འདས་ཟིན་པ་དེ་འདས་ཟིན་པ་རེད། མ་འོངས་པར་ཚང་མས་ཆིག་སྒྲིལ་བྱས་ཏེ་འགྲོ་དགོས།

དེ་རིང་དྷ་ས་གངས་སྐྱིད་ཁུལ་དུ་སྲིད་སྤྱིའི་འོས་བསྡུའི་སྟེང་སྲིད་སྐྱོང་འོས་མི་བློ་བཟང་སེང་གེ་མཆོག་དང་སྤེན་པ་ཚེ་རིང་རྣམ་གཉིས་ཕེབས་ཏེ། བཙན་བྱོལ་བོད་མིའི་དམངས་གཙོར་མིག་དཔེ་བལྟས་ཏེ་རྒྱ་ནག་གཞུང་གིས་བོད་དང་རྒྱ་ནག་ནང་དམངས་གཙོ་ལག་ལེན་བསྟར་དགོས་པའི་འབོད་སྐུལ་གནང་སོང་།

དེ་རིང་སྟེ་ཕྱི་ཟླ་ ༣ ཚེས་ ༢༠ ཉིན། རྒྱ་གར་དང་ཕྱི་རྒྱལ་ཡུལ་གྲུ་ཁག་ཏུ། སྐབས་བཅོ་ལྔ་པའི་བཀའ་ཤག་གི་སྲིད་སྐྱོང་དང་སྐབས་བཅུ་དྲུག་པའི་བོད་མི་མང་སྤྱི་འཐུས་འོས་བསྡུ་ཆེན་མོ་དེ་དབུ་འཛུགས་གནང་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༩ པའི་སྟེང་། གངས་སྐྱིད་སྤྱི་ཐབ་ཐོག་ཁང་དུ་མདོ་སྟོད་སྨད་གཉིས་དང་། སྤྱི་ཐབ་འོག་ཁང་དུ་དབུས་གཙང་བཅས་སུ་འོས་བསྡུའི་སྤྱིལ་བུ་གོ་སྒྲིག་གནང་འདུག

གངས་སྐྱིད་གཡས་གཡོན་གྱི་མི་མང་དེ་རིང་ཞོགས་པའི་ཆུ་ཚོད་ ༧།༣༠ ཙམ་ནས་གངས་སྐྱིད་ཐང་གར་འཛོམས་འདུག་ལ། ཆུ་ཚོད་ ༩ པ་ཟིན་མ་ཐག་མི་མང་རྣམས་བང་བསྒྲིགས་ཏེ་དབུས་གཙང་མི་མང་གི་བང་གི་སྣེ་མོ་གངས་སྐྱིད་དྲིལ་བསྒྲགས་ལས་ཁུངས་སྒོ་ཁ་བར་དང་། མདོ་སྟོད་སྨད་གཉིས་ཀྱི་བང་གི་སྣེ་མོ་ཤེས་རིག་ལས་ཁུངས་སྒོ་ཁ་བར་བསླེབས་འདུག

