ས་ར་མཐོ་སློབ་ཀྱི་སྐབས་དང་པོའི་ཞིབ་འཇུག་སློབ་མར་རྒྱུས་ལོན་བྱས་པ་ལྟར་ན་སློབ་ཡུན་དུས་ཚོད་ཐུང་དྲགས་པ་དང་དཔེ་མཚོད་སོགས་ཀྱི་མཐུན་རྐྱེན་ཞན་པ། ཞིབ་འཇུག་སློབ་མའི་འོག་གི་དངོས་གཞིའི་སྐབས་སུ་ཆེད་ལས་རང་བཞིན་གྱི་སློབ་སྦྱོང་མེད་པ་སོགས་ནི་ཞིབ་འཇུག་སྡེ་ཚན་དེའི་མདུན་ལམ་གྱི་བཀག་རྒྱ་ཞིག་ཆགས་ཡོད་འདུག
ཕྱི་ལོ་ ༢༠༡༤ ལོའི་ཕྱི་ཟླ་ ༧ པའི་ནང་ས་ར་བོད་ཀྱི་མཐོ་རིམ་སློབ་གཉེར་ཁང་དུ། སྐབས་དང་པོའི་བོད་རིགས་ཞིབ་འཇུག་སློབ་མ་ ༡༣ བསྡུས་ཡོད་པ་དག་ཉེ་ལམ་ཕྱི་ཟླ་ ༣ ཚེས་ ༣༡ ཉིན་མཐར་ཕྱིན་ཡིག་རྒྱུགས་བཏང་ཟིན་པ་མ་ཟད། ཟླ་འདིའི་ཕྱི་ཚེས་ ༢༦ ཉིན་མཐར་ཕྱིན་མཛད་སྒོ་འཚོགས་རྒྱུ་དང་། མཛད་སྒོའི་སྐུ་མགྲོན་གཙོ་བོར་༧གོང་ས་མཆོག་ཆིབས་བསྒྱུར་བསྐྱང་འཆར་ཡོད་སྟབས། འདི་གའི་གསར་འགོད་པས་ས་ར་མཐོ་སློབ་ཀྱི་སྐབས་དང་པོའི་ཞིབ་འཇུག་སློབ་མའི་ངེས་སྟོན་པ་དང་སློབ་ཐོན་སློབ་མ། དེ་བཞིན། མཐར་ཕྱིན་སློབ་མའི་ཆེད་རྩོམ་ཞིབ་འཇུག་པ་བཅས་ལ་བཅར་འདྲི་ཞུས།
སྦྲེལ་ནག་པ་བློ་གྲོས་དཔལ་བཟང་ལགས་སུ་ཞིབ་འཇུག་སློབ་མ་བསྡུས་པའི་ཐོག་མའི་དམིགས་ཡུལ་ལྟར་འགྲོ་ཐུབ་ཡོད་མེད་དྲིས་པར་ཁོང་གིས། ངས་ཐོག་མ་འོག་གི་རིག་གནས་རབ་འབྱམས་པ་ (B.A) དང་སྒང་གི་གཙུག་ལག་རབ་འབྱམས་པ་ (M.A) གཉིས་མཐུད་རྒྱག་ཐུབ་ན་ཡག་པོ་འདུག་བསམ་སོང་། བཙན་བྱོལ་ནང་རིག་གནས་རབ་འབྱམས་པར་ཆེད་ལས་མེད་སྟབས། སྒང་ནས་གཙུག་ལག་རབ་འབྱམས་པའི་སྡེ་ཚན་བཙུགས་ཀྱང་དེའི་ནང་ལ་ཆེད་ལས་སློབ་མ་རེག་གི་མ་རེད། ཕྱི་རྒྱལ་ལྟ་བུར་མཚོན་ན་གཙུག་ལག་རབ་འབྱམས་ནང་དངོས་གཞིའི་ཆེད་ལས་སློབ་མ་རྐྱང་སླེབ་ཀྱི་ཡོད་པ་རེད། ང་རང་གི་རེ་བར་སྒང་གི་གཙུག་ལག་རབ་འབྱམས་བཙུགས་པ་དང་བསྟུན་ཏེ། འོག་གི་དངོས་གཞི་དེའང་ཆེད་ལས་རང་བཞིན་ཡོང་ཐུབ་ན་བསམ་པ་ཡིན།
