རྒྱ་གར་ལྷོ་ཕྱོགས་སུ་ཡོད་པའི་བྱེས་ཀྱི་གདན་ས་བཀྲ་ཤིས་ལྷུན་པོ་རུ་༧གོང་ས་མཆོག་གིས་བྱང་ཆུབ་ལམ་རིམ་གྱི་བཀའ་ཆོས་མཇུག་སྐྱོང་མཛད་སྐབས། འཛམ་གླིང་ཐོག་བྱམས་བརྩེ་གོང་འཕེལ་དུ་གཏོང་དགོས་ན་བུད་མེད་ནི་གལ་གནད་ཆེན་པོ་ཆགས་ཡོད་སྟབས། མ་འོངས་པར་ཁོང་གི་ཡང་སྲིད་བུད་མེད་ཅིག་ཕེབས་སྲིད་གསུངས་པ་དེར་རྒྱུ་མཚན་ཡོད་སྐོར་གསུངས་འདུག
ཟླ་འདིའི་ཕྱི་ཚེས་ ༢༠ ཉིན་ནས་བཟུང་༧གོང་ས་མཆོག་གིས་བྱེས་ཀྱི་གདན་ས་བཀྲ་ཤིས་ལྷུན་པོ་རུ་བྱང་ཆུབ་ལམ་རིམ་གྱི་བཀའ་ཆོས་མཇུག་སྐྱོང་མཛད་བཞིན་ཡོད་པ་དང་བསྟུན། ཕྱི་ཚེས་ ༢༢ ཉིན་གྱི་སྔ་དྲོར་རྒྱ་ནག་སྐམ་ས་ཆེན་མོ་དང་ཧོང་ཀོང་། ཨོ་མིན་བཅས་ནས་བཅར་བའི་རྒྱ་རིགས་ཆོས་ཞུ་བ་ ༡༥༠ ལྷག་ལ་དམིགས་བསལ་གྱི་མཇལ་ཁ་དང་བཀའ་སློབ་གནང་ཡོད་པ་དང་། དེ་བཞིན་འབྱུང་ཁམས་འཁྲུག་པའི་རྐྱེན་གྱིས་འཛམ་གླིང་གི་ཡུལ་ལུང་སྤྱི་དང་ལྷག་པར་ཆོས་རྒྱལ་སྲོང་བཙན་སྒམ་པོའི་སྐབས་ནས་བཟུང་འབྲེལ་འདྲིས་ཟབ་པའི་ཁྱིམ་མཚེས་རྒྱལ་ཁབ་བལ་ཡུལ་ནང་ས་ཡོམ་གྱི་གོད་ཆག་དང་ཆབ་སྲིད་ཀྱི་དཀའ་རྙོག་འོག་དཀའ་ངལ་ཆེན་པོ་འཕྲད་བཞིན་པར་ཐུགས་སྨོན་གནང་ཡོད་འདུག
དེ་ཡང་༧གོང་ས་མཆོག་གིས་རྒྱ་རིགས་ཚོར་བཀའ་སློབ་གནང་སྐབས། ང་ཚོ་སྡུག་བསྔལ་ལས་གྲོལ་དགོས་ན་གསོལ་བ་བཏབ་པ་ཙམ་གྱིས་མི་ཕན་པར་ལམ་བསླབ་པ་གསུམ་ལ་བསྟེན་དགོས་སྐོར་བཀའ་སློབ་གནང་དོན། འཇིག་རྟེན་བཀོད་པ་པོ་འདོད་མཁན་ཚོས་དཀོན་མཆོག་ལ་སྨོན་ལམ་རྒྱག་རྒྱུ་ཙམ་རེད། སངས་རྒྱས་པའི་རྗེས་འབྲང་ཚོས་རང་གི་རྩོལ་བ་ལ་བརྟེན་ནས་རྟོགས་པ་སྐྱེ་དགོས། ངོས་ཀྱིས་རྒྱ་ནག་ནང་དུ་རྒྱ་རིགས་ནང་པ་ས་ཡ་ ༣༠༠ ལྷག་ཡོད་པ་གོ་ཐོས་བྱུང་། གལ་ཏེ་ཁྱེད་ཚོར་རང་ཉིད་ནང་པ་སངས་རྒྱས་པའི་ཆོས་པ་ཞིག་ཡིན་བསམ་པའི་འདུ་ཤེས་ཡོད་ན། ནང་ཆོས་ལ་སློབ་གཉེར་བྱེད་དགོས་པ་ལས། ཁ་ནས་རྒྱལ་བ་འོད་དཔག་མེད་མཁྱེན་ནོ། ཞེས་ཡང་ཡང་བཏོན་པ་ཙམ་གྱིས་དེ་ཙམ་ཕན་རྒྱུ་མེད། བཤེས་གཉེན་ཚད་དང་ལྡན་པ་ཞིག་ཡིན་ན་འབུལ་བར་དང་འདོད་བྱེད་རྒྱུ་མ་རེད། དེ་ཤེས་པ་བྱོས། སྲིད་འཛིན་ཞི་ཅིན་ཕིན་དེ་སྔ་ཧྥ་རན་སིའི་རྒྱལ་ས་ཕ་རི་སི་དང་ལྡི་ལིའི་ནང་ཡོད་སྐབས། ནང་ཆོས་ཀྱིས་རྒྱ་ནག་ནང་གི་རིག་གཞུང་སླར་གསོ་ཡོང་རྒྱུར་ཞབས་འདེགས་ཆེན་པོ་བསྒྲུབ་ཐུབ་རྒྱུ་ཡིན་པ་གསུངས་ཡོད། ང་ཚོའི་སྡུག་བསྔལ་ཕལ་མོ་ཆེ་འདོད་ཆགས་དང་ཞེ་སྡང་། གཏི་མུག་བཅས་ཉོན་མོངས་དུག་གསུམ་ལས་ཡོང་གི་ཡོད་པ་དང་། དེ་ལས་གཙོ་བོ་གཏི་མུག་བདེན་འཛིན་ཡིན་པ་རྒྱལ་བས་གསུངས་ཡོད། ང་ཚོ་སྡུག་བསྔལ་ལས་ཇི་ལྟར་གྲོལ་ཐུབ་ཅེས་ན། སྨོན་ལམ་བརྒྱབ་པ་དང་སངས་རྒྱས་ཀྱི་བྱིན་རླབས་ལ་བརྟེན་ནས་གྲོལ་ཐབས་མེད། དེས་ན་ལམ་བསླབ་པ་གསུམ་ལ་བསླབས་ནས་སྡུག་བསྔལ་ལས་ཐར་བ་བྱེད་དགོས། དེ་ལས་ཤེས་རབ་ཀྱི་བསླབ་པ་གཙོ་བོ་ཡིན། བདག་མེད་རྟོགས་པའི་ཤེས་རབ་དེ་ཐོས་བསམ་གྱིས་སྒྲོ་འདོགས་གཅོད་ནས་རང་རྒྱུད་ལ་སྐྱེ་དགོས། སྟོང་པ་ཉིད་བརྗོད་སྐབས་གང་ཡང་མེད་པའི་གོ་དོན་མིན། ཆོས་ཐམས་ཅད་མིང་རྐྱང་བཏགས་ཡོད་ཙམ་དུ་གྲུབ་པ་ཞིག་ཡིན་པ་རྟོགས་ནས། གཟུགས་སྟོང་པའོ། སྟོང་པ་ཉིད་གཟུགས་སོ། ཞེས་གསུང་བཞིན་ཡོད། མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རྩ་བ་ཤེས་རབ་ནས་གསུངས་པ་དེར་ཁྱེད་ཚོས་གཟིགས་ཐུབ། རྩ་བ་ཤེས་རབ་རྒྱ་སྐད་ནང་དུའང་ཡོད། ཟླ་བ་གྲགས་པའི་ཚིགས་གསལ་དེ་ཡང་དེང་སྐབས་ཐེ་ཝན་དུ་རྒྱ་སྐད་ནང་སྒྱུར་བཞིན་ཡོད། ཅེས་དང་།
