དེ་རིང་སྔ་དྲོར་བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བཅུ་པ་དབུ་འཛུགས་ཀྱི་མཛད་སྒོའི་ཐོག་ས་རཱ་མཐོ་སློབ་ཀྱི་སློབ་སྤྱི་ལགས་ནས་ད་ལྟ་འཇོན་ཐང་ངོམ་པའི་དུས་ཚོད་ཡིན་པ་ལས་བོད་འཐོར་ཞིག་ཏུ་གཏོང་བར་བསམ་བློ་གཏང་ན་བརྒྱ་ཆ་བརྒྱ་ཐམ་པ་ནོར་འཁྲུལ་ཡིན་སྐོར་བརྗོད་སོང་།
དེ་རིང་སྔ་དྲོའི་ཆུ་ཚོད་ ༩ ཙམ་ལ་ས་རཱ་བོད་ཀྱི་མཐོ་རིམ་སློབ་གཉེར་ཁང་དུ། བོད་རིགས་མཐོ་རིམ་སློབ་མའི་ཚོགས་ཆེན་ཐེངས་བཅུ་པ་དབུ་འཛུགས་ཀྱི་མཛད་སྒོ་ཚོགས་སོང་བ་དང་། མཛད་སྒོའི་ཐོག་སྐུ་མགྲོན་གཙོ་བོ་ཤེས་རིག་ལས་ཁུངས་ཤེས་ཡོན་ལྷན་ཚོགས་ཀྱི་ཡིག་ཚང་གི་འགན་འཛིན་རྒན་ཚེ་རིང་བསམ་གྲུབ་ལགས་དང་། དམིགས་བསལ་སྐུ་མགྲོན་བོད་ཀྱི་ཐེབས་རྩའི་ཇུས་སྟོན་པ་ཚེ་དབང་རིག་འཛིན་ལགས་རྣམ་གཉིས་དང་། ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་ཀྱི་དབུས་མཐོ་སློབ་ཀྱི་དགེ་ལས་སློབ་ཕྲུག་དང་། དེ་བཞིན་རྒྱ་གར་རྒྱལ་ཡོངས་ནང་ཡོད་པའི་བོད་ཀྱི་མཐོ་རིམ་སློབ་གྲྭ་ཁག་དང་རིག་གནས་ཁྱབ་ཁོངས་ཀྱི་དགོན་སྡེ་བཅས་ནས་ཁྱོན་ཚོགས་ཞུགས་པ་ ༦༥ མ་ཟིན་ཙམ་འཛོམས་ཀྱི་ཡོད་པ་དང་། མཛད་སྒོའི་ཐོག་སྐུ་མགྲོན་རྣམ་གཉིས་ནས་ཐེངས་འདིའི་ཚོགས་ཆེན་གྱི་བརྗོད་གཞི་གཙོ་བོ་སྟེ་༼རང་ངོ་རང་ཤེས། རང་འགན་རང་འཁུར༽ཞེས་པའི་དཔེ་དེབ་ཅིག་དབུ་འབྱེད་གནང་བ་དང་སྦྲགས། བོད་དབྱིན་གཉིས་ཀྱི་རྩོམ་ཡིག་འགྲན་སྡུར་ཁྲོད་ཨང་རིམ་སོན་པའི་སློབ་ཕྲུག་རྣམས་ལ་ཕྱག་འཁྱེར་དང་བྱ་དགའ་གནང་སོང་།