བཙན་བྱོལ་ནང་དུ་བོད་ཡིག་ཐོག་དངོས་གཞི་ཐོན་རྗེས་ཞིབ་འཇུག་དང་འབུམ་རམས་སོགས་ལ་འགྲོ་ས་ཡོད་པ་མ་རེད། གཙུག་ལག་རབ་འབྱམས་པ་བཙུགས་པ་ལ་བརྟེན་ནས་ཡང་བསྐྱར་འབུམ་རམས་པའི་སྡེ་ཚན་ཞིག་འཛུགས་ཐུབ་པ་ཡིན་ན། ད་གཟོད་སློབ་སྦྱོང་གི་བརྒྱུད་རིམ་ཆ་ཚང་ཞིག་ཆགས་ཀྱི་ཡོད་པ་རེད། དངོས་གནས་བྱས་ན། གཙུག་ལག་རབ་འབྱམས་སྐབས་སུ་རང་གི་ལྟ་བ་འདོན་རྒྱུ་མ་ཡིན་པར་གཙོ་བོ་རང་གི་ཆེད་ལས་དང་འབྲེལ་བའི་དཔེ་ཀློག་མང་པོ་བྱེད་དགོས་པ་རེད། རང་ཉིད་ལ་ལྟ་བ་ལྟ་གྲུབ་ཚད་ལྡན་ཞིག་ཆགས་དགོས་ན། སྔོན་མའི་མཁས་དབང་དེ་ཚོའི་ལྟ་བ་ལྟ་གྲུབ་ཁག་དཀྲུག་དཀྲུག་གཏོང་བ་དང་སྤྱི་སྡོམ་རྒྱག་དགོས་པ་རེད། དེ་ལྟར་བྱས་ན་འོ་མ་དཀྲུག་ནས་མར་ཐོན་པ་ལྟར་རྗེས་མ་རང་ཉིད་ལ་ལྟ་བ་ལྟ་གྲུབ་ཆགས་ཡོང་གི་ཡོད་པ་དང་། རྗེས་མ་འབུམ་རམས་པའི་སྐབས་སུ་ད་གཟོད་རང་གི་ལྟ་བ་ལྟ་གྲུབ་ཚད་ལྡན་ཞིག་འདོན་ཐུབ་ཀྱི་ཡོད་པ་རེད།
ང་ཚོ་བཙན་བྱོལ་དུ་ཡོང་ནས་མི་ལོ་ ༥༠ ལྷག་རིང་སློབ་སྦྱོང་གི་བརྒྱུད་རིམ་ངེས་ཅན་ཞིག་འགྲོ་ཐུབ་ཡོད་པ་མ་རེད། བོད་སློབ་ཁག་ཚང་མར་རིག་གནས་རབ་འབྱམས་ཐོན་རྗེས་སློབ་སྦྱོང་གི་བརྒྱུད་རིམ་རྫོགས་ཚར་བ་རེད། དངོས་གནས་དེ་འདྲ་མ་རེད། བོད་རང་གི་སྐད་ཡིག་ཐོག་ནས་ཡིན་ན་འདྲ་ལ། ནུབ་ཕྱོགས་ཀྱི་སློབ་སྦྱོང་ཡིན་ནའང་འདྲ། སློབ་སྦྱོང་གི་བརྒྱུད་རིམ་དེ་རིག་གནས་རབ་འབྱམས་དང་། དེ་ནས་གཙུག་ལག་རབ་འབྱམས། དེ་ནས་འབུམ་རམས་པ་སོགས་ཆ་ཚང་འཐུས་ཚང་ཞིག་བརྒྱུད་དགོས་པ་རེད། དཔེར་ན། དགོན་པ་གྲྭ་ཚང་ཁག་ཡིན་ནའང་ཁ་དོག་དཀར་དམར་ནས་ལྷ་རམས་དགེ་བཤེས་བར་མདོ་སྔགས་སོགས་བརྒྱུད་རིམ་ཆ་ཚང་ཞིག་འགྲོ་བཞིན་ཡོད་པ་ལྟ་བུ་རེད། མདོ་དོན། ང་རང་གི་དམིགས་འཆར་ཆ་ཚང་ཞིག་འགྲོ་ཐུབ་ཡོད་དམ་ཞེ་ན་ཧ་ཅང་ཁག་པོ་རེད། རྒྱུ་མཚན་དང་པོ་དེ་ང་མི་གཅིག་གི་བསམ་ཚུལ་རེད། དེ་ལ་ཐོག་འོག་བར་གསུམ་གྱི་རྒྱབ་སྐྱོར་དགོས་ཀྱི་ཡོད་པ་རེད་ལ། མདོར་བསྡུས་ན། ངས་གཙུག་ལག་རབ་འབྱམས་པའི་ཁྲིད་གཞི་རྫོགས་པ་ཙམ་མ་གཏོགས་དམིགས་འཆར་ཆ་ཚང་ཞིག་འགྲུབ་ཐུབ་མ་སོང་། ཅེས་བརྗོད་སོང་།
