༧གོང་ས་མཆོག་གིས་འཛམ་གླིང་དབུ་འཁྲིད་རྣམ་པས་བོད་མིའི་འཚེ་མེད་ཞི་བའི་འཐབ་རྩོད་ལྟ་བུར་རྒྱབ་སྐྱོར་མ་གནང་བར་དཀའ་ངལ་དང་རྩོད་རྙོག་རྣམས་འཚེ་བའི་ལམ་ནས་སེལ་ཐབས་བྱས་ཚེ་མི་མང་ལ་བརྡ་ལན་ལོག་པ་སྤྲོད་ཉེན་ཡོད་སྐོར་གསུངས་འདུག
དེ་རིང་༧གོང་ས་མཆོག་གིས་ཉི་ཧོང་གི་གྲོང་ཁྱེར་ཨོ་ས་ཀའི་ (Osaka )རྒྱལ་སྤྱིའི་ཚོགས་ཁང་ཆེན་མོའི་ནང་དུ། ཉི་ཧོང་གི་གཙོས་ཐའེ་ཝན་དང་སོག་པོ། ཀོ་རི་ཡ། རྒྱ་ནག་སྐམ་ས་སོགས་རྒྱལ་ཁབ་ ༧ ནས་བཅར་བའི་ནང་པ་དང་ནང་ཆོས་དོན་གཉེར་བ་ ༢༧༠༠ ཡས་མས་ལ་རྒྱལ་སྲས་ཞི་བ་ལྷས་མཛད་པའི་སྤྱོད་འཇུག་ཆེན་མོའི་ཆོས་འབྲེལ་དབུ་འཛུགས་གནང་ཡོད་འདུག
ཁ་སང་ཕྱི་ཚེས་ ༩ ཉིན་ཉི་ཧོང་གི་གྲགས་ཅན་བརྙན་འཕྲིན་གསར་འགྱུར་ཚན་པ་(NHK )ཡི་དྲི་བར་བཀའ་ལན་གནང་སྐབས། ༸སྐུའི་ཡང་སྲིད་སྐོར་ལ་བཀའ་འདྲི་ཞུས་པར་ཁོང་གིས། ཡང་སྲིད་སྐོར་དེ་ངོས་ཀྱིས་ཕྱི་ལོ་ ༡༩༦༩ ནས་ཏཱ་ལའི་བླ་མའི་བླ་བྲང་དེ་མུ་མཐུད་ནས་གནས་དང་མ་གནས་ཟེར་བ་དེ་བོད་མི་མང་གིས་ཐག་གཅོད་བྱེད་དགོས་པ་ཞིག་རེད། ཅེས་བརྗོད་པ་ཡིན། འོན་ཀྱང་དེང་སྐབས་༸རྒྱལ་བའི་ཡང་སྲིད་སྐོར་དེ་ངོས་ལས་རྒྱ་ནག་གཞུང་ལ་དོ་སྣང་ཆེ་བ་ཡོད་པ་ལྟ་བུ་འདུག དེར་ངོས་རང་ཡ་མཚན་སྐྱེ་བཞིན་འདུག གང་ཡིན་བརྗོད་ན་རྒྱ་ནག་གཞུང་གིས་ཏཱ་ལའི་བླ་མའི་ཡང་སྲིད་སྐོར་ཐེ་བྱུས་བྱེད་རྒྱུ་དེ་གཙོ་བོ་ཆབ་སྲིད་ཀྱི་དགོས་དབང་ཁོ་ན་ཡིན་པ་ལས་ཆོས་དད་རྩ་བ་ནས་མ་རེད། མན་ཇུ་གོང་མའི་སྐབས་ཏཱ་ལའི་བླ་མའི་ཡང་སྲིད་ལ་ཐེ་བྱུས་བྱས་པའི་གནས་སྟངས་བྱུང་བ་ནི་དེའི་ཚེ་དེའི་དུས་སུ་བོད་དང་ཆོས་ཡོན་གྱི་འབྲེལ་བའི་ཐོག་ནས་བསམ་ཤེས་བྱེད་ཐུབ་པའི་གནས་སྟངས་ཤིག་ཡོད། འོན་ཀྱང་དེང་སྐབས་རྒྱ་ནག་དམར་པོའི་རིང་ལུགས་ཀྱིས་ཆོས་མེད་སྨྲ་བ་ཡིན་ཟེར་བཞིན་ཡོད་པས་༸རྒྱལ་བའི་ཡང་སྲིད་སྐོར་ལ་བྱུས་གཏོགས་གང་ཡང་མེད། དེར་བརྟེན་ངོས་ཀྱིས་རྒྱུན་ལྡན་རྩེད་མོ་དང་སྦྲགས་རྒྱ་ནག་དམར་པོའི་སྲིད་གཞུང་