ཨ་རི་ནས་སློབ་སྦྱོང་འཐོན་རྗེས་ཕྱིར་དྷ་སར་ཕེབས་ཤོག་ཨཱ།

ཨ་རིའི་སློབ་ཡོན་ཁོངས་ཕྱི་ལོ་ ༡༩༨༨ ནས་ ༢༠༡༥ ལོའི་བར་སློབ་མ་ ༤༢༤ བྱུང་ཡོད་ཁོངས་ནས་སློབ་མ་ ༣༤༤ ཕྱིར་ལོག་དང་སློབ་མ་ ༨༠ ཕྱིར་ལོག་མི་འདུག

འདི་གའི་གསར་འགོད་པས་རྒྱུས་ལོན་བྱས་པ་ལྟར་ན། ཕྱི་ལོ་ ༡༩༨༨ ལོར་ནེའུ་ཡོག་ཏུ་རྟེན་གཞི་བྱས་པའི་ཨ་རིའི་བོད་ཀྱི་ཐེབས་རྩ་བརྒྱུད་དེ། ཨ་རིའི་གཞུང་གིས་སློབ་ཡོན་ལས་འཆར་མགོ་འཛུགས་གནང་སྟེ། བོད་མིའི་སྒྲིག་འཛུགས་ཤེས་རིག་ལས་ཁུངས་དང་མཉམ་འབྲེལ་འོག ཕྱི་ལོ་ ༢༠༡༠ ལོར་སློབ་ཕྲུག་ ༣༦༤  ལ་སློབ་ཡོན་ཕུལ་ཡོད་བའི་ཁྲོད་ནས་སློབ་ཟུར་ ༡༢༥ ཙམ་གྱིས་ད་ལྟ་བཙན་བྱོལ་བོད་གཞུང་གི་ལས་ཁུངས་ཁག་དང་གཞུང་འབྲེལ་མིན་པའི་ཚོགས་པ་ཁག་ནང་ཕྱག་ལས་གནང་བཞིན་ཡོད་པ་དང་། སློབ་ཟུར་ ༡༤༠ ཙམ་གྱིས་ལོ་འགའ་རེར་ལས་ཀ་བྱས་རྗེས་ཕྱི་རྒྱལ་དུ་ཕྱིན་ཡོད་འདུག སློབ་ཕྲུག་ ༧༤ ཙམ་ཕྱིར་ལོག་བྱས་མི་འདུག ཕྱི་ལོ་ ༢༠༡༡ ནས་ ༢༠༡༥ ལོའི་བར་སློབ་མ་ ༤༤ ཨ་རིར་བསྐྱོད་ཁོངས་ནས་སློབ་མ་ ༦ ཕྱིར་ལོག་བྱས་མི་འདུག

འདི་གའི་གསར་འགོད་པས་ཤེས་རིག་ལས་ཁུངས་སློབ་ཡོན་ཚན་པའི་དྲུང་གཞོན་སྐལ་བཟང་རིན་ཆེན་ལགས་སུ། འདི་ལོར་སློབ་ཡོན་ཁོངས་ཡིག་རྒྱུགས་གཏོང་མཁན་ག་ཚོད་བྱུང་བ་དང་། འདེམས་སྒྲུག་བྱས་ཟིན་པ་དག་ག་དུས་ཨ་རིར་གཏོང་འཆར་ཡོད་པ་དྲིས་པར་ཁོང་གིས།  ད་ལོ་སྙན་ཞུ་རྒྱག་མཁན་ ༡༠༢ བྱུང་ཡོད་ཁོངས་ནས་ཆ་རྐྱེན་མ་ཚང་བ་ ༤ དང་། ཡིག་རྒྱུགས་གཏོང་བར་མ་སླེབ་མཁན་ ༡༦ བྱུང་བ་ཕུད་པའི་གཞན་མི་ ༨༢ ཀྱིས་ཡིག་རྒྱུགས་བཏང་སྟེ། དེ་དག་ཁྲོད་ནས་མི་ ༦༢ ལ་ངག་རྒྱུགས་བླངས་རྗེས། མཐའ་མ་སློབ་མ་ ༡༥ བདམས་ནས་(TOEFL) གི་ཡིག་རྒྱུགས་ནང་ཞུགས་བཅུག་སྟེ། སྐར་གྲངས་མཐོ་ཤོས་ལེན་མཁན་གྱི་སློབ་མ་ ༦ བདམས་ཟིན་ནས་ལོ་རྗེས་མའི་ཕྱི་ཟླ་ ༨ པའི་ནང་ཨ་རིར་གཏོང་རྒྱུ་ཆགས་ཡོད་པ་རེད། ཅེས་བརྗོད་བྱུང་།