ཡང་ཁོང་གིས། ཕྱི་ལོ་ ༡༩༥༤།༡༩༥༥ ནང་ངོས་རང་ཟླ་བ་དྲུག་ཙམ་པེ་ཅིང་དུ་སྡོད་རིང་མའོ་ཙེ་ཏུང་དང་ཐེངས་འགའ་ཤས་མཇལ་བ་རེད། ཁོང་ནས་ངོས་ལ་བོད་ནང་དུ་བོད་མིའི་བདེ་དོན་ཡར་རྒྱས་གཏོང་ཕྱོགས་སྐོར་ལམ་སྟོན་གནང་བྱུང་། སྐབས་དེར་ཁོང་གི་བོད་ནང་བཅོས་བསྒྱུར་གཏོང་རྒྱུའི་འཆར་སྣང་དེ་ཡག་པོ་ཞིག་མཐོང་བྱུང་། ངོས་ཀྱི་བསམ་པར་གལ་ཏེ་མའོ་ཙེ་ཏུང་གིས་འཆར་སྣང་གང་ཡོད་པ་དེ་དག་དཔྱིས་ཕྱིན་ལག་བསྟར་ཐུབ་ཡོད་ན། ཕྱིས་སུ་བོད་ནང་དུ་འཕྲད་པའི་དཀའ་ངལ་དེ་འདྲ་རང་ཡོང་རྒྱུ་མ་རེད་བསམ་གྱི་འདུག མའོ་ཡིས་ངོས་ལ་ཁྱེད་རང་གི་བསམ་བློ་གཏོང་སྟངས་དེ་ཚན་རིག་དང་མཐུན་པ་ཞིག་རེད། འོན་ཀྱང་ཆོས་དེ་དུག་རེད། ཅེས་གསུངས་བྱུང་། གལ་ཏེ་ཁོང་ད་དུང་བཞུགས་ནས་དཔལ་ནཱ་ལེནྡྲའི་གཞུང་ལུགས་ལ་སློབ་གཉེར་གནང་ཡོད་ཚེ་བསམ་ཚུལ་དེར་འགྱུར་བ་འགྲོ་རྒྱུ་རེད་བསམ་དྲན་བཞིན་འདུག ཅེས་གསུངས་ཡོད་པ་དང་། དེནས་དྲི་བ་རྣམས་ལ་བཀའ་ལན་བསྩལ་བའི་མཇུག་ཏུ་གལ་ཏེ་རྒྱ་ནག་ནང་དུ་ནང་ཆོས་དར་སྤེལ་བྱུང་བ་ཡིན་ན། ཐེངས་འདིར་སེ་ར་ཐེག་ཆེན་གླིང་དུ་སེམས་དང་སྲོག་གི་བགྲོ་གླེང་ལྷན་ཚོགས་ཚོགས་པ་ལྟར། འབྱུང་འགྱུར་རྒྱ་ནག་ཏུ་འཚོགས་རྒྱུ་ཡོང་མདོག་ཁ་པོ་རེད། ཅེས་བཀའ་སློབ་བསྩལ་ཡོད་འདུག
དེ་ཡང་ཕྱི་ཚེས་ ༢༡ ཉིན་གྱི་ཕྱི་དྲོར་༧གོང་ས་མཆོག་གིས་མ་འོངས་པར་ཁོང་གི་ཡང་སྲིད་བུད་མེད་ཅིག་ཡིན་སྲིད་གསུངས་པ་དེར་རྒྱུ་མཚན་ཡོད་སྐོར་བཀའ་གནང་དོན། ཆོས་ཀྱི་སྐད་ཆ་གང་ཡང་མིན། ལུས་ཀྱི་གྲུབ་ཆའི་ཆ་ནས་བུད་མེད་ཀྱིས་རང་གི་མངལ་དུ་ཕྲུ་གུ་ཟླ་བ་དགུ་ཙམ་རིང་ཉར། ཕྲུ་གུ་སྐྱེས་རྗེས་རང་བཞིན་ལྷན་སྐྱེས་ཀྱི་ནུ་ཞོ་ཐོན། དེ་འདྲའི་ཐོག་ནས་བདག་པོ་རྒྱག་རྒྱུ་དེ་མི་ཙམ་མ་ཟད། ཁྱི་དང་བྱ། བྱིའུ་སོགས་མང་པོ་ཞིག་གིས་ཕྲུ་གུ་དེ་རང་མགོ་མ་ཐོན་བར་མས་ཧ་ཅང་ཡག་པོ་བལྟ་གི་འདུག