ལུས་སེམས་སྲོག་གི་བགྲོ་གླེང་ཚོགས་ཆེན་ཐོག་སེམས་ཁམས་འཁྲུག་རྐྱེན་དང་སེམས་ཁམས་བཅོས་ཐབས་གཉིས་བརྗོད་གཞི་གཙོ་བོར་བཟུང་སྟེ་ལག་ལེན་ཉམས་མྱོང་གི་ཤེས་བྱ་གང་མང་ཞིག་ཆོས་སྦྱིན་ཡོང་བའི་རེ་བ་བྱེད་བཞིན་ཡོད་སྐོར་བརྗོད་སོང་།
དེ་རིང་སྔ་དྲོའི་ཆུ་ཚོད་ ༡༠།༣༠ སྟེང་སྨན་རྩིས་མཐོ་སློབ་ཚོགས་ཁང་དུ། བོད་ཀྱི་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱི་གོ་སྒྲིག་འོག སྨན་རྩིས་ཁང་གི་ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་གསུམ་པ་དབུ་འཛུགས་གནང་སོང་བ་དང་། སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གི་དབུས། གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་ཁག་དང་སྨན་ཁང་ཁག་གི་གདན་ཞུས་སྐུ་མགྲོན་རྣམ་པ་དང་། དགོན་སྡེ་ཁག་གི་བླ་སྤྲུལ་རྣམ་པ། དྷ་སྟེང་བོད་ཁྱིམ་གྱི་སློབ་ཕྲུག་དང་སྨན་རྩིས་ཁང་གི་དགེ་ལས་སློབ་ཕྲུག་རྣམ་པ། གཞན་ཡང། ཕྱི་རྒྱལ་ཁག་ནས་ཡོང་བའི་ཚོགས་བཅར་བ་བཅས་མི་གྲངས་ ༤༠༠ མ་ཟིན་ཙམ་འཛོམས་འདུག
བགྲོ་གླེང་གི་ཐོག་མར་སྨན་རྩིས་ཁང་གི་ལུས་སེམས་སྲོག་གི་སྡེ་ཚན་གྱི་འགན་འཛིན་དགེ་བཤེས་བསྟན་པ་བཀྲིས་ལགས་ཀྱིས། ལུས་སེམས་སྲོག་གི་བགྲོ་གླེང་ཚོགས་ཆེན་ཐེངས་གསུམ་པའི་དགོས་དམིགས་སོགས་ངོ་སྤྲོད་གནང་པ་དང་འབྲེལ། བགྲོ་གླེང་ཐེངས་དང་པོ་དང་གཉིས་པའི་བརྒྱུད་རིམ་དང་གྲུབ་འབྲས་སྐོར་ལ་ཁོང་གིས། བགྲོ་གླེང་ཐེངས་དང་པོའི་དམིགས་ཡུལ་ནི། ཕྱི་དངོས་པོ་ཁོ་ནར་བློ་ཁ་ཡོངས་སུ་ཕྱོགས་པའི་འགྲན་རྩོད་དང་འབྲེལ་བའི་ཚུལ་མིན་རྣམ་རྟོག་གི་ཤུགས་རྐྱེན་ལ་བརྟེན་ནས་སེམས་ཁམས་ཀྱི་དཀའ་ངལ་ཇེ་ཆེར་འགྲོ་བཞིན་ཡོད་པ་ལྟར། སེམས་ཁམས་བདེ་སྲུང་དང་སེམས་ཁམས་ལེགས་བཅོས་གཙིགས་སུ་བཟུང་སྟེ་རྒྱ་ཁྱབ་ཀྱི་སློབ་གསོ་དང་ངེས་དོན་གྱི་ལག་ལེན་གཉིས་མངོན་འགྱུར་ཡོང་ཐབས་སུ། བོད་ལུགས་དང་ཕྱི་ལུགས་རིག་གཞུང་ཁག་གི་བཞེད་ཚུལ་ཕྱོགས་གཅིག་ཏུ་སྤུངས་ཏེ་རྒྱུས་ལོན་ཡང་དག་བྱས་པ་དང་། བགྲོ་གླེང་ཐེངས་གཉིས་པའི་དམིགས་ཡུལ་ནི། སེམས་ཁམས་འཕྲོད་བསྟེན་གྱི་བྱ་གཞག་ཡར་རྒྱས་གཏོང་ཐབས་དང་། ཕྱི་ནང་གི་རིག་གཞུང་འདྲ་མིན་གྱི་ལེགས་ཆ་བརྗེ་རེས། འགྲོ་བ་མིའི་སེམས་ཁམས་ལེགས་བཅོས་ཐད་ཆོས་ལུགས་འདྲ་མིན་དང་གསོ་རིག་འདྲ་མིན་ཐུན་མོང་གི་བསྒྲུབ་བྱ་གང་ཡོད་འཚོལ་ཞིབ་བྱས་པ་ཡིན། དེ་རིང་བགྲོ་གླེང་ཐེངས་གསུམ་པའི་སྐབས་འདིར་སེམས་ཁམས་འཁྲུག་རྐྱེན་དང་སེམས་ཁམས་བཅོས་ཐབས་གཉིས་བརྗོད་གཞི་གཙོ་བོར་བཟུང་སྟེ་ལག་ལེན་ཉམས་མྱོང་གི་ཤེས་བྱ་གང་མང་ཞིག་ཆོས་སྦྱིན་ཡོང་བའི་རེ་བ་བྱེད་བཞིན་ཡོད་སྟབས། བགྲོ་གླེང་འདིར་གདན་འདྲེན་ཞུས་པའི་མཁས་དབང་རྣམ་པ་དང་། ཚོགས་བཅར་བ་ཡོངས་ཀྱིས་དགོངས་ཚུལ་ཅི་ཡོད་གནད་དོན་འདིར་སྨིན་ངེས་ཡིན་པའི་ཡིད་ཆེས་གཏིང་ཟབ་བྱེད་ཀྱི་ཡོད། ཅེས་བརྗོད་སོང་།