སྔ་དྲོའི་ཆུ་ཚོད་ ༡༠།༡༥ ཙམ་ལ་སྲིད་སྐྱོང་འོས་མི་སྤེན་པ་ཚེ་རིང་མཆོག་ཕེབས་ཏེ་འོས་འཕངས་རྗེས་གསར་འགོད་པས་ཁོང་ལ། ཐེངས་འདིའི་འོས་བསྡུ་བརྒྱུད་དེ་རྒྱ་ནག་གཞུང་ལ་བརྡ་ལན་ག་རེ་ཡོད་མེད་དྲིས་པའི་ལན་དུ་ཁོང་གིས། ༧གོང་ས་མཆོག་གིས་བཀའ་གནང་བ་ལྟར་འདས་པའི་ལོ་ ༦༠ ལྷག་རིང་གཡས་སྐྱོར་གཡོན་སྐྱོར་བྱས་ནས་ཡོང་བ་རེད། དམངས་གཙོའི་འཕེལ་རིམ་ཐོག་ད་བར་འགྱུར་བ་གང་ཕྱིན་པ་དེ་༧གོང་ས་མཆོག་རང་གི་ཐུགས་རྗེ་བཀའ་དྲིན་ལ་བརྟེན་ཏེ་བྱུང་བ་ཞིག་ཡིན་སྟབས། རྒྱ་ནག་གཞུང་ལ་ང་ཚོ་བཙན་བྱོལ་ནང་དམངས་གཙོ་ཚད་དང་ལྡན་པ་ཞིག་གི་སྟེང་ལ་འགྲོ་བཞིན་ཡོད་ཟེར་ནས་བརྡ་ལན་སྤྲོད་རྒྱུ་དང་། མ་འོངས་པར་ཡང་དམངས་གཙོ་གོང་འཕེལ་གཏོང་རྒྱུ་དང་། མང་ཚོགས་ངོས་ནས་ཀྱང་འགན་ཤུགས་ཆེ་ཙམ་འཁུར་བའི་ཐོག་ནས་འཆམ་མཐུན་ཡོང་ཐུབ་པ་ཞིག་རེད། དེ་བཞིན། རྒྱ་ནག་གཞུང་གིས་ཀྱང་ང་ཚོའི་ཐོག་ནས་བསླབ་བྱ་ལེན་རྒྱུ་དང་། ལྷག་པར་དུ་རྒྱ་ནག་ནང་དམངས་གཙོ་འཕེལ་རྒྱས་སུ་གཏོང་འདོད་ཡོད་ན། བོད་ནས་མགོ་བཙུགས་ཏེ་དམངས་གཙོ་ལག་བསྟར་བྱེད་པའི་ལམ་ཁ་ཞིག་༧གོང་ས་མཆོག་གིས་བསྟན་ཡོད་པ་རེད། ཅེས་གསུངས་སོང་།

ཡང་ཁོང་ལ། གལ་སྲིད་སྲིད་སྐྱོང་བློ་བཟང་སེང་གེ་མཆོག་ལ་འོས་བསྡུའི་རྒྱལ་ཁ་ཐོབ་པ་ཡིན་ན། ད་བར་ཁྱེད་རང་ལ་རྒྱབ་སྐྱོར་གནང་མཁན་མང་ཚོགས་ལ་ལམ་སྟོན་ག་རེ་གནང་འཆར་ཡོད་མེད་དྲིས་པའི་ལན་དུ་ཁོང་གིས། འདིའི་སྔོར་ངས་གསར་འགོད་གསལ་བསྒྲགས་ནང་ལའང་ཞུས་ཡོད། ཐེངས་འདིའི་འོས་བསྡུའི་ལས་རིམ་དང་འབྲེལ་ཏེ་མང་ཚོགས་ནང་ཕྱོགས་རེས་འཐེན་འཁྱེར་གྱི་གནས་ཚུལ་དང་། སྡིགས་ར་སྐུལ་བ་དང་ལག་པ་བརྐྱངས་པའི་གནས་ཚུལ་སོགས་ཐོས་རྒྱུ་འདུག་པ་དེ་དག་བློ་ཕམ་གྱི་རྒྱུ་རེད། ང་རང་ལ་རྒྱབ་སྐྱོར་བྱེད་མཁན་དང་སྐད་འཕྲིན་ཚོགས་པ་དེ་ཚོར་འོས་བསྡུའི་ལས་རིམ་ཚར་བའི་ཉིན་མོ་ནས་སྒོ་རྒྱག་རོགས་ཞུས་ཡོད་ལ། ལམ་སྟོན་ཞུས་པ་ལྟར་གཅིག་གཉིས་ཤིག་སྒོ་བརྒྱབ་ཚར་འདུག མི་ལྔ་བརྒྱ་ཡོད་པའི་སྐད་འཕྲིན་ཚོགས་པ་ཞིག་གིས་ཉིན་གཉིས་གསུམ་རིང་སྒོ་རྒྱག་རྒྱུ་མིན། གནས་སྐབས་རིང་བགྲོ་གླེང་འདྲ་དང་གཞས་འདྲ་བཏང་ནས་འདུག་རྒྱུ་ཡིན་ཟེར། དེ་དག་ཡག་པོ་རེད་བསམ་གྱི་འདུག སྲིད་སྐྱོང་ལས་ཐོག་བློ་བཟང་སེང་གེ་ལགས་སུ་རྒྱབ་སྐྱོར་གནང་མཁན་ཚོ་ཡིན་ནའང་ད་བར་བརྒྱུད་རིམ་ཞིག་ཕྱིན་ཚར་བ་དེ་ཕྱིན་ཚར་བ་རེད་ཕྱིར་སློག་རྒྱག་ཐབས་ཡོད་པ་མ་རེད། མ་འོངས་པར་ང་ཚོ་ཚང་མས་གཅིག་གྱུར་བྱས་ཏེ་འགྲོ་དགོས་པ་རེད་མ་གཏོགས་ང་ཚོའི་ཁ་གཏད་རྒྱ་ནག་རེད། ང་ཚོར་ཆིག་སྒྲིལ་གྱི་ནུས་པ་ཏོག་ཙམ་ཡོད་པ་དེ་ཁ་ཐོར་དུ་ཕྱིན་པ་ཡིན་ན། ང་ཚོས་ཕར་ཁ་གཏད་ཇི་ལྟར་གཅོག་རྒྱུ་ཡིན། མ་འོངས་པར་ང་ཚོ་ཚང་མས་ཆིག་སྒྲིལ་བྱས་ཏེ་འགྲོ་དགོས་པ་རེད། ཅེས་གསུངས་སོང་།