འདི་རང་བཞིན་ལུས་ཀྱི་གྲུབ་ཆའི་སྟེང་ནས་འགྲོ་རྒྱུ་ཞིག་རེད། དེར་བརྟེན་གཞན་ལ་བརྩེ་བ་བྱ་རྒྱུ་དང་། གཞན་སྡུག་བསྔལ་གྱིས་མནར་བ་ལ་མི་བཟོད་པའི་བློ་དེ་བུད་མེད་ལ་ཤུགས་ཆེ་བ་ཡོད་པའི་བཟོ་འདྲ་བོ་ཞིག་འདུག་པར་བརྟེན། བྱམས་བརྩེ་ཡར་རྒྱས་གཏོང་རྒྱུའི་ལས་ཀར་དམིགས་བསལ་ཐོག་ནུས་པ་སྐྱེ་དགོས་ཀྱི་འདུག་ཅེས་བརྗོད་སྐབས། བུད་མེད་ཚོ་གནད་འགག་ཧ་ཅང་ཆེན་པོ་ཆགས་ཀྱི་ཡོད་སྟབས། མ་འོངས་པར་གལ་སྲིད་ཏཱ་ལའི་བླ་མའི་ཡང་སྲིད་མུ་མཐུད་ནས་ཏཱ་ལའི་བླ་མའི་སྒྲིག་འཛུགས་འདི་ཡོད་པ་ཞིག་དང་། གནས་དགོས་པ་ཞིག མུ་མཐུད་ནས་ཡང་སྲིད་ཡོང་བ་དེ་འདྲ་ཆགས་པ་ཡིན་ན། བུད་མེད་ཀྱི་རྟེན་ཅན་ཡོང་སྲིད་ཀྱི་རེད། ཅེས་ངོས་ཀྱིས་བརྗོད་པ་འདི་རྩེད་མོ་བྱས་ནས་བཤད་པ་མིན། དེར་རྒྱུ་མཚན་ཕྲན་བུ་ཡོད། ང་ཚོ་བོད་ཀྱི་ལོ་རྒྱུས་ལ་ཆ་མཚོན་ནའང་། རྡོ་རྗེ་འཕགས་མོའི་གཙོས་སྐྱེ་ཕྲེང་མཐོ་པོ་བརྩི་རྒྱུའི་ནང་བུད་མེད་ཡོད། དོན་གྱི་བདག་པོ་བཅོམ་ལྡན་འདས་རེད། ཁོང་གིས་དགེ་སློང་ཕ་དང་མ་ཞེས་ཐོབ་ཐང་འདྲ་མཉམ་གནང་ཡོད། ཅེས་དང་།
རྒྱ་གཞུང་གིས་༧གོང་ས་མཆོག་གི་ཡང་སྲིད་ངོས་འཛིན་ཞུ་ཕྱོགས་ལ་ཐེ་ཇུས་བྱེད་བཞིན་པའི་སྐོར་ལ་ཁོང་གིས། དེང་སྐབས་རྒྱ་ནག་གཞུང་གིས་ཏཱ་ལའི་བླ་མའི་ཡང་སྲིད་ཡོང་གི་མིན་ཟེར་རྒྱུ་བཟོ་འདྲ་བོ་དང་། ཡང་སྲིད་བུད་མེད་ཡོང་གི་རེད་ཟེར་རྒྱུ་དེ་ཚོའི་གྲས་དེ་འོས་སུ་མ་མཆིས་པ་དང་། ཆོས་དང་འགལ་ལུགས་ཤོད་ཀྱི་འདུག དེ་དག་དགོད་སྤྲོ་དགོས་པ་རེད། ངོས་ཀྱིས་རྩེད་མོ་རྩེ་ནས་བཤད་ཀྱི་ཡོད། གུང་ཁྲན་ཏང་གིས་ཏཱ་ལའི་བླ་མའི་ཡང་སྲིད་སྐོར་ལ་ཇུས་གཏོགས་བྱེད་དགོས་ན། སྔོན་ལ་ལོ་རྒྱུས་ནང་བོད་ཀྱི་བླ་ཆེན་དེ་འདྲར་རྒྱ་ནག་གོང་མས་ཐེ་གཏོགས་བྱས་པ་དེ་འདྲ་བྱུང་ཡོད། དེའི་གནས་སྐབས་སུ་རྒྱ་ནག་གོང་མ་ཡང་ནང་པ་རེད། སྐྱེ་བ་སྔ་ཕྱི་ཁས་ལེན་གྱི་ཡོད། མཆོད་ཡོན་སྦྱིན་བདག་བྱས་ནས་ཐུན་མོང་མ་ཡིན་པའི་འབྲེལ་བ་ཡོད། ད་ལྟའི་རྒྱ་ནག་གི་