ངས་སྲིད་སྐྱོང་འོས་མི་གཉིས་ཀ་ངོ་ཤེས་ཀྱི་མི་འདུག་ཟེར།

དེ་རིང་སྔ་དྲོའི་ཆུ་ཚོད་ ༩ ནས་ཕྱི་དྲོའི་ཆུ་ཚོད་ ༥ པ་བར་བཞུགས་སྒར་དྷ་རམ་ས་ལར་ཕྱི་ལོ་ ༢༠༡༦ ལོའི་བཙན་བྱོལ་བོད་མིའི་དངོས་གཞིའི་འོས་བླུག་བཞིན་འདུག་ལ། འོས་འཕེན་པ་མང་པོས་པར་དང་མིང་སོགས་ཡོད་ཀྱང་སྤྱི་འཐུས་མང་པོར་རྒྱུས་མེད་སྟབས་འོས་བླུགས་མེད་སྐོར་བརྗོད་བྱུང་།

དེ་རིང་སྔ་དྲོའི་ཆུ་ཚོད་ ༩ པ་ཐོག དྷ་ས་ཐེག་ཆེན་གཙུག་ལག་ཁང་གི་ཆོས་རའི་ནང་དུ། བཙན་བྱོལ་བོད་མིའི་འོས་བསྡུ་ཆེན་མོའི་དངོས་གཞིའི་འོས་བླུགས་སོང་བ་དང་། ཆོལ་ཁ་རེ་རེ་བྱས་ནས་འོས་མིའི་འགེངས་ཤོག་ལེན་ས་དང་འོས་འཕེན་པའི་ཐོ་འགོད་བྱེད་ས་བཟོས་འདུག་ལ། དྷ་ས་རམ་ལ་ནི་བཙན་བྱོལ་བོད་མིའི་ལྟེ་གནས་ཆགས་ཡོད་སྟབས། ཞོགས་པའི་ཆུ་ཚོད་ ༧ པ་ཡོལ་ཙམ་ནས་བཟུང་མི་མང་པོ་གཙུག་ལག་ཁང་ཏུ་འབྱོར་ཏེ། འོས་འཕེན་པར་གྲ་སྒྲིག་བྱས་ཏེ་བང་བསྒྲིགས་ནས་བསྡད་འདུག འདི་ལོའི་བཙན་བྱོལ་བོད་མིའི་འོས་བསྡུ་ཆེན་མོར་རྟོག་ཞིབ་སླད་ཆེད་དུ་ཕེབས་པའི་ཧྥ་རན་སི་དང་འཇར་མན། ཁེ་ན་ཌ། ཨོ་སི་ཊོ་ལི་ཡ་སོགས་ནས་ཕེབས་པའི་རྒྱལ་སྤྱིའི་གྲོས་ཚོགས་འཐུས་མིའི་རྟོག་ཞིབ་སྐུ་ཚབ་ཚོགས་ཆུང་གི་ཚོགས་མི་རྣམ་པ་ཡང་གཙུག་ལག་ཁང་དུ་ཡོང་སྟེ། དངོས་སུ་གཟིགས་ཞིབ་གནང་བ་དང་འབྲེལ་ཡུལ་དངོས་ནས་གསར་འགོད་པར་བཙན་བྱོལ་བོད་མིའི་འོས་བསྡུའི་སྤྱི་ཡོངས་ཀྱི་མཐོང་སྣང་སོགས་བརྗོད་བྱུང་ལ། བོད་མི་འོས་འཕེན་པ་ཁ་ཤས་ཤིག་ལ་འོས་བསྡུ་དང་འབྲེལ་བའི་བསམ་ཚུལ་ཁག་ཅིག་དྲིས་ཡོད།