གསར་འགོད་པས་བོད་ཕྱི་ནང་གཉིས་ཀྱི་ཞིབ་འཇུག་སློབ་མའི་སྒྲིག་གཞི་དང་བསླབ་གཞིའི་ཐད་ཁྱད་པར་གང་འདྲ་ཡོད་མེད་དྲིས་པར་ཁོང་གིས། དེ་ལ་གཅིག་ནས་འཛིན་སྐྱོང་དང་གཉིས་ནས་དགེ་རྒན། གསུམ་ནས་སློབ་མའི་ཁྱད་པར་སོགས་འདུག དང་པོ་འཛིན་སྐྱོང་གི་ཆ་ནས་འདི་གར་སློབ་སྤྱི་དང་ཤེས་ཡོན་འགན་འཛིན་སོགས་ཆ་ཚང་མི་རེ་གཉིས་ཤིག་གིས་གནང་གི་ཡོད་སྟབས། རང་བཞིན་གྱིས་ཞ་ཞོར་དུ་འཐུས་ཤོར་མང་པོ་འགྲོ་བཞིན་ཡོད་པ་རེད། བོད་ནང་ཡིན་ན་ཆེད་ལས་སྡེ་ཚན་དང་དཔེ་མཛོད་སོགས་ཀྱི་མཐུན་རྐྱེན་འཛོམ་པོ་ཞེ་དྲག་རེད། འདིར་མཐུན་རྐྱེན་གྱིས་མ་འདང་བའི་དབང་གིས་ན་ནིང་ང་ཚོ་སྨིན་རི་གླིང་དང་དྷ་ས་དཔེ་ཁང་། ཀིརྟིའི་དཔེ་ཁང་། ཝར་ཎ་དཔེ་མཛོད་ཁང་སོགས་དཔྱད་གཞིའི་ཡིག་ཆ་འཚོལ་བསྡུ་བྱེད་དུ་འགྲོ་དགོས་ཆགས་པ་རེད།
གཉིས་པ་དགེ་རྒན་གྱི་ཆ་ནས་བོད་ནང་ཡིན་ན་རྩོམ་རིག་ལ་ནུབ་ཕྱོགས་རྩོམ་རིག་དང་རྒྱ་གར་རྩོམ་རིག བོད་ཀྱི་རྩོམ་རིག་བཅས་ཆེད་དགེ་རེ་རེ་ཡོད་པ་རེད། འདི་གར་རིག་ཚན་ཚང་མ་དགེ་རྒན་གཅིག་གིས་ཁྲིད་ཀྱི་ཡོད་སྟབས། སྤུས་ཚད་དང་ཆུ་ཚོད་སོགས་ཀྱི་དཀའ་ངལ་ཡོད་པ་རེད། གསུམ་པ་སློབ་མའི་ཆ་ནས། བོད་ནང་ཡིན་ན་གཤམ་གྱི་རིག་གནས་རབ་འབྱམས་ནས་ཆེད་ལས་རང་བཞིན་ཐོན་ཏེ་ཞིབ་འཇུག་སྐབས་སུ་ཡང་ཆེད་ཐོག་འགྲོ་བཞིན་ཡོད་པ་རེད། འདིར་དེ་འདྲ་མེད་སྟབས། གཤམ་ནས་ཆེད་ལས་མ་སྦྱང་བའི་སློབ་མ་རྐྱང་རྐྱང་གཙུག་ལག་རབ་འབྱམས་ནང་ཡོང་དུས། དངོས་གཞིའི་སྦྱོང་བྱ་མང་པོ་ཞིག་ཡང་བསྐྱར་སྦྱོང་དགོས་ཀྱི་ཡོད་སྟབས་དུས་ཚོད་ཀྱི་འདང་གི་ཡོད་མ་རེད་ལ། ཤེས་ཚད་ཀྱིས་ཀྱང་ལྕོགས་ཀྱི་ཡོད་པ་མ་རེད། མ་འོངས་པར་གཙུག་ལག་རབ་འབྱམས་འདོན་མཁན་ཚོ་གཤམ་གྱི་རིག་གནས་རབ་འབྱམས་དེའང་ཆེད་ལས་ཐོག་འགྲོ་ཐུབ་དགོས་པ་ཧ་ཅང་གལ་ཆེན་པོ་རེད། གནད་དོན་གཞན་ཞིག་གང་འདུག་ཟེར་ན། ང་ཚོ་བཙན་བྱོལ་སྤྱི་ཚོགས་ནང་སློབ་སྦྱོང་ལ་དུང་བ་དང་སློབ་སྦྱོང་གི་བརྒྱུད་རིམ་ཡོད་མཁན་ཚོར་བདག་པོ་མ་བརྒྱབ་པར་འཕྲོ་བརླག་འགྲོ་བཞིན་ཡོད་པ་རེད། དེ་འཕྲོ་བརླག་མི་འགྲོ་བའི་ཆེད་དུ་མཐོ་སློབ་ཁག་ཏུ་ཞིབ་འཇིག་སྡེ་ཚན་འཛུགས་ཐུབ་ན་ཡག་པོ་ཡོད་པ་རེད། ཅེས་བརྗོད་སོང་།