མཛད་སྒོའི་ཐོག་གོ་སྒྲིག་མཐུན་ཚོགས་ཀྱི་ཚོགས་གཙོ་ཡེ་ཤེས་དཔལ་ལྡན་ལགས་ཀྱིས་བོད་རིགས་མཐོ་རིམ་སློབ་མའི་ཚོགས་ཆེན་གྱི་རྒྱབ་ལྗོངས་དང་ཐེངས་བཅུ་པའི་ཚོགས་ཆེན་གྱི་བརྗོད་གཞི་འདེམས་སྟངས་སོགས་ངོ་སྤྲོད་གནང་སོང་བ་དང་། དམིགས་བསལ་སྐུ་མགྲོན་ཚེ་དབང་རིག་འཛིན་ལགས་ནས་བོད་རིགས་མཐོ་རིམ་སློབ་མའི་ཚོགས་ཆེན་གྱི་འཕེལ་རིམ་དང་གལ་འགངས་རང་བཞིན་སྐོར་གཏམ་བཤད་གནང་སྐབས། མཐོ་རིམ་སློབ་མའི་ཚོགས་ཆེན་དེ་ཐོག་མར་བཙུགས་དུས་ནས་བོད་རིགས་སློབ་ཕྲུག་ཚོས་རང་ངོ་རང་ཤེས་དང་རང་འགན་རང་འཁུར་གྱིས་མྱུར་ཏུ་བོད་ལ་ལོག་ཐུབ་པ་ཡིན་ན། བོད་གསར་པ་དེ་འཛུགས་སྐྲུན་བྱེད་མཁན་གྱི་མིང་དོན་མཚུངས་པའི་བོད་མི་ཞིག་སྐྱེད་སྲིང་བྱེད་ཆེད་དང་། གལ་སྲིད་བོད་དུ་ལོག་མ་ཐུབ་པ་ཡིན་ནའང་བཙན་བྱོལ་ནང་ལྷག་པའི་རིང་མིང་དོན་མཚུངས་པའི་བོད་མི་ཞིག་སྐྱེད་སྲིང་ཡོང་བའི་དམིགས་ཡུལ་བཟུང་སྟེ་བཙུགས་པ་ཡིན་སྐོར་སོགས་བརྗོད་སོང་།
དེའི་རྗེས་ས་རཱ་མཐོ་སློབ་ཀྱི་སློབ་སྤྱི་དགེ་བཤེས་འཇམ་དཔལ་གྲགས་པ་ལགས་ནས་གནའ་དེང་རིག་གནས་ཟུང་འབྲེལ་གྱིས་སྦྱོང་དགོས་པ་གལ་ཆེན་པོ་ཡིན་སྐོར་གསུང་བཤད་གནང་སྐབས། ཤེས་ཡོན་ཟེར་བ་དེར་གྲངས་ཀ་བརྒྱབ་ན་གྲངས་ལས་འདས་པ་ཞིག་རེད་དེ་ཚུར་བསྡུས་པ་ཡིན་ན། དེང་དུས་དང་སྲོལ་རྒྱུན་གཉིས་ཀྱི་ནང་འདུས་ཀྱི་ཡོད་ལ། དེང་དུས་དང་སྲོལ་རྒྱུན་གཉིས་ཀྱི་ནང་ནས་དེང་དུས་ཀྱི་ནང་ནས་ལེགས་ཆ་མང་པོ་ལེན་མཁན་ཡོད་པ་རེད་དེ། ང་ཚོ་བོད་པ་འདི་ད་ལྟ་བཙན་བྱོལ་བའི་གནས་སྐབས་ཤིག་གི་ནང་བསྡད་ཡོད་དུས། དེང་དུས་དང་སྲོལ་རྒྱུན་གཉིས་ཀའི་ཐོག་ནས་གོམ་པ་ཞིག་རྒྱག་མ་ཐུབ་ན། བོད་མི་ཟེར་བ་འདི་གསོན་པོར་གནས་མ་ཐུབ་པའི་གནས་སྟངས་ཤིག་ཆགས་ཀྱི་ཡོད་པ་རེད། རྒྱལ་ཁབ་ཡོད་མཁན་ཞིག་ཡིན་ན་དེང་དུས་ཀྱི་ཤེས་ཡོན་ཐོག་ནས་སོ་སོའི་རྒྱལ་ཁབ་འཛུགས་སྐྲུན་ཙམ་དང་། གང་ཟག་བྱེ་བྲག་པ་རེ་གཉིས་ཀྱི་དཔལ་འབྱོར་གྱི་ཁེ་ཕན་ཞིག་གི་ཐོག་ནས་ནུས་པ་ཞིག་འདོན་ཐུབ་ན་འགྲིག་གི་ཡོད་པ་རེད། ང་ཚོ་བོད་མི་ཚོས་རང་རང་གི་མི་ཚེའི་ནང་ལྟོ་གོས་ཀྱི་དཀའ་ངལ་མ་འཕྲད་པ་ཙམ་གྱི་ལས་གནས་ཤིག་བཟུང་སྟེ། དེའི་ཐོག་སློབ་སྦྱོང་སྤྲད་པ་ཡིན་ན། ང་ཚོ་བོད་པ་ལོགས་སུ་བཙན་བྱོལ་དུ་བསླེབས་པ་དང་། ༧གོང་ས་སྐྱབས་མགོན་ཆེན་པོ་མཆོག་ནས་དབུ་འཁྲིད་དེ་འདས་པའི་ལོ་ངོ་ ༥༠ ལྷག་རིང་བཙན་བྱོལ་གྱི་སྤྱི་ཚོགས་ཟུར་དུ་བཙུགས་པར་དགོས་པ་དམིགས་བསལ་གང་ཡང་འགྲུབ་ཡོད་པ་མ་རེད་དྲན་གྱི་ཡོད། ཅེས་བརྗོད་སོང་།
ཡང་ཁོང་གིས། མཐོ་རིམ་སློབ་མའི་ཐོག་མའི་དམིགས་ཡུལ་ལྟར་ད་ལྟ་ཚོགས་ཆེན་ཐེངས་བཅུ་པ་འཚོགས་ཐུབ་པ་བྱུང་ཡོད་པ་དང་། འདི་ཚོགས་ཐུབ་པ་བྱུང་བར་ས་རཱ་མཐོ་སློབ་ཀྱི་སློབ་ཕྲུག་ཚོར་ཆ་བཞག་ན། སོ་སོའི་ཉིན་རེའི་སློབ་སྦྱོང་ཆ་ཚང་དང་ཡིག་ཚད་ཕྱིན་པ་དང་། དེ་བཞིན་སློབ་གྲྭ་འདིའི་འབྲེལ་ཡོད་ལས་ཀ་མང་པོ་ཞིག་ཡོད་པ་རེད། དཀའ་ལས་མང་པོ་ཡོད་ཀྱང་དེ་ཚོ་ཆེ་བཞག་ཆུང་བཞག་གི་ཐོག་ནས་དཀའ་ལས་བརྒྱབ་པ་དང་། སོ་སོར་ཉིན་རེ་བཞིན་གྱི་ལས་ཀ་ཆུ་ཡི་གཉེར་མ་བཞིན་དུ་ཡོད་ཀྱང་། དེ་ཚོ་མང་པོ་ཞིག་སྤྱི་པ་རང་གི་སྒང་ལ་ཚུར་རུག་རུག་བྱས་ནས་ཡོང་བ་དེར་ངས་དམིགས་བསལ་གྱིས་ཁྱེད་རང་ཚོར་ཐུགས་རྗེ་གནང་ཞེས་རྗེས་སུ་ཡི་རང་དང་བསྔགས་བརྗོད་ཞུས་པ་ཡིན། འདི་འདྲ་དཀའ་ལས་བརྒྱབ་པའི་འབྲས་བུ་དེ་ང་ཚོ་བོད་པ་ཟེར་བ་འདི་རྡོག་རྩ་གཅིག་སྒྲིལ་རེད། ང་ཚོའི་སྤྱི་ཚོགས་ནང་གཅིག་ཤར་ལ་འགྲོ་དུས་གཅིག་ནུབ་ལ་འགྲོ་ཡི་ཡོད་པ་རེད་ཟེར་བ་རྐྱང་རྐྱང་བྱེད་ཀྱི་འདུག