ཨ་རིར་ཕྱིར་སྐྱོད་བྱེད་མཁན་གྱི་སློབ་མ་ཚོར་སློབ་ཡོན་ག་ཚོད་གནང་གི་ཡོད་མེད་དྲིས་པར། ད་ལྟ་ངས་སློབ་མ་ཚོའི་མཐོ་སློབ་ཀྱི་སློབ་ཡོན་ག་ཚོད་ཡིན་མིན་ཏག་ཏག་ཅིག་ལབ་ཐུབ་ཀྱི་མ་རེད། གང་ཡིན་ཟེར་ན། མཐོ་སློབ་མི་འདྲ་བར་སློབ་ཡོན་མི་འདྲ་སྤྲོད་དགོས་ཀྱི་ཡོད་སྟབས། སློབ་ཡོན་ཏག་ཏག་ཅིག་ལབ་ཐུབ་ཀྱི་མི་འདུག ཡིན་ནའང་། ད་ལྟའི་ལས་གཞི་འདི་ལོ་གཉིས་ཆགས་ཀྱི་ཡོད་སྟབས། ཁོ་ཚོ་ཨ་རིར་བསླེབ་མ་ཐག་ལས་གཞི་འདིའི་འགན་ཁུར་བ་ཨ་རིའི་བོད་ཀྱི་ཐེབས་རྩས་སློབ་མ་ཚོར་ལག་ཁྱེར་གློག་ཀླད་ཉོ་ཆེད་ཨ་སྒོར་ ༧༢༥ དང་། རྒྱུན་གྲོན་ཆེད་ཨ་སྒོར་ ༣༥༠ གནང་གི་ཡོད་པ་རེད། དེ་དང་མཉམ་དུ་སློབ་ཐུན་རེར་ཨ་སྒོར་ ༥༠༠ རེ་དང་། ལོ་གཉིས་ལ་ཨ་སྒོར་ ༢༠༠༠ གནང་གི་ཡོད་པ་མ་ཟད། ཟླ་ ༢༡ རིང་འགྲོ་གྲོན་ཆེད་ཟླ་རེར་ཨ་སྒོར་ ༣༥༠ དང་། ཟས་དོད་ཆེད་ཟླ་རེར་ཨ་སྒོར་ ༣༠༠ རེ་གནང་གི་ཡོད་པ་རེད། དེ་བཞིན། ལྡི་ལི་ནས་ཨ་རི་བར་གྱི་ཕར་ཚུར་གྱི་གནམ་གྲུའི་འགྲོ་གྲོན་ཆ་ཚང་གནང་གི་ཡོད་པ་མ་ཟད། སློབ་སྦྱོང་གི་དུས་ཡུན་རིང་སློབ་སྦྱོང་གི་ཉམས་མྱོང་གསོག་ཆེད་ཨ་རིའི་ས་ཁུལ་དང་མཐོ་སློབ་ཁག་ཏུ་འགྲོ་དགོས་བྱུང་ཚེ་འགྲོ་གྲོན་གྱི་འཛིན་གཞིར་བཟུང་དོད་གནང་གི་ཡོད་པ་རེད། ཅེས་བརྗོད་བྱུང་།

