ལྷོ་ཀོ་རི་ཡའི་རྒྱལ་ས་སོ་ཨོལ་ཏུ་གནས་སྡོད་བྱེད་མཁན་བོད་ཀྱི་གླུ་བ་ཁ་རག་སྤེན་པས་འདས་བའི་ལོ་ངོ་མང་པོའི་རིང་ལ་བོད་ཀྱི་གླུ་གཞས་སྒྱུ་རྩལ་ལ་བརྟེན་ནས་ཀོ་རི་ཡའི་མི་མང་ཁྲོད་དུ་བོད་ཀྱི་གླུ་གཞས་སྒྱུ་རྩལ་དང་། བོད་པའི་རིག་གཞུང་། བོད་དོན་འཐབ་རྩོད་བཅས་ཀྱི་སྐོར་ལ་གོ་རྟོགས་སྤེལ་ཡོད། ད་ལོ་ཁོང་གིས་ “འབྲོག་པའི་རོལ་དབྱངས་སྐོར་སྐྱོད་” ཞེས་པའི་བོད་ཀྱི་གླུ་གཞས་སྒྱུ་རྩལ་དང་བོད་དོན་ངོ་སྤྲོད་ཀྱི་ལས་འགུལ་ཞིག་མགོ་བརྩམས་པའི་སྐོར་ལ་བཅར་འདྲི་བྱས་ཡོད།
དྲི་བ། ཁྱེད་ཀྱིས་ད་བར་ལྷོ་ཀོ་རི་ཡའི་ནང་དུ་བོད་ཀྱི་རོལ་དབྱངས་ལས་འགུལ་ཅི་སྤེལ་ངོ་སྤྲོད་མདོར་བསྡུས་ཤིག་གནང་རོགས།
ལན། ང་ནི་རྒྱ་གར་ལ་དྭགས་སུ་བོད་ཀྱི་ས་མ་འབྲོག་གི་ཁྱིམ་ཚང་ཞིག་ཏུ་སྐྱེས་ཤིང་། ཆུང་དུས་ནས་བོད་ཀྱི་གླུ་གར་ལ་དགའ་བའི་མི་ཞིག་ཡིན། ༢༠༠༤ ལོར་གླུ་གཞས་ཆེད་སྒྲིག་འཁོར་ཐག་དང་པོ་ “མཛེས་ལྡན་སྐྱིད་པོ” ཞེས་པ་བཏོན་པ་ཡིན། གླུ་གཞས་ཆེད་སྒྲིག་འཁོར་ཐག་གཉིས་པ་བཏོན་རྗེས། ཚིག་དབྱངས་གསར་རྩོམ་དང་སྒྲ་འཇུག་བཅས་ཡོངས་རྫོགས་སོ་སོས་བྱེད་འདོད་བྱུང་སོང་། རྗེས་སུ་ལྷོ་ཀོ་རི་ཡ་རྒྱལ་ཡོངས་སྒྱུ་རྩལ་གཙུག་ལག་སློབ་གྲྭས་(Korea National University of Arts)སྒྲུབ་བཞིན་པའི་ཨེ་ཤ་ཡའི་སྒྱུ་རྩལ་བ་གསོ་སྐྱོང་གི་ལས་གཞི་(AMAFeK)བརྒྱུད་ནས་དབྱངས་གསར་རྩོམ་གྱི་སློབ་སྦྱོང་བྱེད་པའི་གོ་སྐབས་ཐོབ་སོང་པས། ༢༠༠༧ ལོར་ལྷོ་ཀོ་རི་ཡར་སློབ་སྦྱོང་བྱེད་དུ་ཡོང་བ་ཡིན། ལོ་ངོ་བཞིའི་རིང་ལ་ཀོ་རི་ཡའི་རྒྱལ་ཡོངས་སྒྱུ་རྩལ་གཙུག་ལག་སློབ་གྲྭས་སློབ་ཡོན་གྱི་མཐུན་འགྱུར་འོག་ཀོ་རི་ཡའི་སྲོལ་རྒྱུན་གླུ་གཞས་ཀྱི་དབྱངས་རྩོམ་སྟངས་ཆེད་སྦྱོང་བྱས་པ་ཡིན། སློབ་མཐར་ཕྱིན་རྗེས་རིག་གཞུང་སྣ་འཛོམས་ཀྱི་རོལ་ཚོགས་མོན་ཌན་ཌི་(Montant)ཞེས་པའི་ནང་དུ་ལོ་གསུམ་རིང་ལ་བྱ་བ་སྒྲུབ་པའི་གོ་སྐབས་ཐོབ་བྱུང་།
