད་ན། དབང་ཆ་འཕོ་འགྱུར་ཞིག་མ་འགྲོ་བར་རྩ་བ་ཉིད་ནས་གཙང་མ་ཆགས་ཐབས་མེད་སྟབས། བཙན་བྱོལ་བོད་གཞུང་གི་དབང་ཆའི་མ་ལག་གཙོས་བསམ་བློ་གཏོང་ཕྱོགས་ཡན་ཆད་ཀྱང་གཙང་མ་ཆགས་དགོས་ཀྱི་འདུག ཅེས་བརྗོད་སོང་།

བཙན་བྱོལ་སྤྱི་ཚོགས་ཁྲོད་༧གོང་ས་མཆོག་གི་མཚན་གནས་བེད་སྤྱོད་བཏང་ནས་ཆབ་སྲིད་འཁྲབ་མཁན་ཡོད་སྐོར་ལ་ཁོང་གིས། ༧གོང་ས་སྐྱབས་མགོན་རིན་པོ་ཆེ་མཆོག་ང་ཚོར་བོད་ཀྱི་དམངས་གཙོ་གསོལ་རས་གནང་མཁན་དང་། གུ་ཡངས་དང་དམངས་གཙོའི་དབུ་ཁྲིད་ཅིག་ཡིན་པ་འཛམ་གླིང་ཐོག་སྤྱི་མོས་ངོས་འཛིན་བྱེད་ཀྱི་ཡོད་པ་མ་ཟད། ང་རང་སྒེར་གྱི་ངོས་ནས་ཀྱང་དེ་འདྲ་ཞིག་ལ་ངོས་འཛིན་བྱེད་ཀྱི་ཡོད། ཡིན་ཡང་༧གོང་ས་མཆོག་གི་མཚན་གནས་བེད་སྤྱོད་བཏང་སྟེ། ང་ཚོའི་དམངས་གཙོའི་ལམ་ཁ་འགོག་གི་ཡོད་པ་རེད། དེ་༧གོང་ས་མཆོག་གི་སྐྱོན་མ་རེད། ད་ལྟ་ཡིན་ཡང་༧གོང་ས་མཆོག་གི་མཚན་གནས་རྗེས་འབྲེལ་གྱི་ཐོག་ནས་ཁོང་གིས་གནང་བཞག་པའི་དམངས་གཙོའི་ལམ་ཁ་ཡང་དག་པ་དེ། ཡང་བསྐྱར་ཁོང་གི་མཚན་གནས་རྗེས་འབྲེལ་གྱི་ཐོག་ནས་བཀག་བསྡད་ཡོད་པ་དེ། ད་རེབ་ང་ཕྱོགས་མཐའ་ཁག་ཏུ་ཕྱིན་པ་དང་སྲིད་སྐྱོང་གི་འོས་མིར་ལངས་པའི་ཁྲོད་ནས་ངོས་འཛིན་གསལ་པོ་བྱུང་། དེར་བརྟེན་འདིར་རྒྱ་ཆེའི་མི་མང་གི་ངོས་ནས་ཀྱང་དོ་སྣང་བྱེད་དགོས་པ་དང་། ཁྱད་པར་དུ་འདིའི་ཐོག་ནས་༧གོང་ས་མཆོག་སྐུ་སྒེར་ལ་ཡིན་ཡང་ཐུགས་སུན་ཞུ་མི་དགོས་པ་ཞིག་ང་ཚོ་མི་མང་ནང་ནས་ཏན་ཏན་འགན་འཁྱེར་དགོས་པ་རེད་བསམ་གྱི་འདུག ཅེས་བརྗོད་སོང་།