ཨ་རིའི་སློབ་ཡོན་ཁོངས་ཞུགས་པར་ཆ་རྐྱེན་གང་དག་ཚང་དགོས་མེད་དྲིས་པར་ཁོང་གིས། སློབ་ཡོན་འདི་ཨ་རིའི་གཞུང་གིས་འགྲོ་སོང་བཏང་བའི་ཐོག་ནས་བྱུང་བ་ཞིག་ཆགས་བསྡད་ཀྱི་ཡོད་པ་རེད། སློབ་ཡོན་འདིའི་ཁོངས་བཞུགས་པར་འཛིན་རིམ་བཅུ་གཉིས་ཐོན་རྗེས་རྒྱ་གར་དབུས་གཞུང་གིས་ངོས་འཛིན་ཡོད་པའི་མཐོ་སློབ་ཞིག་ནས་ཉུང་མཐར་ཉེ་བའི་གཙུག་ལག་རབ་འབྱམས་པ་ཐོན་པའི་སྒང་ལ་ད་དུང་ལོ་གཅིག་རིང་སློབ་སྦྱོང་བྱས་པའི་ལག་འཁྱེར་དགོས་པ་རེད། དེ་དང་མཉམ་དུ་སྐྱབས་བཅོལ་ལག་དེབ་དང་དེབ་ལྗང་ཁུའི་ངོ་བཤུས་དང་། ཆང་ས་བརྒྱབ་ཚར་ཡོད་ན་བཟའ་ཟླའི་སྐྱབས་བཅོལ་ལག་དེབ་དང་དེབ་ལྗང་ཁུའི་ངོ་བཤུས། གལ་སྲིད་ཆང་ས་བརྒྱབ་མེད་ཚེ་ཕ་མའི་སྐྱབས་བཅོལ་ལག་དེབ་དང་དེབ་ལྗང་ཁུའི་ངོ་བཤུས་བཅས་དགོས་པ་རེད། འདི་དང་མཉམ་དུ་ང་ཚོས་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་གྲོས་བསྡུར་བྱས་ཏེ། ང་ཚོའི་སྤྱི་ཚོགས་ནང་སློབ་ཚན་གང་དག་ཐོག་སློབ་སྦྱོང་བྱས་ན་རན་པ་འདུག་བལྟས་ཡོད་སྟབས། དོ་བདག་འཛུལ་བཞུགས་པ་ཚོས་དེ་དག་ཁྲོད་ནས་སོ་སོའི་སློབ་ཚན་འདེམས་དགོས་པ་རེད། དབྱིན་ཡིག་ཐོག་འགེངས་ཤོག་ཅིག་བསྐངས་ཏེ་སོ་སོའི་ངོ་སྤྲོད་མདོར་བསྡུས་དང་། ག་རེ་བྱས་ནས་ཨ་རིར་འགྲོ་ཡི་ཡོད་མེད་སྐོར་གྱི་རྩོམ་ཐུང་ཤོག་ངོས་གཅིག་ལྷག་ཅིག་བྲིས་ནས་སྙན་ཞུ་དང་མཉམ་སྦྱར་སྤྲོད་དགོས་པ་རེད། དེའི་རྗེས་ང་ཚོས་ཡིག་ཆ་ཁག་ལ་ཞིབ་འཇུག་བྱས་ཏེ། འོས་ཆོས་ཚང་བ་ཚོར་ཉིན་ ༡༤ ནང་ཚུད་ལ་ཡིག་རྒྱུགས་གཏོང་བར་ཡོང་དགོས་པའི་བརྡ་ཐོ་གཏོང་གི་ཡོད་པ་རེད། ཅེས་བརྗོད་བྱུང་།