ལོ་ངོ་དེ་དག་གི་རིང་ལ། རིག་གཞུང་སྣ་འཛོམས་ཁྱབ་བསྒྲགས་དང་། སྲོལ་རྒྱུན་རིག་གཞུང་འཁྲབ་སྟོན། ན་གཞོན་སློབ་ཕྲུག་ཚོའི་ཆེད་དུ་རོལ་དབྱངས་ཟབ་སྦྱོང་སོགས་ཀྱི་ལས་གཞི་འདྲ་མིན་ནང་མཉམ་ཞུགས་བྱས་པ་ཡིན། ༢༠༡༤ ལོ་ནས་བཟུང་། རང་དབང་གླུ་བ་དང་འཁྲབ་སྟོན་པ་ཞིག་བྱེད་མགོ་བཙུགས་པ་ཡིན་ལ། གཙོ་བོ་བོད་ཀྱི་གླུ་བ་ཞིག་དང་འཁྲབ་སྟོན་པ་ཞིག་ཡིན་པའི་ཆ་ནས། ཞི་བདེ་དང་བརྩེ་བ། རང་བྱུང་ཁམས་དང་རང་དབང་སོགས་དང་འབྲེལ་བའི་ཐོག་ནས་འཁྲབ་སྟོན་དང་། ཀོ་རི་ཡའི་སྤྱི་ཚོགས་ཁྲོད་དུ་བོད་ཀྱི་ཡིད་དུ་འོང་བའི་གླུ་གཞས་ལ་དོ་སྣང་དང་དགའ་མོས་ཡོང་ཆེད་མུ་མཐུད་འབད་པ་བྱས་བ་ཡིན།
ཀོ་རི་ཡའི་རིག་གཞུང་འཁྲབ་སྟོན་པ་མང་པོ་དང་མཉམ་འབྲེལ་ཐོག་ཀོར་བོད་གཉིས་ཀྱི་སྲོལ་རྒྱུན་སྒྱུ་རྩལ་འཁྲབ་སྟོན་ཐེངས་མང་དང་། ཀོ་རི་ཡའི་ནང་གི་རྒྱལ་སྤྱིའི་རང་བཞིན་ཅན་གྱི་སྒྱུ་རྩལ་འཁྲབ་སྟོན་ནང་དུའང་བོད་ཀྱི་སྐུ་ཚབ་ཀྱི་ངོ་བོའི་ཐོག་ནས་ཆ་ཤས་བླངས་པ་ཡིན། ལྷག་པར་ཏུ་བོད་ཀྱི་སྲོལ་རྒྱུན་སྒྱུ་རྩལ་མི་ཉམས་གོང་འཕེལ་གྱི་ལས་ལ་འབད་བཞིན་པའི་རོལ་དབྱངས་དགེ་རྒན་དག་གིས་སྟབས་བདེའི་སློབ་ཁྲིད་བྱེད་ཐབས་བཅས་ཀྱི་ཐད་ལ་ཉམས་ཞིབ་ཀྱང་བྱས་པ་ཡིན། དེ་བཞིན། ད་ཆ་ཀོ་རི་ཡའི་ནང་དུ་ཁ་རག་སྒྲ་སྦྱོར་ཁང་ཞིག་གསར་འཛུགས་ཀྱིས་རོལ་དབྱངས་གསར་རྩོམ་དང་རོལ་དབྱངས་འདུ་འཛོམས་གོ་སྒྲིག་གི་ལས་ཀ་བྱེད་བཞིན་ཡོད།
༢༠༡༦ ལོར་“འོད་སྣང་ལ་ཕྲེང་བ་”ཞེས་པའི་ཆེད་སྒྲིག་འོད་སྡེར་ཞིག་བཏོན་པ་ཡིན། འདི་ནི་ངའི་ལོ་ངོ་བཅུའི་རིང་གི་དཀའ་ལས་ཀྱི་འབྲས་བུ་ཡིན་ལ། ངའི་བུ་མོ་ཁ་རག་དཔལ་མཛེས་ཀྱི་ཆེད་དུའང་ཡིན། ད་ཆ་གླུ་ལེན་པ་དང་། དབྱངས་རྩོམ་པ། སྒྲ་འཇུག་བྱེད་པ་སོགས་ཀྱི་བྱེད་སྒོ་མཐའ་དག་སོ་སོ་གཅིག་པུས་བསྒྲུབ་ཐུབ་ཀྱི་ཡོད་པས་སྤོབས་པ་སྐྱེ་གི་འདུག་ལ། གཙོ་བོ་༧གོང་ས་མཆོག་གི་བཀའ་དྲིན་དང་། བོད་ཕྲུག་ཁྱིམ་སྡེའི་ཤེས་ཡོན་གྱི་ནུས་པ། ནང་མི་ཉེ་འབྲེལ་དང་གྲོགས་པོ་གྲོགས་མོ། ཀོ་རི་ཡ་རྒྱལ་ཡོངས་སྒྱུ་རྩལ་གཙུག་ལག་སློབ་གྲྭའི་མཐུན་འགྱུར་རོགས་རམ་བཅས་ནས་བྱུང་བ་ཞིག་རེད།
ང་ནི་བོད་ཀྱི་གླུ་བ་རྒན་པ་ཞིག་རེད། མ་འོངས་པར་བོད་ཀྱི་སློབ་ཕྲུག་ཚོར་རོལ་དབྱངས་འཆད་ཁྲིད་ཀྱི་རོགས་རམ་དང་ལམ་སྟོན་བྱེད་པའི་འཆར་གཞི་ཡོད། ༢༠༠༨ ནས་ ༢༠༡༣ ལོའི་བར་ལོ་ལྔའི་རིང་རོལ་དབྱངས་བརྒྱུད་རོགས་དངུལ་བསྡུ་བའི་ལས་འགུལ་སྤེལ་བ་ཡིན། རེས་གཟའ་སྤེན་པ་རྟག་པར་ཀོ་རི་ཡའི་མི་སེར་ཚོའི་མདུན་དུ་བོད་ཀྱི་གླུ་གཞས་ལེན་པ་དང་། བཙན་བྱོལ་ནང་གི་ཤེས་ཡོན་དང་འཚོ་བའི་གནས་བབ་སོགས་ངོ་སྤྲོད་བྱས། ལས་འགུལ་འདི་དག་བརྒྱུད་ནས་བསྡུས་བའི་ཞལ་འདེབས་ཀྱིས་བཙན་བྱོལ་ནང་གི་སློབ་ཕྲུག་ཆུང་ཆུང་ཚོར་རོགས་རམ་བྱས་པ་ཡིན། དེར་མ་ཟད་དོ་སྣང་ཅན་གྱི་ཀོ་རི་ཡའི་མི་སེར་ཚོས་བོད་ཀྱི་རིག་གཞུང་དང་ད་ལྟའི་གནས་བབ་ཀྱི་ཐད་སྐད་ཆ་དྲིས་བར་ལན་འདེབས་ཀྱིས་གོ་རྟོགས་སྤེལ་བ་ཡིན། སྐབས་དེའི་ལས་འཆར་གྱི་མིང་ལ་ “ལག་གདང་སྦྲེལ་བའི་ལས་གཞི་” ཟེར་ཞིང་། ད་ལྟ་“བདེ་བ་ལས་འཆར་”ཞེས་མིང་བསྒྱུར་ཡོད། ལས་འགུལ་འདི་བརྒྱུད་ནས་མ་འོངས་བོད་ཀྱི་གཞོན་སྐྱེས་ཚོར་རོལ་དབྱངས་ཀྱི་སྐོར་ལ་ཟབ་སྦྱོང་སྤྲད་པའི་འཆར་གཞི་ཞིག་ཀྱང་ཡོད།
དྲི་བ། “འབྲོག་པའི་རོལ་དབྱངས་སྐོར་སྐྱོད་”ཞེས་བའི་ལས་འགུལ་དེ་ཅི་ཞིག་རེད། དེ་ག་དུས་མགོ་བཙུགས་པ་དང་། རྒྱུ་མཚན་ཅི་ཞིག་ལ་བརྟེན་ནས་མགོ་བཙུགས་པ་ཡིན།
