དེ་རིང་ནས་མ་འོངས་པའི་ཉིན་གསུམ་རིང་དྷ་རམ་ས་ལར་བཙན་བྱོལ་བོད་མིའི་འཕྲོད་བསྟེན་སྐོར་ལ་དམིགས་བསལ་ཚོགས་ཆེན་ཞིག་འཚོགས་བཞིན་ཡོད་པ་དང་། ཚོགས་འདུའི་སྟེང་ད་བར་བཙན་བྱོལ་བོད་མིའི་འཕྲོད་བསྟེན་ཐོག་འཐུས་ཤོར་གང་དུ་ཕྱིན་ཡོད་པ་དང་འཕྲོད་བསྟེན་ལས་བྱེད་ཚོའི་བཟང་སྤྱོད་བཅས་ཀྱི་ཐོག་གོ་བསྡུར་གནང་རྒྱུ་ཡིན་འདུག
དེ་རིང་སྔ་དྲོའི་ཆུ་ཚོད་ ༩།༣༠ སྟེང་བཞུགས་སྒར་ཉེ་འཁྲིས་དབུས་སྣེ་ལེན་ཁང་གི་ཚོགས་ཁང་དུ། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག བཙན་བྱོལ་བོད་མིའི་འཕྲོད་བསྟེན་ཡར་རྒྱས་གཏོང་ཕྱོགས་དང་འབྲེལ་བའི་སྐོར་ལ་ཉིན་གསུམ་རིང་གི་དམིགས་བསལ་ཚོགས་ཆེན་ཞིག་དབུ་འཛུགས་གནང་སོང་། ཚོགས་ཆེན་དབུ་འཛུགས་སྟེང་སྲིད་སྐྱོང་བློ་བཟང་སེང་གེ་མཆོག་ཕེབས་ཡོད་པ་དང་། གཞན་བཙན་བྱོལ་བོད་མིའི་འཕྲོད་བསྟེན་ཁྱབ་ཁོངས་རྒྱ་གར་གྱི་ས་གནས་ ༢༦ དང་བལ་ཡུལ་གྱི་ས་གནས་ ༡༠ བཅས་ཀྱི་མི་གྲངས་ ༡༢༩ ཙམ་མཉམ་ཞུགས་གནང་འདུག
ཚོགས་འདུའི་གྲོས་གཞི་ཁག་ནི། ༧ཉེ་ལམ་གོང་ས་མཆོག་གིས་བཀའ་ནན་གནང་བ་ལྟར། མི་མང་ལ་འཕྲོད་བསྟེན་ཞབས་ཞུ་ཡར་རྒྱས་གཏོང་ཐབས་སྤྱི་དང༌། ལྷག་པར་ནད་རིཌ་སྔོན་འགོག་ཐོག་འཐུས་ཤོར་གང་དུ་ཕྱིན་ཡོད་མེད་དང༌འཐུས་ཤོར་གྱི་རྒྱུ་རྐྱེན་གང་ཡིན་ལ་གོ་བསྡུར། སྨན་ཁང་དུ་བསྟེན་གཏུགས་བྱེད་མཁན་རྣམས་ནད་ན་ཚའི་སྡུག་བསྔལ་གྱིས་མནར་ནས་སྨན་ཁང་བསྟེན་མཁན་ཤ་སྟག་ཡིན་པར་བརྟེན་འཕྲོད་བསྟེན་འགོ་ལས་ཡོངས་ནས་རྣམ་ཀུན་མི་མང་དང་ལྷག་པར་ནད་པ་དང་མཉམ་ཡ་རབས་བཟང་སྤྱོད་དང་བྱམས་སྙིང་རྗེའི་སྒོ་ནས་གཅེས་སྐྱོང་བྱེད་ཕྱོགས་སོགས་ཡིན་འདུག
