བཞུགས་སྒར་རྒྱལ་བའི་ཕོ་བྲང་དུ་འཛམ་གླིང་ཤར་ནུབ་ཀྱི་གཞོན་སྐྱེས་ཉམས་མྱོང་རྗེ་ལེན་གྱི་ཚོགས་འདུ་ཞིག་ཚོགས་པའི་སྟེང་། ༧གོང་ས་མཆོག་གིས་འཛམ་གླིང་སྟེང་གི་རྙོག་དྲ་མང་པོ་ང་ཚོ་མིས་བཟོས་པ་ཡིན་སྟབས། དཀོན་མཆོག་ལ་གསོལ་འདེབས་བྱས་པས་མི་ཡོང་སྟབས་ང་ཚོ་མིས་སེལ་ཐབས་བྱེད་གསུངས།
དེ་རིང་སྔོ་དྲོའི་ཆུ་ཚོད་ ༩།༠༠ བའི་སྟེང་བཞུགས་སྒར་ཐེག་ཆེན་ཆོས་གླེང་གཙུག་ལག་ཁང་གི་རྒྱལ་བའི་ཕོ་བྲང་དུ། ཨ་རིའི་ཞི་བདེ་ལྷན་ཚོགས་ (USIP) དང་དགའ་ལྡན་ཕོ་བྲང་གཉིས་ཐུན་མོང་གི་གོ་སྒྲིག་འོག འཛམ་གླིང་ཤར་ནུབ་ཀྱི་གཞོན་སྐྱེས་དབུ་ཁྲིད་ཚོའི་ཉམས་མྱོང་དང་བསམ་ཚུལ་བརྗེ་ལེན་གྱི་བགྲོ་གླེང་ཚོགས་འདུ་ཞིག་ཚོགས་ཡོད་པ་དང་། ཚོགས་འདུའི་སྐུ་མགྲོན་གཙོ་བོར་༧གོང་ས་སྐྱབས་མགོན་རིན་པོ་ཆེ་མཆོག་གི་དབུས་རྒྱ་གར་གྱི་དྲང་སྲོང་བ་ཆེན་མོ་ཌི་ཝན་སི་ཡ་ཌི་ཙེ་ནུལ་ཨ་བྷི་ཌེན་ (Dewan Syed Zainul Abedin) མཆོག་དང་། འཛམ་གླིང་ཤར་ནུབ་རྒྱལ་ཁབ་ཁག་ ༡༦ ནས་ཕེབས་པའི་ཨ་རིའི་ཞི་བདེ་ལྷན་ཚོགས་ཀྱི་ཚོགས་མི་ ༤༠ ཙམ་བཅས་འཛོམས་འདུག
ཚོགས་འདུ་དབུ་འཛུགས་སྟེང་༧གོང་ས་མཆོག་གིས་དེང་གི་འཛམ་གླིང་སྟེང་འབྱུང་བཞིན་པའི་རྩོད་རྙོག་འདུམ་འགྲིག་དང་དམག་འཁྲུག་ཞི་འཇགས་ཡོང་བའི་སྐོར་གསུངས་དོན། དེང་སྐབས་འཛམ་གླིང་སྒང་ལ་རྙོག་དྲ་དང་འཁྲུག་རྩོད་མང་པོ་འབྱུང་གི་ཡོད་པ་དང་། དེ་ཡང་གཅིག་ནས་ཆོས་ལུགས་རིག་གནས་ཀྱི་ཐོག་ནས་རྙོག་དྲ་བྱུང་སྟེ། མི་སེར་སྟོང་ཕྲག་མང་པོ་དམར་གསོད་ཐེབས་ཀྱི་ཡོད་པ་དང་། སྤྱིར་བཏང་རྒྱལ་ཁབ་དང་མི་རིགས་སོ་སོའི་བར་ཆོས་ལུགས་ལྟ་གྲུབ་ཐུན་མིན་གྱི་རྙོག་དྲ་རེ་ཟུང་འབྱུང་གི་ཡོད་ཀྱང་། དེ་ལ་བརྟེན་ཏེ་མི་ཡིས་མི་དམར་གསོད་གཏོང་གི་ཡོད་པ་དེ་ནི་དཔེ་མི་སྲད་པའི་བསམ་ཡུལ་ལས་འདས་པ་ཞིག་ཆགས་ཀྱི་ཡོད་ཅིང་། རྙོག་དྲ་འདི་རིགས་དཀོན་མཆོག་ལ་གསོལ་འདེབས་དང་སྨོན་ལམ་བརྒྱབ་ནས་སེལ་ཐབས་མེད་པ་དང་། དེ་ང་རང་ཚོ་རང་གིས་ལག་ལེན་བསྟར་དགོས་པ་དང་། དཀའ་རྙོག་འདི་རིགས་ང་ཚོ་མིས་བཟོས་པ་ཡིན་སྟབས། ང་ཚོ་མིས་ཐབས་ཤེས་བཏང་ནས་སེལ་ཐབས་བྱེད་དགོས་ཤིང་། དེ་ཡང་དམིགས་བསལ་གཞོན་སྐྱེས་ཚོའི་སེམས་ནང་བསླེབ་དགོས་པ་དང་། དེང་གི་དུས་རབས་ཉེར་བཞི་བ་འདི་གྲོས་མོལ་གྱི་དུས་རབས་ཤིག་ལ་བསྒྱུར་ཏེ་འཛམ་གླིང་སྟེང་ཞི་བདེ་དང་ལྷིང་འཇགས་ཡོང་བའི་ཐབས་ཤེས་གཏོང་དགོས་པ་དང་། གཙོ་བོ་མི་རིགས་དང་རྒྱལ་ཁབ་ཕན་ཚུན་བར་གྲོས་མོལ་ལ་བརྟེན་ནས་ཞི་བདེ་འདུམ་འགྲིག་ཡོང་དགོས་པ་དང་། སྤྱིར་འཛམ་གླིང་སྟེང་གི་ཆོས་ལུགས་གྲུབ་མཐའ་ཁག་ཚང་མའི་ནང་བྱམས་བརྩེ་གཙོ་བོར་གསུང་གི་ཡོད་སྟབས། ཆོས་ལུགས་གྲུབ་མཐའ་གང་ལ་དད་ཅིང་གུས་ནའང་། དེ་ཚོ་ཚང་མས་བྱམས་བརྩེ་སྐོར་གསུང་བ་ཤ་སྟག་ཡིན་ཞིང་། བྱམས་བརྩེ་དེ་ཡར་རྒྱས་གཏང་བའི་ཐབས་ལམ་གཙོ་བོ་ང་ཚོས་བཟོད་བསྲན་ཉམས་ལེན་དང་བསླབ་ཁྲིམས་ཉམས་ལེན་བྱེད་རྒྱུ་བཅས་ནི་ཆོས་ལུགས་གྲུབ་མཐའ་ཚང་མའི་ནང་གསུང་གི་ཡོད་ཅིང་། རྩ་བའི་བྱམས་བརྩེ་ཟེར་བ་དེ་ཆོས་ལུགས་ཡོད་མེད་ལ་ཁྱད་མེད་པར། དེ་ང་ཚོ་ཚང་མས་ལག་ལེན་བསྟར་ཐུབ་པ་ཞིག་ཡིན་པ་དང་། དེ་གཞི་རྩར་བཞག་སྟེ་ང་ཚོ་ཚང་མས་དེང་གི་འཛམ་གླིང་སྟེང་གི་རྙོག་དྲ་འདི་རིགས་སེལ་བའི་ཐབས་ལམ་འཚོལ་དགོས་ཀྱི་ཡོད་ཅེས་སོགས་གསུངས་སོང་།