མགོ་ཁྲིད་ཚོ་ཆོས་ཁས་མི་ལེན་མཁན་ཞིག་རེད། དེར་བརྟེན་ཆོས་ཁས་ལེན་མཁན་གྱིས་བྱས་པ་ལྟར་ཆོས་ཁས་མི་ལེན་མཁན་ཞིག་གིས་བྱས་པ་དེ་འོས་ཤིང་འཚམ་པ་ཞིག་མིན། ངོས་ཀྱིས་རྩེད་མོ་དང་སྦྲགས་སྔོན་ལ་གུང་ཁྲན་ཏང་གིས་སྐྱེ་བ་སྔ་ཕྱིའི་ལྟ་གྲུབ་འདི་ཁས་ལེན་དགོས་རེད། འདི་ཁས་ལེན་པའི་ཐོག་ནས་སྔོན་ལ་མའོ་ཙེ་ཏུང་གི་ཡང་སྲིད་ངོས་འཛིན་བྱེད་དགོས་པ་དང་། དེའི་རྗེས་སུ་ཏིང་ཞོ་ཕིང་གི་ཡང་སྲིད་ངོས་འཛིན་བྱེད་དགོས། དེ་ནས་ཏཱ་ལའི་བླ་མའི་ཡང་སྲིད་སྐོར་ཇུས་གཏོགས་བྱེད་ན་འོས་པ་རེད་ཅེས་ངོས་ནས་རྒྱུན་དུ་ཤོད་ཀྱི་ཡོད། ཅེས་གསུངས་འདུག
རི་བོ་དགེ་ལུགས་པའི་བླ་མ་ཐུབ་བསྟན་བཟོད་པ་རིན་པོ་ཆེ་མཆོག་གིས། ད་ལོ་བལ་ཡུལ་ནང་ས་ཡོམ་གོད་ཆག་ཚབས་ཆེན་བྱུང་བ་དང་། ཆབ་སྲིད་ཀྱི་དཀའ་རྙོག་གིས་དེང་སང་དཀའ་ངལ་མང་པོ་འཕྲད་བཞིན་ཡོད་སྟབས། ཐེངས་འདིའི་གསུང་ཆོས་ལ་བཅར་བའི་བལ་ཡུལ་གྱི་དད་ལྡན་ཆོས་ཞུ་བ་རྣམས་ལ་ལམ་སྟོན་གྱི་བཀའ་སློབ་ཅིག་བསྩལ་གནང་ཡོང་བའི་གསོལ་འདེབས་ཞུས་པ་ལྟར། ཁ་སང་ཕྱི་ཚེས་ ༢༤ ཉིན་༧གོང་ས་མཆོག་གིས་ཐུགས་སྨོན་བཀའ་སློབ་གནང་དོན། འབྱུང་བ་འཁྲུག་པའི་རྐྱེན་གྱིས་སྔ་མོ་ཆར་ཞོད་ཞེ་དྲགས་མེད་སར་དེང་སང་ཆར་ཤོད་ཆེན་པོ་བབས་པའི་རྐྱེན་གྱིས་ཆུ་ལོག་བྱུང་གི་ཡོད་པ་རེད། བར་སྐབས་ཆིན་ནེ་(Chennai)ཁུལ་ལ་ཆུ་ལོག་ཆེན་པོ་བྱུང་སྟེ། མི་མང་པོར་དཀའ་ངལ་ཞེ་དྲགས་འཕྲད་པ་རེད། དེ་བཞིན་བལ་ཡུལ་ནང་ས་ཡོམ་གྱི་རྐྱེན་གྱིས་དཀའ་ངལ་ཞེ་དྲགས་འཕྲད་ཀྱི་ཡོད་ཀྱང་ང་ཚོར་གཞན་དག་ཅི་བྱེད་རྒྱུ་ཡོད་པ་མ་རེད། སྐབས་དེར་ངས་ཞལ་འདེབས་འདྲ་པོ་ཕྲན་བུ་ཞིག་ཕུལ་བ་ཡིན། ང་རང་ཚོ་བོད་པའི་དགོན་པ་སོགས་མང་པོ་ཞིག་གིས་རོགས་པ་ཞེ་དྲགས་ཡག་པོ་བྱས་པའི་སྐད་ཆ་གོ་རྒྱུ་འདུག དེ་ཚོར་བལ་ཡུལ་ནང་གི་རིས་མེད་ཀྱི་ཆོལ་ཁ་ཁག་གི་གཙོས་པའི་ཧུར་ཐག་འབད་ཐག་གནང་བ་དེར་བསྔགས་བརྗོད་ཡོད་ལ། ཐུགས་རྗེ་ཆེ་ཞེས་ཞུ་ཡི་ཡོད། ཅེས་དང་།