ཁོང་གིས་མུ་མཐུད་དུ། སྔོན་མ་ཡིན་ན་ང་ཚོར་སྙན་ཞུ་མང་པོ་འབྱོར་གྱི་ཡོད་པ་མ་རེད། གང་ཡིན་ཟེར་ན། ཆ་རྐྱེན་གཅིག་སྟེ་དབྱིན་ཡིག་གི་གནས་ཚད་གང་འདྲ་ཡོད་མེད་ཀྱི་ཡིག་རྒྱུགས་ (TOEFL) གཏོང་དགོས་པ་མ་ཟད། ཡིག་རྒྱུགས་དེའི་ཕོགས་བསྡོམས་སྐར་གྲངས་ ༡༢༠ ནས་ཉུང་མཐར་སྐར་གྲངས་ ༩༠ ཡན་ལོན་དགོས་སྟབས ༢༠༡༢ ལོའི་སྔོན་ལ་སློབ་ཡོན་འདིར་སྙན་ཞུ་རྒྱག་མཁན་ ༢༠ ཙམ་ལས་བྱུང་ཡོད་པ་མ་རེད། ༢༠༡༣ ལོ་ནས་ང་ཚོས་(TOEFL) ཀྱི་སྐར་གྲངས་སྔོན་འགྲོའི་ཆ་རྐྱེན་ཁོངས་མ་བཞག་པར་ཚོད་ལྟ་ཅིག་བྱས་སྐབས། སྙན་ཞུ་རྒྱག་མཁན་མི་ ༩༠ ལྷག་དང་། ཕྱི་ལོ་ ༢༠༡༤ ལོར་ ༡༠༠ ལྷག་བྱུང་ཡོད་སྟབས། ང་ཚོས་སྙན་ཞུ་རྒྱག་མཁན་ཆ་རྐྱེན་གྱི་ཡིག་ཆ་ཁག་ལ་ཞིབ་འཇུག་བྱས་རྗེས། འོས་ཆོས་ཚང་མཁན་ཚོར་བོད་ཀྱི་རིག་གཞུང་དང་ཆབ་སྲིད་ཡིག་རྒྱུགས་བཏང་སྟེ་བརྒྱ་ཆ་ ༥༠ ནས་ཉུང་མཐར་བརྒྱ་ཆ་ ༡༧ ལོན་དགོས་པ་བཟོས་ཡོད་པ་རེད། སྐར་གྲངས་ལོན་མཁན་ཚོར་ཞིབ་འཇུག་ཚོགས་ཆུང་གིས་སྐར་གྲངས་དེའི་ཐོག་དོ་བདག་སོ་སོའི་འཛིན་རིམ་བཅུ་གཉིས་དང་ཉེ་བའི་གཙུག་ལག་རབ་འབྱམས་ཀྱི་སྐར་གྲངས་བཅས་བསྡོམས་ཏེ། ཆ་སྙོམ་སྐར་གྲངས་ཕྱོགས་བསྡོམས་བརྒྱ་ཆ་ ༥༠ ཡན་ལོན་མཁན་ཚོར་ཨ་རིའི་གཞུང་ཚབ་ཁང་གི་ལས་བྱེད་གཉིས་དང་བོད་རིགས་གཉིས་བཅས་མི་བཞིས་ངག་རྒྱུགས་བླངས་ཏེ་མི་ ༡༥ རྩེ་བཏོག་གིས་ (TOEFL) གི་ཡིག་རྒྱུགས་ནང་ཞུགས་དགོས་ཀྱི་ཡོད་པ་མ་ཟད། ཡིག་རྒྱུགས་འདིའི་ནང་ཉུང་མཐར་ ༡༢༠ ནས་ ༩༠ ལོན་དགོས་ཀྱི་ཡོད་པ་རེད། དེའི་རྗེས་གོང་གསལ་སྐར་གྲངས་ཆ་ཚང་བསྡོམས་ནས་བརྒྱ་ཆ་རྩེ་གཏོག་གིས་ས་མིག་ལྟར་འདེམས་སྒྲུག་གནང་གི་ཡོད་པ་རེད། ཅེས་བརྗོད་བྱུང་།