ཨ་རིའི་ཞི་བདེ་ལྷན་ཚོགས་ཀྱི་ཚོགས་མི་ལྕམ་མ་རེ་ཡམ་ (Mariam) ལགས་ཀྱིས་གསར་འགོད་པར་བརྗོད་དོན། ཁོང་མོ་ཨ་ཧྥི་གྷ་ནེ་སི་ཐན་ནས་ཡིན་ཞིང་། ཨ་ཧྥི་གྷ་ནེ་སི་ཐན་ནང་འཁྲུག་ཟིང་འབྱུང་མུས་ཡིན་པ་དང་། དེ་ནི་གཙོ་བོ་རྒྱལ་ནང་གི་ཆོས་ལུགས་དང་འཇིགས་སྐུལ་དྲག་སྤྱོད་སོགས་ཡིན་ཞིང་། དེ་རིང་འདི་གར་༧གོང་ས་སྐྱབས་མགོན་ཆེན་པོ་མཆོག་དང་ལྷན་དུ་ཁོང་གི་མི་ཚེ་ཉམས་མྱོང་གི་བསླབ་བྱ་སྟེ། གཙོ་བོ་བྱམས་བརྩེ་ལ་བརྟེན་ནས་རྒྱལ་ཁབ་སོ་སོ་དང་མི་རིགས་སོ་སོའི་བར་གྱི་འཁྲུག་རྩོད་འདུམ་འགྲིག་དང་། འབྱུང་འགྱུར་མི་མང་གིས་ཞི་བདེ་ལྷིང་འཇགས་ཀྱི་འཚོ་བ་རོལ་ཐབས་བཅས་ཀྱི་སྐོར་ནས་བསླབ་བྱ་མང་པོ་ཐོབ་ཡོད་པ་དང་། སྤྱིར་རྒྱ་གར་ནང་ཆོས་ལུགས་གྲུབ་མཐའ་མང་པོ་ཡོད་ནའང་འདི་གར་མི་མང་གི་འཚོ་གནས་ཞི་བདེ་ལྷིང་འཇགས་ཡིན་པ་དང་། ཨ་ཧྥི་གྷ་ནེ་སི་ཐན་ནང་ཁ་ཆེ་མི་རིགས་གཅིག་དང་ཁ་ཆེ་ཆོས་ལུགས་གཅིག་མ་གཏོགས་གཞན་མེད་ནའང་། ཨ་ཧྥི་གྷ་ནེ་སི་ཐན་ནང་ད་དུང་མུ་མཐུད་ཟིང་འཁྲུག་འབྱུང་མུས་ཡིན་སྟབས། ངས་༧གོང་ས་ཏཱ་ལའི་བླ་མའི་བྱམས་བརྩེ་ཞི་བདེའི་བསླབ་བྱ་འཁྱེར་ཏེ་ཕྱིར་ཨ་ཧྥི་གྷ་ནེ་སི་ཐན་ནང་ལོག་རྒྱུ་ཡིན་ཞེས་སོགས་བརྗོད་སོང་།
ཨ་རིའི་ཞི་བདེ་ལྷན་ཚོགས་ཀྱི་ཚོགས་མི་འཛམ་གླིང་ཤར་ནུབ་ཀྱི་གཞོན་སྐྱེས་དབུ་ཁྲིད་ཚོའི་ཉམས་མྱོང་དང་བསམ་ཚུལ་བརྗེ་ལེན་གྱི་བགྲོ་གླིང་འདིའི་དགོས་དམིགས་གཙོ་བོ་དེང་སྐབས་འཛམ་གླིང་སྟེང་གི་འཁྲུག་རྩོད་མང་ཤོས་དེ་གཞོན་སྐྱེས་ཚོའི་ཁྲོད་དུ་ཡོང་གི་ཡོད་པ་དང་། ལྷག་པར་དུ་སེ་རི་ཡ་དང་ཨེ་རག