དེ་རྩ་བ་ཉིད་ནས་ཡག་པོ་མ་རེད། ང་ཚོ་གཅིག་གྱུར་བྱེད་དགོས་པ་རེད་མ་གཏོགས་ལོ་རྒྱུས་སྒང་ནས་བཤད་པ་ཡིན་ན་བོད་སིལ་བུར་འཐོར་བ་དེའང་ད་ལྟའི་གནས་སྟངས་དེ་ཆགས་པ་རེད་བཱ། ད་ལྟའི་བཙན་བྱོལ་སྤར་བ་གང་བོ་འདི་ཡར་ཡར་འཁྲིད། མར་མར་འཁྲིད་ནས་ངའི་ལུང་ཚན་དང་ཁོའི་ལུང་ཚན། ངའི་ཨ་ཕ་དང་ཁོའི་ཨ་མ་རྐྱང་རྐྱང་ལབ་བསྡད་ན། བོད་འཐོར་ཞིག་བྱུང་ན་ང་ཚོ་ཆ་ཚང་ལ་དཀའ་ངལ་འཕྲད་ངེས་རེད་དཱ། བོད་སིལ་བུའི་དཀའ་ངལ་དེ་ད་ལྟ་ང་ཚོས་མྱོང་བཞིན་འདུག ད་དུང་ང་ཚོས་བྱེད་སྟངས་འདི་བྱས་བསྡད་པ་ཡིན་ན། བཙན་བྱོལ་སྤར་བ་གང་ལས་མེད་པ་འདིའི་ནང་གཅིག་གིས་གཅིག་ལ་དོགས་པ་དང་། གཅིག་གིས་གཅིག་ལ་ཡིད་ཆེས་མེད་པའི་ཐོག་ནས་ཕྱིན་ན་ང་ཚོའི་མགོ་སུས་འཁྲིད་ཐུབ་པ་རེད། ང་ཚོའི་མགོ་ལ་སུ་འགྲོ་ཡི་རེད། དེར་དཔེ་ཉེན་ཁ་ཆེན་པོ་འདུག་དཱ། དེའི་ནོར་འཁྲུལ་ཚང་མ་ཤོར་ན་གཞོན་སྐྱེས་ཚོས་ཤོར་ངེས་རེད། རྒན་པ་ཚོ་བསླེབ་ཡ་ཡོད་པ་མ་རེད། དེ་འདྲའི་ཐོག་ལ་ནོར་འཁྲུལ་མི་འགྲོ་བར་ང་ཚོས་བསམ་བློ་རྒྱ་ཆེ་ས་ཞིག་གི་ཐོག་ནས་བོད་ཀྱི་བདེན་མཐའ་སེལ་དགོས་པ་རེད། སྡུག་ས་ནས་བསམ་བློ་གཏང་ན་བོད་པའི་ནང་ནས་ང་ཚོ་རྦད་དེ་སྡུག་ཤོས་དེ་རེད། རྒྱལ་ཁབ་ཤོར་བའི་དུས་སྐབས་དེར་ང་ཚོ་སྐྱེས་པ་རེད། བློ་སྟོབས་ཡོད་པའི་བསམ་བློ་ཞིག་གི་ཐོག་ནས་བལྟས་པ་ཡིན་ན། ང་ཚོ་དུས་ཚོད་ཡག་ཤོས་དེ་ལ་ཁེལ་བ་རེད། གང་ཡིན་ཟེར་ན། ང་ཚོར་དཀའ་ངལ་ཤུགས་ཆེ་ཤོས་འཕྲད་པའི་སྐབས་སུ་སུས་འཇོན་གྱི་འདུག་ཅེས་འཇོན་ཐང་ངོམ་པའི་དུས་ཚོད་དེ་རེད། དེར་བརྟེན་ད་ལྟ་སློབ་ཕྲུག་ཚོས་འཇོན་ཐང་ངོམ་པའི་དུས་ཚོད་དེ་རེད་མ་གཏོགས་འཁུམ་ནས་བསྡད་དེ། ཡོད་པ་དེའང་འཐོར་ཞིག་ཏུ་འགྲོ་བའི་ཐོག་བསམ་བློ་གཏང་བསྡད་ན་བརྒྱ་ཆ་བརྒྱ་ཐམ་པ་ནོར་འཁྲུལ་རེད། ང་ཚོའི་ཤེས་ཡོན་དེ་དུག་གི་སྒང་ལ་ཕྱིན་པ་རེད། ཅེས་བརྗོད་སོང་།