གིས་དང་ཐོག་མའོ་ཙེ་ཏུང་གི་ཡང་སྲིད་བཙལ་ནས་རིམ་བཞིན་དམར་པོའི་འགོ་ཁྲིད་གཞན་གྱི་ཡང་སྲིད་བཙལ་རྗེས་གཞི་ནས་ཏཱ་ལའི་བླ་མའི་ཡང་སྲིད་སྐོར་ལ་བྱུས་གཏོགས་བྱས་ན་འོས་འཚམ་ཞིག་ཆགས་རྒྱུ་རེད་ཅེས་ཤོད་ཀྱི་ཡོད། སྤྱིར་བོད་བརྒྱུད་ནང་བསྟན་འཛིན་སྐྱོང་སྤེལ་གསུམ་ཟེར་བ་དེ་གང་ཟག་སྒེར་པ་གཅིག་ལ་རག་ལུས་མེད། སངས་རྒྱས་བཅོམ་ལྡན་འདས་དང་ན་ལེནྡྲའི་ལོ་པཎ་རྣམས་ཀྱི་དག་ཐེར་མཛད་པའི་བསྟན་པ་འདི་ཡང་སྲིད་ལམ་ལུགས་མེད་ནའང་བསྟན་པ་མུ་མཐུད་གནས་ཐུབ་པ་བྱུང་ཡོད། སངས་རྒྱས་ཀྱི་ཆོས་ལ་སློབ་སྦྱོང་མཐིལ་ཕྱིན་པ་བྱས་ནས་རང་རྒྱུད་ལ་ཐོས་བསམ་སྒོམ་གསུམ་ཡ་མ་བྲལ་བར་བཤད་སྒྲུབ་ཟུང་འབྲེལ་གྱི་སྒོ་ནས་བྱུང་བ་ཡིན་ན་བསྟན་པ་མ་ཉམས་པར་གནས་ཐུབ་རྒྱུ་རེད། ཅེས་དང་།
ཡང་ཁོང་གིས། ངོས་རང་ཇི་སྲིད་ནམ་འཚོའི་བར་འཚེ་མེད་ཞི་བའི་ཉམས་ལེན་མཐའ་གཅིག་ཏུ་བྱེད་རྒྱུ་ཡིན། གང་ཡིན་བརྗོད་ན་འཚེ་མེད་ཞི་བའི་ལམ་འབའ་ཞིག་ལ་བརྟེན་ནས་ཁོར་ཡུག་བཟང་པོ་ཞིག་སྐྲུན་ཐུབ་རྒྱུ་རེད། དེར་བརྟེན་འཛམ་གླིང་དབུ་ཁྲིད་རྣམ་པས་འཚེ་མེད་ཞི་བའི་ལམ་ནས་རྩོད་རྙོག་སེལ་ཐབས་གནང་རྒྱུར་ངོས་ཀྱིས་འབོད་སྐུལ་ཞུ་རྒྱུ་ཡིན། དེ་ལྟར་མིན་པར་འཛམ་གླིང་དབུ་ཁྲིད་རྣམ་པས་བོད་མིའི་འཚེ་མེད་ཞི་བའི་འཐབ་རྩོད་ལྟ་བུར་རྒྱབ་སྐྱོར་མ་གནང་བར་དཀའ་ངལ་དང་རྩོད་རྙོག་རྣམས་འཚེ་བའི་ལམ་ནས་སེལ་ཐབས་བྱས་ཚེ། འཚེ་མེད་ཞི་བའི་ཐབས་ལམ་ཐོག་ནས་དཀའ་རྙོག་སེལ་ཐུབ་རྒྱུ་མ་རེད་སྙམ་པའི་བརྡ་ལན་ལོག་པ་ཞིག་མི་མང་ལ་སྤྲོད་ཉེན་ཡོད།
སྤྱིར་སེམས་ནང་བདེ་སྐྱིད་ཡོང་བར་ཤེས་ཡོན་གྱིས་གྲོགས་བྱེད་ཐུབ་ཀྱང་དེང་སྐབས་ཤེས་ཡོན་ལམ་ལུགས་ནང་གཙོ་བོ་ཕྱི་དངོས་པོ་འཛུགས་སྐྲུན་ཡར་རྒྱས་ཇི་ལྟར་གཏོང་དགོས་པ་དེར་གཙིགས་ཆེར་འཛིན་པར་བརྟེན་དེང་དུས་ཤེས་ཡོན་ལམ་ལུགས་ནང་མ་འདང་པའི་ཆ་ཞིག་ཡོད། དེར་བརྟེན་ཤེས་ཡོན་ལམ་ལུགས་དེ་ཕྱི་དངོས་པོ་རྐྱང་པ་གཙོ་བཟུང་མ་བྱས་པར་ནང་གཤིས་རྒྱུད་དང་