གཞོན་ནུའི་རྒྱུན་ལས་གསུམ་གྱི་ཟས་བཅད་ངོ་རྒོལ་དང་འབྲེལ་བའི་ཐོག་ཁོང་གིས། དབུས་གཞོན་ནུ་ལྷན་ཚོགས་ཀྱི་ཚོགས་གཞོན་རྟ་མགྲིན་སྲིད་གཅོད་ལགས་དང་བསྟན་འཛིན་དབང་ཕྱུག་ལགས། ཚེ་དབང་སྒྲོལ་མ་ལགས་བཅས་ཀྱིས་ཟས་བཅད་ངོ་རྒོལ་གནང་སྟེ་ཉིན་ ༢༤ ཕྱིན་ཡོད་པ་རེད། ང་ཡིན་ན་རྒྱ་མིའི་བཙོན་ཁང་ནང་འགྲོ་མྱོང་། གྲོད་ཁོག་ཀྱང་ལྟོགས་མྱོང་། ཁ་སང་ང་ཁོང་ཚོར་ལྟ་བར་ཕྱིན་པ་ཡིན། ངའི་ངོས་ནས་མནར་གཅོད་ཀྱི་གོ་རིམ་ཁྲོད་ནས་མི་ཟེར་བ་དེ་མེ་མདའ་གཅིག་བརྒྱབ་ནས་ལམ་སེང་བསད་པ་ཡིན་ན། དེ་འདྲའི་མནར་གཅོད་ཆེན་པོ་ཞིག་གང་ཡང་མ་རེད། གལ་ཆེ་ཤོས་དེ་ཉིན་གྲངས་འདི་འདྲའི་མང་པོ་ཞིག་ལ་ཟ་རྒྱུ་འཐུང་རྒྱུ་མེད་པར་གྲོད་ཁོག་སྟོང་པར་མནར་གཅོད་བཏང་པ་དེ། གཡུལ་ས་ཞིག་ཏུ་ཕྱིན་ནས་མེ་མདའ་ཞིག་ཐེབས་པ་ལས་ཀྱང་ཧ་ཅང་གིས་བཟོད་སྒོམ་བྱེད་མ་ཐུབ་པའི་གནས་སྟངས་ཤིག་རེད། ད་ལྟ་ཚེ་དབང་སྒྲོལ་མ་ལགས་ཡིན་ན་སྨན་ཁང་ནང་བསྐྱལ་ཀྱང་ཟས་བཅད་ངོ་རྒོལ་བྱེད་ཀྱི་ཡོད་སྟབས། ད་རེབ་བརྒྱུད་ལམ་ཁག་བརྒྱུད་རྒྱ་ཆེའི་མི་མང་གིས་འདིར་དོ་སྣང་བྱེད་དགོས་ཀྱི་འདུག གང་ཡིན་ཟེར་ན། བོད་མི་རིགས་དང་རྒྱལ་ཁབ་ཀྱི་ཆེད་དུ་ད་ལྟ་ཡིན་ཡང་བློས་གཏོང་བྱེད་མཁན་འདི་འདྲ་ཡོད་སྟབས། ང་ཚོས་འདིའི་རིགས་གསལ་པོ་མཐོང་དགོས་པ་རེད། སྲིད་སྐྱོང་དང་སྤྱི་འཐུས་ཀྱི་གནད་དོན་ཙམ་མིན་པར་དངོས་གནས་དྲང་གནས་ཀྱི་དཀའ་ལས་རྒྱག་མཁན་གྱི་མི་འདི་ཚོའི་རིགས་ལ་མཐོང་ཆུང་དང་སྣང་མེད་བཏང་སྟེ། ཁོང་ཚོས་འཐོབ་རྒྱུ་མེད་པའི་འདི་དང་དེ་བྱེད་ཀྱི་འདུག་སོགས་ལབ་པ་ཡིན་ན། ལས་རྒྱུ་འབྲས་ལའང་འགྲོ་ཡི་མ་རེད། ཅེས་བརྗོད་སོང་།

མཇུག་ཏུ་ཟུར་ཉན་པ་ཞིག་གིས་ཁྱེད་ཀྱིས་༧གོང་ས་མཆོག་ལ་རྒྱལ་འཚོང་བ་ལབ་ཡོད་པ་རེད་ཅེས་རྒྱ་བསྒྲགས་བོད་བསྒྲགས་བྱེད་བཞིན་འདུག་སྟབས། དེའི་སྐོར་གསལ་བཤད་ཅིག་བྱེད་རོགས་བརྗོད་པར་ཁོང་གིས། སྔོན་མ་ནས་ངས་༧རྒྱལ་བ་རིན་པོ་ཆེར་རྒྱལ་འཚོང་པ་ལབ་པ་རེད་ཅེས་སྤྱི་ཚོགས་ནང་ཁྱབ་བསྡད་ཡོད་པ་མ་ཟད། ཉེ་ལམ་སྐད་ཆ་དེ་ཤུགས་ཆེ་རུ་འགྲོ་དགོས་པའི་རྒྱུ་མཚན་ག་པར་ཐུག་ཡོད་དམ་ཞེས་ན། ནོར་ཝེ་རླུང་འཕྲིན་ཁང་གིས་ང་ལ་དམངས་ཁྲོད་ནས་ཀླུ་མཁར་བྱམས་ཀྱིས་༧གོང་ས་མཆོག་ལ་རྒྱལ་འཚོང་པ་ལབ་ཡོད་པ་རེད་ཅེས་བརྗོད་ཀྱི་འདུག་སྟབས། དེ་དངོས་གནས་རེད་དམ་མ་རེད་ཅེས་དྲིས་པར་བརྟེན། ངས་སྐབས་དེ་དུས་ང་སྒེར་གྱི་ངོས་ནས་བརྙན་འཕྲིན་དེའི་ནང་༧གོང་ས་མཆོག་ལ་རྒྱལ་འཚོང་པ་ལབ་མེད་པ་གསལ་པོ་བྱས་ནས་གསལ་བཤད་བརྒྱབ་ཡོད་པ་མ་ཟད། ད་ལྟ་དེའི་ནང་ཡོད་ཡོད་པ་རེད། ཅེས་སོགས་བརྗོད་སོང་།

གསར་འགོད་པ། དོན་གྲུབ།