སྒྲིག་གཞི་ཁ་གསལ་མེད་པའི་སྐྱོན་འདུག

བློ་ཕངས་པ་ཞིག་ལ་འོས་མིར་འགྲོ་གྲོན་གཏོང་ཕྱོགས་ཀྱི་སྒྲིག་ཁྲིམས་འདིའི་ནང་གསལ་ཁ་མེད་པའི་གནད་དོན་ཡོད་རྐྱེན། གཞུང་གི་ངོས་འཛིན་ཡོད་ཀྱང་གཞུང་འབྲེལ་མིན་པའི་ཚོགས་སྡེ་ཁ་ཤས་ཀྱིས་སྒྲིག་ཁྲིམས་དེར་གཡོལ་བའི་ཐོག་ནས་ཁོ་ཚོས་འོས་འདོན་བྱས་པའི་འོས་མི་ཚོར་དམིགས་བསལ་ཁེ་བཟང་རག་གི་ཡོད་ཟེར།

དེ་རིང་ཞོགས་པའི་ཆུ་ཚོད་ ༩ སྟེང་མེག་གྷན་ནོར་བུ་གསོལ་མགྲོན་ཁང་དུ། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་གོ་སྒྲོག་འོག ཕྱི་ལོ་ ༢༠༡༥ ཟླ་ ༡༠ ཚེས་ ༡༥ ནས་ ༢༠ བར་གྱི་ཉིན་གྲངས་ལྔའི་རིང་། ཨེ་ཤ་ཡ་དམངས་གཙོ་འབྲེལ་མཐུད་ཁང་ (ADN) དང་ཨེ་ཤ་ཡ་རང་དབང་འོས་བསྡུའི་འབྲེལ་མཐུད་ཁང་ (ANFREL) གཉིས་ཀྱི་ཆེད་ཕེབས་སྐུ་ཚབ་བཞིས་བཙན་བྱོལ་བོད་མིའི་བཀའ་སྤྱི་གཉིས་ཀྱི་སྔོན་འགྲོའི་རྒྱལ་ཡོངས་འོས་བསྡུ་ཆེན་མོའི་ལས་རིམ་ཧྲིལ་བོར་ཞིབ་འཇུག་གོ་བསྡུར་ཞུས་པའི་སྐོར་གྱི་གསལ་འགོད་ལྷན་ཚོགས་ཤིག་སྐོང་འཚོགས་གནང་སོང་།

