རྒྱ་ནག་གཞུང་གིས་བོད་ནང་གཏེར་ཁ་སྔོག་འདོན་བྱས་པའི་མི་ཚད་ས་གནས་མི་མང་ལ་རྡུང་རྡེག་གཏོང་གི་ཡོད་པའི་བྱ་སྤྱོད་དེ་དག་རྒྱལ་སྤྱིའི་ཁྲིམས་ལུགས་དང་རྒྱ་ནག་གི་རྩ་ཁྲིམས། བོད་པའི་ཆོས་དད་སོགས་ལའང་འགལ་བཞིན་ཡོད་སྟབས་ངེས་པར་དུ་ཁྲིམས་ལུགས་དང་མཐུན་པ་གནང་རོགས་ཟེར།
ཟླ་འདིའི་ཚེས་ ༨ ཉིན། གངས་སྐྱིད་ལྷག་པ་ཚེ་རིང་ཚོགས་ཁང་དུ། བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱིས་གསར་འགོད་གསལ་བསྒྲགས་ཤིག་སྤེལ་ཏེ། རྒྱ་ནག་གཞུང་གིས་བོད་ནང་གི་ཁོར་ཡུག་སྔོག་གཏོར་དང་འགྲོ་བ་མིའི་ཐོབ་ཐང་རྡོག་རོལ་གཏོང་བཞིན་པའི་གནས་སྟངས་ཛ་དྲག་ཆགས་ཡོད་སྐོར་བརྗོད་སོང་།
གསར་འགོད་གསལ་བསྒྲགས་ཐོག་སྲིད་སྐྱོང་བློ་བཟང་སེང་གེ་མཆོག་གིས་གསུངས་དོན། ངས་རྒྱུན་པར་རྒྱ་ནག་གཞུང་གིས་བོད་ནང་གི་ཁོར་ཡུག་ཐོག་འཛིན་པའི་སྲིད་ཇུས་དང་ལས་འཆར་ག་འདྲ་ཞིག་ལག་བསྟར་བྱས་ཀྱང་། དང་པོ། ཁོར་ཡུག་གི་ཡུལ་མི་ཚོར་ངོས་མཐུན་ཡོད་པ་དང་། གཉིས་པ། བོད་མིའི་ཆོས་དང་རིག་གཞུང་ལ་གུས་བརྩི་ཆེ་བ། གསུམ་པ། དཔལ་འབྱོར་ཐོག་ནས་མི་མང་ལ་ཁེ་ཕན་ཡོད་པ། བཞི་བ། ཁྲིམས་མཐུན་དང་མི་མང་གི་མོས་མཐུན་ཡོད་པའི་ཐོག་ནས་སྲིད་ཇུས་དང་ལས་འཆར་སྤེལ་དགོས་པ་རེད་ཅེས་ཤོད་སྡོད་ཀྱིན་ཡོད། དོན་ཚན་བཞི་དེ་གཞིར་བཞག་པའི་ཐོག་ནས་ཉེ་ལམ་མི་ཉག་ལྷ་སྒང་གར་རྒྱས་ཁར་བྱུང་བའི་དཀའ་རྙོག་དང་། ད་ཆར་མདོ་སྨད་བླ་བྲང་ཨ་མཆོག་ཡུལ་དུ་བྱུང་བའི་གནད་དོན་་དེ་དག་རྒྱ་ནག་གཞུང་ནས་མི་མང་གི་མངོན་འདོད་བརྩིས་མེད་བཏང་སྟེ་གཏེར་ཁ་སྔོག་པ་ཞིག་ཡིན་སྟབས་མི་མང་གིས་ངོ་རྒོལ་བྱེད་ཀྱིན་ཡོད་པ་རེད། དང་པོ་དེ་ཁོར་ཡུག་རྒྱུན་གནས་ཐུབ་པ་ཞིག་དགོས་པ་རེད། དེ་མེད་པའི་ཐོག་ནས་གཏེར་ཁ་སྔོག་སྟངས་དང་རྫས་ལུད་བེད་སྤྱོད་སྟངས་གང་ཅིའི་ཐད་ནས་འཕྲལ་ཕུགས་རྒྱང་གསུམ་ལ་གནོད་སྐྱོན་ཆེན་པོ་ཡོད