ཚོགས་འདུའི་ཐོག་མར་འཕྲོད་བསྟེན་དྲུང་ཚབ་འཆི་མེད་རིག་འཛིན་ལགས་ཀྱིས་ཉེ་ལམ་༧གོང་ས་མཆོག་གིས་བཙན་བྱོལ་བོད་མིའི་འཕྲོད་བསྟེན་ཐོག་བཀའ་བསླབ་གནང་བའི་སྐོར་དང་ཐེངས་འདིའི་ཚོགས་ཆེན་གྱི་དགོས་དམིགས་སོགས་ངོ་སྤྲོད་གནང་རྗེས། འཕྲོད་བསྟེན་བཀའ་བློན་ཚེ་རིང་དབང་ཕྱུག་མཆོག་གིས། དབུས་འཕྲོད་བསྟེན་ལས་ཁུངས་ནས་གཙོ་བོ་ཡར་རྒྱས་གཏོང་རྒྱུ་དོན་ཚན་ཁག་ལྔ་ཆགས་ཀྱི་ཡོད་པ་དང་། དང་པོ་འཕྲོད་བསྟེན་གྱི་གྲངས་ཐོ་དེ་འཐུས་ཚང་ཚད་ལྡན་ཚན་རིག་དང་མཐུན་པ་ཞིག་དགོས་པ་གལ་ཆེན་པོ་རེད། བཙན་འབྱོལ་བོད་མི་འབུམ་གཅིག་ཙམ་ལས་མེད་པའི་སྤྱི་ཚོགས་ཆུང་ཆུང་འདིའི་ནང་ལ་འཕྲོད་བསྟེན་འཛིན་སྐྱོང་ཁག་མང་པོ་ཆགས་ཡོད་སྟབས། ང་ཚོ་སྒྲིག་འཛུགས་ཀྱི་ངོས་ནས་འཕྲོད་བསྟེན་གྲངས་ཐོ་ལས་གཞི་དེ་ཚགས་ཚུད་གཏོང་རྒྱུ་དང་། ད་ཆར་བོད་ལུགས་ཀྱི་འཕྲོད་བསྟེན་ཁྱབ་ཁོངས་སྨན་རྩིས་ཁང་གི་བོད་སྨན་ཁང་ ༥༥ ཡོད་པ་རེད། ཕྱི་ལུགས་ཀྱི་འཕྲོད་བསྟེན་ཁྱབ་ཁོངས་ཀྱི་སྨན་ཁང་ཁག་གི་གྲངས་ཐོ་དེ་སྨན་ཁང་དུ་ཡོང་མཁན་ནད་པ་ཚོ་མ་གཏོགས་གཞན་ཆ་ཚང་བ་ཞིག་ད་ཆར་བསླེབས་ཐུབ་མི་འདུག འཕྲོད་བསྟེན་གྲངས་ཐོ་དེ་ང་ཚོས་ཚད་ལྡན་འཐུས་ཚང་ཞིག་ཡོང་ཐུབ་པ་བྱས་ན། མ་འོངས་པར་སྔོན་འགོག་ལས་འཆར་ཆེ་རུ་གཏོང་བ་དང་བོད་མིའི་སྒྲིག་འཛུགས་ཀྱི་སྲིད་སྐྱོང་གཙོས་པའི་བཀའ་ཤག་འཕྲོད་བསྟེན་ལས་བྱེད་ཚོར་ནད་ཚ་ག་རེ་སྒང་ལ་ཐག་ཆོད་དང་། ང་ཚོས་ག་རེ་ཡར་རྒྱས་གཏང་དགོས་པ། ནད་ཚ་ག་རེ་སྒང་ལ་དཀའ་ངལ་ཆེན་པོ་འདུག ཏན་ཏན་འགན་ཆེན་པོ་ཞིག་བསླེབ་ཐུབ་ཀྱི་རེད་བསམ་གྱི་འདུག ཅེས་སོགས་གསུངས་སོང་།
