འཆར་འགོད་ལྷན་ཚོགས་ནས་དེ་སྔོན་ཐེངས་ཁ་ཤས་ལ་བཙན་བྱོལ་བོད་མིའི་མི་གྲངས་ཞིབ་བཤེར་གྱི་ལས་གཞི་སྤེལ་ཡོད་ཀྱང་ཕྱི་རྒྱལ་ཁག་ཏུ་ཡོད་པའི་བོད་མི་ཚོའི་གྲངས་འབོར་རག་ཁག་པོ་ཡོད་པས་མུ་མཐུད་ཞིབ་བཤེར་བྱས་པ་ཡིན་ནའང་གྲངས་འབོར་ཏག་ཏག་ཅིག་རག་རྒྱུ་ཧ་ཅང་ཁག་པོ་ཆགས་ཡོད་སྐོར་གསུངས་སོང་།
དེ་རིང་བོད་མི་མང་སྤྱི་འཐུས་ཀྱི་གྲོས་ཚོགས་ཚོགས་དུས་ ༡༡ པའི་ལས་ཉིན་དྲུག་པའི་སྔ་དྲོར། སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་འཆར་འགོད་ལྷན་ཚོགས་ཀྱི་ངོ་བོ་དང་འགན་དབང་། འདས་པའི་ལོ་ངོ་ ༣༠ ལྷག་རིང་རྒྱ་བལ་འབྲུག་གསུམ་གྱི་བཙན་བྱོལ་བོད་མི་འདུས་སྡོད་ཁུལ་མང་པོའི་ནང་ཉམས་ཞིབ་དང་ཟབ་སྦྱོང་སྦྱོང་བརྡར་སྤྲོད་པའི་ལས་གཞི་མང་པོ་གནང་དང་གནང་མུས་ཡོད་པའི་སྐོར་ལ་སྐར་རྟགས་ཅན་གྱི་དྲི་བ་འགའ་དང་འབྲེལ་འཕྲོས་དོན་དྲི་བ་ཁག་ཅིག་ཞུས་སོང་།
སྤྱི་འཐུས་ཨཅཱརྱ་ཡེ་ཤེས་ཕུན་ཚོགས་ལགས་ཀྱིས་འཆར་འགོད་ལྷན་ཁང་ཕྱི་ལོ་ ༡༩༨༧ ལོར་གལ་ཆེ་དོན་ཆེའི་ཐོག་ནས་ཟུར་དུ་གསར་འཛུགས་གནང་སྟེ་ལོ་ངོ་ ༣༠ ལྷག་འགྲོ་བཞིན་ཡོད་པ་དང་། ལྷན་ཁང་འདིའི་ཐོག་ནས་བཀའ་ཤག་གོང་མ་རྣམས་ཀྱི་དགོངས་གཞི་དང་ད་ལྟའི་བཀའ་ཤག་བར་ཁྱད་པར་ཇི་འདྲ་ཡོད་པ་དང་། ལྷན་ཁང་གི་ངོ་བོ་ཇི་འདྲ་ཞིག་ལ་འགྱུར་ཡོད་མེད། ད་ལྟ་ལྷན་ཁང་གི་འགན་དབང་དང་ལས་དོན་གནང་ཕྱོགས་ཐོག་རང་དབང་ཇི་ཙམ་ཡོད་པ། དེ་བཞིན་སྔར་དང་མི་འདྲ་བའི་ཕན་རླབས་གང་བྱུང་ཡོད་སྐོར་དྲིས་པར་སྲིད་སྐྱོང་བློ་བཟང་སེང་གེ་མཆོག་གིས། འཆར་འགོད་ལྷན་ཁང་གི་ཐོག་ཕྱི་ལོ་ ༡༩༨༨ ཚུན་གྱི་བཀའ་ཤག་གོང་མ་རིམ་བྱོན་དང་། ད་ལྟའི་བཀའ་ཤག་གཉིས་ཀྱི་རྩ་བའི་དགོངས་གཞི་ལ་ཁྱད་པར་མེད་ཀྱང་། ལས་དོན་བྱེད་ཕྱོགས་ཐོག་དུས་ཀྱི་དགོས་མཁོར་འཚམ་པའི་འགྱུར་བ་ཕྲན་བུ་ཕྱིན་ཡོད་ཅིང་། ལྷན་ཁང་གི་མིང་ཡང་འཆར་འགོད་ལྷན་ཚོགས་ཞེས་པར་འགྱུར་བ་ཕྱིན་ཡོད་ཀྱང་ངོ་བོ་རང་འཇགས་གནས་ཡོད་པ་དང་། ལྷན་ཚོགས་ཀྱི་འགན་དབང་དང་ལས་དོན་གནང་ཕྱོགས་ཐོག་རང་དབང་བཀའ་ཤག་ལ་ཇི་ཙམ་ཡོད་པ་དེ་ཙམ་ཡོད་ལ། སྔར་མེད་ཀྱི་ཕན་རླབས་ནང་སྔར་གྱི་ལས་སྒོའི་ཐོག་དཔལ་འབྱོར་ལས་ཁུངས་ཀྱི་སྤྱི་ཚོགས་ཡར་རྒྱས་ཐེབས་རྩའི་ལས་སྒོ་ཁག་ཅིག་ལའང་འགན་འཁུར་མཉམ་ལེན་བྱས་ཏེ་གཞི་རྒྱ་ཆེ་རུ་ཕྱིན་ཡོད་སྐོར་བཀའ་ལན་གནང་སོང་།
འཕྲོས་དོན་དྲི་བའི་སྐབས་སྤྱི་འཐུས་ཨཅཱརྱ་ཡེ་ཤེས་ཕུན་ཚོགས་ཀྱིས་ལས་དོན་གནང་ཕྱོགས་ལ་ཁྱད་པར་ཕྱིན་ཡོད་ན། སྔར་གྱི་ཕྱག་ལས་གནང་ཕྱོགས་ག་འདྲ་ཡོད་པ་དང་། ད་ལྟ་དགོས་མཁོ་ལ་དཔག་པའི་ཕྱག་ལས་གནང་ཕྱོགས་ག་འདྲ་ཡོད། དེ་བཞིན་འཆར་འགོད་ལྷན་ཚོགས་ཀྱི་ཚོགས་མིའི་གྲུབ་ཆར་རྣམ་པ་དང་གནང་སྟངས་མི་འདྲ་བ་གང་ཡོད། སྔོན་མ་འཆར་འགོད་ལྷན་ཚོགས་ཀྱི་དམིགས་ཡུལ་ཆེ་ཤོས་ཤིག་ན། ལོ་ལྔ་ཚན་རེའི་ནང་བོད་ནང་འཆར་གཞི་ཞིབ་འཇུག་གནང་དགོས་པ་རེད་གསུངས་ཡོད་པ་དེ་ད་ལྟ་གནས་བབ་དེའི་སྒང་ལ་རང་འཇགས་ཡོད་མེད་དོགས་འདྲི་ཞུས་པར་སྲིད་སྐྱོང་མཆོག་གིས། ཐོག་མ་མགོ་བཙུགས་པའི་སྐབས་ལ་འཆར་འགོད་ལྷན་ཚོགས་ཞེས་པའི་ཐོག་ནས་མགོ་བཙུགས་པ་རེད། དེ་ནས་འཆར་འགོད་ལྷན་ཁང་ཞེས་བཏགས་ཡོད་པ་རེད། འཆར་འགོད་ལྷན་ཚོགས་ཡིན་པའི་སྐབས་ཀྱི་ལྷན་ཚོགས་ནང་དཔལ་འབྱོར་ལས་ཁུངས་ཀྱི་བཀའ་བློན་དང་དྲུང་ཆེ་རྣམ་པ། ཟུང་དྲུང