ཡང་གསར་འགོད་པས་སྐབས་དང་པོའི་མཐར་ཕྱིན་སློབ་མ་ཚོས་སོ་སོའི་ཆེད་སྦྱང་གི་གྲུབ་འབྲས་ལ་བརྟེན་ནས། མ་འོངས་པར་བཙན་བྱོལ་སྤྱི་ཚོགས་ནང་ནུས་པ་ག་འདྲ་འདོན་ཐུབ་མིན་དྲིས་པར་ཁོང་གིས། ངས་གསལ་བོར་བཤད་ཐུབ་པ་ཞིག་ལ། སྐབས་དང་པོའི་མཐར་ཕྱིན་ཞིབ་འཇུག་སློབ་མ་འདི་དག་ཁོ་རང་ཚོའི་ཆེད་ལས་རང་གི་ཐོག་ལས་ཀ་ཞིག་རེག་པ་ཡིན་ན་ཏན་ཏན་ནུས་པ་འཐོན་གི་རེད་བསམ་གྱི་འདུག དེ་མ་གཏོགས་ཁོ་ཚོའི་ཆེད་ལས་དང་འབྲེལ་བ་མེད་པའི་སྡེ་ཚན་ཞིག་ཏུ་ལས་ཀ་བྱས་པ་ཡིན་ན་གྲུབ་འབྲས་འཐོན་རྒྱུ་ཁག་པོ་རེད། དཔེར་ན། ཆེད་ལས་རྩོམ་རིག་ཞིབ་འཇུག་སློབ་མ་ཞིག་དཔལ་འབྱོར་ལས་ཁུངས་ལྟ་བུ་དང་། ཡང་ན་ནང་སྲིད་ལས་ཁུངས་ལྟ་བུ་ཞིག་ཏུ་བླངས་པ་ཡིན་ན་ནུས་པ་གང་ཡང་འཐོན་ཐབས་ཡོད་པ་མ་རེད། ཅེས་བརྗོད་སོང་།
དེའི་རྗེས་གསར་འགོད་པས། སྐབས་དང་པོའི་ལོ་རྒྱུས་དང་རྩོམ་རིག་གཙུག་མཐར་ཕྱིན་སློབ་མ་ཁག་ཅིག་ལ་ཐོག་མའི་སོ་སོའི་དམིགས་ཡུལ་ལྟར་གྲུབ་འབྲས་ལེན་ཐུབ་ཡོད་མེད་དྲིས་པར། རྩོམ་རིག་ཞིབ་འཇུག་མཐར་ཕྱིན་སློབ་མ་ཆོས་གྲགས་ལགས་ཀྱིས། ང་རང་ལ་མཚོན་ན་ཐོག་མའི་དམིགས་ཡུལ་ལས་བརྒལ་བའི་གྲུབ་འབྲས་ཤིག་ཐོན་སོང་བསམ་ཡོད། གང་ཡིན་ཟེར་ན། ང་དང་པོ་ས་ར་མཐོ་སློབ་ཏུ་ཡོང་དོན་གཙོ་བོ་དགེ་རྒན་སྤྲེལ་ནག་པ་བློ་གྲོས་དཔལ་བཟང་ལགས་ངེས་སྟོན་སློབ་དཔོན་ཡིན་པ་རྒྱུ་མཚན་དུ་བྱས་ནས་འཛུལ་བ་ཡིན་ལ། བོད་ཀྱི་རྩོམ་རིག་སྐོར་ལ་ཐོག་མའི་རང་གི་རེ་བ་ལྟར་འདོད་པ་ཁེངས་པ་ཞིག་བྱུང་སོང་བསམ་ཡོད། ནུབ་ཕྱོགས་མཚན་ཉིད་རིག་པ་དང་མཛེས་དཔྱོད་རིག་པ། སྒྱུ་རྩལ་རིག་པ་སོགས་དང་འབྲེལ་ནས་ནུབ་ཕྱོགས་རྩོམ་རིག་ལོ་རྒྱུས་དང་གཞུང་ལུགས། དེ་བཞིན་རྒྱ་གར་གྱི་རྩོམ་