རྒྱུད་སྟོད་གྲྭ་ཚང་དུ་ཆོས་བརྒྱུད་རིས་མེད་ཀྱི་མཁས་པ་རྣམས་ཀྱིས་༧གོང་ས་མཆོག་གི་མཛད་རྣམ་དང་གསུང་རྩོམ། དགོངས་གཞི་བཅས་ཀྱི་ཐོག་ཉིན་བཞིའི་རིང་གི་བགྲོ་གླེང་ཞིག་མགོ་འཛུགས་གནང་ཡོད་པ་རེད།
དེ་རིང་སྔ་དྲོའི་ཆུ་ཚོད་ ༩ ཐོག་དྷ་རམ་ས་ལའི་ནེ་འཁྲིས་རྒྱུད་སྟོད་གྲྭ་ཚང་གི་འདུ་ཁང་ནང་དུ། དགེ་ལུགས་ཡོངས་ཀྱི་༧རྒྱལ་བའི་བརྟན་བཞུགས་དང་བཀའ་དྲིན་རྗེས་དྲན་ཚོགས་ཆུང་གི་གོ་སྒྲིག་འོག ༧གོང་ས་མཆོག་གི་མཛད་རྣམ་དང་གསུང་རྩོམ། དགོངས་གཞི་བཅས་ཀྱི་སྐོར་ལ་ཉིན་ ༤ རིང་གི་མཁས་པའི་བགྲོ་གླེང་ཞིག་དབུ་འཛུགས་གནང་ཡོད་ཅིང་། མཛད་སྒོའི་ཐོག་སྐུ་མགྲོན་གཙོ་ཏཱ་ཡི་སི་ཏུ་རིན་པོ་ཆེ་མཆོག་དང་། དམིགས་བསལ་སྐུ་མགྲོན་བཀའ་ཟུར་ཀིརྟི་རིན་པོ་ཆེ་མཆོག་རྣམ་གཉིས་ཀྱི་དབུས་རྒྱུད་སྟོད་གྲྭ་ཚང་གི་མཁན་རིན་པོ་ཆེ་མཆོག་དང་བླ་མ་དབུ་མཛད། དེ་བཞིན། བོད་ཀྱི་ཆོས་བརྒྱུད་ཁག་གི་སྐུ་ཚབ་དང་དགོན་སྡེ་གྲྭ་ཚང་ཁག་གི་སྐུ་ཚབ། གཞན་ཡང་། དྷ་ས་ཁུལ་དུ་ཡོད་པའི་ཚོགས་པ་ཁག་གི་སྐུ་ཚབ་སོགས་མི་གྲངས་ ༡༠༠ ལྷག་འཛོམས་ཡོད་འདུག
མཛད་སྒོའི་ཐོག་གོ་སྒྲིག་ཚོགས་ཆུང་གི་ཚོགས་གཙོ་དགེ་ལུགས་སྤྱི་འཐུས་དགེ་བཤེས་རོང་པོ་བློ་བཟང་སྙན་གྲགས་ལགས་ཀྱིས་བགྲོ་གླེང་ངོ་སྤྲོད་གནང་དོན། ༧རྒྱལ་བ་སྐུ་ཕྲེང་བཅུ་བཞི་པའི་མཛད་འཕྲིན་གྱི་འོད་སྣང་ལ་བརྟེན་ནས་ཆོས་བརྒྱུད་རིས་སུ་མ་ཆད་པར་ཕན་ཚུན་ཤེས་ནས་དད་པ་འཐོབ་པ་ཞིག་ཡོང་དགོས་པ་དང་། དེའི་ཐོག་ལ་གོམ་པ་མདུན་སྐྱོད་ཀྱི་རྣམ་པ་ངོ་མཚར་བ་དང་དགའ་འོས་པ་ཞིག་སོང་དང་འགྲོ་བཞིན་ཡོད་པ་ལྟར། དེའི་ཐོག་ལ་ང་ཚོ་རྗེས་འཇུག་པ་ཚོ་ཡིན་ན་ཡང་གོམ་པ་མདུན་སྤོས་ཀྱིས་རྗེས་ལུས་མ་ཐེབས་པ་ཞིག་ཡོང་དགོས་པའི་གནས་བབ་ཅིག་ཆགས་བསྡད་ཡོད། ཅེས་སོགས་གསུངས་སོང་།