འབྲེལ་བའི་རིན་ཐང་དེ་དག་གོང་མཐོར་གཏོང་ཐབས་བྱས་ཚེ་ཤེས་ཡོན་ལམ་ལུགས་ཆ་ཚང་བ་ཞིག་ཡོང་ཐུབ། དེའི་ཐོག་ནས་བྱིས་གསོ་ཁང་ནང་དུའང་བྱམས་བརྩེའི་ཉམས་ལེན་གལ་ཆེ་ཡིན་སྐོར་སློབ་གསོ་སྤྲད་ནས་རིམ་བཞིན་མཐོ་སློབ་མ་ཐོན་བར་ནང་གི་བསམ་བློ་དང་འབྲེལ་བའི་བཟང་པོའི་རིན་ཐང་དེ་དག་སྐོར་ལ་སློབ་གསོ་སྤྲོད་དགོས། དེ་ནི་གཙོ་བོ་ཕྲུ་གུ་དེར་རིག་གསར་གྱི་ཤེས་ཡོན་རྐྱང་པ་ཙམ་མིན་པར་དེའི་ཁར་མི་བཟང་པོ་ཞིག་ཇི་འདྲ་བཟོ་དགོས་པ་དང་། དེ་ནས་གང་ཟག་སྒེར་ཡག་པོ་ཞིག་བྱུང་བ་ཡིན་ན་ཁྱིམ་ཚང་སྐྱིད་པ་ཞིག་ཡོང་ཐུབ། ཁྱིམ་ཚང་སྐྱིད་པ་ཞིག་བྱུང་ན་སྤྱི་ཚོགས་དང་དེ་ནས་རྒྱལ་ཁབ་སོགས་རིམ་བཞིན་འགྲོ་བ་མི་སྡེའི་སྤྱི་ཚོགས་ཁྱོན་ཡོངས་བདེ་སྐྱིད་ཕུན་སུམ་ཚོགས་པ་ཞིག་བཟོ་ཐུབ་རྒྱུ་རེད། ཅེས་བཀའ་ལན་བསྩལ་འདུག
ཡང་དབུ་མའི་ལམ་གྱི་སྐོར་ལ་བཀའ་འདྲི་ཞུ་སྐབས་ཁོང་གིས། བོད་ཀྱི་གནད་དོན་གསལ་ཆེད་དངོས་ཡོད་གནས་ཚུལ་དང་འཚམས་པའི་ཐབས་ལམ་ཉག་གཅིག་དེ་དབུ་མའི་ལམ་གྱི་སྲིད་བྱུས་དེ་ཡིན། སྲིད་བྱུས་འདི་གཉིས་སྨན་གྱི་སྲིད་བྱུས་ཤིག་ཡིན། ངོས་ཀྱི་ཡུ་རོབ་སྤྱི་མཐུན་རྒྱལ་ཁབ་ཀྱི་རྣམ་པ་དེར་དངོས་གནས་ཡིད་སྨོན་སྐྱེ་བཞིན་འདུག རྒྱལ་ཁབ་ཚོས་སྒེར་གྱི་ཁེ་ཕན་ཆེད་རང་གི་བདག་དབང་བློས་གཏོང་བྱས་ནས་སྤྱི་པའི་སྒྲིག་འཛུགས་ཤིག་ནང་མཉམ་ཞུགས་བྱེད་བཞིན་ཡོད། དེང་སྐབས་གཅིག་ལ་གཅིག་རྟེན་དགོས་པའི་གོ་ལ་སྤྱི་ཡོངས་ཀྱི་གནས་སྟངས་འོག་རྒྱལ་ཁབ་སུ་ཡིན་རུང་གཞན་ལ་མ་བརྟེན་པར་རང་ཉིད་ཁེར་རྐྱང་འཚོ་ཐབས་བྲལ། བོད་ལ་མཚོན་ན་ས་ཆ་གཞི་ཡངས་ཤིང་རྒྱ་ཆེ་ལ་གཏེར་དངོས་ཐོན་སྐྱེད་ཕུན་སུམ་ཚོགས་པ་ཡོད། འོན་ཀྱང་དཔལ་འབྱོར་ཡར་རྒྱས་གཏོང་བར་རྒྱ་ནག་གི་རོགས་རམ་ལ་བརྟེན་དགོས་པ་ཆགས་ཡོད། ཉི་ཧོང་དང་འཇར་མན་ལྟ་བུར་མཚོན་ན་དེ་སྔ་འཛམ་གླིང་དམག་ཆེན་གཉིས་པའི་སྐབས་རྡུལ་ཕྲན་མཚོན་ཆའི་གོད་ཆག་ཧ་ཅང་ཚབས་ཆེ་ཕོག་ཡོད་ཀྱང་། འཁོན་སེམས་མ་འཆང་པར་སྙིང་ལ་རུས