རིག་ལོ་རྒྱུས་དང་གཞུང་ལུགས་བཅས་ལའང་སློབ་སྦྱོང་གི་གོ་སྐབས་ཡག་པོ་རག་སོང་། ཅེས་བརྗོད་སོང་། ལོ་རྒྱུས་ཞིབ་འཇུག་མཐར་ཕྱིན་སློབ་མ་རྡོ་རྗེ་ཕུན་ཚོགས་ལགས་ཀྱིས། ང་ཐོག་མར་ཞིབ་འཇུག་སློབ་མར་འཛུལ་སྐབས། བོད་ཀྱི་ལོ་རྒྱུས་ལ་ཕྱོགས་ཡོངས་ནས་ཤེས་རྟོགས་ཡོད་པ་ཞིག་ཏུ་འགྱུར་བའི་རེ་བ་ཆེན་པོ་ཞིག་འཆང་ནས་ཡོང་བ་ཡིན་ཡང་། ཡིན་ནའང་ད་ལྟ་བསམ་བློ་བཏང་དེ་དེ་ལས་བསླ་བོ་ཞིག་ཁྱོན་ནས་མ་རེད། ཡིན་ནའང་ལོ་ངོ་གཉིས་ཀྱི་རིང་བོད་ཀྱི་ལོ་རྒྱུས་ཁོ་ནར་ཆེད་སྦྱོང་བྱས་པ་དེས་ལྟ་རྒྱ་ཐོས་རྒྱ་སྔར་ལས་ཇེ་བཟང་ལ་སོང་འདུག་བསམ་གྱི་ཡོད། ཅེས་བརྗོད་སོང་།
གསར་འགོད་པས་ལོ་གཉིས་རིང་གི་ཞིབ་འཇུག་གྲུབ་འབྲས་ལ་བརྟེན་ཏེ། མ་འོངས་པར་སྤྱི་ཚོགས་ནང་ནུས་པ་འདོན་ཐུབ་པའི་གདེང་ཚོད་ཡོད་མེད་དྲིས་པར་ཆོས་གྲགས་ལགས་ཀྱིས། དེ་བཤད་ཁག་པོ་འདུག ལོ་ངོ་གཉིས་ཀྱི་བརྒྱུད་རིམ་ཁྲོད་ནས་ང་ལ་ད་རུང་མུ་མཐུད་ནས་སློབ་སྦྱོང་བྱེད་དགོས་ཀྱི་འདུག་སྙམ་པའི་བསམ་བློ་ཞིག་བསྐྲུན་སོང་། གང་ཡིན་ཟེར་ན། ང་རང་གི་ཆེད་ལས་དེ་རྒྱ་གར་གྱི་གནའ་བོའི་རྩོམ་རིག་ཡིན། ཆེད་ལས་རང་གི་སྒང་ལ་ད་དུང་སློབ་སྦྱོང་ལོ་ཁ་ཤས་ཤིག་བྱེད་ཐུབ་ན། སྤྱི་ཚོགས་ཐོག་ལ་དངོས་གནས་ནུས་པ་འདོན་ཐུབ་ས་རེད་བསམ་གྱི་འདུག་ཅེས་བརྗོད་བྱུང་། ཞིབ་འཇུག་སློབ་མ་རྡོ་རྗེ་ཕུན་ཚོགས་ལགས་ཀྱིས། ད་བར་ངས་བོད་ཀྱི་ལོ་རྒྱུས་ལ་ཆེད་སྦྱོང་བྱས་པའི་ཤེས་ཚད་འདིས་དེང་སང་ང་ཚོའི་བཙན་འབྱོལ་སྤྱི་ཚོགས་ནང་གི་ལོ་རྒྱུས་འབྲི་སྒྲིག་པའམ་ལོ་རྒྱུས་དགེ་རྒན་ཡིན་ཟེར་མཁན་མང་པོ་ཞིག་ལས་བཟང་བ་མིན་ནའང་སྐྱོ་བ་མིན་པའི་གདེང་ཚོད་ཡོད། འོན་ཀྱང་ངའི་རེ་བ་ཁོ་ཚོ་ལྟར་བྱེད་རྒྱུ་དེ་མ་ཡིན་པར་ད་དུང་མུ་མཐུད་དུ་སློབ་གཉེར་རྒྱུན་སྐྱོང་བྱ་དགོས་བསམ་ཡོད། ཅེས་བརྗོད་སོང་།