སྐུ་མགྲོན་གཙོ་བོ་བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ནང་ཆོས་ཀྱིས་མིའི་ལུས་སེམས་གཉིས་ཀྱི་བདེ་ཐང་ལ་ཕན་ཐོགས་ཆེན་པོ་ཡོད་སྐོར་གསུང་བཤད་གནང་དོན། དེ་རིང་གཙོ་བོ་སེམས་ཁམས་ཐོག་ལ་བགྲོ་གླེང་གནང་གི་ཡོད་སྟབས། ཏན་ཏན་མང་པོ་ཞིག་ལ་ཕན་ཐོགས་ཀྱི་རེད་དྲན་གྱི་ཡོད། ང་རང་གིས་དེའི་སྐོར་ལ་སློབ་སྦྱོང་བྱེད་པའི་གོ་སྐབས་བྱུང་ཡོད་པ་མ་རེད་ཟེར་ན་སྐྱག་རྫུན་ཆགས་ཀྱི་ཡོད་པ་རེད། གོ་སྐབས་ཡོད་པ་རེད་དེ། ཡིན་ནའང་དུས་ཚོད་དེའི་སྒང་ལ་དམིགས་སུ་བཀར་ནས་བཏང་ཡོད་པ་མ་རེད། དེ་ནོར་འཁྲུལ་རེད། ང་རང་ཆུང་ཆུང་དུས་ནས་༧སྤྱི་ནོར་༧གོང་ས་སྐྱབས་མགོན་རིན་པོ་ཆེ་མཆོག་གི་བཀའ་སློབ་དེ་ཚོར་ཉན་གྱི་ཡོད་པ་དང་། སློབ་གྲྭའི་ནང་དུའང་ནང་ཆོས་སོགས་ལ་སློབ་སྦྱོང་བྱས་པ་ཡིན། རྗེས་སུ་སྤྱི་ཚོགས་ཀྱི་འགན་ཞིག་ཁུར་བསྡད་དུས། མི་མང་པོར་ཐུག་པ་དང་མཁས་དབང་མང་པོའི་ས་ནས་ཤེས་པ་དང་གོ་བའི་གོ་སྐབས་བྱུང་བའི་བརྒྱུད་རིམ་ལ་བརྟེན་ནས། ང་རང་སྒེར་གྱི་མི་ཚེར་ཆ་བཞག་པ་ཡིན་ནའང་། ཆུང་ཆུང་ཡིན་དུས་ནས་བསམ་བློའི་འཁྱེར་སོ་དང་འབྲེལ་བའི་ཐོག་ནས་སེམས་ལ་བདེ་སྐྱིད་སྤྲོད་ཐུབ་ཀྱི་ཡོད་པ་དེ་ཏན་ཏན་གསལ་བོ་ཞིག་ཧ་གོ་ཡི་འདུག་ལ། དེ་བཞིན་ལུས་པོའི་བདེ་ཐང་ལའང་ཁྱད་པར་ག་འདྲ་ཞིག་འགྲོ་གི་ཡོད་མེད་དེ་ཚོ་ཡང་གང་ལ་གང་འཚམ་ཞིག་ཧ་གོ་ཐུབ་ཀྱི་འདུག ཅེས་སོགས་གསུངས་སོང་།
ཐེངས་འདིའི་བགྲོ་གླེང་གི་ཉིན་གྲངས་གསུམ་རིང་དོལ་པོ་སྤྲུལ་སྐུ་དང་བྱ་དོ་རིན་པོ་ཆེ་མཆོག་རྣམ་གཉིས་ནས་ནང་པའི་ལྟ་གྲུབ་སྐོར་ལ་གསུང་བཤད་གནང་རྒྱུ་དང་། དེ་བཞིན་སྨན་རམས་པ་བསོད་ནམས་ལྷ་མོ་ལགས་དང་སྨན་རམས་པ་གནས་ཤར་རྡོ་རྗེ་རབ་བརྟན་ལགས་ནས་བོད་ཀྱི་གསོ་བ་རིག་པའི་སྐོར་དང་། རྩིས་རམས་པ་བསོད་ནམས་དཔལ་མོ་ལགས་དང་སྨན་རྩིས་པ་ཨེ་པ་བསོད་ནམས་རིན་ཆེན་ལགས་གཉིས་ནས་བོད་ཀྱི་སྐར་རྩིས་རིག་པའི་སྐོར་ལ་གཏམ་བཤད་གནང་རྒྱུ་དང་། གཞན་ཡང་། སེམས་ཁམས་རིག་པའི་སྨན་པ་སྐུ་ཞབས་ཊི་རེ་ཨི་གྷན་ལགས་ཀྱིས་དེང་རབས་ཚན་རིག་དང་། ཕྱི་ལུགས་འབུམ་རམས་པ་ལྕམ་སོ་ནི་ཝུ་ཌན་ལགས་ཀྱིས་དེང་རབས་ཚན་རིག་སྐོར་ལ་གཏམ་བཤད་བཅས་གནང་རྒྱུ་ཡིན་འདུག
གསར་འགོད་པ། པདྨ་རྒྱལ།
གཏིང་ཟབ་ལ་རྒྱ་ཆེ་བའི་ནང་དོན་རིག་པའི་གཏིང་སྔོག་ནས་ཚན་རིག་གི་སྙིང་བཅུད་བཏོན་པར་བསྔགས་བརྗོད་ཡོད།