དེ་རིང་ཉིན་རྒྱབ་ཆུ་ཚོད་ ༣ པ་ཐོག དྷ་ས་བོད་ཀྱི་ཟློས་གར་ཚོགས་ཁང་དུ། ཨ་རིའི་རླུང་འཕྲིན་ཁང་ནས་སྐབས་བཅོ་ལྔ་པའི་སྲིད་སྐྱོང་འོས་མི་བློ་བཟང་སེང་གེ་མཆོག་དང་སྤེན་པ་ཚེ་རིང་མཆོག་གཉིས་བར་ལྷན་འཛོམས་ཀྱི་བགྲོ་གླེང་ཐེངས་དང་པོ་གོ་སྒྲིག་གནང་ཡོད་པ་ལྟར། ཚོགས་ཞུགས་པ་ཁག་ཅིག་ལ་བགྲོ་གླེང་བརྒྱུད་དགོངས་ཚུལ་ཅི་བྱུང་སྐོར་བཅར་འདྲི་ཞུས་ཡོད།
བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་ཟུར་པ་ངག་དབང་འོད་འབར་ལགས་ཀྱིས། ང་རང་སྒེར་གྱི་ངོས་ནས་དེ་རིང་སྲིད་སྐྱོང་འོས་མི་རྣམ་གཉིས་ཀྱི་བགྲོ་གླེང་དེ་རྩ་བའི་ཆ་ནས་ཡག་པོ་ཞེ་དྲགས་བྱུང་སོང་བསམ་གྱི་འདུག དང་པོ་དེར་འོས་མི་གཉིས་ཆའི་ངོས་ནས་བཀའ་མོལ་གསུང་སྟངས་དེ་གསང་པོ་ཞིག་གསུངས་སོང་བསམ་གྱི་འདུག གཉིས་པ་དེར་རྩ་བའི་དུས་ཚོད་ཐུང་ཐུང་རེད་ལ། དྲི་བའི་ནང་ལོགས་ལའང་ཞེ་དྲགས་ཡོད་པ་མ་རེད། དེར་བརྟེན་མ་འོངས་པའི་འཐབ་རྩོད་ཐོག་ལ་དྲི་བ་དང་དྲིས་ལན་གཉིས་ཆ་འདོད་པ་ཁེངས་བ་ཞིག་བྱུང་མ་སོང་། དེ་ནས་བོད་ནང་ལོགས་ཀྱི་རྒྱ་ཆེའི་མི་མང་གི་སེམས་ཤུགས་དང་གནས་སྟངས། ཆོས་དང་རིག་གཞུང་། ལྷག་པར་དུ་ཕྱི་ལོ་ ༡༩༨༧ ནས་བཟུང་ད་ལྟའི་བར་བོད་མི་སྟོང་ཕྲག་མང་པོ་བཙོན་ཁང་དུ་བསྡད་དགོས་ཁེལ་ཡོད་ཀྱང་། དེ་ཚོའི་སྐོར་ལ་བཀའ་མོལ་ཚིག་གཅིག་གསུངས་མ་སོང་བ་དེ་བློ་ཕམ་ཆེ་ཤོས་ཡིན། ངས་མ་གོ་ནས་ཁོང་གཉིས་ཀྱིས་གསུངས་ཡོད་ན་གང་ཤེས་མ་གཏོགས་ང་རང་གིས་གོ་མ་སོང་། ཞེས་བརྗོད་བྱུང་།
འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གི་ཉམས་ཞིབ་པ་བསྟན་འཛིན་ཉིན་བྱེད་ལགས་ཀྱིས། དེ་སྔོན་སྲིད་སྐྱོང་འོས་མི་གཉིས་བར་དུ་ཐད་ཀར་གདོང་ཐུག་མེད་པའི་ཐོག་ནས་ཕར་ཚུར་ལ་བགྲོ་གླེང་བྱུང་ཡོད་པ་དང་། དེས་མང་ཚོགས་ཀྱི་སེམས་ནང་བློ་འཚབ་དང་སེལས་ཁྲལ་མང་པོ་ཞིག་ཡོང་ཡོད་པ་རེད་བསམ་གྱི་འདུག