ཧོང་ཀོང་མི་མང་གིས་སྨྲ་བརྗོད་རང་དབང་གི་དར་ཆ་འཕྱེར་ཏེ་ཧོང་ཀོང་རང་བཙན་གྱི་སྒྲིག་འགལ་ཁེ་ལས་གཉེར་ཐབས་སུ་འཐབ་རྩོད་བྱེད་ཀྱི་འདུག་ཟེར།
ཧོང་ཀོང་རང་དབང་གསར་ཁང་གིས་གནས་ཚུལ་སྤེལ་བ་ལྟར་ན། ཁ་སང་རེས་གཟའ་ལྷག་པའི་ཉིན་རྒྱ་ནག་གཞུང་འབྲེལ་མི་དམངས་ཉིན་རེ་ཚགས་པར་ཁང་གིས་ཧོང་ཀོང་གི་རང་བཙན་གླེང་བ་དེས་ཧོང་ཀོང་གྲོང་ཁྱེར་གྱི་བདེ་འཇགས་ལ་འཇིག་ཉེན་བཟོ་ཡི་ཡོད་ལུགས་བཤད་འདུག
རྒྱ་ནག་རྒྱལ་ཡོངས་སྲིད་གྲོས་ཀྱི་ཧོང་ཀོང་གྲོང་ཁྱེར་གྱི་སྐུ་ཚབ་ཁྲིན་ཆིན་ཞ་ (Chan Ching-har) ཟེར་བ་ཞིག་གིས། ཧོང་ཀོང་མི་མང་གིས་སྨྲ་བརྗོད་རང་དབང་གི་དར་ཆ་འཕྱེར་ཏེ། ཧོང་ཀོང་རང་བཙན་གྱི་སྒྲིག་འགལ་ཁེ་ལས་གཉེར་ཐབས་སུ་འཐབ་རྩོད་བྱེད་ཀྱིན་ཡོད། ཧོང་ཀོང་ཡུལ་མིའི་སྨྲ་བརྗོད་རང་དབང་གི་ཁེ་དབང་དེ “རྒྱལ་ཁབ་གཅིག ལམ་ལུགས་གཉིས” ཀྱི་སྲིད་ཇུས་གཞིར་བཟུང་ཐོག་རྒྱ་ནག་གི་མངའ་ཁོངས་བདག་དབང་ཆ་ཚང་ལ་རག་ལས་ཡོད། དེར་བརྟེན་ཧོང་ཀོང་རང་བཙན་གྱི་རྩོད་གཞི་སློང་མཁན་ཚོས་མངོན་གསལ་དོད་པོར་རྒྱལ་ཁབ་ཀྱི་གཞི་རྩའི་རྩ་ཁྲིམས་རྡོག་རོལ་བཏང་བ་མ་ཟད། ཧོང་ཀོང་གྲོང་ཁྱེར་གྱི་བདེ་འཇགས་ལ་འཇིག་ཉེན་བཟོ་བ་དང་། ཧོང་ཀོང་གི་སྤྱི་ཚོགས་དཔལ་འབྱོར་གྱི་རེ་འདུན་ལ་དོ་ཕོག་བཏང་བ་རེད། ཧོང་ཀོང་ཡུལ་མི་ཚོས་དེང་གི་རྒྱལ་ཁབ་ཁ་བྲལ་བའི་ལངས་ཕྱོགས་ལ་དོགས་ཟོན་དགོས་ལུགས་སོགས་བཤད་འདུག
དེ་བཞིན། རྒྱ་ནག་གཞུང་འབྲེལ་གོ་ལའི་དུས་བབ་གསར་ཁང་གིས་ཧོང་ཀོང་རང་བཙན་གླེང་བ་དེས་དོན་དངོས་སུ་རྒྱ་ནག་གཞུང་ལ་ཤན་ཤུགས་ཅི་ཡང་ཐེབས་ཀྱི་མེད་ནའང་། ཁོ་ཚོས་གནས་འཕྲིན་བརྒྱུད་ལམ་ཁག་ཏུ་ཧོང་ཀོང་རང་བཙན་ཡིན་པའི་ཨུ་ཚིགས་བྱེད་པ་དང་། ཧོང་ཀོང་གི་འབྱུང་འགྱུར་ལ་སེམས་འཁུར་བྱེད་མཁན་མི་མང་ལ་དཀྲོག་རྐྱེན་སློང་གི་ཡོད་སྐོར་སོགས་བཀོད་ཡོད་འདུག
ཡང་ཉེ་ལམ་ཧོང་ཀོང་གྲོང་ཁྱེར་གྱི་ (Causeway Bay Books) དཔེ་ཁང་གི་ལས་མི་ཚོ་གར་སོང་ཆ་མེད་དུ་གྱུར་བའི་གནས་ཚུལ་དང་། མེན་པོ་ (Ming Pao) ཚགས་པར་ཁང་གི་ལག་བསྟར་རྩོམ་སྒྲིག་པ་གོ་ཡན་ (guó yuán) ལས་གནས་ནས་དགོངས་པ་ཞུས་པར་ཧོང་ཀོང་མི་མང་ཁོ་ལས་གནས་ནས་ཕྱིར་ཕུད་བཏང་བའི་ངོ་རྒོལ་བྱེད་ཀྱི་ཡོད་ལུགས་བཤད་འདུག
གནས་ཚུལ་ལྟར་ན། ཟླ་འདིའི་ཕྱི་ཚེས་ ༢༠ ཉིན་ཧོང་ཀོང་གི་མེན་པོ་ (Ming Pao) ཚགས་པར་ཁང་གི་རྩོམ་སྒྲིག་པ་གོ་ཡན་ནི་ཧོང་ཀོང་གྲོང་ཁྱེར་གྱི་ཆབ་སྲིད་དཔལ་འབྱོར་དང་འགྲོ་འོང་འགྲིམ་འགྲུལ་སོགས་ཀྱི་བཅའ་ཁྲིམས་སྣང་མེད་བཏང་བའི་ཉེས་མིང་ཐོག་ལས་གནས་ནས་ཕྱིར་འཕུད་བཏང་ཡོད་པ་དང་། ན་ནིང་ལོ་མཇུག་ཧོང་ཀོང་གྲོང་ཁྱེར་གྱི་ (Causeway Bay Books) དཔེ་ཁང་གི་ལས་མི་ ༥ གློ་བུར་གར་སོང་ཆ་མེད་དུ་གྱུར་ཅིང་། ད་ལོའི་ཕྱི་ཟླ་ ༢ ནས་ ༣ ཡས་མས་སུ་ཁོ་ཚོ་རྒྱ་ནག་སྐམ་ཆེན་མོའི་ནང་ཡོད་པའི་གནས་ཚུལ་ཐོན་པ་ལྟར། པེ་ཅིན་གཞུང་གི་དངོས་ཤུགས་བརྒྱུད་གསུམ་གྱི་དམ་དྲག་འོག་ད་ལོ་ནས་ཧོང་ཀོང་གྲོང་ཁྱེར་གྱི་སྨྲ་བརྗོད་རང་དབང་གི་གནས་སྟངས་ཇེ་སྡུག་ཏུ་འགྲོ་བཞིན་ཡོད་འདུག
གསར་འགོད་པ། པདྨ་རྒྱལ།