གསར་འགོད་ལྷན་ཚོགས་སྟེང་སྐུ་མགྲོན་གཙོ་བོ་ཨེ་ཤ་ཡ་རང་དབང་འོས་བསྡུའི་འབྲེལ་མཐུད་ཁང་གི་འབྲེལ་མཐུད་པ་སྐུ་ཞབས་ར་ཡན་ (Ryan D. Whelan) ལགས་དང་། བལ་ཡུལ་དུ་རྟེན་གཞི་བྱས་པའི་རྒྱལ་ཡོངས་འོས་བསྡུ་རྟོག་ཞིབ་མཐུན་ཚོགས་ (NEMA) ཀྱི་འབྲེལ་མཐུད་པ་སྐུ་ཞབས་ཕི་ར་ཌི་ཕུ་གྷི་མེར་ (Pradip Ghimire) ལགས་དང་སྲས་མོ་ཀཱན་ཆིན་ཁ་ཐི་རི་ (Kanchan Khatri) ལགས་གསུམ་ཆེད་ཕེབས་ཐོག སྐུ་ཞབས་ར་ཡན་ལགས་ནས་ད་རེབ་ཀྱི་བཙན་བྱོལ་བོད་མིའི་སྔོན་འགྲོའི་རྒྱལ་ཡོངས་འོས་བསྡུའི་ལས་རིམ་སྐོར་གྱི་གསར་འགོད་གསལ་བསྒྲགས་བསྐྱངས་པའི་ནང་། ད་རེབ་བཙན་བྱོལ་བོད་མི་མང་པོས་སྐབས་ ༡༥ པའི་སྲིད་སྐྱོང་དང་སྐབས་ ༡༦ པའི་སྤྱི་འཐུས་གཉིས་ཀྱི་སྔོན་འགྲོའི་འོས་བསྡུ་དེ་བཞིན་ཞི་འཇགས་དང་ཚགས་ཚུད་ཀྱི་ཐོག་ནས་འོས་འདེམ་གནང་བར་འདི་ག་འབྲེལ་མཐུད་ཁང་གཉིས་ནས་ལྷག་བསམ་ཟོལ་མེད་ཀྱིས་དགའ་བསུ་ཞུ་རྒྱུ་དང་། ཐེངས་འདིའི་སྔོན་འགྲོའི་འོས་བསྡུའི་ལས་རིམ་བརྒྱུད་ནས་བྱུང་བའི་ཉམས་མྱོང་གཞིར་བཟུང་ཐོག མ་འོངས་པར་བཙན་བྱོལ་བོད་མིའི་དམངས་གཙོའི་ལས་རིམ་འདི་སྔར་བས་སྲ་བརྟན་ཡོང་བར་ང་ཚོས་ཡིད་ཆེས་དང་རེ་བ་བྱེད་བཞིན་ཡོད། ༢༠༡༡ ལོའི་འོས་བསྡུ་དང་བསྡུར་ན། འདི་ལོའི་འོས་བསྡུའི་ལས་རིམ་ནང་མང་ཚོགས་སྔར་བའི་མང་པོ་ཚ་ཚ་འུར་འུར་དུ་མཉམ་ཞུགས་བྱས་ཡོད་པའི་རྒྱུ་མཚན་ནི། ད་རེབ་འོས་བསྡུའི་ཁྱབ་བསྒྲགས་དང་བགྲོ་གླེང་སོགས་དམངས་གཙོའི་ལས་རིམ་ཆ་ཚང་སྔོན་ཆད་དང་བསྡུར་ན་གྲ་རྒྱས་པོ་དང་ཚགས་ཚུད་པོ་བྱུང་འདུག་པ་དང་། ལྷག་པར་དུ་ཕྱི་ཚེས་ ༡༨ ཉིན་གྱི་སྔོན་འགྲོའི་འོས་བསྡུའི་སྐབས་སུ་མི་མང་འོས་བསྡུའི་ས་ཚིགས་སོ་སོར་གྲལ་རིང་པོ་སྒྲིག་ནས་ཧ་ཅང་དོ་སྣང་ཆེན་པོའི་སྒོ་ནས་འོས་བླུགས་སོང་། ཕྱི་ལོ་ ༢༠༡༦ ཕྱི་ཟླ་ ༣ ཚེས་ ༢༠ ཉིན་མཐའ་མའི་དངོས་གཞིའི་འོས་བསྡུ་མཇུག་མ་སྒྲིལ་བར་དུ། མང་ཚོགས་བྱིངས་འོས་བསྡུའི་ནང་མཉམ་ཞུགས་དང་དོ་ཁུར་མུ་མཐུད་ཡོང་རྒྱུར་དགའ་བསུ་དང་སྐུལ་འདེད་བྱ་རྒྱུ་གལ་ཆེན་པོ་རེད།