འདི་གའི་གསར་འགོད་པས་རྟོག་ཞིབ་ཚོགས་ཆུང་གི་ཚོགས་མི་དང་ཧྥ་རན་སིའི་གྲོས་ཚོགས་འཐུས་མི་སྐུ་ཞབས་ཨན་ཌ་རི་གྷ་ཊོ་ལེན་ (Andre Gattolin) ལགས་ལ། དེ་རིང་གི་བཙན་བྱོལ་བོད་མིའི་འོས་བསྡུའི་ཐད་ཁྱེད་རང་ལ་མཐོང་སྣང་ག་རེ་བྱུང་ཞེས་དྲིས་པར་ཁོས། ཧ་ཅང་དགའ་འོས་པ་ཞིག་རེད། ངས་སྐྱབས་བཅོལ་བོད་མིའི་འོས་བསྡུ་ཐོག་དང་པོ་མཐོང་བ་ཡིན། ང་རང་རྒྱལ་སྤྱིའི་གྲོས་ཚོགས་འཐུས་མི་དང་བཙན་བྱོལ་བོད་མིའི་འོས་བསྡུ་རྟོག་ཞིབ་ལས་དོན་གྱི་སྐུ་ཚབ་ཏུ་ཡོང་བ་ཡིན། ཁྱེད་ཚོའི་འོས་བསྡུའི་སྒྲིག་འཛུགས་ཡག་པོ་འདུག་ལ། ཁྱེད་རང་ཚོའི་ལག་དེབ་ལྗང་ཁུ་དེབ་སྐྱེལ་དང་ཞིབ་བཤེར། འོས་བླུགས་རྗེས་སེན་རྟགས་སྔོ་ནག་རྒྱག་པ་དང་། འོས་འཕེན་མི་མང་གིས་འོས་བསྡུའི་སྒྲིག་སྲོལ་བརྩི་བ་སོགས་ངས་དེ་རིང་གི་འོས་བསྡུ་འདི་ཧ་ཅང་ཡག་པོ་མཐོང་སོང་། སྤྱིའི་ཆ་ནས་ཁྱེད་རང་ཚོས་བཙན་བྱོལ་ནང་འོས་བསྡུ་བྱེད་ཀྱི་ཡོད་དུས། ང་ཚོའི་ལུང་པ་དང་ཁྱེད་རང་ཚོ་བཙན་བྱོལ་བོད་མིའི་འོས་བསྡུ་གཉིས་འདྲ་ཡི་མེད་པ་བཤད་མ་དགོས་པ་རེད། ཅེས་སོགས་བརྗོད་བྱུང་།

དགེ་འདུན་པ་ཞིག་གིས་འོས་བསྡུའི་སྐྱོན་ཆ་སྐོར་ལ་བསམ་ཚུལ་བརྗོད་དོན། འོས་བསྡུའི་སྔོན་འགྲོ་དང་དངོས་གཞི་གཉིས་བར་དུ་དུས་ཚོད་རིང་དྲགས་པའི་སྐྱོན་འདུག་བསམ་གྱི་ཡོད། ད་ལྟའི་གནས་ཚུལ་འདྲ་པོ་ཡིན་ན་ཕྱོགས་གཅིག་ནས་བགྲོ་གླེང་ཡག་པོ་བྱུང་གི་ཡོད་པ་དང་། ཕྱོགས་གཅིག་ནས་བགྲོ་གླེང་མང་དྲགས་ནས་སྐྱོན་ཞིག་བསླེབ་གྲབས་བསླེབ་གྲབས་བྱེད་ཀྱི་ཡོད་པ་རེད། སྔོན་འགྲོ་ཕྱི་ལོ་ ༢༠༡༥ ལོའི་ཟླ་ ༡༠ ཚེས་ ༡༨ ནས་དེ་རིང་ཕྱི་ཟླ་ ༣ ཚེས་ ༢༠ བར་ཟླ་བ་གང་ལ་གང་འཚམ་ཞིག་ཕྱིན་ཚར་བ་རེད། དེ་འདྲ་ཡིན་དུས་སྔོན་འགྲོ་དང་དངོས་གཞིའི་བར་དུ་དུས་ཚོད་རིང་དྲགས་པའི་སྐྱོན་ཞིག་ང་རང་གིས་མཐོང་གི་འདུག ཅེས་དང་།

ཡང་གསར་འགོད་པས་སྲིད་སྐྱོང་འོས་མི་སུ་ལ་འོས་བླུགས་ཡོད་དྲིས་པར་ཁོང་གིས། སྲིད་སྐྱོང་འོས་མི་གཉིས་ཀྱིས་བགྲོ་གླེང་མང་པོ་ཞེ་དྲགས་ཤིག་གནང་ཡོད་པ་དང་། ང་རང་གི་དམིགས་ཡུལ་ནང་ཁོང་གཉིས་ཀྱི་ནང་ནས་སུས་གཞིས་ལུས་མི་མང་གི་སྙིང་སྟོབས་དང་ལྷག་བསམ། རེ་བ་བཅས་ཀྱི་སྐོར་ལ་བཀའ་མོལ་དང་དབྱེ་ཞིབ། འཆར་གཞི་མང་བ་འདུག་དེར་བལྟས་ནས་འོས་བླུགས་ཡོད། ཅེས་བརྗོད་བྱུང་།

དགེ་འདུན་པ་ཞིག་ལ་ཐེངས་འདིའི་འོས་བསྡུ་བརྒྱུད་མ་འོངས་པའི་འོས་བསྡུ་ལ་བསམ་ཚུལ་ག་རེ་འདོན་རྒྱུ་ཡོད་ཅེས་དྲིས་པར་ཁོང་གིས། མ་འོངས་པར་སྲིད་སྐྱོང་ཡིན་ན་རེད། སྤྱི་འཐུས་ཡིན་ནའང་རེད་བོད་མི་རིགས་ཀྱི་རྩ་དོན་ཡག་ཐག་ཆོད་སྒྲུབ་མཁན་ཞིག་དགོས་ཀྱི་འདུག ཕྱི་གསལ་ནང་གསལ་དང་བཀའ་མོལ་ཡིན་ནའང་བོད་སྤྱི་པར་འགན་འཁུར་བའི་ཐོག་ནས་གནང་དགོས་ཀྱི་འདུག་མ་གཏོགས། སོ་སོར་རྐུབ་སྟེགས་རག་པ་ཡིན་ན་སྒེར་དོན་རྐྱང་རྐྱང་སྒྲུབ་བསྡད་པ་འདྲ་པོ་མཐོང་གི་འདུག དེ་འདྲ་བྱས་བསྡད་པ་ཡིན་ན་བོད་ནང་ལོགས་ཀྱི་བོད་མི་མང་པོར་བློ་ཕམ་ཡོང་གི་ཡོད་ས་རེད་དཱ། ངས་བསམ་བློ་བཏང་ན་མ་འོངས་པར་སྲིད་སྐྱོང་དང་སྤྱི་འཐུས་སུ་གདམ་པ་ཡིན་ནའང་བོད་སྤྱི་པར་དངོས་གནས་དྲང་གནས་ཕན་ཐོགས་མཁན་ཞིག་གདམ་དགོས་པ་ཧ་ཅང་གལ་ཆེན་པོ་རེད་ཅེས་ཟེར།

བོད་ནས་གསར་དུ་ཡོང་བའི་ཕོ་གསར་ཞིག་ལ་སྤྱི་འཐུས་ག་ཚོད་བདམས་ཡིན་དྲིས་པར་ཁོང་གིས། ངས་སྤྱི་འཐུས་དགུ་མ་གཏོགས་གདམ་རྒྱུ་རག་མ་སོང་། གང་ཡིན་ཟེར་ན། གཙོ་ཆེ་བ་སོ་སོར་ཆ་རྒྱུས་ཡོད་དགོས་པ་རེད། དེ་འདྲ་ཡིན་དུས་ངས་སྤྱི་འཐུས་མི་དགུ་བདམས་ཡོད། ཅེས་བརྗོད་བྱུང་བ་དང་། ཡང་འོས་ཐེངས་དང་པོ་འཕེན་མཁན་བུ་མོ་ཞིག་གིས། ངས་སྤྱི་འཐུས་གཉིས་བདམས་ཡོད། ཁོང་གཉིས་ངའི་རོགས་པ་ཞིག་གིས་ཡག་པོ་ཡོད་པ་རེད་ཟེར་གྱི་འདུག་པས་བདམས་པ་ཡིན། གཞན་པ་རྣམས་ངོ་ཤེས་ཀྱི་མི་འདུག་ལ། རྒྱུས་ཀྱང་མེད་པས་བདམས་མེད་ཅེས་བརྗོད་བྱུང་།