་སྟབས་མི་མང་གིས་ངོ་རྒོལ་བྱེད་ཀྱིན་ཡོད་པ་རེད། གཉིས་པ་དེ་ཆོས་དང་རིག་གཞུང་ལ་གུས་བརྩི་བྱེད་དགོས་པ་གལ་ཆེན་པོ་རེད། བོད་ནང་དུ་ང་ཚོའི་གནས་རི་མང་པོ་ཡོད་པ་རེད། བོད་ནང་དུ་གནས་རི་མང་པོ་ཞེ་དྲགས་ཡོད་པ་དེའི་སྒང་ནས་གཏེར་ཁ་སྔོག་པ་ཡིན་ན། མི་མང་གི་འཚོ་བ་དང་མི་མང་གི་བསམ་བློའི་ནང་ལ་དོ་ཕོག་ཆེན་པོ་འགྲོ་གི་ཡོད་པ་རེད། དཔལ་འབྱོར་ཐོག་ཡིན་ནའང་ས་གནས་མི་མང་ལ་ཕན་པ་ཞིག་ཡོང་དགོས་ཀྱི་ཡོད་པ་རེད། ད་ལྟའི་བར་དུ་བོད་ནང་དུ་གཏེར་ཁ་བསྔོགས་པ་དང་ཤིང་ནགས་བཅད་པ། ཆུ་རགས་བརྒྱབ་པ་གང་ཞིག་ཡིན་ཡང་ས་གནས་མི་མང་ལ་དཔལ་འབྱོར་ཐོག་ནས་ཁེ་ཕན་ཡོད་པ་ཕར་ཞོག རྒྱ་ནག་གི་གཏེར་ཁ་འདོན་ཚན་པ་དང་རྒྱ་ནག་གི་ཚོང་པ་ཚོས་གཏེར་ཁ་སྔོག་པ་དང་ཤིང་ནགས་གཅོད་སྐབས་རྫས་རིགས་འདྲ་མིན་བེད་སྤྱོད་བཏང་སྟེ་ས་གཞི་འཕྲོ་བརླག་ཏུ་གཏོང་གི་ཡོད། སྤྱིར་བཏང་གཏེར་ཁ་སྔོག་པ་ཡིན་ན་དཔལ་འབྱོར་ཐོག་ནས་ས་གནས་མི་མང་ལ་ཁེ་ཕན་ངེས་པར་དུ་འཐོབ་དགོས་ཀྱང་། ད་ལྟའི་ཆར་ཁེ་ཕན་གང་ཡང་རེག་གི་མེད་པར་མི་མང་གི་འཚོ་བར་གནོད་སྐྱོན་ཆེན་པོ་ཕོག་གི་ཡོད་པ་རེད། གོང་ཞུས་དོན་ཚན་བཞི་དེ་དག་ལག་ལེན་མ་བསྟར་བའི་ཐོག་ནས་གཏེར་ཁ་སྔོག་ཡོང་དུས་བླ་བྲང་ཨ་མཆོག་གི་མི་མང་གིས་རང་བཞིན་གྱིས་ངོ་རྒོལ་བྱེད་ཀྱིན་ཡོད་པ་རེད། རྒྱ་ནག་གཞུང་གིས་ཁྲིམས་དང་མཐུན་པ། ཡ་རབས་བཟང་སྤྱོད་དང་མཐུན་པའི་ཐོག་ནས་འགྲེལ་བཤད་རྒྱག་རྒྱུ་མེད་སྟབས་ངོ་རྒོལ་བ་ཚོར་མ་ཉེས་ཁ་གཡོག་བྱེད་ཀྱི་ཡོད་པ་རེད། ཉེ་ཆར་ས་གནས་ཀྱི་གསར་འགོད་གསལ་བསྒྲགས་ཤིག་གི་ནང་ག་རེ་འཁོད་འདུག་ཟེར་ན། ཕྱི་ནང་ལག་པ་མཉམ་འབྲེལ་བྱས་ཏེ་མི་མང་གིས་ངོ་རྒོལ་བྱེད་ཀྱི་འདུག་ཅེས་འཁོད་འདུག