དེའི་རྗེས་སྲིད་སྐྱོང་བློ་བཟང་སེང་གེ་མཆོག་གིས་གསུང་བཤད་གནང་དོན། ཉེ་ཆར་༧གོང་ས་མཆོག་ནས་བཀའ་སློབ་ནན་པོ་ཕེབས་པ་དེ་ཡིག་ངག་གཉིས་ཐོག་ཡོད་པ་རེད། དེ་གལ་ཆེན་པོ་ཞེ་དྲགས་ལ་བརྩི་རོགས་གནོངས། ང་ཚོ་བཀའ་ཤག་ནས་གལ་ཆེན་པོར་བརྩི་ཡི་ཡོད། དེ་ཡིད་ལ་བཅངས་པའི་ཐོག་ནས་ལག་བསྟར་གནང་བ་ག་རེ་ཡོད་པ་དེའི་སྒང་ལ་རྣམ་པ་ཚོས་བཀའ་བསྡུར་གནང་རྒྱུ་རེད། ལོ་བཞི་དང་ཕྱེད་ལྷག་ཅིག་རིང་ལ་ང་འདུ་དེ་འདྲར་ཐེངས་མང་བཅར་མྱོང་། མཐའ་མ་དེ་ལ་ལག་བསྟར་ཆོག་པའི་འཆར་གཞི་གསར་བ་ག་རེ་འདུག་ཟེར་ཡོང་དུས། བཀའ་མོལ་མང་པོ་གསུང་བའི་གྲས་ནས་བརྒྱ་ཆ་བཅུ་བཅོ་ལྔ་ནས་ཉེར་ལྔ་ཡོད་དུས་ཡག་ཤོས་རེད། བརྒྱ་ཆ་ ༧༥ ནས་ ༨༠ ཧ་ལམ་རང་འཇགས་དེ་གསུང་ཡོང་གི་འདུག ད་ལྟའི་བར་ཚོགས་ཆེན་ཚོགས་ཆུང་ནང་ང་རང་འདོད་པ་ཁེངས་ཤོས་དེ་ག་རེ་བྱུང་སོང་ཟེར་ན། ཕལ་ཆེར་ཟླ་བ་བརྒྱད་དགུའི་སྔོན་ལ་གཙུག་ལག་ཁང་དུ་འཛོམས་ནས་བོད་མིའི་སྒྲིག་འཛུགས་ཀྱི་སྲིད་བྱུས་ཉར་སྟངས་དང་ལག་བསྟར་བྱེད་སྟངས་འགྲིག་མ་འགྲིག་ག་རེ་ཡོད་པའི་སྐོར་ལ་བསམ་ཚུལ་མང་པོ་ཕེབས་སོང་། སྙན་ཐོ་དེའི་ནང་ལ་དངོས་གནས་བརྒྱ་ཆ་ ༥༠ ལས་ལྷག་ཅིག་གསར་བ་རེད། ལག་བསྟར་བྱེད་ཐུབ་པ་ཞིག་རེད་བསམ་པ་བྱུང་། ད་ལྟའི་བར་ང་རང་འདོད་པ་ཁེངས་ཤོས་དེ་བྱུང་སོང་། དེ་རིང་འདིར་མི་ཚོགས་མང་པོ་འཛོམས་པའི་སྐབས་ལ་ངས་ཁ་རུ་ཁ་ཐུག་གིས་རེ་འབོད་ཞུ་རྒྱུར། གསུང་བཤད་དང་བཀའ་སློབ་རྒྱུན་རིང་མི་གནང་བར། དངོས་སུ་ལག་བསྟར་བྱ་རྒྱུའི་ལས་འཆར་ག་རེ་ཡོད་པ་དང་འཆར་གཞི་ག་རེ་ཡོད་པ་དེའི་སྒང་ལ་དགོངས་ཚུལ་མང་པོ་གསུང་རོགས་གནོངས། ཞེས་སོང་གསུང་སོང་།