ཨ་ནེ་ཞིག་ལ་ཁྱེད་ཀྱིས་སྲིད་སྐྱོང་འོས་མི་སུ་ལ་བླུགས་ཡོད་ཅེས་དྲིས་པར་མོས། ངས་ཁོང་གཉིས་ཀ་ངོ་ཤེས་ཀྱི་མེད། གང་ལྟར་ཤོག་བུའི་སྒང་ལ་པར་འདུག་པས་དེ་གཉིས་ཀྱི་ནང་ནས་གཅིག་ལ་འོས་རྟགས་ཤིག་བརྒྱབ་ནས་སྤྲད་བཞག་ཡིན། ཅེས་བརྗོད་བྱུང་། ཡང་ཨ་མ་ལགས་ཤིག་གིས་འོས་ཀྱི་འགེངས་ཤོག་ནང་འོས་མི་ཚང་མའི་པར་འདུག་སྟེ། ནམ་རྒྱུན་མཐོང་བསྡད་པའི་མི་དང་པར་གཉིས་ཀྱི་བར་དུ་མ་འདྲ་བ་ཆེན་པོ་ཡོད་དུས་ཡག་པོ་ཞིག་ངོ་ཤེས་ཀྱི་མི་འདུག དེ་ནས་ངོ་ཤེས་པ་དང་ཡག་པོ་ཡོད་བསམ་པའི་སྤྱི་འཐུས་འོས་མི་ ༦ ལ་འོས་རྟགས་བརྒྱབ་ཡིན། ཞེས་བརྗོད་བྱུང་།

བོད་ནས་ཡོང་བའི་བུད་མེད་ཅིག་ལ་སྲིད་སྐྱོང་གི་འོས་སུ་ལ་བླུགས་ཡོད་དྲིས་པར་ཁོང་མོས། ངས་སྲིད་སྐྱོང་དངོས་གནས་བོད་སྤྱི་པའི་དོན་དུ་ཕན་ཐོགས་སྒྲུབ་མཁན་ཞིག་དང་། ལྷག་པར་དུ་༧རྒྱལ་བ་རིན་པོ་ཆེའི་བཀའ་དགོངས་སེམས་ཀྱི་དཀྱིལ་ལ་ཉར་མཁན་ཞིག་ལ་འོས་བླུགས་ཡོད། སྔོན་མ་ཡིན་ན་ངེད་ཚང་གི་བཟའ་མི་གསུམ་གྱིས་བློ་བཟང་སེང་གེ་མཆོག་ལ་བླུགས་ཡིན། ད་ལན་ལྷག་བསམ་དང་དྲང་ཚུགས་གང་ཅིའི་ཆ་ནས་སྤེན་པ་ཚེ་རིང་ཡག་པོར་མཐོང་སྟེ་ཁོང་ལ་བླུགས་ཡོད། ཡིན་ནའང་། མ་འོངས་པར་ཁོང་གཉིས་ཀྱི་སུ་ལ་རྒྱལ་ཁ་འཐོབ་པ་ཡིན་ནའང་རྒྱབ་སྐྱོར་ཡོད་ཅེས་ཟེར།

ཨ་མ་ལགས་ཤིག་ལ་བསམ་བློ་ག་འདྲ་ཞིག་འཁུར་ཏེ་སྲིད་སྐྱོང་འོས་མི་སུ་ལ་འོས་བླུགས་ཡིན་དྲིས་དུས་མོས། ངས་བློ་བཟང་སེང་གེ་ལགས་ལ་འོས་བླུགས་ཡོད། གང་ཡིན་ཟེར་ན། ངའི་རྐང་པ་ནད་པ་ཡིན་པས་ཡར་མར་འགྲོ་ཐུབ་ཀྱི་མེད་ཀྱང་བརྙན་འཕྲིན་དེ་འདྲའི་ནང་ནས་༧རྒྱལ་བ་རིན་པོ་ཆེས་བློ་བཟང་སེང་གེ་ལགས་ཁོང་རང་སྐྱེས་ས་རྒྱ་གར་དང་རྒྱ་གར་ལ་སློབ་སྦྱོང་བྱས་པ་དང་། དེ་ནས་ཕྱི་རྒྱལ་དུ་སློབ་སྦྱོང་བྱས་ཏེ་དེང་དུས་ཀྱི་ཤེས་ཡོན་ཆ་ཚང་ཡོད་པ་དཔེ་མི་སྲིད་པའི་ཡག་པོ་ཡོད། གོ་ཆོད་པོ་ཞེ་དྲགས་ཡོད་ཅེས་མང་པོ་གསུངས་སོང་། དེ་འདྲ་ཡིན་དུས་ང་རང་གི་འོས་གཅིག་པུ་དེའང་ཁོང་ལ་ཕུལ་ཡིན། ཞེས་བརྗོད་བྱུང་།