བོད་མིའི་སྒྲིག་འཛུགས་དང་ལག་འབྲེལ་མེད་པ་བཤད་མ་དགོས་པ་རེད། ད་ལྟའི་བར་བོད་ནང་དུ་ངོ་རྒོལ་དེ་འདྲ་མང་པོ་ཞིག་བྱུང་བ་རེད། དེ་ཚང་མ་རྒྱ་གཞུང་གིས་བོད་ནང་བོད་མི་ཚོར་མནར་གཅོད་དང་གདུག་རྩུབ། དབྱེ་འབྱེད་བྱས་པར་བརྟེན་ནས་བྱུང་བ་གསལ་བོ་རེད། བོད་མི་ཚོའི་བདེ་སྡུག་ལ་ལྟ་རྒྱུ་དང་བོད་མི་ཚོའི་མངོན་འདོད་བསྒྲུབ་རྒྱུའི་འགན་དེ་བོད་མིའི་སྒྲིག་འཛུགས་ལ་ཡོད་པ་རེད། འོན་ཀྱང་རྒྱ་གཞུང་གིས་མ་ཉེས་ཁ་གཡོག་གི་ཐོག་ནས་སྐྱོན་བརྗོད་བྱེད་ཀྱིན་ཡོད་པ་རེད། ཅེས་གསུངས་སོང་།
ཁོང་གིས་མུ་མཐུད་དུ་གསུངས་དོན། ད་ཆར་རྒྱ་ནག་གཞུང་གིས་བླ་བྲང་ཨ་མཆོག་གི་ཡུལ་མི་གཉིས་ལ་རྡུང་རྡེག་བཏང་སྟེ་སྨན་ཁང་དུ་བསྐྱལ་ཡོད་པ་དང་། ཡུལ་མི་ཁ་ཤས་འཛིན་བཟུང་བྱས་པའི་གནས་ཚུལ་ཐོན་ཡོད་པ་དེ་དག་ཁོར་ཡུག་གི་ཁྲིམས་སྒྲིག་གཞི་དང་འགལ་ཡོད་པ་མ་ཟད། འགྲོ་བ་མིའི་གཞི་རྩའི་ཐོབ་ཐང་དང་འགལ་ཡོད་ལ། རྒྱལ་སྤྱིའི་ཁྲིམས་དང་འགལ་བ། རྒྱ་ནག་གི་རྩ་ཁྲིམས་ལའང་འགལ་ཡོད་སྟབས། དེ་ལ་མཐའ་གཅིག་ཏུ་ངོ་རྒོལ་བྱེད་ཀྱིན་ཡོད། རྒྱ་ནག་གཞུང་གིས་ཉེ་ཆར་མི་ཉག་ཏུ་བྱུང་བའི་གསར་འགོད་གསལ་བསྒྲགས་ནང་ག་རེ་འཁོད་འདུག་ཟེར་ན། མི་མང་གིས་ངོ་རྒོལ་བྱས་པ་དེར་ཞིབ་འཇུག་བྱས་སྐབས་ཁོར་ཡུག་ལ་གནོད་སྐྱོན་ཡོད་པ་དང་། མི་མང་གི་མོས་མཐུན་མེད་པའི་བསམ་ཚུལ་ལ་བརྟེན་ནས་གནས་སྐབས་སུ་གཏེར་ཁ་སྔོག་རྒྱུ་མཚམས་འཇོག་རྒྱུ་ཡིན་ཞེས་འཁོད་འདུག གནས་སྐབས་རིང་ཞེས་འཕྲལ་སེལ་ཞིག་ཆགས་ཡོད་སྟབས། དེའི་རྗེས་ལ་ག་རེ་བྱེད་མིན་ཧ་གོ་ཡི་ཡོད་པ་མ་རེད། བླ་བྲང་ཨ་མཆོག་ཏུ་བྱུང་བའི་གནས་སྟངས་ཐད་ནས་ཡིན་ནའང་། ཁོར་ཡུག་ལ་མི་གནོད་པ་དང་མི་མང་གི་མོས་མཐུན་དགོས་པ། ཁྲིམས་མཐུན་དགོས་པ་སོགས་གལ་ཆེན་པོ་ཡིན་པ་དེ་རྒྱ་ནག་གཞུང་གིས་ངོས་ཟིན་པའི་ཐོག་ནས་ལག་ལེན་བསྟར་བའི་རེ་བ་ཞུ་རྒྱུ་ཡིན། མ་ཉེས་ཁ་གཡོག་རིགས་ལ་རྩ་བ་ནས་མོས་མཐུན་མེད། རང་ལུས་མེར་བསྲེགས་གཏོང་མཁན་བོད་མི་གཉིས་ཀྱིས་ཆེད་མངགས་གཏེར་འདོན་སྔོན་འགོག་ཆེད་དུ་རང་ལུས་མེར་བསྲེགས་བཏང་གནང་ཡོད་པ་དང་། ཁོང་གཉིས་ཀྱི་ཁ་ཆེམས་ནང་དུའང་བོད་ནང་གི་གཏེར་རི་སྔོག་གཏོར་དང་འབྲེལ་བའི་ཐོག་ནས་ཡིན་ཞེས་གསལ་བོར་འཁོད་ཡོད་པ་རེད། དེ་དག་རྒྱ་ནག་གཞུང་གིས་མཁྱེན་དགོས་པ་གལ་ཆེན་པ་རེད། ཅེས་གསུངས་སོང་།