ལན། ཁྱེད་ཀྱིས་ཤེས་གསལ་ལྟར། འབྲོག་པ་ནི་ས་ཆ་གཅིག་ནས་གཅིག་ལ་གནས་སྤོར་ནས་འགྲོ་བ་ལྟར། ངས་ཀྱང་ནང་མི་དང་མཉམ་དུ་ས་ཆ་གཅིག་ནས་གཞན་གཅིག་ལ་རོལ་དབྱངས་སྐོར་སྐྱོད་བྱེད་ཀྱི་ཡོད་པས་མིང་འདི་བཏགས་པ་ཡིན། ད་ལོའི་གསུམ་བཅུའི་དུས་དྲན་ནས་མགོ་བཙུགས་པ་ཡིན་ལ། ཕྱི་ཟླ་གསུམ་པ་ནས་ལྔ་པ་བར་ཏུ་ཀོ་རི་ཡའི་རྒྱལ་ས་གཙོའི་གཞན་གྲོང་ཁྱེར་ཆེ་ཁག་བཞི་དང་། ལྷོ་རྒྱུད་ཀྱི་ཅེ་ཅོས་གླིང་ཕྲན་བཅས་སུ་སྐོར་སྐྱོད་བྱ་འཆར་ཡོད། འདི་ནི་གཙོ་བོ་ “འོད་སྣང་ལ་ཕྲེང་བ་” ཞེས་པའི་འོད་སྡེར་དང་། བོད་ཀྱི་རོལ་དབྱངས། རིག་གཞུང་། བོད་ཀྱི་གནས་བབ་བཅས་ཀྱི་སྐོར་ལ་གོ་རྟོགས་སྤེལ་བའི་ལས་གཞི་ཞིག་ཡིན། ཞོར་དུ་བདེ་བ་ལས་གཞིའི་སྐོར་ངོ་སྤྲོད་ཀྱང་བྱེད་ཀྱིན་ཡོད།
ངས་གླུ་གཞས་འཁྲབ་སྟོན་བྱེད་པ་དང་། ངའི་བཟའ་ཟླས་ལས་འགུལ་གྱི་དགོས་དམིགས་ངོ་སྤྲོད། དེ་བཞིན་གཞས་ཚིག་ནང་དོན་འགྲེལ་བཤད། བུ་མོ་ཁ་རག་དཔལ་མཛེས་ཀྱིས་མ་འོངས་བོད་ཀྱི་སོན་རྩའི་མཚོན་རྟགས་ལྟ་བུ་བྱེད་ཀྱི་ཡོད། ཀོ་རི་ཡའི་ནང་དུ་བོད་ཀྱི་འོད་སྡེར་ཉོ་ཚོང་དང་། བོད་ཀྱི་རོལ་དབྱངས་འཁྲབ་སྟོན་ལ་དངོས་སུ་རོལ་མྱོང་བྱེད་པའི་གོ་སྐབས་དཀོན་པོ་ཡིན་སྟབས། ངས་ཀོ་རི་ཡའི་མི་སེར་མཐོ་དམན་བར་གསུམ་ཚང་མའི་རྣ་ལམ་ཏུ་བོད་ཀྱི་རོལ་དབྱངས་ཀྱི་བག་ཆགས་ཤིག་འཇོག་ཐུབ་པའི་འབད་བརྩོན་བྱེད་ཀྱིན་ཡོད།
མདོར་བསྡུས་ཏེ་བཤད་ན། ངའི་ལས་འགུལ་དེ་རོལ་དབྱངས་ཚོགས་ཁང་ནང་གི་ལྟད་མོ་བ་དང་། ཀོ་རི་ཡའི་གླུ་བ་དང་དབྱངས་མཁན། ཁྲོམ་གཞུང་ཉུལ་མཁན་གྱི་ཕ་མ་དང་བུ་ཕྲུག ལྷིང་འཇགས་ལྡན་པའི་དགོན་པ། དྲོ་སྐྱིད་ལྡན་པའི་མགྲོན་ཁང་། ཇ་ཁང་ཆུང་ཆུང་བཅས་སུ་བོད་ཀྱི་རོལ་དབྱངས་ཀྱི་སྙན་འཇེབས་ལྷང་ལྷང་དུ་གྲགས་པར་འབད་པ་བྱེད་ཀྱིན་པའི་ལས་འགུལ་ཞིག་ཡིན།
དྲི་བ། འབྲོག་པའི་རོལ་དབྱངས་སྐོར་སྐྱོད་ལས་འགུལ་འདི་བརྒྱུད་ནས་ཀོ་རི་ཡའི་མི་མང་ཁྲོད་བོད་དོན་གོ་རྟོགས་ཅི་ཙམ་སྤེལ་ཐུབ་ཀྱི་འདུག