ཨ་ཧྥི་གྷ་ནེ་སི་ཐན་དང་པ་ཀི་སི་ཐན། ནེ་གྷི་རེ་ཡ་དང་དཀྱིལ་ཤར་ཡུལ་གྲུ་ཁག་ཏུ་འབྱུང་བཞིན་པའི་ཆོས་ལུགས་གྲུབ་མཐའ་དང་འཇིགས་སྐུལ་དྲག་སྤྱོད་སོགས་ཀྱི་འཁྲུག་རྩོད་ཁྲོད་དུ་གཞོན་སྐྱེས་བརྒྱ་ཆ་ ༨༠ ལ་ཤི་རྨས་ཐེབས་ཡོད་པ་དང་། གཞོན་སྐྱེས་དེ་ཚོ་ལོ་ན་ ༢༢ ལ་མ་སོན་པ་ཤ་སྟག་ཡིན་སྟབས། ཨ་རིའི་ཞི་བདེ་ལྷན་ཚོགས་ཀྱི་ཚོགས་མི་འཛམ་གླིང་ཤར་ནུབ་ཀྱི་གཞོན་སྐྱེས་དབུ་ཁྲིད་མང་པོས་བོད་མིའི་སྐྱབས་མགོན་༧གོང་ས་རྒྱལ་བ་རིན་པོ་ཆེ་མཆོག་དང་ལྷན་དུ་སོ་སོའི་ཉམས་མྱོང་དང་བསམ་ཚུལ་བརྗེ་ལེན་བརྒྱུད། འབྱུང་འགྱུར་འཛམ་གླིང་སྟེང་དུས་ཟིང་ཆེ་བའི་རྒྱལ་ཁབ་ཁག་ནང་གི་མི་ཤི་ཁྲག་སྦྱོར་གྱི་རྩོད་རྙོག་དང་དམག་འཁྲུག་ཞི་འཇགས་དང་ཞི་བདེ་ཡོང་ཐབས་སྐོར་ཡིན་པ་དང་། ཐེངས་འདིའི་བགྲོ་གླེང་ལྷན་ཚོགས་སྟེང་དཀྱིལ་ཤར་ཡུལ་གྲུ་དང་ཨ་ཧྥི་རེ་ཁ། ལྷོ་ཤར་ཨེ་ཤེ་ཡ་བཅས་ནས་ཕེབས་པའི་གཞོན་སྐྱེས་དབུ་ཁྲིད་ལོ་ན་ ༢༠ ནས་ ༣༠ སོན་པ་ཁག་ཅིག་མཉམ་ཞུགས་བྱས་ཡོད་པ་དང་། ཁོ་ཚོས་སོ་སོའི་རྒྱལ་ནང་གི་ཕོ་མོ་དབྱེ་འབྱེད་དང་ཆོས་ལུགས་གྲུབ་མཐའ་འཐེན་འཁྱེར། ཤོག་ཁག་ཕན་ཚུན་བར་གྱི་འཁྲུག་རྩོད་སོགས་འདུམ་འགྲིག་དང་མ་འོངས་ཞི་བདེ་བརྟན་ལྷིང་ཡོང་ཐབས། ལྷག་པར་དུ་ཡུལ་དུས་ཀྱི་ཟིང་འཁྲུག་དང་འགྲོ་བ་མིའི་ཐོབ་ཐང་། ཡུལ་བྱོལ་སྐྱབས་བཅོལ་བཅས་ཀྱི་དཀའ་རྙོག་ཐད་རོགས་སྐྱོར་གྱི་ལས་འཆར་རབ་དང་རིམ་པ་སྤེལ་མུས་ཡིན་འདུག
གཞན། ཨ་རིའི་ཞི་བདེ་ལྷན་ཚོགས་ཞེས་པའི་རང་དབང་གི་ཚོགས་པ་འདི་ནི་ཕྱི་ལོ་ ༡༩༨༤ ལོར་ཨ་རིའི་རྒྱལ་དམངས་ལྷན་ཚོགས་ཀྱི་ངོས་ནས་གསར་འཛུགས་བྱས་པ་དང་། ད་ལྟའི་བར་འཛམ་གླིང་ཤར་ནུབ་ཀྱི་རྒྱལ་ཁབ་ཁག་ནས་ཚོགས་མི་ ༣༠༠ ལྷག་མཉམ་ཞུགས་བྱས་ཡོད་འདུག
གསར་འགོད་པ། པདྨ་རྒྱལ།