དེ་བཞིན་འདི་ག་ཚོགས་པ་གཉིས་ངོས་ནས་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལྷན་ཁང་གིས་ངལ་བ་འཛེམ་མེད་གནང་སྟེ། སྔོན་འགྲོའི་འོས་བསྡུའི་ལས་རིམ་རྣམས་ཚགས་ཚུད་སྒྲུབ་ཐུབ་པ་གནང་བར་བསྔགས་བརྗོད་ཞུ་བཞིན་ཡོད་ལ། བཙན་བྱོལ་བོད་མིའི་སྤྱི་ཚོགས་འདི་འཛམ་གླིང་ཡུལ་ལུང་གང་སར་ཁ་འཐོར་དུ་གྱར་ཡོད་ནའང་། དབུས་འོས་བསྡུ་ལྷན་ཁང་གིས་ས་ཁུལ་དང་ཡུལ་ལུང་ཚང་མར་འོས་བསྡུའི་ས་ཚིགས་བཙུགས་ཏེ། མི་མང་བྱིངས་འོས་བསྡུའི་ནང་མཉམ་ཞུགས་ཡོང་ཐུབ་བཟོས་ཡོད་པ་དེ་ཆེས་བསྔགས་སུ་འོས་པ་མ་ཟད། འཛམ་གླིང་ཡུལ་ལུང་གཞན་པའི་འོས་བསྡུ་ལྷན་ཁང་ཁག་གི་ངོས་ནས་ཀྱང་མིག་དཔེར་ལྟ་དགོས་པ་ཞིག་ཆགས་ཡོད། ད་ཆར་མཐའ་མའི་དངོས་གཞིའི་འོས་བསྡུའི་གྲུབ་འབྲས་མ་འཐོན་བར་གྱི་ཟླ་བ་ ༥ ལྷག་གི་དུས་ཡུན་འདི་བེད་སྤྱད་ནས། སྔོན་འགྲོའི་སྐབས་ཀྱི་ཉམས་མྱོང་ག་རེ་ཐོབ་ཡོད་མེད་ཐད་ལ་ཕྱིར་རྟོགས་བྱས་ཏེ། མཐའ་མའི་འོས་བསྡུའི་སྐབས་སུ་དམངས་གཙོའི་ལས་རིམ་དེ་སྔར་བའི་གཏིང་ཇེ་ཟབ་དང་ཚགས་ཇེ་ཚུད་དུ་བཏང་བ་ཡིན་ན། དམངས་གཙོའི་ལས་རིམ་འདི་ཡར་རྒྱས་གོང་འཕེལ་ཡོང་བར་ཕན་ཐོག་ཆེན་པོ་ཡོང་གི་རེད།

སྤྱིར་འོས་བསྡུ་ལྷན་ཁང་ག་འདྲ་ཞིག་ཡིན་ནའང་། འོས་བསྡུ་ལྷན་ཁང་ནས་དྲང་སྙོམས་དང་རང་ཚུགས་ལྡན་པ། ལས་དོན་བྱེད་ཕྱོགས་ཚགས་ཚུད་ཡོང་དགོས་པ་དེ་གལ་ཆེན་པོ་ཡིན་པ་སྨོས་མེད་ཐོག ད་ལྟའི་རང་ཚུགས་ལྡན་པའི་འོས་བསྡུ་ལྷན་ཁང་གི་ལས་དོན་ཁག་སྔར་བའི་སྲ་བརྟན་ཡོང་བའི་ཆེད་དུ། འོས་བསྡུ་ལྷན་ཁང་གིས་ད་ལྟའི་འོས་བསྡུའི་སྒྲིག་གཞི་འདི་ཡར་རྒྱས་དང་ཕྱོགས་ཡོངས་ནས་གཅིག་མཚུངས་ལག་བསྟར་ཡོང་བར་ལས་དོན་ཁ་ཤས་ཤིག་བསྒྲུབ་དགོས་འདུག་པར་ང་ཚོས་ངོས་འཛིན་དང་རེ་བ་བྱེད་ཀྱི་ཡོད། དེ་ཡང་དཔེར་ན། འོས་བསྡུའི་སྐབས་སུ་འོས་མིའི་ཐད་འགྲོ་སོང་གཏོང་བར་ཚད་བཀག་བཟོས་ཡོད་པ་དེ་ཕྱོགས་ཡོངས་ནས་འདྲ་མཉམ་གྱིས་ཁྱབ་ཐུབ་བྱ་རྒྱུར་བསམ་ཞིབ་ནན་མོ་གཏོང་དགོས་ཀྱི་འདུག་ལ། དེ་དག་འདྲ་མཉམ་ཡོང་བའི་ཆེད་དུ་ཁ་ཡོད་ལག་ཡོད་ཀྱི་ཐོག་ནས་ལས་དོན་བསྒྲུབ་དགོས་ པ་མ་ཟད། སྔོན་འགྲོའི་སྐབས་ཀྱི་སྲིད་སྐྱོང་གི་འོས་ཤོག་གྲུབ་འབྲས་དེ་གང་མགྱོགས་སྒོས་མང་ཚོགས་ལ་གསལ་འདོན་ཐུབ་རྒྱུར་འབད་བརྩོན་བྱ་དགོས། ཞེས་དང་།

གསར་འགོད་གསལ་བསྒྲགས་ནང་མུ་མཐུད། བློ་ཕངས་པ་ཞིག་ལ་འོས་མིར་འགྲོ་གྲོན་གཏོང་ཕྱོགས་ཀྱི་སྒྲིག་ཁྲིམས་འདིའི་ནང་གསལ་ཁ་མེད་པའི་གནད་དོན་ཡོད་རྐྱེན། གཞུང་གི་ངོས་འཛིན་ཡོད་ཀྱང་གཞུང་འབྲེལ་མིན་པའི་ཚོགས་སྡེ་ཁ་ཤས་ཀྱིས་སྒྲིག་ཁྲིམས་དེར་གཡོལ་བའི་ཐོག་ནས་ཁོ་ཚོས་འོས་འདོན་བྱས་པའི་འོས་མི་ཚོར་དམིགས་བསལ་ཁེ་བཟང་རག་གི་ཡོད། དེར་བརྟེན། འོས་བསྡུ་ལྷན་ཁང་གི་འགྲོ་གྲོན་དང་འབྲེལ་བའི་སྒྲིག་ཁྲིམས་དེ་དག་འདྲ་མཉམ་དང་ཚད་ལྡན་ཡོང་ཆེད། དབུས་འོས་བསྡུ་ལྷན་ཁང་གིས་གཞུང་གི་ངོས་འཛིན་ཡོད་ཀྱང་གཞུང་འབྲེལ་མ་ཡིན་པའི་ཚོགས་སྡེ་དེ་དག་གིས་ལེན་བཞིན་པའི་ཁེ་བཟང་རྣམས་གཏན་འགོག་བྱ་རྒྱུའམ། ཡང་ན་གཞུང་གི་ངོས་འཛིན་ཡོད་མེད་ཅི་རིགས་ཀྱི་ཚོགས་སྡེ་ཚང་མར་འདྲ་མཉམ་ཐོག་ཁྱབ་པ་བྱ་དགོས། ཞེས་སོགས་འཁོད་འདུག

དེའི་རྗེས་དྲི་བ་དྲིས་ལན་སྐབས་སུ། གསར་འགོད་པས་དབུས་འོས་བསྡུ་ལས་ཁང་ནས་སྲིད་སྐྱོང་འོས་མི་ལྔའི་ནང་ནས་འོས་མི་གཉིས་པ་དང་གསུམ་པའི་བར་ཁྱད་པར་བརྒྱ་ཆ་ ༢༠ ལས་ཉུང་བ་ཡོད་ན། འོས་མི་གསུམ་པ་དེ་འདོན་རྒྱུ་ཡིན་སྐོར་གསལ་བསྒྲགས་ཟིན་པ་ལྟར། དེའི་སྐོར་ལ་དགོངས་ཚུལ་ག་རེ་ཡོད་མེད་དྲིས་པར། སྐུ་ཞབས་ར་ཡན་ལགས་ཀྱིས་དེ་ནོར་བ་རེད། སྤྱིར་བཏང་གནས་ཚུལ་དེ་སྔོན་འགྲོའི་འོས་བསྡུ་མ་ཚུགས་གོང་ནས་མང་ཚོགས་ལ་གསལ་བཤད་བྱས་ནས་དོགས་གཞི་མེད་པ་བཟོས་དགོས་པ་རེད། ཅེས་བརྗོད་སོང་།

གསར་འགོད་པ། པདྨ་རྒྱལ།