མཇུག་ཏུ་སྐུ་མགྲོན་གཙོ་བོ་རྒན་ཚེ་རིང་བསམ་གྲུབ་ལགས་ནས་བཙན་བྱོལ་བོད་མིའི་ལོ་གཅིག་གི་འགྲོ་སོང་གི་ནང་ནས་བརྒྱ་ཆ་ ༨༠ ཙམ་ཤེས་ཡོན་གོང་འཕེལ་དང་མི་རབས་གསར་པ་སྐྱེད་སྲིང་ཆེད་གཏོང་བཞིན་ཡོད་སྐོར་ངོ་སྤྲོད་གནང་བ་དང་འབྲེལ་ཁོང་གིས། སྔོན་མ་ཡིན་ན་ཤེས་རིག་ལས་ཁུངས་ཀྱི་ཟབ་སྦྱོང་ཞིག་སྒུག་ནས་འདུག་དགོས་པ་རེད། ཡིན་ནའང་། ད་ལྟ་དེ་སྒུག་མི་དགོས་པར་སློབ་གྲྭ་དང་དགེ་རྒན་སོ་སོའི་ངོས་ནས་ཡར་རྒྱས་གཏང་རྒྱུ་ག་རེ་ཡོད་མེད་དེ་འདྲ་ཅིག་ལ་ཐོན་ཡོད་སྟབས། མཐོ་རིམ་སློབ་མའི་ཚོགས་འདུ་འདི་བརྒྱུད་ནས་བཙན་བྱོལ་བོད་མིའི་ཤེས་ཡོན་ལ་གསར་བརྗེ་ཡི་རྣམ་པ་ཤུགས་ཆེན་པོ་ཞིག་འདོན་ཐུབ་པའི་རེ་བ་གཅིག་ག་རེ་ཡོད་པ་རེད་ཟེར་ན། རྣམ་པ་ཚོ་བློ་རིག་གསར་པ་དང་ནུས་པ་གསར་པ། རྣམ་དཔྱོད་གསར་པ་ལྡན་པའི་གཞོན་སྐྱེས་ཡིན་དུས་དངོས་ཡོད་གནས་ཚུལ་གསར་པ་ཐོན་ཐུབ་པའི་རེ་བ་ཤུགས་ཆེན་པོ་ཡོད་པ་རེད་བསམ་གྱི་འདུག གྷན་དྷི་ཇེ་ཡི་གསར་གཏོད་ཀྱི་ལས་ཀ་མང་ཆེ་བ་ཞིག་ཁོང་རང་གཞོན་པའི་སྐབས་སུ་བརྩམས་གནང་བ་ཞིག་ཆགས་ཀྱི་འདུག་གཱ། སོ་ཝ་མི་ཝེ་ཝིག་ཨ་ན་དཱས་(Swami Vivekanda )རྒྱ་གར་རྒྱལ་ཁབ་གསར་བརྗེ་བྱེད་ཐུབ་པའི་ནུས་པ་དེ་སུ་ལ་ཡོད་པ་རེད་ཟེར་ན། གཞོན་སྐྱེས་དེ་ཚོར་ཡོད་པ་རེད་ཅེས་ལབ་པ་འདྲ་པོ་འདུག་གཱ། རྣམ་པ་ཚོར་ནུས་པ་ཤུགས་ཆེན་པོ་ཞེ་དྲགས་ཡོད་པ་རེད་བསམ་བསམ་ཞིག་དྲན་གྱི་འདུག ཅེས་བརྗོད་པ་དང་འབྲེལ། མཐོ་རིམ་སློབ་མའི་ངོས་ནས་བཙན་བྱོལ་བོད་མིའི་ཤེས་ཡོན་ཡར་རྒྱས་ཆེད་ཞབས་འདེབས་ག་རེ་ཞུ་ཐུབ་ཀྱི་འདུག གསར་གཏོད་ག་རེ་བྱེད་ཐུབ་ཀྱི་འདུག་དེའི་ཐོག་བསམ་བློ་གཏང་སྟེ། ཐེངས་འདིའི་ཚོགས་ཆེན་བརྒྱུད་བཙན་བྱོལ་བོད་མིའི་ཤེས་ཡོན་སློབ་གསོའི་ལོ་རྒྱུས་ནང་འགོད་རིན་ཡོད་པའི་གསར་གཏོད་རང་བཞིན་གྱི་གྲོས་ཆོད་ཅིག་འཇོག་གལ་ཆེ་སྐོར་སོགས་བརྗོད་སོང་།