ཡང་གསར་འགོད་པས་ལོ་ངོ་གཉིས་རིང་གི་སློབ་སྦྱོང་གི་བརྒྱུད་རིམ་ཁྲོད། སྐབས་དང་པོའི་ཞིབ་འཇུག་སློབ་མའི་སྒྲིག་འཛུགས་དང་ཁྲིད་གཞིའི་ཐད་མ་འདང་ས་དང་ཞན་ཆ་ག་རེ་མཐོང་གི་ཡོད་མེད་དྲིས་པར། ཞིབ་འཇིག་སློབ་མ་ཆོས་གྲགས་ལགས་ཀྱིས་སློབ་སྦྱོང་གི་དུས་ཡུན་ཐུང་དྲགས་འདུག ཁྲིད་གཞི་དག་ངེས་སྟོན་པའི་ངོས་ནས་འཆར་འགོད་ཧ་ལས་པའི་ཡག་པོ་གནང་འདུག འཛམ་གླིང་ཤར་ནུབ་ཀྱི་རྩོམ་རིག་གཙོས་པའི་ཤེས་བྱ་མང་པོ་ཞིག་ལ་བློ་སྒོ་ཕྱེས་སོང་། ཞེས་བརྗོད་སོང་། སློབ་བུ་རྡོ་རྗེ་ཕུན་ཚོགས་ལགས་ཀྱིས་ངས་འདིར་དཀའ་ངལ་གསུམ་ཙམ་ཞུས་ན། གཅིག ལོ་རྒྱུས་སྡེ་ཚན་ལ་མཚོན་ན་སློབ་ཚན་འཆར་འགོད་ཚོད་ལྟའི་ངོ་བོར་འགྲོ་བཞིན་ཡོད་པ་དེ་ཏག་ཏག་ཅིག་ཡོང་ཐུབ་ཀྱི་མེད་པ་དང་། ཐོག་མའི་འཆར་འགོད་ནང་གསལ་བའི་ཁྱིམ་མཚེས་རྒྱལ་ཁབ་ཀྱི་ལོ་རྒྱུས་དང་། ལོ་རྒྱུས་ཞིབ་འཇུག་ལ་དགོས་ངེས་ཀྱི་ལོ་རྒྱུས་རིག་པ་དང་། དཔྱད་ཐབས་རིག་པ་སོགས་ཀྱི་སློབ་ཚན་ཇི་བཞིན་འགྲོ་མ་ཐུབ་པ་དེ་རེད། གཉིས། སློབ་གྲྭའི་དཔེ་མཛོད་དུ་ང་ཚོར་དགོས་ངེས་ཀྱི་ཕྱག་དཔེ་མང་པོ་ཞིག་རག་གི་མེད་པ་དང་། ཡིག་ཚང་ནས་མངག་ཉོ་བྱས་ཀྱང་དུས་ཐོག་ཏུ་མི་རག་པ། གསུམ། སློབ་གྲོགས་འགའ་རེར་ཡིག་ཚང་བརྒྱུད་ནས་སློབ་ཡོན་རག་དང་མ་རག་གི་དཀའ་ངལ་འཕྲད་ཀྱི་ཡོད་པ་སོགས་རེད། ཅེས་བརྗོད་སོང་།
སྐབས་དང་པོའི་ཞིབ་འཇུག་སློབ་མའི་མཐར་ཕྱིན་ཆེད་རྩོམ་དང་རྒྱུགས་འབྲས་ལ་དཔྱད་ཞིབ་གནང་མཁན་ན་ག་སངས་རྒྱས་བསྟན་དར་ལགས་ཀྱིས་སྐབས་དང་པོའི་ཞིབ་འཇུག་སློབ་མའི་ཞན་ཆའི་སྐོར་ལ། སྤྱིར་བཏང་བོད་ཡིག་དང་འབྲེལ་བའི་མཐོ་རིམ་སློབ་གྲྭ་ཁག་ཏུ་ (M.A) ལ་ཞིབ་འཇུག་ཅེས་ཡོངས་གྲགས་སུ་ལབ་ཀྱི་འདུག་ཀྱང་། ཞིབ་འཇུག་སློབ་མ་ཟེར་དུས་དབྱིན་ཇིའི་སྐད་ཡིག་ནང་ (Research or Researcher) ཞེས་ལབ་ཀྱི་ཡོད་པ་རེད། དེ་ (M.A) ཐོན་པའི་རྗེས་ཀྱི་ (PH.D) སྐབས་སུ་དེ་འདྲ་ལབ་ཀྱི་འདུག དེ་ཡིན་དུས་དེ་གཉིས་ལ་ཁྱད་པར་ཅུང་འདུག