ཁོང་གིས་མུ་མཐུད། མིའི་ནུས་པས་མ་འདང་བ་ཡིན་ན་སྨོན་ལམ་བརྒྱབ་ནས་འདུག་རྒྱུ་མ་གཏོགས་གང་ཡང་ཡོད་པ་མ་རེད། དེ་རིང་གཉུག་མར་གནས་པ་དང་གློ་བུར་དུ་ལྷགས་པ་བཅས་མི་འབོར་ཆེན་ཞིག་འདིར་འདུས་ཡོད་པ་རེད། ང་ཚོ་འདིར་འདུས་པ་དེ་ཚོང་དང་ལྟད་མོ་ཞེ་དྲགས་ཡོད་ནས་འདུས་པ་མ་རེད། སངས་རྒྱས་ཀྱི་ཆོས་ཀྱི་སྙིང་པོ་དག་པའི་གཞན་གཅེས་པའི་བྱང་ཆུབ་ཀྱི་སེམས་ཞེས་པ་དེ་ཆགས་ཀྱི་ཡོད་པ་དང་། དེ་འདྲའི་ཆོས་ཚུལ་དེ་ང་ཚོས་འདིར་འཆད་ཉན་བྱེད་ཀྱི་ཡོད་སྟབས། སེམས་ཅན་ཐམས་ཅད་ཀྱི་དོན་དུ་ང་རང་ཚོས་སེམས་སྐྱེད་ཀྱི་ཡོད་པ་རེད། བྱང་ཆུབ་མཆོག་ཏུ་སེམས་ནི་བསྐྱེད་པར་བགྱི། །སེམས་ཅན་ཐམས་ཅད་བདག་གིས་མགྲོན་དུ་གཉེར། །བྱང་ཆུབ་སྤྱོད་མཆོག་ཡིད་འོང་སྤྱད་པར་བགྱི། །འགྲོ་ལ་ཕན་ཕྱིར་སངས་རྒྱས་འགྲུབ་པར་ཤོག་ཅེས་ཉིན་རེ་བཞིན་དུ་ང་ཚོས་བསམ་བློ་གཏོང་བཞིན་ཡོད་པ་དང་། བྱེ་བྲག་ཏུ་འཛམ་བུ་གླིང་འདིའི་སྒང་གི་སེམས་ཅད་མཐའ་དག་དང་དེའི་ནང་ནས་འགྲོ་བ་མིའི་རིགས། སྐབས་སུ་བབ་པ་ཁྱིམ་མཚེས་ཡུལ་ལུང་ནང་དཀའ་ངལ་ཞེ་དྲགས་འཕྲད་བསྡད་ཡོད་པ་དེར་གཞན་དག་མ་བྱུང་བ་ཡིན་ནའང་ཚང་མས་ཐུགས་སྨོན་བདེན་ཚིག་ག་ཚོད་ཡོང་ཡོང་གནང་རོགས། ཞེས་གསུངས་འདུག
བོད་མིའི་སྒྲིག་འཛུགས་ཀྱི་དྲ་བ་སོགས་ནས་པདྨ་མཚོས་བསྡུ་སྒྲིག་བྱས།
བརྟེན་ནོར་ཡོད་པས་བརྟན་ཞེས་གོ་རོགས།
༧གོང་ས་རྒྱལ་དབང་ཐམས་ཅད་མཁྱེན་པ་སྐུ་འཕྲེང་བཅུ་བཞི་པ་ངག་དབང་བློ་བཟང་བསྟན་འཛིན་རྒྱ་མཚོ་མཆོག་གི་སྐུ་ཚེ་ཡུན་རིང་བརྟེན་ཞིང་ཐུགས་ཀྱི་འགྲོ་དོན་ལྷུན་གྱི་འགྲུབ་པར་སྨོན་དང་མགོན་པོ་མཆོག་གི་གདུལ་བྱར་ཚེ་རབས་ནས་ཚེ་རབས་སྐྱེས་པར་སྨོན་འདུན་ཞུ།