ཉིན་གྲངས་ ༧ ཙམ་གྱི་རིང་གི་ཚོགས་ཆེན་འདིའི་ཐོག ཕྱོགས་མཐའ་ཁག་ནས་ཡོང་བའི་ཚོགས་བཅར་མཐོ་རིམ་སློབ་མ་ཚོས། བཙན་བྱོལ་བོད་མིའི་ཡིག་རྒྱུགས་ཀྱི་ལས་གཞི་གོང་འཕེལ་གཏོང་ཐབས་དང་། བཙན་བྱོལ་སྤྱི་ཚོགས་ཁྲོད་མ་འདང་བའི་སློབ་གསོའི་ཁ་ཕྱོགས། དེ་བཞིན་ཆེད་ལས་དགེ་རྒན་གསོ་སྐྱོང་བྱེད་སྟངས་དང་མི་རབས་གསར་པའི་དཔུང་ཁག་ལ་རྒྱལ་ཞེན་གྱི་བསམ་བློ་བསྐྲུན་ཐབས་སོགས་བཙན་བྱོལ་བོད་མིའི་ཤེས་ཡོན་དང་འབྲེལ་བའི་བརྗོད་གཞི་ཁག་མ་འདྲ་བ་ ༡༦ ཐོག་བགྲོ་གླེང་དང་དོགས་འདྲི་གནང་བ་བརྒྱུད། ཤེས་རིག་ལས་ཁུངས་དང་བོད་ཕྲུག་ཁྱིམ་སྡེར་བསམ་འཆར་འབུལ་རྒྱུ་དང་། གཞན་ཡང་། ཐེངས་འདིའི་ཚོགས་ཆེན་ཐོག་ཤེས་རིག་བཀའ་བློན་དངོས་གྲུབ་ཚེ་རིང་མཆོག་ནས་༼བཙན་བྱོལ་བོད་རིགས་མཐོ་རིམ་སློབ་མས་ཁ་གསབ་བྱ་འོས་པའི་བོད་མིའི་སྤྱི་ཚོགས་ཁྲོད་ཀྱི་སྟོང་ཆ༽ཞེས་པའི་ཐོག་གསུང་བཤད་གནང་རྒྱུའི་གཙོས། བསམ་བྷོཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་དང་ས་རཱ་མཐོ་སློབ་ཀྱི་ལོ་རྒྱུས་སློབ་དཔོན་ཆེན་མོ་གཙང་ཕྲུག་སྟོབས་ལགས། འབུམ་རམས་པ་ཚེ་རིང་དབྱངས་སྐྱིད་ལགས། དེ་བཞིན། དྲ་ཚིགས་དོ་དམ་ཆེད་ལས་པ་བསམ་གྲུབ་ཆོས་འཕེལ་ལགས་བཅས་ཀྱིས། བོད་རིགས་མཐོ་རིམ་སློབ་མའི་ཤེས་ཡོན་གྱི་གནས་བབ་དང་མཐོ་རིམ་སློབ་མའི་འགན་འཁུར། བོད་མི་རིགས་ཀྱི་ད་ལྟའི་གནས་བབ་དང་མཐོ་རིམ་སློབ་མའི་འགན་འཁྲི། ཕུགས་བསམ་མངོན་འགྱུར་ཡོང་ཐབས། དེ་བཞིན་དྲ་ཚིགས་དོ་དམ་ཇི་ལྟར་བྱེད་དགོས་མིན་ལམ་སྟོན་དང་འབྲེལ། བོད་རིགས་མཐོ་རིམ་སློབ་མའི་དྲ་ཚིགས་ཀྱི་ཁྱད་ཆོས་ངོ་སྤྲོད་སོགས་གནང་འཆར་ཡོད་འདུག