ཁོང་གིས་དེ་རིང་རྣམ་པ་ཚོ་འདིར་ཕེབས་དོན་སྤྱི་ཡོངས་འཕྲོད་བསྟེན་ལས་ཁུངས་སྤྱི་དང་ལས་བྱེད་སྤྱིའི་དོན་དག་རེད་དེ། གཙོ་བོ་ནད་ཚ་སྔོན་འགོག་ཆེད་དུ་༧གོང་ས་མཆོག་ནས་བཀའ་སློབ་མང་པོ་ཕེབས་ཡོད་སྟབས། དེའི་ཐོག་ལ་ག་རེ་བྱ་རྒྱུ་འདུག བོད་སྨན་དང་ཕྱི་ལུགས་ཀྱི་སྨན་ཐོག་ནས་ག་རེ་བྱ་རྒྱུ་འདུག་དེ་རེད། ཁ་སང་༧གོང་ས་མཆོག་གནམ་ཐང་ལ་ཆིབས་བསྒྱུར་བསྐྱངས་པའི་སྐབས་སུ་ང་ཕེབས་བསུར་བཅར་བ་ཡིན། བཅར་བའི་སྐབས་སུ་ད་ལན་འཕྲོད་བསྟེན་ལས་ཁུངས་ནས་ནད་ཚ་སྔོན་འགོག་སྒང་ལ་ཚོགས་ཆེན་འཚོགས་རྒྱུ་ཡིན་ཞེས་སྙན་སེང་ཞུས་པའི་སྐབས་ལ། ཞེ་དྲགས་ཡག་པོ་རེད། ནད་ཚ་སྔོན་འགོག་དེ་ཞེ་དྲགས་གལ་ཆེན་པོ་འདུག་གསུངས་སོང་། གང་ཡིན་ཟེར་ན་༧གོང་ས་མཆོག་གིས། གཞིས་ཆགས་ཁག་དང་སློབ་གྲྭ་ག་བར་ཕྱིན་ན། ནད་པ་མང་པོར་འཕྲད་ཡོང་གི་འདུག དེའི་ནང་ལ་ལོ་ཆེན་པོ་དེ་འདྲ་མང་པོ་འདུག དེ་སྔོན་འགོག་གི་སྒང་ལ་ང་ཚོས་དོ་སྣང་མེད་པ་དང་ལག་བསྟར་མ་བྱས་པའི་རྐྱེན་རེད། རྒྱུད་སྨད་ཀྱི་བླ་མ་དབུ་མཛོད་ཁོང་རེ་བ་ཆེན་པོ་ཞེ་དྲགས་གནང་ས་ཞིག་ཡིན་ཡང་། ཁོང་ཉེ་བའི་ཆར་དགོངས་པ་བརྫོགས་འདུག དེ་ག་རེ་རེད་ཟེར་ན་ལོ་ཆུང་ཆུང་དེ་འདྲ་ཞིག་དེ་ལྟར་དགོངས་པ་རྫོགས་པ་དེ་ནད་ཚ་སྔོན་འགོག་མ་ཤེས་པ་དང་། འཕྲོད་བསྟེན་ལ་དོ་སྣང་མ་བྱས་པའི་ཐོག་ནས་ཁོང་དགོངས་པ་རྫོགས་པ་རེད། རེ་བ་ཆེན་པོ་ཞེ་དྲགས་ཡོད་དེ་ད་ཁོང་དགོངས་པ་རྫོགས་པ་རེད། དེ་དང་དེ་བཞིན་ང་ཚོའི་སྤྱི་ཚོགས་ནང་མང་པོ་ཡོང་གི་འདུག ཁོང་ཞེ་དྲགས་ཡག་པོ་ཡོད་ཟེར་དུས་སྐབས་ལ། ཁོང་ན་ནས་གྲོངས་འགྲོ་བཞིན་ཡོད་པ་རེད། ང་རང་གི་ལོ་ཚོད་གཅིག་པ་དེ་འདྲར་ཐུག་ཡོང་གི་འདུག ཐུག་ནས་སྐད་ཆ་བཤད་སྐབས་གང་འཚམ་ཞིག་ནས་ད་ང་ཕྱི་ལོག་ལ་འགྲོ་དགོས་ཡོད། གང་ཡིན་ཟེར་ན་ང་གོན་པ་འཁྲུད་དུ་འགྲོ་དགོས་ཡོད། ང་ལ་ (TB) ནད་ཚ་ཡོད་ཟེར་གྱི་འདུག སློབ་སྦྱོང་དང་འཇོན་ཐང་ཡོད་པ་རེད། སྤྱི་ཚོགས་ནང་མཐོང་ཡོད་པ་དེ་འདྲ་ཞིག་གིས་ད་ང་གོན་པ་འཁྲུད་དུ་འགྲོ་དགོས་མ་གཏོགས་ང་ (TB) ནད་པ་ཡིན་ཟེར་ན་ག་འདྲ་ཆགས་སོང་ཞེས་༧གོང་ས་མཆོག་གིས་བཀའ་གནང་ཡོད་སྐོར་གསུངས་སོང་།