དེའི་རྗེས་དམིགས་བསལ་སྐུ་མགྲོན་ཀིརྟི་རིན་པོ་ཆེ་མཆོག་ནས་༧གོང་ས་མཆོག་གི་མཛད་འཕྲིན་རྣམས་ལས་གསར་གཏོད་རང་བཞིན་གྱི་སྐོར་ལ་གསུང་བཤད་གནང་དོན། སྐུ་མདུན་གྱི་གསར་གཏོད་རང་བཞིན་གྱི་མཛད་འཕྲིན་ཁག་ལས་ངས་དཔེ་མཚོན་ཐུང་ཐུང་ཞིག་ཞུས་པ་ཡིན་ན། ཆོས་སྲིད་གཉིས་ལྡན་གྱི་བོད་མིའི་དམངས་གཙོ་དེ་སྐུ་མདུན་གྱི་གསར་གཏོད་རེད་ལ། དགེ་བཤེས་མའི་རྒྱུགས་སྤྲོད་དེ་སྐུ་མདུན་གྱི་གསར་གཏོད་རེད། དེ་བཞིན། དུས་རབས་ཉེར་གཅིག་པ་དེ་འཚེ་བ་མེད་པའི་དུས་རབས་ཤིག་ཏུ་བསྐྲུན་དགོས་གསུངས་པ་དེ་ཁོང་གི་གསར་གཏོད་ཅིག་རེད་ལ། ཆོས་ལུགས་དང་མ་འབྲེལ་བའི་བཟང་སྤྱོད་གོང་འཕེལ་གཏོང་དགོས་གསུངས་པ་དེའང་ཁོང་གི་གསར་གཏོད་ཅིག་རེད། ཆོས་ལུགས་ཡོངས་རྫོགས་གཞི་གཅིག་གི་ཐོག་ཏུ་འདུས་ཐུབ་པ་བྱེད་དགོས་གསུངས་པ་དེ་ཡང་ཁོང་གི་གསར་གཏོད་རེད། ནང་ཆོས་དང་ཚན་རིག་དཔུང་པ་མཉམ་གཤིབ་བྱེད་པ་དེ་སྐུ་མདུན་གྱི་གསར་གཏོད་རེད། དེ་བཞིན། སྔོན་མ་ཝ་ར་ཎ་སི་རུ་སྐུ་མདུན་གྱིས་ནང་ཆོས་དང་དམར་པོའི་ལྟ་བའི་མཐུན་པའི་ཆ་དེར་བཀའ་སློབ་ཅིག་གནང་ཡོད་པ་དང་། ད་ལྟའི་བར་དུ་སུ་གང་གིས་དེ་ཚོ་ཕལ་ཆེར་གསུང་མྱོང་ཡོད་རྒྱུ་མ་རེད་བསམ་གྱི་འདུག གཞན་ཡང་། བོད་ཀྱི་དགོན་པ་ཡོངས་རྫོགས་སློབ་གཉེར་ཁང་གི་ངོ་བོར་བསྒྱུར་བ་དེའང་སྐུ་མདུན་གྱི་གསར་གཏོད་ཅིག་རེད་ལ། བོད་མི་ཡོངས་རྫོགས་ཤེས་ཡོན་ལྡན་པ་དང་ཡ་རབས་བཟང་སྤྱོད་ལྡན་པ་དེའང་ཁོང་གི་གསར་གཏོད་ཀྱི་རང་བཞིན་རེད། ཅེས་གསུངས་བ་དང་འབྲེལ། ༧གོང་ས་མཆོག་གི་བཀའ་དྲིན་རྗེས་སུ་དྲན་པའི་ཐོག་ནས་མ་འོངས་པར་ཁོང་གི་བཀའ་སློབ་དེ་ཚོ་མི་རེ་ངོས་རེ་ནས་ལག་ལེན་ག་རེ་བསྟར་དགོས་པ་དང་། ཚོགས་པ་ཁག་གི་ངོས་ནས་ལག་ལེན་ག་རེ་བསྟར་དགོས་པའི་ཐོག་ད་ལྟ་ནས་ཤུགས་རྒྱག་རྒྱུ་ཧ་ཅང་གལ་ཆེན་པོ་ཡིན་སྟབས། ད་རེབ་ཙམ་མིན་པར་མ་འོངས་པར་བརྗོད་གཞི་རེ་རེའི་ཐོག་བགྲོ་གླེང་གནང་ཐུབ་པར་ཐུགས་སྐུལ་བཅས་གནང་ཡོད་པ་རེད།
མཇུག་ཏུ་སྐུ་མགྲོན་གཙོ་བོ་ཏཱ་ཡི་སི་ཏུ་རིན་པོ་ཆེ་མཆོག་ནས་བོད་མི་ཞིག་ཏུ་སྐྱེས་པ་ཙམ་གྱིས་བསོད་ནམས་ཆེན་པོ་ཆགས་ཡོད་སྐོར་གསུང་སྐབས། འཛམ་བུ་གླིང་ལ་མི་རིགས་འདྲ་མིན་སྣ་ཚོགས་ཀྱིས་ཁེངས་བསྡད་ཡོད་པ་རེད། ང་ཚོ་བོད་པ་རྐྱང་པ་མ་རེད། མི་རིགས་ཁྲི་ཕྲག་མང