སྔོན་མ་སློབ་ཡོན་འདིའི་ཁོངས་སྒྲིག་ཞུགས་ (Degree ) དང་སྒྲིག་ཞུགས་མ་ཡིན་པ་(Non-Degree)ཟེར་བའི་རིགས་གཉིས་ལ་སློབ་ཡོན་གནང་གི་ཡོད་ཀྱང་། ད་ལྟའི་ཆར་སྒྲིག་ཞུགས་མ་ཡིན་པ་ཟེར་བ་དེ་མེད་པ་བཟོ་དོན་གང་ཡིན་དྲིས་པར། སྔོན་མ་ཨ་རིའི་སློབ་ཡོན་ལས་གཞི་འདིའི་འོག་སྒྲིག་ཞུགས་དང་སྒྲིག་ཞུགས་མིན་པའི་ཁོངས་སློབ་མ་ ༡༥ ནས་ ༢༠ བར་འདེམས་སྒྲུག་བྱས་ཏེ་སློབ་ཡོན་སྤྲོད་སྲོལ་ཡོད་ཀྱང་། ༢༠༡༡ ལོར་ཨ་རིའི་དཔལ་འབྱོར་ཉམས་གུད་བྱུང་བར་བརྟེན་ཏེ། ཕར་ཕྱོགས་ནས་བོད་མིའི་སྒྲིག་འཛུགས་ལ་སྒྲིག་ཞུགས་ཁོངས་སློབ་ཡོན་སྤྲོད་ཐུབ་པ་ཡིན་ན། བོད་པའི་སྤྱི་ཚོགས་ལ་ཕན་ཐོགས་ཡོང་ས་རེད་ཅེས་བསམ་འཆར་ཕུལ་ཡོད་སྟབས། ད་ལྟ་སྒྲིག་ཞུགས་མ་ཡིན་པའི་སློབ་ཡོན་དེ་མེད་པ་ཆགས་ནས་ལོ་གཉིས་རེའི་སྒྲིག་ཞུགས་ཀྱི་སློབ་ཡོན་འདི་འགྲོ་བསྡད་ཀྱི་ཡོད་པ་རེད། ཅེས་བརྗོད་བྱུང་།

མཇུག་ཏུ་ཨ་རིའི་སློབ་ཡོན་ཁོངས་ནས་ཕྱིར་ལོག་མ་བྱས་པ་ཚོར་ཤེས་རིག་ལས་ཁུངས་ཀྱིས་ཆད་པ་གང་འདྲ་ལག་བསྟར་བྱེད་ཀྱི་ཡོད་མེད་དྲིས་པར། ང་ཚོས་ཨ་རིར་སྐྱོད་མཁན་ཚོར་སློབ་ཡོན་འདི་ནི་རིག་གཞུང་བརྗེ་ལེན་གྱི་སློབ་ཡོན་ཞིག་ཆགས་ཀྱི་ཡོད་སྟབས། ཕྱིར་མ་ལོག་ཚེ་ཁྲིམས་འགལ་ཆགས་ཀྱི་ཡོད་པ་མ་ཟད། ཁོ་ཚོ་མ་འཐོན་སྔོན་ལ་ཨ་རིའི་མི་སྣ་ཆེད་འབོད་བྱས་ཏེ་གལ་སྲིད་ཕྱིར་མ་ལོག་ན་མ་འོངས་པའི་བོད་ཕྲུག་ཚོའི་མདུན་ལམ་ལའང་གནོད་ཀྱི་ཡོད་པའི་ལམ་སྟོན་བྱེད་ཀྱི་ཡོད་པ་རེད། ད་ལྟ་ང་ཚོས་ཕྱིར་ལོག་མ་བྱེད་མཁན་ཚོར་དེབ་སེར་པོ་དང་ལྗང་ཁུའི་རྒྱབ་གཉེར་མ་སྤྲད་པ་དང་སྦྲགས། གན་ཡིག་གི་འབྲུ་དོན་ལྟར་ལག་བསྟར་བྱེད་ཀྱི་ཡོད་སྟབས། ཕྱི་ལོ་ ༢༠༡༢ ལོར་སློབ་མ་ ༧༥ དང་། ༢༠༡༣ ལོར་སློབ་མ་ ༨༥ ཕྱིར་ལོག་བྱས་ཡོད་པ་མ་ཟད་ ༢༠༡༥ ལོར་སློབ་མ་ཆ་ཚང་ཕྱིར་ལོག་ཡོད་པ་རེད། ཅེས་བརྗོད་བྱུང་།

གསར་འགོད་པ། དོན་གྲུབ།