སྲིད་སྐྱོང་མཆོག་གིས་མུ་མཐུད་དུ། ང་ཚོའི་སྤྱི་ཚོགས་ནང་གི་ནད་ཚ་ལ་ཕྱོགས་གཅིག་ནས་བལྟས་ན། ང་ཚོའི་མཐུན་རྐྱེན་ཐོག་ནས་མ་འདང་བ་རེད་དམ་ཞེ་ན། དེ་འདྲ་རྩ་བ་ནས་མ་རེད། ང་ཚོ་ལས་སྐྱོ་བའི་རྒྱལ་ཁབ་དང་ལུང་པ་མང་པོ་ཡོད་པ་རེད། དངོས་གནས་བྱས་ན། འདས་པའི་མི་ལོ་ ༥༠ ནང་ནད་ཚ་ཉུང་དུ་འགྲོ་དགོས་ཀྱང་། ཉེ་ཆར་དགོན་སྡེ་ཁག་དང་སློབ་གྲྭ་ཁག་ནང་མང་དུ་འགྲོ་བཞིན་ཡོད་པའི་གནས་ཚུལ་འདུག འཕྲོད་བསྟེན་ལ་དང་དོད་བྱས་ཏེ་སྤྱི་ཚོགས་ཐང་པོ་ཡོད་ན། གཞུང་དེ་ཐང་པོ་ཡོང་གི་རེད་ལ། བོད་རིགས་ཐང་པོ་ཡོང་ན། བོད་ཀྱི་རྩ་དོན་རྩོད་པའི་སྒྲིག་འཛུགས་འདི་ཡང་ཐང་པོ་ཡོང་གི་རེད། ང་ཚོའི་སྤྱི་ཚོགས་ཐང་པོ་མེད་པ་དང་བོད་རིགས་ཐང་པོ་མེད་ན། རྩ་དོན་གྱི་སྒྲིག་འཛུགས་འདི་ཡང་མེད་པ་ཆགས་ཉེན་ཡོད། ཅེས་སོགས་གསུངས་སོང་།
གསར་འགོད་པ། པདྨ་རྒྱལ།
![Wang made a research tour in Tibet from July 19 to 22. [Xinhua/Liu Bin]](https://tibettimes.net/wp-content/uploads/2026/07/1784796471071092378-360x180.jpg)
གཏན་ཉིན་སློབ་གྲྭ་ཁག་དང་དགོན་སྡེ་ཁག་ནང་ན་ཚ་སྔོན་འགོག་ཆེད་དུ་ཞལ་ལག་དང་གཙང་སྦྲ་སོགས་ཡར་རྒྱས་གང་མང་གཏང་རྒྱུ་ལྷག་འདུག་པས་དེའི་ཐོག་འཕྲོད་བསྟེན་ལས་ཁུངས་ནས་གང་ཐུབ་རོགས་འདེག་གནང་ན་རྒྱལ་མཚན་ཆེའོ།
ཚོགས་ཆེན་ལམ་ལྷོང་ཡོང་བ་དང་དོན་འབྲས་སོན་པའི་རེ་བ་དང་། ཡིད་ཆེས་ཡོད། སྲིད་སྐྱོང་མཆོག་ནས་བཀའ་སློབ་ལེགས་པོ་གནང་ཞག ནུས་པ་མཉམ་སྤུང་བྱ་རྒྱུ་དུས་ལ་འབབ་ཞག