ཕྱི་དྲིལ་ཁོར་ཡུག་ཚན་པའི་འགན་འཛིན་བསྟན་པ་རྒྱལ་མཚན་ལགས་ཀྱིས་ ༢༠༠༩ ལོ་ནས་ད་ལྟའི་བར་དུ་བོད་ནང་གི་གཏེར་རི་སྔོག་གཏོར་དང་འབྲེལ་བའི་ཞི་བའི་ངོ་རྒོལ་ཐེངས་ ༣༠ ལྷག་བྱུང་འདུག་ལ། དམིགས་བསལ་ད་ལོར་གཏེར་རི་སྔོག་གཏོར་མི་ཆོག་པའི་ཞི་བའི་ངོ་རྒོལ་ལས་འགུལ་མང་པོ་བྱུང་འདུག ཉེ་ལམ་མི་ཉག་ལྷ་སྒང་གར་རྒྱས་ཁ་རུ་རྒྱ་ནག་གཞུང་གི་ཆེད་མངགས་གཏེར་འདོན་ཚན་པས་གཏེར་ཁ་སྔོག་སྐབས་རྒྱུག་ཆུའི་ནང་རྫས་འགྱུར་བླུགས་པའི་རྐྱེན་གྱིས། ཆུ་ནང་གི་ཉ་རིགས་མང་པོ་ཤི་བ་དང་། ས་གནས་བོད་མི་བརྒྱ་ཕྲག་མང་པོ་འདུ་འཛོམས་ཀྱིས་ཉིན་གཉིས་རིང་ཞི་བའི་ངོ་རྒོལ་བྱས་པར་བརྟེན་ནས་ས་གནས་སྲིད་གཞུང་དང་ས་གནས་རང་སྐྱོང་ཁུལ་ནས་གསལ་བསྒྲགས་ཤིག་སྤེལ་ཏེ། ཁོར་ཡུག་ལ་དོ་ཕོག་ཡོང་གི་ཡོད་སྟབས་གནས་སྐབས་སུ་གཏེར་ཁ་སྔོག་འདོན་མཚམས་འཇོག་བྱས་ཡོད་ཀྱང་། དེ་རྒྱ་ནག་གཞུང་གིས་དངོས་གནས་ཁོར་ཡུག་སྲུང་སྐྱོབ་དང་མི་མང་ལ་ཕན་པའི་ལས་ཀ་ཞིག་ཡིན་མིན་དོགས་པ་ཡོད། རྒྱུ་མཚན་ནི། གནས་ཚུལ་དེ་དང་གཅིག་མཚུངས་མང་པོ་ཞིག་ཕྱི་ལོ་ ༢༠༡༡ དང་ ༢༠༡༣ ནང་བྱུང་ཡོད་ནའང་། དེ་དོན་ལ་རྒྱ་ནག་གཞུང་གིས་ཡ་ལན་གང་ཡང་སྤྲད་མེད་པ་རེད། ད་ལྟའི་ཛ་དྲགས་ཀྱི་གནས་སྟངས་ཤིག་ནི་མདོ་སྨད་བླ་བྲང་ཨ་མཆོག་ནས་མི་མང་གི་གཏེར་རི་སྔོག་གཏོར་མི་ཆོག་པའི་ཞི་བའི་ལས་འགུལ་ཉིན་དགུ་རིང་སྤེལ་བ་དང་། ད་དུང་མུ་མཐུད་ནས་སྤེལ་བཞིན་ཡོད་སྟབས། རྒྱ་གཞུང་གིས་ས་གནས་བོད་མི་ཚོར་ཕན་པའི་བརྡ་ལན་ཞིག་སྤྲོད་ཀྱི་མེད་པ་ཧ་ཅང་གསལ་བོ་རེད། ཅེས་བརྗོད་སོང་།
གསར་འགོད་པ། པདྨ་རྒྱལ།