སློབ་མ་ཚོས་སློབ་སྦྱོང་དང་ཉམས་ཞིབ་སྐབས་སུ། དགེ་རྒན་ལགས་ཀྱིས་ཁྱེད་རང་ཚོས་གཙུག་ལག་རབ་འབྱམས་པའི་སློབ་ཐུན་འདིའི་ནང་སོ་སོ་རང་གིས་ཞིབ་འཇུག་བྱས་ཏེ་ལྟ་སྟངས་ཀྱི་ཐོག་ནས་ཐག་གཅོད་དགོས་པ་དེ་ཙམ་གལ་ཆེན་པོ་མ་རེད། གཙོ་བོ་ཁྱེད་རང་ཚོས་ཞིབ་འཇུག་སློབ་མའི་དཔྱད་གཞི་ག་རེ་འདེམ་པ་ཡིན་ན། དེའི་སྐོར་གྱི་ཞིབ་འཇུག་རྒྱུ་ཆ་མང་པོ་བསྡུ་རུབ་བྱས་ཏེ་དཔྱད་ཞིབ་བྱེད་རྒྱུ་མ་གཏོགས། རྩ་བའི་ཞིབ་འཇུག་ངོ་མ་ནང་བཞིན་གྲུབ་དོན་འདོན་རྒྱུ་དེ་ཙམ་གལ་ཆེན་པོ་མ་རེད་གསུངས་འདུག འོན་ཀྱང་སློབ་མ་ཚོའི་ངོས་ནས་དཔེ་ཀློག་གི་སྐབས་སུའང་དེ་དང་འབྲེལ་བའི་གཞུང་ལུགས་མང་པོ་ཞིག་ལ་སློབ་སྦྱོང་བྱས། ཚོགས་འདུ་ཚོགས། དཔྱད་ཞིབ་ཀྱི་ཐོག་ནས་ཐག་གཅོད་དེ་འདྲ་གང་ཡང་གནང་མི་འདུག དེ་ངས་ཞན་ཆ་གཅིག་རེད་བསམ་གྱི་འདུག ཅེས་བརྗོད་བྱུང་།
གྲུབ་འབྲས་ཀྱི་སྐོར་ལ་ཁོང་གིས། ཁོ་ཚོའི་གཙུག་ལག་རབ་འབྱམས་པའི་ནང་རིག་ཚན་གཉིས་བཞག་འདུག གཅིག་བོད་ཀྱི་ལོ་རྒྱུས་རེད་ལ་གཅིག་བོད་ཀྱི་རྩོམ་རིག་རེད། བོད་ཀྱི་རྩོམ་རིག་ལབ་དུས། སྔ་མོའི་ང་ཚོའི་སྲོལ་རྒྱུན་རྩོམ་རིག་དེ་གཞིར་བཞག་གི་ཐོག་ནས་གསར་རྩོམ་ག་རེ་ལེན་རྒྱུ་འདུག་དེ་ལ་ཁོ་ཚོས་དཀའ་ལས་ཞེ་དྲགས་བརྒྱབ་འདུག དེ་ལ་ཡིག་ཆ་མང་པོའི་ཐོག་ནས་ལམ་སྟོན་ཤུགས་ཆེན་པོ་དང་གསལ་བོ་གནང་འདུག དེ་ཡང་དཔྱད་གཞིའི་ཡིག་ཆའི་གཞི་དེ་རིག་བྱེད་དང་གྷི་རེ་སིའི་རྩོམ་རིག་ཡིན་ནའང་། ལྟ་སྟངས་ཀྱི་ཐད་ནས་བོད་རང་གི་རྩོམ་རིག་ཟེར་ན་རེད། དེང་རབས་བོད་ཀྱི་རྩོམ་རིག་གི་མགོ་ཁུངས་དེ་ནུབ་ཕྱོགས་གྷི་རེ་སི་ཆགས་ཀྱི་འདུག དེ་འདྲའི་རྒྱབ་ལྗོངས་ཀྱི་ཐོག་ནས་ཞེ་དྲགས་གཏིང་ཟབ་པོ་དང་རྒྱ་ཆེན་པོ་གནང་འདུག ང་ཚོ་བོད་ཀྱི་སྐད་ཡིག་ནང་རྩོམ་རིག་གི་རྒྱུ་ཆ་ཧ་ཅང་ཉུང་ཉུང་ཡིན་སྟབས། ཁོ་ཚོས་སྐད་ཡིག་མང་པོ་ཞིག་གི་ཐོག་ནས་སློབ་སྦྱོང་བྱས་ཡོད་པ་ཧ་ཅང་གསལ་བོ་རེད། སྤྱིར་བཏང་སློབ་སྦྱོང་ག་རེ་བྱས་པ་ཡིན་ནའང་དེ་ལ་ཞན་ཆ་མེད་པ་ཞིག་མི་སྲིད་པ་རེད། ནམ་རྒྱུན་ང་ཚོས་ཞིབ་འཇུག་སློབ་མ་ཟེར་དུས། དགེ་རྒན་གྱི་ལམ་སྟོན་ཙམ་མ་གཏོགས་ཧ་ཅང་མང་པོ་ཁྲིད་བསྡད་པ་དེ་འདྲ་ཡོད་མ་རེད། ཡིན་ནའང་སྐབས་དང་པོའི་ཞིབ་འཇུག་སློབ་སྐབས་འདིའི་ནང་དགེ་རྒན་གྱི་ལམ་སྟོན་ཡག་པོ་ཡོད་པ་ཙམ་ཟད། ཤུགས་ཆེན་པོ་དང་རྒྱ་ཆེན་པོ་གནང་འདུག