དགེ་འདུན་པ་ཞིག་ལ་ཐེངས་འདིའི་འོས་བསྡུར་མཐོང་སྣང་ག་རེ་བྱུང་བ་དང་། མ་འོངས་པར་ཡིད་གཟབ་དགོས་པ་ག་རེ་འདུག་དྲིས་པར་ཁོང་གིས། ད་ལན་གྱི་འོས་བསྡུའི་བརྒྱུད་རིམ་ནང་ང་ལ་མཐོང་ཚུལ་ག་རེ་བྱུང་ཟེར་ན། མི་སྒེར་དང་ཚོགས་པ་ག་རེ་ཡིན་ནའང་སྤྱི་ཡོངས་ཀྱི་འོས་བསྡུའི་བརྒྱུད་རིམ་ནང་འགན་ལེན་སྟངས་དེར་ངེས་པར་དུ་ཡིད་གཟབ་བྱེད་དགོས་པ་མང་པོ་ཞིག་མཐོང་སོང་། དཔེར་ན། ང་ཚོར་ཆོལ་ཁ་ལོགས་སུ་ཡོད་དུས་ཆོལ་ཁ་རང་གི་ངོས་ནས་སྲིད་སྐྱོང་གི་འོས་མི་འདོན་པ་དེ་ཚོ་ཧ་ལས་པའི་དམངས་གཙོའི་འཕེལ་རིམ་ནང་ནོར་འཁྲུལ་ཆེན་པོ་ཞིག་ཆགས་ཀྱི་ཡོད་པ་རེད་བསམ་གྱི་འདུག་ལ། ངས་དེ་ནོར་འཁྲུལ་ཞིག་ཏུ་ངོས་འཛིན་བྱེད་བཞིན་ཡོད། ད་ལྟའི་བོད་ཀྱི་གནས་སྟངས་འདི་འདྲ་ཆགས་པ་དེ་ང་ཚོ་ཆིག་སྒྲིལ་མེད་པའི་རྐྱེན་གྱིས་བྱུང་བ་རེད། ང་ཚོའི་སྤྱི་ཚོགས་ནང་ཆོལ་ཁ་ཟེར་བའི་མིང་འདི་གོ་བ་ཙམ་གྱིས་མི་སུ་འདྲ་ཞིག་ཡིན་ནའང་རང་བཞིན་ལྷན་སྐྱེས་ཀྱིས་དེའི་ཕྱོགས་ལ་བསམ་བློ་བཏང་སྟེ་དམངས་གཙོའི་ལམ་ཀར་འགྲོ་མ་ཐུབ་པའི་བར་ཆད་ཞེ་དྲགས་ཤིག་སླེབ་ཡོང་གི་ཡོད་པ་རེད། དེ་འདྲ་ཡིན་དུས། མ་འོངས་པར་ང་ཚོས་སྲིད་སྐྱོང་འོས་མི་དེ་གང་ཐུབ་ཀྱིས་དཔེར་ན་རྒྱལ་ཡོངས་མང་གཙོ་ཚོགས་པ་ནང་བཞིན་གྱི་ཚོགས་པ་རང་ནས་ཐེ་ཇུས་བྱེད་པ་མ་གཏོགས་ཆོལ་ཁའི་ཐོག་ནས་འདོན་པ་དེ། ང་ཚོའི་དམངས་གཙོའི་འཕེལ་རིམ་ནང་ནོར་འཁྲུལ་ཆེན་པོ་རེད་བསམ་གྱི་ཡོད། ཅེས་བརྗོད་བྱུང་།

གསར་འགོད་པ། པདྨ་མཚོ།