་དང་དྲུང་གཞོན་བཅས་ཡོད་པ་རེད། རྗེས་སུ་འཆར་འགོད་ལྷན་ཁང་ཆགས་ཡོང་དུས་ཚོགས་གཙོ་བཀའ་བློན་ཁྲི་པ་དང་ཚོགས་གཞོན་དཔལ་འབྱོར་བཀའ་བློན། འཐུས་མིའི་ནང་བཀའ་བློན་གཞན་དང་བཀའ་དྲུང་། དེ་བཞིན་འཆར་འགོད་ཀྱི་འགན་འཛིན་ཟེར་ན་རེད་ཁྱད་ལས་པ་ཡོད་པ་རེད། འཆར་འགོད་ལྷན་ཚོགས་ལ་ཚུར་ཕྱི་ལོ་ ༢༠༡༤ ཟླ་ ༡༢ ཚེས་ ༡༢ ཉིན་བསྒྱུར་བ་དང་། སྐབས་དེར་ངོ་བོ་རང་འཇགས་ལྷག་ཡོད་ཀྱང་ལས་དོན་ལ་འགྱུར་བ་ཕྲན་བུ་འགྲོ་ཡོད་པ་རེད་ལབ་པ་ནང་བཞིན་ཚོགས་གཙོ་སྲིད་སྐྱོང་དང་། ཚོགས་གཙོ་གཞོན་པ་དཔལ་འབྱོར་བཀའ་བློན། འཆར་འགོད་ལྷན་ཚོགས་ནང་འཐུས་མི་བཀའ་བློན་གཞན་ཡོད་ལ། ལྷན་ཚོགས་ཀྱི་དྲུང་ཆེའི་འགན་འཁུར་མཁན་དེ་སྤྱི་ཚོགས་ཡར་རྒྱས་ཐེབས་རྩའི་དྲུང་ཆེ་ཆགས་ཡོད་པ་རེད། སྔོན་མ་ཡིན་ན་བཀའ་དྲུང་རེད། ད་ལྟའི་ཆར་སྤྱི་ཚོགས་ཡར་རྒྱས་ཐེབས་རྩའི་དྲུང་ཆེ་ཆགས་ཏེ་འགྱུར་བ་ཕྱིན་ཡོད་པ་རེད། ཕྱག་ལས་གནང་ཕྱོགས་དེ་སྔོན་མའི་གནང་སྟངས་ཀྱི་ཐོག་ནས་ས་གནས་ཁག་ལ་ཕེབས་ཏེ་ལས་འཆར་གྱི་འཆར་གཞི་དེ་ཚོ་བསྡུ་རུབ་བྱས་རྗེས། དཔལ་འབྱོར་འདུ་འགོད་ཐབས་ཤེས་བྱས་པ་དེ་འདྲ་བྱུང་ཡོད་པ་དང་། ཡང་མཚམས་རེར་རོགས་དངུལ་རག་པ་ཡིན་ན་དེ་གཞིར་བཟུང་སྔར་ནས་འཆར་གཞི་མེད་པ་ཡིན་ནའང་། དགོས་ངེས་ཡོད་པ་ཡིན་ན་ལག་བསྟར་བྱས་པའང་ཡོད་པ་རེད། དེ་སྔོན་གྲོས་ཚོགས་ནང་ཞུས་པ་ལྟར་ལོ་ལྔ་རེའི་ནང་ཞིབ་འཇུག་འགྲོ་ཐུབ་ཡོད་པ་མ་རེད། ཐེངས་དང་པོའི་ནང་ཧིན་སྒོར་ས་ཡ་ཆིག་སྟོང་བཅོ་བརྒྱད་ཀྱི་འཆར་གཞི་ཡར་བསྡུས་ཡོད་པ་དང་། ལག་བསྟར་ཐུབ་པ་བརྒྱ་ཆ་ ༢༠ བྱུང་ཡོད། ཐེངས་གཉིས་པའི་ནང་ས་ཡ་ཆིག་སྟོང་དགུ་བཅུ་གོ་བདུན་གྱི་འཆར་གཞི་ཡར་བསྡུས་ཏེ། བརྒྱ་ཆ་ ༣༠ ལག་བསྟར་ཐུབ་ཡོད་པ་དང་། གསུམ་པའི་ནང་ས་ཡ་ཆིག་སྟོང་བཞི་བཅུའི་འཆར་གཞི་བསྡུས་ཡོད་པ་དང་། ལག་བསྟར་ཐུབ་པ་དེ་བརྒྱ་ཆ་ ༦༠ མ་ཟིན་ཙམ་ཡིན་པ་འདྲ། ཐེངས་གསུམ་པ་དེར་ས་ཡ་ལྔ་བརྒྱ་དགུ་བཅུ་གོ་བདུན་གྱི་ལས་འཆར་ཡར་བསྡུས་ཏེ། ལག་བསྟར་བརྒྱ་ཆ་ ༦༥ བྱས་ཡོད་པ་རེད། ངོ་བོ་གཅིག་པ་ཡིན་པ་གང་ཞིག་ལ་ལས་དོན་བྱེད་ཕྱོགས་ལ་ཕྲ་ལ་ཕྲན་བུ་འགྱུར་བ་བཏང་སྟེ། བཀའ་ཤག་འདིའི་ཐོག་ནས་མི་མང་ནང་ལ་བསམ་ཚུལ་ག་རེ་ཡོང་གི་འདུག་ཟེར་ན། འཆར་གཞི་ཡར་གཏོང་ཤོག་ལབ་དུས་རིམ་པ་མང་པོ་ཞིག་ཡོང་གི་འདུག ཁ་ཤས་ཀྱིས་ས་གནས་སུ་ཡོད་པའི་འདོད་པ་གཞིར་བཟུང་འཆར་གཞི་ག་རེ་ཡོད་པ་ཆ་ཚང་བཏང་ཡོང་གི་འདུག གཞི་རྩའི་ཞིབ་འཇུག་གནང་གི་ཡོད་པ་རེད་དེ་རྗེས་སུ་ས་གནས་ཁག་ལ་སྐྱོན་ཆ་ག་རེ་ལྷག་གི་འདུག་ཟེར་ན། ང་ཚོའི་འཆར་གཞི་དབུས་ལ་བཏང་ཚར་ཡང་ད་དུང་ལན་འབྱོར་མ་སོང་ཟེར་བ་དང་། ཡང་འགའ་ཤས་ཀྱིས་ཁྱེད་རང་ཚོས་འཆར་གཞི་དེ་འདྲ་བཙུགས་ཡོད་ཟེར་གྱི་འདུག་སྟེ། ད་དུང་དངུལ་འབྱོར་མ་སོང་ཟེར་ནས་སྐད་ཆ་མང་པོ་ཞིག་ལྷག་ཡོང་གི་འདུག དེར་བརྟེན་ད་ལན་ང་ཚོས་མི་མང་ནང་ནས་འཆར་གཞི་ཡར་མ་བསྡུས་པར་ང་རང་ཚོ་ས་གནས་ས་ཐོག་ཏུ་འགྲོ་སྐབས་དགོས་མཁོ་ག་རེ་འདུག་ཞིབ་འཇུག་བྱས་ཏེ། ལྷན་ཁང་རེ་རེ་ནས་འགན་འཁུར་ཏེ་འཆར་འགོད་ལྷན་ཚོགས་མཉམ་དུ་བཀའ་སྡུར་གནང་བའི་ཐོག་ནས་བྱས་ན་ཞེས་ལབ་སྟེ། ད་ལྟའི་ཆར་ཞིབ་འཇུག་བྱས་མེད་ཀྱང་ཕལ་ཆེར་འཆར་གཞི་ཡོད་པ་དང་ལག་བསྟར་བྱས་པ་གཉིས་ཀར་བལྟས་པ་ཡིན་ན། ལག་བསྟར་བྱས་པ་དེ་མང་བ་དང་དཔལ་འབྱོར་ཐོག་ནས་ཡིན་ནའང་མང་ཙམ་ཆགས་ཡོད་པ་རེད་བསམ་གྱི་ཡོད། ཅེས་གསུངས་སོང་།