ལན། མི་མང་ག་ཚོད་ཅིག་གིས་ཆ་ཤས་ལེན་གྱི་ཡོད་མེད་གསལ་བོ་བཤད་ཚོད་ཐུག་གི་མེད། འོན་ཀྱང་། ཀོ་རི་ཡའི་མི་མང་པོ་ཞིག་གིས་དོ་སྣང་ཆེན་པོས་རོལ་དབྱངས་སྐོར་སྐྱོད་འདིར་མཉམ་ཞུགས་དང་། བོད་ཀྱི་གླུ་གཞས་དང་རོལ་ཆའི་སྐོར་ལ་དྲི་བ་མང་པོ་འདྲི་བཞིན་འདུག ཉན་མཁན་མང་པོ་ཞིག་བོད་ནང་དུ་འགྲོ་མྱོང་ཡོད་པའམ་རྒྱ་གར་བཙན་བྱོལ་སྤྱི་ཚོགས་ལ་རྒྱུས་མངའ་ཡོད་མཁན་དེ་འདྲ་རེད། དེ་མིན་ཐོག་དང་པོར་བོད་ཀྱི་སྐོར་ལ་ཤེས་རྟོགས་ཆེད་ཡོང་མཁན་ཡང་མི་ཉུང་བ་ཞིག་འདུག ངའི་དམིགས་ཡུལ་གཙོ་བོ་ནི་ཀོ་རི་ཡའི་མི་ཞིག་གིས་ཡུལ་དུས་གང་རུང་ཞིག་ཏུ་བོད་ཀྱི་རོལ་དབྱངས་གོ་ན། དེ་ནི་བོད་ཀྱི་རོལ་དབྱངས་ཡིན་པ་ངོས་འཛིན་ཐུབ་པ་ཙམ་འབྱུང་རྒྱུ་དེ་རེད།
ངས་དཔྱིད་ཀའི་མེ་ཏོག་གི་དྲི་བསུང་དང་མཉམ་དུ་བོད་ཀྱི་རོལ་དབྱངས་ཀྱིས་ཞི་བདེ་བསྐྲུན་རྒྱུ་དང་། བོད་དོན་གྱི་སྐོར་ལ་གོ་རྟོགས་འཕེལ་བའི་རེ་བ་བྱེད་ཀྱིན་ཡོད། སྤྱིར་བཏང་རོལ་དབྱངས་སྐོར་སྐྱོད་འདི་གྲ་སྒྲིག་བྱེད་རྒྱུ་ལས་སླ་བོ་མིན་ཡང་། ས་ཆ་མི་འདྲ་བ་ནས་མི་གསར་བ་མང་པོ་ཞིག་ལ་ཐུག་ནས་བོད་ཀྱི་རོལ་དབྱངས་དང་བོད་ཀྱི་གནས་བབ་ངོ་སྤྲོད་བྱེད་རྒྱུ་བྱུང་བ་འདིས་སེམས་ལ་བདེ་བ་སྤྲོད་ཀྱི་འདུག
བཅར་འདྲི་ཞུ་མཁན་ཆོས་རྒྱལ་སྐྱབས།
ཡི་རང་ཞུ་རྒྱུ་ལས་མ་འདས།
ལུས་ལ་ཕྱུ་པ་དང་ནི་འོག་འཇུག་བསྣམས།།
གཟི་དང་བྱུ་རུའི་སྐེ་རྒྱན་མཛེས་པ་ལ།།
རྒྱལ་བའི་སྐུ་ཚེ་བརྟན་པའི་གླུ་གཞས་ཤིག།
ཕྱག་གིས་ཁ་བཏཊ་བསྒྲེང་བཞིན་དབྱངས་སུ་གྱེར།།
སྙན་པོ་ངག་གི་མཆོད་པ་ཡར་མཆོད་དེ།
བླ་མའི་སྐུ་ཚེ་བརྟན་པར་འབུལ་བ་དང།།
མཆོད་པ་མར་མཆོད་དྲིན་ཆེན་ཕ་མ་དང་།།
འགོ་འདྲེན་དཔོན་ཆེན་མཉེས་ཕྱིར་འབུལ་བ་ལཊ།།
བོད་ཀྱི་གླུ་གཞས་བ་ཁ་རག་སྤེན་པ་མཆོག་ལ་རྙིང་ཐག་པ་ནས་ཐུགས་རྗེ་ཆེ་བཞེས་ཞུ་འདོད་བྱུང།