གང་ཡིན་ཟེར་ན། གཉིས་ཀ་རྒྱལ་ཁབ་ཅིག་གི་མགོ་ཁྲིད་ཆེ་ཤོས་གཉིས་ཆགས་ཀྱི་ཡོད་པ་རེད། དེ་རིང་ཁོང་རང་གཉིས་གདོང་ཐུག་སྟེ་ཐད་ཀར་བགྲོ་གླེང་བྱེད་དུས། དང་པོ་དམངས་གཙོའི་སྒྲིག་འཛུགས་ཀྱི་ཆ་ནས་ཕན་ཐོགས་པ་ཞིག་ཡིན་ལ། མི་མང་གི་སེམས་ལ་དགའ་ཚོར་མང་པོ་ཞིག་སྐྱེས་ཡོད་པ་རེད་བསམ་གྱི་འདུག གང་ཡིན་ཟེར་ན། ཁོང་རང་གཉིས་ཀྱིས་རྩོད་པ་བརྒྱབ་པ་གང་ཞིག་ལ་མཐའ་མར་ཕན་ཚུན་ལག་པ་བཏང་ནས་གཅིག་གིས་གཅིག་ལ་རྐུབ་སྟེགས་ཙམ་མ་ཡིན་པར་སེམས་གཏིང་ནས་མགོ་ཁྲིད་ཅིག་དང་བོད་པ་ཞིག་ཡིན་པའི་ཆ་ནས་བརྩེ་དུང་དེ་གསལ་པོ་ཐོན་སོང་དྲན་གྱི་འདུག དེ་ངས་གལ་ཆེན་པོ་ཞེ་དྲགས་རེད་བསམ་གྱི་འདུག ང་རང་སྒེར་གྱི་ངོས་ནས་རྩ་དོན་གྱི་ཆ་ནས་ཏོག་ཙམ་དགའ་བོ་བྱུང་མ་སོང་། གང་ཡིན་ཟེར་ན། ཁོང་རང་གཉིས་འཛིང་བ་མ་གཏོགས་རང་དབང་འཐབ་རྩོད་ཐད་སྐད་ཆ་ཞེ་དྲགས་བཤད་མ་སོང་ང་། དེའི་སྐོར་ལ་རྗེས་མ་ཁོང་རྣམ་གཉིས་ཀྱིས་མང་ཙམ་བཤད་ན་ཡག་པོ་ཡོད་པ་རེད་བསམ་གྱི་འདུག ཅེས་བརྗོད་བྱུང་།
བོད་ཀྱི་མཛངས་མ་གོ་སྒྲིག་པ་བློ་བཟང་དབང་རྒྱལ་ལགས་ཀྱིས། སྤྱིར་བཏང་ཚང་མས་མཁྱེན་གསལ་རེད། ད་ལྟ་ང་ཚོ་འཁྲུག་ཆ་དོད་པོ་ཞེ་དྲགས་ཤིག་གི་སྒང་ལ་འགྲོ་བཞིན་ཡོད་པ་རེད། དེ་རིང་ཨ་རིའི་རླུང་འཕྲིན་ཁང་གིས་ཕྱག་ལས་ཡག་པོ་ཞེ་དྲགས་གནང་འདུག དྲི་བ་མང་པོ་ཞིག་ཚུར་རུག་རུག་བཟོས་ཏེ་ཁོང་རང་ཚོས་གང་ལྟར་དྲི་བ་རང་ལ་ལན་རྒྱག་པའི་ལས་རིམ་བཟོས་གནང་ཡོད་དུས། ནམ་རྒྱུན་ཧ་གོ་ཡི་མེད་ལབ་པ་དང་། དོགས་པ་འདུག་ཟེར་བ་དེ་ཚོ་ཆ་ཚང་འདྲ་པོ་ཞིག་དེ་རིང་གཙང་མ་ཆགས་སོང་བསམ་པའི་ཚོར་བ་བྱུང་། ཞེས་བརྗོད་བྱུང་།