ཡང་སྤྱི་འཐུས་ཨ་ཅཱརྱ་ཡེ་ཤེས་ཕུན་ཚོགས་ལགས་ཀྱིས་འཆར་འགོད་ལྷན་ཚོགས་ལ་རང་དབང་བཀའ་ཤག་ལ་གང་ཡོད་པ་དེ་ཙམ་ཡོད་གསུང་དུས། འཆར་འགོད་ལྷན་ཚོགས་ཀྱི་འགན་འཛིན་ལ་དབང་ཆ་བཀའ་ཤག་དང་འདྲ་མཉམ་ཡོད་གསུང་གི་ཡོད་པ་རེད་དམ། ཡང་ན་འཆར་འགོད་ལྷན་ཚོགས་ལ་རང་དབང་བཀའ་ཤག་དང་འདྲ་མཉམ་ཡོད་གསུང་གི་ཡོད་དྲིས་པར་སྲིད་སྐྱོང་མཆོག་ནས། འཆར་འགོད་ལྷན་ཚོགས་ནང་སྲིད་སྐྱོང་དང་དཔལ་འབྱོར་བཀའ་བློན་གྱིས་གཙོས་པའི་བཀའ་བློན་རྣམ་པ་ཚང་མ་ཡོད་དུས། བཀའ་ཤག་ལ་སྐུ་དབང་ག་ཚོད་ཡོད་པ་དེ་འཆར་འགོད་ལྷན་ཚོགས་ལ་ཡོད་པ་རེད། ཁྱད་པར་དེ་ག་རེ་རེད་ཟེར་ན། དེ་སྔ་ཡིན་ན་དྲུང་ཆེ་བཀའ་དྲུང་གིས་གནང་གི་ཡོད་པ་དང་། ད་ལྟ་སྤྱི་ཚོགས་ཡར་རྒྱས་ཐེབས་རྩའི་དྲུང་ཆེ་ཡིས་གནང་གི་ཡོད་སྟབས། བཀའ་ཤག་ལ་སྐུ་དབང་ཡོད་པ་དེ་རང་གནས་ཀྱི་ཡོད་པ་རེད། ཅེས་གསུངས་སོང་།
སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་ཀྱིས། བར་སྐབས་ཤིག་ལ་བཙན་བྱོལ་བོད་མིའི་མི་འབོར་ཞིབ་བཤེར་ཐེངས་ཁ་ཤས་ཤིག་གནང་ཡོད་པ་དང་། འཆར་གཞི་ལྟར་ན་ལོ་ལྔ་རེའི་ནང་ཐེངས་གཅིག་རེ་གནང་གི་ཡིན་གསུངས་ཡོད་ཀྱང་། བར་སྐབས་ཤིག་ནས་གནང་མེད་པ་དེ་སྔོན་མ་ཞིབ་བཤེར་གནང་བ་དེ་ཏག་ཏག་མ་བསྡད་ནས་མ་གནང་བ་རེད་དམ། ཡང་ན་མི་རྒྱུའི་མཐུན་རྐྱེན་གང་རུང་ཞིག་མ་འཛོམས་ནས་མ་གནང་བ་རེད་ཅེས་དྲིས་པར་སྲིད་སྐྱོང་མཆོག་གིས། བཙན་བྱོལ་བོད་མིའི་མི་འབོར་གྲངས་བཤེར་བྱེད་པ་དེ་དཀའ་ལས་ཁག་ཙམ་ཆགས་བསྡད་ཡོད་པ་རེད། དཔལ་འབྱོར་བཀའ་བློན་གྱིས་དཔྱ་ཁྲལ་ལག་དེབ་དང་འབྲེལ་བའི་ཐོག་ནས་གྲངས་འབོར་ཞིག་གསུངས་སོང་ང་། ཕྱི་རྒྱལ་ཁག་ལ་དཔྱ་ཁྲལ་ལག་དེབ་ཀྱི་དངུལ་གནང་མཁན་ད་ལྟའི་ཆར་མང་དུ་མང་དུ་འགྲོ་ཡི་ཡོད། ཡིན་ནའང་། རྒྱ་གར་ལ་ཡོད་པའི་དཔྱ་ཁྲལ་ལག་དེབ་ཀྱི་དངུལ་འབུལ་མཁན་གྱི་གྲངས་ཚད་དེ་ངས་མ་བརྗེད་པ་ཡིན་ན། འབུམ་གཅིག་དང་ཁྲི་གསུམ་ཡོད་པ་རེད། མི་འབོར་གྲངས་ཚད་ཀྱི་ཐོ་ལེན་རྒྱུ་དེ་ཞེ་དྲགས་ཁག་པོ་རེད་འདུག དཔྱ་ཁྲལ་ལག་དེབ་ལ་གཅིག་ཡོང་གི་འདུག་ལ། སྐྱབས་བཅོལ་ལག་དེབ་ནས་གཅིག་ཡོང་གི་འདུག ཡང་གཞིས་ཆགས་རང་གི་ཐོ་གཞུང་གི་ཐོག་ནས་ཀྱང་གཅིག་ཡོང་གི་འདུག དེར་བརྟེན་ང་ཚོ་བཙན་བྱོལ་རང་ཡིན་དུས་དཔལ་འབྱོར་གྱི་དོན་དུ་ཡིན་ནའང་རེད། གནད་དོན་ཁག་ཁ་ཤས་ལ་བརྟེན་ནས་ང་ཚོའི་མི་འབོར་དེ་ག་དུས་ཡིན་ནའང་སྐོར་བ་ཞིག་བརྒྱབ་ནས་བསྡད་ཡོད་པས་གྲངས་འབོར་དེ་ཁག་པོ་ཞེ་དྲགས་འདུག སྔོན་མའི་འཆར་འགོད་ལྷན་ཚོགས་ཀྱི་གྲངས་ཀ་གཞིར་བཟུང་བྱས་ན། ངས་དྲན་པ་རང་གི་ཐོག་ནས་ཞུས་ན་བཙན་བྱོལ་བོད་མིའི་སྤྱི་ཚོགས་ཡོངས་ནང་མི་འབོར་འབུམ་གཅིག་དང་གསུམ་ཁྲི་བདུན་སྟོང་ཡིན་ས་ཡོད། དེའི་ནང་རྒྱ་གར་ནང་ཡོད་པའི་བོད་མིའི་གྲངས་འབོར་དེ་གང་ལ་གང་འཚམ་ཐིག་པ་འདྲ་པོ་འདུག ཡིན་ནའང་། ཕྱི་རྒྱལ་དང་དམིགས་བསལ་གྱིས་ཨ་རིར་ཡོད་པའི་གྲངས་འབོར་དེ་ཧ་ལས་པའི་ཉུང་ཉུང་རེད་འདུག ངས་ཀྱང་དྲན་གྱི་འདུག སྔོན་ཆད་འཆར་འགོད་ལྷན་ཚོགས་ཀྱི་མི་འབོར་གྲངས་བཤེར་གྱི་འགེང་ཤོག་དེ་ཡོང་གི་འདུག ཡིན་ནའང་། འགེང་ཤོག་སྐོང་མཁན་དང་མི་སྐོང་མཁན་གཉིས་བསྡུར་ན་རྦད་དེ་མི་སྐོང་མཁན་མང་བ་ཡོད་པ་རེད། གང་ཡིན་ཟེར་ན། ཁོ་ཚོས་འགེང་ཤོག་དེ་བསྐངས་བ་ཡིན་ན་གྲངས་ཀ་དེར་དམིགས་བསལ་གྱིས་འབྲེལ་བ་ཞེ་དྲགས་ཡོད་པ་མ་རེད། གཞིས་ཆགས་ཁག་ཡིན་ན་འབྲེལ་བ་ཏན་ཏན་ཡོད་པ་རེད། དེར་བརྟེན་ཕྱི་རྒྱལ་ལ་ཡོད་པའི་བོད་མིའི་གྲངས་ཀ་ལེན་རྒྱུ་དེ་ཧ་ལས་པའི་དཀའ་ལས་ཁག་པོ་ཆགས་འདུག ང་ཚོས་བསྐྱར་དུ་གྲངས་བཤེར་ཞིག་དགོས་ཀྱི་འདུག་ཅེས་ན་འབད་བརྩོན་བྱེད་ཆོག་གི་རེད། ཡིན་ནའང་། གྲངས་ཀ་རང་འབབ་ཐུབ་རྒྱུ་དེ་ག་འདྲ་ཞིག་ཡིན་ན་བསམ་གྱི་འདུག འོན་ཀྱང་ངེས་པར་དུ་དགོས་ཀྱི་འདུག་ཅེས་པའི་དགོངས་པ་ཡོད་ན། ང་ཚོས་འབད་བརྩོན་བསྐྱར་དུ་བྱེད་ཆོག་གི་རེད། ཅེས་གསུངས་སོང་།
བཀྲས་མཐོང་དབང་པོ་ལགས་ཀྱིས་ད་ལྟའི་ཆར་འཆར་འགོད་ལྷན་ཚོགས་ཀྱི་ཕྱག་ལས་དེ་གཙོ་བོ་རྒྱ་བལ་འབྲུག་གསུམ་ནང་གི་བོད་མིའི་གནས་སྡོད་ཁུལ་ཆགས་བསྡད་ཡོད་པ་དང་། འདས་པའི་ལོ་ཤས་ནས་བཟུང་ཡུ་རོབ་དང་ཨ་རིའི་ནང་བོད་པ་མང་པོ་ཞེ་དྲགས་བསླེབས་ཡོད་པས་དེ་ཚོའི་ཐོག་ལ་འཆར་གཞི་ཅི་ཡོད་མེད་བཀའ་འདྲི་ཞུས་པར་སྲིད་སྐྱོང་མཆོག་གིས། འཆར་འགོད་ལྷན་ཚོགས་ཀྱི་འཆར་གཞི་དེ་མང་ཆེ་བ་ལས་འཆར་ཡིན་དུས། འགྲོ་སྟངས་བྱས་ན་དཔལ་འབྱོར་དང་སྤྱི་ཚོགས་ཡར་རྒྱས་དང་འབྲེལ་བའི་ཐོག་ནས་ཡིན་སྟབས། ད་ལྟའི་བར་དུ་རྒྱ་བལ་འབྲུག་གསུམ་གྱི་ནང་གཙོ་བོ་དམིགས་ཡོད་པ་རེད། ཕྱི་རྒྱལ་ལ་ཡོད་པའི་བོད་མི་ཚོར་དཀའ་ངལ་ཡོད་པ་དེ་སྔ་ནས་བཀའ་ཤག་གིས་ཞིབ་ཅིང་ཕྲ་བ་ཞུས་ཡོད་ལ། ཧ་གོ་ཡི་ཡོད་པ་ལྟར་འབད་བརྩོན་བྱེད་ཀྱི་ཡོད། དཔེར་ན། ཡིག་ཆ་རག་ཐབས་ཀྱི་གཙོས་པའི་ངོ་སྤྲོད་ཡི་གེ་གནང་བ་སོགས་གང་ཐུབ་ཅི་ཐུབ་བྱེད་ཀྱི་ཡོད། ཅེས་སོགས་གསུངས་སོང་།
གསར་འགོད་པ། པདྨ་མཚོ།