ཆུ་ཚོད་ ༡༠། ༤༠ ཙམ་ལ་སྲིད་སྐྱོང་འོས་མི་བློ་བཟང་སེང་གེ་མཆོག་ཕེབས་ཏེ་འོས་ཤོག་འཕངས་རྗེས་གསར་འགོད་པས་ཁོང་ལ། ཐེངས་འདིའི་འོས་བསྡུ་བརྒྱུད་དེ་རྒྱ་ནག་གཞུང་ལ་བརྡ་ལན་ག་རེ་ཡོད་མེད་དྲིས་པའི་ལན་དུ་ཁོང་གིས། རྒྱ་ནག་གཞུང་ལ་དེ་སྔ་ནས་བཤད་བསྡད་ཡོད། བོད་མིའི་སྒྲིག་འཛུགས་འདིར་༧གོང་ས་མཆོག་གིས་གསོལ་རས་གནང་པའི་དམངས་གཙོ་ལོ་ངོ་ལྔ་བཅུ་ང་གྲངས་རིང་ལག་བསྟར་བྱས་ནས་ཡོང་བ་རེད། རྒྱ་ནག་གཞུང་ལ་མཚོན་ན་ཡང་། རྒྱ་ནག་ནང་ཡིན་ན་རེད་ལ་བོད་ནང་ཡིན་ནའང་རེད་དམངས་གཙོ་ལག་བསྟར་གནང་ཐུབ་པ་ཞིག་རེད། གང་ཡིན་ཟེར་ན། ང་ཚོས་བཙན་བྱོལ་ནང་དམངས་གཙོ་ལག་བསྟར་བྱེད་ཐུབ་པ་ཡིན་ན་བོད་དང་རྒྱ་ནག་ནང་དམངས་གཙོ་ལག་བསྟར་བྱེད་ཐུབ་པ་ཞིག་རེད། ང་ཚོའི་མིག་དཔེ་བཟང་པོ་འདིར་གཟིགས་རོགས་གནང་། རྒྱ་ནག་གཞུང་གིས་ང་ཚོའི་དམངས་གཙོ་ལ་སྐྱོན་བརྗོད་བྱེད་ཀྱི་ཡོད་པ་རེད། མཛུབ་མོ་གཅིག་ཕར་བཙུགས་ཡོད་སྐབས་མཛུབ་མོ་བཞི་ཚུར་བཙུགས་ཡོད་པ་ཤེས་པ་གནང་རོགས། དམངས་གཙོ་ལག་བསྟར་བྱས་ན་རྒྱ་ནག་མི་མང་དང་བོད་པར་ཕན་ཐོགས་ཡོད་པ་རེད་ཞུ་རྒྱུ་ཡིན། ཞེས་གསུངས་སོང་།