གསར་འགོད་པ་ཞིག་གིས་དེ་རིང་བགྲོ་གླེང་ནང་གནད་དོན་གལ་ཆེན་པོ་དེ་འདྲ་གླེང་སློང་བྱུང་མ་སོང་བསམ་པ་དེ་འདྲ་ཡོད་མེད་དྲིས་པར་ཁོང་གིས། སྒེར་གྱི་གནད་དོན་དེ་འདྲ་ཡོད་པ་རེད། དཔེར་ན། ཁ་སང་ཕྱི་དྲིལ་བཀའ་བློན་ཟུར་པ་བདེ་སྐྱིད་ཆོས་དབྱངས་ལགས་ཀྱིས་དགོངས་པ་ཞུས་པའི་གནད་དོན་བྱུང་བསྡད་ཡོད་པ་དང་། དེའི་ཐོག་སྤྱི་ཚོགས་ནང་ལབ་གླེང་མང་པོ་ཞིག་ཆགས་བསྡད་ཡོད་པ་རེད། བདེ་སྐྱིད་ཆོས་དབྱངས་ལགས་ལ་ཆ་བཞག་ན། བདུན་ཕྲག་གསུམ་ནང་འོས་ཤོག་བསླེབ་ཀྱི་ཡོད་པ་དང་། ཟླ་བ་ཁ་ཤས་ནང་ལས་ཡུན་འཁྱོལ་འགྲོ་མཁན་གྱི་བཀའ་བློན་ཞིག་ཆགས་བསྡད་ཡོད་པ་རེད། དེ་འདྲའི་གནས་སྟངས་ཤིག་གི་འོག་ནས་གློ་བུར་དུ་ཛ་དྲག་ཐོག་ནས་དགོངས་པ་ཞུས་པ་དེའང་ལབ་གླེང་གསར་པ་ཞིག་ཆགས་ཡོད་དུས། དེ་རིང་བགྲོ་གླེང་འདིའི་ཐོག་དེའི་སྐོར་ལ་དྲི་བ་བསླེབ་མ་སོང་ང་། གནད་དོན་དེའི་ཐོག་ནས་སྤྱི་ཚོགས་ནང་བཀའ་ཤག་ནང་ལོགས་ལ་རྙོག་དྲ་འདྲ་པོ་བྱུང་ཡོད་ན། ཡང་མིན་ན་བདེ་སྐྱིད་ཆོས་དབྱངས་ལགས་མོ་རང་སྒེར་གྱི་ཐོག་ནས་བཀའ་ཤག་གི་ཕྱག་ལས་གནང་སྟངས་ཐད་གཟིགས་སྟངས་མ་འདྲ་བ་དེ་འདྲ་ཡོད་པ་ཡིན་ན་བསམ་ནས་ལབ་གླེང་ཡོང་གི་ཡོད་ལ། གནད་དོན་དེ་ཁ་གསལ་པོ་མེད་དུས་བརྗོད་གཞི་གསར་པ་ཞིག་ཆགས་བསྡད་ཡོད་པ་རེད་བསམ་གྱི་འདུག ཅེས་བརྗོད་བྱུང་།
ཡང་ཚོགས་ཞུགས་པ་བུ་མོ་ཞིག་གིས། ངས་བགྲོ་གླེང་གི་རྗེས་སུ་མི་མང་གིས་དྲི་བ་འདོན་རྒྱུ་ཡིན་གྱི་རེད་བསམ་ནས་སོ་སོའི་ངོས་ནས་གྲ་སྒྲིག་བྱས་པ་ཡིན། འོན་ཀྱང་མི་མང་གིས་དྲི་བ་འདོན་པའི་སྡིངས་ཆ་མི་འདུག ངའི་བསམ་པར་བགྲོ་གླེང་འདིའི་སྟེང་མི་མང་གི་སྲིད་སྐྱོང་གླེང་གི་ཡོད་དུས། མི་མང་ལ་དྲི་བ་འདོན་པའི་གོ་སྐབས་སྤྲོད་དགོས་པ་དེ་གལ་ཆེན་པོ་རེད་བསམ་གྱི་འདུག ཨ་རིའི་རླུང་འཕྲིན་ཁང་གཅིག་པུ་རེད་འདུག ཁོ་རང་ཚོས་དྲི་བ་དྲིས་ལན་འདེབས་པ་ཙམ་ལས་མི་མང་ལ་འབྲེལ་བ་མེད་པ་ལྟ་བུ་ཞིག་ཏུ་མཐོང་སོང་། ཁོ་རང་ཚོར་ལབ་དགོས་པ་དང་དགག་པ་རྒྱག་དགོས་ས། འདོད་པ་མ་ཁེངས་པ་སོགས་སྲིད་སྐྱོང་འོས་མི་གཉིས་ཀྱིས་ལབ་པ་དང་། ཨ་རིའི་རླུང་འཕྲིན་ཁང་གིས་དྲི་བ་ག་རེ་བཏང་བ་ཡིན་ན། དེ་ལ་དྲིས་ལན་རྒྱག་གི་འདུག་མ་གཏོགས་མི་མང་ལ་འབྲེལ་བ་ཉུང་བ་ཞིག་ཏུ་མཐོང་སོང་ཞེས་དང་།
