རྒྱ་གཞུང་གིས་གསུམ་བཅུའི་དུས་དྲན་དང་བསྟུན་བོད་ཁུལ་དུ་ཉུལ་ཞིབ་མི་སྣ་ཆེད་གཏོང་གིས་དམ་དྲག་ཤུགས་ཆེ་རུ་བཏང་ཡོད་འདུག
ལོ་ལྟར་གསུམ་བཅུའི་དུས་དྲན་གྱི་སྔ་གཞུག་ཏུ་རྒྱ་ནག་གཞུང་གིས་བོད་ཁུལ་ཡོངས་སུ་ལྟ་ཞིབ་ནན་པོ་བྱས་ཏེ་དམ་དྲག་ཤུགས་ཆེན་བྱེད་བཞིན་ཡོད་པ་ལྟར། དེ་རིང་འབྲེལ་ཡོད་ཅིག་གིས་འདྲ་པར་དང་བཅས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། གསུམ་བཅུའི་དུས་དྲན་གྱི་སྔ་ནུབ་ཏུ། རྒྱ་གཞུང་གིས་རེབ་གོང་ཕྱོགས་སུ་དམག་ཆས་གྱོན་ཡོད་མེད་ཀྱི་དམག་མི་མང་པོ་འགྲེམས་འཇོག་བྱས་ཡོད་པ་མ་ཟད། མང་ཚོགས་ཀྱི་བདེ་འཇགས་སྲུང་སྐྱོབ་ལ་ཁ་གཡར་ཏེ། རེབ་གོང་རྫོང་ཐོག་དང་རྫོང་ཁོངས་ཀྱི་གྲོང་པ་རེ་རེ། དེ་བཞིན་དགོན་སྡེ་ཁག་ཡོངས་ཀྱི་ནང་དཔུང་རས་དམར་པོ་བཏགས་པའི་ཉུལ་ཞིབ་མི་སྣ་ཆེད་གཏོང་བྱས་ཏེ། མང་ཚོགས་ཁྲོད་ཟིང་ཆ་སློང་མི་ཉན་པ་དང་། གལ་སྲིད་བསླང་བ་ཡིན་ན་ཉེས་ཆད་ལྗིད་མོ་ཕོག་རྒྱུ་ཡིན་པའི་ཉེན་བརྡ་བཏང་སྟེ་དགོན་གྲོང་རེ་རེ་བཞིན་དུ་ལྟ་ཞིབ་ནན་པོ་བྱེད་ཀྱི་ཡོད་འདུག གནས་ཚུལ་ཅུང་ཙམ་ཞིག་མཐོང་ཐོས་བྱུང་ཚེ། ལམ་སང་ས་གནས་ཉེན་རྟོག་པར་ཡར་ཞུ་བྱེད་དགོས་ཀྱི་ཡོད་པ་དང་། གལ་སྲིད་ཡར་ཞུ་བྱེད་མ་ཐུབ་པར་གནས་ཚུལ་བྱུང་བ་ཡིན་ན་ཉུལ་ཞིབ་ཆེད་གཏོང་མི་སྣར་ཉེས་ཆད་གཅོད་རྒྱུ་ཡིན་པའི་ཉེན་བརྡ་བཏང་ཡོད་འདུག
ཡང་ས་གནས་སུ་ཡོད་པའི་བོད་མི་ཞིག་གིས་དྲ་ལམ་དུ་ཁོང་རང་གི་སེམས་ཚོར་ཞིག་བྲིས་པའི་ནང་། ངའི་ཕ་ཡུལ་གྱི་རི་ཆུ་སྔར་བཞིན་འགྱུར་མེད། ཉེ་འཁོར་གྱི་འགྲོ་བ་མིའི་ངོ་གདོང་ན་འུ་ཐུག་གི་ཉམས་ཤིག་ད་དུང་གསལ་ལེར་མངོན་འདུག དེ་རིང་ངས་ཤོག་གུ་དཀར་པོ་དག་གི་དྭངས་གཙང་གི་ངོ་གདོང་ལ་མཛུབ་ཐེལ་དམར་པོ་དང་མིང་ཡིག་ནག་པོ་གཅལ་དུ་བཀྲམས་ཏེ། འབྲོག་དམངས་ཆིག་སྟོང་ཙམ་གྱི་སྙིང་ལ་ན་ཟུག་སློང་ག྄ིན་པ་གཞི་ནས་ཚོར་ཡོང་། འོན་ཀྱང་ང་ཚོས་གོ་དགོས་པ་དང་ཉན་དགོས་པ་ནི་གསལ་བཤད་མེད་པའི་གསལ་བཤད་ཅིག་དང་མཛུབ་མོ་ནང་དུ་བཀུག་པའི་གྲོས་ཆོད་ཅིག་ཡིན་ངེས། དེ་རིང་ཁྱོད་ཚོ་རང་གི་གོ་ཁ་ན། ང་ཆེ་ང་བཙན་གསུངས་པའི་གྲུབ་རྟགས་རེ་སྟོན་གྱིན་བཞུགས་ཡོད་ངེས། ངས་ནི་ལོ་ངོ་ང་བརྒྱད་སྔོན་གྱི་དེ་རིང་གི་ཉིན་མོ་དེ་དྲན་གྱིན་ཡོད། འཕྲིན་ཕྲན་གྱི་བར་སྟོངས་སློག་བཞིན་ཡོད། མེས་པོའི་དུར་སྒམ་རེ་རེ་ཁ་ཕྱེ་བཞིན་ཡོད། གཏན་ནས་ཁྱེད་ཅག་གི་ཉོག་གཏམ་ལ་ཉན་ཁོམ་མེད། ཅེས་བྲིས་འདུག་ལ། སེམས་ཚོར་རྩོམ་ཡིག་དེའི་ནང་དོན་ལ་བལྟས་པ་ཡིན་ན། སྲིད་གཞུང་གིས་ས་གནས་འབྲེལ་ཡོད་མི་སྣར་བཙན་སྐུལ་གྱིས། ས་གནས་སུ་གནས་ཚུལ་བྱུང་དུ་འཇུག་རྒྱུ་མིན་པའི་ཁག་ཐེག་ཡིག་ཆའི་ཐོག་མིང་རྟགས་བཀོད་དུ་བཅུག་པ་སོགས་ཀྱི་བྱ་འགུལ་སྤེལ་གྱི་ཡོད་འདུག
གནས་ཚུལ་དང་མཉམ་དུ་མཁོ་སྤྲོད་གནང་བའི་འདྲ་པར་འདི་རྣམས་ནི་རེབ་གོང་རྩེ་ཁོག་རྫོང་ཧོར་ནག་ཤང་གི་སྡེ་བ་ཅིག་ཏུ་མྱུལ་ཞིབ་པས་སྲིད་གཞུང་གི་བཀའ་བཀོད་ལྟར་བྱ་འགུལ་སྤེལ་བཞིན་པའི་ཟུར་ཞིག་ཡིན་འདུག
གསར་འགོད་པ། པདྨ་མཚོ།