་པ་བཅུག་ནས་དཀའ་ལས་བརྒྱབ་པའི་འབྲས་བུར་དེང་སྐབས་འཛམ་གླིང་ནང་ཡར་རྒྱས་ཆེ་ཤོས་ཀྱི་རྒྱལ་ཁབ་ཆགས་ཐུབ་ཡོད། རླབས་ཆེན་རེད། ཕྱོགས་མཚུངས་བོད་མི་ཚོས་ཀྱང་དངོས་ཡོད་གནས་ཚུལ་གཞི་ལ་བཞག་ནས་འགྲོ་རྒྱུ་ཧ་ཅང་གལ་ཆེན་པོ་རེད། དངོས་ཡོད་གནས་ཚུལ་གཞི་ལ་བཞག་ནས་བོད་མིའི་ཆོས་དང་རིག་གཞུང་ཕྱུག་པོ་ཡོད་པ་དེ་དག་རང་སྐྱོང་གི་གནས་བབ་འོག་བདག་གཅེས་ཐུབ་པ་ཞིག་བྱུང་ན་ཕྱོགས་གཉིས་ཀར་བསམ་བློ་གཏོང་ས་ཞིག་ཡོད། ཅེས་སོགས་བཀའ་ལན་གནང་འདུག
ཡང་འབྱུང་འགྱུར་གྱི་ཏཱ་ལའི་བླ་མ་སུ་རེད་ཅེས་པའི་དྲིི་བར་བཀའ་ལན་གནང་དོན། སུས་ཤེས་རྒྱུ་རེད། ངོས་ལ་མཚོན་ན་ད་ཆ་བོད་མིའི་ཆབ་སྲིད་ཀྱི་འགན་དབང་ནས་བགྲེས་ཡོལ་ཆ་ཚང་ཞུས་ཟིན་པ་མ་ཟད། ཏཱ་ལའི་བླ་མའི་བླ་བྲང་གིས་བོད་མིའི་ཆོས་ཕྱོགས་ཙམ་མ་ཟད། ཆབ་སྲིད་ཐོག་ལའང་ཐེ་བྱུས་བྱ་རྒྱུའི་ལམ་སྲོལ་དེ་ཡང་དགའ་ཞིང་སྤྲོ་ཞིང་སྤོབས་པ་དང་བཅས་དང་བླངས་ཐོག་ནས་ད་ཆ་མཇུག་སྒྲིལ་ཟིན་པ་ཡིན། དེར་བརྟེན་འབྱུང་འགྱུར་ཏཱ་ལའི་བླ་མ་ནི་ས་སྐྱ་ཁྲི་འཛིན་དང་ཀརྨ་པ་བཞིན་ཆོས་ཕྱོགས་ཀྱི་མི་སྣ་ཁོ་ན་ཆགས་རྒྱུ་རེད། མ་འོངས་པར་ཏཱ་ལའི་བླ་མའི་ཡང་སྲིད་མ་ཕེབས་ཀྱང་དཀའ་ངལ་འཕྲད་རྒྱུ་མ་རེད། དཔེར་ན་སྟོན་པ་བཅོམ་ལྡན་འདས་དང་མགོན་པོ་ཀླུ་སྒྲུབ་ཀྱི་ཡང་སྲིད་མེད། འོན་ཀྱང་ཁོང་རྣམ་པས་བརྩམས་པའི་བཀའ་བསྟན་དེ་དག་ལོ་ངོ་བརྒྱ་ཕྲག་གི་རྗེས་སུའང་མུ་མཐུད་གནས་ཡོད། ཅེས་བཀའ་ལན་གནང་ཡོད་པ་རེད།
པདྨ་མཚོས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།
༅༅། གངས་རི་ར་བས་བསྐོར་བའི་བསིལ་ལྗོངས་ཡུལ།། སྐྱེ་མཆོག་དུ་མའི་འཁྲུངས་ཡུལ་གངས་ཅན་ལྗོངས།།
སྤྲོ་སྐྱིད་ལྡན་པའི་རིགས་མཐུན་ཕོ་མོ་དང།། རྒན་གཞོན་ཚེ་ཐག་རིང་བའི་སྨོན་འདུན་ཞུ།།
འདི་དང་བར་དོ་ཕྱི་མ་གསུམ། མགོན་ཁྱེད་ཀྱི་ཐུགས་རྗེའི་འཛིན་པ་ཞུ།།
ཁེྱེད་ཀྱི་བཀའ་དྲིན་ནམ་ཡང་བརྗེད་མི་སྲིད།། ནམ་ཡང་མི་བརྗེད་སེམས་གཏིང་ཉར་བཞིན་ཡོད།།