གསར་འགོད་པས་བགྲོ་གླེང་འདི་བརྒྱུད་ཁྱེད་རང་གིས་འོས་བླུགས་འདོད་པའི་སྲིད་སྐྱོང་འོས་མི་དེར་རྒྱབ་སྐྱོར་ཞུ་ཕྱོགས་ཐད་འགྱུར་ལྡོག་འདྲ་བྱུང་སོང་ངམ་ཞེས་དྲིས་པར། ངས་སྔོན་མར་སྲིད་སྐྱོང་བློ་བཟང་སེང་གེ་ལགས་ལ་འོས་བླུགས་པ་ཡིན་ལ། ད་རེས་ཀྱང་ནོར་མི་འདུག་བསམ་པ་ཏན་ཏན་བྱུང་སོང་། འདོད་པ་མ་ཁེངས་པ་དེ་རྒྱུན་ལྡན་རེད། དམངས་གཙོ་ཡིན་དུས་སོ་སོའི་འདོད་པ་མ་ཁེངས་པ་དེ་འདྲ་ཡོང་བ་ཡིན་ཡིན་པ་རེད། ཡིན་ནའང་ང་རང་གིས་བསམ་པར་ཕྱི་ལོ་ ༢༠༡༡ ལོར་ངས་འོས་བླུགས་པ་དེ་འཕྲོ་བརླག་ལ་འགྲོ་མི་འདུག་བསམ་སོང་། གང་ཡིན་ཟེར་ན་ལས་ཀ་བྱེད་དགོས་པ་དེ་བྱས་ཡོད་པ་གསལ་བོ་ཁ་ཤས་ཤིག་ཡོད་པ་རེད། དེ་གསལ་བོ་གསལ་རྐྱང་ཡིན་པས་ང་རང་འདོད་པ་ཁེངས་པ་ཞིག་བྱུང་སོང་། ཞེས་བརྗོད་བྱུང་།
ཚོགས་ཞུགས་དགེ་འདུན་པ་ཞིག་གིས། དེ་རིང་གི་ཚོགས་འདུའི་ངོ་གདོང་ནས་བལྟས་ན། བོད་ཕྱི་ནང་གི་ལྟ་ཚུལ་གྱི་ཐོག་ནས་ཁོང་རྣམ་པ་གཉིས་ཀྱི་རྣམ་འགྱུར་ཧ་ཅང་ཡག་པོ་བྱུང་སོང་བསམ་གྱི་འདུག རྒྱབ་ལྗོངས་ཀྱི་གནས་ཚུལ་བཤད་ན། ཁོང་གཉིས་ཀྱི་བཤད་སྟངས་དེ་ཅུང་འདྲ་ཡི་མི་འདུག་བསམ་གྱི་འདུག སྲིད་སྐྱོང་དང་ཚོགས་གཙོ་གཉིས་ཀྱི་བཤད་སྟངས་ཐད་ནས་ངའི་བློ་ལ་འགྲོ་ཤོས་ཚོགས་གཙོ་མཆོག་གི་བཤད་སྟངས་དེ་རེད། མ་འོངས་པར་ཤེས་ཀྱི་མེད་ཀྱང་དེ་རིང་གི་གནས་སྟངས་ལ་བལྟས་ན་ཕལ་ཆེར་ཚོགས་གཙོ་མཆོག་གི་སྐད་ཆ་དེ་གནས་ལུགས་ལྡན་པ་ཞིག་རེད་བསམ་གྱི་འདུག ད་ལྟ་སྒེར་གྱི་འཁོན་འཛིན་མ་ཡིན་པར་སྤྱི་པར་བསམ་བློ་གཏོང་གིན་ཡོད་པའི་ཐད་ནས་ངས་ཚོགས་གཙོ་མཆོག་གི་གཏམ་བཤད་དེ་ཡག་པོར་མཐོང་གི་འདུག ཅེས་བརྗོད་བྱུང་།
གསར་འགོད་པ། པདྨ་རྒྱལ་དང་པདྨ་མཚོ།