ཡང་ཁོང་ལ། སྲིད་སྐྱོང་གི་རྒྱལ་ཁ་དེ་ཁྱེད་རང་ལ་ཐོབ་པ་ཡིན་ན་འདྲ་ལ་སྤེན་པ་ཚེ་རིང་ལ་ཐོབ་པ་ཡིན་ནའང་འདྲ། ཕྱོགས་གཉིས་སོ་སོར་རྒྱབ་སྐྱོར་གནང་མཁན་མང་ཚོགས་ཚོར་ལམ་སྟོན་ཁ་གསལ་ག་རེ་གནང་རྒྱུ་ཡོད་མེད་དྲིས་པར་ཁོང་གིས། འདིའི་ཐད་ངས་སྔོན་མ་ནས་ཞུས་ཡོད། ང་ཚོའི་ཐུན་མོང་མ་ཡིན་པའི་དམངས་གཙོ་འདིར་ཁྱད་ཆོས་གཅིག་ག་རེ་ཡོད་པ་རེད་ཟེར་ན། ཡ་རབས་བཟང་སྤྱོད་ཐོག་ནས་ཆ་ཤས་ལེན་རྒྱུ་ཧ་ཅང་གལ་ཆེན་པོ་རེད། འོས་འཕངས་ཚར་བའི་རྗེས་ལའང་ཡ་རབས་བཟང་སྤྱོད་ཐོག་ནས་འགྲོ་དགོས་པ་ཤིན་ཏུ་ནས་གལ་ཆེན་པོ་རེད། གང་ཡིན་ཟེར་ན། ང་ཚོ་བཙན་བྱོལ་སྒྲིག་འཛུགས་ལ་མི་འབོར་ཉུང་ཤས་ཤིག་ལས་ཡོད་པ་མ་རེད། ང་ཚོའི་དམངས་གཙོའི་སྒྲིག་སྲོལ་འདི་ཡང་ནུབ་ཕྱོགས་སུ་དམངས་གཙོ་ལོ་བརྒྱ་ཕྲག་རིང་ལག་བསྟར་བའི་རྒྱལ་ཁབ་དག་ལ་སྙོབ་ཐུབ་ཡོད་པ་མ་རེད། ཡིན་ནའང་བོད་པའི་ཡ་རབས་བཟང་སྤྱོད་འདི་ལ་རྒྱལ་སྤྱི་དང་རྒྱ་གར་གྱིས་བསྔགས་བརྗོད་གནང་གི་ཡོད་པ་རེད། ཅེས་གསུངས་སོང་།

སྔ་དྲོའི་ཆུ་ཚོད་ ༩།༤༠ ཙམ་ལ་ཐེངས་འདིར་བཙན་བྱོལ་བོད་མིའི་འོས་བསྡུ་ཆེན་མོར་ཆེད་དུ་རྟོག་ཞིབ་གནང་བར་ཕེབས་ཡོད་པའི་འཇར་མན་གྲོས་ཚོགས་འཐུས་མི་སྐུ་ཞབས་ (Thomas Mann) ལགས་དང་། ཧྥ་རན་སིའི་གྲོས་ཚོགས་འཐུས་མི་ (Andre Gattolin) ལགས། ཁེ་ན་ཌའི་གྲོས་ཚོགས་འཐུས་མི་ཟུར་པ་སྐུ་ཞབས་ (Consiglio Di Nino) དེ་བཞིན། ཨོ་སི་ཊོ་ལི་ཡའི་གྲོས་ཚོགས་འཐུས་མི་ལྕམ་ (Lisa Singh) ལགས་གཙོས་པའི་དབྱིན་ཡུལ་དང་ཨི་ཊ་ལི་བཅས་ཀྱི་གྲོས་ཚོགས་འཐུས་མི་དང་འཐུས་མི་ཟུར་པ་སོགས་མི་གྲངས་ ༨ དང་། དེ་བཞིན། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་སྐུ་ཞབས་ Matteo Mecacci ལགས་དང་འགན་འཛིན་གཞོན་པ་བུ་ཆུང་ཚེ་རིང་ལགས་སོགས་དྷ་ས་གཙུག་ལག་ཁང་དུ་འོས་བསྡུའི་ལས་རིམ་ལ་རྟོག་ཞིབ་གནང་ཟིན་ཏེ་གངས་སྐྱིད་ཁུལ་རྟོག་ཞིབ་ཏུ་ཕེབས་སོང་།

གསར་འགོད་པ། དོན་འགྲུབ་བཀྲ་ཤིས།