དེ་རིང་པེན་བོད་ཀྱི་རྩོམ་པ་པོའི་མཐུན་ཚོགས་ཀྱིས་རྒྱལ་སྤྱིའི་བུད་མེད་དུས་ཆེན་ཐེངས་ ༡༠༥ པ་སྲུང་གཙིའི་ཐོག་བོད་ཀྱི་སྐྱེས་མ་ཚོར་དམིགས་བསལ་ཀྱི་འཇོན་ཐང་དང་ནུས་པ་ཡོད་སྐོར་བརྗོད་སོང་།
དེ་རིང་སྔ་དྲོའི་ཆུ་ཚོད་ ༡༠ བའི་སྟེང་བཞུགས་སྒར་དྷ་སའི་ཉེ་འགྲམ་གྱི་བཙུན་དགོན་སྒྲོལ་མ་གླིང་གི་ཚོགས་ཁང་དུ། རྒྱལ་སྤྱིའི་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་གོ་སྒྲིག་འོག་རྒྱལ་སྤྱིའི་ ༣.༨ བུད་མེད་དུས་ཆེན་ཐེངས་ ༡༠༥ སྲུང་གཙི་གནང་སོང་བ་དང་། མཛད་སྒོའི་ཐོག་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་བུད་མེད་རྩོམ་པ་པོ་དང་བཙུན་མ་རྩོམ་པ་པོ་ཁག་ཅིག་གི་གཙོས་པའི་བཙུན་དགོན་སྒྲོལ་མ་གླིང་གི་དགེ་སློབ་རྣམ་པ་བཅས་མི་གྲངས་ ༢༠༠ ཡས་མས་འཛོམས་འདུག
མཛད་སྒོའི་ཐོག་མར་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་དྲུང་ཆེ་ཉི་མ་འཚོ་ལགས་ཀྱིས་ཐེངས་འདིའི་བགྲོ་གླེང་གི་དགོས་དམིགས་སྐོར་ལ། རྒྱལ་སྤྱིའི་ ༣.༨ བུད་མེད་དུས་ཆེན་ནི་ཐོག་མར་ཕྱི་ལོ་ ༡༩༠༩ ལོར་ཨ་རི་ནས་སྲུང་གཙི་བྱས་པ་དང་རིམ་བཞིན་ཡོ་རུབ་སོགས་ཕྱི་རྒྱལ་ཡུལ་གྲུ་སོ་སོར་དར་འཕེལ་བྱུང་བ་དང་འབྲེལ། བོད་ནང་ཡིན་ན་ཡང་དུས་ཆེན་འདི་བཞིན་སྲུང་གཙི་བྱས་ནས་དུས་ཡུན་གང་འཚམ་ཕྱིན་ཡོད་པ་དང་། རྒྱལ་སྤྱིའི་བུད་མེད་དུས་ཆེན་སྲུང་གཙི་བྱེད་པའི་རྣམ་པའི་ཆ་ནས་ཡུལ་ལུང་མང་ཆེ་བས་སྤྱི་ཚོགས་ཐོག་བྱས་རྗེས་ཅན་གྱི་བུད་མེད་རྣམས་ངོས་འཛིན་དང་ཁོ་མོ་ཚོར་གདེང་འཇོག་གནང་སྟངས་རིགས་ཤིག་ཡིན་སྐོར་བརྗོད་སོང་།
