དེ་རིང་སྔ་དྲོར་གཉན་ནད་རེག་དུག་སྔོན་འགོག་བྱེད་ཐབས་སྐོར་གྱི་བོད་སྐད་འགུལ་རིས་བརྙན་ཐུང་ཞིག་དབུ་འབྱེད་གནང་སོང་།
དེ་རིང་སྔ་དྲོའི་ཆུ་ཚོད་ ༡༡།༣༠ ཐོག་གངས་སྐྱིད་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་དང་ཨ་རིའི་སི་ཊན་ཧྥོར་ཌི་གཙུག་ལག་སློབ་ཆེན་(Stanford University )ཀྱིས་ཆེད་འཛུགས་གནང་པའི་གཉན་ནད་སློབ་གསོ་ཚོགས་པ་(TeachAIDS )གཉིས་མཉམ་འབྲེལ་ཐོག གཉན་ནད་རེག་དུག་(HIV AIDS)སྔོན་འགོག་བྱེད་ཐབས་སྐོར་ཀྱི་བོད་སྐད་འགུལ་རིས་བརྙན་ཐུང་ཞིག་དབུ་འབྱེད་གནང་སོང་།
ལས་གཞིའི་འབྲེལ་ཡོད་ལས་བྱེད་ཉི་མ་རྒྱལ་མཚན་ལགས་ཀྱིས་འགུལ་རིས་བརྙན་ཐུང་དེ་ངོ་སྤྲོད་གནང་སྐབས། སི་ཊན་ཧྥོར་ཌི་གཙུག་ལག་སློབ་ཆེན་གྱིས་ལོ་ལྔ་རིང་ཆེད་ལས་པ་མང་པོས་གཉན་ནད་རག་དུག་སྔོན་འགོག་སྐོར་ལ་ཞིབ་འཇུག་གནང་བ་བརྒྱུད་བརྙན་ཐུང་དེ་བཟོས་ཡོད་པ་དང་། ད་ལྟའི་ཆར་བརྙན་ཐུང་དེ་འཛམ་བུ་གླིང་གི་རྒྱལ་ཁབ་ ༨༠ ནང་སྐད་རིགས་མི་འདྲ་བ་ ༢༦ ཐོག་བཟོས་ཡོད་པ་དང་། ལོ་ཤས་ཀྱི་སྔོན་དུ་འཕྲོད་བསྟེན་ལས་ཁུངས་ནས་གཉན་ནད་སློབ་གསོ་ཚོགས་པར་གཉན་ནད་རེག་དུག་སྔོན་འགོག་སྐོར་ནས་གློག་བརྙན་ཞིག་བཟོ་ཐུབ་ན་ཡག་པོ་ཡོད་པའི་རེ་སྐུལ་གནང་བ་ལྟར། གོང་བརྗོད་གློག་ཐུང་དེ་བོད་སྒྱུར་བྱས་ཡོད་པ་མ་ཟད། བོད་ཀྱི་སྲོལ་རྒྱུན་དང་མཐུན་པའི་འགུལ་རིས་མཉམ་དུ་བོད་སྐད་དང་བོད་ཡིག་ཟུང་འབྲེལ་ཐོག་བཟོས་ཡོད་སྐོར་བརྗོད་སོང་།
བརྙན་ཐུང་དབུ་འབྱེད་ཐོག་འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས་བརྙན་ཐུང་གི་བྱུང་རིམ་ངོ་སྤྲོད་གནང་སྐབས། ད་ལྟའི་ཆར་འཛམ་བུ་གླིང་སྤྱི་ཡོངས་ཀྱི་ནང་གཉན་ནད་རེག་དུག་གི་ན་ཚ་དེ་དཀའ་ངལ་ཆེན་པོ་ཞིག་ཆགས་བསྡད་ཡོད་པ་དང་། བཙན་བྱོལ་བོད་མིའི་སྤྱི་ཚོགས་ནང་དུའང་གཉན་ནད་རེག་དུག་ཡོད་མཁན་གང་ལ་གང་འཚམ་ཞིག་ཡོད་པ་དང་། དེ་བཞིན་བོད་ནང་ཡིན་ནའང་ན་ཚ་དེ་དཀའ་ངལ་ཆེན་པོ་ཞིག་ཆགས་ཡོད་ལ། ད་ལྟའི་ཆར་ན་ཚ་དེ་བཅོས་ཐབས་མེད་པ་ཞིག་ཆགས་ཡོད་ཀྱང་། སྔོན་འགོག་བྱེད་ཐུབ་པའི་ན་ཚ་ཞིག་ཆགས་ཡོད་སྟབས། འཛམ་གླིང་སྤྱི་ཡོངས་ཀྱི་ནང་གཉན་ནད་རེག་དུག་སྔོན་འགོག་གི་གོ་རྟོགས་སྤེལ་ཆེད། གཉན་ནད་སློབ་གསོ་ཚོགས་པས་རྒྱལ་ཁབ་ ༨༠ ནང་སྐད་རིགས་ ༢༦ ཐོག་གློག་བརྙན་དེ་བཟོ་བསྐྲུན་བྱས་ཡོད་པ་དང་། ད་ལན་བོད་སྐད་ནང་བསྒྱུར་བ་དེ་སྐད་རིགས་ ༢༧ པ་ཆགས་ཡོད་པ་དང་། བརྙན་ཐུང་དེ་རྒྱ་བལ་འབྲུག་གསུམ་གྱི་གཙོས་ཕྱི་རྒྱལ་ཁག་དང་ལྷག་པར་དུ་བོད་ནང་ཁྱབ་ཐུབ་པའི་ཆེད་དུ། བོད་ཀྱི་དྲ་བརྙན་གསར་འགྱུར་སོགས་བརྒྱུད་ནས་དྲ་ཐོག་ནས་ལྟ་ཐུབ་པ་བཟོས་ཡོད་ལ། མ་འོངས་པར་འོད་སྡེར་ ༡༠༠༠༠ བཟོ་སྐྲུན་བྱས་ནས་འགྲེམས་སྤེལ་གནང་འཆར་ཡོད་སྐོར་དང་། བརྙན་ཐུང་ནང་སྐད་དང་འགུལ་གཟུགས་ཚབ་བྱེད་པ་བླ་སྨན་པ་ཚེ་བརྟན་ལགས་དང་གཞས་པ་ཕུར་བཀྲིས་རྣམ་རྒྱལ་གཉིས་ཀྱི་གཙོས་རོགས་རམ་གནང་མཁན་ཚང་མར་ཐུགས་རྗེ་ཆེ་ཞུས་གནང་སོང་།
ཡང་འཕྲོད་བསྟེན་བཀའ་བློན་མཆོག་གིས་གཉན་ནད་རེག་དུག་སྔོག་འགོག་གི་ལས་གཞི་དེ་དང་འབྲེལ་བའི་གསལ་བསྒྲགས་ནང་། གཉན་ནད་རེག་དུག་སྟེ་ (HIV AIDS )ཞེས་པའི་ནད་གཞི་ནི་ལོ་ན་རྒན་གཞོན་དང་། ཕོ་མོ། དབུལ་ཕྱུག་བཅས་དབྱེར་མེད་ལ་འགོ་གི་ཡོད། ན་ཚ་འདི་གྲྭ་བཙུན་ལའང་འགོ་སྲིད། དེའི་ཁྱིམ་ཚང་དང་། སྤྱི་ཚོགས། དེ་ནས་རྒྱལ་ཁབ་ཁྱོན་ཡོངས་ལ་ཉམས་ཉེས་སུ་འགྲོ་ངེས་རེད། ན་ཚ་དེར་བཅོས་ཐབས་མེད་ཀྱང་ང་ཚོས་གོ་རྟོགས་མཐིལ་ཕྱིན་པ་ཞིག་བྱས་པའི་སྒོ་ནས་ ནད་གཞི་དེར་སྔོན་འགོག་བྱེད་ཐུབ། ང་ཚོ་བོད་མི་རྣམས་གཟུགས་གཞི་བདེ་ལ་གཉན་ནད་རེག་དུག་ལ་གདོང་ལེན་ཐུབ་པ་ཡོང་བར་ ནད་གཞི་ཁྱབ་བརྡལ་འགྲོ་བ་དེ་འགོག་རྒྱུ་ནི་གལ་ཆེ་ཤོས་ཤིག་ཆགས་ཡོད། དེ་ནི་ང་ཚོའི་འཕྲོད་བསྟེན་སྲུང་སྐྱོབ་དང་འབྲེལ་བའི་ལས་གཞི་ཛ་དྲག་ཅིག་དང་། སྤྱི་ཚོགས་གཅེས་སྲུང་ལ་ཤིན་ཏུ་མཁོ་བའི་གོམ་པ་ཞིག་རེད།
ང་ཚོས་ནད་གཞི་དེར་རྒྱུས་མངའ་ལོན་པ་དང་ཕྱོགས་མཚུངས་སྤྱི་ཚོགས་ཀྱི་མཐོང་ཚུལ་ངན་པ་རྣམས་སེལ་ཏེ་སྙིང་རྗེ་བརྩེ་སེམས་ཀྱི་ཐོག་ནས་གནས་ཐབས་བྱ་དགོས། གཉན་ནད་རེག་དུག་ (HIV AIDS) གིས་མནར་བའི་ནད་པ་རྣམས་ལ་བྱམས་སྙིང་རྗེ་དང་། གུས་བཀུར་བྱ་རྒྱུ་ནི་གཙོ་ཆེ་ཤོས་ཤིག་རེད། ང་ཚོ་ཆེ་མཐོང་ལྡན་པའི་མི་ཞིག་ཡིན་པའི་ཆ་ནས་( HIV AIDS )གཉན་ནད་རེག་དུག་གི་མི་ཕན་ཚུན་དབར་འབྲེལ་ལམ་བྱེད་ཕྱོགས་ཐད་ཤུགས་རྐྱེན་མ་ཐེབས་པར་བྱེད་དགོས། ཞེས་གསུངས་འདུག
གསར་འགོད་པ། པདྨ་མཚོ།
