ཏུར་ཀི་སྤྱི་མཐུན་རྒྱལ་ཁབ་ཀྱི་རྒྱལ་ས་ཨན་ཀ་རའི་ནང་འགལ་རྫས་བཀལ་གཏོར་བཏང་སྟེ་དམག་མི་དང་སེར་མི་ ༨༩ ཤི་རྨས་བྱུང་ཡོད་འདུག
ཁ་སང་ཕྱི་དྲོའི་ཆུ་ཚོད་ ༦།༣༠ ཡས་མས་སུ་ཨེ་ཤ་ཡའི་ནུབ་རྒྱུད་དང་ཡུ་རོབ་གླིང་གི་ལྷོ་ཤར་གྱི་ཏུར་ཀི་སྤྱི་མཐུན་རྒྱལ་ཁབ་ (Turkey) ཀྱི་རྒྱལ་ས་ཨན་ཀ་ར་ (Ankara) ནང་ཡོད་པའི་ཏུར་ཀིའི་གྲོས་ཚོགས་ཁང་དང་སྲིད་གཞུང་གི་ལྟེ་གནས། དམག་སྲིད་སྤྱི་ཁྱབ་ཁང་གི་ཉེ་འགྲམ་དུ་འགལ་རྫས་ཐོགས་པའི་རླངས་འཁོར་ཞིག་དམག་མིའི་སྤྱི་སྤྱོད་རླངས་འཁོར་གཉིས་ཀྱི་བར་དུ་བཀལ་གཏོར་བཏང་བའི་ཁྲོད་ཉུང་མཐར་མི་ ༢༨ བསད་པ་དང་མི་ ༦༡ ལྷག་ལ་རྨས་སྐྱོན་ཚབས་ཆེན་ཕོག་སྟེ་གྲོང་ཁྱེར་སྨན་ཁང་ཁག་ཏུ་བསྐྱེལ་དགོས་བྱུང་ཡོད་པ་དང་། ད་ལྟ་ཨན་ཀ་ར་གྲོང་ཁྱེར་ཉེན་རྟོག་པས་གསང་བའི་བརྙན་ལེན་པར་ཆས་སྤྱད་དེ་འགལ་རྫས་དོན་རྐྱེན་སློང་མཁན་ལ་ཞིབ་བཤེར་བྱེད་བཞིན་པའི་སྒང་ཡིན་འདུག
ཏུར་ཀིའི་སྲིད་འཛིན་ཊེ་ཡེབ་ཨར་ཌོ་གྷན་ (Tayyip Erdogan) གྱིས། ང་ཚོས་མུ་མཐུད་མི་གསོད་དོན་རྐྱེན་སློང་མཁན་སློང་མཁན་ཚོར་འཐབ་འཛིང་བྱེད་དགོས། ཁོ་ཚོར་འགྲོ་བ་མིའི་བདེ་སྡུག་གི་འདུ་ཤེས་དང་ཀུན་སློང་ཡག་པོ་ཡོད་མ་རེད། ཉི་མ་རེ་རེའི་རྒོལ་འཛིང་གི་རྒྱབ་ལོགས་ན་བརྒྱུད་སྐུལ་གཏོང་མཁན་འཇིགས་སྐུལ་དྲག་སྤྱོད་པ་མང་པོ་ཡོད་རེད། ཅེས་བརྗོད་འདུག
ཏུར་ཀི་སྤྱི་མཐུན་རྒྱལ་ཁབ་ཀྱི་སྲིད་བློན་གཞོན་པ་དང་སྲིད་གཞུང་གི་མགྲིན་ཚབ་པ་ནུ་མན་ཀུར་ཊུལ་མུ་སི་ (Numan Kurtulmus) ཡིས། ཐེངས་འདིའི་འགལ་རྫས་བཀལ་གཏོར་གྱི་དོན་རྐྱེན་ཁྲོད་དམག་མི་དང་མི་སེར་ ༨༩ ལ་ཤི་རྨས་ཚབས་ཆེན་བྱུང་ཡོད་པ་དང་། འཇིགས་སྐུལ་དྲག་སྤྱོད་པའི་འགལ་རྫས་དེ་ཁ་སང་ཕྱི་དྲོར་འགྲིམ་འགྲུལ་འདུ་འཛི་ཆེ་བའི་སྐབས་སུ་གྲོས་ཚོགས་ཁང་ནས་མི་ཊིར་ ༥༠༠ མཚམས་སུ་བཀལ་གཏོར་བཏང་བ་རེད་ཅེས་བརྗོད་ཅིང་། ཁྲིམས་ཁང་བློན་ཆེན་བྷི་ཀེར་བྷོ་ཙ་ཌ་གྷི་ (Bekir Bozdag) ཡིས། ཐེངས་འདིའི་འགལ་རྫས་དོན་རྐྱེན་དེ་འཇིགས་སྐུལ་དྲག་སྤྱོད་པས་འཚོགས་བཞིན་པའི་གྲོས་ཚོགས་ལ་དམིགས་པ་ཞིག་ཡིན་སྐོར་བརྗོད་འདུག
གནས་ཚུལ་ལྟར་ན། ཏུར་ཀིའི་རྒྱལ་ནང་དུ་འབྱུང་བཞིན་པའི་ཟིང་འཁྲུག་གི་འབྱུང་རྐྱེན་གཙོ་བོ་ཁ་ཆེ་འཇིགས་སྐུལ་དྲག་སྤྱོད་ཚོགས་པ་དང་འབྲེལ་བ་མ་ཟད། ཏུར་ཀི་སྤྱི་མཐུན་རྒྱལ་ཁབ་ཀྱི་ཁྱིམ་མཚེས་རྒྱལ་ཁབ་སི་རི་ཡ་ (Syria) དང་ལྷོ་ཤར་ཁུལ་གྱི་ཀུར་ཌེ་སི་ཐན་ (Kurdistan) ཁ་ཆེ་མི་རིགས་བར་གྱི་མི་ལོ་བཅུའི་འཁྲུག་རྩོད་ནང་ཚུད་པ་ཞིག་ཡིན་འདུག
ཕྱི་ལོ་ ༡༩༩༠ ལོ་ནས་ཀུར་ཌེ་ཤཱ་ཁ་ཆེ་དམངས་དམག་ཚོགས་པའི་ (PKK) འཐབ་འཁྲུག་དེ་འདས་ལོའི་ཕྱི་ཟླ་ ༧ ནང་ཞི་འཇགས་གཏོང་ཐུབ་ཡོད་ཅིང་། འཁྲུག་འཛིང་གི་རྩོད་རྙོག་གཙོ་བོ་ཁ་ཆེ་མི་རིགས་ས་གནས་རང་སྐྱོང་ཡིན་པ་རེད།
ཀུར་ཏེ་ཤཱ་ཁ་ཆེ་དམངས་དམག་དང་ངལ་རྩོལ་ཚོགས་ཁག་གཉིས་བར་གྱི་འཁྲུག་འཛིང་ལ་བརྟེན་ནས་འདས་ལོའི་ཕྱི་ཟླ་ ༡༠ ནང་ཏུར་ཀིའི་རྒྱལ་ས་ཨན་ཀ་རའི་མེ་འཁོར་ས་ཚུགས་སུ་འགལ་རྫས་བཀལ་གཏོར་བཏང་སྟེ་ཡུལ་མི་དང་དམངས་དམག་ ༡༠༠ ལྷག་དམར་གསོད་ཐེབས་ཡོད་པ་དང་། འདས་ལོའི་ཕྱི་ཟླ་ ༡ པོའི་ནང་ཏུར་ཀིའི་གྲུ་ཁ་ཨ་སི་ཊན་བྷུལ་ (Istanbul) ནང་འགལ་རྫས་བཀལ་གཏོར་ཁྲོད་དུ་འཇར་མན་གྱི་ཡུལ་སྐོར་སྤྲོ་འཆམ་པ་ ༡༠ དམར་གསོད་བཏང་བ་དེ་ཡང་ཡུལ་དེའི་ཁ་ཆེ་འཇིགས་སྐུལ་དྲག་སྤྱོད་པ་ཡིན་པར་དོགས་གཞི་བྱེད་ཀྱི་ཡོད་པ་མ་ཟད། འདས་ལོའི་ཕྱི་ཟླ་ ༧ ནང་སི་རི་ཡའི་མཐའ་མཚམས་སུ་འཁེལ་བའི་ཏུར་ཀིའི་གྲོང་རྡལ་སུ་རུ་ཁི་ (Suruc) ནང་འགལ་རྫས་བཀལ་གཏོར་ཁྲོད་མི་ ༣༠ དམར་གསོད་བཏང་ཡོད་པ་རེད།
གསར་འགོད་པ། པདྨ་རྒྱལ།