བགྲོ་གླེང་ཐོག་པེན་རྩོམ་པ་པོའི་མཐུན་ཚོགས་ཀྱི་གསར་འགོད་པ་བསྟན་འཛིན་ཆོས་དབྱིངས་ནས་རྩོམ་འབྲིའི་རང་དབང་ལ་ཚོད་འཛིན་ཐེབས་པའི་བོད་ནང་གི་བུད་མེད་རྩོམ་པ་པོ་ཚེ་རིང་འོད་ཟེར་དང་འཇམ་དབྱངས་སྐྱིད། ཡེ་ཤེས་ཆོས་སྒྲོན། ནོར་འཛིན་དབང་མོ་བཅས་ཀྱི་ལོ་རྒྱུས་ངོ་སྤྲོད་གནང་སོང་བ་དང་། ནོར་གླིང་བོད་ཀྱི་རིག་གཞུང་ཉམས་ཞིབ་ཁང་གི་ཉམས་ཞིབ་པ་གཟུངས་འདུས་སྐྱིད་ནས་ཁོ་མོའི་རྩོམ་འབྲིའི་བརྒྱུད་རིམ་དང་ཉམས་མྱོང་ཐད་ནས་ད་ལྟ་བར་བརྩམས་གྲུབ་པའི་དེབ་ཕྲེང་གསུམ་དང་འབྲེལ། དམིགས་བསལ་ཁོ་མོའི་རྩོམ་ཡིག་གི་ཁ་ཕྱོགས་ལ་འགྱུར་བ་ཐེབས་སྟངས་ནི་བོད་ཕྱི་ནང་གཉིས་སུ་འབྱུང་བཞིན་པའི་སྐུ་ལུས་མེར་སྲེག་ལས་འགུལ་གྱི་གནས་སྟངས་དང་འབྲེལ་བ་ཡོད་སྐོར་བརྗོད་སོང་བ་དང་། བཙུན་མ་རྩོམ་པ་པོ་གངས་རྫི་དང་ཚེ་དཔག ཟླ་བ་ཆོས་སྒྲོན་གསུམ་ནས་བོད་ཀྱི་བཙུན་མའི་སྡེ་ནས་གནའ་དེང་གི་སློབ་གཉེར་བྱེད་སྟངས་དང་། དེ་ནས་ཐེའུ་གསར་དུས་དེབ་དང་འབྲེལ་བའི་བཙུན་དགོན་ཁག་གི་བཙུན་མ་ཚོའི་རྩོམ་ཡིག་ངོ་སྤྲོད་དང་འབྲེལ། ཁོང་ཅག་གིས་བཙུན་མ་དང་སྐྱེས་མ་རྣམས་ཀྱིས་རང་གི་འཇོན་ནུས་ཕྱི་ལ་འདོན་པའི་གོ་སྐབས་བརྩོན་ལེན་བྱེད་དགོས་པའི་སྐུལ་མ་དང་། དེ་བཞིན་བོད་ཀྱི་བུད་མེད་རྣམ་ལ་དམིགས་བསལ་ནུས་པ་དང་འཇོན་ཐང་ཡོད་པར་ངོས་འཛིན་གནང་གི་ཡོད་སྐོར་བརྗོད་སོང་།
དེའི་རྗེས་དབུས་བུད་མེད་ལྷན་ཚོགས་ཀྱི་རྒྱུན་ལས་ཟུར་པ་པདྨ་ཆོས་སྒྲོན་གྱིས་རང་ཉིད་རྩོམ་རིག་གི་ལམ་ཁར་ཇི་ལྟར་བསྐྱོད་པའི་གནས་ཚུལ་རགས་བསྡུས་དང་འབྲེལ་<<རྔམ་བརྗིད་རི་བོའི་ཚོགས་རྣམས་ཐོད་ཀྱི་བསུ་>>ཞེས་པའི་དཔེ་དེབ་སྒྱུར་སྐབས་ཀྱི་མྱོང་ཚོར་དང་བརྒྱུད་རིམ་སོགས་ཡིག་སྒྱུར་ཀྱི་ཁ་ཕྱོགས་དང་དེའི་འགན་འཁྲིའི་སྐོར་ལ་གཏམ་བཤད་སྤེལ་བ་དང་། དུས་བབ་གསར་ཁང་གི་རྩོམ་སྒྲིག་ལས་རོགས་པདྨ་མཚོས་གསར་འགྱུར་རྩོམ་རིག་འབྲི་ཕྱོགས་དང་གསར་འགོད་པའི་གཡོལ་དུ་མེད་པའི་འགན་འཁྲི་གསུམ་གྱི་ཐོག་གཏམ་བཤད་བྱས་ཡོད་པ་རེད།