དེ་ཡག་པོ་ཞེ་དྲགས་འདུག་བསམ་གྱི་ཡོད། བོད་ཀྱི་ལོ་རྒྱུས་ཡིན་ན་དེ་འདྲ་མ་རེད། དགེ་རྒན་གྱི་ལམ་སྟོན་ཤུགས་ཆེན་པོ་དེ་འདྲ་མེད་ནའང་། བོད་རང་གི་སྐད་ཡིག་ནང་དཔྱད་གཞིའི་ཡིག་ཆ་མང་པོ་རག་གི་ཡོད་སྟབས། སློབ་མ་ཚོས་ཁོངས་འཁྱོལ་གྱི་ཡོད་པ་རེད། ཅེས་བརྗོད་སོང་།
གསར་འགོད་པ། པདྨ་རྒྱལ།
སྦྲེལ་ནག་པ་བློ་གྲོས་དཔལ་བཟང་ལགས་ཀྱིས་དངོས་གནས་བྱས་ན། གཙུག་ལག་རབ་འབྱམས་སྐབས་སུ་རང་གི་ལྟ་བ་འདོན་རྒྱུ་མ་ཡིན་པར་གཙོ་བོ་རང་གི་ཆེད་ལས་དང་འབྲེལ་བའི་དཔེ་ཀློག་མང་པོ་བྱེད་དགོས་པ་རེད། རང་ཉིད་ལ་ལྟ་བ་ལྟ་གྲུབ་ཚད་ལྡན་ཞིག་ཆགས་དགོས་ན། སྔོན་མའི་མཁས་དབང་དེ་ཚོའི་ལྟ་བ་ལྟ་གྲུབ་ཁག་དཀྲུག་དཀྲུག་གཏོང་བ་དང་སྤྱི་སྡོམ་རྒྱག་དགོས་པ་རེད། དེ་ལྟར་བྱས་ན་འོ་མ་དཀྲུག་ནས་མར་ཐོན་པ་ལྟར་རྗེས་མ་རང་ཉིད་ལ་ལྟ་བ་ལྟ་གྲུབ་ཆགས་ཡོང་གི་ཡོད་པ་དང་། རྗེས་མ་འབུམ་རམས་པའི་སྐབས་སུ་ད་གཟོད་རང་གི་ལྟ་བ་ལྟ་གྲུབ་ཚད་ལྡན་ཞིག་འདོན་ཐུབ་ཀྱི་ཡོད་པ་རེད། ཅེས་ཟེར།
དགེ་རྒན་བློ་གྲོས་དཔལ་བཟང་ལགས་ཀྱིས་དངོས་གནས་ལྷག་བསམ་རྣམ་དག་གིས་དཀའ་ལས་ཤུགས་ཆེན་པོ་བརྒྱབ་སོང་། ཐུགས་རྗེ་ཆེ་ཞུ། ཁོང་གིས་བོད་ཀྱི་རིག་གནས་དང་སློབ་གསོ་ལ་བཟུང་བའི་རེ་བ་དང་སྙིང་སྟོབས་དེར་རྗེས་སུ་ཡི་རངས་ཞུ་འོས། སྲིད་སྐྱོང་མཆོག་གི་ཆེད་ལས་བ་སྟོང་དང་ཁྲི་ཡི་ཧམ་བཤད་ཙམ་དང་། བཙན་བྱོལ་གྱི་ཆེ་ཆེ་དྲག་དྲག་དག་གིས་བོད་ཀྱི་རིག་གནས་ཟེར་ནས་ཁ་བཤད་སྟོང་བ་དེ་ཙམ་མ་ཡིན་པར། བཙན་བྱོལ་དུ་ཁོང་ལྟ་བུའི་དགེ་རྒན་བཅུ་གྲངས་ཤིག་ཡོད་ཚེ། དངོས་གནས་ཚད་དང་ལྡན་པའི་ཆེད་ལས་ཤེས་ཡོན་པའི་དཔུང་སྡེ་ཞིག་སྐྱེད་སྲིང་བྱ་ཐུབ་ངེས།