མཐོ་རིམ་སློབ་མའི་ཚོགས་ཆེན་གོ་སྒྲིག་མཐུན་ཚོགས་ཀྱི་ཚོགས་མི་བསོད་ནམས་ཚེ་བརྟན་ལགས་སུ་བཅར་འདྲི་བྱེད་སྐབས། བོད་རིགས་མཐོ་རིམ་སློབ་མའི་ཚོགས་ཆེན་དེ་ཕྱི་ལོ་ ༢༠༠༦ ལོར་མགོ་བཙུགས་ཡོད་པ་དང་། མཐོ་རིམ་སློབ་མ་རྣམས་ཀྱིས་ཕན་ཚུན་ངོ་སྤྲོད་དང་བསམ་ཚུལ་བརྗེ་ལེན། དེ་བཞིན་ནང་ཁུལ་གྲོས་སྡུར་བྱས་པ་བརྒྱུད་བོད་མི་རིགས་ཀྱི་འགན་འཁྲི་དང་སྣེ་ཁྲིད་ཀྱི་བསམ་བློ་བསྐྲུན་སླད་དུ་རྒྱུན་མཐུད་གོ་སྒྲིག་བྱེད་བཞིན་ཡོད་པ་དང་། ཚོགས་ཆེན་ཐེངས་ ༨ པ་ནས་བཟུང་སློབ་མའི་ཚོགས་ཆེན་རང་གི་ངོ་བོར་བསྒྱུར་ཏེ་མཐོ་རིམ་སློབ་མ་རང་ངོས་ནས་ཚོགས་ཆེན་སྟངས་འཛིན་བྱེད་ཀྱི་ཡོད་ལ། ད་ལན་གྱི་ཚོགས་ཆེན་ཐོག་གི་བརྗོད་གཞི་རྣམས་ཀྱང་སློབ་མ་རང་ངོས་ནས་བོད་མིའི་སྤྱི་ཚོགས་ནང་མ་གླེང་ཐབས་མེད་དུ་གྱུར་བའི་བརྗོད་གཞི་མི་འདྲ་བ་ ༣༠ བསྡུས་ཏེ། དགེ་རྒན་རྣམ་པ་དང་རྒན་པ་ཚོར་བཀའ་འདྲི་ཞུས་རྗེས་བརྗོད་གཞི་གལ་ཆེ་ཤོས་ ༡༦ བདམས་ཡོད་སྐོར་དང་། གོ་སྒྲིག་ཚོགས་ཆུང་གི་ངོས་ནས་ས་གནས་ཁག་ ༣༢ ཀྱི་ཚོགས་བཅར་བ་ ༡༡༥ ལ་མགྲོན་ཤོག་བཏང་སྟེ་གྲ་སྒྲིག་བྱས་ཡོད་ཀྱང་། མཐོ་སློབ་ཁ་ཤས་ཡིག་ཚད་ཀྱིས་ཚོགས་བཅར་བྱེད་ཐུབ་མེད་པ་དང་ཡང་ཁ་ཤས་ཧར་ཡཱ་ནའི་རྙོག་དྲ་ཡིས་ལམ་བར་དུ་འགག་ཡོད་སྟབས། དངོས་སུ་ཚོགས་བཅར་ཐུབ་མཁན་ས་གནས་ཁག་ ༡༥ ཙམ་ནས་ཕལ་ཆེར་ ༦༥ ནས་ ༧༠ ཙམ་ཡོད་སྐོར་བརྗོད་བྱུང་།
གསར་འགོད་པ། པདྨ་མཚོ།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