མཇུག་ཏུ་པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཞོན་སྨན་ཤེར་བློ་གྲོས་ལགས་ཀྱིས། བོད་ཕྱི་ནང་གཉིས་ཀྱི་བུད་མེད་ཚོའི་བསམ་བློའི་གོ་རྟོགས་དང་ཤེས་ཡོན་གནས་ཚད་སོགས་ཕྱོགས་ཡོངས་ནས་ཡར་རྒྱས་ཆེན་པོ་འགྲོ་བཞིན་པ་དང་། ལྷག་པར་དུ་བོད་ཀྱི་བཙུན་མའི་སྡེ་ཡི་སློབ་སྦྱོང་གི་ཁ་ཕྱོགས་སོགས་ལ་བཟང་ཕྱོགས་ཀྱི་འཕོ་འགྱུར་ཧ་ཅང་ཆེན་པོ་ཕྱིན་ཡོད་པ་དེ་དགའ་གུས་བྱེད་འོས་ཞིག་ཡིན་སྐོར་དང་། བོད་ཀྱི་བུད་མེད་ཀྱི་ཤེས་འཇོན་ནུས་སྟོབས་ཀྱི་ཐད་ནས་དཔེ་མཚོན་ཙམ་ཞུས་ན། བཙན་བྱོལ་ནང་གི་ཨ་མ་རྗེ་བཙུན་པདྨ་ལགས་ལྟ་བུ་དང་བོད་ནང་གི་བུད་མེད་རྩོམ་པ་པོ་ཚེ་རིང་འོད་ཟེར་ལགས་ལྟ་བུར་བོད་རང་གི་སྤྱི་ཚོགས་ཙམ་མིན་པར་རྒྱལ་སྤྱིའི་སྒང་ནས་ཆེད་བསྟོད་ཀྱི་གཟེངས་རྟགས་མང་པོ་ཐོབ་ཡོད་པ་དང་། རྒྱལ་སྤྱིའི་ཐོག་ཤུགས་རྐྱེན་ཆེན་པོ་ཡོད་པའི་བོད་ཀྱི་བུད་མེད་གཉིས་ཆགས་ཡོད་སྐོར། དེ་བཞིན་མ་འོངས་པར་བོད་ཀྱི་རྩོམ་པ་པོའི་མཐུན་ཚོགས་ཀྱི་ངོས་ནས་བཙན་བྱོལ་བོད་མིའི་སྤྱི་ཚོགས་ནང་རྩོམ་རིག་སྒྱུ་རྩལ་གྱི་གཙོས་ཤེས་ཡོན་སློབ་གསོ་གོང་འཕེལ་དང་འབྲེལ་བའི་ཟབ་སྦྱོང་དང་བགྲོ་གླེང་སོགས་གང་མང་གོ་སྒྲིག་གནང་འཆར་ཡོད་སྐོར་བརྗོད་སོང་།
མཛད་སྒོའི་ཐོག་མཐུན་ཚོགས་ཀྱི་དྲུང་ཆེ་ཉི་མ་འཚོ་ལགས་ཀྱིས་ངོ་སྤྲོད་གནང་བ་ལྟར་ན། ད་ལྟའི་བར་བོད་ནང་དུ་བུད་མེད་རྩོམ་པ་པོ་ ༢༡ དང་བརྩམས་ཆོས་གྲངས་ ༣༡ བྱུང་ཡོད་པ་དང་། བཙན་བྱོལ་དུ་བུད་མེད་རྩོམ་པ་པོ་ ༡༤ དང་བརྩམས་ཆོས་གྲངས་ ༦༣ བཅས་བོད་ཕྱི་ནང་གཉིས་སུ་ཁྱོན་བུད་མེད་རྩོམ་པ་པོ་གྲངས་ ༣༥ ཙམ་གྱིས་བརྩམས་ཆོས་གྲངས་ ༩༤ བརྩམས་གྲུབ་ཡོད་པ་ནི། གྲངས་ཀའི་ཆ་ནས་ད་ལྟའི་གྲུབ་འབྲས་བླ་མེད་ཅིག་ལ་ངོས་འཛིན་དང་། དེ་དག་གི་ནང་ནས་འོད་ཟེར་དང་འཇམ་དབྱངས་སྐྱིད་ལྟ་བུས་མི་ཚེ་བློས་གཏོང་གིས་འཛམ་གླིང་ལ་གཡོ་སྒུལ་བསླངས་ཡོད་པ་དང་། བསམ་གླིང་ཚེ་རིང་ལྷ་མོས་བྱིས་སྒྲུང་དཔེ་དེབ་ཀྱིས་སྟོང་ཆ་གང་འཚམ་བསྐངས་ཡོད་འདུག
གསར་འགོད་པ། པདྨ་རྒྱལ།