མི་མང་གིས་ཆ་ཤས་ལེན་མི་ཆོག་དེ་ནི་ཡག་པོ་གཏན་གནས་མིན། སྲིད་སྐྱོང་གི་འོས་ཆོས་ལ་དོགས་པ་ཡོད་མཁན་དང་། རྙོག་གླེང་བཤད་མཁན་གཙོ་བོ་མི་མང་ཡིན་ལ། དེ་བཞིན་སྲིད་སྐྱོང་ཡང་མི་མང་གི་དབུ་ཁྲིད་ཡིན།
བརྙན་དང་སྒྲ་ལེན་མི་ཆོག་པར་དོ་ནན་བྱས་ཡོད་ཀྱང་། སྲོད་སྐྱོང་བློ་སེང་གི་རྒྱལ་སྐྱོར་བ་ཚོས་དུས་རྒྱུན་བོད་རིགས་ནང་ཁུལ་ལ་གསོད་གི་ཡིན་ཟེར་བ་དང་། བློ་སེང་སྲིད་སྐྱོང་ལ་མ་ཐོབ་ཚེ་དྭངས་བླངས་དཔྱ་ཁྲལ་སྤྲོད་ཀྱི་མིན། སྲིད་སྐྱོང་གི་ལས་དོན་བྱེད་ཕྱོགས་ལ་དོགས་འདྲི་བྱེད་མཁན་ཚོར་ངན་དམོད་ཚད་ལས་འདས་པ་བྱེད་པ་སོགས་བོད་མི་ནང་ཁུལ་ལ་ཁྲིམས་མེད་ལུགས་མེད་བྱེད་སྤྱོད་སྤེལ་ལོབས་སུ་སོང་བས། བློ་སེང་གིས་ཚོགས་གཙོར་ཟུར་ཟ་བྱས་རིགས་ཀྱི་བརྙན་དྲ་ལམ་གང་སར་ཁྱབ་བཞིན་འདུག ཁྲིམས་མེད་ལུགས་མེད་ཉེ་དགའ་ཕྱོགས་ཞེན་ཁོ་ན་ལས་མི་འདུག
སྲིད་སྐྱོང་འོས་མི་རྣམ་གཉིས་ལ་བཀྲིས་བདེ་ལེགས་གྲངས་མེད་ཡོད་ སུ་ལ་འོས་ཐོབ་ན་མ་ཐོབ་ཁྱད་པར་མེད ་བོད་མི་ས་ཡ་དྲུག་སྐུ་ཚབ་ཡིན་དུས་བརྒྱ་ཆ་གུས་སྐུར་ཡོད་ ཡིན་ནའི་ངས་ལོ་་སྔོན་མ་བློ་སེང་ལ་འོས་འཕུལ་ཡོད་ འདི་ལོ་སྤེན་ཚེ་ལ་ཡིན་ ལོ་ལྔའི་རྗེས་ལ་སྤེན་འོས་མིར་ཡང་རྐྱར་ལང་ན་འོས་མི་འཕུལ་ཐག་གཅོད་ཡིན་ གང་ཡིན་ཞེས་ན་བོད་མི་གཞོན་སྐྱེས་དང་ཤེས་ཡོན་ཚོར་གོ་སྐབས་གནང་དགོས་དུག་ལྷན་རྒྱས་ཚོས་དགོངས་པ་ཆེ་བཞེས་ཐོག་ལོ་ལྔའི་རྗེས་ལ་བརྗེས་པོ་སྐྱོན་ཀྱང་གནང་རོགས་
ཁ་སང་གི་བགྲོ་གླེང་ཐོག་བསམ་ཚུལ་ཞུ་ཡ་གསུམ་ཡོད། དང་པོ་བགྲོ་གླེང་སྟེང་རྡ་རམ་ས་ལའི་མང་ཚོགས་མཉམ་ཞུགས་བྱེད་དུ་མ་བཅུག་པར་བགྲོ་གླེང་གོ་སྒྲིག་གནང་མཁན་ཁོ་རང་ཚོའི་དགའ་བོ་ཉེ་བ་དང་ངོ་ཤེས་གྲོགས་པོ། སྤྲེལ་ལད་འཁྲབ་པ་ཡིན་ནམ་གང་ཤེས་ཏེ། བོད་གཞུང་གི་དཔོན་རིགས་ཁ་ཤས་མ་གཏོགས་མང་ཚོགས་དཀྱུས་མ་སུ་གང་བགྲོ་གླེང་སྟེང་བཀག་སྡོམ་བྱས་ཡོད་པས་མང་ཚགོས་མང་པོ་ཞིག་བློ་ཕམ་དང་ཁོང་ཁྲོ་དང་བཅས་ཏེ་ཕྱིར་ལོག་དགོས་བྱུང་བ་མ་ཟད། ཁ་ཤས་ཀྱིས་རྣམ་འགྱུར་ངན་པ་བསྟན་ཏེ་ཚོགས་ཁང་ཕྱི་ལོག་ནས་བགྲོ་གླེང་གོ་སྒྲིག་གནང་མཁན་ཚོར་ཁ་འཛིང་ཡང་བྱས་སོང་པ་དེ་དང་པོ་ཡིན། གཉིས་པ་བགྲོ་གླེང་དངོས་གཞིའི་སྐབས་མང་ཚོགས་དང་ཟུར་ཉན་པ་ཚོར་དྲི་བ་དྲིས་ལན་སོགས་ཀྱི་གོ་སྐབས་གཅིག་ཀྱང་མ་སྤྲད་པར་དམ་དྲགས་ཆེན་པོ་བྱས་སོང་། ལྷག་པར་དུ་བགྲོ་གླེང་གཙོ་སྐྱོང་བས་གསལ་བསྒྲགས་གནང་སྟེ་པར་དང་བརྙན་ལེན་མི་ཆོག་པ་མ་ཟད་ཁ་པར་ནང་སྒྲ་ཡང་བླངས་མི་ཆོག་པའི་དམ་དྲགས་བྱས་པ་དེ་ཁྱོན་ནས་ཡག་པོར་མཐོང་མ་སོང་། གསུམ་གྱི་ཆ་ནས་བགྲོ་གླེང་གོ་སྒྲིག་པའི་དྲི་བ་ཁག་དེ་ཙམ་གྱིས་ཁ་ཡོད་ལག་ཡོད་དང་གནད་དུ་འཁེལ་བ་ཞིག་ཏུ་མཐོང་མ་སོང་། ནམ་བཞག་རྒྱུན་གྱི་སྤྱི་འགྲོས་ཙམ་མ་གཏོགས་ཡག་པོ་དེ་ཙམ་མཐོང་མ་སོང་ལ། ལྷག་པར་དུ་ཕར་ཕྱོགས་ནས་སྲིད་སྐྱོང་འོས་མི་གཏམ་བཤད་གནང་མཁན་གཉིས་ཀྱི་ངོས་ནས་ཀྱང་ཕར་ཚུར་སྐྱོན་བརྗོད་དང་གསལ་བཤད་བྱེད་རྒྱུར་རྔམ་དྲགས་ཏེ་དྲི་བར་ལན་འདེབས་མ་བྱས་པ་དེ་ཧ་ཅང་བློ་ཕམ་གྱི་གནས་ཚུལ་ཞིག་བྱུང་སོང་།
དགའ་འོས་པ་གཅིག་རང་དེ་བོད་པའི་ཨ་ཡོད་ནང་གི་ད་ཡོད། སྒོ་ངའི་ནང་གི་སེར་ཐིག་གཉིས་སྟེང་ཆ་གཅིག་ལ་ཕེབས་ཏེ་མཐུན་བསྒྲིལ་རྡོག་རྩ་གཅིག་སྒྲིལ་གནང་བ་དེ་ལེགས་སོ།།
དེ་རིང་ནི་དགའ་འོས་པ་དང་བཀྲིས་པའི་ཉི་མ་ཞིག་ལ་དངོས་འཛིན་ཞུ་བཞིན་ཡོད་གང་ཡིན་ཟེར་ན་བོད་མི་རིགས་ཤིག་ལ་མཚོན་ན་༧གོང་ས་མཆོག་གིས་བོད་མི་རིགས་ལ་མང་གཙོ་འདི་གསོལ་སྩལ་གནང་བ་རེད། དེ་ཡང་དག་ཞིག་འགྲོ་ཐུབ་མིན་འདི་ལྟར་འགྲོ་དགོས་པ་ཡིན་དུས་མང་གཙོའི་ལམ་ཁ་དེར་འགྲོ་བ་ན་མི་མང་གཉིད་ལས་སད་དགོས་པ་རེད། གང་ལྟར་སྲིད་སྐྱོང་འོས་མི་གཉིས་རྣམ་འགྱུར་ཡག་པོ་འདུག་མ་ཟད་ལས་དོན་ཐོག་སྐྱོན་བརྗོད་གནང་བ་སོགས་མང་གཙོའི་འགྲོ་སྟངས་ཤིག་རེད། གང་ལྟར་དགའ་འོས་པ་ཤིག་རེད་བཀྲིས་བདེ་ལེགས་ཡོད།