་པོ་ཡོད་པ་དང་། མི་རིགས་སོ་སོར་རིག་གཞུང་དང་སྐད་ཡིག་ཡོད་ལ། ཚང་མ་ལ་ལོ་རྒྱུས་རིང་པོ་ཡོད་པ་རེད། ལོ་རྒྱུས་རིང་པོ་མེད་མཁན་སུ་གང་ཡོད་པ་མ་རེད། དེས་ཀྱང་ཚད་ཀྱི་མ་རེད་འཛམ་གླིང་ཤར་ལྷོ་ནུབ་བྱང་གང་སར་ནང་པ་སངས་རྒྱས་པའི་ཆོས་དར་བསྡད་ཡོད་པའི་ལུང་པ་མང་པོ་ཞེ་དྲགས་རེད། ང་ཚོ་བོད་པ་རྐྱང་པ་མ་རེད། ཡིན་ནའང་། ང་ཚོ་བོད་ཀྱི་མི་ཞིག་ཡིན་རྗེས་འཛམ་བུ་གླིང་གང་དུ་ཕྱིན་པ་ཡིན་ཡང་མི་ཚང་མས་བརྟག་དཔྱད་དང་ཞིབ་འཇུག་གང་ཡང་མ་བྱས་པར་མི་ཡག་པོ་ཞིག་ཡིན་པར་ངོས་འཛིན་རང་བྱེད་ཀྱི་འདུག་གཱ། ང་རང་ལ་ཉམས་མྱོང་ཡོད་པ་རེད། ཕྱི་ལོ་ ༡༩༧༩ ནས་ངས་འཛམ་བུ་གླིང་བསྐོར་ནས་ཕྱིན་པ་རེད། དེ་འདྲའི་ཚོར་བ་ཞིག་དང་བརྩི་མཐོང་ཞིག་མི་རིགས་ཤིག་གི་ཐོག་ལ་བྱེད་བཞིན་པ་དེ། འཛམ་བུ་གླིང་གི་མི་རིགས་གཞན་པ་ནང་པ་ཡིན་པ་དེ་ཚོ་ལའང་ཡོད་པ་མ་རེད་དཱ། ད་དེ་ག་རེ་བྱས་པ་རེད་ཟེར་ན། ང་རང་ཚོ་བོད་གངས་ཅན་གྱི་ལྗོངས་འདི་འཕགས་པ་སྤྱན་རས་གཟིགས་ཀྱིས་རྗེས་སུ་བཟུང་བའི་ཞིང་རེད། དེ་བཞིན་བོད་ཆོས་རྒྱལ་ཆེན་པོ་རྣམ་པ་ཚོ་དང་གུ་རུ་རིན་པོ་ཆེ་ཁོང་རྣམ་པས་བྱིན་གྱིས་བརླབས་པའི་ཡུལ་རེད། དེར་བརྟེན། མི་ཡུལ་གྱི་དག་པའི་ཞིང་ཆགས་བསྡད་ཡོད་པ་རེད། མི་སྒེར་སོ་སོའི་ཐོག་ནས་སྣ་ཚོགས་ཡོང་གི་རེད། འཕེན་བྱེད་དགེ་བས་འཕངས་ལ་རྫོགས་བྱེད་མི་དགེ་བས་རྫོགས་པ། འཕེན་བྱེད་མི་དགེ་བས་འཕངས་ལ་རྫོགས་བྱེད་དགེ་བས་རྫོགས་པ་དེ་འདྲ་མང་པོ་ཡོང་གི་རེད། བསམ་བློ་ཡག་པོ་ཞིག་གཏང་ན། འཛམ་བུ་གླིང་པ་ཚང་མས་ང་ཚོར་བུ་ལོན་སྤྲོད་དགོས་པ་སྟེ་ང་ཚོས་སྔོན་མ་ཅིག་གཡར་བཞག་ཡོད་པ་མ་རེད་བཱ། ཡིན་ནའང་། ཚང་མས་ང་ཚོར་ག་རེ་དྲག་དྲག་བྱེད་ཀྱི་འདུག་གཱ། དེ་འཕགས་པ་སྤྱན་རས་གཟིགས་ཀྱི་བཀའ་དྲིན་རེད། ཅེས་སོགས་གསུངས་ནས་བླངས་དོར་གྱི་བཀའ་སློབ་གནང་གྲུབ་རྗེས། དགེ་ལུགས་སྤྱི་འཐུས་དགེ་བཤེས་ཨ་ཀྲུག་ཚེ་བརྟན་ལགས་ནས་ཐུགས་རྗེ་ཆེ་ཞུའི་གསུང་བཤད་བཅས་གནང་སྟེ་མཛད་སྒོ་གྲོལ་ཡོད་པ་རེད།
གསར་འགོད་པ། པདྨ་མཚོ།
